১৫. উপজ্ঝাচরিযৰত্তনিদ্দেসো

উপজ্ঝাচরিযৰত্তানীতি –

১৪৫. নিস্সাযুপজ্ঝাচরিযে, ৰসমানো সুপেসলো;

দন্তকট্ঠাসনং তোযং, যাগুং কালে দদে সদা.

১৪৬. পত্তে ৰত্তং চরে গাম-প্পৰেসে গমনাগমে;

আসনে পাদপীঠে চ, কথলোপাহনচীৰরে.

১৪৭. পরিভোজনীযপানীয-ৰচ্চপ্পস্সাৰঠানিসু;

ৰিহারসোধনে ৰত্তং, পুন পঞ্ঞাপনে তথা.

১৪৮. ন পপ্ফোটেয্য সোধেন্তো, পটিৰাতে চ সঙ্গণে;

ৰিহারং ভিক্খু পানীয-সামন্তা সযনাসনং.

১৪৯. ন্হানে ন্হাতস্স কাতব্বে, রঙ্গপাকে চ ধোৰনে;

সিব্বনে চীৰরে থেৰে, রজন্তো ন ৰজে ঠিতে.

১৫০. একচ্চস্স অনাপুচ্ছা, পত্তং ৰা চীৰরানি ৰা;

ন দদেয্য ন গণ্হেয্য, পরিক্খারঞ্চ কিঞ্চনং.

১৫১. একচ্চং পচ্ছতো কাতুং, গন্তুং ৰা তস্স পচ্ছতো;

পিণ্ডপাতঞ্চ নিন্নেতুং, নীহরাপেতুমত্তনো.

১৫২. কিচ্চযং পরিকম্মং ৰা, কেসচ্ছেদঞ্চ অত্তনো;

কারাপেতুং ৰ কাতুং ৰা, অনাপুচ্ছা ন ৰট্টতি.

১৫৩. গামং সুসানং নিস্সীমং, দিসং ৰা গন্তুমিচ্ছতো;

অত্তনো কিচ্চযং ৰাপি, অনাপুচ্ছা ন ৰট্টতি.

১৫৪. উপ্পন্নং অরতিং দিট্ঠিং, কুক্কুচ্চং ৰা ৰিনোদযে;

করেয্য ৰাপি উস্সুক্কং, সঙ্ঘাযত্তেসু কম্মসু.

১৫৫. গিলানেসু উপট্ঠেয্য, ৰুট্ঠানং নেসমাগমে;

ৰত্তভেদেন সব্বত্থ, অনাদরেন দুক্কটন্তি.