৩১. ৰিকপ্পনানিদ্দেসো

ৰিকপ্পনা চেৰাতি –

২২১. সম্মুখা পরম্মুখাতি, দুৰে ৰুত্তা ৰিকপ্পনা;

সম্মুখায ৰিকপ্পেন্তো, ব্যত্তস্সেকস্স সন্তিকে;

‘‘ইমং চীৰরং তুয্হং, ৰিকপ্পেমী’’তি ভাসযে.

২২২. এত্তাৰতা নিধেতুংৰ, কপ্পতী ন চ কপ্পতি;

পরিভোগাদিকং তেন, অপ্পচ্চুদ্ধটভাৰতো.

২২৩. ‘‘ময্হং সন্তকং পরিভুঞ্জ ৰা ৰিস্সজ্জেহি ৰা যথাপচ্চযং ৰা করোহী’’তি –

তেন পচ্চুদ্ধটেযেৰ, পরিভোগাদি কপ্পতি.

২২৪. অপরা সম্মুখাৰেকা, ভিক্খুস্সেকস্স সন্তিকে;

গহেত্ৰা নামমেকস্স, পঞ্চন্নং সহধম্মিনং.

২২৫. ‘‘ইমং চীৰরং তিস্সস্স ভিক্খুনো, তিস্সায ভিক্খুনিযা, তিস্সস্স সামণেরস্স, তিস্সায সামণেরিযা, তিস্সায সিক্খমানায ৰিকপ্পেমী’’তি ৰত্তব্বং.

তেন ভিক্খুনা ‘‘তিস্সস্স ভিক্খুনো, তিস্সায ভিক্খুনিযা, তিস্সস্স সামণেরস্স, তিস্সায সামণেরিযা, তিস্সায সিক্খমানায সন্তকং পরিভুঞ্জ ৰা ৰিস্সজ্জেহি ৰা যথাপচ্চযং ৰা করোহী’’তি ৰত্তব্বং.

২২৬. পরম্মুখাৰিকপ্পনে-কস্সন্তিকেৰমীরযে;

‘‘ইমং চীৰরং তুয্হং ৰিকপ্পনত্থায দম্মী’’তি.

২২৭. তেন ৰত্তব্বো ‘‘কো তে মিত্তো ৰা সন্দিট্ঠো ৰা’’তি. ইতরেন চেৰং ৰত্তব্বং ‘‘তিস্সো ভিক্খূ’’তি ৰা ‘‘তিস্সা ভিক্খুনী’’তি ৰা ‘‘তিস্সো সামণেরো’’তি ৰা ‘‘তিস্সা সামণেরী’’তি ৰা ‘‘তিস্সা সিক্খমানা’’তি ৰা.

পুন তেন ‘‘অহং তিস্সস্স তিস্সায ৰা দম্মী’’তি ৰিকপ্পেত্ৰা তেনেৰ ‘‘তিস্সস্স ভিক্খুনো, তিস্সায ভিক্খুনিযা, তিস্সস্স সামণেরস্স, তিস্সায সামণেরিযা, তিস্সায সিক্খমানায সন্তকং পরিভুঞ্জ ৰা ৰিস্সজ্জেহি ৰা যথাপচ্চযং ৰা করোহী’’তি পচ্চুদ্ধরিতব্বং.

২২৮. দূরসন্তিকত্তেকত্তবহুভাৰং ৰিজানিয;

‘‘এতং ইম’’ন্তি ‘‘এতানি, ইমানী’’তেত্থ যোজযে.

২২৯. দসাহং মাসমেকং ৰা, পঞ্চ ৰা কথিনত্থতে;

পারিপূরত্থমূনস্স, পচ্চাসা সতি মাসকং;

নুপ্পাদযতি নিস্সগ্গিং, নাধিট্ঠিতৰিকপ্পিতন্তি.