৩৯. ৰস্সূপনাযিকনিদ্দেসৰণ্ণনা

৩০৯-৩১০. ইদানি ৰস্সূপগমনং দস্সেতুং ‘‘পুরিমিকা’’তিআদিমাহ. তত্থ পুরিমিকা পচ্ছিমিকা (মহাৰ. ১৮৪; মহাৰ. অট্ঠ. ১৮৫) চেতি দ্ৰে ৰস্সূপনাযিকাতি অত্থো. আলযপরিগ্গাহো ৰা ৰচীভেদো ৰা ৰস্সূপনাযিকাতি পাঠসেসো. ইদানি ৰত্তব্বং সন্ধায ‘‘এদিসো’’তি ৰুত্তং. ‘‘ইধ ৰস্সং ৰসিস্সামী’’তি চিত্তুপ্পাদেত্থ আলযো (মহাৰ. অট্ঠ. ২০৩). আলযপরিগ্গাহো পন ৰজে ৰা সত্থে ৰা নাৰায ৰা ৰস্সং উপগন্তুকামস্স তত্থ সেনাসনং অলভন্তস্স লব্ভতি, সত্থাদীসু পন ৰস্সং উপগন্তুং ন ৰট্টতীতি কত্ৰা. যদি সত্থাদীসু কৰাটবন্ধং সেনাসনং লব্ভতি, তত্থ উপগন্তব্বং. উপগচ্ছন্তেন চ ‘‘ইধ ৰস্সং উপেমী’’তি তিক্খত্তুং ৰত্তব্বং. ৰিহারে পন ৰচীভেদো ৰা কাতব্বো. সচে ‘‘ইধ ৰস্সং ৰসিস্সামী’’তি আলযো অত্থি, অসতিযা পন ৰস্সং ন উপেতি, ছিন্নৰস্সো ন হোতি, পৰারেতুঞ্চ লভতি এৰ.

৩১১. নোপেতুকামো আৰাসং, তদহূতিক্কমেয্য ৰাতি পাঠে (মহাৰ. ১৮৬) অতিক্কমন্তস্স আৰাসং তদহু ৰস্সূপনাযিকাতিপি অত্থো. আৰাসং অতিক্কমেয্য ৰাতি সম্বন্ধো. জানং ৰানুপগচ্ছতোতি এত্থ ৰিহারে নিসীদিত্ৰাপি অনুপগচ্ছতো দুক্কটাপত্তি হোতীতি অধিপ্পাযো.

৩১২. ছিন্নৰস্সো (ৰজির. টী. মহাৰগ্গ ২০৮) ৰা কেনচি অন্তরাযেন পঠমং অনুপগতো (মহাৰ. ১৮৫-১৮৬) ৰা দুতিযং উপগচ্ছেয্যাতি সম্বন্ধো. তেমাসন্তি পুরিমং ৰা তেমাসং পচ্ছিমং ৰা তেমাসং. ‘‘ন ভিক্খৰে ৰস্সং উপগন্ত্ৰা পুরিমং ৰা পচ্ছিমং ৰা তেমাসং অৰসিত্ৰা চারিকা পক্কমিতব্বা. যো পক্কমেয্য, আপত্তি দুক্কটস্সা’’তি (মহাৰ. ১৮৫) হি ৰুত্তং.

৩১৩-৫. ‘‘অনুজানামি, ভিক্খৰে, সত্তন্নং সত্তাহকরণীযেন অপ্পহিতেপি গন্তুং, পগেৰ পহিতে, ‘ভিক্খুস্স ভিক্খুনিযা সিক্খমানায সামণেরস্স সামণেরিযা মাতুযা চ পিতুস্স চ, গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা উপট্ঠহিস্সামি ৰা’তি সত্তাহং সন্নিৰত্তো কাতব্বো’’তি (মহাৰ. ১৯৮) ৰুত্তত্তা ‘‘মাতাপিতূনমত্থায…পে… উপট্ঠিস্স’’ন্তি ৰুত্তং. তত্থাযং সঙ্খেপো – ‘‘মাতাদীনং গিলানভত্তং ৰা তদুপট্ঠাকভত্তং ৰা গিলানানং ওসধং ৰা এসিস্সং পরিযেসিস্স’’ন্তি ৰা ‘‘তে গিলানে গন্ত্ৰা পুচ্ছিস্সামী’’তি ৰা ‘‘উপট্ঠিস্স’’ন্তি ৰা পহিতেপি অপ্পহিতেপি সত্তাহকিচ্চেন গন্তুং লভতি.

ইদানি সহধম্মিকে এৰ সন্ধায ‘‘অনভিরত’’ন্তিআদি ৰুত্তং. ‘‘ৰিসভাগরূপং দিস্ৰা অনভিরতি, ততো ৰূপকাসিস্সং, তং গহেত্ৰা অঞ্ঞত্থ গমিস্স’’ন্তি অধিপ্পাযেন গন্তুম্পি লব্ভতীতি অত্থো. কুক্কুচ্চং ৰিনোদনঞ্চ দিট্ঠিং ৰিৰেচনঞ্চ অহং ৰা করেয্যং অঞ্ঞেহি ৰা কারেয্যন্তি সম্বন্ধো. পরিৰাসমানত্তআদীহি ৰুট্ঠানং ৰা গরুকা. আদি-সদ্দেন সচে সঙ্ঘেন কম্মং কতং হোতি, তস্স পটিপ্পস্সদ্ধিযা অনুস্সাৰনকরণাদীসু উস্সুক্কং করেয্যন্তি গন্তুং লব্ভতীতি অত্থো. সত্তাহকিচ্চেনাতি সত্তাহকরণীযেন.

৩১৬. ধম্মসৰনত্থং নিমন্তিতো এৰং ৰজেতি অত্থো. গরূ নাম আচরিযুপজ্ঝাযা, তেহি ভণ্ডধোৰনকিচ্চেন পহিতস্স গন্তুং ৰট্টতীতি অত্থো.

৩১৭. ন ভণ্ডধোৰন…পে… দস্সনেতি এত্থ (মহাৰ. অট্ঠ. ১৯৯) এতেসুপি ন ৰজেতি সম্বন্ধো. লব্ভন্তি এত্থ ‘‘অজ্জেৰ আগমিস্স’’ন্তি অদূরগো যদি ন পাপুণেয্য, লব্ভন্তি সম্বন্ধো. কিং ৰুত্তং হোতি? ‘‘অজ্জেৰ আগমিস্সামী’’তি সামন্তৰিহারং গন্ত্ৰা পুন আগচ্ছন্তস্স অন্তরামগ্গে সচে অরুণুট্ঠানং হোতি, ৰস্সচ্ছেদোপি ন হোতি, রত্তিচ্ছেদেন দুক্কটম্পি নাপজ্জতীতি ৰুত্তং হোতি.

৩১৮. সেসঞাতিহীতি ভাতুভগিনীআদীহি. ভিক্খুনিস্সিতকেন চ পহিতেতি সম্বন্ধো. নিদ্দিসিত্ৰাতি ‘‘আগচ্ছন্তু ভদন্তা, ইচ্ছামি দানঞ্চ দাতুং ধম্মঞ্চ সোতুং ভিক্খুঞ্চ পস্সিতু’’ন্তিআদিনা যং কিঞ্চি নিদ্দিসিত্ৰাৰ পেসিতে গন্তুং ৰট্টতি. কেৰলং ‘‘আগচ্ছন্তু ভিক্খূ, ইচ্ছামি ভিক্খূনং আগমন’’ন্তি এৰং অনিদ্দিসিত্ৰা ৰুত্তে গন্তুং ন লব্ভতীতি অত্থো.

৩১৯. অচ্ছরাযে সতত্তনোতি দসৰিধেসু অন্তরাযেসু একস্মিম্পি অন্তরাযে অত্তনো সতীতি অত্থো. সঙ্ঘসামগ্গিযা ৰা ৰস্সচ্ছেদে অনাপত্তীতি অত্থো. ৰুত্তঞ্হেতং ‘‘ইধ পন, ভিক্খৰে, ৰস্সূপগতো ভিক্খু পস্সতি সম্বহুলে ভিক্খূ সঙ্ঘভেদায পরক্কমন্তে. তত্র চে ভিক্খুনো এৰং হোতি, ‘গরুকো খো সঙ্ঘভেদো ৰুত্তো ভগৰতা. মা মযি সম্মুখীভূতে সঙ্ঘো ভিজ্জী’তি পক্কমিতব্বং, অনাপত্তি ৰস্সচ্ছেদস্সা’’তি (মহাৰ. ২০২). এৰং ছিন্নৰস্সো নো পৰারযেতি অত্থো.

৩২০. রুক্খস্স সুসিরেতি এত্থ (মহাৰ. ২০৪; মহাৰ. অট্ঠ. ২০৩) পন সুদ্ধে রুক্খসুসিরে এৰ ন ৰট্টতি, মহন্তস্স পন সুসিরস্স অন্তো পদরচ্ছদনং কুটিকং কত্ৰা পৰিসনদ্ৰারং যোজেত্ৰা উপগন্তুং ৰট্টতি. রুক্খস্স ৰিটপেতি এত্থাপি সুদ্ধৰিটপমত্তে ন ৰট্টতি, মহাৰিটপে পন অট্টকং বন্ধিত্ৰা ৰুত্তনযেন কুটিকং কত্ৰা উপগন্তুং ৰট্টতি. ছৰকুটি নাম পাসাণকুটিকন্তি ৰদন্তি. তীসু পস্সেসু পাসাণে উস্সাপেত্ৰা উপরি পাসাণেন পটিচ্ছন্না.

৩২১. নাৰাদীসু পন উপগতো পৰারেতুঞ্চ লব্ভতীতি সম্বন্ধো. ৰস্সূপনাযিকৰিনিচ্ছযো.

ৰস্সূপনাযিকনিদ্দেসৰণ্ণনা নিট্ঠিতা.