ছক্কৰণ্ণনা

৩২৩. অত্তানং অধি অজ্ঝত্তা,অধি-সদ্দো সমাসৰিসযে অধিকারত্থং, পৰত্তিঅত্থঞ্চ গহেত্ৰা পৰত্ততীতি অত্তানং অধিকিচ্চ উদ্দিস্স পৰত্তা অজ্ঝত্তা; অজ্ঝত্তেসু ভৰানি অজ্ঝত্তিকানীতি নিযকজ্ঝত্তেসুপি অব্ভন্তরানি চক্খাদীনি ৰুচ্চন্তি, তানি পন যেন অজ্ঝত্তভাৰেন ‘‘অজ্ঝত্তিকানী’’তি ৰুচ্চন্তি, তমত্থং পাকটং কত্ৰা দস্সেন্তো ‘‘অজ্ঝত্তিকানী’’তি আহ. সদ্দত্থতো পন অজ্ঝত্তজ্ঝত্তানিযেৰ অজ্ঝত্তজ্ঝত্তিকানি যথা ‘‘ৰেনযিকো’’তি (ম. নি. ১.২৪৬; অ. নি. ৮.১১; পারা. ৮) দট্ঠব্বং. ততো অজ্ঝত্ততোতি ততো অজ্ঝত্তজ্ঝত্ততো, যানি অজ্ঝত্তিকানি ৰুত্তানি. অজ্ঝত্তিকানঞ্হি পটিযোগীনি বাহিরানি অজ্ঝত্তধম্মানং ৰিয বহিদ্ধাধম্মা. ‘‘অজ্ঝত্তিকানী’’তি হি সপরসন্তানিকানি চক্খাদীনি ৰুচ্চন্তি, তথা রূপাদীনি ‘‘বাহিরানী’’তি. অজ্ঝত্তানি পন সসন্তানিকা এৰ চক্খুরূপাদযো, ততো অঞ্ঞেৰ বহিদ্ধাতি. ‘‘ৰিঞ্ঞাণসমূহা’’তি এত্থ যদিপি তেসং ৰিঞ্ঞাণানং সমোধানং নত্থি ভিন্নকালিকত্তা, চিত্তেন পন একজ্ঝং অভিসংযূহনৰসেন সমূহতা ৰুত্তা যথা ‘‘ৰেদনাক্খন্ধো’’তি. চক্খুপসাদনিস্সিতন্তি চক্খুপসাদং নিস্সায পচ্চযং লভিত্ৰা উপ্পন্নং কুসলাকুসলৰিপাকৰিঞ্ঞাণং চক্খুৰিঞ্ঞাণতাসামঞ্ঞেন একজ্ঝং কত্ৰা ৰুত্তং. চক্খুসন্নিস্সিতো সম্ফস্সো, ন চক্খুদ্ৰারিকো. ইমে দস সম্ফস্সেতি ইমে পসাদৰত্থুকে দস ৰিপাকসম্ফস্সে ঠপেত্ৰা. এতেনেৰ নযেনাতি এতেন ফস্সে ৰুত্তেনেৰ নযেন. তণ্হাছক্কে তণ্হং আরব্ভ পৰত্তাপি তণ্হা ধম্মতণ্হাতি ৰেদিতব্বা.

অপ্পটিস্সযোতি অপ্পটিস্সৰো, ৰ-কারস্স য-কারং কত্ৰা নিদ্দেসো. গরুনা কিস্মিঞ্চি ৰুত্তে গারৰৰসেন পটিস্সৰনং পটিস্সৰো, পটিস্সৰভূতং, তংসভাগঞ্চ যং কিঞ্চি গারৰং, নত্থি এতস্মিং পটিস্সৰোতি অপ্পটিস্সৰো, গারৰরহিতো. তেনাহ ‘‘অনীচৰুত্তী’’তি. যথা চেতিযং উদ্দিস্স কতং সত্থু কতসদিসং, এৰং চেতিযস্স পুরতো কতং সত্থু পুরতো কতসদিসং এৰাতি আহ ‘‘পরিনিব্বুতে পনা’’তিআদি. সক্কচ্চং ন গচ্ছতীতি আদরং গারৰং উপ্পাদেত্ৰা ন উপসঙ্কমতি. যথা সিক্খায একদেসে কোপিতে, অগারৰে চ কতে সব্বা সিক্খা কুপ্পতি, সব্বত্থ চ অগারৰং কতং নাম হোতি সমুদাযতো সংৰরসমাদানং অৰযৰতো ভেদোতি. এৰং একভিক্খুস্মিংপি…পে… অগারৰো কতোৰ হোতি. অনাদরিযমত্তেনপি সিক্খায অপরিপূরিযেৰাতি আহ ‘‘অপূরযমানোৰ সিক্খায অগারৰো নামা’’তি. অপ্পমাদলক্খণং সম্মাপটিপত্তি. দুৰিধন্তি ধম্মামিসৰসেন দুৰিধং.

সোমনস্সূপৰিচারাতি সোমনস্সসহগতা ৰিচারা অধিপ্পেতা, উপসদ্দো চ নিপাতমত্তন্তি আহ ‘‘সোমনস্সসম্পযুত্তা ৰিচারা’’তি. তথা হিস্স অভিধম্মে (ধ. স. ৮) ‘‘চারো ৰিচারো…পে… উপৰিচারো’’তি নিদ্দেসো পৰত্তো. সোমনস্সকারণভূতন্তি সভাৰতো, সঙ্কপ্পতোপি সোমনস্সস্স উপ্পত্তিযা পচ্চযভূতং. কামং পরিত্তভূমকা ৰিতক্কৰিচারা অঞ্ঞমঞ্ঞমৰিযোগিনো, কিরিযাভেদতো পন পঠমাভিনিপাততায ৰিতক্কস্স ব্যাপারো সাতিসযো. ততো পরং ৰিচারস্সাতি তং সন্ধায ‘‘ৰিতক্কেত্ৰা’’তি পুব্বকালকিরিযাৰসেন ৰত্ৰা ‘‘ৰিচারেন পরিচ্ছিন্দতী’’তি ৰুত্তং. লদ্ধপুব্বাসেৰনস্স ৰিচারস্স ব্যাপারো পঞ্ঞা ৰিয হোতি. তথা হি ‘‘ৰিচারো ৰিচিকিচ্ছায পটিপক্খো’’তি পেটকে ৰুত্তং. ‘‘দিট্ঠিসামঞ্ঞগতো’’তি এত্থ যায দিট্ঠিযা পুগ্গলো দিট্ঠিসামঞ্ঞং গতো ৰুত্তো, সা পঠমমগ্গসম্মাদিট্ঠি কোসম্বকসুত্তে অধিপ্পেতোতি আহ ‘‘কোসম্বকসুত্তে পঠমমগ্গো কথিতো’’তি. ইধাতি ইমস্মিং সুত্তে. চতূসুপি মগ্গেসু সম্মাদিট্ঠি দিট্ঠিগ্গহণেন গহিতাতি আহ ‘‘চত্তারোপি মগ্গা কথিতা’’তি.