৩৫. পরিক্খারনিদ্দেসৰণ্ণনা

২৫৯-৬০. ছত্তে অন্তো বহি চ পঞ্চৰণ্ণেহি সুত্তেহি সিব্বিতুঞ্চ পণ্ণে গিরিকূটঅড্ঢচন্দাদিং ছিন্দিতুঞ্চ ন ৰট্টতীতি সম্বন্ধো. ছত্তেতি তালপণ্ণে ছত্তে. গিরিকূটং নাম মকরদন্তকং, আদি-সদ্দেন তাদিসং অঞ্ঞং ৰিকাররূপং সঙ্গহিতং. ঘটকন্তি গেহত্থম্ভেসু ৰিয কযিরমানং ঘটকং. দণ্ডেতি ছত্তদণ্ডে. লেখাতি তহিং তহিং দিন্না লেখা. সাদিসন্তি দীঘেন নিদ্দিট্ঠং. বুন্দম্হি মূলে.

২৬১. থিরত্থং ছত্তে একৰণ্ণেন সিব্বিতুং ৰা পঞ্জরং ৰিনন্ধিতুং ৰা ৰট্টতীতি সম্বন্ধো. সিব্বিতুন্তি অন্তো বহি চ সিব্বিতুং. একৰণ্ণেনাতি নীলাদিনা একৰণ্ণেন. পঞ্জরন্তি ছত্তদণ্ডগাহকসলাকপঞ্জরং. থিরত্থন্তি ইমিনা ন ৰণ্ণমট্ঠত্থাযাতি দস্সেতি. বন্ধিতুং দণ্ডে লেখা ৰট্টতীতি সম্বন্ধো. বন্ধিতুন্তি ৰাতপ্পহারেন অচলনত্থং ছত্তমণ্ডলিকং রজ্জুকেহি গহেত্ৰা বন্ধনত্থায. লেখাৰাতি ৰলযমিৰ উক্কিরিত্ৰা কতা লেখা এৰ. ৰট্টতীতি যদিপি ন বন্ধতি, রজ্জুকেহি বন্ধিতুং যুত্তট্ঠানত্তা ৰট্টতি.

২৬২. চীৰরে অন্তে ৰাপি পট্টমুখে ৰাপি ৰেণিপি ৰা সঙ্খলিকাপি ৰা অঞ্ঞং সূচিৰিকারং ৰা পাল়িকণ্ণিকআদিকং কপ্পবিন্দুৰিকারম্পি ৰা ন চ কপ্পতীতি সম্বন্ধো. অন্তেতি চীৰরপরিযন্তে, অনুৰাতেতি ৰুত্তং হোতি. পট্টমুখেতি পট্টকোটিযং, দ্ৰিন্নং পট্টানং সঙ্ঘটিতট্ঠানং সন্ধাযেতং ৰুত্তং. ৰেণীতি ৰরকসীসাকারেন সিব্বনং. সঙ্খলিকাতি বিল়ালবন্ধনাকারেন সিব্বনং. অঞ্ঞং সূচিৰিকারং ৰাতি চীৰরমণ্ডনত্থায কযিরমানং অঞ্ঞং যং কিঞ্চি সূচিকম্মৰিকারং ৰা. টীকাযং পন ‘‘সতপদিসদিসং অঞ্ঞং ৰা সূচিৰিকারং ন কপ্পতী’’তি সামঞ্ঞেন ৰুত্তং. ‘‘চীৰরমণ্ডনত্থায নানাসুত্তকেহি সতপদিসদিসং সিব্বন্তা আগন্তুকপট্টং ঠপেন্তি, অঞ্ঞম্পি যং কিঞ্চি সূচিকম্মৰিকারং করোন্তি, সব্বং ন ৰট্টতী’’তি অট্ঠকথাযং ৰুত্তত্তা পন নানাৰণ্ণেহি ৰা হোতু, একৰণ্ণেন ৰা হোতু, চীৰরমণ্ডনত্থায সংসিব্বন্তানং সূচিকম্মৰিকারং সন্ধায ৰুত্তন্তি চীৰরেসু ফালিতট্ঠানস্স থিরভাৰত্থং সতপদিসদিসম্পি সিব্বিতুং ৰট্টতীতি অম্হাকং খন্তি. পাল়ি-সদ্দেন, কণ্ণিক-সদ্দেন চ কপ্প-সদ্দলোপেন ৰা উপচারেন ৰা পাল়িকপ্পাদযোৰ গহিতা. পাল়ি চ কণ্ণিকা চ পাল়িকণ্ণিকাযো, তা আদি যস্স অঞ্ঞস্স তাদিসস্সাতি ৰিগ্গহো. তত্থ নীলাৰল়িআদিসণ্ঠানায বিন্দুপন্তিযা যথা সোভতি, তথা কযিরমানো পাল়িকপ্পো. তথেৰ বিন্দুসমূহে কত্থচি দস্সেত্ৰা কযিরমানো কণ্ণিককপ্পো.

২৬৩. গণ্ঠিপাসকপট্টাতি গণ্ঠিনো চ পাসকস্স চ পতিট্ঠানট্ঠানে ঠপেতব্বা পট্টা. ৰট্টতীতি এত্থ ‘‘গণ্ঠিপাসকা’’তি কত্ৰা ‘‘চতুকোণাৰ ৰট্টন্তী’’তি অত্থতো ৰচনং ৰিপল্লাসেত্ৰা যোজেতব্বং. অগ্ঘিযন্তি চেতিযসণ্ঠানেন সিব্বনং. মূলে চ অগ্গে চ একসদিসং কত্ৰা মুগ্গরাকারেন সিব্বনং মুগ্গরো. ৰিকারন্তি ৰিকারো, লিঙ্গৰিপল্লাসেন ৰুত্তং. এত্থাতি গণ্ঠিপাসকপট্টেসু.

২৬৪. কোণসুত্তাতি নপুংসকনিদ্দেসো, গণ্ঠিপাসকপট্টানং কোণেহি নীহটসুত্তকোটিযো. পীল়কাতি তানিযেৰ নিৰত্তেত্ৰা পীল়কাকারেন কতানি. দুৰিঞ্ঞেয্যাৰাতি তেসং অন্তেসু একৰারং গণ্ঠিকরণেন ৰা পুন নিৰত্তেত্ৰা সিব্বনেন ৰা দুৰিঞ্ঞেয্যা এৰ. গন্ধং তেলং ৰাতি গন্ধং ৰা তেলং ৰা. কঞ্চিকপিট্ঠখলিকআদীনিপি ৰট্টন্তি.

২৬৫. মণিনাতি মসারগল্লাদিপাসাণেন. ন চ ঘট্টেয্যাতি নেৰ ঘট্টেয্য. অঞ্ঞেন ৰাতি মুগ্গরমুসলাদিনা. অংসবদ্ধককাযবন্ধনানি পন তথা কাতুং ৰট্টতি. দোণিযং কত্ৰা ন চ ঘংসেয্যাতি পক্করজনাকিরণদোণিযং ঠপেত্ৰা ভূমিযং জণ্ণুকানি নিহন্ত্ৰা ইতো চিতো চ আৰিজ্ঝিত্ৰা নেৰ ঘংসেয্যাতি অত্থো.

২৬৬-৭. কণ্ণকোণকসুত্তানীতি চীৰররজনকালে লগ্গনত্থায অনুৰাতে চতূসু কোণেসু চ পাসকং কত্ৰা বন্ধিতানি সুত্তানি, যানি ‘‘অনুজানামি, ভিক্খৰে, কণ্ণসুত্তক’’ন্তি (মহাৰ. ৩৪৪) এৰং অনুঞ্ঞাতানি. কণ্ণসঙ্খাতা কোণা কণ্ণকোণকা, তেসু সুত্তানি. গণ্ঠিকপাসকপট্টেসু পন কণ্ণকোণকসুত্তানং দুৰিঞ্ঞেয্যানমেৰ কপ্পিযতা হেট্ঠা ৰুত্তাতি চীৰরে রত্তেযেৰ তেসং ছিন্দিতব্বতা নত্থি, কণ্ণকোণকসুত্তানং ছিন্দিতব্বতায ৰুত্তত্তা অনুৰাতেহি নিক্খমিতসুত্তানিপি ছিন্দিতব্বানীতি ৰেদিতব্বং. ধম্মকরণে ছত্তৰট্টিযং লেখং ঠপেত্ৰা লেখা ন ৰট্টতীতি যোজনা. ছত্তৰট্টিযন্তি ছত্তস্স মুখৰট্টিযং. লেখাতি উপরি ৰা হেট্ঠা ৰা কুচ্ছিযং ৰা অঞ্ঞা লেখা. কুঞ্চিকায চ পিপ্ফলে চ মণিকা চ পীল়কা চ ন ৰট্টন্তীতি সম্বন্ধো. মণিকাতি একা ৰট্টমণি. পীল়কাতি সাসপমত্তিকা মুত্তরাজিসদিসা বহুৰট্টলেখা. দণ্ডম্হীতি পিপ্ফলদণ্ডকে.

২৬৮-৯. অরণিযং মালাদি চ পত্তমণ্ডলে ভিত্তিকম্মঞ্চ ন ৰট্টতীতি সম্বন্ধিতব্বং. অরণিযন্তি উত্তরারণি অধরারণি অরণিধনুকঞ্চ সামঞ্ঞেন গহিতং. পত্তমণ্ডলেতি তিপুসীসাদিমযে পত্তমণ্ডলে. এত্থ পন মকরদণ্ডকং ৰট্টতি. হেট্ঠাতি কত্তরযট্ঠিযা হেট্ঠা. উদ্ধন্তি তস্সাযেৰ উপরি.

২৭০-৩. সম্মুঞ্জনিম্হীতি সম্মুঞ্জনিযা লিঙ্গৰিপল্লাসো. অৰারিতন্তি ইত্থিরূপং পন ৰারিতং. সোৰণ্ণমযম্পীতি সুৰণ্ণমযম্পি. ৰিসাণনাল়ি নাম ৰিসাণমযা নাল়ি. এত্থ পন অৰুত্তানিপি যানি কানিচি আরকণ্ডকদন্তকট্ঠছেদনপানীযঘটপানীযউল়ুঙ্কচুণ্ণভাজনাদীনি ৰুত্তানং অনুলোমানীতি ৰেদিতব্বানি. যো পনেত্থ ৰিনযঞ্ঞূ তাদিসং পরিক্খারং দিস্ৰা ছিন্দেয্য ৰা ছিন্দাপেয্য ৰা, অনুপৰজ্জো সোতি ৰেদিতব্বন্তি.

পরিক্খারনিদ্দেসৰণ্ণনা নিট্ঠিতা.