১৪. ভূমিনিদ্দেসো

ভূমিযোতি –

১৩৬. সম্মুতুস্সাৰনন্তা চ, গোনিসাদী গহাপতি;

কপ্পিযা ভূমিযো যাসু, ৰুত্থং পক্কঞ্চ কপ্পতি.

১৩৭. ৰাসত্থায কতে গেহে, সঙ্ঘিকে ৰেকসন্তকে;

কপ্পিযা কুটি লদ্ধব্বা, সহসেয্যপ্পহোনকে.

১৩৮. গেহে সঙ্ঘস্স ৰেকস্স, করমানেৰমীরযং;

পঠমিট্ঠকথম্ভাদিং, ঠপেয্যুস্সাৰনন্তিকা;

‘‘কপ্পিযকুটিং করোম, কপ্পিযকুটিং করোমা’’তি.

১৩৯. যেভুয্যেনাপরিক্খিত্তো, আরামো সকলোপি ৰা;

ৰুচ্চতে ‘‘গোনিসাদী’’তি, সম্মুতী সঙ্ঘসম্মতা.

১৪০. ভিক্খুং ঠপেত্ৰা অঞ্ঞেহি, দিন্নো তেসংৰ সন্তকো;

অত্থায কপ্পকুটিযা, গেহো গহপতী মতো.

১৪১. অকপ্পকুটিযা ৰুত্থসপ্পিআদীহি মিস্সিতং;

ৰজেয্য অন্তোৰুত্থত্তং, পুরিমং কালিকদ্ৰযং.

১৪২. তেহেৰ ভিক্খুনা পক্কং, কপ্পতে যাৰজীৰিকং;

নিরামিসংৰ সত্তাহং, সামিসে সামপাকতা.

১৪৩. উস্সাৰনন্তিকা যেহি, থম্ভাদীহি অধিট্ঠিতা;

তেসুযেৰাপনীতেসু, তদঞ্ঞেসুপি তিট্ঠতি.

১৪৪. সব্বেসু অপনীতেসু, ভৰে জহিতৰত্থুকা;

গোনিসাদী পরিক্খিত্তে, সেসা ছদনৰিব্ভমাতি.