৩. সভোজনসিক্খাপদৰণ্ণনা

ততিযে সহ উভোহি জনেহীতি সভোজনং, তস্মিং সভোজনে. অথ ৰা সভোজনেতি সভোগে, রাগপরিযুট্ঠিতপুরিসস্স হি ইত্থী ভোগো, ইত্থিযা চ পুরিসো, তেনেৰস্স পদভাজনে ‘‘ইত্থী চেৰ হোতি, পুরিসো চা’’তিআদি (পাচি. ২৮১) ৰুত্তং. অনুপখজ্জ নিসজ্জং কপ্পেয্যাতি অনুপৰিসিত্ৰা নিসীদেয্য, যং তস্মিং কুলে সযনিঘরং, তস্স মহাচতুস্সালাদীসু কতস্স মহল্লকস্স পিট্ঠসঙ্ঘাটতো হত্থপাসং ৰিজহিত্ৰা অন্তোসযনস্স আসন্নে ঠানে, খুদ্দকস্স ৰা ৰেমজ্ঝং অতিক্কমিত্ৰা নিসীদেয্যাতি অত্থো, এৰং নিসিন্নস্স পাচিত্তিযং.

সাৰত্থিযং উপনন্দং আরব্ভ অনুপখজ্জ নিসজ্জনৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, তিকপাচিত্তিযং, অসযনিঘরে সযনিঘরসঞ্ঞিনো, ৰেমতিকস্স ৰা দুক্কটং. নসযনিঘরসঞ্ঞিস্স, ৰুত্তলক্খণং পদেসং অনতিক্কমিত্ৰা নিসিন্নস্স, ভিক্খুস্মিং দুতিযকে সতি, উভোসু নিক্খন্তেসু ৰা, ৰীতরাগেসু ৰা নিসীদন্তস্স, উম্মত্তকাদীনঞ্চ অনাপত্তি. অৰীতরাগজাযম্পতিকানং সন্নিহিততা, সযনিঘরতা, দুতিযস্স ভিক্খুনো অভাৰো, অনুপখজ্জ নিসীদনন্তি ইমানেত্থ চত্তারি অঙ্গানি. সমুট্ঠানাদীনি পঠমপারাজিকসদিসানীতি.

সভোজনসিক্খাপদৰণ্ণনা নিট্ঠিতা.