৬. সুরাপানৰগ্গো

১. সুরাপানসিক্খাপদৰণ্ণনা

‘‘সুরা’’তি ৰা ‘‘ন ৰট্টতী’’তি ৰা জানিত্ৰা পিৰনে অকুসলমেৰাতি লিখিতং. অকুসলচিত্তন্তি যেভুয্যেন তং সন্ধায কির ৰুত্তং. অথ কস্মা ৰিনযট্ঠকথাযং ‘‘অকুসলেনেৰ পাতব্বতাযা’’তি (পাচি. অট্ঠ. ৩২৯) ৰুত্তন্তি চে? সচিত্তকপক্খে অকুসলেনেৰ পাতব্বতাযাতি.

সুরাপানসিক্খাপদৰণ্ণনা নিট্ঠিতা.

২. অঙ্গুলিপতোদকসিক্খাপদৰণ্ণনা

কাযসংসগ্গসঙ্ঘাদিসেসাপত্তিভাৰে সমানেপি ভিক্খুনিযাপি অনুপসম্পন্নেপি দুক্কটং, উপসম্পন্নে এৰ পাচিত্তিযন্তি এৰং পুগ্গলাপেক্খং দস্সেতুং ‘‘অঙ্গুলিপতোদকে পাচিত্তিয’’ন্তি ৰুত্তং. সতি করণীযেতি এত্থ পুরিসং সতি করণীযে আমসতোতি অধিপ্পাযো, ন ইত্থিং.

অঙ্গুলিপতোদকসিক্খাপদৰণ্ণনা নিট্ঠিতা.

৩. হসধম্মসিক্খাপদৰণ্ণনা

‘‘চিক্খল্লং ৰা’’তি ৰচনতো সক্খরম্পি খিপনকীল়ায কীল়তো দুক্কটমেৰ. উপরিগোপ্ফকে পাচিত্তিযং, অঞ্ঞত্থ দুক্কটন্তি পাচিত্তিযৰত্থুঅত্থৰসেন ‘‘উদকে হসধম্মে পাচিত্তিয’’ন্তি ৰুত্তং.

ইদং সঞ্ঞাৰিমোক্খং চে, তিকপাচিত্তিযং কথং;

কীল়িতংৰ অকীল়াতি, মিচ্ছাগাহেন তং সিযা.

এত্তাৰতা কথং কীল়া, ইতি কীল়াযং এৰাযং;

অকীল়াসঞ্ঞী হোতেত্থ, ৰিনযত্থং সমাদযে.

একন্তাকুসলো যস্মা, কীল়াযাভিরতমনো;

তস্মা অকুসলং চিত্তং, একমেৰেত্থ লব্ভতীতি. (ৰজির. টী. পাচিত্তিয ৩৩৬);

হসধম্মসিক্খাপদৰণ্ণনা নিট্ঠিতা.

৪. অনাদরিযসিক্খাপদৰণ্ণনা

তস্স ৰচনন্তি ‘‘অযং উক্খিত্তকো ৰা ৰম্ভিতো ৰা গরহিতো ৰা ইমস্স ৰচনং অকতং ভৰিস্সতী’’তি অনাদরিযং করোতি. ধম্মন্তি কথাযং ধম্মো নস্সেয্য ৰা ৰিনস্সেয্য ৰা অন্তরধাযেয্য ৰা, তং ৰা অসিক্খিতুকামো অনাদরিযং করোতি. ‘‘লোকৰজ্জং অতিক্কমিত্ৰা ‘ইদং অম্হাকং আচরিযুগ্গহো’তি ৰদন্তস্স ন ৰট্টতী’’তি (ৰজির. টী. পাচিত্তিয ৩৪৪) লিখিতং.

অনাদরিযসিক্খাপদৰণ্ণনা নিট্ঠিতা.

৬. জোতিসিক্খাপদৰণ্ণনা

‘‘ৰিসিব্বনাপেক্খো’’তি ৰুত্তত্তা অঞ্ঞস্স ৰট্টতি, অঞ্ঞেসঞ্চ.

জোতিনেকমনেকে ৰা, জালেন্তি মুনযো সহ;

একো সোপেতি নানেকো, অধিপ্পাযৰিসেসতো.

জোতিসিক্খাপদৰণ্ণনা নিট্ঠিতা.

৮. দুব্বণ্ণকরণসিক্খাপদৰণ্ণনা

মোরক্খিমণ্ডলমঙ্গুলপিট্ঠীনন্তি ন একন্ততো, অধিকং, ওরঞ্চাতি ৰদন্তি. এককোণেপি ৰট্টতি, এৰং যত্থ কত্থচি একবিন্দুপি ৰট্টতীতি.

দুব্বণ্ণকরণসিক্খাপদৰণ্ণনা নিট্ঠিতা.

৯. ৰিকপ্পনসিক্খাপদৰণ্ণনা

‘‘সমুট্ঠানাদীনি পঠমকথিনসদিসানি, ইদং পন কিরিযাকিরিয’’ন্তি পাঠো. এত্থ পরিভোগেন কাযকম্মং. অপচ্চুদ্ধরণেন ৰচীকম্মং.

ৰিকপ্পনসিক্খাপদৰণ্ণনা নিট্ঠিতা.

১০. অপনিধানসিক্খাপদৰণ্ণনা

সসূচিকে সূচিঘরে সূচিগণনায আপত্তিযোতি পোরাণা.

অপনিধানসিক্খাপদৰণ্ণনা নিট্ঠিতা.

সুরাপানৰগ্গো ছট্ঠো.