সততৰিহারছক্কৰণ্ণনা

৩২৮. নিচ্চৰিহারাতি সব্বদা পৰত্তনকৰিহারা. ঠপেত্ৰা হি সমাপত্তিৰেলং, ভৰঙ্গৰেলঞ্চ খীণাসৰা ইমিনাৰ ছল়ঙ্গুপেক্খাৰিহারেন সব্বকালং ৰিহরন্তি. চক্খুনা রূপং দিস্ৰাতি নিস্সযৰোহারেন ৰুত্তং. সসম্ভারকথা হেসা যথা ‘‘ধনুনা ৰিজ্ঝতী’’তি. তস্মা নিস্সযসীসেন নিস্সিতস্স গহণং দট্ঠব্বন্তি আহ ‘‘চক্খুৰিঞ্ঞাণেন দিস্ৰা’’তি. ইট্ঠে অরজ্জন্তোতি ইট্ঠে আরম্মণে রাগং অনুপ্পাদেন্তো মগ্গেন সমুচ্ছিন্নত্তা. নেৰ সুমনো হোতি গেহসিতপেমৰসেনপি. ন দুম্মনো পসাদঞ্ঞথত্তৰসেনপি. অসমপেক্খনেতি ইট্ঠেপি অনিট্ঠেপি মজ্ঝত্তেপি আরম্মণে ন সমং ন সম্মা অযোনিসো গহণে. যো অখীণাসৰানং মোহো উপ্পজ্জতি, তং অনুপ্পাদেন্তো মগ্গেনেৰ তস্স সমুগ্ঘাটিতত্তা. ঞাণুপেক্খাৰসেনেৰ উপেক্খকো ৰিহরতি মজ্ঝত্তো. অযঞ্চস্স পটিপত্তিৰেপুল্লপ্পত্তিযা, পঞ্ঞাৰেপুল্লপ্পত্তিযা ৰাতি আহ ‘‘সতিযা’’তিআদি. ছল়ঙ্গুপেক্খাতি ছসু দ্ৰারেসু পৰত্তা সতিসম্পজঞ্ঞস্স ৰসেন ছাৰযৰা উপেক্খা. ঞাণসম্পযুত্তচিত্তানি লব্ভন্তি তেহি ৰিনা সম্পজানতায অসম্ভৰতো. মহাচিত্তানীতি অট্ঠপি মহাকিরিযচিত্তানি লব্ভন্তি. সততৰিহারাতি ঞাণুপ্পত্তিপচ্চযরহিতকালেপি পৰত্তিভেদনতো. দস চিত্তানীতি অট্ঠ মহাকিরিযচিত্তানি হসিতুপ্পাদৰোট্ঠব্বনচিত্তেহি সদ্ধিং দস চিত্তানি লব্ভন্তি. অরজ্জনাদুস্সনৰসেন পৰত্তি তেসম্পি সাধারণাতি.‘‘উপেক্খকো ৰিহরতী’’তি ৰচনতো ছল়ঙ্গুপেক্খাৰসেন আগতানং ইমেসং সততৰিহারানং ‘‘সোমনস্সং কথং লব্ভতী’’তি চোদেত্ৰা ‘‘আসেৰনতো লব্ভতী’’তি সযমেৰ পরিহরতীতি. কিঞ্চাপি খীণাসৰো ইট্ঠানিট্ঠেপি আরম্মণে মজ্ঝত্তে ৰিয বহুলং উপেক্খকো ৰিহরতি অত্তনো পরিসুদ্ধপকতিভাৰাৰিজহনতো, কদাচি পন তথা চেতোভিসঙ্খারাভাৰে যং তং সভাৰতো ইট্ঠং আরম্মণং, তত্থ যাথাৰসভাৰগ্গহণৰসেনপি অরহতো চিত্তং সোমনস্সসহগতং হুত্ৰা পৰত্ততেৰ, তঞ্চ খো পুব্বাসেৰনৰসেন. তেনাহ ‘‘আসেৰনতো লব্ভতী’’তি.