২৮. কম্মনিদ্দেসৰণ্ণনা

১৯৯. ৰগ্গেন অধম্মকম্মঞ্চ সমগ্গেন অধম্মকম্মঞ্চ ৰগ্গেন ধম্মকম্মঞ্চ সমগ্গেন ধম্মকম্মঞ্চাতি চত্তারি কম্মানি হোন্তীতি সেসো. তত্থ ৰগ্গেন অধম্মকম্মন্তি ৰগ্গেন সঙ্ঘেন করণীযং অধম্মকম্মং. এস নযো সব্বত্থ. ৰগ্গোতি চ সমূহো ৰুচ্চতি, সো চ চতুৰগ্গাদিকরণীযাদীসু যাৰতিকানং কম্মপ্পত্তানং অসম্মুখীভাৰেন, ছন্দারহানং ছন্দানাহরণেন, সম্মুখীভূতানঞ্চ পটিক্কোসনেন, তেসু একেনাপি ৰা ইধ অধিপ্পেতো. অধম্মকম্মন্তি এত্থ পন ধম্মো নাম ‘‘উত্তিদুতিযে চে, ভিক্খৰে, কম্মে একায উত্তিযা কম্মং করোতি, ন চ কম্মৰাচং অনুস্সাৰেতি, অধম্মকম্ম’’ন্তিআদিনা (মহাৰ. ৩৮৭) একাযেৰ ঞত্তিযা, তথা দ্ৰীহি ঞত্তীহি একাযেৰ ৰা কম্মৰাচায, তথা দ্ৰীহি কম্মৰাচাহীতি আগতায চ তথা হাপনঅঞ্ঞথাকরণভাৰেন ঞত্তিকম্মং ঠপেত্ৰা ঞত্তিচতুত্থে চ কম্মে আগতায চ অকম্মারহস্স তজ্জনীযপব্বাজনীযপটিসারণীযনিযস্সতিৰিধউক্খেপনীযানং সত্তন্নং কম্মানং করণৰসেন, কম্মারহস্স চ ৰিরাধেত্ৰা করণৰসেন আগতায চ পাল়িযা ৰিপরীতা চ পাল়ি, উপসম্পদাদিকম্মৰসেন আগতা চ পাল়ি, সম্মুখাৰিনযসতিৰিনযঅমূল়্হৰিনযপটিঞ্ঞাকরণযেভুয্যসিকাতস্সপাপি- যসিকাতিণৰত্থারকসঙ্খাতানং সত্তন্নং কম্মানং যথালাভকরণৰসেন আগতা চ পাল়ি, তেন করণীযং অপলোকনঞত্তিঞত্তিদুতিযঞত্তিচতুত্থসঙ্খাতং চতুব্বিধং কম্মং ধম্মকম্মং, তপ্পটিপক্খং অধম্মকম্মং. তব্বিপরিযাযেন সমগ্গো ধম্মকম্মঞ্চ ৰেদিতব্বং. ধম্মো যথাৰুত্তা পাল়ি অস্স অত্থি, ধম্মেন কতং ৰাতি ধম্মিকং. তব্বিপরীতং অধম্মিকং. চতুত্থংযেৰাতি তেসু চতূসু কম্মেসু চতুন্নং পূরণং সমগ্গেন ধম্মিকং. সেসকম্মানং ভাৰেন ভিক্খুনা দুক্কটস্স ভৰনং লক্খীযতীতি সেসকম্মেসূতি ভাৰলক্খণে সত্তমী. দুক্কটন্তি কুপ্পানং অধম্মকম্মৰগ্গকম্মানং কতত্তা দুক্কটং.

২০০. ইদানি যদিদং সমগ্গেন ধম্মিকং নাম, তং যেহি সঙ্ঘেহি কাতব্বং, তেসং পভেদং দস্সেতুং ‘‘চতুৰগ্গো’’তিআদিমাহ. চত্ৰাদীনং সঙ্খ্যেযৰুত্তিত্তা চতুন্নং ৰগ্গোতিআদিনা ৰিগ্গহো. দসৰীসতিৰগ্গিকোতি দসন্নং ৰীসতিযা চ ৰগ্গভেদৰসেন দসৰীসতীনং ৰগ্গোতি ৰিগ্গহো, ণিকো সকত্থে. ৰীসতিযা ৰগ্গো, অতিরেকেন সহিতো ৰীসতিৰগ্গোতি ৰিগ্গহো.

২০১-২. পঞ্চন্নং কম্মানং নিযমেতি ‘‘চতূ’’তিআদিনা. অব্ভানং উপসম্পদং পৰারণং ঠপেত্ৰা চতুৰগ্গো চাতিআদিনা যোজেত্ৰা সব্বকম্মেসু কম্মপ্পত্তোতি দীপিতোতি যোজেতব্বং. তত্থ তত্থ চ-সদ্দো চতুৰগ্গাদযো কম্মপত্তিকিরিযাযং সমুচ্চিনোতি. ইধ পন সব্ব-সদ্দো অব্ভানাদীনং কেসঞ্চি ঠপিতত্তা পদেসসব্বে গয্হতি. কম্মপত্তোতি কম্মস্স পত্তো যুত্তো অনুরূপো. ইতরোতি ৰীসতিৰগ্গো অতিরেকৰীসতিৰগ্গো. সব্বকম্মেসূতি এত্থ পন সব্ব-সদ্দো সব্বসব্বে. ননু চ ৰীসতিৰগ্গস্স কম্মপ্পত্তভাৰেসতি অতিরেকৰীসতিৰগ্গস্স পগেৰাতি ৰিঞ্ঞাযতি. তথা সতি সো কস্মা ৰুত্তোতি? সচ্চং, তথাপি সো চতুৰগ্গাদিনা সঙ্ঘেন কত্তব্বকম্মং ঊনকতরেন ন ৰট্টতি, অতিরেকেন পন ৰট্টতীতি ঞাপনত্থং ৰুত্তো.

২০৩. ইদানি চতুৰগ্গাদিকেন ছন্দাহরণেন পূরেতব্বোতি দস্সেতি ‘‘চতূ’’তিআদিনা. পারাজিকাদিভাৰমনাপন্নত্তা পকতিযা সভাৰেনেৰ ঠিতো অত্তা যেসং, পকতো ৰা ততোযেৰ কম্মেসু অৰিগতো অত্তা যেসং তেতি পকতত্তকা, পারাজিকউক্খিত্তকলদ্ধিনানাসংৰাসকেহি অঞ্ঞে. পরেতি একসীমট্ঠা তাদিসাযেৰ অঞ্ঞে. সেসেপীতি অৰসেসে পঞ্চৰগ্গাদিকরণীযেপি.

২০৪. ইদানি ৰত্থুঞত্তিঅনুস্সাৰনসীমাদিৰিপত্তিতো, কম্মৰিপত্তীসু পরিসতো চ পটিক্কোসতো চ কম্মস্স কুপ্পাকুপ্পভাৰং তত্থ চ আপত্তিআদিং দস্সেতুং ‘‘চতূ’’তিআদি মাহ. চতুৰগ্গাদিকত্তব্বং অসংৰাসগণপূরং ৰা কম্মারহগণপূরং ৰা কম্মঞ্চ গরুকট্ঠগণপূরং ৰা পরিৰাসাদিকম্মঞ্চাতি যোজনা. এত্থ চ কম্মারহো গরুকট্ঠতো অঞ্ঞো, নিক্খিত্তৰত্তো পন গরুকট্ঠো গণপূরকো হোতিযেৰ. কতন্তি চতুৰগ্গাদিনা কতং.

২০৫. ৰারেয্যাতি অন্তরাযে অসতি অন্তমসো একোপি ৰারেয্যাতি অত্থো. অন্তরাযেতি পাপেহি করিযমানে জীৰিতব্রহ্মচরিযন্তরাযে সতি. অনন্তরাযিকা চে ন ৰারেন্তি, দুক্কটং. দিট্ঠাৰিন্তি অত্তনো অত্তনো দিট্ঠিং লদ্ধিং ‘‘অধম্মকম্মং ইদং, ন মেতং খমতী’’তি অঞ্ঞমঞ্ঞং আৰি করেয্যুন্তি সেসো. একোধিট্ঠানন্তি একো ভিক্খু ‘‘ন মেতং খমতী’’তি অধিট্ঠানং করেয্যাতি সেসো. ততোধিকাতি তীহি অধিকা. তে পন সঙ্ঘত্তা পহোন্তি অত্তনো কম্মং নিত্থরিতুং.

২০৬. খিত্তচিত্তো নাম উম্মত্তকো. দুখট্টিতোতি ৰেদনট্টো. ন রূহতীতি গয্হত্তং ন রোহতীতি অত্থো.

২০৭. অন্তমসো অনন্তরস্সাপি আরোচেন্তস্স পকত…পে… ভিক্খুনোতি সম্বন্ধো. একসীমাযং তিট্ঠতীতি একসীমট্ঠো. সমো সংৰাসো অস্সাতি সমসংৰাসো. একসীমট্ঠো চ সো সমসংৰাসো চ, পকতত্তো চ সো একসীমট্ঠসমসংৰাসো চ, সো চাযং ভিক্খু চাতি সব্বত্থ কম্মধারযো, তস্স. এত্থ পন অৰিপন্নসীলো পকতত্তোতি অধিপ্পেতো. আরোচেন্তস্সাতি অত্তনো লদ্ধিং পকাসেন্তস্স. রূহতীতি পটিক্খেপো রুহতি.

২০৮. ধম্মিকং কম্মন্তি ধম্মেন কত্তব্বং অপলোকনাদিকম্মং. পটিক্কোসেয্যাতি নিৰারেয্য. তিরোক্খা কাযসামগ্গিং ৰা ছন্দং ৰাতি ৰা-সদ্দং নেত্ৰা অত্থো নেতব্বো. তিরোক্খাতি পরম্মুখা. সো সম্মুখা-সদ্দো ৰিয নিপাতো, অথ ৰা অক্খা ইন্দ্রিযৰিসযতো তিরো বহীতি অত্থোতি.

কম্মনিদ্দেসৰণ্ণনা নিট্ঠিতা.