চূল়সীলৰণ্ণনা

৭. নিৰত্তো অমূলকত্তা ৰিস্সজ্জেতব্বতাভাৰতো. অনুৰত্ততিযেৰ ৰিস্সজ্জেতব্বতায অধিকতভাৰতো. অনুসন্ধিং দস্সেস্সতি ‘‘অত্থি ভিক্খৰে’’তিআদিনা. ওরন্তি ৰা অপরভাগো ‘‘ওরতো ভোগং, ওরং পার’’ন্তিআদীসু ৰিয. অথ ৰা হেট্ঠাঅত্থো ওর-সদ্দো ‘‘ওরং আগমনায যে পচ্চযা, তে ওরম্ভাগিযানি সংযোজনানী’’তিআদীসু ৰিয. সীলঞ্হি সমাধিপঞ্ঞাযো অপেক্খিত্ৰা অপরভাগো, হেট্ঠাভূতঞ্চ হোতীতি. সীলমত্তকন্তি এত্থ মত্ত-সদ্দো অপ্পকত্থো ৰা ‘‘ভেসজ্জমত্তা’’তিআদীসু (দী. নি. ১.৪৪৭) ৰিয. ৰিসেসনিৰত্তিঅত্থো ৰা ‘‘অৰিতক্কৰিচারমত্তা ধম্মা (ধ. স. তিকমাতিকা ৬), মনোমত্তা ধাতু মনোধাতূ’’তি চ আদীসু ৰিয. ‘‘অপ্পমত্তকং, ওরমত্তক’’ন্তি পদদ্ৰযেন সামঞ্ঞতো ৰুত্তোযেৰ হি অত্থো সীলমত্তকন্তি ৰিসেসৰসেন ৰুত্তো. অথ ৰা সীলেনপি তদেকদেসস্সেৰ সঙ্গহণত্থং অপ্পকত্থৰাচকো, ৰিসেসনিৰত্তিঅত্থো এৰ ৰা ‘‘সীলমত্তক’’ন্তি এত্থ মত্ত-সদ্দো ৰুত্তো. তথা হি ইন্দ্রিযসংৰরপচ্চযসন্নিস্সিতসীলানি ইধ দেসনং অনারুল়্হানি. ন হি তানি পাতিমোক্খআজীৰপারিসুদ্ধিসীলানি ৰিয সব্বপুথুজ্জনেসু পাকটানীতি. ‘‘উস্সাহং কত্ৰা’’তি এতেন ‘‘ৰদমানো’’তি এত্থ সত্তিঅত্থং মান-সদ্দং দস্সেতি.

অলঙ্করণং ৰিভূসনং অলঙ্কারো, কুণ্ডলাদিপসাধনং ৰা. ঊনট্ঠানপূরণং মণ্ডনং. মণ্ডনেতি মণ্ডনহেতু. অথ ৰা মণ্ডতীতি মণ্ডনো, মণ্ডনজাতিকো পুরিসো. বহুৰচনত্থে চ ইদং একৰচনং, মণ্ডনসীলেসূতি অত্থো. পরিপূরকারীতি এত্থ ইতি-সদ্দো আদিঅত্থো, পকারত্থো ৰা, তেন সকলম্পি সীলথোমন সুত্তং দস্সেতি. চন্দনন্তি চন্দনসহচরণতো চন্দনগন্ধো, তথা তগরাদীসুপি. সতঞ্চ গন্ধোতি এত্থ গন্ধো ৰিযাতি গন্ধোতি ৰুত্তো সীলনিবন্ধনো থুতিঘোসো. সীলঞ্হি কিত্তিযা নিমিত্তং. যথাহ ‘‘সীলৰতো সীলসম্পন্নস্স কল্যাণো কিত্তিসদ্দো অব্ভুগ্গচ্ছতী’’তি (দী. নি. ২.১৫০; অ. নি. ৫.২১৩; মহাৰ. ২৮৫). পৰাযতীতি পকাসতি. গন্ধাৰ গন্ধজাতা.

‘‘অপ্পকং বহুক’’ন্তি ইদং পারাপারং ৰিয অঞ্ঞমঞ্ঞং উপনিধায ৰুচ্চতীতি আহ ‘‘উপরিগুণে উপনিধাযা’’তি. সীলঞ্হীতি এত্থ হি-সদ্দো হেতুঅত্থো, তেন ইদং দস্সেতি ‘‘যস্মা সীলং কিঞ্চাপি পতিট্ঠাভাৰেন সমাধিস্স বহুকারং, পভাৰাদিগুণৰিসেসে পনস্স উপনিধায কলম্পি ন উপেতি, তথা সমাধি চ পঞ্ঞাযা’’তি. তেনেৰাহ ‘‘তস্মা’’তিআদি. ইদানি ‘‘কথ’’ন্তি পুচ্ছিত্ৰা সমাধিস্স আনুভাৰং ৰিত্থারতো ৰিভাৰেতি. ‘‘অভি…পে… মূলে’’তি ইদং যমকপাটিহারিযস্স সুপাকটভাৰদস্সনত্থং, অঞ্ঞেহি বোধিমূলঞাতিসমাগমাদীসু কতপাটিহারিযেহি ৰিসেসনত্থঞ্চ ৰুত্তং. যমকপাটিহারিযকরণত্থায হি ভগৰতো চিত্তে উপ্পন্নে তদনুচ্ছৰিকং ঠানং ইচ্ছিতব্বন্তি রতনমণ্ডপাদি সক্কস্স দেৰরঞ্ঞো আণায ৰিস্সকম্মুনা নিম্মিতন্তি ৰদন্তি, ভগৰতাৰ নিম্মিতন্তি অপরে. ‘‘যো কোচি এৰরূপং পাটিহারিযং কাতুং সমত্থো অত্থি চে, আগচ্ছতূ’’তি চোদনাসদিসত্তা ৰুত্তং ‘‘অত্তাদানপরিদীপন’’ন্তি. তত্থ অত্তাদানং অনুযোগো, তিত্থিযানং তথা কাতুং অসমত্থত্তা, ‘‘করিস্সামা’’তি পুব্বে উট্ঠিতত্তা তিত্থিযপরিমদ্দনং.

উপরিমকাযতোতিআদি পটিসম্ভিদামগ্গে (পটি. ম. ১.১১৬).

তত্থাযং পাল়িসেসো –

‘‘হেট্ঠিমকাযতো অগ্গিক্খন্ধো পৰত্ততি, উপরিমকাযতো উদকধারা পৰত্ততি. পুরত্থিমকাযতো অগ্গি, পচ্ছিমকাযতো উদকং. পচ্ছিমকাযতো অগ্গি, পুরত্থিমকাযতো উদকং. দক্খিণঅক্খিতো অগ্গি, ৰামঅক্খিতো উদকং. ৰামঅক্খিতো অগ্গি, দক্খিণঅক্খিতো উদকং. দক্খিণকণ্ণসোততো অগ্গি, ৰামকণ্ণসোততো উদকং. ৰামকণ্ণসোততো অগ্গি, দক্খিণকণ্ণসোততো উদকং. দক্খিণনাসিকাসোততো অগ্গি, ৰামনাসিকাসোততো উদকং. ৰামনাসিকাসোততো অগ্গি, দক্খিণনাসিকাসোততো উদকং. দক্খিণঅংসকূটতো অগ্গি, ৰামঅংসকূটতো উদকং. ৰামঅংসকূটতো অগ্গি, দক্খিণঅংসকূটতো উদকং. দক্খিণহত্থতো অগ্গি, ৰামহত্থতো উদকং. ৰামহত্থতো অগ্গি, দক্খিণহত্থতো উদকং. দক্খিণপস্সতো অগ্গি, ৰামপস্সতো উদকং. ৰামপস্সতো অগ্গি, দক্খিণপস্সতো উদকং. দক্খিণপাদতো অগ্গি, ৰামপাদতো উদকং. ৰামপাদতো অগ্গি, দক্খিণপাদতো উদকং. অঙ্গুলঙ্গুলেহি অগ্গি, অঙ্গুলন্তরিকাহি উদকং. অঙ্গুলন্তরিকাহি অগ্গি, অঙ্গুলঙ্গুলেহি উদকং. একেকলোমতো অগ্গি, একেকলোমতো উদকং. লোমকূপতো লোমকূপতো অগ্গিক্খন্ধো পৰত্ততি, লোমকূপতো লোমকূপতো উদকধারা পৰত্ততী’’তি (পটি. ম. ১.১১৬).

অট্ঠকথাযং পন ‘‘একেকলোমকূপতো’’তি আগতং.

‘‘ছন্নং ৰণ্ণানন্তি আদিনযপ্পৰত্ত’’ন্তি এত্থাপি নীলানং পীতকানং লোহিতকানং ওদাতানং মঞ্জিট্ঠানং পভস্সরানন্তি অযং পাল়িসেসো. ‘‘সুৰণ্ণৰণ্ণা রস্মিযো’’তি ইদং তাসং যেভুয্যতায ৰুত্তং. ৰিত্থারেতব্বন্তি এত্থাপি ‘‘সত্থা তিট্ঠতি, নিম্মিতো চঙ্কমতি ৰা নিসীদতি ৰা সেয্যং ৰা কপ্পেতী’’তিআদিনা চতূসু ইরিযাপথেসু একেকমূলকা সত্থুৰসেন চত্তারো, নিম্মিতৰসেন চত্তারোতি সব্বেৰ অট্ঠ ৰারে ৰিত্থারেতব্বং.

মধুপাযাসন্তি মধুসিত্তং পাযাসং. অত্তা মিত্তো মজ্ঝত্তো ৰেরীতি চতূসু সীমসম্ভেদৰসেন চতুরঙ্গসমন্নাগতং মেত্তাকম্মট্ঠানং. ‘‘চতুরঙ্গসমন্নাগত’’ন্তি ইদং পন ‘‘ৰীরিযাধিট্ঠান’’ন্তি এতেনাপি যোজেতব্বং. তত্থ ‘‘কামং তচো চ ন্হারু চা’’তিআদিপাল়ি (ম. নি. ২.১৮৪; সং. নি. ২.২২; অ. নি. ২.৫; অ. নি. ৮.১৩; মহানি. ১৯৬) ৰসেন চতুরঙ্গসমন্নাগততা ৰেদিতব্বা. ‘‘কিচ্ছং ৰতাযং লোকো আপন্নো’’তিআদিনা (দী. নি. ২.৫৭; সং. নি. ২.৪) জরামরণমুখেন পচ্চযাকারে ঞাণং ওতারেত্ৰা. আনাপানচতুত্থজ্ঝানন্তি এত্থাপি ‘‘সব্ববুদ্ধানং আচিণ্ণ’’ন্তি পদং ৰিভত্তিৰিপরিণামং কত্ৰা যোজেতব্বং. তম্পি হি সব্ববুদ্ধানং আচিণ্ণমেৰাতি ৰদন্তি. ছত্তিংসকোটিসতসহস্সমুখেন মহাৰজিরঞাণগব্ভং গণ্হাপেন্তো ৰিপস্সনংৰড্ঢেত্ৰা. দ্ৰত্তিংসদোণগণ্হনপ্পমাণং কুণ্ডং কোলম্বো. দরিভাগো কন্দরো. চক্কৰাল়পাদেসু মহাসমুদ্দো চক্কৰাল়মহাসমুদ্দো.

‘‘দুৰে পুথুজ্জনা’’তিআদি পুথুজ্জনে লব্ভমানৰিভাগদস্সনত্থং ৰুত্তং, ন মূলপরিযাযৰণ্ণনাদীসু ৰিয পুথুজ্জনৰিসেসনিদ্ধারণত্থং. সব্বোপি হি পুথুজ্জনো ভগৰতো উপরি গুণে ৰিভাৰেতুং ন সক্কোতি, তিট্ঠতু পুথুজ্জনো, সাৰকপচ্চেকবুদ্ধানম্পি অৰিসযা বুদ্ধগুণা. তথা হি ৰক্খতি ‘‘সোতাপন্না’’তিআদি (দী. নি. অট্ঠ. ১.৮). ৰাচুগ্গতকরণং উগ্গহো. অত্থপরিপুচ্ছনং পরিপুচ্ছা. অট্ঠকথাৰসেন অত্থস্স সৰনং সৰনং. ব্যঞ্জনত্থানং সুনিক্খেপসুদস্সনেন ধম্মস্স পরিহরণং ধারণং. এৰং সুতধাতপরিচিতানং মনসানুপেক্খনং পচ্চৰেক্খণং. বহূনং নানপ্পকারানং কিলেসানং সক্কাযদিট্ঠিযা চ অৰিহতত্তা তা জনেন্তি, তাহি ৰা জনিতাতি পুথুজ্জনা. অৰিঘাতমেৰ ৰা জন-সদ্দো ৰদতি. পুথু সত্থারানং মুখুল্লোকিকাতি এত্থ পুথূ জনা সত্থুপটিঞ্ঞা এতেসন্তি পুথুজ্জনাতি ৰচনত্থো. পুথু…পে… অৰুট্ঠিতাতি এত্থ জনেতব্বা, জাযন্তি ৰা এত্থাতি জনা, গতিযো. পুথূ জনা এতেসন্তি পুথুজ্জনা. ইতো পরে জাযন্তি এতেহীতি জনা, অভিসঙ্খারাদযো. তে এতেসং পুথূ ৰিজ্জন্তীতি পুথুজ্জনা. অভিসঙ্খরণাদি অত্থো এৰ ৰা জন-সদ্দো দট্ঠব্বো. কামরাগভৰরাগদিট্ঠিঅৰিজ্জা ওঘা. রাগগ্গিআদযো সন্তাপা. তেযেৰ, সব্বেপি ৰা কিলেসা পরিল়াহা. পুথু পঞ্চসু কামগুণেসু রত্তাতি এত্থ জাযতীতি জনো, রাগো গেধোতি এৰং আদিকো. পুথু জনো এতেসন্তি পুথুজ্জনা, পুথূসু ৰা জনা জাতা রত্তাতি এৰং রাগাদিঅত্থো এৰ ৰা জন-সদ্দো দট্ঠব্বো. পলিবুদ্ধাতি সম্বুদ্ধা, উপদ্দুতা ৰা. ‘‘পুথূনং গণনপথমতীতান’’ন্তিআদিনা পুথূ জনা পুথুজ্জনাতি দস্সেতি.

যেহি গুণৰিসেসেহি নিমিত্তভূতেহি ভগৰতি তথাগত-সদ্দো পৰত্তো, তংদস্সনত্থং ‘‘অট্ঠহি কারণেহি ভগৰা তথাগতো’’তিআদিমাহ. গুণনেমিত্তকানেৰ হি ভগৰতো সব্বানি নামানি. যথাহ –

‘‘অসঙ্খ্যেয্যানি নামানি, সগুণেন মহেসিনো;

গুণেন নামমুদ্ধেয্যং, অপি নামসহস্সতো’’তি. (ধ. স. অট্ঠ. ১৩১৩; উদা. অট্ঠ. ৫৩; পটি. ম. অট্ঠ. ১.১.৭৬);

তথা আগতোতি এত্থ আকারনিযমনৰসেন ওপম্মসম্পটিপাদনত্থো তথা-সদ্দো. সামঞ্ঞজোতনায ৰিসেসাৰট্ঠানতো পটিপদাগমনত্থো আগত-সদ্দো, ন ঞাণগমনত্থো ‘‘তথলক্খণং আগতো’’তিআদীসু (দী. নি. অট্ঠ. ১.৭; ম. নি. অট্ঠ. ১.১২; সং. নি. অট্ঠ. ২.৪.৭৮; অ. নি. অট্ঠ. ১.১.১৭০; উদা. অট্ঠ. ১৮; পটি. ম. অট্ঠ. ১.১.৩৭; থেরগা. অট্ঠ. ১.৩; ইতিৰু. অট্ঠ. ৩৮; মহানি. অট্ঠ. ১৪) ৰিয, নাপি কাযগমনাদিঅত্থো ‘‘আগতো খো মহাসমণো, মাগধানং গিরিব্বজ’’ন্তিআদীসু (মহাৰ. ৬২) ৰিয. তত্থ যদাকারনিযমনৰসেন ওপম্মসম্পটিপাদনত্থো তথা-সদ্দো, তং করুণাপধানত্তা মহাকরুণামুখেন পুরিমবুদ্ধানং আগমনপটিপদং উদাহরণৰসেন সামঞ্ঞতো দস্সেন্তো যংতংসদ্দানং একন্তসম্বন্ধভাৰতো ‘‘যথা সব্বলোক…পে… আগতা’’তি আহ. তং পন পটিপদং মহাপদানসুত্তাদীসু (দী. নি. ২.৪) সম্বহুলনিদ্দেসেন সুপাকটানং আসন্নানঞ্চ ৰিপস্সীআদীনং ছন্নং সম্মাসম্বুদ্ধানং ৰসেন নিদস্সেন্তো ‘‘যথা ৰিপস্সী ভগৰা’’তিআদিমাহ. তত্থ যেন অভিনীহারেনাতি মনুস্সত্তলিঙ্গসম্পত্তিহেতুসত্থারদস্সনপব্বজ্জাঅভিঞ্ঞাদিগুণসম্পত্তিঅধিকারছন্দানং ৰসেন অট্ঠঙ্গসমন্নাগতেন কাযপ্পণিধানমহাপণিধানেন. সব্বেসঞ্হি বুদ্ধানং কাযপ্পণিধানং ইমিনাৰ অভিনীহারেন সমিজ্ঝতীতি. এৰং মহাভিনীহারৰসেন ‘‘তথাগতো’’তি পদস্স অত্থং দস্সেত্ৰা ইদানি পারমীপূরণৰসেন দস্সেতুং ‘‘যথা ৰিপস্সী ভগৰা…পে… কস্সপো ভগৰা দানপারমিং পূরেত্ৰা’’তিআদিমাহ.

এত্থ চ সুত্তন্তিকানং মহাবোধিযানপটিপদায কোসল্লজননত্থং পারমীসু অযং ৰিত্থারকথা – কা পনেতা পারমিযো? কেনট্ঠেন পারমিযো? কতিৰিধা চেতা? কো তাসং কমো? কানি লক্খণরসপচ্চুপট্ঠানপদট্ঠানানি? কো পচ্চযো? কো সংকিলেসো? কিং ৰোদানং? কো পটিপক্খো? কা পটিপত্তি? কো ৰিভাগো? কো সঙ্গহো? কো সম্পাদনূপাযো? কিত্তকেন কালেন সম্পাদনং? কো আনিসংসো? কিং চেতাসং ফলন্তি?

তত্রিদং ৰিস্সজ্জনং – কা পনেতা পারমিযোতি. তণ্হামানাদীহি অনুপহতা করুণূপাযকোসল্লপরিগ্গহিতা দানাদযো গুণা পারমিযো.

কেনট্ঠেন পারমিযোতি দানসীলাদিগুণৰিসেসযোগেন সত্তুত্তমতায পরমা মহাসত্তা বোধিসত্তা, তেসং ভাৰো, কম্মং ৰা পারমী, দানাদিকিরিযা. অথ ৰা পরতীতি পরমো, দানাদিগুণানং পূরকো পালকো চ বোধিসত্তো. পরমস্স অযং, পরমস্স ৰা ভাৰো, কম্মং ৰা পারমী, দানাদিকিরিযাৰ. অথ ৰা পরং সত্তং অত্তনি মৰতি বন্ধতি গুণৰিসেসযোগেন, পরং ৰা অধিকতরং মজ্জতি সুজ্ঝতি সংকিলেসমলতো, পরং ৰা সেট্ঠং নিব্বানং ৰিসেসেন মযতি গচ্ছতি, পরং ৰা লোকং পমাণভূতেন ঞাণৰিসেসেন ইধলোকং ৰিয মুনাতি পরিচ্ছিন্দতি, পরং ৰা অতিৰিয সীলাদিগুণগণং অত্তনো সন্তানে মিনোতি পক্খিপতি, পরং ৰা অত্তভূততো ধম্মকাযতো অঞ্ঞং, পটিপক্খং ৰা তদনত্থকরং কিলেসচোরগণং মিনাতি হিংসতীতি পরমো, মহাসত্তো. ‘‘পরমস্স অয’’ন্তিআদি ৰুত্তনযেনেৰ যোজেতব্বং. পারে ৰা নিব্বানে মজ্জতি সুজ্ঝতি সত্তে চ সোধেতি, তত্থ ৰা সত্তে মৰতি বন্ধতি যোজেতি, তং ৰা মযতি গচ্ছতি গমেতি চ, মুনাতি ৰা তং যাথাৰতো, তত্থ ৰা সত্তে মিনোতি পক্খিপতি, কিলেসারিং ৰা সত্তানং তত্থ মিনাতি হিংসতীতি পারমী, মহাপুরিসো. তস্স ভাৰো, কম্মং ৰা পারমিতা, দানাদিকিরিযাৰ. ইমিনা নযেন পারমীনং সদ্দত্থো ৰেদিতব্বো.

কতিৰিধাতি সঙ্খেপতো দসৰিধা, তা পন পাল়িযং সরূপতো আগতাযেৰ. যথাহ –

‘‘ৰিচিনন্তো তদা দক্খিং, পঠমং দানপারমি’’ন্তিআদি (বু. ৰং. ১১৬).

যথা চাহ –

‘‘কতি নু খো ভন্তে বুদ্ধকারকা ধম্মা? দস খো সারিপুত্ত বুদ্ধকারকা ধম্মা. কতমে দস? দানং খো সারিপুত্ত বুদ্ধকারকো ধম্মো, সীলং নেক্খম্মং পঞ্ঞা ৰীরিযং খন্তি সচ্চমধিট্ঠানং মেত্তা উপেক্খা বুদ্ধকারকো ধম্মো, ইমে খো সারিপুত্ত দস বুদ্ধকারকা ধম্মাতি. ইদমৰোচ ভগৰা, ইদং ৰত্ৰান সুগতো অথাপরং এতদৰোচ সত্থা –

‘দানং সীলঞ্চ নেক্খম্মং, পঞ্ঞা ৰীরিযেন পঞ্চমং;

খন্তি সচ্চং অধিট্ঠানং, মেত্তুপেক্খাতি তে দসা’তি’’.

কেচি পন ‘‘ছব্বিধা’’তি ৰদন্তি, তং এতাসং সঙ্গহৰসেন ৰুত্তং. সো পন সঙ্গহো পরতো আৰিভৰিস্সতি.

কো তাসং কমোতি এত্থ কমো নাম দেসনাক্কমো, সো চ পঠমসমাদানহেতুকো, সমাদানং পৰিচযহেতুকং, ইতি যথা আদিম্হি পৰিচিতা সমাদিন্না চ, তথা দেসিতা. তত্থ চ দানং সীলস্স বহূপকারং সুকরঞ্চাতি তং আদিম্হি ৰুত্তং. দানং সীলপরিগ্গহিতং মহপ্ফলং হোতি মহানিসংসন্তি দানানন্তরং সীলং ৰুত্তং. সীলং নেক্খম্মপরিগ্গহিতং, নেক্খম্মং পঞ্ঞাপরিগ্গহিতং, পঞ্ঞা ৰীরিযপরিগ্গহিতা, ৰীরিযং খন্তিপরিগ্গহিতং, খন্তি সচ্চপরিগ্গহিতা, সচ্চং অধিট্ঠানপরিগ্গহিতং, অধিট্ঠানং মেত্তাপরিগ্গহিতং, মেত্তা উপেক্খাপরিগ্গহিতা মহপ্ফলা হোতি মহানিসংসাতি মেত্তানন্তরং উপেক্খা ৰুত্তা. উপেক্খা পন করুণাপরিগ্গহিতা, করুণা চ উপেক্খাপরিগ্গহিতাতি ৰেদিতব্বা. কথং পন মহাকারুণিকা বোধিসত্তা সত্তেসু উপেক্খকা হোন্তীতি? উপেক্খিতব্বযুত্তেসু কঞ্চি কালং উপেক্খকা হোন্তি, ন পন সব্বত্থ, সব্বদা চাতি কেচি. অপরে পন ন সত্তেসু উপেক্খকা, সত্তকতেসু পন ৰিপ্পকারেসু উপেক্খকা হোন্তীতি.

অপরো নযো – পচুরজনেসুপি পৰত্তিযা সব্বসত্তসাধারণত্তা, অপ্পফলত্তা, সুকরত্তা চ আদিম্হি দানং ৰুত্তং. সীলেনদাযকপটিগ্গাহকসুদ্ধিতো, পরানুগ্গহং ৰত্ৰা পরপীল়ানিৰত্তিৰচনতো, কিরিযধম্মং ৰত্ৰা অকিরিযধম্মৰচনতো, ভোগসম্পত্তিহেতুং ৰত্ৰা ভৰসম্পত্তিহেতুৰচনতো চ দানস্স অনন্তরং সীলং ৰুত্তং. নেক্খম্মেন সীলসম্পত্তিসিদ্ধিতো, কাযৰচীসুচরিতং ৰত্ৰা মনোসুচরিতৰচনতো, ৰিসুদ্ধসীলস্স সুখেনেৰ ঝানসমিজ্ঝনতো, কম্মাপরাধপ্পহানেন পযোগসুদ্ধিং ৰত্ৰা কিলেসাপরাধপ্পহানেন আসযসুদ্ধিৰচনতো, ৰীতিক্কমপ্পহানেন চিত্তস্স পরিযুট্ঠানপ্পহানৰচনতো চ সীলস্স অনন্তরং নেক্খম্মং ৰুত্তং. পঞ্ঞায নেক্খম্মস্স সিদ্ধিপরিসুদ্ধিতো, ঝানাভাৰে পঞ্ঞাভাৰৰচনতো. সমাধিপদট্ঠানা হি পঞ্ঞা, পঞ্ঞাপচ্চুপট্ঠানো চ সমাধি. সমথনিমিত্তং ৰত্ৰা উপেক্খানিমিত্তৰচনতো, পরহিতজ্ঝানেন পরহিতকরণূপাযকোসল্লৰচনতো চ নেক্খম্মস্স অনন্তরং পঞ্ঞা ৰুত্তা. ৰীরিযারম্ভেন পঞ্ঞাকিচ্চসিদ্ধিতো, সত্তসুঞ্ঞতাধম্মনিজ্ঝানক্খন্তিং ৰত্ৰা সত্তহিতায আরম্ভস্স অচ্ছরিযতাৰচনতো, উপেক্খানিমিত্তং ৰত্ৰা পগ্গহনিমিত্তৰচনতো, নিসম্মকারিতং ৰত্ৰা উট্ঠানৰচনতো চ. নিসম্মকারিনো হি উট্ঠানং ফলৰিসেসমাৰহতীতি পঞ্ঞায অনন্তরং ৰীরিযং ৰুত্তং.

ৰীরিযেন তিতিক্খাসিদ্ধিতো. ৰীরিযৰা হি আরদ্ধৰীরিযত্তা সত্তসঙ্খারেহি উপনীতং দুক্খং অভিভুয্য ৰিহরতি ৰীরিযস্স তিতিক্খালঙ্কারভাৰতো. ৰীরিযৰতো হি তিতিক্খা সোভতি. পগ্গহনিমিত্তং ৰত্ৰা সমথনিমিত্তৰচনতো, অচ্চারম্ভেন উদ্ধচ্চদোসপ্পহানৰচনতো. ধম্মনিজ্ঝানক্খন্তিযা হি উদ্ধচ্চদোসো পহীযতি. ৰীরিযৰতো সাতচ্চকরণৰচনতো. খন্তিবহুলো হি অনুদ্ধতো সাতচ্চকারী হোতি. অপ্পমাদৰতো পরহিতকিরিযারম্ভে পচ্চুপকারতণ্হাভাৰৰচনতো. যাথাৰতো ধম্মনিজ্ঝানে হি সতি তণ্হা ন হোতি. পরহিতারম্ভে পরমেপি পরকতদুক্খসহনভাৰৰচনতো চ ৰীরিযস্স অনন্তরং খন্তি ৰুত্তা. সচ্চেন খন্তিযা চিরাধিট্ঠানতো, অপকারিনো অপকারখন্তিং ৰত্ৰা তদুপকারকরণে অৰিসংৰাদৰচনতো, খন্তিযা অপৰাদৰাচাৰিকম্পনেন ভূতৰাদিতায অৰিজহনৰচনতো, সত্তসুঞ্ঞতাধম্মনিজ্ঝানক্খন্তিং ৰত্ৰা তদুপব্রূহিতঞাণসচ্চৰচনতো চ খন্তিযা অনন্তরং সচ্চং ৰুত্তং. অধিট্ঠানেন সচ্চসিদ্ধিতো. অচলাধিট্ঠানস্স হি ৰিরতি সিজ্ঝতি. অৰিসংৰাদিতং ৰত্ৰা তত্থ অচলভাৰৰচনতো. সচ্চসন্ধো হি দানাদীসু পটিঞ্ঞানুরূপং নিচ্চলোৰ পৰত্ততি. ঞাণসচ্চং ৰত্ৰা সম্ভারেসু পৰত্তিনিট্ঠাপনৰচনতো. যথাভূতঞাণৰা হি বোধিসম্ভারেসু অধিতিট্ঠতি, তে চ নিট্ঠাপেতি পটিপক্খেহি অকম্পিযভাৰতোতি সচ্চস্স অনন্তরং অধিট্ঠানং ৰুত্তং. মেত্তায পরহিতকরণসমাদানাধিট্ঠানসিদ্ধিতো, অধিট্ঠানং ৰত্ৰা হিতূপসংহারৰচনতো. বোধিসম্ভারে হি অধিতিট্ঠমানো মেত্তাৰিহারী হোতি. অচলাধিট্ঠানস্স সমাদানাৰিকোপনতো, সমাদানসম্ভৰতো চ অধিট্ঠানস্স অনন্তরং মেত্তা ৰুত্তা. উপেক্খায মেত্তাৰিসুদ্ধিতো, সত্তেসু হিতূপসংহারং ৰত্ৰা তদপরাধেসু উদাসীনতাৰচনতো, মেত্তাভাৰনং ৰত্ৰা তন্নিস্সন্দভাৰনাৰচনতো, ‘‘হিতকামসত্তেপি উপেক্খকো’’তি অচ্ছরিযগুণভাৰৰচনতো চ মেত্তায অনন্তরং উপেক্খা ৰুত্তাতি এৰমেতাসং কমো ৰেদিতব্বো.

কানি লক্খণরসপচ্চুপট্ঠানপদট্ঠানানীতি? এত্থ অৰিসেসেন তাৰ সব্বাপি পারমিযো পরানুগ্গহলক্খণা, পরেসং উপকারকরণরসা, অৰিকম্পনরসা ৰা, হিতেসিতাপচ্চুপট্ঠানা, বুদ্ধত্তপচ্চুপট্ঠানা ৰা, মহাকরুণাপদট্ঠানা, করুণূপাযকোসল্লপদট্ঠানা ৰা.

ৰিসেসেন পন যস্মা করুণূপাযকোসল্লপরিগ্গহিতা অত্তুপকরণপরিচ্চাগচেতনা দানপারমিতা. করুণূপাযকোসল্লপরিগ্গহিতং কাযৰচীসুচরিতং অত্থতো অকত্তব্বৰিরতি, কত্তব্বকরণচেতনাদযো চ সীলপারমিতা. করুণূপাযকোসল্লপরিগ্গহিতো আদীনৰদস্সনপুব্বঙ্গমো কামভৰেহি নিক্খমনচিত্তুপ্পাদো নেক্খম্মপারমিতা. করুণূপাযকোসল্লপরিগ্গহিতো ধম্মানং সামঞ্ঞৰিসেসলক্খণাৰবোধো পঞ্ঞাপারমিতা. করুণূপাযকোসল্লপরিগ্গহিতো কাযচিত্তেহি পরহিতারম্ভো ৰীরিযপারমিতা. করুণূপাযকোসল্লপরিগ্গহিতং সত্তসঙ্খারাপরাধসহনং অদোসপ্পধানো তদাকারপ্পৰত্তো চিত্তুপ্পাদো খন্তিপারমিতা. করুণূপাযকোসল্লপরিগ্গহিতং ৰিরতিচেতনাদিভেদং অৰিসংৰাদনং সচ্চপারমিতা. করুণূপাযকোসল্লপরিগ্গহিতং অচলসমাদানাধিট্ঠানং তদাকারপ্পৰত্তো চিত্তুপ্পাদো অধিট্ঠানপারমিতা. করুণূপাযকোসল্লপরিগ্গহিতো লোকস্স হিতূপসংহারো অত্থতো অব্যাপাদো মেত্তাপারমিতা. করুণূপাযকোসল্লপরিগ্গহিতা অনুনযপটিঘৰিদ্ধংসিনী ইট্ঠানিট্ঠেসু সত্তসঙ্খারেসু সমপ্পৰত্তি উপেক্খাপারমিতা.

তস্মা পরিচ্চাগলক্খণং দানং, দেয্যধম্মে লোভৰিদ্ধংসনরসং, অনাসত্তিপচ্চুপট্ঠানং, ভৰৰিভৰসম্পত্তিপচ্চুপট্ঠানং ৰা, পরিচ্চজিতব্বৰত্থুপদট্ঠানং. সীলনলক্খণং সীলং, সমাধানলক্খণং, পতিট্ঠানলক্খণঞ্চাতি ৰুত্তং হোতি. দুস্সীল্যৰিদ্ধংসনরসং, অনৰজ্জরসং ৰা, সোচেয্যপচ্চুপট্ঠানং, হিরোত্তপ্পপদট্ঠানং. কামতো ভৰতো চ নিক্খমনলক্খণং নেক্খম্মং, তদাদীনৰৰিভাৰনরসং, ততো এৰ ৰিমুখভাৰপচ্চুপট্ঠানং, সংৰেগপদট্ঠানং. যথাসভাৰপটিৰেধলক্খণা পঞ্ঞা, অক্খলিতপটিৰেধলক্খণা ৰা কুসলিস্সাসখিত্তউসুপটিৰেধো ৰিয, ৰিসযোভাসনরসা পদীপো ৰিয, অসম্মোহপচ্চুপট্ঠানা অরঞ্ঞগতসুদেসকো ৰিয, সমাধিপদট্ঠানা, চতুসচ্চপদট্ঠানা ৰা. উস্সাহলক্খণং ৰীরিযং, উপত্থম্ভনরসং, অসংসীদনপচ্চুপট্ঠানং, ৰীরিযারম্ভৰত্থু (অ. নি. ৮.৮০) পদট্ঠানং, সংৰেগপদট্ঠানং ৰা. খমনলক্খণা খন্তি, ইট্ঠানিট্ঠসহনরসা, অধিৰাসনপচ্চুপট্ঠানা, অৰিরোধপচ্চুপট্ঠানা ৰা, যথাভূতদস্সনপদট্ঠানা. অৰিসংৰাদনলক্খণং সচ্চং, যাথাৰৰিভাৰনরসং [যথাসভাৰৰিভাৰনরসং (চরিযা. অট্ঠ. পকিণ্ণককথায)], সাধুতাপচ্চুপট্ঠানং, সোরচ্চপদট্ঠানং. বোধিসম্ভারেসু অধিট্ঠানলক্খণং অধিট্ঠানং, তেসং পটিপক্খাভিভৰনরসং, তত্থ অচলতাপচ্চুপট্ঠানং, বোধিসম্ভারপদট্ঠানং. হিতাকারপ্পৰত্তিলক্খণা মেত্তা, হিতূপসংহাররসা, আঘাতৰিনযনরসা ৰা, সোম্মভাৰপচ্চুপট্ঠানা, সত্তানং মনাপভাৰদস্সনপদট্ঠানা. মজ্ঝত্তাকারপ্পৰত্তিলক্খণা উপেক্খা, সমভাৰদস্সনরসা, পটিঘানুনযৰূপসমপচ্চুপট্ঠানা, কম্মস্সকতাপচ্চৰেক্খণপদট্ঠানা. এত্থ চ করুণূপাযকোসল্লপরিগ্গহিততা দানাদীনং পরিচ্চাগাদিলক্খণস্স ৰিসেসনভাৰেন ৰত্তব্বা, যতো তানি পারমীসঙ্খ্যং লভন্তীতি.

কো পচ্চযোতি অভিনীহারো পচ্চযো. যো হি অযং ‘‘মনুস্সত্তং লিঙ্গসম্পত্তী’’তিআদি (বু. ৰং. ২.৫৯) অট্ঠধম্মসমোধানসম্পাদিতো ‘‘তিণ্ণো তারেয্যং, মুত্তো মোচেয্যং, বুদ্ধো বোধেয্যং, সুদ্ধো সোধেয্যং, দন্তো দমেয্যং, সন্তো সমেয্যং, অস্সত্থো অস্সাসেয্যং, পরিনিব্বুতো পরিনিব্বাপেয্য’’ন্তিআদিনা (চরিযা. অট্ঠ. পকিণ্ণককথায) পৰত্তো অভিনীহারো, সো অৰিসেসেন সব্বপারমীনং পচ্চযো. তপ্পৰত্তিযা হি উদ্ধং পারমীনং পৰিচযুপট্ঠানসমাদানাধিট্ঠাননিপ্ফত্তিযো মহাপুরিসানং সম্ভৰন্তি.

যথা চ অভিনীহারো, এৰং মহাকরুণা, উপাযকোসল্লঞ্চ. তত্থ উপাযকোসল্লং নাম দানাদীনং বোধিসম্ভারভাৰস্স নিমিত্তভূতা পঞ্ঞা, যাহি করুণূপাযকোসল্লতাহি মহাপুরিসানং অত্তসুখনিরপেক্খতা, নিরন্তরং পরহিতকরণপসুততা, সুদুক্করেহিপি মহাবোধিসত্তচরিতেহি ৰিসাদাভাৰো, পসাদসম্বুদ্ধিদস্সনসৰনানুস্সরণাৰত্থাসুপি সত্তানং হিতসুখপটিলাভহেতুভাৰো চ সম্পজ্জতি. তথা হি পঞ্ঞায বুদ্ধভাৰসিদ্ধি, করুণায বুদ্ধকম্মসিদ্ধি. পঞ্ঞায সযং তরতি, করুণায পরে তারেতি. পঞ্ঞায পরদুক্খং পরিজানাতি, করুণায পরদুক্খপটিকারং আরভতি. পঞ্ঞায চ দুক্খে নিব্বিন্দতি, করুণায দুক্খং সম্পটিচ্ছতি. তথা পঞ্ঞায পরিনিব্বানাভিমুখো হোতি, করুণায তং ন পাপুণাতি. তথা করুণায সংসারাভিমুখো হোতি, পঞ্ঞায তত্র নাভিরমতি. পঞ্ঞায চ সব্বত্থ ৰিরজ্জতি, করুণানুগতত্তা ন চ ন সব্বেসং অনুগ্গহায পৰত্তো, করুণায সব্বেপি অনুকম্পতি, পঞ্ঞানুগতত্তা ন চ ন সব্বত্থ ৰিরত্তচিত্তো. পঞ্ঞায চ অহংকারমমংকারাভাৰো, করুণায আলসিযদীনতাভাৰো. তথা পঞ্ঞাকরুণাহি যথাক্কমং অত্তপরনাথতা, ধীরৰীরভাৰো, অনত্তন্তপঅপরন্তপতা, অত্তহিতপরহিতনিপ্ফত্তি, নিব্ভযাভিংসনকভাৰো, ধম্মাধিপতিলোকাধিপতিতা, কতঞ্ঞুপুব্বকারিভাৰো, মোহতণ্হাৰিগমো, ৰিজ্জাচরণসিদ্ধি, বলৰেসারজ্জনিপ্ফত্তীতি সব্বস্সাপি পারমিতাফলস্স ৰিসেসেন উপাযভাৰতো পঞ্ঞাকরুণা পারমীনং পচ্চযো. ইদঞ্চ দ্ৰযং পারমীনং ৰিয পণিধানস্সাপি পচ্চযো.

তথা উস্সাহউম্মঙ্গঅৰত্থানহিতচরিযা চ পারমীনং পচ্চযোতি ৰেদিতব্বা, যা বুদ্ধভাৰস্স উপ্পত্তিট্ঠানতায ‘‘বুদ্ধভূমিযো’’তি পৰুচ্চন্তি. যথাহ –

‘‘কতি পন ভন্তে বুদ্ধভূমিযো? চতস্সো খো সারিপুত্ত বুদ্ধভূমিযো. কতমা চতস্সো? উস্সাহো চ হোতি ৰীরিযং, উমঙ্গো চ হোতি পঞ্ঞাভাৰনা, অৰত্থানঞ্চ হোতি অধিট্ঠানং, মেত্তাভাৰনা চ হোতি হিতচরিযা. ইমা খো সারিপুত্ত চতস্সো বুদ্ধভূমিযো’’তি (সু. নি. অট্ঠ. ১.খগ্গৰিসাণসুত্তৰণ্ণনাযম্পি).

তথা নেক্খম্মপৰিৰেকঅলোভাদোসামোহনিস্সরণপ্পভেদা ছ অজ্ঝাসযা. ৰুত্তঞ্হেতং –

‘‘নেক্খম্মজ্ঝাসযা চ বোধিসত্তা কামে দোসদস্সাৰিনো, পৰিৰেক…পে… সঙ্গণিকায, অলোভ…পে… লোভে, অদোস…পে… দোসে, অমোহ…পে… মোহে, নিস্সরণজ্ঝাসযা চ বোধিসত্তা সব্বভৰেসু দোসদস্সাৰিনো’’তি (ৰিসুদ্ধি. অট্ঠ. ১.৪৯ ৰাক্যখন্ধেপি).

তস্মা এতে বোধিসত্তানং ছ অজ্ঝাসযা দানাদীনং পচ্চযাতি ৰেদিতব্বা. ন হি লোভাদীসু আদীনৰদস্সনেন, অলোভাদিঅধিকভাৰেন চ ৰিনা দানাদিপারমিযো সম্ভৰন্তি. অলোভাদীনঞ্হি অধিকভাৰেন পরিচ্চাগাদিনিন্নচিত্ততা অলোভজ্ঝাসযাদিতাতি. যথা চেতে, এৰং দানজ্ঝাসযতাদযোপি. যথাহ –

‘‘কতি পন ভন্তে বোধায চরন্তানং বোধিসত্তানং অজ্ঝাসযা? দস খো সারিপুত্ত বোধায চরন্তানং বোধিসত্তানং অজ্ঝাসযা. কতমে দস? দানজ্ঝাসযা সারিপুত্ত বোধিসত্তা মচ্ছেরে দোসদস্সাৰিনো, সীল…পে… উপেক্খজ্ঝাসযা সারিপুত্ত বোধিসত্তা সুখদুক্খেসু দোসদস্সাৰিনো’’তি.

এতেসু হি মচ্ছেরঅসংৰরকামৰিচিকিচ্ছাকোসজ্জঅক্খন্তিৰিসংৰাদঅনধিট্ঠানব্যাপাদ- সুখদুক্খসঙ্খাতেসু আদীনৰদস্সনপুব্বঙ্গমা দানাদিনিন্নচিত্ততাসঙ্খাতা দানজ্ঝাসযতাদযো দানাদিপারমীনং নিব্বত্তিযা কারণন্তি. তথা অপরিচ্চাগপরিচ্চাগাদীসু যথাক্কমং আদীনৰানিসংসপচ্চৰেক্খণা দানাদিপারমীনং পচ্চযো.

তত্থাযং পচ্চৰেক্খণাৰিধি – খেত্তৰত্থুহিরঞ্ঞসুৰণ্ণগোমহিংসদাসিদাসপুত্তদারাদিপরিগ্গহব্যাসত্তচিত্তানং সত্তানং খেত্তাদীনং ৰত্থুকামভাৰেন বহুপত্থনীযভাৰতো, রাজচোরাদিসাধারণভাৰতো, ৰিৰাদাধিট্ঠানতো, সপত্তকরণতো, নিস্সারতো, পটিলাভপরিপালনেসু পরৰিহেঠনহেতুতো, ৰিনাসনিমিত্তঞ্চ সোকাদিঅনেকৰিহিতব্যসনাৰহতো, তদাসত্তিনিদানঞ্চ মচ্ছেরমলপরিযুট্ঠিতচিত্তানং অপাযূপপত্তিসম্ভৰতোতি এৰং ৰিৰিধৰিপুলানত্থাৰহা এতে অত্থা নাম, তেসং পরিচ্চাগোযেৰেকো সোত্থিভাৰোতি পরিচ্চাগে অপ্পমাদো করণীযো.

অপিচ ‘‘যাচকো যাচমানো অত্তনো গুয্হস্স আচিক্খনতো ময্হং ৰিস্সাসিকো’’তি চ ‘‘পহায গমনীযং অত্তনো সন্তকং গহেত্ৰা পরলোকং যাহীতি ময্হং উপদেসকো’’তি চ ‘‘আদিত্তে ৰিয অগারে মরণগ্গিনা আদিত্তে লোকে ততো ময্হং সন্তকস্স অপৰাহকসহাযো’’তি চ ‘‘অপৰাহিতস্স চস্স নিজ্ঝাযনিক্খেপট্ঠানভূতো’’তি চ ‘‘দানসঙ্খাতে কল্যাণকম্মস্মিং সহাযভাৰতো, সব্বসম্পত্তীনং অগ্গভূতায পরমদুল্লভায বুদ্ধভূমিযা সম্পত্তিহেতুভাৰতো চ পরমো কল্যাণমিত্তো’’তি চ পচ্চৰেক্খিতব্বং.

তথা ‘‘উল়ারে কম্মনি অনেনাহং সম্ভাৰিতো, তস্মা সা সম্ভাৰনা অৰিতথা কাতব্বা’’তি চ ‘‘একন্তভেদিতায জীৰিতস্স অযাচিতেনপি মযা দাতব্বং, পগেৰ যাচিতেনা’’তি চ ‘‘উল়ারজ্ঝাসযেহি গৰেসিত্ৰাপি দাতব্বো, সযমেৰাগতো মম পুঞ্ঞেনা’’তি চ ‘‘যাচকস্স দানাপদেসেন ময্হমেৰাযমনুগ্গহো’’তি চ ‘‘অহং ৰিয অযং সব্বোপি লোকো মযা অনুগ্গহেতব্বো’’তি চ ‘‘অসতি যাচকে কথং ময্হং দানপারমী পূরেয্যা’’তি চ ‘‘যাচকানমেৰত্থায মযা সব্বো পরিগ্গহেতব্বো’’তি চ ‘‘অযাচিত্ৰা মম সন্তকং যাচকা সযমেৰ কদা গণ্হেয্যু’’ন্তি চ ‘‘কথমহং যাচকানং পিযো চস্সং মনাপো’’তি চ ‘‘কথং ৰা তে ময্হং পিযা চস্সু মনাপা’’তি চ ‘‘কথং ৰাহং দদমানো, দত্ৰাপি চ অত্তমনো অস্সং পমুদিতো পীতিসোমনস্সজাতো’’তি চ ‘‘কথং ৰা মে যাচকা ভৰেয্যুং, উল়ারো চ দানজ্ঝাসযো’’তি চ ‘‘কথং ৰাহমযাচিতোযেৰ যাচকানং হদযমঞ্ঞায দদেয্য’’ন্তি চ ‘‘সতি ধনে যাচকে চ অপরিচ্চাগো মহতী ময্হং ৰঞ্চনা’’তি চ ‘‘কথং ৰাহং অত্তনো অঙ্গানি জীৰিতং ৰাপি যাচকানং পরিচ্চজেয্য’’ন্তি চ পচ্চৰেক্খিতব্বং.

অপিচ ‘‘অত্থো নামাযং নিরপেক্খং দাযকং অনুগচ্ছতি যথা তং নিরপেক্খং খেপকং কিটকো’’তি অত্থে নিরপেক্খতায চিত্তং উপ্পাদেতব্বং. যাচমানো পন যদি পিযপুগ্গলো হোতি, ‘‘পিযো মং যাচতী’’তি সোমনস্সং উপ্পাদেতব্বং. অথ উদাসীনপুগ্গলো হোতি, ‘‘অযং মং যাচমানো অদ্ধা ইমিনা পরিচ্চাগেন মিত্তো হোতী’’তি সোমনস্সং উপ্পাদেতব্বং. দদন্তোপি হি যাচকানং পিযো হোতীতি. অথ পন ৰেরীপুগ্গলো যাচতি, ‘‘পচ্চত্থিকো মং যাচতি, অযং মং যাচমানো অদ্ধা ইমিনা পরিচ্চাগেন ৰেরীপি পিযো মিত্তো হোতী’’তি ৰিসেসতো সোমনস্সং উপ্পাদেতব্বং. এৰং পিযপুগ্গলে ৰিয মজ্ঝত্তৰেরীপুগ্গলেসুপি মেত্তাপুব্বঙ্গমং করুণং উপট্ঠপেত্ৰাৰ দাতব্বং.

সচে পনস্স চিরকালপরিভাৰিতত্তা লোভস্স দেয্যধম্মৰিসযা লোভধম্মা উপ্পজ্জেয্যুং, তেন বোধিসত্তপটিঞ্ঞেন ইতি পটিসঞ্চিক্খিতব্বং ‘‘ননু তযা সপ্পুরিস সম্বোধায অভিনীহারং করোন্তেন সব্বসত্তানং উপকারত্থায অযং কাযো নিস্সট্ঠো, তপ্পরিচ্চাগমযঞ্চ পুঞ্ঞং, তত্থ নাম তে বাহিরেপি ৰত্থুস্মিং অতিসঙ্গপ্পৰত্তি হত্থিসিনানসদিসী হোতি, তস্মা তযা ন কত্থচি সঙ্গো উপ্পাদেতব্বো. সেয্যথাপি নাম মহতো ভেসজ্জরুক্খস্স তিট্ঠতো মূলং মূলত্থিকা হরন্তি, পপটিকং, তচং, খন্ধং, ৰিটপং, সারং, সাখং, পলাসং, পুপ্ফং, ফলং ফলত্থিকা হরন্তি, ন তস্স রুক্খস্স ‘ময্হং সন্তকং এতে হরন্তী’’তি ৰিতক্কসমুদাচারো হোতি, এৰমেৰ সব্বলোকহিতায উস্সুক্কমাপজ্জন্তেন মযা মহাদুক্খে অকতঞ্ঞুকে নিচ্চাসুচিম্হি কাযে পরেসং উপকারায ৰিনিযুজ্জমানে অণুমত্তোপি মিচ্ছাৰিতক্কো ন উপ্পাদেতব্বো, কো ৰা এত্থ ৰিসেসো অজ্ঝত্তিকবাহিরেসু মহাভূতেসু একন্তভেদনৰিকিরণৰিদ্ধংসনধম্মেসু, কেৰলং পন সম্মোহৰিজম্ভিতমেতং, যদিদং ‘এতং মম, এসোহমস্মি, এসো মে অত্তা’তি অভিনিৰেসো. তস্মা বাহিরেসু ৰিয অজ্ঝত্তিকেসুপি করচরণনযনাদীসু, মংসাদীসু চ অনপেক্খেন হুত্ৰা ‘তংতদত্থিকা হরন্তূ’তি নিস্সট্ঠচিত্তেন ভৰিতব্ব’’ন্তি. এৰং পটিসঞ্চিক্খতো চস্স বোধায পহিতত্তস্স কাযজীৰিতেসু নিরপেক্খস্স অপ্পকসিরেনেৰ কাযৰচীমনোকম্মানি সুৰিসুদ্ধানি হোন্তি. সো ৰিসুদ্ধকাযৰচীমনোকম্মন্তো ৰিসুদ্ধাজীৰো ঞাযপটিপত্তিযং ঠিতো, আযাপাযুপাযকোসল্লসমন্নাগমেন ভিয্যোসো মত্তায দেয্যধম্মপরিচ্চাগেন, অভযদানসদ্ধম্মদানেহি চ সব্বসত্তে অনুগ্গণ্হিতুং সমত্থো হোতীতি. অযং তাৰ দানপারমিযং পচ্চৰেক্খণানযো.

সীলপারমিযং পন এৰং পচ্চৰেক্খিতব্বং – ইদঞ্হি সীলং নাম গঙ্গোদকাদীহি ৰিসোধেতুং অসক্কুণেয্যস্স দোসমলস্স ৰিক্খালনজলং, হরিচন্দনাদীহি ৰিনেতুং অসক্কুণেয্যরাগাদিপরিল়াহৰিনযনং, হারমকুটকুণ্ডলাদীহি পচুরজনালঙ্কারেহি অসাধারণো সাধূনং অলঙ্কারৰিসেসো, সব্বদিসাৰাযনতো অকিত্তিমো, সব্বকালানুরূপো চ সুরভিগন্ধো, খত্তিযমহাসালাদীহি দেৰতাহি চ ৰন্দনীযাদিভাৰাৰহনতো পরমো ৰসীকরণমন্তো, চাতুমহারাজিকাদি দেৰলোকারোহনসোপানপন্তি, ঝানাভিঞ্ঞানং অধিগমুপাযো, নিব্বানমহানগরস্স সম্পাপকমগ্গো, সাৰকবোধিপচ্চেকবোধিসম্মাসম্বোধীনং পতিট্ঠানভূমি, যং যং ৰা পনিচ্ছিতং পত্থিতং, তস্স তস্স সমিজ্ঝনূপাযভাৰতো চিন্তামণিকপ্পরুক্খাদিকে চ অতিসেতি. ৰুত্তঞ্হেতং ভগৰতা ‘‘ইজ্ঝতি ভিক্খৰে সীলৰতো চেতোপণিধি ৰিসুদ্ধত্তা’’তি (অ. নি. ৮.৩৫). অপরম্পি ৰুত্তং ‘‘আকঙ্খেয্য চে ভিক্খৰে ভিক্খু সব্রহ্মচারীনং পিযো চ অস্সং মনাপো চ গরু চ ভাৰনীযো চাতি, সীলেস্ৰেৰস্স পরিপূরকারী’’তিআদি (ম. নি. ১.৬১), তথা ‘‘অৰিপ্পটিসারত্থানি খো আনন্দ কুসলানি সীলানী’’তি (অ. নি. ১০.১; ১১.১), ‘‘পঞ্চিমে গহপতযো আনিসংসা সীলৰতো সীলসম্পদাযা’’তি (দী. নি. ২.১৫০; উদা. ৭৬; মহাৰ. ১৮৫) সুত্তানঞ্চ ৰসেন সীলস্স গুণা পচ্চৰেক্খিতব্বা, তথা অগ্গিক্খন্ধোপমসুত্তাদীনং (অ. নি. ৭.৭২) ৰসেন সীলৰিরহে আদীনৰা.

পীতিসোমনস্সনিমিত্ততো, অত্তানুৰাদপরানুৰাদদণ্ডদুগ্গতিভযাভাৰতো, ৰিঞ্ঞূহি পাসংসভাৰতো, অৰিপ্পটিসারহেতুতো, সোত্থিট্ঠানতো, অভিজনসাপতেয্যাধিপতেয্যাযুরূপট্ঠানবন্ধুমিত্তসম্পত্তীনং অতিসযনতো চ সীলং পচ্চৰেক্খিতব্বং. সীলৰতো হি অত্তনো সীলসম্পদাহেতু মহন্তং পীতিসোমনস্সং উপ্পজ্জতি ‘‘কতং ৰত মযা কুসলং, কতং কল্যাণং, কতং ভীরুত্তাণ’’ন্তি. তথা সীলৰতো অত্তা ন উপৰদতি, ন পরে ৰিঞ্ঞূ, দণ্ডদুগ্গতিভযানং সম্ভৰোযেৰ নত্থি, ‘‘সীলৰা পুরিসপুগ্গলো কল্যাণধম্মো’’তি ৰিঞ্ঞূনং পাসংসো হোতি. তথা সীলৰতো য্ৰাযং ‘‘কতং ৰত মযা পাপং, কতং লুদ্দং, কতং কিব্বিস’’ন্তি দুস্সীলস্স ৰিপ্পটিসারো উপ্পজ্জতি, সো ন হোতি. সীলঞ্চ নামেতং অপ্পমাদাধিট্ঠানতো, ভোগব্যসনাদিপরিহারমুখেন মহতো অত্থস্স সাধনতো, মঙ্গলভাৰতো চ পরমং সোত্থিট্ঠানং, নিহীনজচ্চোপি সীলৰা খত্তিযমহাসালাদীনং পূজনীযো হোতীতি কুলসম্পত্তিং অতিসেতি সীলসম্পদা, ‘‘তং কিং মঞ্ঞসি মহারাজ, ইধ তে অস্স পুরিসো দাসো কম্মকরো’’তিআদি (দী. নি. ১.১৮৩) ৰচনঞ্চেত্থ সাধকং. চোরাদীহি অসাধারণতো, পরলোকানুগমনতো, মহপ্ফলভাৰতো, সমথাদিগুণাধিট্ঠানতো চ বাহিরধনং অতিসেতি সীলং, পরমস্স চিত্তিস্সরিযস্স অধিট্ঠানভাৰতো খত্তিযাদীনং ইস্সরিযং অতিসেতি সীলং. সীলনিমিত্তঞ্হি তংতংসত্তনিকাযেসু সত্তানং ইস্সরিযং ৰস্সসতদীঘপ্পমাণতো জীৰিততো একাহম্পি সীলৰতো জীৰিতস্স ৰিসিট্ঠতাৰচনতো, সতি চ জীৰিতে সিক্খানিক্খেপস্স মরণতাৰচনতো সীলং জীৰিততো ৰিসিট্ঠতরং. ৰেরীনম্পি মনুঞ্ঞভাৰাৰহনতো, জরারোগৰিপত্তীহি অনভিভৰনীযতো চ রূপসম্পত্তিং অতিসেতি সীলং. পাসাদহম্মিযাদিট্ঠানৰিসেসে, রাজযুৰরাজসেনাপতিআদিট্ঠানৰিসেসে চ অতিসেতি সীলং সুখৰিসেসাধিট্ঠানভাৰতো. সভাৰসিনিদ্ধে সন্তিকাৰচরেপি বন্ধুজনে মিত্তজনে চ অতিসেতি একন্তহিতসম্পাদনতো, পরলোকানুগমনতো চ. ‘‘ন তং মাতা পিতা কযিরা’’তিআদি (ধ. প. ৪৩) ৰচনঞ্চেত্থ সাধকং. তথা হত্থিঅস্সরথাদিভেদেহি, মন্তাগদসোত্থানপ্পযোগেহি চ দুরারক্খং অত্তানং আরক্খভাৰেন সীলমেৰ ৰিসিট্ঠতরং অত্তাধীনতো, অপরাধীনতো, মহাৰিসযতো চ. তেনেৰাহ ‘‘ধম্মো হৰে রক্খতি ধম্মচারি’’ন্তিআদি (জা. ১.৯.১০২). এৰমনেকগুণসমন্নাগতং সীলন্তি পচ্চৰেক্খন্তস্স অপরিপুণ্ণা চেৰ সীলসম্পদা পারিপূরিং গচ্ছতি অপরিসুদ্ধা চ পারিসুদ্ধিং.

সচে পনস্স দীঘরত্তং পরিচযেন সীলপটিপক্খা ধম্মা দোসাদযো অন্তরন্তরা উপ্পজ্জেয্যুং, তেন বোধিসত্তপটিঞ্ঞেন এৰং পটিসঞ্চিক্খিতব্বং ‘‘ননু তযা সম্বোধায পণিধানং কতং, সীলৰিকলেন চ ন সক্কা লোকিযাপি সম্পত্তিযো পাপুণিতুং, পগেৰ লোকুত্তরা, সব্বসম্পত্তীনং পন অগ্গভূতায সম্মাসম্বোধিযা অধিট্ঠানভূতেন সীলেন পরমুক্কংসগতেন ভৰিতব্বং. তস্মা ‘কিকীৰ অণ্ড’ন্তিআদিনা (ৰিসুদ্ধি. ১.১৯; দী. নি. অট্ঠ. ১.৭) ৰুত্তনযেন সম্মা সীলং পরিরক্খন্তেন সুট্ঠু তযা পেসলেন ভৰিতব্বং. অপি চ তযা ধম্মদেসনায যানত্তযে সত্তানং অৰতারণপরিপাচনানি কাতব্বানি, সীলৰিকলস্স চ ৰচনং ন পচ্চেতব্বং হোতি অসপ্পাযাহারৰিচারস্স ৰিয ৰেজ্জস্স তিকিচ্ছনং, তস্মা কথাহং সদ্ধেয্যো হুত্ৰা সত্তানং অৰতারণপরিপাচনানি করেয্য’’ন্তি সভাৰপরিসুদ্ধসীলেন ভৰিতব্বং. কিঞ্চ ‘‘ঝানাদিগুণৰিসেসযোগেন মে সত্তানং উপকারকরণসমত্থতা, পঞ্ঞাপারমীআদিপরিপূরণঞ্চ, ঝানাদযো চ গুণা সীলপারিসুদ্ধিং ৰিনা ন সম্ভৰন্তী’’তি সম্মদেৰ সীলং পরিসোধেতব্বং.

তথা ‘‘সম্বাধো ঘরাৰাসো রজোপথো’’তিআদিনা (দী. নি. ১.১৯১; ম. নি. ১.২৯১; সং. নি. ২.১৫৪; ম. নি. ২.১০) ঘরাৰাসে ‘‘অট্ঠিকঙ্কলূপমা কামা’’তিআদিনা (ম. নি. ১.২৩৪; পাচি. ৪১৭; মহানি. ৩, ৬;), ‘‘মাতাপি পুত্তেন ৰিৰদতী’’তিআদিনা (ম. নি. ১.১৬৮, ১৭৮) চ কামেসু ‘‘সেয্যথাপি পুরিসো ইণং আদায কম্মন্তে পযোজেয্যা’’তিআদিনা (দী. নি. ১.২১৮) কামচ্ছন্দাদীসু আদীনৰদস্সনপুব্বঙ্গমা ৰুত্তৰিপরিযাযেন ‘‘অব্ভোকাসো পব্বজ্জা’’তিআদিনা (দী. নি. ১.১.৯১; সং. নি. ১.১৫৪) পব্বজ্জাদীসু আনিসংসপটিসঙ্খাৰসেন নেক্খম্মপারমিযং পচ্চৰেক্খণা ৰেদিতব্বা. অযমেত্থ সঙ্খেপত্থো, ৰিত্থারো পন দুক্খক্খন্ধ (ম. নি. ১.১৬৩) ৰীমংসসুত্তাদি (ম. নি. ১.৪৮৭) ৰসেন দুক্খক্খন্ধআসিৰিসোপমসুত্তাদিৰসেন (চরিযা. অট্ঠ. পকিণ্ণককথাযং) ৰেদিতব্বো.

তথা ‘‘পঞ্ঞায ৰিনা দানাদযো ধম্মা ন ৰিসুজ্ঝন্তি, যথাসকং ব্যাপারসমত্থা চ ন হোন্তী’’তি পঞ্ঞাগুণা মনসি কাতব্বা. যথেৰ হি জীৰিতেন ৰিনা সরীরযন্তং ন সোভতি, ন চ অত্তনো কিরিযাসু পটিপত্তিসমত্থং হোতি, যথা চ চক্খাদীনি ইন্দ্রিযানি ৰিঞ্ঞাণেন ৰিনা যথাসকং ৰিসযেসু কিচ্চং কাতুং নপ্পহোন্তি, এৰং সদ্ধাদীনি ইন্দ্রিযানি পঞ্ঞায ৰিনা সকিচ্চপটিপত্তিযং অসমত্থানীতি পরিচ্চাগাদিপটিপত্তিযং পঞ্ঞা পধানকারণং. উম্মীলিতপঞ্ঞাচক্খুকা হি মহাসত্তা অত্তনো অঙ্গপচ্চঙ্গানিপি দত্ৰা অনত্তুক্কংসকা, অপরৰম্ভকা চ হোন্তি, ভেসজ্জরুক্খা ৰিয ৰিকপ্পরহিতা কালত্তযেপি সোমনস্সজাতা. পঞ্ঞাৰসেন উপাযকোসল্লযোগতো পরিচ্চাগো পরহিতপ্পৰত্তিযা দানপারমিভাৰং উপেতি. অত্তত্থঞ্হি দানং ৰুড্ঢিসদিসং হোতি.

তথা পঞ্ঞায অভাৰেন তণ্হাদিসংকিলেসাৰিযোগতো সীলস্স ৰিসুদ্ধিযেৰ ন সম্ভৰতি, কুতো সব্বঞ্ঞুগুণাধিট্ঠানভাৰো. পঞ্ঞৰা এৰ চ ঘরাৰাসে কামগুণেসু সংসারে চ আদীনৰং, পব্বজ্জায ঝানসমাপত্তিযং নিব্বানে চ আনিসংসং সুট্ঠু সল্লক্খেন্তো পব্বজিত্ৰা ঝানসমাপত্তিযো নিব্বত্তেত্ৰা নিব্বাননিন্নো, পরে চ তত্থ পতিট্ঠপেতীতি.

ৰীরিযঞ্চ পঞ্ঞারহিতং যদিচ্ছিতমত্থং ন সাধেতি দুরারম্ভভাৰতো. ৰরমেৰ হি অনারম্ভো দুরারম্ভতো, পঞ্ঞাসহিতেন পন ৰীরিযেন ন কিঞ্চি দুরধিগমং উপাযপটিপত্তিতো. তথা পঞ্ঞৰা এৰ পরাপকারাদিঅধিৰাসকজাতিযো হোতি, ন দুপ্পঞ্ঞো. পঞ্ঞাৰিরহিতস্স চ পরেহি উপনীতা অপকারা খন্তিযা পটিপক্খমেৰ অনুব্রূহেন্তি, পঞ্ঞৰতো পন তে খন্তিসম্পত্তিযা পরিব্রূহনৰসেন অস্সা থিরভাৰায সংৰত্তন্তি. পঞ্ঞৰা এৰ তীণি সচ্চানি তেসং কারণানি পটিপক্খে চ যথাভূতং জানিত্ৰা পরেসং অৰিসংৰাদকো হোতি. তথা পঞ্ঞাবলেন অত্তানং উপত্থম্ভেত্ৰা ধিতিসম্পদায সব্বপারমীসু অচলসমাদানাধিট্ঠানো হোতি, পঞ্ঞৰা এৰ চ পিযমজ্ঝত্তৰেরীৰিভাগং অকত্ৰা সব্বত্থ হিতূপসংহারকুসলো হোতি. তথা পঞ্ঞাৰসেন লাভাদিলোকধম্মসন্নিপাতে নিব্বিকারতায মজ্ঝত্তো হোতি. এৰং সব্বাসং পারমীনং পঞ্ঞাৰ পারিসুদ্ধিহেতূতি পঞ্ঞাগুণা পচ্চৰেক্খিতব্বা.

অপিচ পঞ্ঞায ৰিনা ন দস্সনসম্পত্তি, অন্তরেন চ দিট্ঠিসম্পদং ন সীলসম্পদা, সীলদিট্ঠিসম্পদারহিতস্স ন সমাধিসম্পদা, অসমাহিতেন চ ন সক্কা অত্তহিতমত্তম্পি সাধেতুং, পগেৰ উক্কংসগতং পরহিতন্তি পরহিতায পটিপন্নেন ‘‘ননু তযা সক্কচ্চং পঞ্ঞাপারিসুদ্ধিযং আযোগো করণীযো’’তি বোধিসত্তেন অত্তা ওৰদিতব্বো. পঞ্ঞানুভাৰেন হি মহাসত্তো চতুরধিট্ঠানাধিট্ঠিতো চতূহি সঙ্গহৰত্থূহি (দী. নি. ৩.২১০, ৩১৩; অ. নি. ১০.৩২) লোকং অনুগ্গণ্হন্তো সত্তে নিয্যানিকমগ্গে অৰতারেতি, ইন্দ্রিযানি চ নেসং পরিপাচেতি. তথা পঞ্ঞাবলেন খন্ধাযতনাদীসু পৰিচযবহুলো পৰত্তিনিৰত্তিযো যাথাৰতো পরিজানন্তো দানাদযো গুণে ৰিসেসনিব্বেধভাগিযভাৰং নযন্তো বোধিসত্তসিক্খায পরিপূরকারী হোতীতি এৰমাদিনা অনেকাকারৰোকারে পঞ্ঞাগুণে ৰৰত্থপেত্ৰা পঞ্ঞাপারমী অনুব্রূহেতব্বা.

তথা দিস্সমানপারানিপি লোকিযানি কম্মানি নিহীনৰীরিযেন পাপুণিতুং অসক্কুণেয্যানি, অগণিতখেদেন পন আরদ্ধৰীরিযেন দুরধিগমং নাম নত্থি. নিহীনৰীরিযো হি ‘‘সংসারমহোঘতো সব্বসত্তে সন্তারেস্সামী’’তি আরভিতুমেৰ ন সক্কুণোতি. মজ্ঝিমো আরভিত্ৰা অন্তরাৰোসানমাপজ্জতি. উক্কট্ঠৰীরিযো পন অত্তসুখনিরপেক্খো আরম্ভপারং অধিগচ্ছতীতি ৰীরিযসম্পত্তি পচ্চৰেক্খিতব্বা. অপিচ ‘‘যস্স অত্তনোযেৰ সংসারপঙ্কতো সমুদ্ধরণত্থমারম্ভো, তস্সাপি ৰীরিযস্স সিথিলভাৰেন মনোরথানং মত্থকপ্পত্তি ন সক্কা সম্ভাৰেতুং, পগেৰ সদেৰকস্স লোকস্স সমুদ্ধরণত্থং কতাভিনীহারেনা’’তি চ ‘‘রাগাদীনং দোসগণানং মত্তমহাগজানং ৰিয দুন্নিৰারযভাৰতো, তন্নিদানানঞ্চ কম্মসমাদানানং উক্খিত্তাসিকৰধকসদিসভাৰতো, তন্নিমিত্তানঞ্চ দুগ্গতীনং সব্বদা ৰিৰটমুখভাৰতো, তত্থ নিযোজকানঞ্চ পাপমিত্তানং সদা সন্নিহিতভাৰতো, তদোৰাদকারিতায চ বালস্স পুথুজ্জনভাৰস্স সতি সম্ভৰে যুত্তং সযমেৰ সংসারদুক্খতো নিস্সরিতু’’ন্তি চ ‘‘মিচ্ছাৰিতক্কা ৰীরিযানুভাৰেন দূরী ভৰন্তী’’তি চ ‘‘যদি পন সম্বোধি অত্তাধীনেন ৰীরিযেন সক্কা সমধিগন্তুং, কিমেত্থ দুক্কর’’ন্তি চ এৰমাদিনা নযেন ৰীরিযস্স গুণাপচ্চৰেক্খিতব্বা.

তথা ‘‘খন্তি নামাযং নিরৰসেসগুণপটিপক্খস্স কোধস্স ৰিধমনতো গুণসম্পাদনে সাধূনমপ্পটিহতমাযুধং, পরাভিভৰনে সমত্থানং অলঙ্কারো, সমণব্রাহ্মণানং বলসম্পদা, কোধগ্গিৰিনযনী উদকধারা, কল্যাণস্স কিত্তিসদ্দস্স সঞ্জাতিদেসো, পাপপুগ্গলানং ৰচীৰিসৰূপসমকরো মন্তাগদো, সংৰরে ঠিতানং পরমা ধীরপকতি, গম্ভীরাসযতায সাগরো, দোসমহাসাগরস্স ৰেলা, অপাযদ্ৰারস্স পিধানকৰাটং, দেৰব্রহ্মলোকানং আরোহণসোপানং, সব্বগুণানং অধিৰাসনভূমি, উত্তমা কাযৰচীমনোৰিসুদ্ধী’’তি মনসি কাতব্বং. অপি চ ‘‘এতে সত্তা খন্তিসম্পত্তিযা অভাৰতো ইধ চেৰ তপন্তি, পরলোকে চ তপনীযধম্মানুযোগতো’’তি চ ‘‘যদিপি পরাপকারনিমিত্তং দুক্খং উপ্পজ্জতি, তস্স পন দুক্খস্স খেত্তভূতো অত্তভাৰো, বীজভূতঞ্চ কম্মং মযাৰ অভিসঙ্খত’’ন্তি চ ‘‘তস্স দুক্খস্স আণণ্যকারণমেত’’ন্তি চ ‘‘অপকারকে অসতি কথং ময্হং খন্তিসম্পদা সম্ভৰতী’’তি চ ‘‘যদিপাযং এতরহি অপকারকো, অযং নাম পুব্বে অনেন ময্হং উপকারো কতো’’তি চ ‘‘অপকারো এৰ ৰা খন্তিনিমিত্ততায উপকারো’’তি চ ‘‘সব্বেপিমে সত্তা ময্হং পুত্তসদিসা, পুত্তকতাপরাধেসু চ কো কুজ্ঝিস্সতী’’তি চ ‘‘যেন কোধভূতাৰেসেন অযং ময্হং অপরজ্ঝতি, সো কোধভূতাৰেসো মযা ৰিনেতব্বো’’তি চ ‘‘যেন অপকারেন ইদং ময্হং দুক্খং উপ্পন্নং, তস্স অহম্পি নিমিত্ত’’ন্তি চ ‘‘যেহি ধম্মেহি অপরাধো কতো, যত্থ চ কতো, সব্বেপি তে তস্মিংযেৰ খণে নিরুদ্ধা, কস্সিদানি কেন কোধো কাতব্বো’’তি চ ‘‘অনত্ততায সব্বধম্মানং কো কস্স অপরজ্ঝতী’’তি চ পচ্চৰেক্খন্তেন খন্তিসম্পদা ব্রূহেতব্বা.

যদি পনস্স দীঘরত্তং পরিচযেন পরাপকারনিমিত্তকো কোধো চিত্তং পরিযাদায তিট্ঠেয্য, ইতি পটিসঞ্চিক্খিতব্বং ‘‘খন্তি নামেসা পরাপকারস্স পটিপক্খপটিপত্তীনং পচ্চুপকারকারণ’’ন্তি চ ‘‘অপকারো চ ময্হং দুক্খুপ্পাদনেন দুক্খুপনিসায সদ্ধায, সব্বলোকে অনভিরতিসঞ্ঞায চ পচ্চযো’’তি চ ‘‘ইন্দ্রিযপকতিরেসা, যদিদং ইট্ঠানিট্ঠৰিসযসমাযোগো, তত্থ অনিট্ঠৰিসযসমাযোগো ময্হং ন সিযাতি তং কুতেত্থ লব্ভা’’তি চ ‘‘কোধৰসিকো সত্তো কোধেন উম্মত্তো ৰিক্খিত্তচিত্তো, তত্থ কিং পচ্চপকারেনা’’তি চ ‘‘সব্বে পিমে সত্তা সম্মাসম্বুদ্ধেন ওরসপুত্তা ৰিয পরিপালিতা, তস্মা ন তত্থ মযা চিত্তকোপোপি কাতব্বো’’তি চ ‘‘অপরাধকে চ সতি গুণে গুণৰতি মযা ন কোপো কাতব্বো’’তি চ ‘‘অসতি গুণে ৰিসেসেন করুণাযিতব্বো’’তি চ ‘‘কোপেন চ ময্হং গুণযসা নিহীযন্তী’’তি চ ‘‘কুজ্ঝনেন ময্হং দুব্বণ্ণদুক্খসেয্যাদযো সপত্তকন্তা আগচ্ছন্তী’’তি চ ‘‘কোধো চ নামাযং সব্বাহিতকারকো সব্বহিতৰিনাসকো বলৰা পচ্চত্থিকো’’তি চ ‘‘সতি চ খন্তিযা ন কোচি পচ্চত্থিকো’’তি চ ‘‘অপরাধকেন অপরাধনিমিত্তং যং আযতিং লদ্ধব্বং দুক্খং, সতি চ খন্তিযা ময্হং তদভাৰো’’তি চ ‘‘চিন্তনেন কুজ্ঝন্তেন চ মযা পচ্চত্থিকোযেৰ অনুৰত্তিতো হোতী’’তি চ ‘‘কোধে চ মযা খন্তিযা অভিভূতে তস্স দাসভূতো পচ্চত্থিকো সম্মদেৰ অভিভূতো হোতী’’তি চ ‘‘কোধনিমিত্তং খন্তিগুণপরিচ্চাগো ময্হং ন যুত্তো’’তি চ ‘‘সতি চ কোধে গুণৰিরোধিনি (গুণৰিরোধপচ্চনীধম্মে চরিযা. অট্ঠ. পকিণ্ণককথাযং) কিং মে সীলাদিধম্মা পারিপূরিং গচ্ছেয্যুং, অসতি চ তেসু কথাহং সত্তানং উপকারবহুলো পটিঞ্ঞানুরূপং উত্তমং সম্পত্তিং পাপুণিস্সামী’’তি চ ‘‘খন্তিযা চ সতি বহিদ্ধা ৰিক্খেপাভাৰতো সমাহিতস্স সব্বে সঙ্খারা অনিচ্চতো দুক্খতো সব্বে ধম্মা অনত্ততো নিব্বানঞ্চ অসঙ্খতামতসন্তপণীতাদিভাৰতো নিজ্ঝানং খমন্তি ‘বুদ্ধধম্মা চ অচিন্তেয্যাপরিমেয্যপভাৰা’তি’’, ততো চ ‘‘অনুলোমিযং খন্তিযং ঠিতো ‘কেৰলা ইমে চ অত্তত্তনিযভাৰরহিতা ধম্মমত্তা যথাসকং পচ্চযেহি উপ্পজ্জন্তি ৰযন্তি, ন কুতোচি আগচ্ছন্তি, ন কুহিঞ্চি গচ্ছন্তি, ন চ কত্থচি পতিট্ঠিতা, ন চেত্থ কোচি কস্সচি ব্যাপারো’তি অহংকারমমংকারানধিট্ঠানতা নিজ্ঝানং খমতি, যেন বোধিসত্তো বোধিযা নিযতো অনাৰত্তিধম্মো হোতী’’তি এৰমাদিনা খন্তিপারমিযং পচ্চৰেক্খণা ৰেদিতব্বা.

তথা ‘‘সচ্চেন ৰিনা সীলাদীনং অসম্ভৰতো, পটিঞ্ঞানুরূপং পটিপত্তিযা অভাৰতো চ সচ্চধম্মাতিক্কমে চ সব্বপাপধম্মানং সমোসরণতো, অসচ্চসন্ধস্স অপ্পচ্চযিকভাৰতো, আযতিঞ্চ অনাদেয্যৰচনতাৰহনতো, সম্পন্নসচ্চস্স চ সব্বগুণাধিট্ঠানভাৰতো, সচ্চাধিট্ঠানেন সব্ববোধিসম্ভারানং পারিসুদ্ধিপারিপূরিসমন্ৰাযতো, সভাৰধম্মাৰিসংৰাদনেন সব্ববোধিসম্ভারকিচ্চকরণতো, বোধিসত্তপটিপত্তিযা চ পরিনিপ্ফত্তিতো’’তিআদিনা সচ্চপারমিযা সম্পত্তিযো পচ্চৰেক্খিতব্বা.

তথা ‘‘দানাদীসু দল়্হসমাদানং, তম্পটিপক্খসন্নিপাতে চ নেসং অচলাৰত্থানং, তত্থ চ থিরভাৰং ৰিনা ন দানাদিসম্ভারা সম্বোধিনিমিত্তা সম্ভৰন্তী’’তিআদিনা অধিট্ঠানে গুণা পচ্চৰেক্খিতব্বা.

তথা ‘‘অত্তহিতমত্তে অৰতিট্ঠন্তেনাপি সত্তেসু হিতচিত্ততং ৰিনা ন সক্কা ইধলোকপরলোকসম্পত্তিযো পাপুণিতুং, পগেৰ সব্বসত্তে নিব্বানসম্পত্তিযং পতিট্ঠাপেতুকামেনা’’তি চ ‘‘পচ্ছা সব্বসত্তানং লোকুত্তরসম্পত্তিং আকঙ্খন্তেন ইদানি লোকিযসম্পত্তিং আকঙ্খা যুত্তরূপা’’তি চ ‘‘ইদানি আসযমত্তেন পরেসং হিতসুখূপসংহারং কাতুং অসক্কোন্তো কদা পযোগেন তং সাধেস্সামী’’তি চ ‘‘ইদানি মযা হিতসুখূপসংহারেন সংৰদ্ধিতা পচ্ছা ধম্মসংৰিভাগসহাযা ময্হং ভৰিস্সন্তী’’তি চ ‘‘এতেহি ৰিনা ন ময্হং বোধিসম্ভারা সম্ভৰন্তি, তস্মা সব্ববুদ্ধগুণৰিভূতিনিপ্ফত্তিকারণত্তা ময্হং এতে পরমং পুঞ্ঞক্খেত্তং অনুত্তরং কুসলাযতনং উত্তমং গারৰট্ঠান’’ন্তি চ ‘‘সৰিসেসং সত্তেসু সব্বেসু হিতজ্ঝাসযতা পচ্চুপট্ঠপেতব্বা, কিঞ্চ করুণাধিট্ঠানতোপি সব্বসত্তেসু মেত্তা অনুব্রূহেতব্বা. ৰিমরিযাদীকতেন হি চেতসা সত্তেসু হিতসুখূপসংহারনিরতস্স তেসং অহিতদুক্খাপনযনকামতা বলৰতী উপ্পজ্জতি দল়্হমূলা, করুণা চ সব্বেসং বুদ্ধকারকধম্মানমাদি চরণং পতিট্ঠা মূলং মুখং পমুখ’’ন্তি এৰমাদিনা মেত্তায গুণা পচ্চৰেক্খিতব্বা.

তথা ‘‘উপেক্খায অভাৰে সত্তেহি কতা ৰিপ্পকারা চিত্তস্স ৰিকারং উপ্পাদেয্যুং, সতি চ চিত্তৰিকারে দানাদিসম্ভারানং সম্ভৰোযেৰ নত্থী’’তি চ ‘‘মেত্তাসিনেহেন সিনেহিতে চিত্তে উপেক্খায ৰিনা সম্ভারানং পারিসুদ্ধি ন হোতী’’তি চ ‘‘অনুপেক্খকো সম্ভারেসু পুঞ্ঞসম্ভারং তব্বিপাকঞ্চ সত্তহিতত্থং পরিণামেতুং ন সক্কোতী’’তি চ ‘‘উপেক্খায অভাৰে দেয্যপটিগ্গাহকেসু ৰিভাগং অকত্ৰা পরিচ্চজিতুং ন সক্কোতী’’তি চ ‘‘উপেক্খারহিতেন জীৰিতপরিক্খারানং জীৰিতস্স চ অন্তরাযং অমনসিকরিত্ৰা সংৰরৰিসোধনং কাতুং ন সক্কা’’তি চ ‘‘উপেক্খাৰসেন অরতিরতিসহস্সেৰ নেক্খম্মবলসিদ্ধিতো, উপপত্তিতো ইক্খনৰসেনেৰ সব্বসম্ভারকিচ্চনিপ্ফত্তিতো, অচ্চারদ্ধস্স ৰীরিযস্স অনুপেক্খনে পধানকিচ্চাকরণতো, উপেক্খতোযেৰ তিতিক্খানিজ্ঝানসম্ভৰতো, উপেক্খাৰসেন সত্তসঙ্খারানং অৰিসংৰাদনতো, লোকধম্মানং অজ্ঝুপেক্খনেন সমাদিন্নধম্মেসু অচলাধিট্ঠানসিদ্ধিতো, পরাপকারাদীসু অনাভোগৰসেনেৰ মেত্তাৰিহারনিপ্ফত্তিতোতি সব্ববোধিসম্ভারানং সমাদানাধিট্ঠানপারিপূরিনিপ্ফত্তিযো উপেক্খানুভাৰেন সম্পজ্জন্তী’’তি এৰং আদিনা নযেন উপেক্খাপারমী পচ্চৰেক্খিতব্বা. এৰং অপরিচ্চাগপরিচ্চাগাদীসু যথাক্কমং আদীনৰানিসংসপচ্চৰেক্খণা দানাদিপারমীনং পচ্চযোতি ৰেদিতব্বা.

তথা সপরিক্খারা পঞ্চদস চরণধম্মা পঞ্চ চ অভিঞ্ঞাযো. তত্থ চরণধম্মা নাম সীলসংৰরো, ইন্দ্রিযেসু গুত্তদ্ৰারতা, ভোজনে মত্তঞ্ঞুতা, জাগরিযানুযোগো, সত্ত সদ্ধম্মা, চত্তারি ঝানানি চ. তেসু সীলাদীনং চতুন্নং তেরসপি ধুতধম্মা, অপ্পিচ্ছতাদযো চ পরিক্খারো. সদ্ধম্মেসু সদ্ধায বুদ্ধধম্মসঙ্ঘসীলচাগদেৰতূপসমানুস্সতি- লূখপুগ্গলপরিৰজ্জনসিনিদ্ধপুগ্গলসেৰনপসাদনীয- ধম্মপচ্চৰেক্খণতদধিমুত্ততা পরিক্খারো, হিরোত্তপ্পানং অকুসলাদীনৰপচ্চৰেক্খণঅপাযাদীনৰপচ্চৰেক্খণকুসলধম্মুপত্থম্ভন- ভাৰপচ্চৰেক্খণহিরোত্তপ্প রহিতপুগ্গলপরিৰজ্জনহিরোত্তপ্পসম্পন্নপুগ্গলসেৰনতদধিমুত্ততা, বাহুসচ্চস্স পুব্বযোগপরিপুচ্ছকভাৰসদ্ধম্মাভিযোগঅনৰজ্জৰিজ্জাট্ঠানাদি- পরিচযপরিপক্কিন্দ্রিযতাকিলেসদূরীভাৰঅপ্পস্সুতপরিৰজ্জনবহুস্সুতসেৰনতদধিমুত্ততা, ৰীরিযস্স অপাযভযপচ্চৰেক্খণগমনৰীথিপচ্চৰেক্খণধম্মমহত্তপচ্চৰেক্খণ- থিনমিদ্ধৰিনোদনকুসীতপুগ্গলপরিৰজ্জনআরদ্ধৰীরিযপুগ্গল- সেৰনসম্মপ্পধানপচ্চৰেক্খণতদধিমুত্ততা, সতিযা সতিসম্পজঞ্ঞমুট্ঠস্সতিপুগ্গলপরিৰজ্জনউপট্ঠিতস্সতিপুগ্গলসেৰনতদধিমুত্ততা, পঞ্ঞায পরিপুচ্ছকভাৰৰত্থুৰিসদকিরিযাইন্দ্রিযসমত্তপটিপাদনদুপ্পঞ্ঞ- পুগ্গলপরিৰজ্জনপঞ্ঞৰন্তপুগ্গলসেৰনগম্ভীরঞাণচরিযপচ্চ- ৰেক্খণতদধিমুত্ততা, চতুন্নং ঝানানং সীলাদিচতুক্কং অট্ঠতিংসায আরম্মণেসু পুব্বভাগভাৰনা, আৰজ্জনাদিৰসীভাৰকরণঞ্চ পরিক্খারো. তত্থ সীলাদীহি পযোগসুদ্ধিযা সত্তানং অভযদানে, আসযসুদ্ধিযা আমিসদানে, উভযসুদ্ধিযা চ ধম্মদানে সমত্থো হোতীতিআদিনা চরণাদীনং দানাদিসম্ভারানং পচ্চযভাৰো যথারহং নিদ্ধারেতব্বো, অতিৰিত্থারভযেন ন নিদ্ধারযিম্হ. এৰং সম্পত্তিচক্কাদযোপি দানাদীনং পচ্চযোতি ৰেদিতব্বা.

কো সংকিলেসোতি অৰিসেসেন তণ্হাদীহি পরামট্ঠভাৰো পারমীনং সংকিলেসো, ৰিসেসেন দেয্যপটিগ্গাহকৰিকপ্পা দানপারমিযা সংকিলেসো, সত্তকালৰিকপ্পা সীলপারমিযা, কামভৰতদুপসমেসু অভিরতিঅনভিরতিৰিকপ্পা নেক্খম্মপারমিযা, ‘‘অহং মমা’’তি ৰিকপ্পা পঞ্ঞাপারমিযা, লীনুদ্ধচ্চৰিকপ্পা ৰীরিযপারমিযা, অত্তপরৰিকপ্পা খন্তিপারমিযা, অদিট্ঠাদীসু দিট্ঠাদিৰিকপ্পা সচ্চপারমিযা, বোধিসম্ভারতব্বিপক্খেসু দোসগুণৰিকপ্পা অধিট্ঠানপারমিযা, হিতাহিতৰিকপ্পা মেত্তাপারমিযা, ইট্ঠানিট্ঠৰিকপ্পা উপেক্খাপারমিযা সংকিলেসোতি ৰেদিতব্বো.

কিং ৰোদানন্তি তণ্হাদীহি অনুপঘাতো, যথাৰুত্তৰিকপ্পৰিরহো চ এতাসং ৰোদানন্তি ৰেদিতব্বং. অনুপহতা হি তণ্হামানদিট্ঠিকোধূপনাহমক্খপলাসইস্সামচ্ছরিযমাযাসাঠেয্যথম্ভসারম্ভ- মদপমাদাদীহি কিলেসেহি দেয্যপটিগ্গাহকৰিকপ্পাদিরহিতা চ দানাদিপারমিযো পরিসুদ্ধা পভস্সরা ভৰন্তীতি.

কো পটিপক্খোতি অৰিসেসেন সব্বেপি কিলেসা সব্বেপি অকুসলা ধম্মা এতাসং পটিপক্খো, ৰিসেসেন পন পুব্বে ৰুত্তা মচ্ছেরাদযোতি ৰেদিতব্বা. অপিচ দেয্যপটিগ্গাহকদানফলেসু অলোভাদোসামোহগুণযোগতো লোভদোসমোহপটিপক্খং দানং, কাযাদিদোসৰঙ্কাপগমনতো লোভাদিপটিপক্খং সীলং, কামসুখপরূপঘাতঅত্তকিলমথপরিৰজ্জনতো দোসত্তযপটিপক্খং নেক্খম্মং, লোভাদীনং অন্ধীকরণতো, ঞাণস্স চ অনন্ধীকরণতো লোভাদিপটিপক্খা পঞ্ঞা, অলীনানুদ্ধতঞাযারম্ভৰসেন লোভাদিপটিপক্খং ৰীরিযং, ইট্ঠানিট্ঠসুঞ্ঞতানং খমনতো লোভাদিপটিপক্খা খন্তি, সতিপি পরেসং উপকারে অপকারে চ যথাভূতপ্পৰত্তিযা লোভাদিপটিপক্খং সচ্চং, লোকধম্মে অভিভুয্য যথাসমাদিন্নেসু সম্ভারেসু অচলনতো লোভাদিপটিপক্খং অধিট্ঠানং, নীৰরণৰিৰেকতো লোভাদিপটিপক্খা মেত্তা, ইট্ঠানিট্ঠেসু অনুনযপটিঘৰিদ্ধংসনতো, সমপ্পৰত্তিতো চ লোভাদিপটিপক্খা উপেক্খাতি দট্ঠব্বং.

কা পটিপত্তীতি সুখূপকরণসরীরজীৰিতপরিচ্চাগেন ভযাপনূদনেন ধম্মোপদেসেন চ বহুধা সত্তানং অনুগ্গহকরণং দানে পটিপত্তি. তত্থাযং ৰিত্থারনযো – ‘‘ইমিনাহং দানেন সত্তানং আযুৰণ্ণসুখবলপটিভানাদিসম্পত্তিং রমণীযং অগ্গফলসম্পত্তিং নিপ্ফাদেয্য’’ন্তি অন্নদানং দেতি, তথা সত্তানং কম্মকিলেসপিপাসৰূপসমায পানং দেতি, তথা সুৰণ্ণৰণ্ণতায, হিরোত্তপ্পালঙ্কারস্স চ নিপ্ফত্তিযা ৰত্থানি দেতি, তথা ইদ্ধিৰিধস্স চেৰ নিব্বানসুখস্স চ নিপ্ফত্তিযা যানং দেতি, তথা সীলগন্ধনিপ্ফত্তিযা গন্ধং, বুদ্ধগুণসোভানিপ্ফত্তিযা মালাৰিলেপনং, বোধিমণ্ডাসননিপ্ফত্তিযা আসনং, তথাগতসেয্যানিপ্ফত্তিযা সেয্যং, সরণভাৰনিপ্ফত্তিযা আৰসথং, পঞ্চচক্খুপটিলাভায পদীপেয্যং দেতি. ব্যামপ্পভানিপ্ফত্তিযা রূপদানং, ব্রহ্মস্সরনিপ্ফত্তিযা সদ্দদানং, সব্বলোকস্স পিযভাৰায রসদানং, বুদ্ধসুখুমালভাৰায ফোট্ঠব্বদানং, অজরামরণভাৰায ভেসজ্জদানং, কিলেসদাসব্যৰিমোচনত্থং দাসানং ভুজিস্সতাদানং, সদ্ধম্মাভিরতিযা অনৰজ্জখিড্ডারতিহেতুদানং, সব্বেপি সত্তে অরিযায জাতিযা অত্তনো পুত্তভাৰূপনযনায পুত্তদানং, সকলস্স লোকস্স পতিভাৰূপগমনায দারদানং, সুভলক্খণসম্পত্তিযা সুৰণ্ণমণিমুত্তাপৰাল়াদিদানং, অনুব্যঞ্জনসম্পত্তিযা নানাৰিধৰিভূসনদানং, সদ্ধম্মকোসাধিগমায ৰিত্তকোসদানং, ধম্মরাজভাৰায রজ্জদানং, ঝানাদিসম্পত্তিযা আরামুয্যানাদিৰনদানং, চক্কঙ্কিতেহি পাদেহি বোধিমণ্ডূপসঙ্কমনায চরণদানং, চতুরোঘনিত্থরণায সত্তানং সদ্ধম্মহত্থদানত্থং হত্থদানং, সদ্ধিন্দ্রিযাদিপটিলাভায কণ্ণনাসাদিদানং, সমন্তচক্খুপটিলাভায চক্খুদানং, ‘‘দস্সনসৰনানুস্সরণপারিচরিযাদীসু সব্বকালং সব্বসত্তানং হিতসুখাৰহো, সব্বলোকেন চ উপজীৰিতব্বো মে কাযো ভৰেয্যা’’তি মংসলোহিতাদিদানং, ‘‘সব্বলোকুত্তমো ভৰেয্য’’ন্তি উত্তমঙ্গদানং দেতি.

এৰং দদন্তো চ ন অনেসনায দেতি, ন পরোপঘাতেন, ন ভযেন, ন লজ্জায, ন দক্খিণেয্যরোসনেন, ন পণীতে সতি লূখং, ন অত্তুক্কংসনেন, ন পরৰম্ভনেন, ন ফলাভিকঙ্খায, ন যাচকজিগুচ্ছায, ন অচিত্তীকারেন দেতি, অথ খো সক্কচ্চং দেতি, সহত্থেন দেতি, কালেন দেতি, চিত্তিং কত্ৰা দেতি, অৰিভাগেন দেতি, তীসু কালেসু সোমনস্সিতো দেতি. ততোযেৰ দত্ৰা ন পচ্ছানুতাপী হোতি, ন পটিগ্গাহকৰসেন মানাৰমানং করোতি, পটিগ্গাহকানং পিযসমুদাচারো হোতি ৰদঞ্ঞূ যাচযোগো সপরিৰারদাযী. তঞ্চ দানসম্পত্তিং সকললোকহিতসুখায পরিণামেতি, অত্তনো চ অকুপ্পায ৰিমুত্তিযা, অপরিক্খযস্স ছন্দস্স, অপরিক্খযস্স ৰীরিযস্স, অপরিক্খযস্স সমাধানস্স, অপরিক্খযস্স ঞাণস্স, অপরিক্খযায সম্মাসম্বোধিযা পরিণামেতি. ইমঞ্চ দানপারমিং পটিপজ্জন্তেন মহাসত্তেন জীৰিতে, ভোগেসু চ অনিচ্চসঞ্ঞা পচ্চুপট্ঠপেতব্বা, সত্তেসু চ মহাকরুণা. এৰঞ্হি ভোগে গহেতব্বসারং গণ্হন্তো আদিত্তস্মা ৰিয অগারস্মা সব্বং সাপতেয্যং, অত্তানঞ্চ বহি নীহরন্তো ন কিঞ্চি সেসেতি, নিরৰসেসতো নিস্সজ্জতিযেৰ. অযং তাৰ দানপারমিযা পটিপত্তিক্কমো.

সীলপারমিযা পন যস্মা সব্বঞ্ঞুসীলালঙ্কারেহি সত্তে অলঙ্করিতুকামেন অত্তনোযেৰ তাৰ সীলং ৰিসোধেতব্বং, তস্মা সত্তেসু তথা দযাপন্নচিত্তেন ভৰিতব্বং, যথা সুপিনন্তেনপি ন আঘাতো উপ্পজ্জেয্য. পরূপকারনিরততায পরসন্তকো অলগদ্দো ৰিয ন পরামসিতব্বো. অব্রহ্মচরিযতোপি আরাচারী, সত্তৰিধমেথুন সংযোগৰিরতো, পগেৰ পরদারগমনতো. সচ্চং হিতং পিযং পরিমিতমেৰ চ কালেন ধম্মিং কথং ভাসিতা হোতি, অনভিজ্ঝালু অব্যাপন্নো অৰিপরীতদস্সনো সম্মাসম্বুদ্ধে নিৰিট্ঠসদ্ধো নিৰিট্ঠপেমো. ইতি চতুরাপাযৰট্টদুক্খপথেহি অকুসলকম্মপথেহি, অকুসলধম্মেহি চ ওরমিত্ৰা সগ্গমোক্খপথেসু কুসলকম্মপথেসু পতিট্ঠিতস্স সুদ্ধাসযপযোগতায যথাভিপত্থিতা সত্তানং হিতসুখূপসঞ্হিতা মনোরথা সীঘং অভিনিপ্ফজ্জন্তি.

তত্থ হিংসানিৰত্তিযা সব্বসত্তানং অভযদানং দেতি, অপ্পকসিরেনেৰ মেত্তাভাৰনং সম্পাদেতি, একাদস মেত্তানিসংসে অধিগচ্ছতি, অপ্পাবাধো হোতি অপ্পাতঙ্কো দীঘাযুকো সুখবহুলো, লক্খণৰিসেসে পাপুণাতি, দোসৰাসনঞ্চ সমুচ্ছিন্দতি. তথা অদিন্নাদাননিৰত্তিযা চোরাদিঅসাধারণে উল়ারে ভোগে অধিগচ্ছতি, অনাসঙ্কনীযো পিযো মনাপো ৰিস্সসনীযো, ৰিভৰসম্পত্তীসু অলগ্গচিত্তো পরিচ্চাগসীলো, লোভৰাসনঞ্চ সমুচ্ছিন্দতি. অব্রহ্মচরিযনিৰত্তিযা অলোভো হোতি সন্তকাযচিত্তো, সত্তানং পিযো হোতি মনাপো অপরিসঙ্কনীযো, কল্যাণো চস্স কিত্তিসদ্দো অব্ভুগ্গচ্ছতি, অলগ্গচিত্তো হোতি মাতুগামেসু অলুদ্ধাসযো, নেক্খম্মবহুলো, লক্খণৰিসেসে অধিগচ্ছতি, লোভৰাসনঞ্চ সমুচ্ছিন্দতি.

মুসাৰাদনিৰত্তিযা সত্তানং পমাণভূতো হোতি পচ্চযিকো থেতো আদেয্যৰচনো দেৰতানং পিযো মনাপো সুরভিগন্ধমুখো আরক্খিযকাযৰচীসমাচারো, লক্খণৰিসেসে চ অধিগচ্ছতি, কিলেসৰাসনঞ্চ সমুচ্ছিন্দতি. পেসুঞ্ঞনিৰত্তিযা পরূপক্কমেহি অভেজ্জকাযো হোতি অভেজ্জপরিৰারো, সদ্ধম্মে চ অভিজ্জনকসদ্ধো, দল়্হমিত্তো ভৰন্তরপরিচিতানম্পি সত্তানং একন্তপিযো, অসংকিলেসবহুলো. ফরুসৰাচানিৰত্তিযা সত্তানং পিযো হোতি মনাপো সুখসীলো মধুরৰচনো সম্ভাৰনীযো, অট্ঠঙ্গসমন্নাগতো চস্স সরো (ম. নি. ২.৩৮৭) নিব্বত্ততি. সম্ফপ্পলাপনিৰত্তিযা চ সত্তানং পিযো হোতি মনাপো গরুভাৰনীযো চ আদেয্যৰচনো চ পরিমিতালাপো, মহেসক্খো চ হোতি মহানুভাৰো, ঠানুপ্পত্তিকেন পটিভানেন পঞ্হানং ব্যাকরণকুসলো, বুদ্ধভূমিযঞ্চ একায এৰ ৰাচায অনেকভাসানং সত্তানং অনেকেসং পঞ্হানং ব্যাকরণসমত্থো হোতি.

অনভিজ্ঝালুতায ইচ্ছিতলাভী হোতি, উল়ারেসু চ ভোগেসু রুচিং পটিলভতি, খত্তিযমহাসালাদীনং সম্মতো হোতি, পচ্চত্থিকেহি অনভিভৰনীযো, ইন্দ্রিযৰেকল্লং ন পাপুণাতি, অপ্পটিপুগ্গলো চ হোতি. অব্যাপাদেন পিযদস্সনো হোতি সত্তানং সম্ভাৰনীযো, পরহিতাভিনন্দিতায চ সত্তে অপ্পকসিরেনেৰ পসাদেতি, অলূখসভাৰো চ হোতি মেত্তাৰিহারী, মহেসক্খো চ হোতি মহানুভাৰো. মিচ্ছাদস্সনাভাৰেন কল্যাণে সহাযে পটিলভতি, সীসচ্ছেদম্পি পাপুণন্তো পাপকম্মং ন করোতি, কম্মস্সকতাদস্সনতো অকোতূহলমঙ্গলিকো চ হোতি, সদ্ধম্মে চস্স সদ্ধা পতিট্ঠিতা হোতি মূলজাতা, সদ্দহতি চ তথাগতানং বোধিং, সমযন্তরেসু নাভিরমতি উক্কারট্ঠানে ৰিয রাজহংসো, লক্খণত্তযপরিজাননকুসলো হোতি, অন্তে চ অনাৰরণঞাণলাভী, যাৰ বোধিং ন পাপুণাতি, তাৰ তস্মিং তস্মিং সত্তনিকাযে উক্কট্ঠুক্কট্ঠো চ হোতি, উল়ারুল়ারসম্পত্তিযো পাপুণাতি.

‘‘ইতি হিদং সীলং নাম সব্বসম্পত্তীনং অধিট্ঠানং, সব্ববুদ্ধগুণানং পভৰভূমি, সব্ববুদ্ধকরধম্মানমাদি চরণং মুখং পমুখ’’ন্তি বহুমানং উপ্পাদেত্ৰা কাযৰচীসংযমে, ইন্দ্রিযদমনে, আজীৰসম্পদায, পচ্চযপরিভোগে চ সতিসম্পজঞ্ঞবলেন অপ্পমত্তেন লাভসক্কারসিলোকং মিত্তমুখপচ্চত্থিকং ৰিয সল্লক্খেত্ৰা ‘‘কিকীৰ অণ্ড’’ন্তিআদিনা (ৰিসুদ্ধি. ১.১৯; দী. নি. অট্ঠ. ১.৭) ৰুত্তনযেন সক্কচ্চং সীলং সম্পাদেতব্বং. অযমেত্থ সঙ্খেপো, ৰিত্থারো পন ৰিসুদ্ধিমগ্গে (ৰিসুদ্ধি. ১.৬) ৰুত্তনযেন ৰেদিতব্বো. তঞ্চ পনেতং সীলং ন অত্তনো দুগ্গতিপরিকিলেসৰিমুত্তিযা, সুগতিযম্পি, ন রজ্জসম্পত্তিযা, নচক্কৰত্তি-নদেৰ-নসক্ক-নমার-নব্রহ্মসম্পত্তিযা, নাপি অত্তনো তেৰিজ্জতাদিহেতু, ন পচ্চেকবোধিযা, অথ খো সব্বঞ্ঞুভাৰেন সব্বসত্তানং অনুত্তরসীলালঙ্কারসম্পাদনত্থমেৰাতি পরিণামেতব্বং.

তথা সকলসংকিলেসনিৰাসট্ঠানতায, পুত্তদারাদীহি মহাসম্বাধতায, কসিৰণিজ্জাদিনানাৰিধকম্মন্তাধিট্ঠানব্যাকুলতায চ ঘরাৰাসস্স নেক্খম্মসুখাদীনং অনোকাসতং, কামানঞ্চ ‘‘সত্থধারালগ্গমধুবিন্দু ৰিয চ অৰলেয্হমানা পরিত্তস্সাদা ৰিপুলানত্থানুবন্ধা’’তি চ ‘‘ৰিজ্জুলতোভাসেন গহেতব্বং নচ্চং ৰিয পরিত্তকালোপলব্ভা, উম্মত্তকালঙ্কারো ৰিয ৰিপরীতসঞ্ঞায অনুভৰিতব্বা, করীসাৰচ্ছাদনসুখং ৰিয পটিকারভূতা, উদকতেমিতঙ্গুলিযা উস্সাৰকোদকপানং ৰিয অতিত্তিকরা, ছাতজ্ঝত্তভোজনং ৰিয সাবাধা, বলিসামিসং ৰিয ব্যসনসন্নিপাতকারণা, অগ্গিসন্তাপো ৰিয কালত্তযেপি দুক্খুপ্পত্তিহেতুভূতা, মক্কটালেপো ৰিয বন্ধনিমিত্তা ঘাতকাৰচ্ছাদনকিমিলযো ৰিয অনত্থচ্ছাদনা, সপত্তগামৰাসো ৰিয ভযট্ঠানভূতা, পচ্চত্থিকপোসকো ৰিয কিলেসমারাদীনং আমিসভূতা, ছণসম্পত্তিযো ৰিয ৰিপরিণামদুক্খা, কোটরগ্গি ৰিয অন্তোদাহকা, পুরাণকূপাৰলম্ববীরণমধুপিণ্ডং ৰিয অনেকাদীনৰা, লোণূদকপানং ৰিয পিপাসহেতুভূতা, সুরামেরযং ৰিয নীচজনসেৰিতা, অপ্পস্সাদতায অট্ঠিকঙ্কলূপমা’’তিআদিনা চ নযেন আদীনৰং সল্লক্খেত্ৰা তব্বিপরিযাযেন নেক্খম্মে আনিসংসং পস্সন্তেন নেক্খম্মপৰিৰেকউপসমসুখাদীসু নিন্নপোণপব্ভারচিত্তেন নেক্খম্মপারমী পূরেতব্বা.

তথা যস্মা পঞ্ঞা আলোকো ৰিয অন্ধকারেন, মোহেন সহ ন ৰত্ততি, তস্মা মোহকারণানি তাৰ বোধিসত্তেন পরিৰজ্জিতব্বানি. তত্থিমানি মোহকারণানি – অরতি তন্দী ৰিজম্ভিতা আলসিযং গণসঙ্গণিকারামতা নিদ্দাসীলতা অনিচ্ছযসীলতা ঞাণস্মিং অকুতূহলতা মিচ্ছাধিমানো অপরিপুচ্ছকতা কাযস্স ন সম্মাপরিহারো অসমাহিতচিত্ততা দুপ্পঞ্ঞানং পুগ্গলানং সেৰনা পঞ্ঞৰন্তানং অপযিরুপাসনা অত্তপরিভৰো মিচ্ছাৰিকপ্পো ৰিপরীতাভিনিৰেসো কাযদল়্হীবহুলতা অসংৰেগসীলতা পঞ্চ নীৰরণানি. সঙ্খেপতো যে ৰা পন ধম্মে আসেৰতো অনুপ্পন্না পঞ্ঞা ন উপ্পজ্জতি, উপ্পন্না পরিহাযতি, ইতি ইমানি সম্মোহকারণানি পরিৰজ্জন্তেন বাহুসচ্চে ঝানাদীসু চ যোগো করণীযো.

তত্থাযং বাহুসচ্চস্স ৰিসযৰিভাগো – পঞ্চ খন্ধা দ্ৰাদসাযতনানি, অট্ঠারস ধাতুযো চত্তারি সচ্চানি বাৰীসতিন্দ্রিযানি দ্ৰাদসপদিকো পটিচ্চসমুপ্পাদো, তথা সতিপট্ঠানাদযো কুসলাদিধম্মপ্পকারভেদা চ. যানি চ লোকে অনৰজ্জানি ৰিজ্জট্ঠানানি, যে চ সত্তানং হিতসুখৰিধানযোগ্যা ব্যাকরণৰিসেসা. ইতি এৰং পকারং সকলমেৰ সুতৰিসযং উপাযকোসল্লপুব্বঙ্গমায পঞ্ঞায সতিৰীরিযুপত্থম্ভকারণায সাধুকং উগ্গহণসৰনধারণপরিচযপরিপুচ্ছাহি ওগাহেত্ৰা তত্থ চ পরেসং পতিট্ঠপনেন সুতমযা পঞ্ঞা নিব্বত্তেতব্বা, তথা খন্ধাদীনং সভাৰধম্মানং আকারপরিৰিতক্কনমুখেন তে নিজ্ঝানং খমাপেন্তেন চিন্তামযা, খন্ধাদীনংযেৰ পন সলক্খণসামঞ্ঞলক্খণপরিগ্গহৰসেন লোকিযং পরিঞ্ঞং নিব্বত্তেন্তেন পুব্বভাগভাৰনাপঞ্ঞা সম্পাদেতব্বা. এৰঞ্হি ‘‘নামরূপমত্তমিদং যথারহং পচ্চযেহি উপ্পজ্জতি চেৰ নিরুজ্ঝতি চ, ন এত্থ কোচি কত্তা ৰা কারেতা ৰা, হুত্ৰা অভাৰট্ঠেন অনিচ্চং, উদযব্বযপটিপীল়নট্ঠেন দুক্খং, অৰসৰত্তনট্ঠেন অনত্তা’’তি অজ্ঝত্তিকবাহিরে ধম্মে নিব্বিসেসং পরিজানন্তো তত্থ আসঙ্গং পজহিত্ৰা, পরে চ তত্থ তং জহাপেত্ৰা কেৰলং করুণাৰসেনেৰ যাৰ ন বুদ্ধগুণা হত্থতলং আগচ্ছন্তি, তাৰ যানত্তযে সত্তে অৰতারণপরিপাচনেহি পতিট্ঠাপেন্তো, ঝানৰিমোক্খসমাধিসমাপত্তিযো চ ৰসীভাৰং পাপেন্তো পঞ্ঞায অতিৰিয মত্থকং পাপুণাতীতি.

তথা সম্মাসম্বোধিযা কতাভিনীহারেন মহাসত্তেন ‘‘কো নু অজ্জ পুঞ্ঞঞাণসম্ভারো উপচিতো, কিঞ্চ মযা কতং পরহিত’’ন্তি দিৰসে দিৰসে পচ্চৰেক্খন্তেন সত্তহিতত্থং উস্সাহো করণীযো, সব্বেসম্পি সত্তানং উপকারায অত্তনো কাযং জীৰিতঞ্চ ওস্সজ্জিতব্বং, সব্বেপি সত্তা অনোধিসো মেত্তায করুণায চ ফরিতব্বা, যা কাচি সত্তানং দুক্খুপ্পত্তি, সব্বা সা অত্তনি পাটিকঙ্খিতব্বা, সব্বেসঞ্চ সত্তানং পুঞ্ঞং অব্ভনুমোদিতব্বং, বুদ্ধমহন্ততা অভিণ্হং পচ্চৰেক্খিতব্বা, যঞ্চ কিঞ্চি কম্মং করোতি কাযেন ৰাচায ৰা, তং সব্বং বোধিনিন্নচিত্তপুব্বঙ্গমং কাতব্বং. ইমিনা হি উপাযেন বোধিসত্তানং অপরিমেয্যো পুঞ্ঞভাগো উপচীযতি. অপিচ সত্তানং পরিভোগত্থং পরিপালনত্থঞ্চ অত্তনো সরীরং জীৰিতঞ্চ পরিচ্চজিত্ৰা খুপ্পিপাসাসীতুণ্হৰাতাতপাদিদুক্খপটিকারো পরিযেসিতব্বো. যঞ্চ যথাৰুত্তদুক্খপটিকারজং সুখং অত্তনা পটিলভতি, তথা রমণীযেসু আরামুয্যানপাসাদতলাদীসু, অরঞ্ঞাযতনেসু চ কাযচিত্তসন্তাপাভাৰেন অভিনিব্বুতত্তা সুখং ৰিন্দতি, যঞ্চ সুণাতি বুদ্ধানুবুদ্ধপচ্চেকবুদ্ধবোধিসত্তানং দিট্ঠধম্মসুখৰিহারভূতং ঝানসমাপত্তিসুখং, তং সব্বং সত্তেসু অনোধিসো উপসংহরতি. অযং তাৰ অসমাহিতভূমিযং নযো.

সমাহিতো পন অত্তনা যথানুভূতং ৰিসেসাধিগমনিব্বত্তং পীতিপস্সদ্ধিসুখং সব্বসত্তেসু অধিমুচ্চতি, তথা মহতি সংসারদুক্খে, তন্নিমিত্তভূতে চ কিলেসাভিসঙ্খারদুক্খে নিমুগ্গং সত্তনিকাযং দিস্ৰা তত্থপি ছেদনভেদনফালনপিসনগ্গিসন্তাপাদিজনিতা দুক্খা তিব্বা খরা কটুকা ৰেদনা নিরন্তরং চিরকালং ৰেদিযন্তে নারকে, অঞ্ঞমঞ্ঞং কুজ্ঝনসন্তাপনৰিহেঠনহিংসনপরাধীনতাদীহি দুক্খং অনুভৰন্তে তিরচ্ছানে, জোতিমালা’কুলসরীরে উদ্ধবাহুৰিরৰন্তে উক্কামুখে খুপ্পিপাসাদীহি ডয্হমানে চ ৰন্তখেল়াদিআহারে চ মহাদুক্খং ৰেদযমানে পেতে চ পরিযেট্ঠিমূলকং মহন্তং অনযব্যসনং পাপুণন্তে হত্থচ্ছেদাদিকারণযোগেন দুব্বণ্ণদুদ্দসিকদলিদ্দতাদিভাৰেন খুপ্পিপাসাদিযোগেন বলৰন্তেহি অভিভৰনীযতো, পরেসং ৰহনতো, পরাধীনতো চ নারকে পেতে তিরচ্ছানে চ অতিসযন্তে অপাযদুক্খনিব্বিসেসং দুক্খং অনুভৰন্তে মনুস্সে চ তথা ৰিসযৰিসপরিভোগৰিক্খিত্তচিত্ততায রাগাদিপরিযুট্ঠানেন ডয্হমানে ৰাযুৰেগসমুট্ঠিতজালাসমিদ্ধসুক্খকট্ঠসন্নিপাতে অগ্গিক্খন্ধে ৰিয অনুপসন্তপরিল়াহৰুত্তিকে অনিহতপরাধীনে কামাৰচরদেৰে চ মহতা ৰাযামেন ৰিদূরমাকাসং ৰিগাহিতসকুন্তা ৰিয, বলৰন্তেহি খিত্তসরা ৰিয চ ‘‘সতিপি চিরপ্পৰত্তিযং অনচ্চন্তিকতায পাতপরিযোসানা অনতিক্কন্তজাতিজরামরণা এৰা’’তি রূপাৰচরারূপাৰচরদেৰে চ পস্সন্তেন মেত্তায করুণায চ অনোধিসো সত্তা ফরিতব্বা. এৰং কাযেন ৰাচায মনসা চ বোধিসম্ভারে নিরন্তরং উপচিনন্তেন উস্সাহো পৰত্তেতব্বো.

অপিচ ‘‘অচিন্তেয্যাপরিমিতৰিপুলোল়ারৰিমলনিরুপমনিরুপক্কিলেসগুণনিচযনিদানভূতস্স বুদ্ধভাৰস্স উস্সক্কিত্ৰা সম্পহংসনযোগ্যং ৰীরিযং নাম অচিন্তেয্যানুভাৰমেৰ. যং ন পচুরজনা সোতুম্পি সক্কুণন্তি, পগেৰ পটিপজ্জিতুং. তথা হি তিৰিধা অভিনীহারচিত্তুপ্পত্তি, চতস্সো বুদ্ধভূমিযো, চত্তারি সঙ্গহৰত্থূনি (দী. নি. ৩.২১০, ৩১৩; অ. নি. ৪.৩২), করুণোকাসতা, বুদ্ধধম্মেসু নিজ্ঝানক্খন্তি, সব্বধম্মেসু নিরুপলেপো, সব্বসত্তেসু পুত্তসঞ্ঞা, সংসারদুক্খেহি অপরিখেদো, সব্বদেয্যধম্মপরিচ্চাগো, তেন চ নিরতিমানতা, অধিসীলসিক্খাদিঅধিট্ঠানং, তত্থ চ অচলতা, কুসলকিরিযাসু পীতিপামোজ্জং, ৰিৰেকনিন্নচিত্ততা, ঝানানুযোগো, অনৰজ্জসুতেন অতিত্তি, যথাসুতস্স ধম্মস্স পরেসং হিতজ্ঝাসযেন দেসনা, সত্তানং ঞাযে নিৰেসনং, আরম্ভদল়্হতা, ধীরৰীরভাৰো, পরাপৰাদপরাপকারেসু ৰিকারাভাৰো, সচ্চাধিট্ঠানং, সমাপত্তীসু ৰসীভাৰো, অভিঞ্ঞাসু বলপ্পত্তি, লক্খণত্তযাৰবোধো, সতিপট্ঠানাদীসু অভিযোগেন লোকুত্তরমগ্গসম্ভারসম্ভরণং, নৰলোকুত্তরাৰক্কন্তী’’তি এৰমাদিকা সব্বা বোধিসম্ভারপটিপত্তি ৰীরিযানুভাৰেনেৰ সমিজ্ঝতীতি অভিনীহারতো যাৰ মহাবোধি অনোস্সজ্জন্তেন সক্কচ্চং নিরন্তরং ৰীরিযং সম্পাদেতব্বং. সম্পজ্জমানে চ ৰীরিযে খন্তিআদযো দানাদযো চ সব্বেপি বোধিসম্ভারা তদধীনৰুত্তিতায সম্পন্না এৰ হোন্তীতি. খন্তিআদীসুপি ইমিনা নযেন পটিপত্তি ৰেদিতব্বা.

ইতি সত্তানং সুখূপকরণপরিচ্চাগেন বহুধা অনুগ্গহকরণং দানেন পটিপত্তি, সীলেন তেসং জীৰিতসাপতেয্যদাররক্খঅভেদপিযহিতৰচনাৰিহিংসাদিকরণানি, নেক্খম্মেন নেসং আমিসপটিগ্গহণধম্মদানাদিনা অনেকধা হিতচরিযা, পঞ্ঞায তেসং হিতকরণূপাযকোসল্লং, ৰীরিযেন তত্থ উস্সাহারম্ভঅসংহীরানি, খন্তিযা তদপরাধসহনং, সচ্চেন তেসং অৰঞ্চনতদুপকারকিরিযাসমাদানাৰিসংৰাদনাদি, অধিট্ঠানেন তদুপকারকরণে অনত্থসম্পাতেপি অচলনং, মেত্তায তেসং হিতসুখানুচিন্তনং, উপেক্খায তেসং উপকারাপকারেসু ৰিকারানাপত্তীতি এৰং অপরিমাণে সত্তে আরব্ভ অনুকম্পিতসব্বসত্তস্স বোধিসত্তস্স পুথুজ্জনেহি অসাধারণো অপরিমাণো পুঞ্ঞঞাণসম্ভারূপচযো এত্থ পটিপত্তীতি ৰেদিতব্বং. যো চেতাসং পচ্চযো ৰুত্তো, তস্স চ সক্কচ্চং সম্পাদনং.

কো ৰিভাগোতি দস পারমিযো, দস উপপারমিযো, দস পরমত্থপারমিযোতি সমত্তিংস পারমিযো. তত্থ কতাভিনীহারস্স বোধিসত্তস্স পরহিতকরণাভিনিন্নআসযপ্পযোগস্স কণ্হধম্মৰোকিণ্ণা সুক্কধম্মা পারমিযো, তেহি অৰোকিণ্ণা সুক্কা ধম্মা উপপারমিযো, অকণ্হা অসুক্কা পরমত্থপারমিযোতি কেচি. সমুদাগমনকালেসু পূরিযমানা পারমিযো, বোধিসত্তভূমিযং পুণ্ণা উপপারমিযো, বুদ্ধভূমিযং সব্বাকারপরিপুণ্ণা পরমত্থপারমিযো. বোধিসত্তভূমিযং ৰা পরহিতকরণতো পারমিযো, অত্তহিতকরণতো উপপারমিযো, বুদ্ধভূমিযং বলৰেসারজ্জসমধিগমেন উভযহিতপরিপূরণতো পরমত্থপারমিযোতি এৰং আদিমজ্ঝপরিযোসানেসু পণিধানারম্ভপরিনিট্ঠানেসু তেসং ৰিভাগোতি অপরে. দোসুপসমকরুণাপকতিকানং ভৰসুখৰিমুত্তিসুখপরমসুখপ্পত্তানং পুঞ্ঞূপচযভেদতো তব্বিভাগোতি অঞ্ঞে.

লজ্জাসতিমানাপস্সযানং লোকুত্তরধম্মাধিপতীনং সীলসমাধিপঞ্ঞাগরুকানং তারিততরিততারযিতূনং অনুবুদ্ধপচ্চেকবুদ্ধসম্মাসম্বুদ্ধানং পারমী, উপপারমী, পরমত্থপারমীতি বোধিত্তযপ্পত্তিতো যথাৰুত্তৰিভাগোতি কেচি. চিত্তপণিধিতো যাৰ ৰচীপণিধি, তাৰ পৰত্তা সম্ভারা পারমিযো, ৰচীপণিধিতো যাৰ কাযপণিধি, তাৰ পৰত্তা উপপারমিযো, কাযপণিধিতো পভুতি পরমত্থপারমিযোতি অপরে. অঞ্ঞে পন ‘‘পরপুঞ্ঞানুমোদনৰসেন পৰত্তা সম্ভারা পারমিযো, পরেসং কারাপনৰসেন পৰত্তা উপপারমিযো, সযং করণৰসেন পৰত্তা পরমত্থপারমিযো’’তি ৰদন্তি. তথা ভৰসুখাৰহো পুঞ্ঞঞাণসম্ভারো পারমী, অত্তনো নিব্বানসুখাৰহো উপপারমী, পরেসং তদুভযসুখাৰহো পরমত্থপারমীতি একে.

পুত্তদারধনাদিউপকরণপরিচ্চাগো পন দানপারমী, অত্তনো অঙ্গপরিচ্চাগো দানউপপারমী, অত্তনো জীৰিতপরিচ্চাগো দানপরমত্থপারমী. তথা পুত্তদারাদিকস্স তিৰিধস্সপি হেতু অৰীতিক্কমনৰসেন তিস্সো সীলপারমিযো, তেসু এৰ তিৰিধেসু ৰত্থূসু আলযং উপচ্ছিন্দিত্ৰা নিক্খমনৰসেন তিস্সো নেক্খম্মপারমিযো, উপকরণঙ্গজীৰিততণ্হং সমূহনিত্ৰা সত্তানং হিতাহিতৰিনিচ্ছযকরণৰসেন তিস্সো পঞ্ঞাপারমিযো, যথাৰুত্তভেদানং পরিচ্চাগাদীনং ৰাযমনৰসেন তিস্সো ৰীরিযপারমিযো, উপকরণঙ্গজীৰিতন্তরাযকরানং খমনৰসেন তিস্সো খন্তিপারমিযো, উপকরণঙ্গজীৰিতহেতু সচ্চাপরিচ্চাগৰসেন তিস্সো সচ্চপারমিযো, দানাদিপারমিযো অকুপ্পাধিট্ঠানৰসেনেৰ সমিজ্ঝন্তীতি উপকরণাদিৰিনাসেপি অচলাধিট্ঠানৰসেন তিস্সো অধিট্ঠানপারমিযো, উপকরণাদিউপঘাতকেসুপি সত্তেসু মেত্তায অৰিজহনৰসেন তিস্সো মেত্তাপারমিযো, যথাৰুত্তৰত্থুত্তযস্স উপকারাপকারেসু সত্তসঙ্খারেসু মজ্ঝত্ততাপটিলাভৰসেন তিস্সো উপেক্খাপারমিযোতি এৰমাদিনা এতাসং ৰিভাগো ৰেদিতব্বো.

কো সঙ্গহোতি এত্থ পন যথা এতা ৰিভাগতো তিংসৰিধাপি দানপারমীআদিভাৰতো দসৰিধা, এৰং দানসীলখন্তিৰীরিযঝানপঞ্ঞাসভাৰেন ছব্বিধা. এতাসু হি নেক্খম্মপারমী সীলপারমিযা সঙ্গহিতা তস্সা পব্বজ্জাভাৰে, নীৰরণৰিৰেকভাৰে পন ঝানপারমিযা, কুসলধম্মভাৰে ছহিপি সঙ্গহিতা. সচ্চপারমী সীলপারমিযা একদেসোযেৰ ৰচীসচ্চৰিরতিসচ্চপক্খে, ঞাণসচ্চপক্খে পন পঞ্ঞাপারমিযা সঙ্গহিতা. মেত্তাপারমী ঝানপারমিযা এৰ, উপেক্খাপারমী ঝানপঞ্ঞাপারমীহি, অধিট্ঠানপারমী সব্বাহিপি সঙ্গহিতাতি.

এতেসঞ্চ দানাদীনং ছন্নং গুণানং অঞ্ঞমঞ্ঞং সম্বন্ধানং পঞ্চদসযুগল়াদীনি পঞ্চদসযুগল়াদিসাধকানি হোন্তি – সেয্যথিদং? দানসীলযুগল়েন পরহিতাহিতানং করণাকরণযুগল়সিদ্ধি, দানখন্তিযুগল়েন অলোভাদোসযুগল়সিদ্ধি, দানৰীরিযযুগল়েন চাগসুতযুগল়সিদ্ধি, দানঝানযুগল়েন কামদোসপ্পহানযুগল়সিদ্ধি, দানপঞ্ঞাযুগল়েন অরিযযানধুরযুগল়সিদ্ধি, সীলখন্তিদ্ৰযেন পযোগাসযসুদ্ধিদ্ৰযসিদ্ধি, সীলৰীরিযদ্ৰযেন ভাৰনাদ্ৰযসিদ্ধি, সীলঝানদ্ৰযেন দুস্সীল্যপরিযুট্ঠানপ্পহানদ্ৰযসিদ্ধি, সীলপঞ্ঞাদ্ৰযেন দানদ্ৰযসিদ্ধি, খন্তিৰীরিযযুগল়েন খমাতেজদ্ৰযসিদ্ধি, খন্তিঝানযুগল়েন ৰিরোধানুরোধপ্পহানযুগল়সিদ্ধি, খন্তিপঞ্ঞাযুগল়েন সুঞ্ঞতাখন্তিপটিৰেধদুকসিদ্ধি, ৰীরিযঝানদুকেন পগ্গাহাৰিক্খেপদুকসিদ্ধি, ৰীরিযপঞ্ঞাদুকেন সরণদুকসিদ্ধি, ঝানপঞ্ঞাদুকেন যানদুকসিদ্ধি. দানসীলখন্তিত্তিকেন লোভদোসমোহপ্পহানত্তিকসিদ্ধি, দানসীলৰীরিযত্তিকেন ভোগজীৰিতকাযসারাদানত্তিকসিদ্ধি, দানসীলঝানত্তিকেন পুঞ্ঞকিরিযৰত্থুত্তিকসিদ্ধি, দানসীলপঞ্ঞাতিকেন আমিসাভযধম্মদানত্তিকসিদ্ধীতি এৰং ইতরেহিপি তিকেহি চতুক্কাদীহি চ যথাসম্ভৰং তিকানি চতুক্কাদীনি চ যোজেতব্বানি.

এৰং ছব্বিধানম্পি পন ইমাসং পারমীনং চতূহি অধিট্ঠানেহি সঙ্গহো ৰেদিতব্বো. সব্বপারমীনং সমূহসঙ্গহতো হি চত্তারি অধিট্ঠানানি. সেয্যথিদং – সচ্চাধিট্ঠানং, চাগাধিট্ঠানং, উপসমাধিট্ঠানং, পঞ্ঞাধিট্ঠানন্তি. তত্থ অধিতিট্ঠতি এতেন, এত্থ ৰা অধিতিট্ঠতি, অধিট্ঠানমত্তমেৰ ৰা তন্তি অধিট্ঠানং. সচ্চঞ্চ তং অধিট্ঠানঞ্চ, সচ্চস্স ৰা অধিট্ঠানং, সচ্চং অধিট্ঠানং এতস্সাতি ৰা সচ্চাধিট্ঠানং. এৰং সেসেসুপি. তত্থ অৰিসেসতো তাৰ লোকুত্তরগুণে কতাভিনীহারস্স অনুকম্পিতসব্বসত্তস্স মহাসত্তস্স পরিঞ্ঞানুরূপং সব্বপারমিপরিগ্গহতো সচ্চাধিট্ঠানং, তেসং পটিপক্খপরিচ্চাগতো চাগাধিট্ঠানং, সব্বপারমিতাগুণেহি উপসমতো উপসমাধিট্ঠানং, তেহিযেৰ পরহিতোপাযকোসল্লতো পঞ্ঞাধিট্ঠানং. ৰিসেসতো পন ‘‘অত্থিকজনং অৰিসংৰাদেত্ৰা দস্সামী’’তি পটিজানতো, পটিঞ্ঞং অৰিসংৰাদেত্ৰা দানতো, দানং অৰিসংৰাদেত্ৰা অনুমোদনতো, মচ্ছরিযাদিপটিপক্খপরিচ্চাগতো, দেয্যপটিগ্গাহকদানদেয্যধম্মক্খযেসু লোভদোসমোহভযৰূপসমতো, যথারহং যথাকালং যথাৰিধানঞ্চ দানতো, পঞ্ঞুত্তরতো চ কুসলধম্মানং চতুরধিট্ঠানপদট্ঠানং দানং. তথা সংৰরসমাদানস্স অৰীতিক্কমতো, দুস্সীল্যপরিচ্চাগতো, দুচ্চরিতৰূপসমতো, পঞ্ঞুত্তরতো চ চতুরধিট্ঠানপদট্ঠানং সীলং. যথাপটিঞ্ঞং খমনতো, পরাপরাধৰিকপ্পপরিচ্চাগতো, কোধপরিযুট্ঠানৰূপসমতো, পঞ্ঞুত্তরতো চ চতুরধিট্ঠানপদট্ঠানা খন্তি. পটিঞ্ঞানুরূপং পরহিতকরণতো, ৰিসাদপরিচ্চাগতো, অকুসলধম্মানং ৰূপসমতো, পঞ্ঞুত্তরতো চ চতুরধিট্ঠানপদট্ঠানং ৰীরিযং. পটিঞ্ঞানুরূপং লোকহিতানুচিন্তনতো, নীৰরণপরিচ্চাগতো, চিত্তৰূপসমতো, পঞ্ঞুত্তরতো চ চতুরধিট্ঠানপদট্ঠানং ঝানং. যথাপটিঞ্ঞং পরহিতূপাযকোসল্লতো, অনুপাযকিরিযাপরিচ্চাগতো, মোহজপরিল়াহৰূপসমতো, সব্বঞ্ঞুতাপটিলাভতো চ চতুরধিট্ঠানপদট্ঠানা পঞ্ঞা.

তত্থ ঞেয্যপটিঞ্ঞানুৰিধানেহি সচ্চাধিট্ঠানং, ৰত্থুকামকিলেসকামপরিচ্চাগেহি চাগাধিট্ঠানং, দোসদুক্খৰূপসমেহি উপসমাধিট্ঠানং, অনুবোধপটিৰেধেহি পঞ্ঞাধিট্ঠানং. তিৰিধসচ্চপরিগ্গহিতং দোসত্তযৰিরোধি সচ্চাধিট্ঠানং, তিৰিধচাগপরিগ্গহিতং দোসত্তযৰিরোধি চাগাধিট্ঠানং, তিৰিধৰূপসমপরিগ্গহিতং দোসত্তযৰিরোধি উপসমাধিট্ঠানং, তিৰিধঞাণপরিগ্গহিতং দোসত্তযৰিরোধি পঞ্ঞাধিট্ঠানং. সচ্চাধিট্ঠানপরিগ্গহিতানি চাগূপসমপঞ্ঞাধিট্ঠানানি অৰিসংৰাদনতো, পটিঞ্ঞানুৰিধানতো চ. চাগাধিট্ঠানপরিগ্গহিতানি সচ্চূপসমপঞ্ঞাধিট্ঠানানি পটিপক্খপরিচ্চাগতো, সব্বপরিচ্চাগফলত্তা চ. উপসমাধিট্ঠানপরিগ্গহিতানি সচ্চচাগপঞ্ঞাধিট্ঠানানি কিলেসপরিল়াহূপসমতো, কামূপসমতো, কামপরিল়াহূপসমতো চ. পঞ্ঞাধিট্ঠানপরিগ্গহিতানি সচ্চচাগূপসমাধিট্ঠানানি ঞাণপুব্বঙ্গমতো, ঞাণানুপরিৰত্তনতো চাতি এৰং সব্বাপি পারমিযো সচ্চপ্পভাৰিতা চাগপরিব্যঞ্জিতা উপসমোপব্রূহিতা পঞ্ঞাপরিসুদ্ধা. সচ্চঞ্হি এতাসং জনকহেতু, চাগো পরিগ্গাহকহেতু, উপসমো পরিৰুড্ঢিহেতু, পঞ্ঞা পারিসুদ্ধিহেতু. তথা আদিম্হি সচ্চাধিট্ঠানং সচ্চপটিঞ্ঞত্তা, মজ্ঝে চাগাধিট্ঠানং কতপণিধানস্স পরহিতায অত্তপরিচ্চাগতো, অন্তে উপসমাধিট্ঠানং সব্বূপসমপরিযোসানত্তা, আদিমজ্ঝপরিযোসানেসু পঞ্ঞাধিট্ঠানং তস্মিং সতি সম্ভৰতো, অসতি অভাৰতো, যথাপটিঞ্ঞঞ্চ ভাৰতো.

তত্থ মহাপুরিসা অত্তহিতপরহিতকরেহি গরুপিযভাৰকরেহি সচ্চচাগাধিট্ঠানেহি গিহিভূতা আমিসদানেন পরে অনুগ্গণ্হন্তি. তথা অত্তহিতপরহিতকরেহি গরুপিযভাৰকরেহি উপসমপঞ্ঞাধিট্ঠানেহি চ পব্বজিতভূতা ধম্মদানেন পরে অনুগ্গণ্হন্তি.

তত্থ অন্তিমভৰে বোধিসত্তস্স চতুরধিট্ঠানপরিপূরণং. পরিপুণ্ণচতুরধিট্ঠানস্স হি চরিমকভৰূপপত্তীতি একে. তত্র হি গব্ভোক্কন্তিঠিতিঅভিনিক্খমনেসু পঞ্ঞাধিট্ঠানসমুদাগমেন সতো সম্পজানো সচ্চাধিট্ঠানপারিপূরিযা সম্পতিজাতো উত্তরাভিমুখো সত্তপদৰীতিহারেন গন্ত্ৰা সব্বা দিসা ওলোকেত্ৰা সচ্চানুপরিৰত্তিনা ৰচসা ‘‘অগ্গোহমস্মি লোকস্স, জেট্ঠো…পে… সেট্ঠোহমস্মি লোকস্সা’’তি (দী. নি. ২.৩১; ম. নি. ৩.২০৭) তিক্খত্তুং সীহনাদং নদি, উপসমাধিট্ঠানসমুদাগমেন জিণ্ণাতুরমতপব্বজিতদস্সাৰিনো চতুধম্মপদেসকোৰিদস্স যোব্বনারোগ্যজীৰিতসম্পত্তিমদানং উপসমো, চাগাধিট্ঠানসমুদাগমেন মহতো ঞাতিপরিৰট্টস্স হত্থগতস্স চ চক্কৰত্তিরজ্জস্স অনপেক্খপরিচ্চাগোতি.

দুতিযে ঠানে অভিসম্বোধিযং চতুরধিট্ঠানং পরিপুণ্ণন্তি কেচি. তত্থ হি যথাপটিঞ্ঞং সচ্চাধিট্ঠানসমুদাগমেন চতুন্নং অরিযসচ্চানং অভিসমযো, ততো হি সচ্চাধিট্ঠানং পরিপুণ্ণং. চাগাধিট্ঠানসমুদাগমেন সব্বকিলেসোপক্কিলেসপরিচ্চাগো, ততো হি চাগাধিট্ঠানং পরিপুণ্ণং. উপসমাধিট্ঠানসমুদাগমেন পরমূপসমসম্পত্তি, ততো হি উপসমাধিট্ঠানং পরিপুণ্ণং. পঞ্ঞাধিট্ঠানসমুদাগমেন অনাৰরণঞাণপটিলাভো, ততো হি পঞ্ঞাধিট্ঠানং পরিপুণ্ণন্তি, তং অসিদ্ধং অভিসম্বোধিযাপি পরমত্থভাৰতো.

ততিযে ঠানে ধম্মচক্কপ্পৰত্তনে (সং. নি. ৫.১০৮১; মহাৰ. ১৩; পটি. ম. ২.৩০) চতুরধিট্ঠানং পরিপুণ্ণন্তি অঞ্ঞে. তত্থ হি সচ্চাধিট্ঠানসমুদাগতস্স দ্ৰাদসহি আকারেহি অরিযসচ্চদেসনায সচ্চাধিট্ঠানং পরিপুণ্ণং, চাগাধিট্ঠানসমুদাগতস্স সদ্ধম্মমহাযাগকরণেন চাগাধিট্ঠানং পরিপুণ্ণং. উপসমাধিট্ঠানসমুদাগতস্স সযং উপসন্তস্স পরেসং উপসমনেন উপসমাধিট্ঠানং পরিপুণ্ণং, পঞ্ঞাধিট্ঠানসমুদাগতস্স ৰিনেয্যানং আসযাদিপরিজাননেন পঞ্ঞাধিট্ঠানং পরিপুণ্ণন্তি, তদপি অসিদ্ধং অপরিযোসিতত্তা বুদ্ধকিচ্চস্স.

চতুত্থে ঠানে পরিনিব্বানে চতুরধিট্ঠানপরিপুণ্ণন্তি অপরে. তত্র হি পরিনিব্বুতত্তা পরমত্থসচ্চসম্পত্তিযা সচ্চাধিট্ঠানপরিপূরণং, সব্বূপধিপটিনিস্সগ্গেন চাগাধিট্ঠানপরিপূরণং, সব্বসঙ্খারূপসমেন উপসমাধিট্ঠানপরিপূরণং, পঞ্ঞাপযোজনপরিনিট্ঠানেন পঞ্ঞাধিট্ঠানপরিপূরণন্তি.

তত্র মহাপুরিসস্স ৰিসেসেন মেত্তাখেত্তে অভিজাতিযং সচ্চাধিট্ঠানসমুদাগতস্স সচ্চাধিট্ঠানপরিপূরণমভিব্যত্তং, ৰিসেসেন করুণাখেত্তে অভিসম্বোধিযং পঞ্ঞাধিট্ঠানসমুদাগতস্স পঞ্ঞাধিট্ঠানপরিপূরণমভিব্যত্তং, ৰিসেসেন মুদিতাখেত্তে ধম্মচক্কপ্পৰত্তনে (সং. নি. ৫.১০৮১; মহাৰ. ১৩; পটি. ম. ২.৩০) চাগাধিট্ঠানসমুদাগতস্স চাগাধিট্ঠানপরিপূরণমভিব্যত্তং, ৰিসেসেন উপেক্খাখেত্তে পরিনিব্বানে উপসমাধিট্ঠানসমুদাগতস্স উপসমাধিট্ঠানপরিপূরণমভিব্যত্তন্তি দট্ঠব্বং.

তত্রপি সচ্চাধিট্ঠানসমুদাগতস্স সংৰাসেন সীলং ৰেদিতব্বং, চাগাধিট্ঠানসমুদাগতস্স সংৰোহারেন সোচেয্যং ৰেদিতব্বং, উপসমাধিট্ঠানসমুদাগতস্স আপদাসু থামো ৰেদিতব্বো, পঞ্ঞাধিট্ঠানসমুদাগতস্স সাকচ্ছায পঞ্ঞা ৰেদিতব্বা. এৰং সীলাজীৰচিত্তদিট্ঠিৰিসুদ্ধিযো ৰেদিতব্বা.

তথা সচ্চাধিট্ঠানসমুদাগমেন দোসা অগতিং ন গচ্ছতি অৰিসংৰাদনতো, চাগাধিট্ঠানসমুদাগমেন লোভা অগতিং ন গচ্ছতি অনভিসঙ্গতো, উপসমাধিট্ঠানসমুদাগমেন ভযা অগতিং ন গচ্ছতি অনপরাধতো, পঞ্ঞাধিট্ঠানসমুদাগমেন মোহা অগতিং ন গচ্ছতি যথাভূতাৰবোধতো.

তথা পঠমেন অদুট্ঠো অধিৰাসেতি, দুতিযেন অলুদ্ধো পটিসেৰতি, ততিযেন অভীতো পরিৰজ্জেতি, চতুত্থেন অসম্মূল়্হো ৰিনোদেতি. পঠমেন নেক্খম্মসুখপ্পত্তি, ইতরেহি পৰিৰেকউপসমসম্বোধিসুখপ্পত্তিযো হোন্তীতি দট্ঠব্বা. তথা ৰিৰেকজপীতিসুখসমাধিজপীতিসুখঅপ্পীতিজকাযসুখসতিপারিসুদ্ধিজউপেক্খাসুখপ্পত্তিযো এতেহি চতূহি যথাক্কমং হোন্তীতি. এৰমনেকগুণানুবন্ধেহি চতূহি অধিট্ঠানেহি সব্বপারমিসমূহসঙ্গহো ৰেদিতব্বো. যথা চ চতূহি অধিট্ঠানেহি সব্বপারমিসঙ্গহো, এৰং করুণাপঞ্ঞাহিপীতি দট্ঠব্বং. সব্বোপি হি বোধিসম্ভারো করুণাপঞ্ঞাহি সঙ্গহিতো. করুণাপঞ্ঞাপরিগ্গহিতা হি দানাদিগুণা মহাবোধিসম্ভারা ভৰন্তি বুদ্ধত্তসিদ্ধিপরিযোসানাতি এৰমেতাসং সঙ্গহো ৰেদিতব্বো.

কো সম্পাদনূপাযোতি সকলস্সাপি পুঞ্ঞাদিসম্ভারস্স সম্মাসম্বোধিং, উদ্দিস্স অনৰসেসসম্ভরণং অৰেকল্লকারিতাযোগেন, তত্থ চ সক্কচ্চকারিতা আদরবহুমানযোগেন, সাতচ্চকারিতা নিরন্তরপযোগেন, চিরকালাদিযোগো চ অন্তরা অৰোসানাপজ্জনেনাতি চতুরঙ্গযোগো এতাসং সম্পাদনূপাযো. অপিচ সমাসতো কতাভিনীহারস্স অত্তনি সিনেহস্স পরিযাদানং, পরেসু চ সিনেহস্স পরিৰড্ঢনং এতাসং সম্পাদনূপাযো. সম্মাসম্বোধিসমধিগমায হি কতমহাপণিধানস্স মহাসত্তস্স যাথাৰতো পরিজাননেন সব্বেসু ধম্মেসু অনুপলিত্তস্স অত্তনি সিনেহো পরিক্খযং পরিযাদানং গচ্ছতি, মহাকরুণাসমাযোগৰসেন পন পিযে পুত্তে ৰিয সব্বসত্তে সম্পস্সমানস্স তেসু মেত্তাসিনেহো পরিৰড্ঢতি. ততো চ তংতদাৰত্থানুরূপমত্তপরসন্তানেসু লোভদোসমোহৰিগমেন ৰিদূরীকতমচ্ছরিযাদিবোধিসম্ভারপটিপক্খো মহাপুরিসো দানপিযৰচনঅত্থচরিযাসমানত্ততাসঙ্খাতেহি চতূহি সঙ্গহৰত্থূহি (দী. নি. ৩.২১০; অ. নি. ৪.৩২) চতুরধিট্ঠানানুগতেহি অচ্চন্তং জনস্স সঙ্গহকরণৰসেন উপরি যানত্তযে অৰতারণং পরিপাচনঞ্চ করোতি. মহাসত্তানঞ্হি মহাপঞ্ঞা মহাকরুণা চ দানেন অলঙ্কতা; দানং পিযৰচনেন; পিযৰচনং অত্থচরিযায; অত্থচরিযা সমানত্ততায অলঙ্কতা সঙ্গহিতা চ. সব্বভূতত্তভূতস্স হি বোধিসত্তস্স সব্বত্থ সমানসুখদুক্খতায সমানত্ততাসিদ্ধি. বুদ্ধভূতো পন তেহেৰ সঙ্গহৰত্থূহি চতুরধিট্ঠানপরিপূরিতাভিবুদ্ধেহি জনস্স অচ্চন্তিকসঙ্গহকরণেন অভিৰিনযনং করোতি. দানঞ্হি সম্মাসম্বুদ্ধানং চাগাধিট্ঠানেন পরিপূরিতাভিবুদ্ধং; পিযৰচনং সচ্চাধিট্ঠানেন; অত্থচরিযা পঞ্ঞাধিট্ঠানেন; সমানত্ততা উপসমাধিট্ঠানেন পরিপূরিতাভিবুদ্ধা. তথাগতানঞ্হি সব্বসাৰকপচ্চেকবুদ্ধেহি সমানত্ততা পরিনিব্বানে. তত্র হি তেসং অৰিসেসতো একীভাৰো. তেনেৰাহ ‘‘নত্থি ৰিমুত্তিযা নানত্ত’’ন্তি.

হোন্তি চেত্থ –

‘‘সচ্চো চাগী উপসন্তো, পঞ্ঞৰা অনুকম্পকো,

সম্ভতসব্বসম্ভারো, কং নামত্থং ন সাধযে.

মহাকারুণিকো সত্থা, হিতেসী চ উপেক্খকো,

নিরপেক্খো চ সব্বত্থ, অহো অচ্ছরিযো জিনো.

ৰিরত্তো সব্বধম্মেসু, সত্তেসু চ উপেক্খকো,

সদা সত্তহিতে যুত্তো, অহো অচ্ছরিযো জিনো.

সব্বদা সব্বসত্তানং, হিতায চ সুখায চ,

উয্যুত্তো অকিলাসূ চ, অহো অচ্ছরিযো জিনো’’তি. (চরিযা. অট্ঠ. ৩২০ পকিণ্ণককথা);

কিত্তকেন কালেন সম্পাদনন্তি হেট্ঠিমেন তাৰ পরিচ্ছেদেন চত্তারি অসঙ্খ্যেয্যানি কপ্পসতসহস্সঞ্চ, মজ্ঝিমেন অট্ঠাসঙ্খ্যেয্যানি কপ্পসতসহস্সঞ্চ, উপরিমেন সোল়সাসঙ্খ্যেয্যানি কপ্পসতসহস্সঞ্চ, এতে চ ভেদা যথাক্কমং পঞ্ঞাধিকসদ্ধাধিকৰীরিযাধিকৰসেন ঞাতব্বা. পঞ্ঞাধিকানঞ্হি সদ্ধা মন্দা হোতি, পঞ্ঞা তিক্খা. সদ্ধাধিকানং পঞ্ঞা মজ্ঝিমা হোতি, ৰীরিযাধিকানং পঞ্ঞা মন্দা. পঞ্ঞানুভাৰেন চ সম্মাসম্বোধি অভিগন্তব্বাতি অট্ঠকথাযং ৰুত্তং. অৰিসেসেন পন ৰিমুত্তিপরিপাচনীযানং ধম্মানং তিক্খমজ্ঝিমমুদুভাৰেন তযোপেতে ভেদা যুত্তাতি ৰদন্তি. তিৰিধা হি বোধিসত্তা অভিনীহারক্খণে ভৰন্তি উগ্ঘটিতঞ্ঞূৰিপঞ্চিতঞ্ঞূনেয্যভেদেন. তেসু উগ্ঘটিতঞ্ঞূ সম্মাসম্বুদ্ধস্স সম্মুখা চতুপ্পদিকং গাথং সুণন্তো ততিযপদে অপরিযোসিতেযেৰ ছঅভিঞ্ঞাহি সহ পটিসম্ভিদাহি অরহত্তং পত্তুং সমত্থুপনিস্সযো হোতি, দুতিযো সত্থু সম্মুখা চতুপ্পদিকং গাথং সুণন্তো অপরিযোসিতেযেৰ চতুত্থপদে ছহি অভিঞ্ঞাহি অরহত্তং পত্তুং সমত্থুপনিস্সযো হোতি, ইতরো ভগৰতো সম্মুখা চতুপ্পদিকং গাথং সুত্ৰা পরিযোসিতায গাথায ছহি অভিঞ্ঞাহি অরহত্তং পত্তুং সমত্থুপনিস্সযো ভৰতি. তযোপেতে ৰিনা কালভেদেন কতাভিনীহারলদ্ধব্যাকরণা পারমিযো পূরেন্তা যথাক্কমং যথাৰুত্তভেদেন কালেন সম্মাসম্বোধিং পাপুণন্তি. তেসু তেসু পন কালভেদেসু অপরিপুণ্ণেসু তে তে মহাসত্তা দিৰসে দিৰসে ৰেস্সন্তরদানসদিসং দানং দেন্তাপি তদনুরূপে সীলাদিসব্বপারমিধম্মে আচিনন্তাপি অন্তরা বুদ্ধা ভৰিস্সন্তীতি অকারণমেতং. কস্মা? ঞাণস্স অপরিপচ্চনতো. পরিচ্ছিন্নকালনিপ্ফাদিতং ৰিয হি সস্সং পরিচ্ছিন্নকালে পরিনিপ্ফাদিতা সম্মাসম্বোধি. তদন্তরা পন সব্বুস্সাহেন ৰাযমন্তেনাপি ন সক্কা পাপুণিতুন্তি পারমিপারিপূরী যথাৰুত্তকালৰিসেসং ৰিনা ন সম্পজ্জতীতি ৰেদিতব্বং.

কো আনিসংসোতি যে তে কতাভিনীহারানং বোধিসত্তানং –

‘‘এৰং সব্বঙ্গসম্পন্না, বোধিযা নিযতা নরা;

সংসরং দীঘমদ্ধানং, কপ্পকোটিসতেহিপি;

অৰীচিম্হি নুপ্পজ্জন্তি, তথা লোকন্তরেসু চা’’তি. আদিনা (অভি. অট্ঠ. ১.নিদানকথা; অপ. অট্ঠ. ১.দূরেনিদানকথা; জা. অট্ঠ. ১.দূরেনিদানকথা; বু. ৰং. অট্ঠ. ২৭.দূরেনিদানকথা; চরিযা. অট্ঠ. পকিণ্ণককথা) –

অট্ঠারস অভব্বট্ঠানানুপগমনপ্পকারা আনিসংসা সংৰণ্ণিতা. যে চ ‘‘সতো সম্পজানো আনন্দ বোধিসত্তো তুসিতাকাযা চৰিত্ৰা মাতুকুচ্ছিং ওক্কমী’’তিআদিনা (ম. নি. ৩.১৯৯) সোল়স অচ্ছরিযব্ভুতধম্মপ্পকারা, যে চ ‘‘সীতং ব্যপগতং হোতি, উণ্হঞ্চ উপসম্মতী’’তিআদিনা (বু. ৰং. ৮৩), ‘‘জাযমানে খো সারিপুত্ত বোধিসত্তে অযং দসসহস্সিলোকধাতু সঙ্কম্পতি সম্পকম্পতি সম্পৰেধতী’’তিআদিনা চ দ্ৰত্তিংস পুব্বনিমিত্তপ্পকারা, যে ৰা পনঞ্ঞেপি ‘‘বোধিসত্তানং অধিপ্পাযসমিজ্ঝনং কম্মাদীসু ৰসীভাৰো’’তি এৰমাদযো তত্থ তত্থ জাতকবুদ্ধৰংসাদীসু দস্সিতপ্পকারা আনিসংসা, তে সব্বেপি এতাসং আনিসংসা, তথা যথানিদস্সিতভেদা অলোভাদোসাদিগুণযুগল়াদযো চাতি ৰেদিতব্বা.

কিং ফলন্তি সমাসতো তাৰ সম্মাসম্বুদ্ধভাৰো এতাসং ফলং, ৰিত্থারতো পন দ্ৰত্তিংসমহাপুরিসলক্খণ- (দী. নি. ২.২৪ আদযো; ৩.১৬৮ আদযো; ম. নি. ২.৩৮৫) অসীতিঅনুব্যঞ্জনব্যামপ্পভাদিঅনেকগুণগণসমুজ্জলরূপকাযসম্পত্তিঅধিট্ঠানা দসবলচতুৰেসারজ্জছঅসাধারণঞাণঅট্ঠারসাৰেণিকবুদ্ধধম্ম- (দী. নি. অট্ঠ. ৩.৩০৫; মূলটী. ২.সুত্তন্তভাজনীযৰণ্ণনা) -পভুতিঅনেকসতসহস্সগুণসমুদযোপসোভিনী ধম্মকাযসিরী, যাৰতা পন বুদ্ধগুণা যে অনেকেহিপি কপ্পেহি সম্মাসম্বুদ্ধেনাপি ৰাচায পরিযোসাপেতুং ন সক্কা, ইদং এতাসং ফলন্তি অযমেত্থ সঙ্খেপো, ৰিত্থারো পন বুদ্ধৰংসচরিযাপিটকজাতকমহাপদানসুত্তাদীনং ৰসেন ৰেদিতব্বো.

যথাৰুত্তায পটিপদায যথাৰুত্তৰিভাগানং পারমীনং পূরিতভাৰং সন্ধাযাহ ‘‘সমতিংস পারমিযো পূরেত্ৰা’’তি. সতিপি মহাপরিচ্চাগানং দানপারমিভাৰে পরিচ্চাগৰিসেসভাৰদস্সনত্থঞ্চেৰ সুদুক্করভাৰদস্সনত্থঞ্চ ‘‘পঞ্চ মহাপরিচ্চাগে’’তি ৰিসুং গহণং, ততোযেৰ চ অঙ্গপরিচ্চাগতো ৰিসুং নযনপরিচ্চাগগ্গহণং, পরিগ্গহপরিচ্চাগভাৰসামঞ্ঞেপি ধনরজ্জপরিচ্চাগতো পুত্তদারপরিচ্চাগগ্গহণঞ্চ কতং. গতপচ্চাগতিকৰত্তসঙ্খাতায পুব্বভাগপটিপদায সদ্ধিং অভিঞ্ঞাসমাপত্তিনিপ্ফাদনং পুব্বযোগো. দানাদীসুযেৰ সাতিসযপটিপত্তিনিপ্ফাদনং পুব্বচরিযা, যা চরিযাপিটকসঙ্গহিতা. অভিনীহারো পুব্বযোগো, দানাদিপটিপত্তি, কাযৰিৰেকৰসেন একচরিযা ৰা পুব্বচরিযাতি কেচি. দানাদীনঞ্চেৰ অপ্পিচ্ছতাদীনঞ্চ সংসারনিব্বানেসু আদীনৰানিসংসাদীনঞ্চ ৰিভাৰনৰসেন সত্তানং বোধিত্তযে পতিট্ঠাপনপরিপাচনৰসেন পৰত্তা কথা ধম্মক্খানং. ঞাতীনং অত্থচরিযা ঞাতত্থচরিযা, সাপি করুণাযনৰসেনেৰ. আদি-সদ্দেন লোকত্থচরিযাদযো সঙ্গণ্হাতি. কম্মস্সকতাঞাণৰসেন, অনৰজ্জকম্মাযতনৰিজ্জাট্ঠানপরিচযৰসেন, খন্ধাযতনাদিপরিচযৰসেন, লক্খণত্তযতীরণৰসেন চ ঞাণচারো বুদ্ধিচরিযা, সা পন অত্থতো পঞ্ঞাপারমীযেৰ, ঞাণসম্ভারদস্সনত্থং ৰিসুং গহণং. কোটিন্তি পরিযন্তো, উক্কংসোতি অত্থো. চত্তারো সতিপট্ঠানে ভাৰেত্ৰা ব্রূহেত্ৰাতি সম্বন্ধো. তত্থ ভাৰেত্ৰাতি উপ্পাদেত্ৰা. ব্রূহেত্ৰাতি ৰড্ঢেত্ৰা. সতিপট্ঠানাদিগ্গহণেন আগমনপটিপদং মত্থকং পাপেত্ৰা দস্সেতি, ৰিপস্সনাসহগতা এৰ ৰা সতিপট্ঠানাদযো দট্ঠব্বা. এত্থ চ ‘‘যেন অভিনীহারেনা’’তিআদিনা আগমনপটিপদায আদিং দস্সেতি, ‘‘দানপারমী’’তিআদিনা মজ্ঝং, ‘‘চত্তারো সতিপট্ঠানে’’তিআদিনা পরিযোসানন্তি ৰেদিতব্বং.

সম্পতিজাতোতি হত্থতো মুচ্চিত্ৰা মুহুত্তজাতো, ন মাতুকুচ্ছিতো নিক্খন্তমত্তো. নিক্খন্তমত্তঞ্হি মহাসত্তং পঠমং ব্রহ্মানো সুৰণ্ণজালেন পটিগ্গণ্হিংসু, তেসং হত্থতো চত্তারো মহারাজানো অজিনপ্পৰেণিযা, তেসং হত্থতো মনুস্সা দুকূলচুম্বটকেন পটিগ্গণ্হিংসু, মনুস্সানং হত্থতো মুঞ্চিত্ৰা পথৰিযং পতিট্ঠিতোতি যথাহ ভগৰা মহাপদানদেসনাযং. সেতম্হি ছত্তেতি দিব্বসেতচ্ছত্তে. অনুহীরমানেতি ধারিযমানে. এত্থ চ ছত্তগ্গহণেনেৰ খগ্গাদীনি পঞ্চ ককুধভণ্ডানিপি (জা. ২.১৯.৭২) ৰুত্তানেৰাতি ৰেদিতব্বং. খগ্গতালৰণ্টমোরহত্থকৰাল়বীজনীউণ্হীসপট্টাপি হি ছত্তেন সহ তদা উপট্ঠিতা অহেসুং. ছত্তাদীনিযেৰ চ তদা পঞ্ঞাযিংসু, ন ছত্তাদিগাহকা. সব্বা চ দিসাতি দসপি দিসা. নযিদং সব্বদিসাৰিলোকনং সত্তপদৰীতিহারুত্তরকালং দট্ঠব্বং. মহাসত্তো হি মনুস্সানং হত্থতো মুচ্চিত্ৰা পুরত্থিমদিসং ওলোকেসি, তত্থ দেৰমনুস্সা গন্ধমালাদীহি পূজযমানা ‘‘মহাপুরিস ইধ তুম্হেহি সদিসোপি নত্থি, কুতো উত্তরিতরো’’তি আহংসু. এৰং চতস্সো দিসা, চতস্সো অনুদিসা, হেট্ঠা, উপরীতি সব্বা দিসা অনুৰিলোকেত্ৰা সব্বত্থ অত্তনা সদিসং অদিস্ৰা ‘‘অযং উত্তরা দিসা’’তি তত্থ সত্তপদৰীতিহারেন অগমাসি. আসভিন্তি উত্তমং. অগ্গোতি সব্বপঠমো. জেট্ঠো সেট্ঠোতি চ তস্সেৰ ৰেৰচনং. অযমন্তিমা জাতি, নত্থি দানি পুনব্ভৰোতি ইমস্মিং অত্তভাৰে পত্তব্বং অরহত্তং ব্যাকাসি.

‘‘অনেকেসং ৰিসেসাধিগমানং পুব্বনিমিত্তভাৰেনা’’তি সঙ্খিত্তেন ৰুত্তমত্থং ‘‘যঞ্হী’’তিআদিনা ৰিত্থারতো দস্সেতি. তত্থ এত্থাতি –

‘‘অনেকসাখঞ্চ সহস্সমণ্ডলং,

ছত্তং মরূ ধারযুমন্তলিক্খে;

সুৰণ্ণদণ্ডা ৰীতিপতন্তি চামরা,

ন দিস্সরে চামরছত্তগাহকা’’তি. (সু. নি. ৬৯৩);

ইমিস্সা গাথায. সব্বঞ্ঞুতঞ্ঞাণমেৰ সব্বত্থ অপ্পটিহতচারতায অনাৰরণঞাণন্তি আহ ‘‘সব্বঞ্ঞুতানাৰরণঞাণপটিলাভস্সা’’তি. ‘‘তথা অযং ভগৰাপি গতো…পে… পুব্বনিমিত্তভাৰেনা’’তি এতেন অভিজাতিযং ধম্মতাৰসেন উপ্পজ্জনৰিসেসা সব্ববোধিসত্তানং সাধারণাতি দস্সেতি. পারমিতানিস্সন্দা হি তেতি.

ৰিক্কমীতি অগমাসি. মরূতি দেৰা. সমাতি ৰিলোকনসমতায সমা সদিসিযো. মহাপুরিসো হি যথা একং দিসং ৰিলোকেসি, এৰং সেসা দিসাপি, ন কত্থচি ৰিলোকনে ৰিবন্ধো তস্স অহোসীতি. সমাতি ৰা ৰিলোকেতুং যুত্তাতি অত্থো. ন হি তদা বোধিসত্তস্স ৰিরূপবীভচ্ছৰিসমরূপানি ৰিলোকেতুং অযুত্তানি দিসাসু উপট্ঠহন্তীতি.

‘‘এৰং তথাগতো’’তি কাযগমনট্ঠেন গত-সদ্দেন তথাগত-সদ্দং নিদ্দিসিত্ৰা ইদানি ঞাণগমনট্ঠেন তং দস্সেতুং ‘‘অথ ৰা’’তিআদিমাহ. তত্থ নেক্খম্মেনাতি অলোভপ্পধানেন কুসলচিত্তুপ্পাদেন. কুসলা হি ধম্মা ইধ নেক্খম্মং, ন পব্বজ্জাদযো, ‘‘পঠমজ্ঝানেনা’’তি চ ৰদন্তি. পহাযাতি পজহিত্ৰা. গতো অধিগতো, পটিপন্নো উত্তরিৰিসেসন্তি অত্থো. পহাযাতি ৰা পহানহেতু, পহানলক্খণং ৰা. হেতুলক্খণত্থো হি অযং পহায-সদ্দো. ‘‘কামচ্ছন্দাদিপ্পহানহেতুকং গতো’’তি হেত্থ ৰুত্তং গমনং অৰবোধো, পটিপত্তি এৰ ৰা. কামচ্ছন্দাদিপ্পহানেন চ তং লক্খীযতি. এস নযো ‘‘পদালেত্ৰা’’তিআদীসুপি. অব্যাপাদেনাতি মেত্তায. আলোকসঞ্ঞাযাতি ৰিভূতং কত্ৰা মনসিকরণেন উপট্ঠিতআলোকসঞ্জাননেন. অৰিক্খেপেনাতি সমাধিনা. ধম্মৰৰত্থানেনাতি কুসলাদিধম্মানং যাথাৰৰিনিচ্ছযেন, ‘‘সপ্পচ্চযনামরূপৰৰত্থানেনা’’তিপি ৰদন্তি.

এৰং কামচ্ছন্দাদিনীৰরণপ্পহানেন ‘‘অভিজ্ঝং লোকে পহাযা’’তিআদিনা (ৰিভ. ৫০৮) ৰুত্তায পঠমজ্ঝানস্স পুব্বভাগপটিপদায ভগৰতো তথাগতভাৰং দস্সেত্ৰা ইদানি সহ উপাযেন অট্ঠহি সমাপত্তীহি, অট্ঠারসহি চ মহাৰিপস্সনাহি তং দস্সেতুং ‘‘ঞাণেনা’’তিআদিমাহ. নামরূপপরিগ্গহকঙ্খাৰিতরণানঞ্হি ৰিবন্ধভূতস্স মোহস্স দূরীকরণেন ঞাতপরিঞ্ঞাযং ঠিতস্স অনিচ্চসঞ্ঞাদযো সিজ্ঝন্তি, তথা ঝানসমাপত্তীসু অভিরতিনিমিত্তেন পামোজ্জেন, তত্থ অনভিরতিযা ৰিনোদিতায ঝানাদি সমধিগমোতি সমাপত্তিৰিপস্সনানং অরতিৰিনোদনঅৰিজ্জাপদালনাদি উপাযো, উপ্পটিপাটিনিদ্দেসো পন নীৰরণসভাৰায অৰিজ্জায হেট্ঠা নীৰরণেসুপি সঙ্গহদস্সনত্থন্তি দট্ঠব্বং. সমাপত্তিৰিহারপ্পৰেসৰিবন্ধনেন নীৰরণানি কৰাটসদিসানীতি আহ ‘‘নীৰরণকৰাটং উগ্ঘাটেত্ৰা’’তি. ‘‘রত্তিং ৰিতক্কেত্ৰা ৰিচারেত্ৰা দিৰা কম্মন্তে পযোজেতী’’তি ৰুত্তট্ঠানে ৰিয ৰিতক্কৰিচারা ধূমাযনাতি অধিপ্পেতাতি আহ ‘‘ৰিতক্কৰিচারধূম’’ন্তি. কিঞ্চাপি পঠমজ্ঝানূপচারেযেৰ চ দুক্খং, চতুত্থজ্ঝানূপচারেযেৰ সুখং পহীযতি, অতিসযপ্পহানং পন সন্ধাযাহ ‘‘চতুত্থজ্ঝানেন সুখদুক্খং পহাযা’’তি.

অনিচ্চস্স, অনিচ্চন্তি অনুপস্সনা অনিচ্চানুপস্সনা, তেভূমকধম্মানং অনিচ্চতং গহেত্ৰা পৰত্তায ৰিপস্সনাযেতং নামং. নিচ্চসঞ্ঞন্তি সঙ্খতধম্মে ‘‘নিচ্চা, সস্সতা’’তি এৰং পৰত্তমিচ্ছাসঞ্ঞং, সঞ্ঞাসীসেন দিট্ঠিচিত্তানম্পি গহণং দট্ঠব্বং. এস নযো ইতো পরেসুপি. নিব্বিদানুপস্সনাযাতি সঙ্খারেসু নিব্বিজ্জনাকারেন পৰত্তায অনুপস্সনায. নন্দিন্তি সপ্পীতিকতণ্হং. তথা ৰিরাগানুপস্সনাযাতি ৰিরজ্জনাকারেন পৰত্তায অনুপস্সনায. নিরোধানুপস্সনাযাতি সঙ্খারানং নিরোধস্স অনুপস্সনায. ‘‘তে সঙ্খারা নিরুজ্ঝন্তিযেৰ, আযতিং সমুদযৰসেন ন উপ্পজ্জন্তী’’তি এৰং ৰা অনুপস্সনা নিরোধানুপস্সনা. তেনেৰাহ ‘‘নিরোধানুপস্সনায নিরোধেতি, নো সমুদেতী’’তি. মুঞ্চিতুকম্যতা হি অযং বলপ্পত্তাতি. পটিনিস্সজ্জনাকারেন পৰত্তা অনুপস্সনা পটিনিস্সগ্গানুপস্সনা. পটিসঙ্খা সন্তিট্ঠনা হি অযং. আদানন্তি নিচ্চাদিৰসেন গহণং. সন্ততিসমূহকিচ্চারম্মণানং ৰসেন একত্তগ্গহণং ঘনসঞ্ঞা. আযূহনং অভিসঙ্খরণং. অৰত্থাৰিসেসাপত্তি ৰিপরিণামো. ধুৰসঞ্ঞন্তি থিরভাৰগ্গহণং. নিমিত্তন্তি সমূহাদিঘনৰসেন, সকিচ্চপরিচ্ছেদতায চ সঙ্খারানং সৰিগ্গহগ্গহণং. পণিধিন্তি রাগাদিপণিধিং, সা পনত্থতো তণ্হানং ৰসেন সঙ্খারেসু নিন্নতা.

অভিনিৰেসন্তি অত্তানুদিট্ঠিং. অনিচ্চদুক্খাদিৰসেন সব্বধম্মতীরণং অধিপঞ্ঞাধম্মৰিপস্সনা. সারাদানাভিনিৰেসন্তি অসারে সারগ্গহণৰিপল্লাসং. ‘‘ইস্সরকুত্তাদিৰসেন লোকো সমুপ্পন্নো’’তি অভিনিৰেসো সম্মোহাভিনিৰেসো. কেচি পন ‘‘অহোসিং নু খো অহমতীতমদ্ধানন্তিআদিনা পৰত্তসংসযাপত্তি সম্মোহাভিনিৰেসো’’তি ৰদন্তি. সঙ্খারেসু লেণতাণভাৰগ্গহণং আলযাভিনিৰেসো. ‘‘আলযরতা আলযসমুদিতা’’তি ৰচনতো আলযো তণ্হা, সাযেৰ চক্খাদীসু রূপাদীসু চ অভিনিৰিসনৰসেন পৰত্তিযা আলযাভিনিৰেসোতি কেচি. ‘‘এৰংৰিধা সঙ্খারা পটিনিস্সজ্জীযন্তী’’তি পৰত্তং ঞাণং পটিসঙ্খানুপস্সনা. ৰট্টতো ৰিগতত্তা ৰিৰট্টং নিব্বানং, তত্থ আরম্মণকরণসঙ্খাতেন অনুপস্সনেন পৰত্তিযা ৰিৰট্টানুপস্সনা গোত্রভু. সংযোগাভিনিৰেসন্তি সংযুজ্জনৰসেন সঙ্খারেসু অভিনিৰিসনং. দিট্ঠেকট্ঠেতি দিট্ঠিযা সহজাতেকট্ঠে, পহানেকট্ঠে চ. ‘‘ওল়ারিকে’’তি উপরিমগ্গৰজ্ঝে কিলেসে অপেক্খিত্ৰা ৰুত্তং, অঞ্ঞথা দস্সনপহাতব্বাপি দুতিযমগ্গৰজ্ঝেহি ওল়ারিকাতি. অণুসহগতেতি অণুভূতে, ইদং হেট্ঠিমমগ্গৰজ্ঝে অপেক্খিত্ৰা ৰুত্তং. সব্বকিলেসেতি অৰসিট্ঠসব্বকিলেসে. ন হি পঠমাদিমগ্গেহি পহীনা কিলেসা পুন পহীযন্তীতি.

কক্খল়ত্তং কঠিনভাৰো. পগ্ঘরণং দ্রৰভাৰো. লোকিযৰাযুনা ভস্তস্স ৰিয যেন তংতংকলাপস্স উদ্ধুমাযনং, থম্ভভাৰো ৰা, তং ৰিত্থম্ভনং. ৰিজ্জমানেপি কলাপন্তরভূতানং কলাপন্তরভূতেহি অসম্ফুট্ঠভাৰে, তংতংভূতৰিৰিত্ততা রূপপরিযন্তো আকাসোতি যেসং যো পরিচ্ছেদো, তেহি সো অসম্ফুট্ঠোৰ, অঞ্ঞথা ভূতানং পরিচ্ছেদসভাৰো ন সিযা ব্যাপীভাৰাপত্তিতো. অব্যাপিতা হি অসম্ফুট্ঠতাতি. যস্মিং কলাপে ভূতানং পরিচ্ছেদো, তেহি অসম্ফুট্ঠভাৰো অসম্ফুট্ঠলক্খণং. তেনাহ ভগৰা আকাসধাতুনিদ্দেসে ‘‘অসম্ফুট্ঠং চতূহি মহাভূতেহী’’তি (ধ. স. ৬৩৭).

ৰিরোধিপচ্চযসন্নিপাতে ৰিসদিসুপ্পত্তি রুপ্পনং. চেতনাপধানত্তা সঙ্খারক্খন্ধধম্মানং চেতনাৰসেনেতং ৰুত্তং ‘‘সঙ্খারানং অভিসঙ্খরণলক্খণ’’ন্তি. তথা হি সুত্তন্তভাজনীযে সঙ্খারক্খন্ধৰিভঙ্গে ‘‘চক্খুসম্ফস্সজা চেতনা’’তিআদিনা (ৰিভ. ৯২) চেতনাৰ ৰিভত্তা, অভিসঙ্খরণলক্খণা চ চেতনা. যথাহ ‘‘তত্থ কতমো পুঞ্ঞাভিসঙ্খারো? কুসলা চেতনা কামাৰচরা’’তিআদি (ৰিভ. ২২৬). ফরণং সৰিপ্ফারিকতা. অস্সদ্ধিযেতি অস্সদ্ধিযহেতু, নিমিত্তত্থে ভুম্মং. এস নযো ‘‘কোসজ্জে’’তিআদীসু. ৰূপসমলক্খণন্তি কাযচিত্তপরিল়াহূপসমলক্খণং. লীনুদ্ধচ্চরহিতে অধিচিত্তে পৰত্তমানে পগ্গহনিগ্গহসম্পহংসনেসু অব্যাৰটতায অজ্ঝুপেক্খনং পটিসঙ্খানং পক্খপাতুপচ্ছেদতো.

মুসাৰাদাদীনং ৰিসংৰাদনাদিকিচ্চতায লূখানং অপরিগ্গাহকানং পটিপক্খভাৰতো পরিগ্গাহিকা সম্মাৰাচা সিনিদ্ধভাৰতো সম্পযুত্তধম্মে, সম্মাৰাচাপচ্চযসুভাসিতানং সোতারঞ্চ পুগ্গলং পরিগ্গণ্হাতীতি সা পরিগ্গহলক্খণা সম্মাৰাচা. কাযিককিরিযা কিঞ্চি কত্তব্বং সমুট্ঠাপেতি. সযঞ্চ সমুট্ঠহনং ঘটনং হোতীতি সম্মাকম্মন্তসঙ্খাতা ৰিরতি সমুট্ঠানলক্খণা দট্ঠব্বা, সম্পযুত্তধম্মানং ৰা উক্খিপনং সমুট্ঠাপনং কাযিককিরিযায ভারুক্খিপনং ৰিয. জীৰমানস্স সত্তস্স, সম্পযুত্তধম্মানং ৰা জীৰিতিন্দ্রিযৰুত্তিযা, আজীৰস্সেৰ ৰা সুদ্ধি ৰোদানং. সসম্পযুত্তধম্মস্স চিত্তস্স সংকিলেসপক্খে পতিতুং অদত্ৰা সম্মদেৰ পগ্গণ্হনং পগ্গহো.

‘‘সঙ্খারা’’তি ইধ চেতনা অধিপ্পেতাতি ৰুত্তং ‘‘সঙ্খারানং চেতনালক্খণ’’ন্তি. নমনং আরম্মণাভিমুখভাৰো. আযতনংপৰত্তনং. আযতনানং ৰসেন হি আযসঙ্খাতানং চিত্তচেতসিকানং পৰত্তি. তণ্হায হেতুলক্খণন্তি ৰট্টস্স জনকহেতুভাৰো, মগ্গস্স পন নিব্বানসম্পাপকত্তন্তি অযমেৰ তেসং ৰিসেসো.

তথলক্খণং অৰিপরীতসভাৰো. একরসো অঞ্ঞমঞ্ঞানতিৰত্তনং অনূনাধিকভাৰো. যুগনদ্ধা সমথৰিপস্সনাৰ, ‘‘সদ্ধাপঞ্ঞা পগ্গহাৰিক্খেপা’’তিপি ৰদন্তি.

খিণোতি কিলেসেতি খযো, মগ্গো. অনুপ্পাদপরিযোসানতায অনুপ্পাদো, ফলং. পস্সদ্ধি কিলেসৰূপসমো.

ছন্দস্সাতি কত্তুকম্যতাছন্দস্স. মূললক্খণং পতিট্ঠাভাৰো. সমুট্ঠাপনলক্খণং আরম্মণপটিপাদকতায সম্পযুত্তধম্মানং উপ্পত্তিহেতুতা. সমোধানং ৰিসযাদিসন্নিপাতেন গহেতব্বাকারো, যা ‘‘সঙ্গতী’’তি ৰুচ্চতি. সমং সহ ওদহন্তি অনেন সম্পযুত্তধম্মাতি ৰা সমোধানং, ফস্সো. সমোসরন্তি সন্নিপতন্তি এত্থাতি সমোসরণং. ৰেদনায ৰিনা অপ্পৰত্তমানা সম্পযুত্তধম্মা ৰেদনানুভৰননিমিত্তং সমোসটা ৰিয হোন্তীতি এৰং ৰুত্তং. গোপানসীনং কূটং ৰিয সম্পযুত্তানং পামোক্খভাৰো পমুখলক্খণং. ততো, তেসং ৰা সম্পযুত্তধম্মানং উত্তরি পধানন্তি তদুত্তরি. পঞ্ঞুত্তরা হি কুসলা ধম্মা. ৰিমুত্তিযাতি ফলস্স. তঞ্হি সীলাদিগুণসারস্স পরমুক্কংসভাৰেন সারং. অযঞ্চ লক্খণৰিভাগো ছধাতুপঞ্চঝানঙ্গাদিৰসেন তংতংসুত্তপদানুসারেন, পোরাণট্ঠকথায আগতনযেন চ কতোতি দট্ঠব্বং. তথা হি ৰুত্তোপি কোচি ধম্মো পরিযাযন্তরপ্পকাসনত্থং পুন দস্সিতো, ততো এৰ চ ‘‘ছন্দমূলকা কুসলা ধম্মা মনসিকারসমুট্ঠানা, ফস্সসমোধানা, ৰেদনাসমোসরণা’’তি, ‘‘পঞ্ঞুত্তরা কুসলা ধম্মা’’তি, ‘‘ৰিমুত্তিসারমিদং ব্রহ্মচরিয’’ন্তি, ‘‘নিব্বানোগধঞ্হি আৰুসো ব্রহ্মচরিযং নিব্বানপরিযোসান’’ন্তি চ সুত্তপদানং ৰসেন ‘‘ছন্দস্স মূললক্খণ’’ন্তিআদি ৰুত্তং.

তথধম্মা নাম চত্তারি অরিযসচ্চানি অৰিপরীতসভাৰত্তা. তথানি তংসভাৰত্তা. অৰিতথানি অমুসাসভাৰত্তা. অনঞ্ঞথানি অঞ্ঞাকাররহিতত্তা.

জাতিপচ্চযসম্ভূতসমুদাগতট্ঠোতি জাতিপচ্চযা সম্ভূতং হুত্ৰা সহিতস্স অত্তনো পচ্চযানুরূপস্স উদ্ধং উদ্ধং আগতভাৰো, অনুপৰত্তত্থোতি অত্থো. অথ ৰা সম্ভূতট্ঠো চ সমুদাগতট্ঠো চ সম্ভূতসমুদাগতট্ঠো, ন জাতিতো জরামরণং ন হোতি, ন চ জাতিং ৰিনা অঞ্ঞতো হোতীতি জাতিপচ্চযসম্ভূতট্ঠো. ইত্থঞ্চ জাতিতো সমুদাগচ্ছতীতি জাতিপচ্চযসমুদাগতট্ঠো. যা যা জাতি যথা যথা পচ্চযো হোতি, তদনুরূপং পাতুভাৰোতি অত্থো. অৰিজ্জায সঙ্খারানং পচ্চযট্ঠোতি এত্থাপি ন অৰিজ্জা সঙ্খারানং পচ্চযো ন হোতি, ন চ অৰিজ্জং ৰিনা সঙ্খারা উপ্পজ্জন্তি. যা যা অৰিজ্জা যেসং যেসং সঙ্খারানং যথা যথা পচ্চযো হোতি, অযং অৰিজ্জায সঙ্খারানং পচ্চযট্ঠো, পচ্চযভাৰোতি অত্থো.

ভগৰা তং জানাতি পস্সতীতি সম্বন্ধো. তেনাতি ভগৰতা. তং ৰিভজ্জমানন্তি যোজেতব্বং. তন্তি রূপাযতনং. ইট্ঠানিট্ঠাদীতি আদি-সদ্দেন মজ্ঝত্তং সঙ্গণ্হাতি, তথা অতীতানাগতপচ্চুপ্পন্নপরিত্তঅজ্ঝত্তবহিদ্ধাতদুভযাদিভেদং. লব্ভমানকপদৰসেনাতি ‘‘রূপাযতনং দিট্ঠং সদ্দাযতনং সুতং গন্ধাযতনং রসাযতনং ফোট্ঠব্বাযতনং মুতং, সব্বং রূপং মনসা ৰিঞ্ঞাত’’ন্তি (ধ. স. ৯৬৬) ৰচনতো দিট্ঠপদঞ্চ ৰিঞ্ঞাতপদঞ্চ রূপারম্মণে লব্ভতি. ‘‘রূপারম্মণং ইট্ঠং অনিট্ঠং মজ্ঝত্তং পরিত্তং অতীতং অনাগতং পচ্চুপ্পন্নং অজ্ঝত্তং বহিদ্ধা দিট্ঠং ৰিঞ্ঞাতং রূপং রূপাযতনং রূপধাতু ৰণ্ণনিভা সনিদস্সনং সপ্পটিঘং নীলং পীতক’’ন্তি এৰমাদীহি অনেকেহি নামেহি. ‘‘তেরসহি ৰারেহী’’তি রূপকণ্ডে (ধ. স. ৬১৪ আদযো) আগতে তেরস নিদ্দেসৰারে সন্ধাযাহ. একেকস্মিঞ্চ ৰারে চতুন্নং চতুন্নং ৰৰত্থাপননযানং ৰসেন ‘‘দ্ৰিপঞ্ঞাসায নযেহী’’তি আহ. তথমেৰ অৰিপরীতদস্সিতায, অপ্পটিৰত্তিযদেসনতায চ. জানামি অব্ভঞ্ঞাসিন্তি ৰত্তমানাতীতকালেসু ঞাণপ্পৰত্তিদস্সনেন অনাগতেপি ঞাণপ্পৰত্তি ৰুত্তাযেৰাতি দট্ঠব্বা. ৰিদিত-সদ্দো অনামট্ঠকালৰিসেসো ৰেদিতব্বো, ‘‘দিট্ঠং সুতং মুত’’ন্তিআদীসু (ধ. স. ৯৬৬) ৰিয. ন উপট্ঠাসীতি অত্তত্তনিযৰসেন ন উপগচ্ছি. যথা রূপারম্মণাদযো ধম্মা যংসভাৰা যংপকারা চ, তথা নে পস্সতি জানাতি গচ্ছতীতি তথাগতোতি এৰং পদসম্ভৰো ৰেদিতব্বো. কেচি পন ‘‘নিরুত্তিনযেন পিসোদরাদিপক্খেপেন ৰা দস্সী-সদ্দস্স লোপং, আগত-সদ্দস্স চাগমং কত্ৰা তথাগতো’’তি ৰণ্ণেন্তি.

নিদ্দোসতায অনুপৰজ্জং. পক্খিপিতব্বাভাৰেন অনূনং. অপনেতব্বাভাৰেন অনধিকং. অত্থব্যঞ্জনাদিসম্পত্তিযা সব্বাকারপরিপুণ্ণং. নো অঞ্ঞথাতি ‘‘তথেৰা’’তি ৰুত্তমেৰত্থং ব্যতিরেকেন সম্পাদেতি. তেন যদত্থং ভাসিতং, একন্তেন তদত্থনিপ্ফাদনতো যথা ভাসিতং ভগৰতা, তথেৰাতি অৰিপরীতদেসনতং দস্সেতি. ‘‘গদত্থো’’তি এতেন তথং গদতীতি তথাগতোতি দ-কারস্স ত-কারো কতো নিরুত্তিনযেনাতি দস্সেতি.

তথা গতমস্সাতি তথাগতো, গতন্তি চ কাযস্স ৰাচায ৰা পৰত্তীতি অত্থো. তথাতি চ ৰুত্তে যংতং-সদ্দানং অব্যভিচারিসম্বন্ধিতায ‘‘যথা’’তি অযমত্থো উপট্ঠিতোযেৰ হোতি. কাযৰচীকিরিযানঞ্চ অঞ্ঞমঞ্ঞানুলোমেন ৰচনিচ্ছাযং, কাযস্স ৰাচা, ৰাচায চ কাযো সম্বন্ধীভাৰেন উপতিট্ঠতীতি ইমমত্থং দস্সেন্তো আহ ‘‘ভগৰতো হী’’তিআদি. ইমস্মিং পন অত্থে তথাৰাদিতায তথাগতোতি অযম্পি অত্থো সিদ্ধো হোতি. সো পন পুব্বে পকারন্তরেন দস্সিতোতি আহ ‘‘এৰং তথাকারিতায তথাগতো’’তি.

‘‘তিরিযং অপরিমাণাসু লোকধাতূসূ’’তি এতেন যদেকে ‘‘তিরিযং ৰিয উপরি অধো চ সন্তি লোকধাতুযো’’তি ৰদন্তি, তং পটিসেধেতি. দেসনাৰিলাসোযেৰ দেসনাৰিলাসমযো যথা ‘‘পুঞ্ঞমযং, দানময’’ন্তিআদীসু.

উপসগ্গনিপাতানং ৰাচকসদ্দসন্নিধানে তদত্থজোতনভাৰেন পৰত্তনতো গত-সদ্দোযেৰ অৰগতত্থং অতীতত্থঞ্চ ৰদতীতি আহ ‘‘গতোতি অৰগতো অতীতো’’তি. অথ ৰা অভিনীহারতো পট্ঠায যাৰ সম্বোধি, এত্থন্তরে মহাবোধিযানপটিপত্তিযা হানঠানসংকিলেসনিৰত্তীনং অভাৰতো যথা পণিধানং, তথা গতো অভিনীহারানুরূপং পটিপন্নোতি তথাগতো. অথ ৰা মহিদ্ধিকতায, পটিসম্ভিদানং উক্কংসাধিগমেন অনাৰরণতায চ কত্থচি পটিঘাতাভাৰতো যথা রুচি, তথা কাযৰচীচিত্তানং গতানি গমনানি পৰত্তিযো এতস্সাতি তথাগতো. যস্মা চ লোকে ৰিধযুত্তগতপকার-সদ্দা সমানত্থা দিস্সন্তি, তস্মা যথা ৰিধা ৰিপস্সীআদযো ভগৰন্তো, অযম্পি ভগৰা তথা ৰিধোতি তথাগতো. যথা যুত্তা চ তে ভগৰন্তো অযম্পি ভগৰা তথা যুত্তোতি তথাগতো. অথ ৰা যস্মা সচ্চং তচ্ছং তথন্তি ঞাণস্সেতং অধিৰচনং, তস্মা তথেন ঞাণেন আগতোতি তথাগতোতি. এৰম্পি তথাগত-সদ্দস্স অত্থো ৰেদিতব্বো –

‘‘পহায কামাদিমলে যথা গতা,

সমাধিঞাণেহি ৰিপস্সিআদযো;

মহেসিনো সক্যমুনী জুতিন্ধরো,

তথাগতো তেন তথাগতো মতো.

তথঞ্চ ধাতাযতনাদিলক্খণং,

সভাৰসামঞ্ঞৰিভাগভেদতো;

সযম্ভুঞাণেন জিনো সমাগতো,

তথাগতো ৰুচ্চতি সক্যপুঙ্গৰো.

তথানি সচ্চানি সমন্তচক্খুনা,

তথা ইদপ্পচ্চযতা চ সব্বসো;

অনঞ্ঞনেয্যেন যতো ৰিভাৰিতা,

যাথাৰতো তেন জিনো তথাগতো.