পাটিদেসনীযকণ্ডো

১. সপ্পিৰিঞ্ঞাপনসিক্খাপদৰণ্ণনা

পাটিদেসনীযেসু পঠমে সপ্পিন্তি পুব্বে ৰুত্তৰিনিচ্ছযং পাল়িআগতং (পাচি. ১২৩০) গোসপ্পিআদিমেৰ. ৰিঞ্ঞাপেত্ৰা ভুঞ্জেয্যাতি এত্থ ‘‘ৰিঞ্ঞত্তিযা পটিলদ্ধং ভুঞ্জিস্সামী’’তি গহণে দুক্কটং, গহিতস্স অজ্ঝোহারে অজ্ঝোহারে পাটিদেসনীযং.

সাৰত্থিযং ছব্বগ্গিযা ভিক্খুনিযো আরব্ভ সপ্পিং ৰিঞ্ঞাপেত্ৰা ভুঞ্জনৰত্থুস্মিং পঞ্ঞত্তং, ‘‘অগিলানা’’তি অযমেত্থ অনুপঞ্ঞত্তি, তিকপাটিদেসনীযং, গিলানায দ্ৰিকদুক্কটং. যা পন গিলানা গিলানসঞ্ঞা, গিলানকালে ৰা ৰিঞ্ঞাপেত্ৰা পচ্ছা অগিলানা হুত্ৰা ভুঞ্জতি, গিলানায ৰা সেসকং, ঞাতকপ্পৰারিতট্ঠানতো ৰা ৰিঞ্ঞত্তং, অঞ্ঞস্স ৰা অত্থায, অত্তনো ৰা ধনেন গহিতং ভুঞ্জতি, তস্সা, উম্মত্তিকাদীনঞ্চ অনাপত্তি. ৰুত্তলক্খণসপ্পিতা, অনুঞ্ঞাতকারণাভাৰো, ৰিঞ্ঞত্তি, অজ্ঝোহারোতি ইমানেত্থ চত্তারি অঙ্গানি. সমুট্ঠানাদীনি অদ্ধানসদিসানীতি.

সপ্পিৰিঞ্ঞাপনসিক্খাপদৰণ্ণনা নিট্ঠিতা.

২. তেলৰিঞ্ঞাপনাদিসিক্খাপদৰণ্ণনা

দুতিযাদীসুপি তেলাদীনি পুব্বে ৰুত্তৰিনিচ্ছযানি পাল়িযং (পাচি. ১২৩৬) আগতানেৰ, পাল়িযং অনাগতেসু পন অট্ঠসুপি দুক্কটমেৰ. সেসং সব্বত্থ পঠমে ৰুত্তসদিসমেৰাতি.

তেলৰিঞ্ঞাপনাদিসিক্খাপদৰণ্ণনা নিট্ঠিতা.

কঙ্খাৰিতরণিযা পাতিমোক্খৰণ্ণনায

ভিক্খুনিপাতিমোক্খে

পাটিদেসনীযৰণ্ণনা নিট্ঠিতা.

১. পরিমণ্ডলাদিসিক্খাপদৰণ্ণনা

ইতো পরং পন সেখিযানি চেৰ অধিকরণসমথা চ সব্বপকারতো ভিক্খুপাতিমোক্খৰণ্ণনাযং ৰুত্তনযেনেৰ ৰেদিতব্বাতি.

কঙ্খাৰিতরণিযা পাতিমোক্খৰণ্ণনায

ভিক্খুনিপাতিমোক্খৰণ্ণনা নিট্ঠিতা.

নিগমনকথা

এত্তাৰতা চ –

ৰণ্ণনং পাতিমোক্খস্স, সোণত্থেরেন যাচিতো;

ৰিনযে জাতকঙ্খানং, কঙ্খাৰিতরণত্থিকো.

আরভিং যমহং সব্বং, সীহল়ট্ঠকথানযং;

মহাৰিহারৰাসীনং, ৰাচনামগ্গনিস্সিতং.

নিস্সায সা অযং নিট্ঠং, গতা আদায সব্বসো;

সব্বং অট্ঠকথাসারং, পাল়িযত্থঞ্চ কেৰলং.

ন হেত্থ তং পদং অত্থি, যং ৰিরুজ্ঝেয্য পাল়িযা;

মহাৰিহারৰাসীনং, পোরাণট্ঠকথাহি ৰা.

যস্মা তস্মা অকত্ৰাৰ, এত্থ কঙ্খং হিতেসিনা;

সিক্খিতব্বাৰ সক্কচ্চং, কঙ্খাৰিতরণী অযং.

যথা চ নিট্ঠং সম্পত্তা, কঙ্খাৰিতরণী অযং;

দ্ৰাৰীসতি ভাণৰারপঅমাণায পাল়িযা.

এৰং অনন্তরাযেন, নিট্ঠং কল্যাণনিস্সিতা;

অচিরং সব্বসত্তানং, যন্তু সব্বে মনোরথাতি.

পরমৰিসুদ্ধসদ্ধাবুদ্ধিৰীরিযপ্পটিমণ্ডিতেন সীলাচারজ্জৰমদ্দৰাদিগুণসমুদযসমুদিতেন সকসমযসমযন্তরগহনজ্ঝোগাহণসমত্থেন পঞ্ঞাৰেয্যত্তিযসমন্নাগতেন তিপিটকপরিযত্তিপ্পভেদে সাট্ঠকথে সত্থুসাসনে অপ্পটিহতঞাণপ্পভাৰেন মহাৰেয্যাকরণেন করণসম্পত্তিজনিতসুৰিনিগ্গতমধউরোদারৰচনলাৰণ্ণযুত্তেন যুত্তমুত্তৰাদিনা ৰাদীৰরেন মহাকৰিনা পভিন্নপটিসম্ভিদাপরিৰারে ছল়ভিঞ্ঞাদিপ্পভেদগুণপ্পটিমণ্ডিতে উত্তরিমনুস্সধম্মে সুপ্পতিট্ঠিতবুদ্ধীনং থেরৰংসপ্পদীপানং থেরানং মহাৰিহারৰাসীনং ৰংসালঙ্কারভূতেন ৰিপুলৰিসুদ্ধবুদ্ধিনা বুদ্ধঘোসোতি গরূহি গহিতনামধেয্যেন থেরেন কতা অযং কঙ্খাৰিতরণী নাম পাতিমোক্খৰণ্ণনা –

তাৰ তিট্ঠতু লোকস্মিং, লোকনিত্থরণেসিনং;

দস্সেন্তী কুলপুত্তানং, নযং সীলৰিসুদ্ধিযা.

যাৰ ‘‘বুদ্ধো’’তি নামম্পি, সুদ্ধচিত্তস্স তাদিনো;

লোকম্হি লোকজেট্ঠস্স, পৰত্ততি মহেসিনোতি.

কঙ্খাৰিতরণী-অট্ঠকথা নিট্ঠিতা.