৩৩. কাযবন্ধননিদ্দেসৰণ্ণনা

২৩৫. অকাযবন্ধনোতি কাযবন্ধনং অবন্ধিত্ৰাতি অত্থো. ততো পট্ঠায চীৰরং পারুপিতব্বং, ততো পট্ঠায এৰ কাযবন্ধনং বন্ধিতব্বং. ‘‘ন ভিক্খৰে অকাযবন্ধনেন গামো পৰিসিতব্বো. যো পৰিসেয্য, আপত্তি দুক্কটস্সা’’তি (চূল়ৰ. ২৭৮) হি ৰুত্তং. তত্থেৰাসতিযা গতোতি অসতিযা গতো যত্থ সরতি, তত্থেৰ বন্ধিতব্বং. সরিত্ৰা পন যাৰ ন বন্ধতি, তাৰ পিণ্ডায চরিতুং ন ৰট্টতি. যদি অন্তোগামে সরতি, কাযবন্ধনে সতি একমন্তে ঠত্ৰা বন্ধিতব্বং, অসতি চে নিক্খমিত্ৰা বন্ধিত্ৰা পুন পিণ্ডায পৰিসিতব্বন্তি ৰদন্তি.

২৩৬. ‘‘অনুজানামি, ভিক্খৰে, দ্ৰে কাযবন্ধনানি পট্টিকং সূকরন্তক’’ন্তি (চূল়ৰ. ২৭৮) ৰুত্তত্তা ‘‘দুৰিধ’’ন্তি ৰুত্তং. তত্থ সূকরন্তং নাম কুঞ্চিকাকোসকা ৰিয অন্তে সুসিরং কত্ৰা কোট্টিতং. রজ্জু চ একাতি একৰট্টা রজ্জু চ. তদনুলোমিকাতি তেসং দ্ৰিন্নং অনুলোমিকা.

২৩৭. মচ্ছকণ্ডকখজ্জুরী-পত্তা মট্ঠা চ পট্টিকাতি এত্থ (চূল়ৰ. অট্ঠ. ২৭৮) এতে মচ্ছকণ্টকাদযো মট্ঠা ৰিকাররহিতা পট্টিকা চ তদন্তোগধাতি অধিপ্পাযো. লব্ভা দসা চতস্সোতি একায ৰা দ্ৰীসু ৰা তীসু ৰা কথা এৰ নত্থীতি অধিপ্পাযো, ততো পরং ন ৰট্টতি. অন্তেসূতি উভোসু অন্তেসু. গুণসুত্তকন্তি দিগুণসুত্তকং.

২৩৯. মকরমুখাদিন্তি আদি-সদ্দেন দেড্ডুভসীসং গহিতং. উভন্তেতি উভোসু অন্তেসু. কস্সাতি? ৰিধস্স. ঘটকাতি ঘটকতো. লেখাতি লেখায. ঘটকতো চ লেখায চ অঞ্ঞং চিত্তকং ন কপ্পতীতি অত্থো.

২৪০. দেড্ডুভকন্তি (চূল়ৰ. ২৭৮; চূল়ৰ. অট্ঠ. ২৭৮) উদকসপ্পসিরসদিসং. মুরজন্তি বহুরজ্জুকে একতো সঙ্কড্ঢিত্ৰা একায রজ্জুযা পলিৰেঠেত্ৰা কতরজ্জু. মদ্দৰীণন্তি পামঙ্গসদিসং. কলাবুকন্তি অনেকৰট্টং. এতানি পন সব্বানি ন কপ্পন্তি. দসাসু দ্ৰে মজ্ঝিমাতি মুরজং মদ্দৰীণন্তি দ্ৰে মজ্ঝিমা এৰ. কপ্পরেতি কপ্পন্তীতি অত্থো.

২৪১. গণ্ঠিযো চাপীতি (চূল়ৰ. ২৭৯) চীৰরগণ্ঠিযোপি. ৰেল়ুআদিমযা কপ্পন্তীতি পসঙ্গেন ৰুত্তং. কাযবন্ধনৰিনিচ্ছযো.

কাযবন্ধননিদ্দেসৰণ্ণনা নিট্ঠিতা.

পঠমভাণৰারং.