৪৯. চতুরারক্খনিদ্দেসো

চতুরক্খাতি –

৪৬১. বুদ্ধানুস্সতি মেত্তা চ, অসুভং মরণস্সতি;

আরকত্তাদিনারহং, সম্মা সামঞ্চ বুদ্ধতো.

৪৬২. সম্মাসম্বুদ্ধইতি ৰানুস্সতি যা পুনপ্পুনং;

নৰভেদে ভগৰতো, বুদ্ধানুস্সতি সা গুণে.

৪৬৩. সীমট্ঠসঙ্ঘে সীমট্ঠদেৰতাসু চ ইস্সরে;

জনে গোচরগামম্হি, তত্থুপাদায মানুসে.

৪৬৪. সব্বসত্তেসু সুখিতা, হোন্তাৰেরাতিআদিনা;

পরিচ্ছিজ্জ পরিচ্ছিজ্জ, ভাৰনা মেত্তভাৰনা.

৪৬৫. ৰণ্ণসণ্ঠানওকাস-দিসতো পরিচ্ছেদতো;

ৰৰত্থপেত্ৰা কেসাদি-কোট্ঠাসে অনুপুব্বতো.

৪৬৬. নাতিসীঘঞ্চ সণিকং, ৰিক্খেপং পটিবাহযং;

পণ্ণত্তিং সমতিক্কম্ম, মুঞ্চন্তস্সানুপুব্বতো.

৪৬৭. ৰণ্ণআসযসণ্ঠান-গন্ধোকাসেহি ভাৰনা;

পটিক্কূলাতি কোট্ঠাসে, উদ্ধুমাতাদিৰত্থুসু;

গহেত্ৰা অসুভাকারং, পৰত্তা ভাৰনাসুভং.

৪৬৮. ‘‘মরণং মে ভৰিস্সতি, জীৰিতং উচ্ছিজ্জিস্সতি;

মরণং মরণং ৰা’’তি, ভাৰযিত্ৰান যোনিসো.

৪৬৯. ৰধকস্সেৰুপট্ঠানা, সম্পত্তীনং ৰিপত্তিতো;

উপসংহরতো কাযবহুসাধারণা তথা.

৪৭০. আযুদুব্বলতো কালৰৰত্থানস্সভাৰতো;

অদ্ধানস্স পরিচ্ছেদা, ভাৰনা মরণস্সতীতি.