১. পারাজিকনিদ্দেসো

১. সং নিমিত্তং পৰেসন্তো, ভিক্খু মগ্গত্তযে চুতো;

পৰেসনট্ঠিতুদ্ধার-পৰিট্ঠে চেপি সাদিযং.

২. অদিন্নং মানুসং ভণ্ডং, থেয্যাযেকেন আদিযং;

পঞ্চৰীসাৰহারেসু, গরুকং চে চুতো ভৰে.

৩. আদিযন্তো হরন্তোৰ-হরন্তোপিরিযাপথং;

ৰিকোপেন্তো তথা ঠানা, চাৰেন্তোপি পরাজিকো.

৪. তত্থ নানেকভণ্ডানং, পঞ্চকানং ৰসা পন;

অৰহারা দসঞ্চেতি, ৰিঞ্ঞাতব্বা ৰিভাৰিনা.

৫. সাহত্থাণত্তিকো চেৰ, নিস্সগ্গো চাত্থসাধকো;

ধুরনিক্খেপনঞ্চেৰ, ইদং সাহত্থপঞ্চকং.

৬. পুব্বসহপ্পযোগো চ, সংৰিধাহরণম্পি চ;

সঙ্কেতকম্মং নিমিত্তং, পুব্বপ্পযোগপঞ্চকং.

৭. থেয্যাপসয্হপরিকপ্প-প্পটিচ্ছন্নকুসাদিকা;

অৰহারা ইমে পঞ্চ, ৰিঞ্ঞাতব্বা ৰিভাৰিনা.

৮. মনুস্সপাণং পাণোতি, জানং ৰধকচেতসা;

জীৰিতা যো ৰিযোজেতি, সাসনা সো পরাজিতো.

৯. ঝানাদিভেদং হদযে অসন্তং,

অঞ্ঞপদেসঞ্চ ৰিনাধিমানং;

মনুস্সজাতিস্স ৰদেয্য ভিক্খু,

ঞাতক্খণে তেন পরাজিকো ভৰেতি.