৫. চিত্তাগারৰগ্গো

১. রাজাগারসিক্খাপদৰণ্ণনা

চিত্তাগারৰগ্গস্স পঠমে রাজাগারন্তি রঞ্ঞো কীল়নঘরং. চিত্তাগারন্তি কীল়নচিত্তসালং. আরামন্তি কীল়নউপৰনং. উয্যানন্তি কীল়নুয্যানং. পোক্খরণিন্তি কীল়নপোক্খরণিং. দস্সনাযাতি ‘‘এতেসু যংকিঞ্চি পস্সিস্সামী’’তি গচ্ছন্তিযা পদে পদে দুক্কটং, যত্থ ঠত্ৰা পস্সতি, তত্থ পদং অনুদ্ধরিত্ৰা পঞ্চাপি পস্সন্তিযা একাৰ আপত্তি. সচে পন তং তং ৰিলোকেত্ৰা পস্সতি, গীৰং পরিৰত্তনপ্পযোগগণনায আপত্তিযো, ন উম্মীলনগণনায.

সাৰত্থিযং ছব্বগ্গিযা ভিক্খুনিযো আরব্ভ চিত্তাগারং দস্সনায গমনৰত্থুস্মিং পঞ্ঞত্তং, ভিক্খুস্স সব্বত্থ দুক্কটং, অৰসেসো ৰিনিচ্ছযো নচ্চদস্সনসিক্খাপদে ৰুত্তনযেনেৰ ৰেদিতব্বোতি.

রাজাগারসিক্খাপদৰণ্ণনা নিট্ঠিতা.

২. আসন্দিপরিভুঞ্জনসিক্খাপদৰণ্ণনা

দুতিযে আসন্দী নাম অতিক্কন্তপ্পমাণা ৰুচ্চতি. পল্লঙ্কো নাম সংহারিমেন ৰাল়েন কতোতি ৰুত্তো. পরিভুঞ্জেয্যাতি এত্থ পন নিসীদননিপজ্জনপ্পযোগগণনায পাচিত্তিযং ৰেদিতব্বং.

সাৰত্থিযং সম্বহুলা ভিক্খুনিযো আরব্ভ আসন্দিপল্লঙ্কপরিভোগৰত্থুস্মিং পঞ্ঞত্তং, আসন্দিযা পাদে ছিন্দিত্ৰা, পল্লঙ্কস্স ৰাল়ে ভিন্দিত্ৰা পরিভুঞ্জন্তিযা, উম্মত্তিকাদীনঞ্চ অনাপত্তি. আসন্দিপল্লঙ্কতা, নিসীদনং নিপজ্জনং ৰাতি ইমানেত্থ দ্ৰে অঙ্গানি. সমুট্ঠানাদীনি এল়কলোমসদিসানীতি.

আসন্দিপরিভুঞ্জনসিক্খাপদৰণ্ণনা নিট্ঠিতা.

৩. সুত্তকন্তনসিক্খাপদৰণ্ণনা

ততিযে সুত্তন্তি ছন্নং অঞ্ঞতরং. কন্তেয্যাতি এত্থ যত্তকং হত্থেন অঞ্ছিতং হোতি, তস্মিং তক্কম্হি ৰেঠিতে একা আপত্তি. ইদঞ্হি সন্ধায পদভাজনীযে (পাচি. ৯৮৮) ‘‘উজ্জৰুজ্জৰে’’তি ৰুত্তং.

সাৰত্থিযং ছব্বগ্গিযা ভিক্খুনিযো আরব্ভ সুত্তং কন্তনৰত্থুস্মিং পঞ্ঞত্তং, কন্তনতো পুব্বে কপ্পাসৰিচিননং আদিং কত্ৰা সব্বপ্পযোগেসু হত্থৰারগণনায দুক্কটং. কন্তিতসুত্তং কন্তন্তিযা, উম্মত্তিকাদীনঞ্চ অনাপত্তি. অকন্তিততা, কন্তনন্তি ইমানেত্থ দ্ৰে অঙ্গানি. সমুট্ঠানাদীনি এল়কলোমসদিসানীতি.

সুত্তকন্তনসিক্খাপদৰণ্ণনা নিট্ঠিতা.

৪. গিহিৰেয্যাৰচ্চসিক্খাপদৰণ্ণনা

চতুত্থে গিহিৰেয্যাৰচ্চন্তি গিহীনং ৰেয্যাৰচ্চং. সচেপি হি মাতাপিতরো অত্তনো কিঞ্চি কম্মং অকারাপেত্ৰা তেসং যাগুপচনাদীনি করোন্তি, পুব্বপ্পযোগেসু পযোগগণনায দুক্কটানি আপজ্জিত্ৰা যাগুআদীসু ভাজনগণনায, খাদনীযাদীসু পূৰগণনায পাচিত্তিযং আপজ্জতি.

সাৰত্থিযং সম্বহুলা ভিক্খুনিযো আরব্ভ গিহীনং ৰেয্যাৰচ্চকরণৰত্থুস্মিং পঞ্ঞত্তং, মনুস্সেহি সঙ্ঘস্স যাগুপানে ৰা ভত্তে ৰা চেতিযপূজায ৰা করীযমানায তেসং সহাযভাৰেন যাগুপচনাদীনি, অত্তনো ৰেয্যাৰচ্চকরস্স চ তানিযেৰ করোন্তিযা, উম্মত্তিকাদীনঞ্চ অনাপত্তি. গিহিৰেয্যাৰচ্চকরণং, অনুঞ্ঞাতকারণাভাৰোতি ইমানেত্থ দ্ৰে অঙ্গানি. সমুট্ঠানাদীনি এল়কলোমসদিসানেৰাতি.

গিহিৰেয্যাৰচ্চসিক্খাপদৰণ্ণনা নিট্ঠিতা.

৫. অধিকরণসিক্খাপদৰণ্ণনা

পঞ্চমে অধিকরণন্তি চতুন্নং অঞ্ঞতরং. পাচিত্তিযন্তি ইধ চীৰরসিব্বনে ৰিয ধুরং নিক্খিত্তমত্তে পাচিত্তিযং, একাহম্পি পরিহারো নত্থি.

সাৰত্থিযং থুল্লনন্দং আরব্ভ অধিকরণং নৰূপসমনৰত্থুস্মিং পঞ্ঞত্তং, সেসমেত্থ চীৰরসিব্বনসিক্খাপদে ৰুত্তনযেনেৰ ৰেদিতব্বন্তি.

অধিকরণসিক্খাপদৰণ্ণনা নিট্ঠিতা.

৬. ভোজনদানসিক্খাপদৰণ্ণনা

ছট্ঠে সহত্থাতি কাযেন ৰা কাযপ্পটিবদ্ধেন ৰা নিস্সগ্গিযেন ৰা ঠপেত্ৰা পঞ্চসহধম্মিকে অৰসেসানং অঞ্ঞত্র উদকদন্তপোনা যংকিঞ্চি অজ্ঝোহরণীযং দদন্তিযা পাচিত্তিযং.

সাৰত্থিযং থুল্লনন্দং আরব্ভ অগারিকস্স খাদনীযভোজনীযদানৰত্থুস্মিং পঞ্ঞত্তং, উদকদন্তপোনে দুক্কটং. যা পন দাপেতি ন দেতি, উপনিক্খিপিত্ৰা দেতি, বাহিরলেপং দেতি, তস্সা, উম্মত্তিকাদীনঞ্চ অনাপত্তি. অঞ্ঞত্র উদকদন্তপোনা অজ্ঝোহরণিযং, ঠপেত্ৰা পঞ্চ সহধম্মিকে অঞ্ঞস্স সহত্থা দানন্তি ইমানেত্থ দ্ৰে অঙ্গানি. সমুট্ঠানাদীনি এল়কলোমসদিসানীতি.

ভোজনদানসিক্খাপদৰণ্ণনা নিট্ঠিতা.

৭. আৰসথচীৰরসিক্খাপদৰণ্ণনা

সত্তমে আৰসথচীৰরন্তি ‘‘উতুনিযো ভিক্খুনিযো পরিভুঞ্জন্তূ’’তি দিন্নচীৰরং. অনিস্সজ্জিত্ৰাতি চতুত্থে দিৰসে ধোৰিত্ৰা অঞ্ঞিস্সা অন্তমসো সামণেরিযাপি উতুনিযা অদত্ৰা. পাচিত্তিযন্তি এৰং অনিস্সজ্জিত্ৰা পরিভুঞ্জন্তিযা পাচিত্তিযং.

সাৰত্থিযং থুল্লনন্দং আরব্ভ আৰসথচীৰরং অনিস্সজ্জিত্ৰা পরিভুঞ্জনৰত্থুস্মিং পঞ্ঞত্তং, তিকপাচিত্তিযং, নিস্সজ্জিতে দ্ৰিকদুক্কটং. তস্মিং পন নিস্সজ্জিতসঞ্ঞায, পুন পরিযাযেন ৰা, অঞ্ঞাসং উতুনীনং অভাৰেন ৰা, অচ্ছিন্ননট্ঠচীৰরিকায ৰা, আপদাসু ৰা পরিভুঞ্জন্তিযা, উম্মত্তিকাদীনঞ্চ অনাপত্তি. আৰসথচীৰরতা, চতুত্থদিৰসতা, ধোৰিত্ৰা অনিস্সজ্জনং, অনুঞ্ঞাতকারণাভাৰোতি ইমানেত্থ চত্তারি অঙ্গানি. সমুট্ঠানাদীনি কথিনসদিসানি, ইদং পন কিরিযাকিরিযন্তি.

আৰসথচীৰরসিক্খাপদৰণ্ণনা নিট্ঠিতা.

৮. আৰসথৰিহারসিক্খাপদৰণ্ণনা

অট্ঠমে আৰসথন্তি কৰাটবদ্ধৰিহারং. অনিস্সজ্জিত্ৰাতি রক্খণত্থায অদত্ৰা, ‘‘ইদং জগ্গেয্যাসী’’তি এৰং অনাপুচ্ছিত্ৰাতি অত্থো. চারিকং পক্কমেয্য পাচিত্তিযন্তি এত্থ সকগামতো অঞ্ঞং গামং একরত্তিৰাসত্থাযপি পক্কমন্তিযা পরিক্খিত্তস্স আৰসথস্স পরিক্খেপং, অপরিক্খিত্তস্স উপচারং পঠমপাদেন অতিক্কন্তমত্তে দুক্কটং, দুতিযেন পাচিত্তিযং.

সাৰত্থিযং থুল্লনন্দং আরব্ভ আৰসথং অনিস্সজ্জিত্ৰা চারিকং পক্কমনৰত্থুস্মিং পঞ্ঞত্তং, তিকপাচিত্তিযং, অকৰাটবদ্ধে দুক্কটং, নিস্সজ্জিতে দ্ৰিকদুক্কটং. তস্মিং পন নিস্সজ্জিতসঞ্ঞায, সতি অন্তরাযে, পটিজগ্গিকং পরিযেসিত্ৰা অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি. সকৰাটবদ্ধতা, ৰুত্তনযেন পক্কমনং, অনুঞ্ঞাতকারণাভাৰোতি ইমানেত্থ তীণি অঙ্গানি. সমুট্ঠানাদীনি কথিনসদিসানীতি, ইদং পন কিরিযাকিরিযন্তি.

আৰসথৰিহারসিক্খাপদৰণ্ণনা নিট্ঠিতা.

৯. তিরচ্ছানৰিজ্জাপরিযাপুণনসিক্খাপদৰণ্ণনা

নৰমে তিরচ্ছানৰিজ্জন্তি যংকিঞ্চি বাহিরকং অনত্থসংহিতং হত্থিঅস্সরথধনুথরুসিপ্পআথব্বণখিলনৰসীকরণসোসাপনমন্তাগদপ্পযোগাদিভেদং পরূপঘাতকরং ৰিজ্জং. পরিযাপুণেয্যাতি এত্থ যস্স কস্সচি সন্তিকে তং পদাদিৰসেন পরিযাপুণন্তিযা পদগণনায চেৰ অক্খরগণনায চ পাচিত্তিযন্তি.

তিরচ্ছানৰিজ্জাপরিযাপুণনসিক্খাপদৰণ্ণনা নিট্ঠিতা.

১০. তিরচ্ছানৰিজ্জাৰাচনসিক্খাপদৰণ্ণনা

দসমে ৰাচেয্যাতি পদং ৰিসেসো. উভযম্পি সাৰত্থিযং ছব্বগ্গিযা চেৰ সম্বহুলা ভিক্খুনিযো চ আরব্ভ তিরচ্ছানৰিজ্জং পরিযাপুণনৰাচনৰত্থুস্মিং পঞ্ঞত্তং. লেখে, ধারণায চ, গুত্তত্থায চ যক্খপরিত্তনাগমণ্ডলাদিকে সব্বপরিত্তে, উম্মত্তিকাদীনঞ্চ অনাপত্তি. তিরচ্ছানৰিজ্জতা, পরিযাপুণনৰাচনা, অনুঞ্ঞাতকারণাভাৰোতি ইমানেত্থ দ্ৰীসুপি তীণি অঙ্গানি. সমুট্ঠানাদীনি পদসোধম্মসদিসানীতি.

তিরচ্ছানৰিজ্জাৰাচনসিক্খাপদৰণ্ণনা নিট্ঠিতা.

চিত্তাগারৰগ্গো পঞ্চমো.