১৭. আপুচ্ছকরণনিদ্দেসৰণ্ণনা

১৬১. থেরেনাতি সঙ্ঘত্থেরেন.

১৬২. তত্থ তত্থ সন্নিপতিতানং সব্বেসং ৰুড্ঢো ৰুড্ঢতরো, তস্মিং ৰুড্ঢতরাগমে পুন আপুচ্ছনং নত্থি. ভত্তগ্গে চানুমোদতোতি এত্থ দানপতিনা যাচিতেন দহরেন ৰুড্ঢেন অনাপুচ্ছিত্ৰা কথেতুং ৰট্টতীতি ৰদন্তি.

১৬৩. একৰিহারকেতি একোৰরকে ৰুড্ঢেন ৰসন্তো অনাপুচ্ছা ন সজ্ঝাযেয্যাতি অত্থো. উদ্দেসং পরিপুচ্ছঞ্চ নো দদেতি উদ্দেসং ৰা পরিপুচ্ছং ৰা নো দদেয্য.

১৬৪. ন ৰিৰরেয্য ন থকেয্য চাতি সম্বন্ধো. দ্ৰারং নাম মহাৰল়ঞ্জং, তত্থ আপুচ্ছনকিচ্চং নত্থি.

১৬৫. ৰুড্ঢেন চঙ্কমে চঙ্কমন্তোপি যেন ৰুড্ঢো, তেন পরিৰত্তযেতি সম্বন্ধো. আপুচ্ছকরণৰিনিচ্ছযো.

আপুচ্ছকরণনিদ্দেসৰণ্ণনা নিট্ঠিতা.