৯. ছত্তুপাহনৰগ্গো

১. ছত্তুপাহনসিক্খাপদৰণ্ণনা

ছত্তৰগ্গস্স পঠমে ছত্তুপাহনন্তি পদভাজনে (পাচি. ১১৭৮-১১৮২) ৰুত্তলক্খণং ছত্তঞ্চ উপাহনাযো চ. ধারেয্যাতি পরিভোগৰসেন মগ্গগমনে একপ্পযোগেনেৰ দিৰসম্পি ধারেন্তিযা একা আপত্তি. সচে পন তাদিসং ঠানং পত্ৰা ছত্তম্পি অপনামেত্ৰা উপাহনাপি ওমুঞ্চিত্ৰা পুনপ্পুনং ধারেতি, পযোগগণনায পাচিত্তিযং.

সাৰত্থিযং ছব্বগ্গিযা ভিক্খুনিযো আরব্ভ ছত্তুপাহনধারণৰত্থুস্মিং পঞ্ঞত্তং, ‘‘অগিলানা’’তি অযমেত্থ অনুপঞ্ঞত্তি, ছত্তস্সেৰ উপাহনানংযেৰ ৰা ধারণে দুক্কটং, অগিলানায তিকপাচিত্তিযং, গিলানায দ্ৰিকদুক্কটং. গিলানসঞ্ঞায পন, আরামে আরামূপচারে ধারেন্তিযা, আপদাসু, উম্মত্তিকাদীনঞ্চ অনাপত্তি. উভিন্নং ধারণং, অনুঞ্ঞাতকারণাভাৰোতি ইমানেত্থ দ্ৰে অঙ্গানি. সমুট্ঠানাদীনি এল়কলোমসদিসানীতি.

ছত্তুপাহনসিক্খাপদৰণ্ণনা নিট্ঠিতা.

২. যানসিক্খাপদৰণ্ণনা

দুতিযে যানেনাতি ৰয্হাদিনা. এত্থাপি ওরোহিত্ৰা পুনপ্পুনং অভিরুহন্তিযা পযোগগণনায পাচিত্তিযং. অনাপত্তিযং ‘‘আরামে আরামূপচারে’’তি নত্থি, সেসং পঠমে ৰুত্তনযেনেৰ ৰেদিতব্বন্তি.

যানসিক্খাপদৰণ্ণনা নিট্ঠিতা.

৩. সঙ্ঘাণিসিক্খাপদৰণ্ণনা

ততিযে সঙ্ঘাণিন্তি যংকিঞ্চি কটূপগং. ধারেয্যাতি কটিযং পটিমুঞ্চেয্য. এত্থাপি ওমুঞ্চিত্ৰা ওমুঞ্চিত্ৰা ধারেন্তিযা পযোগগণনায পাচিত্তিযং.

সাৰত্থিযং অঞ্ঞতরং ভিক্খুনিং আরব্ভ সঙ্ঘাণিং ধারণৰত্থুস্মিং পঞ্ঞত্তং. আবাধপচ্চযা কটিসুত্তং ধারেন্তিযা, উম্মত্তিকাদীনঞ্চ অনাপত্তি. সেসং ৰুত্তনযেনেৰ ৰেদিতব্বং, ইদং পন অকুসলচিত্তন্তি.

সঙ্ঘাণিসিক্খাপদৰণ্ণনা নিট্ঠিতা.

৪. ইত্থালঙ্কারসিক্খাপদৰণ্ণনা

চতুত্থে ইত্থালঙ্কারন্তি সীসূপগাদীসু অঞ্ঞতরং যংকিঞ্চি পিল়ন্ধনং. ইধ তস্স তস্স ৰসেন ৰত্থুগণনায আপত্তি ৰেদিতব্বা.

সাৰত্থিযং ছব্বগ্গিযা ভিক্খুনিযো আরব্ভ ইত্থালঙ্কারং ধারণৰত্থুস্মিং পঞ্ঞত্তং, আবাধপচ্চযা কিঞ্চিদেৰ ধারেন্তিযা, উম্মত্তিকাদীনঞ্চ অনাপত্তি. সেসং ৰুত্তসদিসমেৰাতি.

ইত্থালঙ্কারসিক্খাপদৰণ্ণনা নিট্ঠিতা.

৫. গন্ধৰণ্ণকসিক্খাপদৰণ্ণনা

পঞ্চমে গন্ধৰণ্ণকেনাতি যেনকেনচি গন্ধেন চ ৰণ্ণকেন চ. ইধ গন্ধাদিযোজনতো পট্ঠায পুব্বপযোগে দুক্কটং, নহানপরিযোসানে পাচিত্তিযং. আবাধপচ্চযা, উম্মত্তিকাদীনঞ্চ অনাপত্তি. সেসং চতুত্থসদিসমেৰাতি.

গন্ধৰণ্ণকসিক্খাপদৰণ্ণনা নিট্ঠিতা.

৬. ৰাসিতকসিক্খাপদৰণ্ণনা

ছট্ঠে ৰাসিতকেনাতি গন্ধৰাসিতকেন. পিঞ্ঞাকেনাতি তিলপিট্ঠেন. সেসং পঞ্চমসদিসমেৰাতি.

ৰাসিতকসিক্খাপদৰণ্ণনা নিট্ঠিতা.

৭. ভিক্খুনিউম্মদ্দাপনসিক্খাপদৰণ্ণনা

সত্তমে উম্মদ্দাপেয্যাতি উব্বট্টাপেয্য. পরিমদ্দাপেয্যাতি সম্বাহাপেয্য. এত্থ চ হত্থং অমুঞ্চিত্ৰা উব্বট্টনে একাৰ আপত্তি, মোচেত্ৰা মোচেত্ৰা উব্বট্টনে পযোগগণনায আপত্তিযো. সম্বাহনেপি এসেৰ নযো.

সাৰত্থিযং সম্বহুলা ভিক্খুনিযো আরব্ভ ভিক্খুনিযা উম্মদ্দাপনপরিমদ্দাপনৰত্থুস্মিং পঞ্ঞত্তং, গিলানায, আপদাসু, উম্মত্তিকাদীনঞ্চ অনাপত্তি. ইধ মগ্গগমনপরিস্সমোপি গেলঞ্ঞং, চোরভযাদীহি সরীরকম্পনাদযোপি আপদা. সেসং চতুত্থে ৰুত্তনযেনেৰ ৰেদিতব্বন্তি.

ভিক্খুনিউম্মদ্দাপনসিক্খাপদৰণ্ণনা নিট্ঠিতা.

৮-৯-১০. সিক্খমানউম্মদ্দাপনাদিসিক্খাপদৰণ্ণনা

অট্ঠমনৰমদসমেসুপি সিক্খমানায সামণেরিযা গিহিনিযাতি এত্তকমেৰ নানং. সেসং সত্তমসদিসমেৰাতি.

সিক্খমানউম্মদ্দাপনাদিসিক্খাপদৰণ্ণনা নিট্ঠিতা.

১১. অনাপুচ্ছাসিক্খাপদৰণ্ণনা

একাদসমে ভিক্খুস্স পুরতোতি ন অভিমুখমেৰাতি অত্থো, ইদং পন উপচারং সন্ধায কথিতন্তি ৰেদিতব্বং. তস্মা ভিক্খুস্স উপচারে অন্তমসো ছমাযপি ‘‘নিসীদামি, অয্যা’’তি অনাপুচ্ছিত্ৰা নিসীদন্তিযা পাচিত্তিযং.

সাৰত্থিযং সম্বহুলা ভিক্খুনিযো আরব্ভ অনাপুচ্ছা নিসীদনৰত্থুস্মিং পঞ্ঞত্তং, তিকপাচিত্তিযং, আপুচ্ছিতে দ্ৰিকদুক্কটং. তস্মিং আপুচ্ছিতসঞ্ঞায, গিলানায, আপদাসু, উম্মত্তিকাদীনঞ্চ অনাপত্তি. ভিক্খুস্স অনাপুচ্ছা, উপচারে নিসজ্জা, অনুঞ্ঞাতকারণাভাৰোতি ইমানেত্থ তীণি অঙ্গানি. সমুট্ঠানাদীনি কথিনসদিসানি, ইদং পন কিরিযাকিরিযন্তি.

অনাপুচ্ছাসিক্খাপদৰণ্ণনা নিট্ঠিতা.

১২. পঞ্হাপুচ্ছনসিক্খাপদৰণ্ণনা

দ্ৰাদসমে অনোকাসকতন্তি ‘‘অসুকস্মিং নাম ঠানে পুচ্ছামী’’তি এৰং অকতওকাসং, তস্মা সুত্তন্তে ওকাসং কারাপেত্ৰা ৰিনযং ৰা অভিধম্মং ৰা পুচ্ছন্তিযা পাচিত্তিযং. সেসেসুপি এসেৰ নযো, সব্বসো অকারিতে পন ৰত্তব্বমেৰ নত্থি.

সাৰত্থিযং সম্বহুলা ভিক্খুনিযো আরব্ভ অনোকাসকতং ভিক্খুং পঞ্হং পুচ্ছনৰত্থুস্মিং পঞ্ঞত্তং. তত্থ তত্থ ওকাসং কারাপেত্ৰা পুচ্ছন্তিযা, অনোদিস্স ওকাসং কারাপেত্ৰা যত্থ কত্থচি পুচ্ছন্তিযা, উম্মত্তিকাদীনঞ্চ অনাপত্তি. ভিক্খুস্স অনোকাসকারাপনং, পঞ্হং পুচ্ছনন্তি ইমানেত্থ দ্ৰে অঙ্গানি. সমুট্ঠানাদীনি পদসোধম্মসদিসানি, ইদং পন কিরিযাকিরিযন্তি.

পঞ্হাপুচ্ছনসিক্খাপদৰণ্ণনা নিট্ঠিতা.

১৩. অসংকচ্চিকসিক্খাপদৰণ্ণনা

তেরসমে অসংকচ্চিকাতি অধক্খকউব্ভনাভিমণ্ডলসঙ্খাতস্স সরীরস্স পটিচ্ছাদনত্থং অনুঞ্ঞাতসংকচ্চিকৰিরহিতা. গামং পৰিসেয্যাতি এত্থ পরিক্খিত্তস্স গামস্স পরিক্খেপং, অপরিক্খিত্তস্স উপচারং অতিক্কমন্তিযা ৰা ওক্কমন্তিযা ৰা পঠমপাদে দুক্কটং, দুতিযে পাচিত্তিযং.

সাৰত্থিযং অঞ্ঞতরং ভিক্খুনিং আরব্ভ অসংকচ্চিকায গামং পৰিসনৰত্থুস্মিং পঞ্ঞত্তং. যস্সা পন সংকচ্চিকচীৰরং অচ্ছিন্নং ৰা নট্ঠং ৰা, তস্সা, গিলানায, আপদাসু, উম্মত্তিকাদীনঞ্চ অনাপত্তি. অসংকচ্চিকতা, ৰুত্তপরিচ্ছেদাতিক্কমো, অনুঞ্ঞাতকারণাভাৰোতি ইমানেত্থ তীণি অঙ্গানি. সমুট্ঠানাদীনি এল়কলোমসদিসানীতি.

অসংকচ্চিকসিক্খাপদৰণ্ণনা নিট্ঠিতা.

ছত্তুপাহনৰগ্গো নৰমো.

১০…পে…১৬. মুসাৰাদাদিৰগ্গো

মুসাৰাদাদিসিক্খাপদৰণ্ণনা

ইতো পরেসু মুসাৰাদৰগ্গাদীসু সত্তসু ৰগ্গেসু ভিক্খুপাতিমোক্খৰণ্ণনাযং ৰুত্তনযেনেৰ ৰিনিচ্ছযো ৰেদিতব্বোতি.

সোল়সমৰগ্গো.

উদ্দিট্ঠা খো অয্যাযো ছসট্ঠিসতা পাচিত্তিযা ধম্মাতি ভিক্খূ আরব্ভ পঞ্ঞত্তা সাধারণা সত্ততি, অসাধারণা ছন্নৰুতীতি এৰং ছসট্ঠিসতা. সেসং সব্বত্থ উত্তানমেৰাতি.

কঙ্খাৰিতরণিযা পাতিমোক্খৰণ্ণনায

ভিক্খুনিপাতিমোক্খে

সুদ্ধপাচিত্তিযৰণ্ণনা নিট্ঠিতা.

তত্রাযং সঙ্খেপতো অসাধারণসিক্খাপদেসু সমুট্ঠানৰিনিচ্ছযো – গিরগ্গসমজ্জা চিত্তাগারসিক্খাপদং সঙ্ঘাণী ইত্থালঙ্কারো গন্ধৰণ্ণকো ৰাসিতকপিঞ্ঞাকো ভিক্খুনিআদীহি উম্মদ্দনপরিমদ্দনাতি ইমানি দস সিক্খাপদানি অচিত্তকানি লোকৰজ্জানি অকুসলচিত্তানি. অযং পনেত্থ অধিপ্পাযো, ৰিনাপি চিত্তেন আপজ্জিতব্বত্তা অচিত্তকানি, চিত্তে পন সতি অকুসলেনেৰ আপজ্জিতব্বত্তা লোকৰজ্জানি চেৰ অকুসলচিত্তানি চাতি. অৰসেসানি সচিত্তকানি পণ্ণত্তিৰজ্জানেৰ. চোরিৰুট্ঠাপনং গামন্তরং আরামসিক্খাপদং গব্ভিনিৰগ্গে আদিতো পট্ঠায সত্ত, কুমারিভূতৰগ্গে আদিতো পট্ঠায পঞ্চ পুরিসাদিসংসট্ঠং পারিৰাসিকছন্দদানং অনুৰস্সৰুট্ঠাপনং একন্তরিকৰুট্ঠাপনন্তি ইমানি একূনৰীসতি সিক্খাপদানি সচিত্তকানি পণ্ণত্তিৰজ্জানি. অৰসেসানি সচিত্তকানি লোকৰজ্জানেৰাতি.