অনিযতকণ্ডং

১. পঠমঅনিযতসিক্খাপদৰণ্ণনা

‘‘মাতুগামেনা’’তি ৰত্ৰা পুন ‘‘একাযা’’তি ৰুত্তত্তা ‘‘মাতুগামসঙ্খাতায একায ইত্থিযা’’তি ৰুত্তং. রহোতি অপ্পকাসং. অপ্পকাসতা চ যো অনাপত্তিং করোতি, তস্স অপচ্চক্খভাৰতোতি আহ ‘‘চক্খুস্স রহো’’তি. ননু ‘‘রহো নাম চক্খুস্স রহো, সোতস্স রহো. চক্খুস্স রহো নাম ন সক্কা হোতি অক্খিং ৰা নিখণিযমানে, ভমুকং ৰা উক্খিপিযমানে, সীসং ৰা উক্খিপিযমানে পস্সিতুং. সোতস্স রহো নাম ন সক্কা হোতি পকতিকথা সোতু’’ন্তি পদভাজনপাল়িযং সোতস্স রহোতি আগতং, অথ কস্মা তং অৰত্ৰা ‘‘চক্খুস্স রহো’’তি এত্তকমেৰ ৰুত্তন্তি আহ ‘‘কিঞ্চাপী’’তিআদি. ইমিনা পাল়িযং ‘‘সোতস্স রহো’’তি ইদং অত্থুদ্ধারৰসেন ৰুত্তন্তি দস্সেতি. অথ কথমেতং ৰিঞ্ঞাযতি ‘‘চক্খুস্সেৰ রহো ইধ অধিপ্পেতো’’তি? ‘‘পটিচ্ছন্নে আসনে’’তি ৰচনতো ‘‘সক্কা হোতি মেথুনং ধম্মং পটিসেৰিতু’’ন্তি (পারা. ৪৪৫) চ ৰুত্তত্তা. তেনেৰাহ ‘‘সচেপী’’তিআদি. ‘‘পিহিতকৰাটস্সা’’তি (সারত্থ. টী. ২.৪৪৪-৪৪৫) ইমিনা পটিচ্ছন্নভাৰতো চক্খুস্স রহোসব্ভাৰং দস্সেতি. অপিহিতকৰাটস্স (পারা. অট্ঠ. ২.৪৪৪-৪৪৫) পন দ্ৰারে নিসিন্নো অনাপত্তিং করোতি, ন কেৰলং অপিহিতকৰাটস্স গব্ভস্স দ্ৰারে নিসিন্নোৰ অনাপত্তিং করোতি, অন্তোদ্ৰাদসহত্থে ওকাসে নিসিন্নোপীতি ৰেদিতব্বো. তেনাহ ‘‘যত্থ পন সক্কা দট্ঠু’’ন্তিআদি. যস্মা নিসীদিত্ৰা নিদ্দাযন্তো কপিমিদ্ধপরেতো কঞ্চি কালং চক্খূনি উম্মীলেতি, কঞ্চি কালং নিমীলেতি, ন চ মহানিদ্দং ওক্কমতি, তস্মা ‘‘নিদ্দাযন্তোপি অনাপত্তিং করোতী’’তি ৰুত্তং. নিপজ্জিত্ৰা নিদ্দাযন্তো পন তাদিসো ন হোতীতি আহ ‘‘নিপজ্জিত্ৰা নিদ্দাযন্তোপি ন করোতী’’তি, অনাপত্তিং ন করোতীতি অত্থো. মেথুনস্স মাতুগামো দুতিযো ন হোতি. ইত্থিযো হি অঞ্ঞমঞ্ঞিস্সা ৰজ্জং পটিচ্ছাদেন্তি. তেনেৰ ৰেসালিযং (পারা. ৭৬-৭৭) মহাৰনে দ্ৰারং ৰিৰরিত্ৰা নিপন্নে ভিক্খুম্হি সম্বহুলা ইত্থিযো যাৰদত্থং কত্ৰা পক্কমিংসু. তেনাহ ‘‘ইত্থীনং পন সতম্পি ন করোতী’’তি. তং কম্মন্তি অজ্ঝাচারকম্মং. যস্মা নিসীদিত্ৰাৰ নিপজ্জতি, তস্মা নিপজ্জনম্পি অন্তোকত্ৰা ‘‘নিসজ্জং কপ্পেয্যা’’তি ৰুত্তন্তি দস্সেতুং ‘‘এত্থ চা’’তিআদিমাহ. তিণ্ণং ধম্মানং অঞ্ঞতরেন কারেতব্বোতি নিসজ্জং পটিজানমানস্স তিণ্ণং ধম্মানং অঞ্ঞতরসমাযোগো হোতিযেৰাতি ৰুত্তং. পারাজিকেন, পন সঙ্ঘাদিসেসেন চ পাচিত্তিযেন চ তেনাকারেন নিসজ্জং পটিজানমানোৰ কারেতব্বো. ন অপ্পটিজানমানোতি নিসজ্জং অপ্পটিজানমানো তিণ্ণং ধম্মানং অঞ্ঞতরেন ন কারেতব্বোতি. অলজ্জীপি হি পটিজানমানোৰ আপত্তিযা কারেতব্বো. যাৰ ন পটিজানাতি, তাৰ ‘‘নেৰ সুদ্ধো’’তি ৰা ‘‘ন অসুদ্ধো’’তি ৰা ৰত্তব্বো, ৰত্তানুসন্ধিনা পন কারেতব্বোতি. ৰুত্তঞ্হেতং –

‘‘পটিঞ্ঞা লজ্জীসু কতা, অলজ্জীসু এৰং ন ৰিজ্জতি;

বহুম্পি অলজ্জী ভাসেয্য, ৰত্তানুসন্ধিতেন কারযে’’তি. (পরি. ৩৫৯);

ন কেৰলং তিণ্ণং ধম্মানং অঞ্ঞতরেন চোদনাযমেৰ এৰং পটিঞ্ঞায কারেতব্বো, অথ খো নিসজ্জাদিনা আকারেন সদ্ধিং চোদনাযপীতি দস্সেতুং ‘‘যেন ৰা সা সদ্ধেয্যৰচসা উপাসিকা ৰদেয্য, তেন সো ভিক্খু কারেতব্বো’’তি ৰুত্তং. তেনেৰাহ ‘‘নিসজ্জাদীসু আকারেসূ’’তিআদি. এত্থ চ ‘‘পটিজানমানো’’তি অৰুত্তেপি অধিকারত্তা ‘‘পটিজানমানোৰ তেন সো ভিক্খু কারেতব্বো’’তি ৰুত্তং. তথারূপায (সারত্থ. টী. ২.৪৪৪-৪৪৫) উপাসিকায ৰচনে অঞ্ঞথত্তাভাৰতো দিট্ঠং নাম তথাপি হোতি, অঞ্ঞথাপি হোতীতি দস্সনে অঞ্ঞথত্তসম্ভৰং দস্সেতি. অনেকংসিকতায ন নিযতোতি অনিযতো. তেনাহ ‘‘তিণ্ণং আপত্তীন’’ন্তিআদি.

রহোনিসজ্জস্সাদেন মাতুগামস্স সন্তিকং গন্তুকামো অক্খিং অঞ্জেতি, দুক্কটং. নিৰাসনং নিৰাসেতি, কাযবন্ধনং বন্ধতি, চীৰরং পারুপতি, সব্বত্থ পযোগে পযোগে দুক্কটং. গচ্ছতি, পদৰারে পদৰারে দুক্কটং. গন্ত্ৰান নিসীদতি, দুক্কটমেৰ. তেনাহ ‘‘মেথুনধম্মসন্নিস্সিতকিলেসসঙ্খাতেনা’’তিআদি. এত্থ চ রহোনিসজ্জস্সাদস্স অসতিপি মেথুনরাগভাৰে তপ্পটিবদ্ধকিলেসত্তা ৰুত্তং ‘‘মেথুনধম্মসন্নিস্সিতকিলেসসঙ্খাতেনা’’তি. তেনেৰ সন্নিস্সিতগ্গহণং কতং. রহস্সাদেনাতি ‘‘ইত্থন্নামায সদ্ধিং রহো নিসীদিত্ৰা হসিতলপিতাদিকং করেয্য’’ন্তি উপ্পন্নঅস্সাদহেতু. নিসজ্জায পাচিত্তিযং অসতি উপচারগতে নিপজ্জিত্ৰা অনিদ্দাযন্তে অনন্ধে ৰিঞ্ঞুপুরিসেতি অধিপ্পাযো. সচে সা ইত্থী কেনচি করণীযেন উট্ঠাযুট্ঠায পুনপ্পুনং নিসীদতি, নিসজ্জায নিসজ্জায পাচিত্তিযং. যং সন্ধায গতো, সা ন দিট্ঠা, অঞ্ঞা আগন্ত্ৰা নিসীদতি, অস্সাদে উপ্পন্নে পাচিত্তিযং. সচে সম্বহুলা আগচ্ছন্তি, মাতুগামগণনায পাচিত্তিযং. সচে উট্ঠাযুট্ঠায পুনপ্পুনং নিসীদন্তি, নিসজ্জাগণনাযপি পাচিত্তিযানি. অনিযমেত্ৰা ‘‘দিট্ঠদিট্ঠায সদ্ধিং রহস্সাদং কপ্পিস্সামী’’তি গন্ত্ৰা নিসিন্নস্সাপি আগতাগতানং ৰসেন, পুনপ্পুনং নিসজ্জায ৰসেন চ ৰুত্তনযেনেৰ আপত্তিযো ৰেদিতব্বা. ৰুত্তপ্পকারে পুরিসেতি অনন্ধে ৰিঞ্ঞুপুরিসে. উপচারগতে সতীতি দ্ৰাদসহত্থব্ভন্তরগতে সতি. সচে সুদ্ধচিত্তেন গন্ত্ৰা নিসিন্নস্স সন্তিকং আগন্ত্ৰা নিসিন্নায ইত্থিযা রহস্সাদো উপ্পজ্জতি, এৰম্পি অনাপত্তি.

পঠমঅনিযতসিক্খাপদৰণ্ণনা নিট্ঠিতা.

২. দুতিযঅনিযতসিক্খাপদৰণ্ণনা

নহেৰ খো পন পটিচ্ছন্নন্তি এত্থ পন যম্পি বহি পরিক্খিত্তং অন্তো ৰিৰটং পরিৰেণঙ্গণাদি, তম্পি অন্তোগধন্তি ৰেদিতব্বং. ‘‘এৰরূপঞ্হি ঠানং অপ্পটিচ্ছন্নেযেৰ গহিত’’ন্তি মহাপচ্চরিযং (পারা. অট্ঠ. ২.৪৫৩) ৰুত্তং. সঙ্ঘাদিসেসেন ৰাতি কাযসংসগ্গদুট্ঠুল্লোভাসনসঙ্খাতেন সঙ্ঘাদিসেসেন ৰা. তেনেৰ হি পদভাজনে ‘‘সা চে এৰং ৰদেয্য ‘অয্যো, মযা দিট্ঠো নিসিন্নো মাতুগামেন সদ্ধিং কাযসংসগ্গং সমাপজ্জন্তো’’’তিআদি (পারা. ৪৫৫) ৰুত্তং. ইদং সিক্খাপদং দুট্ঠুল্লৰাচাৰসেন আগতং. দুট্ঠুল্লৰাচঞ্চ সুত্ৰা তং মাতুগামোপি ন পটিচ্ছাদেতি. তথা হি দুট্ঠুল্লৰাচাসিক্খাপদে (পারা. ২৮৩ আদযো) যা পন তা ইত্থিযো হিরিমনা, তা নিক্খমিত্ৰা ভিক্খূ উজ্ঝাপেসুং, তস্মা ইধ ইত্থীপি অনাপত্তিং করোতীতি আহ ‘‘ইত্থীপী’’তি. অথ ৰা ইধ অপ্পটিচ্ছন্নত্তা ইত্থীপি অনাপত্তিং করোতি, পঠমে পন পটিচ্ছন্নত্তা ইত্থিসতম্পি অনাপত্তিং ন করোতীতি এৰমেত্থ অত্থো দট্ঠব্বো. অনন্ধো অবধিরোতি এত্থ কাযসংসগ্গৰসেন অনন্ধো ৰুত্তো, দুট্ঠুল্লৰাচাৰসেন অবধিরো.

সমুট্ঠানাদীসু ইদং সিক্খাপদং তিসমুট্ঠানং – কাযচিত্ততো ৰাচাচিত্ততো কাযৰাচাচিত্ততো সমুট্ঠাতি, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, সুখমজ্ঝত্তৰেদনাহি দ্ৰিৰেদনং. তেনাহ ‘‘সমুট্ঠানাদীনি পনেত্থ অদিন্নাদানসদিসানেৰা’’তি. এত্থ চ কাযসংসগ্গং সমাপজ্জন্তো দুট্ঠুল্লম্পি ভণতি, দুট্ঠুল্লং ভণন্তো নিসীদতি চাতি ‘‘কাযৰাচাচিত্ততো চ সমুট্ঠাতী’’তি ৰুত্তং, দুট্ঠুল্লমেৰ ৰা সন্ধায ৰুত্তন্তি গহেতব্বং.

দুতিযঅনিযতসিক্খাপদৰণ্ণনা নিট্ঠিতা.

‘‘অনিযতুদ্দেসো চাযং দিট্ঠাদিসমূলকচোদনায ৰত্থুং পটিজানমানোৰ আপত্তিযা কারেতব্বো, ন ইতরোতি আপত্তিরোপনারোপনলক্খণদস্সনত্থং ৰুত্তো’’তি ৰদন্তি.

ইতি কঙ্খাৰিতরণিযা পাতিমোক্খৰণ্ণনায

ৰিনযত্থমঞ্জূসাযং লীনত্থপ্পকাসনিযং

অনিযতৰণ্ণনা নিট্ঠিতা.