১৯. ন্হানকপ্পনিদ্দেসৰণ্ণনা

১৬৮. কপ্পনং কপ্পিযতা কপ্পো, ন্হানে কপ্পো ন্হানকপ্পো. নৰকো থেরানং পুরতো উপরি ৰা ন চ ন্হাযেয্যাতি সম্বন্ধো. ন চাতি নযেৰ. পুরতোতি অভিমুখে. উপরীতি নদিযা উপরি.

১৬৯-১৭১. কুট্টত্থম্ভতরুট্টানে কাযং ন ঘংসযেতি সম্বন্ধো. তত্থ কুট্টং নাম ইট্ঠকদারুসিলাভিত্তি. থম্ভো নাম নহানতিত্থে নিখনিত্ৰা ঠপিতো. তরূতি রুক্খো. অট্টানং নাম তচ্ছেত্ৰা অট্ঠপদাকারেন রাজিযো ছিন্দিত্ৰা নহানতিত্থে নিখাতফলকং. গন্ধব্বহত্থেন ৰা…পে… মল্লকেন ৰা কাযং সরীরেন ৰা অঞ্ঞমঞ্ঞং ন ঘংসযেতি সম্বন্ধো. গন্ধব্বহত্থেনাতি দারুমযহত্থেন. কুরুৰিন্দকসুত্তিযাতি কুরুৰিন্দকপাসাণচুণ্ণানি লাখায বন্ধিত্ৰা কতগুল়িকাৰলিযা সুত্তেন আৰুণিতসুত্তিযা. মল্লকেনাতি মকরদন্তকে ছিন্দিত্ৰা পদুমকণ্ণিকসণ্ঠানেন কতমল্লকেন. সরীরেনাতি অত্তনো কাযেন. অঞ্ঞমঞ্ঞস্স অঞ্ঞমঞ্ঞং কিরিযাকরণসঙ্খাতে কিরিযাব্যভিহারে দ্ৰিত্তং. কপাল…পে… পুথুপাণি চ সব্বেসং ৰট্টতীতি সম্বন্ধো. কপালঞ্চ ইট্ঠকা চ, তাসং খণ্ডানি. পুথুপাণীতি পুথু নানা পাণি পুথুপাণি, হত্থপরিকম্মং রুল়্হীৰসেন. সব্বেসন্তি গিলানাগিলানানং. গিলানস্স অকতমল্লকং ৰট্টতীতি সম্বন্ধো. অকতমল্লকং নাম কতমল্লকৰিপরীতং. ফেণং নাম সমুদ্দফেণন্তি.

ন্হানকপ্পনিদ্দেসৰণ্ণনা নিট্ঠিতা.