২২. উপাহননিদ্দেসৰণ্ণনা

১৭৫. গুণঙ্গুণূপাহনাতি (মহাৰ. অট্ঠ. ২৪৫) চতুপটলতো পট্ঠায ৰুচ্চতি, ন একদ্ৰিতিপটলতো পট্ঠায ‘‘অনুজানামি, ভিক্খৰে, একপলাসিকং উপাহনং, ন ভিক্খৰে দিগুণা উপাহনা ধারেতব্বা, ন তিগুণা উপাহনা ধারেতব্বা, ন গুণঙ্গুণূপাহনা ধারেতব্বা, যো ধারেয্য, আপত্তি দুক্কটস্সা’’তি (মহাৰ. ২৪৫) ৰুত্তত্তা. ‘‘অনুজানামি, ভিক্খৰে, ওমুক্কং গুণঙ্গুণূপাহনং, ন ভিক্খৰে নৰা গুণঙ্গুণূপাহনা ধারেতব্বা, যো ধারেয্য, আপত্তি দুক্কটস্সা’’তি (মহাৰ. ২৪৭) ৰুত্তত্তা ‘‘নৰা’’তি ৰুত্তং. সব্বত্থাপি মজ্ঝিমদেসে গিলানোপি নৰং গুণঙ্গুণূপাহনং ন লভতি, একৰারম্পি অঞ্ঞেহি পরিভুত্তং ওমুক্কউপাহনসঙ্খাতং লভতি, পচ্চন্তিমেসু জনপদেসু গিলানো নৰম্পি লভতীতি ৰেদিতব্বং ‘‘অনুজানামি, ভিক্খৰে, সব্বপচ্চন্তিমেসু জনপদেসু গুণঙ্গুণূপাহন’’ন্তি (মহাৰ. ২৫৯) অৰিসেসেন ৰুত্তত্তা.

সব্বস্সাতি গিলানস্সাপি অগিলানস্সাপীতি অত্থো. মজ্ঝিমদেসেপি পচ্চন্তিমদেসেপি আরামে আরামূপচারে গিলানস্সাপি অগিলানস্সাপি ‘‘অনুজানামি, ভিক্খৰে, অজ্ঝারামে উপাহনং ধারেতু’’ন্তি (মহাৰ. ২৪৯) ৰুত্তত্তা কপ্পিযন্তি অত্থো. সব্বত্থাতি আরামেপি গামেপি. অকল্লকস্সাতি গিলানস্স. এত্থ পন মজ্ঝিমদেসে গিলানস্স গুণঙ্গুণূপাহনা পরিভুত্তাৰ আরামেপি গামেপি ৰট্টতি, পচ্চন্তিমদেসে অপরিভুত্তাপি. মজ্ঝিমদেসেপি পচ্চন্তিমদেসেপি ভগৰতা গিলানস্সেৰ উপাহনা অনুঞ্ঞাতা ‘‘অনুজানামি, ভিক্খৰে, যস্স পাদা ৰা দুক্খা, পাদা ৰা ফলিতা, পাদখিলো ৰা আবাধো, উপাহনং ধারেতু’’ন্তি (মহাৰ. ২৪৯) চ ‘‘অনুজানামি, ভিক্খৰে, গিলানেন ভিক্খুনা সউপাহনেন গামং পৰিসিতু’’ন্তি (মহাৰ. ২৫৬) ৰুত্তত্তা চ. মজ্ঝিমদেসে চ গিলানো নৰং গুণঙ্গুণূপাহনং ধারেতুং যদি লভতি, কথং পদেসপঞ্ঞত্তি হোতীতি? সব্বত্থ পন ভগৰতা গিলানস্সেৰ উপাহনা অনুঞ্ঞাতা, তস্মা মজ্ঝিমদেসে গিলানো নৰং গুণঙ্গুণূপাহনং লভতীতি গহেতব্বন্তি ৰদন্তি.

১৭৬-৯. সব্বাৰ নীলকা (মহাৰ. ২৪৬; মহাৰ. অট্ঠ. ২৪৬) সব্বনীলকা. এস নযো সব্বত্থ ওদাতকাদীসুপি. ওদাতং পন নেৰ পাল়িযং, ন অট্ঠকথাযং পটিক্খিত্তং, অনুলোমৰসেন পন ইধ পটিক্খিত্তন্তি ৰেদিতব্বং. মহারঙ্গরত্তা সতপদিপিট্ঠিৰণ্ণা. মহানামরঙ্গরত্তা মন্দরত্তা. মঞ্জেট্ঠিকা কণৰেরপুপ্ফৰণ্ণা. পুপ্ফলতাদীহি ৰিচিত্তা চিত্রা. নীলপীতাদিৰদ্ধিকাতি এত্থ আদি-সদ্দেন ওদাতলোহিতমঞ্জেট্ঠিকমহারঙ্গমহানামরঙ্গরত্তাদিৰসেন ৰদ্ধিকা গহিতা. সীহব্যগ্ঘুদ্দাজিনদীপীনং চম্মেহি চাতি সম্বন্ধো. কোচীতি গিলানোপি অগিলানোপি.

১৮০. সকলং ৰা একদেসকং ৰা রজনং চোল়েন (মহাৰ. অট্ঠ. ২৪৬) পুঞ্ছিত্ৰা ৰল়ঞ্জেয্যাতি অত্থো. খল্লকাদিকং পন সব্বং হারিত্ৰা ৰল়ঞ্জেতব্বং. উপাহনৰিনিচ্ছযো.

উপাহননিদ্দেসৰণ্ণনা নিট্ঠিতা.