১০. ছন্দংঅদত্ৰাগমনসিক্খাপদৰণ্ণনা

দসমে ৰিনিচ্ছযকথাযাতি যাৰ আরোচিতং ৰত্থু অৰিনিচ্ছিকং, ঞত্তিং ৰা ঠপেত্ৰা কম্মৰাচা অনিট্ঠাপিতা, তাৰ ৰিনিচ্ছযকথা ৰত্তমানা নাম হোতি. যো ভিক্খু এতস্মিং অন্তরে কম্মং কোপেতুকামতায পরিসায হত্থপাসং ৰিজহতি, তস্স ৰিজহনে দুক্কটং, ৰিজহিতে পাচিত্তিযং.

সাৰত্থিযং অঞ্ঞতরং ভিক্খুং আরব্ভ ছন্দং অদত্ৰা পক্কমনৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, ধম্মকম্মে ৰেমতিকস্স, অধম্মকম্মে ধম্মকম্মসঞ্ঞিনো, ৰেমতিকস্স চ দুক্কটং. অধম্মকম্মসঞ্ঞিস্স পন, যো চ ‘‘সঙ্ঘস্স ভণ্ডনাদীনি ৰা ভৰিস্সন্তি, অধম্মেন ৰা ৰগ্গেন ৰা নকম্মারহস্স ৰা কম্মং করিস্সন্তী’’তি (পাচি. ৪৮৩) ঞত্ৰা, গিলানো ৰা হুত্ৰা, গিলানস্স ৰা করণীযেন, উচ্চারাদীহি ৰা পীল়িতো, ন চ কম্মং কোপেতুকামো ‘‘পুন পচ্চাগমিস্সামী’’তি গচ্ছতি, তস্স, উম্মত্তকাদীনঞ্চ অনাপত্তি. ৰিনিচ্ছযকথায ৰত্তমানতা, ধম্মকম্মতা, ধম্মকম্মসঞ্ঞিতা, সমানসীমাযং ঠিততা, সমানসংৰাসকতা, কোপেতুকামতায হত্থপাসৰিজহনন্তি ইমানেত্থ ছ অঙ্গানি. সমনুভাসনসমুট্ঠানং, কিরিযাকিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি.

ছন্দংঅদত্ৰাগমনসিক্খাপদৰণ্ণনা নিট্ঠিতা.