১৪. ভূমিনিদ্দেসৰণ্ণনা

১৩৬. ইদানি ‘‘অনুজানামি, ভিক্খৰে, চতস্সো কপ্পিযভূমিযো উস্সাৰনন্তিকং গোনিসাদিকং গহপতিং সম্মুতি’’ন্তি (মহাৰ. ২৯৫) এৰং ৰুত্তা চতস্সো কপ্পিযভূমিযো দস্সেতুং ‘‘সম্মুতুস্সাৰনন্তা চা’’তিআদিমাহ. যাসূতি কপ্পিযভূমীসু (কঙ্খা. অট্ঠ. সন্নিধিকারকসিক্খাপদৰণ্ণনা).

১৩৭. ইদানি যত্থ কপ্পিযকুটি ইচ্ছিতব্বা, তং দস্সেতুং ‘‘ৰাসত্থাযা’’তিআদিমাহ. ৰাসত্থাযাতি ইমিনা কোট্ঠাগারভত্তসালাচেতিযঘরসম্মুঞ্জনীমাল়কাদি যং যং অঞ্ঞম্পি ৰাসত্থায করীযতি, তত্থ তত্থ কপ্পিযকুটিকরণকিচ্চং নত্থীতি দীপিতং হোতি. ভোজনসালা পন সেনাসনমেৰ, তস্মা তত্থ কাতব্বা এৰাতি ৰদন্তি. সঙ্ঘিকেৰেকসন্তকেতি এত্থ একসন্তকো উপসম্পন্নসন্তকোৰ ৰেদিতব্বো.

১৩৮. ইদানি কত্তব্বাকারং দস্সেতুং ‘‘গেহে’’তিআদিমাহ. তত্থ সঙ্ঘস্স ৰা একস্স ৰা গেহে ৰিহারে করিযমানে এৰং ঈরযং ‘‘কপ্পিযকুটিং করোম, কপ্পিযকুটিং করোমা’’তি ৰা ‘‘কপ্পিযকুটি কপ্পিযকুটী’’তি ৰা ৰদন্তো পঠমিট্ঠকত্থম্ভাদিং ঠপেয্য, এৰং কতা উস্সাৰনন্তিকা নাম, এৰং উদাহরিতৰচনন্তিকাতি অত্থো.

১৩৯. যেভুয্যেন ৰা অপরিক্খিত্তো, সকলোপি ৰা অপরিক্খিত্তো আরামো ‘‘গোনিসাদী’’তি ৰুচ্চতীতি সম্বন্ধো. এত্থ পন সেনাসনেসু পরিক্খিত্তেসুপি আরামে অপরিক্খিত্তে কপ্পিযকুটিকরণকিচ্চং নত্থি. সম্মুতিং করোন্তেহি কতং পরিযোসিতং ‘‘ইমং ৰিহারং অড্ঢযোগং পাসাদং হম্মিযং গুহং তিণকুটিকং মণ্ডপ’’ন্তি তেসং নামং গহেত্ৰা তস্সা কুটিযা হত্থপাসে ৰা ঠত্ৰা, তস্সা অন্তো ৰা পৰিসিত্ৰা ৰুত্তনযেনেৰ ঞত্তিদুতিযকম্মৰাচায সম্মন্নিতব্বং.

১৪০. ‘‘ভিক্খুং ঠপেত্ৰা অঞ্ঞেহী’’তি ৰচনতো সেসসহধম্মিকেহিপি দেৰমনুস্সেহিপি অঞ্ঞেহি কপ্পিযকুটিযা অত্থায দিন্নো ৰা তেসং সন্তকো ৰা গেহো ‘‘গহপতী’’তি মতো ঞাতোতি অত্থো, সঙ্ঘসন্তকঞ্চ ভিক্খুসন্তকঞ্চ ঠপেত্ৰা সব্বেসং গেহো গহপতীতি অধিপ্পাযো.

১৪১. সপ্পিআদীহি মিস্সিতন্তি সপ্পিআদীহি পঞ্চহি চ হলিদ্দিসিঙ্গিৰেরাদিযাৰজীৰিকেন চাতি অত্থো. ৰজেয্য অন্তোৰুত্থত্তন্তি এত্থ যাৰকালিকযামকালিকসঙ্খাতং পুরিমকালিকদ্ৰযং সঙ্ঘিকং ৰা ভিক্খুস্স ৰা ভিক্খুনিযা ৰা সন্তকং সযং কপ্পিযকুটিযা ৰুত্থম্পি ইতরেহি অকপ্পিযকুটিযা ৰুত্থেহি মিস্সিতং অন্তোৰুত্থভাৰং আগচ্ছেয্যাতি অত্থো.

১৪২. তেহেৰাতি অকপ্পিযকুটিযং ৰুত্থসপ্পিতেলাদীহি. সামপাকতন্তি সামংপক্কভাৰং গচ্ছতীতি অত্থো.

১৪৩-৪. ইমা পন কপ্পিযকুটিযো যদা জহিতৰত্থুকা হোন্তি, তং দস্সেতুং ‘‘উস্সাৰনন্তিকা’’তিআদিমাহ. সচে থম্ভে ৰা ভিত্তিপাদে ৰা পরিৰত্তেন্তি, যো যো ঠিতো, তত্থ তত্থ পতিট্ঠাতি, এতেনুপাযেন সব্বেসু পরিৰত্তেসুপি ন ৰিজহিতৰত্থুকাৰ হোতীতি অত্থো. পরিক্খিত্তে গোনিসাদি ৰিজহিতৰত্থুকা. সেসা ছদনৰিব্ভমাতি ছদনৰিনাসা জহিতৰত্থুকা হোন্তীতি অধিপ্পাযো. ভূমিৰিনিচ্ছযো.

ভূমিনিদ্দেসৰণ্ণনা নিট্ঠিতা.