৪. তুৰট্টৰগ্গো

১. একমঞ্চতুৰট্টনসিক্খাপদৰণ্ণনা

তুৰট্টৰগ্গস্স পঠমে তুৰট্টেয্যুন্তি নিপজ্জেয্যুং. তাসু পন একায ৰা নিপন্নায অপরা নিপজ্জতু, দ্ৰেপি ৰা সহেৰ নিপজ্জন্তু, দ্ৰিন্নম্পি পাচিত্তিযং.

সাৰত্থিযং সম্বহুলা ভিক্খুনিযো আরব্ভ দ্ৰিন্নং একমঞ্চে তুৰট্টনৰত্থুস্মিং পঞ্ঞত্তং, সচে পন একায নিপন্নায একা নিসীদতি, উভো ৰা নিসীদন্তি, তাসং, উম্মত্তিকাদীনঞ্চ অনাপত্তি. একমঞ্চতা, দ্ৰিন্নং তুৰট্টনন্তি ইমানেত্থ দ্ৰে অঙ্গানি. সমুট্ঠানাদীনি এল়কলোমসদিসানীতি.

একমঞ্চতুৰট্টনসিক্খাপদৰণ্ণনা নিট্ঠিতা.

২. একত্থরণতুৰট্টনসিক্খাপদৰণ্ণনা

দুতিযে একং অত্থরণঞ্চেৰ পাৰুরণঞ্চ এতাসন্তি একত্থরণপাৰুরণা, সংহারিমানং পাৰারত্থরণকটসারকাদীনং একং অন্তং অত্থরিত্ৰা একং পারুপিত্ৰা তুৰট্টেন্তীনমেতং অধিৰচনং. পাচিত্তিযন্তি তংযেৰ অত্থরিত্ৰা তং পারুপিত্ৰা নিপজ্জন্তীনং পাচিত্তিযং.

সাৰত্থিযং সম্বহুলা ভিক্খুনিযো আরব্ভ এৰং তুৰট্টনৰত্থুস্মিং পঞ্ঞত্তং, তিকপাচিত্তিযং, অত্থরণে ৰা পাৰুরণে ৰা একস্মিং দুক্কটং, নানত্থরণপাৰুরণে দ্ৰিকদুক্কটং. তস্মিং পন নানত্থরণপাৰুরণসঞ্ঞায, ৰৰত্থানং দস্সেত্ৰা নিপজ্জন্তিযা, উম্মত্তিকাদীনঞ্চ অনাপত্তি. সেসং পঠমসদিসমেৰাতি.

একত্থরণতুৰট্টনসিক্খাপদৰণ্ণনা নিট্ঠিতা.

৩. অফাসুকরণসিক্খাপদৰণ্ণনা

ততিযে অফাসুন্তি ‘‘ইমিনা ইমিস্সা অফাসু ভৰিস্সতী’’তি অনাপুচ্ছা পুরতো চঙ্কমনট্ঠাননিস্সজ্জাদযো ৰা উদ্দিসউদ্দিসাপনপরিপুচ্ছনসজ্ঝাযং ৰা করোন্তিযা চঙ্কমনে নিৰত্তনগণনায, ঠানাদীসু পযোগগণনায, উদ্দেসাদীসু পদগণনায পাচিত্তিযং.

সাৰত্থিযং থুল্লনন্দং আরব্ভ সঞ্চিচ্চ অফাসুকরণৰত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং, ন অফাসুকামতায, আপুচ্ছা পুরতো চঙ্কমনাদীনি করোন্তিযা, উম্মত্তিকাদীনঞ্চ অনাপত্তি. উপসম্পন্নতা, অফাসুকামতা, অফাসুকরণং, অনাপুচ্ছনন্তি ইমানেত্থ চত্তারি অঙ্গানি. সমুট্ঠানাদীনি অদিন্নাদানসদিসানি, ইদং পন কিরিযাকিরিযং, দুক্খৰেদনন্তি.

অফাসুকরণসিক্খাপদৰণ্ণনা নিট্ঠিতা.

৪. নউপট্ঠাপনসিক্খাপদৰণ্ণনা

চতুত্থে দুক্খিতন্তি গিলানং. সহজীৰিনিন্তি সদ্ধিৰিহারিনিং. নেৰ উপট্ঠহেয্যাতি তস্সা উপট্ঠানং সযং ৰা অকরোন্তিযা, পরেহি ৰা অকারেন্তিযা ধুরং নিক্খিত্তমত্তে পাচিত্তিযং.

সাৰত্থিযং থুল্লনন্দং আরব্ভ দুক্খিতং সহজীৰিনিং অনুপট্ঠানৰত্থুস্মিং পঞ্ঞত্তং, অন্তেৰাসিনিযা ৰা অনুপসম্পন্নায ৰা দুক্কটং, দসসু অঞ্ঞতরন্তরাযে সতি পরিযেসিত্ৰা অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি. গিলানতা, সদ্ধিৰিহারিতা, অনুঞ্ঞাতকারণাভাৰো, উপট্ঠানে ধুরনিক্খেপোতি ইমানেত্থ চত্তারি অঙ্গানি. সমুট্ঠানাদীনি সমনুভাসনসদিসানীতি.

নউপট্ঠাপনসিক্খাপদৰণ্ণনা নিট্ঠিতা.

৫. নিক্কড্ঢনসিক্খাপদৰণ্ণনা

পঞ্চমে উপস্সযং দত্ৰাতি সকৰাটবদ্ধং অত্তনো পুগ্গলিকৰিহারং দত্ৰা. নিক্কড্ঢেয্যাতি বহূনিপি দ্ৰারানি একপ্পযোগেন নিক্কড্ঢেন্তিযা একা আপত্তি, নানাপযোগেহি পযোগগণনায আপত্তিযো, আণত্তিযম্পি এসেৰ নযো. সচে পন ‘‘ইমঞ্চিমঞ্চ দ্ৰারং অতিক্কামেহী’’তি আণাপেতি, একায আণত্তিযা এৰ দ্ৰারগণনায আপত্তিযো.

সাৰত্থিযং থুল্লনন্দং আরব্ভ এতাদিসে ৰত্থুস্মিং পঞ্ঞত্তং, তিকপাচিত্তিযং, অকৰাটবদ্ধতো দুক্কটং, অনুপসম্পন্নায তিকদুক্কটং, সকৰাটবদ্ধতো ৰা অকৰাটবদ্ধতো ৰা উভিন্নম্পি পরিক্খারনিক্কড্ঢনে দুক্কটমেৰ, সেসং সঙ্ঘিকৰিহারনিক্কড্ঢনসিক্খাপদে ৰুত্তনযমেৰাতি.

নিক্কড্ঢনসিক্খাপদৰণ্ণনা নিট্ঠিতা.

৬. সংসট্ঠসিক্খাপদৰণ্ণনা

ছট্ঠং উত্তানপদত্থমেৰ. সাৰত্থিযং চণ্ডকাল়িং আরব্ভ সংসট্ঠৰিহারৰত্থুস্মিং পঞ্ঞত্তং, সেসমেত্থ পঠমঅরিট্ঠসিক্খাপদে ৰুত্তৰিনিচ্ছযসদিসমেৰাতি.

সংসট্ঠসিক্খাপদৰণ্ণনা নিট্ঠিতা.

৭. অন্তোরট্ঠসিক্খাপদৰণ্ণনা

সত্তমে অন্তোরট্ঠেতি যস্স ৰিজিতে ৰিহরতি, তস্স রট্ঠে. অসত্থিকা চারিকন্তি ৰিনা সত্থেন গচ্ছন্তিযা, গামন্তরগণনায, অগামকে অরঞ্ঞে অদ্ধযোজনগণনায পাচিত্তিযং.

সাৰত্থিযং সম্বহুলা ভিক্খুনিযো আরব্ভ ৰুত্তনযেনেৰ দেসচারিকং পক্কমনৰত্থুস্মিং পঞ্ঞত্তং. সত্থেন সহ গচ্ছন্তিযা, খেমে অপ্পটিভযে, আপদাসু, উম্মত্তিকাদীনঞ্চ অনাপত্তি. অন্তোরট্ঠতা, অখেমতা, অনুঞ্ঞাতকারণাভাৰো, চারিকং পক্কমনন্তি ইমানেত্থ চত্তারি অঙ্গানি. সমুট্ঠানাদীনি এল়কলোমসদিসানীতি.

অন্তোরট্ঠসিক্খাপদৰণ্ণনা নিট্ঠিতা.

৮. তিরোরট্ঠসিক্খাপদৰণ্ণনা

অট্ঠমে তিরোরট্ঠেতি যস্স ৰিজিতে ৰিহরতি, তং ঠপেত্ৰা অঞ্ঞস্স রট্ঠে. সেসং সত্তমে ৰুত্তনযেনেৰ ৰেদিতব্বং, নগরং পনেত্থ রাজগহন্তি.

তিরোরট্ঠসিক্খাপদৰণ্ণনা নিট্ঠিতা.

৯. অন্তোৰস্সসিক্খাপদৰণ্ণনা

নৰমে অন্তোৰস্সন্তি পুরিমং ৰা তেমাসং, পচ্ছিমং ৰা তেমাসং অৰসিত্ৰা তস্স ৰস্সস্স অন্তোযেৰ. ইধ সত্তাহকরণীযেন ৰা কেনচি উব্বল়্হায ৰা আপদাসু ৰা গচ্ছন্তিযা উম্মত্তিকাদীনঞ্চ অনাপত্তি. সেসং অট্ঠমসদিসমেৰাতি.

অন্তোৰস্সসিক্খাপদৰণ্ণনা নিট্ঠিতা.

১০. চারিকনপক্কমনসিক্খাপদৰণ্ণনা

দসমে ৰস্সংৰুট্ঠাতি পুরিমং ৰা তেমাসং, পচ্ছিমং ৰা তেমাসং ৰুট্ঠা. ছপ্পঞ্চযোজনানীতি এত্থ পৰারেত্ৰা পঞ্চ যোজনানি গন্তুম্পি ৰট্টতি, ছসু ৰত্তব্বমেৰ নত্থি. সচে পন তীণি গন্ত্ৰা তেনেৰ মগ্গেন পচ্চাগচ্ছতি, ন ৰট্টতি, অঞ্ঞেন আগন্তুং ৰট্টতি. ‘‘ৰুত্তপ্পমাণং অদ্ধানং ন গচ্ছিস্সামী’’তি ধুরে নিক্খিত্তমত্তে পাচিত্তিযং.

রাজগহে সম্বহুলা ভিক্খুনিযো আরব্ভ ৰস্সং ৰসিত্ৰা চারিকং অপক্কমনৰত্থুস্মিং পঞ্ঞত্তং. অন্তরাযে সতি, পরিযেসিত্ৰা দুতিযিকং ভিক্খুনিং অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি. ৰস্সংৰুট্ঠতা, অনুঞ্ঞাতকারণাভাৰো, পঞ্চযোজনানতিক্কমোতি ইমানেত্থ তীণি অঙ্গানি. সমুট্ঠানাদীনি পঠমপারাজিকসদিসানি, ইদং পন অকিরিযং, দুক্খৰেদনন্তি.

চারিকনপক্কমনসিক্খাপদৰণ্ণনা নিট্ঠিতা.

তুৰট্টৰগ্গো চতুত্থো.