১. ব্রহ্মজালসুত্তৰণ্ণনা

পরিব্বাজককথাৰণ্ণনা

এৰং পঠমমহাসঙ্গীতিং দস্সেত্ৰা যদত্থং সা ইধ দস্সিতা, ইদানি তং নিগমনৰসেন দস্সেতুং ‘‘ইমিস্সা’’তিআদিমাহ.

১. এত্তাৰতা চ ব্রহ্মজালস্স সাধারণতো বাহিরনিদানং দস্সেত্ৰা ইদানি অব্ভন্তরনিদানং সংৰণ্ণেতুং ‘‘তত্থ এৰ’’ন্তিআদি ৰুত্তং. অথ ৰা ছহি আকারেহি সংৰণ্ণনা কাতব্বা সম্বন্ধতো পদতো পদৰিভাগতো পদত্থতো অনুযোগতো পরিহারতো চাতি. তত্থ সম্বন্ধো নাম দেসনাসম্বন্ধো. যং লোকিযা ‘‘উম্মুগ্ঘাতো’’তি ৰদন্তি. সো পন পাল়িযা নিদানপাল়িৰসেন, নিদানপাল়িযা পন সঙ্গীতিৰসেন ৰেদিতব্বোতি পঠমমহাসঙ্গীতিং দস্সেন্তেন নিদানপাল়িযা সম্বন্ধস্স দস্সিতত্তা পদাদিৰসেন সংৰণ্ণনং করোন্তো ‘‘এৰন্তি নিপাতপদ’’ন্তিআদিমাহ. ‘‘মেতিআদীনী’’তি এত্থ অন্তরা-সদ্দ-চ-সদ্দানং নিপাতপদভাৰো, ৰত্তব্বো, ন ৰা ৰত্তব্বো তেসং নযগ্গহণেন গহিতত্তা, তদৰসিট্ঠানং আপটি-সদ্দানং আদি-সদ্দেন সঙ্গণ্হনতো. ‘‘পদৰিভাগো’’তি পদানং ৰিসেসো, ন পন পদৰিগ্গহো. অথ ৰা পদানি চ পদৰিভাগো চ পদৰিভাগো, পদৰিগ্গহো চ পদৰিভাগো চ পদৰিভাগোতি ৰা একসেসৰসেন পদপদৰিগ্গহাপি পদৰিভাগ সদ্দেন ৰুত্তাতি ৰেদিতব্বং. তত্থ পদৰিগ্গহো ‘‘ভিক্খূনং সঙ্ঘো’’তিআদিভেদেসু পদেসু দট্ঠব্বো.

অত্থতোতি পদত্থতো. তং পন পদত্থং অত্থুদ্ধারক্কমেন পঠমং এৰং-সদ্দস্স দস্সেন্তো ‘‘এৰংসদ্দো তাৰা’’তিআদিমাহ. অৰধারণাদীতি এত্থ আদি-সদ্দেন ইদমত্থপুচ্ছাপরিমাণাদিঅত্থানং সঙ্গহো দট্ঠব্বো. তথা হি ‘‘এৰংগতানি, এৰংৰিধো, এৰমাকারো’’তিআদীসু ইদং-সদ্দস্স অত্থে এৰং-সদ্দো. গত-সদ্দো হি পকারপরিযাযো, তথা ৰিধাকার-সদ্দা চ. তথা হি ৰিধযুত্তগত-সদ্দে লোকিযা পকারত্থে ৰদন্তি. ‘‘এৰং নু খো, ন নু খো, কিং নু খো, কথং নু খো’’তি, ‘‘এৰং সু তে সুন্হাতা সুৰিলিত্তা কপ্পিতকেসমস্সু, আমুত্তমালাভরণা ওদাতৰত্থৰসনা পঞ্চহি কামগুণেহি সমপ্পিতা সমঙ্গীভূতা পরিচারেন্তি, সেয্যথাপি ত্ৰং এতরহি সাচরিযকোতি? নো হিদং ভো গোতমা’’তি চ আদীসু পুচ্ছাযং. ‘‘এৰং লহুপরিৰত্তং, এৰং আযুপরিযন্তো’’তি চ আদীসু পরিমাণে. ননু চ ‘‘এৰং নু খো, এৰং সু তে, এৰং আযুপরিযন্তো’’তি এত্থ এৰং-সদ্দেন পুচ্ছনাকারপরিমাণাকারানং ৰুত্তত্তা আকারত্থো এৰ এৰং-সদ্দো তি? ন, ৰিসেসসব্ভাৰতো. আকারমত্তৰাচকো হেত্থ আকারত্থোতি অধিপ্পেতো, যথা ‘‘এৰং ব্যাখোতিআদীসু পন ন আকারৰিসেসৰাচকো এৰঞ্চ কত্ৰা ‘‘এৰং জাতেন মচ্চেনা’’তিআদীনি উপমাদীসু উদাহরণানি উপপন্নানি হোন্তি. তথা হি ‘‘যথাপি…পে… বহু’’ন্তি? এত্থ পুপ্ফরাসিট্ঠানিযতো মনুস্সুপপত্তিসপ্পুরিসূপনিস্সযসদ্ধম্মসৰনযোনিসোমনসিকারভোগসম্পত্তিআদিদানাদিপুঞ্ঞকিরিযাহেতুসমুদাযতো সোভাসুগন্ধতাদিগুণযোগতো মালাগুণসদিসিযো পহূতা পুঞ্ঞকিরিযা মরিতব্বসভাৰতায মচ্চেন সত্তেন কত্তব্বাতি জোদিতত্তা পুপ্ফরাসিমালাগুণাৰ উপমা, তেসং উপমাকারো যথা-সদ্দেন অনিযমতো ৰুত্তোতি এৰং-সদ্দো উপমাকারনিগমনত্থোতি ৰত্তুং যুত্তং. সো পন উপমাকারো নিযমিযমানো অত্থতো উপমাৰ হোতীতি আহ ‘‘উপমাযং আগতো’’তি.

তথা এৰং ইমিনা আকারেন ‘‘অভিক্কমিতব্ব’’ন্তিআদিনা উপদিসিযমানায সমণসারুপ্পায আকপ্পসম্পত্তিযা যো তত্থ উপদিসনাকারো, সো অত্থতো উপদেসোযেৰাতি ৰুত্তং ‘‘এৰং তে…পে… উপদেসে’’তি. তথা এৰমেতং ভগৰা, এৰমেতং সুগতাতি এত্থ চ ভগৰতা যথাৰুত্তমত্থং অৰিপরীততো জানন্তেহি কতং তত্থ সংৰিজ্জমানগুণানং পকারেহি হংসনং উদগ্গতাকরণং সম্পহংসনং, যো তত্থ সম্পহংসনাকারোতি যোজেতব্বং. এৰমেৰং পনাযন্তি এত্থ গরহণাকারোতি যোজেতব্বং. সো চ গরহণাকারো ‘‘ৰসলী’’তিআদি খুংসনসদ্দসন্নিধানতো ইধ এৰং-সদ্দেন পকাসিতোতি ৰিঞ্ঞাযতি. যথা চেত্থ, এৰং উপমাকারাদযোপি উপমাদিৰসেন ৰুত্তানং পুপ্ফরাসিআদিসদ্দানং সন্নিধানতোতি দট্ঠব্বং. এৰঞ্চ ৰদেহীতি ‘‘যথাহং ৰদামি, এৰং সমণং আনন্দং ৰদেহী’’তি ৰদনাকারো ইদানি ৰত্তব্বো এৰং-সদ্দেন নিদস্সীযতীতি নিদস্সনত্থো ৰুত্তো. এৰং নোতি এত্থাপি তেসং যথাৰুত্তধম্মানং অহিতদুক্খাৰহভাৰে সন্নিট্ঠানজননত্থং অনুমতিগ্গহণৰসেন ‘‘সংৰত্তন্তি, নো ৰা, কথং ৰা এত্থ হোতী’’তি পুচ্ছায কতায ‘‘এৰং নো এত্থ হোতী’’তি ৰুত্তত্তা তদাকারসন্নিট্ঠানং এৰং-সদ্দেন ৰিভাৰিতন্তি ৰিঞ্ঞাযতি, সো পন তেসং ধম্মানং অহিতায দুক্খায সংৰত্তনাকারো নিযমিযমানো অৰধারণত্থো হোতীতি আহ ‘‘এৰং নো এত্থ হোতীতি আদীসু অৰধারণে’’তি. এৰং ভন্তেতি পন ধম্মস্স সাধুকং সৰনমনসিকারে সন্নিযোজিতেহি ভিক্খূহি অত্তনো তত্থ ঠিতভাৰস্স পটিজাননৰসেন ৰুত্তত্তা এত্থ এৰং-সদ্দো ৰচনসম্পটিচ্ছনত্থো ৰুত্তো, তেন এৰং ভন্তে, সাধু ভন্তে, সুট্ঠু ভন্তেতি ৰুত্তং হোতি.

নানানযনিপুণন্তি একত্তনানত্তঅব্যাপারএৰংধম্মতাসঙ্খাতা, নন্দিযাৰট্ট তিপুক্খলসীহৰিক্কীল়িতঅঙ্কুসদিসালোচনসঙ্খাতা ৰা আধারাদিভেদৰসেন নানাৰিধা নযা নানানযা, নযা ৰা পাল়িগতিযো, তা চ পঞ্ঞত্তিঅনুপঞ্ঞত্তিআদিৰসেন সংকিলেভাগিযাদিলোকিযাদিতদুভযৰোমিস্সতাদিৰসেন কুসলাদিৰসেন খন্ধাদিৰসেন সঙ্গহাদিৰসেন সমযৰিমুত্তাদিৰসেন ঠপনাদিৰসেন কুসলমূলাদিৰসেন তিকপট্ঠানাদিৰসেন চ নানপ্পকারাতি নানানযা, তেহি নিপুণং সণ্হসুখুমন্তি নানানযনিপুণং. আসযোৰ অজ্ঝাসযো, তে চ সস্সতাদিভেদেন, তত্থ চ অপ্পরজক্খতাদিৰসেন অনেকা, অত্তজ্ঝাসযাদযো এৰ ৰা সমুট্ঠানং উপ্পত্তিহেতু এতস্সাতি অনেকজ্ঝাসযসমুট্ঠানং. অত্থব্যঞ্জনসম্পন্নন্তি অত্থব্যঞ্জনপরিপুণ্ণং উপনেতব্বাভাৰতো, সঙ্কাসনপকাসনৰিৰরণৰিভজনউত্তানীকরণপঞ্ঞত্তিৰসেন ছহি অত্থপদেহি, অক্খরপদব্যঞ্জনাকারনিরুত্তিনিদ্দেসৰসেন ছহি ব্যঞ্জনপদেহি চ সমন্নাগতন্তি ৰা অত্থো দট্ঠব্বো.

ৰিৰিধপাটিহারিযন্তি এত্থ পাটিহারিযপদস্স ৰচনত্থং ‘‘পটিপক্খহরণতো রাগাদিকিলেসাপনযনতো পাটিহারিয’’ন্তি ৰদন্তি. ভগৰতো পন পটিপক্খা রাগাদযো ন সন্তি, যে হরিতব্বা. পুথুজ্জনানম্পি ৰিগতূপক্কিলেসে অট্ঠগুণসমন্নাগতে চিত্তে হতপটিপক্খে ইদ্ধিৰিধং পৰত্ততি, তস্মা তত্থ পৰত্তৰোহারেন চ ন সক্কা ইধ ‘‘পাটিহারিয’’ন্তি ৰত্তুং. সচে পন মহাকারুণিকস্স ভগৰতো ৰেনেয্যগতা চ কিলেসা পটিপক্খা, তেসং হরণতো ‘‘পাটিহারিয’’ন্তি ৰুত্তং, এৰং সতি যুত্তমেতং. অথ ৰা ভগৰতো চ সাসনস্স চ পটিপক্খা তিত্থিযা, তেসং হরণতো পাটিহারিযং. তে হি দিট্ঠিহরণৰসেন, দিট্ঠিপ্পকাসনে অসমত্থভাৰেন চ ইদ্ধিআদেসনানুসাসনীহি হরিতা অপনীতা হোন্তীতি. ‘‘পটী’’তি ৰা অযং সদ্দো ‘‘পচ্ছা’’তি এতস্স অত্থং বোধেতি ‘‘তস্মিং পটিপৰিট্ঠম্হি, অঞ্ঞো আগঞ্ছি ব্রাহ্মণো’’তিআদীসু ৰিয, তস্মা সমাহিতে চিত্তে, ৰিগতূপক্কিলেসে চ কতকিচ্চেন পচ্ছা হরিতব্বং পৰত্তেতব্বন্তি পটিহারিযং, অত্তনো ৰা উপক্কিলেসেসু চতুত্থজ্ঝানমগ্গেহি হরিতেসু পচ্ছা হরণং পটিহারিযং. ইদ্ধিআদেসনানুসাসনিযো চ ৰিগতূপক্কিলেসেন, কতকিচ্চেন চ সত্তহিতত্থং পুন পৰত্তেতব্বা, হরিতেসু চ অত্তনো উপক্কিলেসেসু পরসত্তানং উপক্কিলেসহরণানি হোন্তীতি পটিহারিযানি ভৰন্তি. পটিহারিযমেৰ পাটিহারিযং. পটিহারিযে ৰা ইদ্ধিআদেসনানুসাসনীসমুদাযে ভৰং একেকং ‘‘পাটিহারিয’’ন্তি ৰুচ্চতি. পটিহারিযং ৰা চতুত্থজ্ঝানং মগ্গো চ পটিপক্খহরণতো, তত্থ জাতং, তস্মিং ৰা নিমিত্তভূতে, ততো ৰা আগতন্তি পাটিহারিযং. তস্স পন ইদ্ধিআদিভেদেন ৰিসযভেদেন চ বহুৰিধস্স ভগৰতো দেসনায লব্ভমানত্তা আহ ‘‘ৰিৰিধপাটিহারিয’’ন্তি.

ন অঞ্ঞথাতি ভগৰতো সম্মুখা সুতাকারতো ন অঞ্ঞথাতি অত্থো, ন পন ভগৰতো দেসিতাকারতো. অচিন্তেয্যানুভাৰা হি ভগৰতো দেসনা. এৰঞ্চ কত্ৰা ‘‘সব্বপ্পকারেন কো সমত্থো ৰিঞ্ঞাতু’’ন্তি ইদং ৰচনং সমত্থিতং হোতি. ধারণবলদস্সনঞ্চ ন ৰিরুজ্ঝতি সুতাকারাৰিরজ্ঝনস্স অধিপ্পেতত্তা. ন হেত্থ অত্থন্তরতাপরিহারো দ্ৰিন্নম্পি অত্থানং একৰিসযত্তা, ইতরথা থেরো ভগৰতো দেসনায সব্বথা পটিগ্গহণে সমত্থো অসমত্থো চাতি আপজ্জেয্যাতি.

‘‘যো পরো ন হোতি, সো অত্তা’’তি এৰং ৰুত্তায নিযকজ্ঝত্তসঙ্খাতায সসন্ততিযং ৰত্তনতো তিৰিধোপি মে-সদ্দো কিঞ্চাপি একস্মিংযেৰ অত্থে দিস্সতি, করণসম্পদানসামিনিদ্দেসৰসেন পন ৰিজ্জমানভেদং সন্ধাযাহ ‘‘মে-সদ্দো তীসু অত্থেসু দিস্সতী’’তি.

কিঞ্চাপি উপসগ্গো কিরিযং ৰিসেসেতি, জোতকভাৰতো পন সতিপি তস্মিং সুত-সদ্দো এৰ তং তমত্থং অনুৰদতীতি অনুপসগ্গস্স সুত-সদ্দস্স অত্থুদ্ধারে সউপসগ্গস্স গহণং ন ৰিরুজ্ঝতীতি দস্সেন্তো ‘‘সউপসগ্গো চ অনুপসগ্গো চা’’তি আহ. অস্সাতি সুত-সদ্দস্স. কম্মভাৰসাধনানি ইধ সুত-সদ্দে সম্ভৰন্তীতি ৰুত্তং ‘‘উপধারিতন্তি ৰা উপধারণন্তি ৰা অত্থো’’তি. মযাতি অত্থে সতীতি যদা মেসদ্দস্স কত্তুৰসেন করণনিদ্দেসো, তদাতি অত্থো. মমাতি অত্থে সতীতি যদা সম্বন্ধৰসেন সামিনিদ্দেসো, তদা.

সুতসদ্দসন্নিধানে পযুত্তেন এৰংসদ্দেন সৰনকিরিযাজোতকেন ভৰিতব্বন্তি ৰুত্তং ‘‘এৰন্তি সোতৰিঞ্ঞাণাদিৰিঞ্ঞাণকিচ্চনিদস্সন’’ন্তি. আদি-সদ্দেন সম্পটিচ্ছনাদীনং পঞ্চদ্ৰারিকৰিঞ্ঞাণানং তদভিনিহটানঞ্চ মনোদ্ৰারিকৰিঞ্ঞাণানং গহণং ৰেদিতব্বং. সব্বেসম্পি ৰাক্যানং এৰকারত্থসহিতত্তা ‘‘সুত’’ন্তি এতস্স সুতং এৰাতি অযমত্থো লব্ভতীতি আহ ‘‘অস্সৰনভাৰপটিক্খেপতো’’তি, এতেন অৰধারণেন নিরাকতং দস্সেতি. যথা চ সুতং সুতং এৰাতি নিযমেতব্বং, তং সম্মা সুতং হোতীতি আহ ‘‘অনূনাধিকাৰিপরীতগ্গহণনিদস্সন’’ন্তি. অথ ৰা ‘‘সদ্দন্তরত্থাপোহনৰসেন সদ্দো অত্থং ৰদতী’’তি সুতন্তি অসুতং ন হোতীতি অযমেতস্স অত্থোতি ৰুত্তং ‘‘অস্সৰনভাৰপটিক্খেপতো’’তি, ইমিনা দিট্ঠাদিৰিনিৰত্তনং করোতি. ইদং ৰুত্তং হোতি. ন ইদং মযা দিট্ঠং, ন সযম্ভুঞাণেন সচ্ছিকতং, অথ খো সুতং, তঞ্চ খো সম্মদেৰাতি. তেনেৰাহ ‘‘অনূনাধিকাৰিপরীতগ্গহণনিদস্সন’’ন্তি. অৰধারণত্থে ৰা এৰং-সদ্দে অযং অত্থযোজনা করীযতীতি তদপেক্খস্স সুত-সদ্দস্স অযমত্থো ৰুত্তো ‘‘অস্সৰনভাৰপটিক্খেপতো’’তি. তেনেৰ আহ ‘‘অনূনাধিকাৰিপরীতগ্গহণনিদস্সন’’ন্তি. সৰনসদ্দো চেত্থ কম্মত্থো ৰেদিতব্বো সুয্যতীতি.

এৰং সৰনহেতুসুণন্তপুগ্গলসৰনৰিসেসৰসেন পদত্তযস্স একেন পকারেন অত্থযোজনং দস্সেত্ৰা ইদানি পকারন্তরেহিপি তং দস্সেতুং ‘‘তথা এৰ’’ন্তিআদি ৰুত্তং. তত্থ তস্সাতি যা সা ভগৰতো সম্মুখা ধম্মস্সৰনাকারেন পৰত্তা মনোদ্ৰারৰিঞ্ঞাণৰীথি, তস্সা. সা হি নানপ্পকারেন আরম্মণে পৰত্তিতুং সমত্থা. তথা চ ৰুত্তং ‘‘সোতদ্ৰারানুসারেনা’’তি. নানপ্পকারেনাতি ৰক্খমানানং অনেকৰিহিতানং ব্যঞ্জনত্থগ্গহণানানাকারেন, এতেন ইমিস্সা যোজনায আকারত্থো এৰং-সদ্দো গহিতোতি দীপেতি. পৰত্তিভাৰপ্পকাসনন্তি পৰত্তিযা অত্থিভাৰপ্পকাসনং. ‘‘সুতন্তি ধম্মপ্পকাসন’’ন্তি যস্মিং আরম্মণে ৰুত্তপ্পকারা ৰিঞ্ঞাণৰীথি নানপ্পকারেন পৰত্তা, তস্স ধম্মত্তা ৰুত্তং, ন সুতসদ্দস্স ধম্মত্থত্তা. ৰুত্তস্সেৰত্থস্স পাকটীকরণং ‘‘অযঞ্হেত্থা’’তিআদি. তত্থ ৰিঞ্ঞাণৰীথিযাতি করণত্থে করণৰচনং. মযাতি কত্থুঅত্থে.

‘‘এৰন্তি নিদ্দিসিতব্বপ্পকাসন’’ন্তি নিদস্সনত্থং এৰং-সদ্দং গহেত্ৰা ৰুত্তং নিদস্সেতব্বস্স নিদ্দিসিতব্বত্তাভাৰাভাৰতো, তেন এৰং-সদ্দেন সকলম্পি সুত্তং পচ্চামট্ঠন্তি দস্সেতি. সুত-সদ্দস্স কিরিযাসদ্দত্তা, সৰনকিরিযায চ সাধারণৰিঞ্ঞাণপ্পবন্ধপটিবদ্ধত্তা তত্থ চ পুগ্গলৰোহারোতি ৰুত্তং ‘‘সুতন্তি পুগ্গলকিচ্চপ্পকাসন’’ন্তি. ন হি পুগ্গলৰোহাররহিতে ধম্মপ্পবন্ধে সৰনকিরিযা লব্ভতীতি.

‘‘যস্স চিত্তসন্তানস্সা’’তিআদিপি আকারত্থমেৰ এৰং-সদ্দং গহেত্ৰা পুরিমযোজনায অঞ্ঞথা অত্থযোজনং দস্সেতুং ৰুত্তং. তত্থ আকারপঞ্ঞত্তীতি উপাদাপঞ্ঞত্তি এৰ, ধম্মানং পৰত্তিআকারুপাদানৰসেন তথা ৰুত্তা. ‘‘সুতন্তি ৰিসযনিদ্দেসো’’তি সোতব্বভূতো ধম্মো সৰনকিরিযাকত্তুপুগ্গলস্স সৰনকিরিযাৰসেন পৰত্তিট্ঠানন্তি কত্ৰা ৰুত্তং. চিত্তসন্তানৰিনিমুত্তস্স পরমত্থতো কস্সচি কত্তু অভাৰেপি সদ্দৰোহারেন বুদ্ধিপরিকপ্পিতভেদৰচনিচ্ছায চিত্তসন্তানতো অঞ্ঞং ৰিয তংসমঙ্গিং কত্ৰা ৰুত্তং ‘‘চিত্তসন্তানেন তংসমঙ্গিনো’’তি. সৰনকিরিযাৰিসযোপি সোতব্বধম্মো সৰনকিরিযাৰসেন পৰত্তচিত্তসন্তানস্স ইধ পরমত্থতো কত্তুভাৰতো, সৰনৰসেন চিত্তপ্পৰত্তিযা এৰ ৰা সৰনকিরিযাভাৰতো তংকিরিযাকত্তু চ ৰিসযো হোতীতি কত্ৰা ৰুত্তং ‘‘তংসমঙ্গিনো কত্তু ৰিসযে’’তি. সুতাকারস্স চ থেরস্স সম্মানিচ্ছিতভাৰতো আহ ‘‘গহণসন্নিট্ঠান’’ন্তি, এতেন ৰা অৰধারণত্থং এৰং-সদ্দং গহেত্ৰা অযং অত্থযোজনা কতাতি দট্ঠব্বং.

পুব্বে সুতানং নানাৰিহিতানং সুত্তসঙ্খাতানং অত্থব্যঞ্জনানং উপধারিতরূপস্স আকারস্স নিদস্সনস্স অৰধারণস্স ৰা পকাসনসভাৰো এৰং-সদ্দোতি তদাকারাদিউপধারণস্স পুগ্গলপঞ্ঞত্তিযা উপাদানভূতধম্মপ্পবন্ধব্যাপারতায ৰুত্তং ‘‘এৰন্তি পুগ্গলকিচ্চনিদ্দেসো’’তি. সৰনকিরিযা পন পুগ্গলৰাদিনোপি ৰিঞ্ঞাণনিরপেক্খা নত্থীতি ৰিসেসতো ৰিঞ্ঞাণব্যাপারোতি আহ ‘‘সুতন্তি ৰিঞ্ঞাণকিচ্চনিদ্দেসো’’তি. মেতি সদ্দপ্পৰত্তিযা একন্তেনেৰ সত্তৰিসযত্তা, ৰিঞ্ঞাণকিচ্চস্স চ তত্থেৰ সমোদহিতব্বতো ‘‘মেতি উভযকিচ্চযুত্তপুগ্গলনিদ্দেসো’’তি ৰুত্তং. অৰিজ্জমানপঞ্ঞত্তিৰিজ্জমানপঞ্ঞত্তিসভাৰা যথাক্কমং এৰং-সদ্দ সুত-সদ্দানং অত্থাতি তে তথারূপপঞ্ঞত্তিউপাদানব্যাপারভাৰেন দস্সেন্তো আহ ‘‘এৰন্তি পুগ্গলকিচ্চনিদ্দেসো. সুতন্তি ৰিঞ্ঞাণকিচ্চনিদ্দেসো’’তি. এত্থ চ করণকিরিযাকত্তুকম্মৰিসেসপ্পকাসনৰসেন পুগ্গলব্যাপাৰিসযপুগ্গলব্যাপারনিদস্সনৰসেন গহণাকারগাহকতব্বিসযৰিসেসনিদ্দেসৰসেন কত্তুকরণ ব্যাপারকত্তুনিদ্দেসৰসেন চ দুতিযাদযো চতস্সো অত্থযোজনা দস্সিতাতি দট্ঠব্বং.

সব্বস্সাপি সদ্দাধিগমনীযস্স অত্থস্স পঞ্ঞত্তিমুখেনেৰ পটিপজ্জিতব্বত্তা, সব্বপঞ্ঞত্তীনঞ্চ ৰিজ্জমানাদিৰসেন ছসু পঞ্ঞত্তিভেদেসু অন্তোগধত্তা তেসু ‘‘এৰ’’ন্তিআদীনং পঞ্ঞত্তীনং সরূপং নিদ্ধারেন্তো আহ ‘‘এৰন্তি চ মেতি চা’’তিআদি. তত্থ এৰন্তি চ মেতি চ ৰুচ্চমানস্স অত্থস্স আকারাদিনো, ধম্মানঞ্চ অসল্লক্খণভাৰতো অৰিজ্জমানপঞ্ঞত্তিভাৰোতি আহ ‘‘সচ্চিকট্ঠপরমত্থৰসেন অৰিজ্জমানপঞ্ঞত্তী’’তি. তত্থ সচ্চিকট্ঠপরমত্থৰসেনাতি ভূতত্থউত্তমত্থৰসেন. ইদং ৰুত্তং হোতিযো মাযামরীচিআদযো ৰিয অভূতত্থো, অনুস্সৰাদীহি গহেতব্বো ৰিয অনুত্তমত্থো চ ন হোতি, সো রূপসদ্দাদিসভাৰো রুপ্পনানুভৰনাদিসভাৰো ৰা অত্থো ‘‘সচ্চিকট্ঠো, পরমত্থ চা’’তি ৰুচ্চতি, ন তথা এৰং মেতি পদানমত্থোতি, এতমেৰত্থং পাকটতরং কাতুং ‘‘কিঞ্হেত্থ ত’’ন্তিআদি ৰুত্তং. সুতন্তি পন সদ্দাযতনং সন্ধাযাহ ‘‘ৰিজ্জমানপঞ্ঞত্তী’’তি. তেনেৰ হি ‘‘যঞ্হি তমেত্থ সোতেন উপলদ্ধ’’ন্তি ৰুত্তং, ‘‘সোতদ্ৰারানুসারেন উপলদ্ধ’’ন্তি পন ৰুত্তে অত্থব্যঞ্জনাদিসব্বং লব্ভতি. তং তং উপাদায ৰত্তব্বতোতি সোতপথং আগতে ধম্মে উপাদায তেসং উপধারিতাকারাদিনো পচ্চামসনৰসেন ‘‘এৰ’’ন্তি, সসন্ততিপরিযাপন্নে খন্ধে উপাদায ‘‘মে’’তি ৰত্তব্বত্তাতি অত্থো. দিট্ঠাদিসভাৰরহিতে সদ্দাযতনে পৰত্তমানোপি সুতৰোহারো ‘‘দুতিযং ততিয’’ন্তিআদিকো ৰিয পঠমাদীনি দিট্ঠমুতৰিঞ্ঞাতে অপেক্খিত্ৰা পৰত্তোতি আহ ‘‘দিট্ঠাদীনি উপনিধায ৰত্তব্বতো’’তি. অসুতং ন হোতীতি হি ‘‘সুত’’ন্তি পকাসিতো যমত্থোতি.

অত্তনা পটিৰিদ্ধা সুত্তস্স পকারৰিসেসা ‘‘এৰ’’ন্তি থেরেন পচ্চামট্ঠাতি আহ ‘‘অসম্মোহং দীপেতী’’তি. ‘‘নানপ্পকারপটিৰেধসমত্থো হোতী’’তি এতেন ৰক্খমানস্স সুত্তস্স নানপ্পকারতং দুপ্পটিৰিজ্ঝতঞ্চ দস্সেতি. ‘‘সুতস্স অসম্মোসং দীপেতী’’তি সুতাকারস্স যাথাৰতো দস্সিযমানত্তা ৰুত্তং. অসম্মোহেনাতি সম্মোহাভাৰেন, পঞ্ঞায এৰ ৰা সৰনকালসম্ভূতায তদুত্তরকালপঞ্ঞাসিদ্ধি, এৰং অসম্মোসেনাতি এত্থাপি ৰত্তব্বং. ব্যঞ্জনানং পটিৰিজ্ঝিতব্বো আকারো নাতিগম্ভীরো, যথাসুতধারণমেৰ তত্থ করণীযন্তি সতিযা ব্যাপারো অধিকো, পঞ্ঞা তত্থ গুণীভূতাতি ৰুত্তং ‘‘পঞ্ঞাপুব্বঙ্গমাযা’’তিআদি পঞ্ঞায পুব্বঙ্গমাতি কত্ৰা. পুব্বঙ্গমতা চেত্থ পধানভাৰো ‘‘মনোপুব্বঙ্গমা’’তিআদীসু ৰিয, পুব্বঙ্গমতায ৰা চক্খুৰিঞ্ঞাণাদীসু আৰজ্জনাদীনং ৰিয অপ্পধানত্তে পঞ্ঞা পুব্বঙ্গমা এতিস্সাতি অযম্পি অত্থো যুজ্জতি, এৰং ‘‘সতিপুব্বঙ্গমাযা’’তি এত্থাপি ৰুত্তনযানুসারেন যথাসম্ভৰমত্থো ৰেদিতব্বো. অত্থব্যঞ্জনসম্পন্নস্সাতি অত্থব্যঞ্জনপরিপুণ্ণস্স, সঙ্কাসনপকাসনৰিৰরণৰিভজনউত্তানীকরণপঞ্ঞত্তিৰসেন ছহি অত্থপদেহি, অক্খরপদব্যঞ্জনাকারনিরুত্তিনিদ্দেসৰসেন ছহি ব্যঞ্জনপদেহি চ সমন্নাগতস্সাতি ৰা অত্থো দট্ঠব্বো.

যোনিসোমনসিকারং দীপেতীতি এৰং-সদ্দেন ৰুচ্চমানানং আকারনিদস্সনাৰধারণত্থানং অৰিপরীতসদ্ধম্মৰিসযত্তাতি অধিপ্পাযো. ‘‘অৰিক্খেপং দীপেতী’’তি ‘‘ব্রহ্মজালং কত্থ ভাসিত’’ন্তিআদি পুচ্ছাৰসেন পকরণপ্পত্তস্স ৰক্খমানস্স সুত্তস্স সৰনং সমাধানমন্তরেন ন সম্ভৰতীতি কত্ৰা ৰুত্তং. ‘‘ৰিক্খিত্তচিত্তস্সা’’তিআদি তস্সেৰত্থস্স সমত্থনৰসেন ৰুত্তং. সব্বসম্পত্তিযাতি অত্থব্যঞ্জনদেসকপযোজনাদিসম্পত্তিযা. অৰিপরীতসদ্ধম্মৰিসযেহি ৰিয আকারনিদস্সনাৰধারণত্থেহি যোনিসোমনসিকারস্স, সদ্ধম্মস্সৰনেন ৰিয চ অৰিক্খেপস্স যথা যোনিসোমনসিকারেন ফলভূতেন অত্তসম্মাপণিধিপুব্বেকতপুঞ্ঞতানং সিদ্ধি ৰুত্তা তদৰিনাভাৰতো, এৰং অৰিক্খেপেন ফলভূতেন কারণভূতানং সদ্ধম্মস্সৰনসপ্পুরিসূপনিস্সযানং সিদ্ধি দস্সেতব্বা সিযা অস্সুতৰতো, সপ্পুরিসূপনিস্সযরহিতস্স চ তদভাৰতো.

‘‘ন হি ৰিক্খিত্তচিত্তো’’তিআদিনা সমত্থনৰচনেন পন অৰিক্খেপেন কারণভূতেন সপ্পুরিসূপনিস্সযেন চ ফলভূতস্স সদ্ধম্মস্সৰনস্স সিদ্ধি দস্সিতা. অযং পনেত্থ অধিপ্পাযো যুত্তো সিযাসদ্ধম্মস্সৰনসপ্পুরিসূপনিস্সযা ন একন্তেন অৰিক্খেপস্স কারণং বাহিরঙ্গত্তা, অৰিক্খেপো পন সপ্পুরিসূপনিস্সযো ৰিয সদ্ধম্মস্সৰনস্স একন্তকারণন্তি. এৰম্পি অৰিক্খেপেন সপ্পুরিসূপনিস্সযসিদ্ধিজোতনা ন সমত্থিতাৰ, নো ন সমত্থিতা ৰিক্খিত্তচিত্তানং সপ্পুরিসপযিরুপাসনাভাৰস্স অত্থসিদ্ধত্তা. এত্থ চ পুরিমং ফলেন কারণস্স সিদ্ধিদস্সনং নদীপূরেন ৰিয উপরি ৰুট্ঠিসব্ভাৰস্স, দুতিযং কারণেন ফলস্স সিদ্ধিদস্সনং দট্ঠব্বং একন্তেন ৰস্সিনা ৰিয মেঘৰুট্ঠানেন ৰুট্ঠিপ্পৰত্তিযা.

ভগৰতো ৰচনস্স অত্থব্যঞ্জনপভেদপরিচ্ছেদৰসেন সকলসাসনসম্পত্তিওগাহনাকারো নিরৰসেসপরহিতপারিপূরিকারণন্তি ৰুত্তং ‘‘এৰং ভদ্দকো আকারো’’তি. যস্মা ন হোতীতি সম্বন্ধো. পচ্ছিমচক্কদ্ৰযসম্পত্তিন্তি অত্তসম্মাপণিধিপুব্বেকতপুঞ্ঞতাসঙ্খাতং গুণদ্ৰযং. অপরাপরং ৰুত্তিযা চেত্থ চক্কভাৰো, চরন্তি এতেহি সত্তা সম্পত্তিভৰেসূতি ৰা. যে সন্ধায ৰুত্তং ‘‘চত্তারিমানি ভিক্খৰে চক্কানি, যেহি সমন্নাগতানং দেৰমনুস্সানং চতুচক্কং ৰত্ততী’’তিআদি. পুরিমপচ্ছিমভাৰো চেত্থ দেসনাক্কমৰসেন দট্ঠব্বো. পচ্ছিমচক্কদ্ৰযসিদ্ধিযাতি পচ্ছিমচক্কদ্ৰযস্স অত্থিতায. সম্মাপণিহিতত্তো পুব্বে চ কতপুঞ্ঞো সুদ্ধাসযো হোতি তদসুদ্ধিহেতূনং কিলেসানং দূরীভাৰতোতি আহ ‘‘আসযসুদ্ধি সিদ্ধা হোতী’’তি. তথা হি ৰুত্তং ‘‘সম্মাপণিহিতং চিত্তং, সেয্যসো নং ততো করে’’তি, ‘‘কতপুঞ্ঞোসি ত্ৰং আনন্দ, পধানং অনুযুঞ্জ খিপ্পং হোহিসি অনাসৰোতি চ. তেনেৰাহ ‘‘আসযসুদ্ধিযা অধিগমব্যত্তিসিদ্ধী’’তি. পযোগসুদ্ধিযাতি যোনিসোমনসিকারপুব্বঙ্গমস্স ধম্মস্সৰনপযোগস্স ৰিসদভাৰেন. তথা চাহ ‘‘আগমব্যত্তিসিদ্ধী’’তি. সব্বস্স ৰা কাযৰচীপযোগস্স নিদ্দোসভাৰেন. পরিসুদ্ধকাযৰচীপযোগো হি ৰিপ্পটিসারাভাৰতো অৰিক্খিত্তচিত্তো পরিযত্তিযং ৰিসারদো হোতীতি.

‘‘নানপ্পকারপটিৰেধদীপকেনা’’তিআদিনা অত্থব্যঞ্জনেসু থেরস্স এৰং-সদ্দ সুত-সদ্দানং অসম্মোহাসম্মোসদীপনতো চতুপটিসম্ভিদাৰসেন অত্থযোজনং দস্সেতি. তত্থ ‘‘সোতব্বপ্পভেদপটিৰেধদীপকেনা’’তি এতেন অযং সুত-সদ্দো এৰং-সদ্দসন্নিধানতো, ৰক্খমানাপেক্খায ৰা সামঞ্ঞেনেৰ সোতব্বধম্মৰিসেসং আমসতীতি দস্সেতি. মনোদিট্ঠিকরণাপরিযত্তিধম্মানং অনুপেক্খনসুপ্পটিৰেধা ৰিসেসতো মনসিকারপটিবদ্ধাতি তে ৰুত্তনযেন যোনিসোমনসিকারদীপকেন এৰং-সদ্দেন যোজেত্ৰা, সৰনধারণৰচীপরিচযা পরিযত্তিধম্মানং ৰিসেসেন সোতাৰধানপটিবদ্ধাতি তে অৰিক্খেপদীপকেন সুত-সদ্দেন যোজেত্ৰা দস্সেন্তো সাসনসম্পত্তিযা ধম্মস্সৰনে উস্সাহং জনেতি. তত্থ ধম্মাতি পরিযত্তিধম্মা. মনসানুপেক্খিতাতি ‘‘ইধ সীলং কথিতং, ইধ সমাধি, ইধ পঞ্ঞা, এত্তকা এত্থ অনুসন্ধিযো’’তিআদিনা নযেন মনসা অনুপেক্খিতা. দিট্ঠিযা সুপ্পটিৰিদ্ধাতি নিজ্ঝানক্খন্তিভূতায, ঞাতপরিঞ্ঞাসঙ্খাতায ৰা দিট্ঠিযা তত্থ তত্থ ৰুত্তরূপারূপধম্মে ‘‘ইতি রূপং, এত্তকং রূপ’’ন্তিআদিনা সুট্ঠু ৰৰত্থপেত্ৰা পটিৰিদ্ধা.

‘‘সকলেন ৰচনেনা’’তি পুব্বে তীহি পদেহি ৰিসুং ৰিসুং যোজিতত্তা ৰুত্তং. অসপ্পুরিসভূমিন্তি অকতঞ্ঞুতং ‘‘ইধেকচ্চো পাপভিক্খু তথাগতপ্পৰেদিতং ধম্মৰিনযং পরিযাপুণিত্ৰা অত্তনো দহতী’’তি এৰং ৰুত্তং অনরিযৰোহারাৰত্থং. সা এৰ অনরিযৰোহারাৰত্থা অসদ্ধম্মো. ননু চ আনন্দত্থেরস্স ‘‘মমেদং ৰচন’’ন্তি অধিমানস্স, মহাকস্সপত্থেরাদীনঞ্চ তদাসঙ্কায অভাৰতো অসপ্পুরিসভূমিসমতিক্কমাদিৰচনং নিরত্থকং তি? নযিদং এৰং ‘‘এৰং মে সুত’’ন্তি ৰদন্তেন অযম্পি অত্থো ৰিভাৰিতোতি দস্সনতো. কেচি পন ‘‘দেৰতানং পরিৰিতক্কাপেক্খং তথাৰচনন্তি এদিসী চোদনা অনৰকাসা’’তি ৰদন্তি. তস্মিং কির খণে একচ্চানং দেৰতানং এৰং চেতসো পরিৰিতক্কো উদপাদি ‘‘তথাগতো চ পরিনিব্বুতো, অযঞ্চ আযস্মা দেসনাকুসলো, ইদানি ধম্মং দেসেতি, সক্যকুলপ্পসুতো তথাগতস্স ভাতা চূল়পিতুপুত্তো, কিং নু খো সযং সচ্ছিকত ধম্মং দেসেতি, উদাহু ভগৰতোযেৰ ৰচনং যথাসুত’’ন্তি. এৰং তদাসঙ্কিতপ্পকারতো অসপ্পুরিসভূমিসমোক্কমাদিতো অতিক্কমাদি ৰিভাৰিতন্তি. অত্তনো অদহন্তোতি ‘‘মমেত’’ন্তি অত্তনি অট্ঠপেন্তো. অপ্পেতীতি নিদস্সেতি. দিট্ঠধম্মিকসম্পরাযিকপরমত্থেসু যথারহং সত্তে নেতীতি নেত্তি, ধম্মোযেৰ নেত্তি ধম্মনেত্তি.

দল়্হতরনিৰিট্ঠা ৰিচিকিচ্ছা কঙ্খা. নাতিসংসপ্পনং মতিভেদমত্তং ৰিমতি. অস্সদ্ধিযং ৰিনাসেতি ভগৰতো দেসিতত্তা, সম্মুখা চস্স পটিগ্গহিতত্তা, খলিতদুরুত্তাদিগ্গহণদোসাভাৰতো চ. এত্থ চ পঠমাদযো তিস্সো অত্থযোজনা আকারাদিঅত্থেসু অগ্গহিতৰিসেসমেৰ এৰং-সদ্দং গহেত্ৰা দস্সিতা, ততো পরা তিস্সো আকারত্থমেৰ এৰং-সদ্দং গহেত্ৰা ৰিভাৰিতা. পচ্ছিমা পন তিস্সো যথাক্কমং আকারত্থং নিদস্সনত্থং অৰধারণত্থঞ্চ এৰং-সদ্দং গহেত্ৰা যোজিতাতি দট্ঠব্বং.

এক-সদ্দো অঞ্ঞসেট্ঠাসহাযসঙ্খ্যদীসু দিস্সতি. তথাহেস ‘‘সস্সতো অত্তা চ লোকো চ, ইদমেৰ সচ্চং মোঘমঞ্ঞন্তি ইত্থেকে অভিৰদন্তী’’তিআদীসু অঞ্ঞত্থে দিস্সতি, ‘‘চেতসো একোদিভাৰ’’ন্তিআদীসু সেট্ঠত্থে, ‘‘একো ৰূপকট্ঠো’’তিআদীসু অসহাযে, ‘‘একোৰ খো ভিক্খৰে খণো চ সমযো চ ব্রহ্মচরিযৰাসাযা’’তিআদীসু সঙ্খ্যযং, ইধাপি সঙ্খ্যযন্তি দস্সেন্তো আহ ‘‘একন্তি গণনপরিচ্ছেদনিদ্দেসো’’তি. কালঞ্চ সমযঞ্চাতি যুত্তকালঞ্চ পচ্চযসামগ্গিঞ্চ. খণোতি ওকাসো. তথাগতুপ্পাদাদিকো হি মগ্গব্রহ্মচরিযস্স ওকাসো তপ্পচ্চযপটিলাভহেতুত্তা. খণো এৰ চ সমযো. যো ‘‘খণো’’তি চ ‘‘সমযো’’তি চ ৰুচ্চতি, সো একো ৰাতি হি অত্থো. মহাসমযোতি মহাসমূহো. সমযোপি খোতি সিক্খাপদপূরণস্স হেতুপি. সমযপ্পৰাদকেতি দিট্ঠিপ্পৰাদকে. তত্থ হি নিসিন্না তিত্থিযা অত্তনো অত্তনো সমযং পৰদন্তীতি. অত্থাভিসমযাতি হিতপটিলাভা. অভিসমেতব্বোতি অভিসমযো, অভিসমযো অত্থোতি অভিসমযট্ঠোতি পীল়ন আদীনি অভিসমেতব্বভাৰেন একীভাৰং উপনেত্ৰা ৰুত্তানি. অভিসমযস্স ৰা পটিৰেধস্স ৰিসযভূতভাৰো অভিসমযট্ঠোতি তানেৰ তথা একত্তেন ৰুত্তানি. তত্থ পীল়নং দুক্খসচ্চস্স তং সমঙ্গীনো হিংসনং অৰিপ্ফারিকতাকরণং. সন্তাপোদুক্খদুক্খতাদিৰসেন সন্তাপনং পরিদহণং.

তত্থ সহকারীকারণং সন্নিজ্ঝ সমেতি সমৰেতীতি সমযো, সমৰাযো. সমেতি সমাগচ্ছতি মগ্গব্রহ্মচরিযমেত্থ তদাধারপুগ্গলেহীতি সমযো, খণো. সমেতি এত্থ, এতেনৰ সংগচ্ছতি সত্তো, সভাৰধম্মো ৰা সহজাতাদীহি, উপ্পাদাদীহি ৰাতি সমযো, কালো. ধম্মপ্পৰত্তিমত্ততায অত্থতো অভূতোপি হি কালো ধম্মপ্পৰত্তিযা অধিকরণং, করণং ৰিয চ কপ্পনামত্তসিদ্ধেন রূপেন ৰোহরীযতীতি. সমং, সহ ৰা অৰযৰানং অযনং পৰত্তি অৰট্ঠানন্তি সমযো, সমূহো, যথা ‘‘সমুদাযো’’তি. অৰযৰসহাৰট্ঠানমেৰ হি সমূহোতি. অৰসেসপচ্চযানং সমাগমে এতি ফলং এতস্মা উপ্পজ্জতি পৰত্ততি চাতি সমযো, হেতু যথা ‘‘সমুদযো’’তি. সমেতি সংযোজনভাৰতো সম্বন্ধো এতি অত্তনো ৰিসযে পৰত্ততি, দল়্হগ্গহণভাৰতো ৰা সংযুত্তা অযন্তি পৰত্তন্তি সত্তা যথাভিনিৰেসং এতেনাতি সমযো, দিট্ঠি. দিট্ঠিসংযোজনেন হি সত্তা অতিৰিয বজ্ঝন্তীতি. সমিতি সঙ্গতি সমোধানন্তি সমযো, পটিলাভো. সমস্স যানং, সম্মা ৰা যানং অপগমোতি সমযো, পহানং. অভিমুখং ঞাণেন এতব্বো অভিসমেতব্বোতি অভিসমযো, ধম্মানং অৰিপরীতো সভাৰো. অভিমুখভাৰেন সম্মা এতি গচ্ছতি বুজ্ঝতীতি অভিসমযো, ধম্মানং যথাভূতসভাৰাৰবোধো. এৰং তস্মিং তস্মিং অত্থে সময-সদ্দস্স পৰত্তি ৰেদিতব্বা. সময-সদ্দস্স অত্থুদ্ধারে অভিসময-সদ্দস্স উদাহরণং ৰুত্তনযেনেৰ ৰেদিতব্বং. অস্সাতি সময-সদ্দস্স. কালো অত্থো সমৰাযাদীনং অত্থানং ইধ অসম্ভৰতো দেসদেসকপরিসানং ৰিয সুত্তস্স নিদানভাৰেন কালস্স অপদিসিতব্বতো চ.

কস্মা পনেত্থ অনিযামিতৰসেনেৰ কালো নিদ্দিট্ঠো, ন উতুসংৰচ্ছরাদিৰসেন নিযমেত্ৰাতি আহ ‘‘তত্থ কিঞ্চাপী’’তিআদি. উতুসংৰচ্ছরাদিৰসেন নিযমং অকত্ৰা সময-সদ্দস্স ৰচনে অযম্পি গুণো লদ্ধো হোতীতি দস্সেন্তো ‘‘যে ৰা ইমে’’তিআদিমাহ. সামঞ্ঞজোতনা হি ৰিসেসে অৰতিট্ঠতীতি. তত্থ দিট্ঠধম্মসুখৰিহারসমযো দেৰসিকং ঝানসমাপত্তীহি ৰীতিনামনকালো, ৰিসেসতো সত্তসত্তাহানি. পকাসাতি দসসহস্সিলোকধাতুযা পকম্পনওভাসপাতুভাৰাদীহি পাকটা. যথাৰুত্তপ্পভেদেসুযেৰ সমযেসু একদেসং পকারন্তরেহি সঙ্গহেত্ৰা দস্সেতুং ‘‘যো চায’’ন্তিআদিমাহ. তথা হি ঞাণকিচ্চসমযো অত্তহিতপটিপত্তিসমযো চ অভিসম্বোধিসমযো. অরিযতুণ্হিভাৰসমযো দিট্ঠধম্মসুখৰিহারসমযো. করুণাকিচ্চপরহিতপটিপত্তিধম্মিকথাসমযো দেসনাসমযেৰ.

করণৰচনেন নিদ্দেসো কতো যথাতি সম্বন্ধো. তত্থাতি অভিধম্মৰিনযেসু. তথাতি ভুম্মকরণেহি. অধিকরণত্থ আধারত্থো. ভাৰো নাম কিরিযা, কিরিযায কিরিযন্তরলক্খণং ভাৰেনভাৰলক্খণং. তত্থ যথা কালো সভাৰধম্মপরিচ্ছিন্নো সযং পরমত্থতো অৰিজ্জমানোপি আধারভাৰেন পঞ্ঞাতো তঙ্খণপ্পৰত্তানং ততো পুব্বে পরতো চ অভাৰতো ‘‘পুব্বণ্হে জাতো, সাযন্হে গচ্ছতী’’তি, চ আদীসু, সমূহো চ অৰযৰৰিনিমুত্তো অৰিজ্জমানোপি কপ্পনামত্তসিদ্ধো অৰযৰানং আধারভাৰেন পঞ্ঞাপীযতি ‘‘রুক্খে সাখা, যৰরাসিযং সম্ভূতো’’তিআদীসু, এৰং ইধাপীতি দস্সেন্তো আহ ‘‘অধিকরণঞ্হি…পে… ধম্মান’’ন্তি. যস্মিং কালে, ধম্মপুঞ্জে ৰা কামাৰচরং কুসলং চিত্তং উপ্পন্নং হোতি, তস্মিংযেৰ কালে, ধম্মপুঞ্জে চ ফস্সাদযোপি হোন্তীতি অযঞ্হি তত্থ অত্থো. যথা চ গাৰীসু দুয্হমানাসু গতো, দুদ্ধাসু আগতোতি দোহনকিরিযায গমনকিরিযা লক্খীযতি, এৰং ইধাপি ‘‘যস্মিং সমযে, তস্মিং সমযে’’তি চ ৰুত্তে সতীতি অযমত্থো ৰিঞ্ঞাযমানো এৰ হোতি পদত্থস্স সত্তাৰিরহাভৰতোতি সমযস্স সত্তাকিরিযায চিত্তস্স উপ্পাদকিরিযা, ফস্সাদীনং ভৰনকিরিযা চ লক্খীযতি. যস্মিং সমযেতি যস্মিং নৰমে খণে, যোনিসোমনসিকারাদিহেতুম্হি, পচ্চযসমৰাযে ৰা সতি কামাৰচরং কুসলং চিত্তং উপ্পন্নং হোতি, তস্মিংযেৰ খণে, হেতুম্হি, পচ্চযসমৰাযে চ সতি ফস্সাদযোপি হোন্তীতি উভযত্থ সময-সদ্দে ভুম্মনিদ্দেসো কতো লক্খণভূতভাৰযুত্তোতি দস্সেন্তো আহ ‘‘খণ…পে… লক্খীযতী’’তি.

হেতুঅত্থো করণত্থো চ সম্ভৰতি ‘‘অন্নেন ৰসতি, অজ্ঝেনেন ৰসতি, ফরসুনা ছিন্দতি, কুদালেন খণতী’’তিআদীসু ৰিয. ৰীতিক্কমঞ্হি সুত্ৰা ভিক্খুসঙ্ঘং সন্নিপাতাপেত্ৰা ওতিণ্ণৰত্থুকং পুগ্গলং পটিপুচ্ছিত্ৰা, ৰিগরহিত্ৰা চ তং তং ৰত্থুং ওতিণ্ণকালং অনতিক্কমিত্ৰা তেনেৰ কালেন সিক্খাপদানি পঞ্ঞপেন্তো ভগৰা ৰিহরতি সিক্খাপদপঞ্ঞত্তিহেতুঞ্চ অপেক্খমানো ততিযপারাজিকাদীসু ৰিযাতি.

অচ্চন্তমেৰ আরম্ভতো পট্ঠায যাৰ দেসনানিট্ঠানং পরহিতপটিপত্তিসঙ্খাতেন করুণাৰিহারেন. তদত্থজোতনত্থন্তি অচ্চন্তসংযোগত্থজোতনত্থং. উপযোগৰচননিদ্দেসো কতো যথা ‘‘মাসং অজ্ঝেতী’’তি.

পোরাণাতি অট্ঠকথাচরিযা. অভিলাপমত্তভেদোতি ৰচনমত্তেন ৰিসেসো. তেন সুত্তৰিনযেসু ৰিভত্তিব্যতযো কতোতি দস্সেতি.

সেট্ঠন্তি সেট্ঠৰাচকং ৰচনং সেট্ঠন্তি ৰুত্তং সেট্ঠগুণসহচরণতো. তথা উত্তমন্তি এত্থাপি. গারৰযুত্তোতি গরুভাৰযুত্তো গরুগুণযোগতো, গরুকরণারহতায ৰা গারৰযুত্তো.

ৰুত্তোযেৰ ন পন ইধ ৰত্তব্বো ৰিসুদ্ধিমগ্গস্স ইমিস্সা অট্ঠকথায একদেসভাৰতোতি অধিপ্পাযো.

অপিচ ভগে ৰনি, ৰমীতি ৰা ভগৰা, ভগে সীলাদিগুণে ৰনি ভজি সেৰি, তে ৰা ৰিনেয্যসন্তানেসু ‘‘কথং নু খো উপ্পজ্জেয্যু’’ন্তি ৰনি যাচি পত্থযীতি ভগৰা, ভগং ৰা সিরিং, ইস্সরিযং, যসঞ্চ ৰমি খেলপিণ্ডং ৰিয ছড্ডযীতি ভগৰা. তথা হি ভগৰা হত্থগতং সিরিং, চতুদ্দীপিস্সরিযং, চক্কৰত্তিসম্পত্তিসন্নিস্সযঞ্চ সত্তরতনসমুজ্জলং যসং অনপেক্খো পরিচ্চজীতি. অথ ৰা ভানি নাম নক্খত্তানি, তেহি সমং গচ্ছন্তি পৰত্তন্তীতি ভগা, সিনেরুযুগন্ধরাদিগতা ভাজনলোকসোভা. তে ভগৰা ৰমি তপ্পটিবদ্ধছন্দরাগপ্পহানেন পজহতীতি এৰম্পি ভগে ৰমীতি ভগৰা.

‘‘ধম্মসরীরং পচ্চক্খং করোতী’’তি ‘‘যো ৰো আনন্দ মযা ধম্মো চ ৰিনযো চ দেসিতো পঞ্ঞত্তো, সো ৰো মমচ্চযেন সত্থা’’তি ৰচনতো ধম্মস্স সত্থুভাৰপরিযাযো ৰিজ্জতীতি কত্ৰা ৰুত্তং.

ৰজিরসঙ্ঘাতসমানকাযো পরেহি অভেজ্জসরীরত্তা. ন হি ভগৰতো রূপকাযে কেনচি অন্তরাযো সক্কা কাতুন্তি. দেসনাসম্পত্তিং নিদ্দিসতি ৰক্খমানস্স সকলসুত্তস্স ‘‘এৰ’’ন্তি নিদ্দিসনতো. সাৰকসম্পত্তিং নিদ্দিসতি পটিসম্ভিদাপ্পত্তেন পঞ্চসু ঠানেসু ভগৰতা এতদগ্গে ঠপিতেন মযা মহাসাৰকেন সুতং, তঞ্চ খো মযাৰ সুতং, ন অনুস্সৰিতং, ন পরম্পরাভতন্তি ইমস্সত্থস্স দীপনতো. কালসম্পত্তিং নিদ্দিসতি ‘‘ভগৰা’’তি পদস্স সন্নিধানে পযুত্তস্স সময-সদ্দস্স কালস্স বুদ্ধুপ্পাদপটিমণ্ডিতভাৰদীপনতো. বুদ্ধুপ্পাদপরমা হি কালসম্পদা. তেনেতং ৰুচ্চতি –

‘‘কপ্পকসাযে কলিযুগে, বুদ্ধুপ্পাদো অহো মহচ্ছরিযং;

হুতাৰহমজ্ঝে জাতং, সমুদিতমকরন্দমরৰিন্দ’’ন্তি.

ভগৰাতি দেসকসম্পত্তিং নিদ্দিসতি গুণৰিসিট্ঠসত্তুত্তমগারৰাধিৰচনতো.

ৰিজ্জন্তরিকাযাতি ৰিজ্জুনিচ্ছরণক্খণে. অন্তরতোতি হদযে. অন্তরাতি আরব্ভ নিপ্ফত্তীনং ৰেমজ্ঝে. অন্তরিকাযাতি অন্তরাল়ে. এত্থ চ ‘‘তদন্তরং কো জানেয্য, এতেসং অন্তরা কপ্পা, গণনাতো অসঙ্খিযা, অন্তরন্তরা কথং ওপাতেতী’’তি চ আদীসু ৰিয কারণৰেমজ্ঝেসু ৰত্তমানা অন্তরা-সদ্দা এৰ উদাহরিতব্বা সিযুং, ন পন চিত্তখণৰিৰরেসু ৰত্তমানা অন্তরন্তরিকা-সদ্দা. অন্তরা-সদ্দস্স হি অযং অত্থুদ্ধারোতি. অযং পনেত্থ অধিপ্পাযো সিযা – যেসু অত্থেসু অন্তরা-সদ্দো ৰত্ততি, তেসু অন্তরসদ্দোপি ৰত্ততীতি সমানত্থত্তা অন্তরা-সদ্দত্থে ৰত্তমানো অন্তর-সদ্দো উদাহটো, অন্তরা-সদ্দো এৰ ৰা ‘‘যস্সন্তরতো’’তি এত্থ গাথাসুখত্থং রস্সং কত্ৰা ৰুত্তোতি দট্ঠব্বং. অন্তরা-সদ্দো এৰ পন ইক-সদ্দেন পদং ৰড্ঢেত্ৰা ‘‘অন্তরিকা’’তি ৰুত্তোতি এৰমেত্থ উদাহরণোদাহরিতব্বানং ৰিরোধাভাৰো দট্ঠব্বো. অযোজিযমানে উপযোগৰচনং ন পাপুণাতি সামিৰচনস্স পসঙ্গে অন্তরা-সদ্দযোগেন উপযোগৰচনস্স ইচ্ছিতত্তা. তেনেৰাহ ‘‘অন্তরাসদ্দেন যুত্তত্তা উপযোগৰচনং কত’’ন্তি.

‘‘নিযতো সম্বোধিপরাযণো, অট্ঠানমেতং ভিক্খৰে অনৰকাসো, যং দিট্ঠিসম্পন্নো পুগ্গলো সঞ্চিচ্চ পাণং জীৰিতা ৰোরোপেয্য, ‘‘নেতং ঠানং ৰিজ্জতী’’ তিআদিৰচনতো দিট্ঠিসীলানং নিযতসভাৰত্তা সোতাপন্নাপি অঞ্ঞমঞ্ঞং দিট্ঠিসীলসামঞ্ঞেন সংহতা, পগেৰ সকদাগামিআদযো. ‘‘তথারূপায দিট্ঠিযা দিট্ঠিসামঞ্ঞগতো ৰিহরতি, তথারূপেসু সীলেসু সীলসামঞ্ঞগতো ৰিহরতী’’তি ৰচনতো পুথুজ্জনানম্পি দিট্ঠিসীলসামঞ্ঞেন সংহতভাৰো লব্ভতিযেৰ.

সুপ্পিযোপি খোতি এত্থ খো-সদ্দো অৰধারণত্থো ‘‘অস্সোসি খো’’তিআদীসু ৰিয. তেন অদ্ধানমগ্গপটিপন্নো অহোসিযেৰ, নাস্স মগ্গপটিপত্তিযা কোচি অন্তরাযো অহোসীতি অযমত্থো দীপিতো হোতি. তত্রাতি ৰা কালস্স পটিনিদ্দেসো. সোপি হি ‘‘একং সময’’ন্তি পুব্বে অধিকতো. যঞ্হি সমযং ভগৰা অন্তরা রাজগহঞ্চ নাল়ন্দঞ্চ অদ্ধানমগ্গপটিপন্নো, তস্মিংযেৰ সমযে সুপ্পিযোপি তং মগ্গং পটিপন্নো অৰণ্ণং ভাসতি, ব্রহ্মদত্তো চ ৰণ্ণং ভাসতীতি. পরিযাযতি পরিৰত্ততীতি পরিযাযো, ৰারো. পরিযাযেতি দেসেতব্বমত্থং পটিপাদেতীতি পরিযাযো, দেসনা. পরিযাযতি অত্তনো ফলং পরিগ্গহেত্ৰা পৰত্ততীতি পরিযাযো, কারণন্তি এৰং পরিযায-সদ্দস্স ৰারাদীসু পৰত্তি ৰেদিতব্বা. কারণেনাতি কারণপতিরূপকেন. তথা হি ৰক্খতি ‘‘অকারণমেৰ কারণন্তি ৰত্ৰা’’তি. কস্মা পনেত্থ ‘‘অৰণ্ণং ভাসতী’’তি, ‘‘ৰণ্ণং ভাসতী’’তি চ ৰত্তমানকালনিদ্দেসো কতো, ননু সঙ্গীতিকালতো সো অৰণ্ণৰণ্ণানং ভাসিতকালো অতীতোতি? সচ্চমেতং, ‘‘অদ্ধানমগ্গপটিপন্নো হোতী’’তি এত্থ হোতি-সদ্দো ৰিয অতীতকালত্থো ভাসতি-সদ্দো চ দট্ঠব্বো. অথ ৰা যস্মিং কালে তেহি অৰণ্ণো ৰণ্ণো চ ভাসীযতি, তং অপেক্খিত্ৰা এৰং ৰুত্তং. এৰঞ্চ কত্ৰা ‘‘তত্রাতি কালস্স পটিনিদ্দেসো’’তি ইদঞ্চ ৰচনং সমত্থিতং হোতি.

অকারণন্তি অযুত্তিং, অনুপপত্তিন্তি অত্থো. ন হি অরসরূপতাদযো দোসা ভগৰতি সংৰিজ্জন্তি, ধম্মসঙ্ঘানঞ্চ দুরক্খাতদুপ্পটিপন্নতাদযোতি. অকারণন্তি ৰা যুত্তকারণরহিতং, পটিঞ্ঞামত্তন্তি অধিপ্পাযো. ইমস্মিঞ্চ অত্থে কারণন্তি ৰত্ৰাতি কারণং ৰাতি ৰত্ৰাতি অত্থো. অরসরূপাদীনঞ্চেত্থ জাতিৰুড্ঢেসু অভিৰাদনাদিসামীচিকম্মাকরণং কারণং, তথা উত্তরিমনুস্সধম্মালমরিযঞাণদস্সনাভাৰস্স সুন্দরিকামগুণাদিনৰবোধো, সংসারস্স আদিকোটিযা অপঞ্ঞাযনপটিঞ্ঞা, অব্যাকতৰত্থুব্যাকরণন্তি এৰমাদযো, তথা অসব্বঞ্ঞুতাদীনং কমাৰবোধাদযো যথারহং নিদ্ধারেতব্বা. তথা তথাতি জাতিৰুড্ঢানং অনভিৰাদনাদিআকারেন.

অৰণ্ণং ভাসমানোতি অৰণ্ণংভাসনহেতু. হেতুঅত্থো হি অযং মান-সদ্দো. অনযব্যসনং পাপুণিস্সতি একন্তমহাসাৰজ্জত্তা রতনত্তযোপৰাদস্স. তেনেৰাহ –

‘‘যো নিন্দিযং পসংসতি,

তং ৰা নিন্দতি যো পসংসিযো;

ৰিচিনাতি মুখেন সো কলিং,

কলিনা তেন সুখং ন ৰিন্দতী’’তি.

‘‘অম্হাকং আচরিযো’’তিআদিনা ব্রহ্মদত্তস্স সংৰেগুপ্পত্তিং, অত্তনো আচরিযে কারুঞ্ঞপ্পৰত্তিঞ্চ দস্সেত্ৰা কিঞ্চাপি অন্তেৰাসিনা আচরিযস্স অনুকূলেন ভৰিতব্বং, অযং পন পণ্ডিতজাতিকত্তা ন এদিসেসু তং অনুৰত্ততীতি, ইদানি তস্স কম্মস্সকতঞ্ঞাণপ্পৰত্তিং দস্সেন্তো ‘‘আচরিযে খো পনা’’তিআদিমাহ. ৰণ্ণং ভাসিতুং আরদ্ধো ‘‘অপিনামাযং এত্তকেনাপি রতনত্তযাৰণ্ণতো ওরমেয্যা’’তি. ৰণ্ণীযতীতি ৰণ্ণো, গুণো. ৰণ্ণনং গুণসঙ্কিত্তনন্তি ৰণ্ণো, পসংসা. সংঞ্ঞূল়্হাতি গন্থিতা, নিবন্ধিতাতি অত্থো. অতিত্থেন পক্খন্দো ধম্মকথিকোতি ন ৰত্তব্বো অপরিমাণগুণত্তা বুদ্ধাদীনং, নিরৰসেসানঞ্চ তেসং ইধ পকাসনং পাল়িসংৰণ্ণনাযেৰ সম্পজ্জতীতি. অনুস্সৰাদীতি এত্থ আদি-সদ্দেন আকারপরিৰিতক্কদিট্ঠিনিজ্ঝানক্খন্তিযো সঙ্গণ্হাতি. অত্তনো থামেন ৰণ্ণং অভাসি, ন পন বুদ্ধাদীনং গুণানুরূপন্তি অধিপ্পাযো. অসঙ্খ্যয্যাপরিমিতপ্পভেদা হি বুদ্ধাদীনং গুণা. ৰুত্তঞ্হেতং –

‘‘বুদ্ধোপি বুদ্ধস্স ভণেয্য ৰণ্ণং,

কপ্পম্পি চে অঞ্ঞমভাসমানো;

খীযেথ কপ্পো চিরদীঘমন্তরে,

ৰণ্ণো ন খীযেথ তথাগতস্সা’’তি.

ইধাপি ৰক্খতি ‘‘অপ্পমত্তকং খো পনেত’’ন্তিআদি.

ইতি হ তেতি এত্থ ইতীতি ৰুত্তপ্পকারপরামসনং. হ-কারো নিপাতমত্তন্তি আহ ‘‘এৰং তে’’তি.

ইরিযাপথানুবন্ধনেন অনুবন্ধা হোন্তি, ন পন সম্মাপটিপত্তিঅনুবন্ধনেনাতি অধিপ্পাযো. তস্মিং কালেতি যস্মিং সংৰচ্ছরে উতুম্হি মাসে পক্খে ৰা ভগৰা তং অদ্ধানমগ্গং পটিপন্নো, তস্মিং কালে. তেনেৰ হি কিরিযাৰিচ্ছেদদস্সনৰসেন ‘‘রাজগহে পিণ্ডায চরতী’’তি ৰত্তমানকালনিদ্দেসো কতো. সোতি এৰং রাজগহে ৰসমানো ভগৰা. তং দিৰসন্তি যং দিৰসং অদ্ধানমগ্গপটিপন্নো, তং দিৰসং. তং অদ্ধানং পটিপন্নো নাল়ন্দাযং ৰেনেয্যানং ৰিৰিধ হিতসুখনিপ্ফত্তিং আকঙ্খমানো ইমিস্সা চ অট্ঠুপ্পত্তিযা তিৰিধসীলালঙ্কতং নানাৰিধকুহনলপনাদিমিচ্ছাজীৰৰিদ্ধংসনং দ্ৰাসট্ঠিদিট্ঠিজালৰিনিৰেঠনং দসসহস্সিলোকধাতুপকম্পনং ব্রহ্মজালসুত্তন্তং দেসেস্সামীতি. এত্তাৰতা ‘‘কস্মা পন ভগৰা তং অদ্ধানং পটিপন্নো’’তি চোদনা ৰিসোধিতা হোতি. ‘‘কস্মা চ সুপ্পিযো অনুবন্ধো’’তি অযং পন চোদনা ‘‘ভগৰতো তং মগ্গং পটিপন্নভাৰং অজানন্তো’’তি এতেন ৰিসোধিতা হোতি. ন হি সো ভগৰন্তং দট্ঠুমেৰ ইচ্ছতীতি. তেনেৰাহ ‘‘সচে পন জানেয্য, নানুবন্ধেয্যা’’তি.

নীলপীতলোহিতোদাতমঞ্জিট্ঠপভস্সরৰসেন ‘‘ছব্বণ্ণরস্মিযো. ‘‘সমন্তা অসীতিহত্থপ্পমাণে’’তি তাসং রস্মীনং পকতিযা পৰত্তিট্ঠানৰসেন ৰুত্তং. ‘‘তস্মিং কির সমযে’’তি চ তস্মিং অদ্ধানগমনসমযে বুদ্ধসিরিযা অনিগূহিতভাৰদস্সনত্থং ৰুত্তং. ন হি তদা তস্সা নিগূহনে পক্কুসাতিঅভিগমনাদীসু ৰিয কিঞ্চিপি কারণং অত্থীতি. রতনাৰেল়ং রতনৰটংসকং. চীনপিট্ঠচুণ্ণং সিন্ধনচুণ্ণং.

ব্যামপ্পভাপরিক্খেপৰিলাসিনী চ অস্স ভগৰতো লক্খণমালাতি মহাপুরিসলক্খণানি অঞ্ঞমঞ্ঞপটিবদ্ধত্তা এৰমাহ. দ্ৰত্তিংসায চন্দমণ্ডলানং মালা কেনচি গন্থেত্ৰা ঠপিতা যদি সিযাতি পরিকপ্পনৰসেনাহ ‘‘গন্থেত্ৰা ঠপিতদ্ৰত্তিংসচন্দমালাযা’’তি. সিরিং অভিভৰন্তী ইৰাতি সম্বন্ধো. এস নযো সূরিযমালাযাতিআদীসুপি. মহাথেরাতি মহাসাৰকে সন্ধাযাহ. এৰং গচ্ছন্তং ভগৰন্তং ভিক্খূ চ দিস্ৰা অথ অত্তনো পরিসং অৰলোকেসীতি সম্বন্ধো. ‘‘যস্মা পনেসা’’তিআদিনা ‘‘কস্মা চ সো রতনত্তযস্স অৰণ্ণং ভাসতী’’তি চোদনং ৰিসোধেতি. ইতীতি এৰং, ৰুত্তপ্পকারেনাতি অত্থো. ইমেহি দ্ৰীহীতি লাভপরিৰারহানিং নিগমনৰসেন দস্সেতি. ভগৰতো ৰিরোধানুনযাভাৰৰীমংসনত্থং এতে অৰণ্ণং ৰণ্ণঞ্চ ভাসন্তীতি অপরে. ‘‘মারেন অন্ৰাৰিট্ঠা এৰং করোন্তী’’তি চ ৰদন্তি.

২. অম্বলট্ঠিকায অৰিদূরে ভৰত্তা উয্যানং অম্বলট্ঠিকা যথা ‘‘ৰরুণানগরং, গোদাগামো’’তি. কেচি পন ‘‘অম্বলট্ঠিকাতি যথাৰুত্তনযেনেৰ একগামো’’তি ৰদন্তি. তেসং মতে অম্বলট্ঠিকাযন্তি সমীপত্থে ভুম্মৰচনং. রাজাগারকং ৰেস্সৰণমহারাজদেৰাযতনন্তি একে. বহুপরিস্সযোতি বহুপদ্দৰো. ‘‘সদ্ধিং অন্তেৰাসিনা ব্রহ্মদত্তেন মাণৰেনা’’তি ৰুত্তং সীহল়ট্ঠকথাযং. তঞ্চ খো পাল়ি আরুল়্হৰসেনেৰ, ন পন তদা সুপ্পিযস্স পরিসায অভাৰতো. কস্মা পনেত্থ ব্রহ্মদত্তোযেৰ পাল়ি আরুল়্হো, ন সুপ্পিযস্স পরিসাতি? পযোজনাভাৰতো. যথা চেতং, এৰং অঞ্ঞম্পি এদিসং পযোজনাভাৰতো সঙ্গীতিকারেহি ন সঙ্গহিতন্তি দট্ঠব্বং. কেচি পন ‘‘ৰুত্তন্তি পাল়িযং ৰুত্ত’’ন্তি ৰদন্তি, তং ন যুজ্জতি পাল়িআরুল়্হৰসেন পাল়িযং ৰুত্তন্তি আপজ্জনতো. তস্মা যথাৰুত্তনযেনেৰেত্থ অত্থো গহেতব্বো. পরিৰারেত্ৰা নিসিন্নো হোতীতি সম্বন্ধো.

৩. কথাধম্মোতি কথাসভাৰো, কথাধম্মো উপপরিক্খাৰিধীতি কেচি. নীযতীতি নযো, অত্থো. সদ্দসত্থং অনুগতো নযো সদ্দনযো. তত্থ হি অনভিণ্হৰুত্তিকে অচ্ছরিয-সদ্দো ইচ্ছিতো. তেনেৰাহ ‘‘অন্ধস্স পব্বতারোহণং ৰিযা’’তি. অচ্ছরাযোগ্গন্তিঅচ্ছরিযন্তি নিরুত্তিনযো, সো পন যস্মা পোরাণট্ঠকথাযং আগতো, তস্মা আহ ‘‘অট্ঠকথানযোতি. যাৰঞ্চিদং সুপ্পটিৰিদিতাতি সম্বন্ধো, তস্স যত্তকং সুট্ঠু পটিৰিদিতা, তং এত্তকন্তি ন সক্কা অম্হেহি পটিৰিজ্ঝিতুং, অক্খাতুং ৰাতি অত্থো. তেনেৰাহ ‘‘তেন সুপ্পটিৰিদিততায অপ্পমেয্যতং দস্সেতী’’তি.

পকতত্থপটিনিদ্দেসো তং-সদ্দোতি তস্স ‘‘ভগৰতা’’তিআদীহি পদেহি সমানাধিকরণভাৰেন ৰুত্তস্স যেন অভিসম্বুদ্ধভাৰেন ভগৰা পকতো সুপাকটো চ হোতি, তং অভিসম্বুদ্ধভাৰং সদ্ধিং আগমনপটিপদায অত্থভাৰেন দস্সেন্তো ‘‘যো সো…পে… অভিসম্বুদ্ধো’’তি আহ. সতিপি ঞাণদস্সন-সদ্দানং ইধ পঞ্ঞাৰেৰচনভাৰে তেন তেন ৰিসেসেন নেসং সৰিসযৰিসেসপ্পৰত্তিদস্সনত্থং অসাধারণঞাণৰিসেসৰসেন ৰিজ্জত্তযৰসেন ৰিজ্জাভিঞ্ঞানাৰরণৰসেন সব্বঞ্ঞুতঞ্ঞাণমংসচক্খুৰসেন পটিৰেধদেসনাঞাণৰসেন চ তদত্থং যোজেত্ৰা দস্সেন্তো ‘‘তেসং তেস’’ন্তিআদিমাহ. তত্থ আসযানুসযং জানতাআসযানুসযঞাণেন. সব্বঞেয্যধম্মং পস্সতা সব্বঞ্ঞুতানাৰরণঞাণেহি.

পুব্বেনিৰাসাদীহীতি পুব্বেনিৰাসাসৰক্খযঞাণেহি. পটিৰেধপঞ্ঞাযাতি অরিযমগ্গপঞ্ঞায. অরীনন্তি কিলেসারীনং, পঞ্চৰিধমারানং ৰা, সাসনপচ্চত্থিকানং ৰা অঞ্ঞতিত্থিযানং, তেসং হননং পাটিহারিযেহি অভিভৰনং, অপ্পটিভানতাকরণং, অজ্ঝুপেক্খনঞ্চ. কেসিৰিনযসুত্তঞ্চেত্থ নিদস্সনং.

তথা ঠানাঠানাদীনি জানতা, যথাকম্মূপগে সত্তে পস্সতা, সৰাসনানং আসৰানং খীণত্তা অরহতা, অভিঞ্ঞেয্যাদিভেদে ধম্মে অভিঞ্ঞেয্যাদিতো অৰিপরীতাৰবোধতো সম্মাসম্বুদ্ধেন. অথ ৰা তীসু কালেসু অপ্পটিহতঞাণতায জানতা, তিণ্ণম্পি কম্মানং ঞাণানুপরিৰত্তিতো নিসম্মকারিতায পস্সতা, দৰাদীনম্পি অভাৰসাধিকায পহানসম্পদায অরহতা, ছন্দাদীনং অহানিহেতুভূতায অপরিক্খযপটিভানসাধিকায সব্বঞ্ঞুতায সম্মাসম্বুদ্ধেনাতি এৰং দসবলট্ঠারসাৰেণিকবুদ্ধধম্মেহিপি যোজনা ৰেদিতব্বা.

যদিপি হীনকল্যাণভেদেন দুৰিধাৰ অধিমুত্তি পাল়িযং ৰুত্তা, পৰত্তিআকারৰসেন পন অনেকভেদভিন্নাতি আহ ‘‘নানাধিমুত্তিকতা’’তি. সা পন অধিমুত্তি অজ্ঝাসযধাতু, তদপি তথা তথা দস্সনং খমনং রোচনঞ্চাতি আহ ‘‘নানাজ্ঝাসযতা…পে… রুচিতা’’তি. নানাধিমুত্তিকতঞাণেনাতি চেত্থ সব্বঞ্ঞুতঞাণং অধিপ্পেতং, ন দসবলঞাণন্তি আহ ‘‘সব্বঞ্ঞুতঞাণেনা’’তি. ইতি হ মেতি এত্থ এৰং-সদ্দত্থো ইতি-সদ্দো, হ-কারো নিপাতমত্তং সরলোপো চ কতোতি দস্সেতুং ৰুত্তং ‘‘এৰং ইমে’’তি.

৪. অরহত্তমগ্গেন সমুগ্ঘাতং কতং, যতো ‘‘নত্থি অব্যাৰটমনো’’তি বুদ্ধধম্মেসু ৰুচ্চতি. ৰীতিনামেত্ৰা ফলসমাপত্তীহি. নিৰাসেত্ৰা ৰিহারনিৰাসনপরিৰত্তনৰসেন. ‘‘কদাচি এককো’’তিআদি তেসং তেসং ৰিনেয্যানং ৰিনযনানুকূলং ভগৰতো উপসঙ্কমদস্সনং. পাদনিক্খেপসমযে ভূমিযা সমভাৰাপত্তি সুপ্পতিট্ঠিতপাদতায নিস্সন্দফলং, ন ইদ্ধিনিম্মানং. ‘‘ঠপিতমত্তে দক্খিণপাদে’’তি বুদ্ধানং সব্বদক্খিণতায ৰুত্তং. অরহত্তে পতিট্ঠহন্তীতি সম্বন্ধো.

দুল্লভা সম্পত্তীতি সতিপি মনুস্সত্তপটিলাভে পতিরূপদেসৰাসইন্দ্রিযাৰেকল্লসদ্ধাপটিলাভাদযো গুণা দুল্লভাতি অত্থো. চাতুমহারাজিকভৰনন্তি চাতুমহারাজিকদেৰলোকে সুঞ্ঞৰিমানানি গচ্ছন্তীতি অত্থো. এস নযো তাৰতিংসভৰনাদীসুপি. কালযুত্তন্তি ইমিস্সা ৰেলায ইমস্স এৰং ৰত্তব্বন্তি তংতংকালানুরূপং. সমযযুত্তন্তি তস্সেৰ ৰেৰচনং, অট্ঠুপ্পত্তিঅনুরূপং ৰা. অথ ৰা সমযযুত্তন্তি হেতূদাহরণসহিতং. কালেন সাপদেসঞ্হি ভগৰা ধম্মং দেসেতি. উতুং গণ্হপেতি, ন পন মলং পক্খালেতীতি অধিপ্পাযো. ন হি ভগৰতো কাযে রজোজল্লং উপলিম্পতীতি.

কিলাসুভাৰো কিলমথো. সীহসেয্যং কপ্পেতি সরীরস্স কিলাসুভাৰমোচনত্থন্তি যোজেতব্বং. ‘‘বুদ্ধচক্খুনা লোকং ৰোলোকেতী’’তি ইদং পচ্ছিমযামে ভগৰতো বহুলআচিণ্ণৰসেন ৰুত্তং. অপ্পেকদা অৰসিট্ঠবলঞাণেহি সব্বঞ্ঞুতঞাণেন চ ভগৰা তমত্থং সাধেতীতি. ‘‘ইমে দিট্ঠিট্ঠানা’’তিআদিদেসনা সীহনাদো. তেসং ‘‘ৰেদনাপচ্চযা তণ্হা’’ তিআদিনা পচ্চযাকারং সমোধানেত্ৰা. ‘‘সিনেরুং উক্খিপন্তো ৰিয নভং পহরন্তো ৰিয চা’’তি ইদং ব্রহ্মজালদেসনায অনঞ্ঞসাধারণত্তা সুদুক্করতাদস্সনত্থং ৰুত্তং. এতন্তি ‘‘যেন, তেনা’’তি এতং পদদ্ৰযং. যেনাতি ৰা হেতুম্হি করণৰচনং, যেন কারণেন সো মণ্ডলমাল়ো উপসঙ্কমিতব্বো, তেন কারণেন উপসঙ্কমীতি অত্থো, কারণং পন ‘‘ইমে ভিক্খূ’’তিআদিনা অট্ঠকথাযং ৰুত্তংএৰ. কট্ঠন্তি নিসীদনযোগ্যং দারুক্খন্ধং.

পুরিমোতি ‘‘কতমায নু ভৰথা’’তি এৰং ৰুত্তো অত্থো. কা চ পন ৰোতি এত্থ চ-সদ্দো ব্যতিরেকে. তেন যথাপুচ্ছিতায কথায ৰক্খমানং ৰিপ্পকতভাৰং জোতেতি. পন-সদ্দো ৰচনালঙ্কারো. যায হি কথায তে ভিক্খূ সন্নিসিন্না, সা এৰ অন্তরাকথাভূতা ৰিপ্পকতা ৰিসেসেন পুন পুচ্ছীযতীতি. অঞ্ঞাতি অন্তরাসদ্দস্স অত্থমাহ. অঞ্ঞত্থে হি অযং অন্তরা-সদ্দো ‘‘ভূমন্তরং সমযন্তর’’ন্তিআদীসু ৰিয. অন্তরাতি ৰা ৰেমজ্ঝেতি অত্থো. ননু চ তেহি ভিক্খূহি সা কথা যথাধিপ্পাযং ‘‘ইতি হ মে’’তিআদিনা নিট্ঠপিতা যেৰাতি? ন নিট্ঠাপিতা ভগৰতো উপসঙ্কমনেন উপচ্ছিন্নত্তা. যদি হি ভগৰা তস্মিং খণে ন উপসঙ্কমেয্য ভিয্যোপি তপ্পটিবদ্ধাযেৰ কথা পৰত্তেয্যুং, ভগৰতো উপসঙ্কমনেন পন ন পৰত্তেসুং. তেনেৰাহ অযং খো…পে… অনুপ্পত্তো’’তি. কস্মা পনেত্থ ধম্মৰিনযসঙ্গহে করিযমানে নিদানৰচনং, ননু ভগৰতো ৰচনমেৰ সঙ্গহেতব্বন্তি? ৰুচ্চতেদেসনায ঠিতিঅসম্মোসসদ্ধেয্যভাৰসম্পাদনত্থং. কালদেসদেসকৰত্থুধম্মপটিগ্গাহকপটিবদ্ধা হি দেসনা চিরট্ঠিতিকা হোতি, অসম্মোসধম্মা সদ্ধেয্যা চ. দেসকালকত্তুসোতুনিমিত্তেহি উপনিবন্ধো ৰিয ৰোহারৰিনিচ্ছযো, তেনেৰ চাযস্মতা মহাকস্সপেন ‘‘ব্রহ্মজালং আৰুসো আনন্দ কত্থ ভাসিত’’ন্তিআদিনা দেসাদিপুচ্ছাসু কতাসু তাসং ৰিস্সজ্জনং করোন্তেন ধম্মভণ্ডাগারিকেন নিদানং ভাসিতন্তি তযিদমাহ ‘‘কাল…পে… নিদানং ভাসিত’’ন্তি.

অপিচ সত্থুসিদ্ধিযা নিদানৰচনং. তথাগতস্স হি ভগৰতো পুব্বরচনানুমানাগমতক্কাভাৰতো সম্মাসম্বুদ্ধত্তসিদ্ধি. সম্মাসম্বুদ্ধভাৰেন হিস্স পুব্বরচনাদীনং অভাৰো সব্বত্থ অপ্পটিহতঞাণচারতায, একপ্পমাণত্তা চ ঞেয্যধম্মেসু. তথা আচরিযমুট্ঠিধম্মমচ্ছরিযসত্থুসাৰকানুরোধাভাৰতো খীণাসৰত্তসিদ্ধি. খীণা সৰতায হিস্স আচরিযমুট্ঠিআদীনং অভাৰো, ৰিসুদ্ধা চ পরানুগ্গহপ্পৰত্তি. ইতি দেসকদোসভূতানং দিট্ঠিচারিত্তসম্পত্তিদূসকানং অৰিজ্জাতণ্হানং অভাৰসূচকেহি, ঞাণপ্পহানসম্পদাভি ব্যঞ্জনকেহি চ সম্বুদ্ধৰিসুদ্ধভাৰেহি পুরিমৰেসারজ্জদ্ৰযসিদ্ধি, ততো এৰ চ অন্তরাযিকনিয্যানিকধম্মেসু সম্মোহাভাৰসিদ্ধিতো পচ্ছিমৰেসারজ্জদ্ৰযসিদ্ধীতি ভগৰতো চতুৰেসারজ্জসমন্নাগমো, অত্তহিতপরহিতপ্পটিপত্তি চ পকাসিতা হোতি নিদানৰচনেন সম্পত্তপরিসায অজ্ঝাসযানুরূপং ঠানুপ্পত্তিকপ্পটিভানেন ধম্মদেসনাদীপনতো, ‘‘জানতা পস্সতা’’তিআদি ৰচনতো চ. তেন ৰুত্তং ‘‘সত্থুসিদ্ধিযা নিদানৰচন’’ন্তি.

তথা সত্থুসিদ্ধিযা নিদানৰচনং. ঞাণকরুণাপরিগ্গহিতসব্বকিরিযস্স হি ভগৰতো নত্থি নিরত্থিকা পৰত্তি, অত্তহিতত্থা ৰা, তস্মা পরেসংযেৰ অত্থায পৰত্তসব্বকিরিযস্স সম্মাসম্বুদ্ধস্স সকলম্পি কাযৰচীমনোকম্মং সত্থুভূতং, ন কব্যরচনাদিসাসনভূতং. তেন ৰুত্তং ‘‘সত্থুসিদ্ধিযা নিদানৰচন’’ন্তি. অপিচ সত্থুনো পমাণভূততাৰিভাৰনেন সাসনস্স পমাণভাৰসিদ্ধিযা নিদানৰচনং. ‘‘ভগৰতা’’তি হি ইমিনা তথাগতস্স গুণৰিসিট্ঠসত্তুত্তমাদিভাৰদীপনেন, ‘‘জানতা’’তিআদিনা আসযানুসযঞাণাদিপযোগদীপনেন চ অযমত্থো সাধিতো হোতি. ইদমেত্থ নিদানৰচনপযোজনস্স মুখমত্তদস্সনং. কো হি সমত্থো বুদ্ধানুবুদ্ধেন ধম্মভণ্ডাগারিকেন ভাসিতস্স নিদানস্স পযোজনানি নিরৰসেসতো ৰিভাৰেতুন্তি.

নিদানৰণ্ণনা নিট্ঠিতা.

৫. নিক্খিত্তস্সাতি দেসিতস্স. দেসনাপি হি দেসেতব্বস্স সীলাদিঅত্থস্স ৰিনেয্যসন্তানেসু নিক্খিপনতো ‘‘নিক্খেপো’’তি ৰুচ্চতি. তত্থ যথা অনেকসতঅনেকসহস্সভেদানিপি সুত্তন্তানি সংকিলেসভাগিযাদিসাসনপ্পট্ঠাননযেন সোল়সৰিধতং নাতিৰত্তন্তি, এৰং অত্তজ্ঝাসযাদিসুত্তনিক্খেপৰসেন চতুব্বিধভাৰন্তি আহ ‘‘চত্তারো সুত্তনিক্খেপা’’তি. কামঞ্চেত্থ অত্তজ্ঝাসযস্স, অট্ঠুপ্পত্তিযা চ পরজ্ঝাসযপুচ্ছাহি সদ্ধিং সংসগ্গভেদো সম্ভৰতি অজ্ঝাসযপুচ্ছানুসন্ধিসব্ভাৰতো, অত্তজ্ঝাসযঅট্ঠুপ্পত্তীনং পন অঞ্ঞমঞ্ঞং সংসগ্গো নত্থীতি নযিধ নিরৰসেসো ৰিত্থারনযো সম্ভৰতি, তস্মা ‘‘চত্তারো সুত্তনিক্খেপা’’তি ৰুত্তং. অথ ৰা যদিপি অট্ঠুপ্পত্তিযা অজ্ঝাসযেন সিযা সংসগ্গভেদো, তদন্তোগধত্তা পন সেসনিক্খেপানং মূলনিক্খেপৰসেন চত্তারোৰ দস্সিতাতি দট্ঠব্বং. সো পনাযং সুত্তনিক্খেপো সামঞ্ঞভাৰতো পঠমং ৰিচারেতব্বো, তস্মিং ৰিচারিতে যস্সা অট্ঠুপ্পত্তিযা ইদং সুত্তং নিক্খিত্তং, তস্সা ৰিভাগৰসেন ‘‘মমং ৰা ভিক্খৰে’’তিআদিনা (দী. নি. ১.৫, ৬), ‘‘অপ্পমত্তকং খো পনেত’’ন্তিআদিনা (দী. নি. ১.৭), ‘‘অত্থি ভিক্খৰে’’তিআদিনা (দী. নি. ১.২৮) চ পৰত্তানং সুত্তানং সুত্তপদেসানং ৰণ্ণনা ৰুচ্চমানা তংতংঅনুসন্ধিদস্সনসুখতায সুৰিঞ্ঞেয্যা হোতীতি আহ ‘‘সুত্তনিক্খেপং ৰিচারেত্ৰা ৰুচ্চমানা পাকটা হোতী’’তি.

‘‘সুত্তনিক্খেপা’’তিআদীসু নিক্খিপনং নিক্খেপো, সুত্তস্স নিক্খেপো সুত্তস্স কথনং সুত্তনিক্খেপো, সুত্তদেসনাতি অত্থো. নিক্খিপীযতীতি ৰা নিক্খেপো, সুত্তংযেৰ নিক্খেপো সুত্তনিক্খেপো. অত্তনো অজ্ঝাসযো অত্তজ্ঝাসযো, সো অস্স অত্থি সুত্তদেসনাকারণভূতোতি অত্তজ্ঝাসযো. অত্তনো অজ্ঝাসযো এতস্সাতি ৰা অত্তজ্ঝাসযো. পরজ্ঝাসযোতি এত্থাপি এসেৰ নযো. পুচ্ছায ৰসো পুচ্ছাৰসো, সো এতস্স অত্থীতি পুচ্ছৰসিকো. অরণীযতো অত্থো, সুত্তদেসনায ৰত্থু. অত্থস্স উপ্পত্তি অত্থুপ্পত্তি, অত্থুপ্পত্তিযেৰ অট্ঠুপ্পত্তি, সা এতস্স অত্থীতি অট্ঠুপ্পত্তিকো. অথ ৰা নিক্খিপীযতি সুত্তং এতেনাতি সুত্তনিক্খেপো, অত্তজ্ঝাসযাদি এৰ. এতস্মিং পন অত্থৰিকপ্পে অত্তনো অজ্ঝাসযো অত্তজ্ঝাসযো, পরেসং অজ্ঝাসযো পরজ্ঝাসযো, পুচ্ছীযতীতি পুচ্ছা, পুচ্ছিতব্বো অত্থো. সোতব্বৰসপ্পৰত্তং ধম্মপ্পটিগ্গাহকানং ৰচনং পুচ্ছাৰসিকা, তদেৰ নিক্খেপসদ্দাপেক্খায পুল্লিঙ্গৰসেন ৰুত্তং ‘‘পুচ্ছাৰসিকো’’তি. তথা অট্ঠুপ্পত্তিযেৰ ‘‘অট্ঠুপ্পত্তিকো’’তি এৰম্পেত্থ অত্থো ৰেদিতব্বো.

এত্থ চ পরেসং ইন্দ্রিযপরিপাকাদিকারণনিরপেক্খতা অত্তজ্ঝাসযস্স ৰিসুং নিক্খেপভাৰো যুত্তো. তেনেৰাহ ‘‘কেৰলং অত্তনো অজ্ঝাসযেনেৰ কথেতী’’তি. পরজ্ঝাসযপুচ্ছাৰসিকানং পন পরেসং অজ্ঝাসযপুচ্ছানং দেসনানিমিত্তভূতানং উপ্পত্তিযং পৰত্তিতানং কথং অট্ঠুপ্পত্তিযং অনৰরোধো, পুচ্ছাৰসিকঅট্ঠুপ্পত্তিকানং ৰা পরজ্ঝাসযানুরোধেন পৰত্তিতদেসনত্তা কথং পরজ্ঝাসযে অনৰরোধোতি ন চোদেতব্বমেতং. পরেসঞ্হি অভিনীহারপরিপুচ্ছাদিৰিনিমুত্তস্সেৰ সুত্তদেসনাকারণুপ্পাদস্স অট্ঠুপ্পত্তিভাৰেন গহিতত্তা পরজ্ঝাসযপুচ্ছাৰসিকানং ৰিসুং গহণং. তথা হি ধম্মদাযাদসুত্তাদীনং (ম. নি. ১.২৯) আমিসুপ্পাদাদিদেসনানিমিত্তং ‘‘অট্ঠুপ্পত্তী’’তি ৰুচ্চতি. পরেসং পুচ্ছং ৰিনা অজ্ঝাসযমেৰ নিমিত্তং কত্ৰা দেসিতো পরজ্ঝাসযো, পুচ্ছাৰসেন দেসিতো পুচ্ছাৰসিকোতি পাকটো যমত্থোতি. অত্তনো অজ্ঝাসযেনেৰ কথেসি ধম্মতন্তিঠপনত্থন্তি দট্ঠব্বং. সম্মপ্পধানসুত্তন্তহারকোতি অনুপুব্বেন নিদ্দিট্ঠানং সংযুত্তকে সম্মপ্পধানপটিসংযুত্তানং সুত্তানং আৰল়ি, তথা ইদ্ধিপাদহারকাদি.ৰিমুত্তিপরিপাচনীযা ধম্মা সদ্ধিন্দ্রিযাদযো. অভিনীহারন্তি পণিধানং.

ৰণ্ণাৰণ্ণেতি এত্থ ‘‘অচ্ছরিযং আৰুসো’’তিআদিনা ভিক্খুসঙ্ঘেন ৰুত্তো ৰণ্ণোপি সঙ্গহিতো, তং পন অট্ঠুপ্পত্তিং কত্ৰা ‘‘অত্থি ভিক্খৰে অঞ্ঞে চ ধম্মা’’তিআদিনা উপরি দেসনং আরভিস্সতীতি. ‘‘মমং ৰা ভিক্খৰে পরে ৰণ্ণং ভাসেয্যু’’ন্তি ইমিস্সা দেসনায ব্রহ্মদত্তেন ৰুত্তৰণ্ণো অট্ঠুপ্পত্তীতি কত্ৰা ৰুত্তং ‘‘অন্তেৰাসী ৰণ্ণং. ইতি ইমং ৰণ্ণাৰণ্ণং অট্ঠুপ্পত্তিং কত্ৰা’’তি. ৰা-সদ্দো উপমানসমুচ্চযসংসযৰৰস্সগ্গপদপূরণৰিকপ্পাদীসু বহূসু অত্থেসু দিস্সতি. তথা হেস ‘‘পণ্ডিতো ৰাপি তেন সো’’তিআদীসু (ধ. প. ৬৩) উপমানে দিস্সতি, সদিসভাৰেতি অত্থো. ‘‘তং ৰাপি ধীরা মুনি ৰেদযন্তী’’তিআদীসু (সু. নি. ২০৩) সমুচ্চযে, ‘‘কে ৰা ইমে, কস্স ৰা’’তিআদীসু (পারা. ২৯৬) সংসযে, ‘‘অযং ৰা ইমেসং সমণব্রাহ্মণানং সব্ববালো সব্বমূল়্হো’’তিআদীসু ৰৰস্সগ্গে, ‘‘ন ৰাযং কুমারকো মত্তমঞ্ঞাসী’’তিআদীসু (সং. নি. ২.১৫৪) পদপূরণে, ‘‘যে হি কেচি ভিক্খৰে সমণা ৰা ব্রাহ্মণা ৰা’’তিআদীসু (ম. নি. ১.১৭০) ৰিকপ্পে, ইধাযং ৰিকপ্পেযেৰাতি দস্সেন্তো আহ ‘‘ৰা-সদ্দো ৰিকপ্পনত্থো’’তি. পর-সদ্দো অত্থেৰ অঞ্ঞত্থে ‘‘অহঞ্চেৰ খো পন ধম্মং দেসেয্যং, পরে চ মে ন আজানেয্যু’’ন্তিআদীসু (দী. নি. ২.৬৪, ৬৫; ম. নি. ১.২৮১; ম. নি. ২.২২৩; সং. নি. ১.১৭২; মহাৰ. ৪, ৮) অত্থি অধিকে ‘‘ইন্দ্রিযপরোপরিযত্তঞাণ’’ন্তিআদীসু (পটি. ম. মাতিকা ৬৮, ১.১১১) অত্থি পচ্ছাভাগে ‘‘পরতো আগমিস্সতী’’তিআদীসু. অত্থি পচ্চনীকভাৰে ‘‘উপ্পন্নং পরপ্পৰাদং সহ ধম্মেন সুনিগ্গহিতং নিগ্গহেত্ৰা’’তিআদীসু (দী. নি. ২.১৬৮). ইধাপি পচ্চনীকভাৰেতি দস্সেন্তো আহ ‘‘পরেতি পটিৰিরুদ্ধা’’তি.

ঈদিসেসুপীতি এত্থ পি-সদ্দো সম্ভাৰনে, তেন রতনত্তযনিমিত্তম্পি অকুসলচিত্তপ্পৰত্তি ন কাতব্বা, পগেৰ ৰট্টামিসলোকামিসনিমিত্তন্তি দস্সেতি. সভাৰধম্মতো অঞ্ঞস্স কত্তুঅভাৰজোতনত্থং আহনতীতি কত্তুঅত্থে আঘাতসদ্দং দস্সেতি, তত্থ আহনতীতি হিংসতি ৰিবাধতি, উপতাপেতি চাতি অত্থো. আহনতি এতেন, আহননমত্তং ৰা আঘাতোতি করণভাৰত্থাপি সম্ভৰন্তিযেৰ. এৰং অৰযৰভেদনেন আঘাত-সদ্দস্স অত্থং ৰত্ৰা ইদানি তত্থ পরিযাযেনপি অত্থং দস্সেন্তো ‘‘কোপস্সেতং অধিৰচন’’ন্তি আহ. অযঞ্চ নযো ‘‘অপ্পচ্চযো অনভিরদ্ধী’’তিআদীসুপি যথাসম্ভৰং ৰত্তব্বো. অপ্পতীতা হোন্তি তেনাতি পাকটপরিযাযেন অপ্পচ্চয-সদ্দস্স অত্থদস্সনং, তংমুখেন পন ন পচ্চেতি তেনাতি অপ্পচ্চযোতি দট্ঠব্বং. অভিরাধযতীতি সাধযতি. দ্ৰীহীতি আঘাতঅনভিরদ্ধিপদেহি. একেনাতি অপ্পচ্চযপদেন. সেসানন্তি সঞ্ঞাৰিঞ্ঞাণক্খন্ধানং, সঞ্ঞাৰিঞ্ঞাণঅৰসিট্ঠসঙ্খারক্খন্ধসঙ্খাতানং ৰা. করণন্তি উপ্পাদনং. আঘাতাদীনঞ্হি পৰত্তিযা পচ্চযসমৰাযনং ইধ ‘‘করণ’’ন্তি ৰুত্তং, তং পন অত্থতো উপ্পাদনমেৰ. অনুপ্পাদনঞ্হি সন্ধায ভগৰতা ‘‘ন করণীযা’’তি ৰুত্তন্তি. পটিক্খিত্তমেৰ একুপ্পাদেকৰত্থুকেকারম্মণেকনিরোধভাৰতো.

তত্থাতি তস্মিং মনোপদোসে. তুম্হন্তি ‘‘তুম্হাক’’ন্তি ইমিনা সমানত্থো একো সদ্দো ‘‘যথা অম্হাক’’ন্তি ইমিনা সমানত্থো ‘‘অম্হ’’ন্তি অযং সদ্দো. যথাহ, ‘‘তস্মা হি অম্হং দহরা ন মিয্যরে’’তি (জা. ১.৯.৯৩, ৯৯). ‘‘অন্তরাযো’’তি ইদং মনোপদোসস্স অকরণীযতায কারণৰচনং. যস্মা তুম্হাকংযেৰ চ ভৰেয্য তেন কোপাদিনা পঠমজ্ঝানাদীনং অন্তরাযো, তস্মা তে কোপাদিপরিযাযেন ৰুত্তা আঘাতাদযো ন করণীযাতি অত্থো. তেন নাহং ‘‘সব্বঞ্ঞূ’’তি ইস্সরভাৰেন তুম্হে ততো নিৰারেমি, অথ খো ইমিনা নাম কারণেনাতি দস্সেতি. তং পন কারণৰচনং যস্মা আদীনৰৰিভাৰনং হোতি, তস্মা আহ ‘‘আদীনৰং দস্সেন্তো’’তি. ‘‘অপি নু তুম্হে’’তিআদিনা মনোপদোসো ন কালন্তরভাৰিনোযেৰ হিতসুখস্স অন্তরাযকরো, অথ খো তঙ্খণপ্পৰত্তিরহস্সপি হিতসুখস্স অন্তরাযকরোতি মনোপদোসে আদীনৰং দল়্হতরং কত্ৰা দস্সেতি. যেসং কেসঞ্চি ‘‘পরে’’তিআদীসু ৰিয ন পটিৰিরুদ্ধানংযেৰাতি অত্থো. তেনেৰাহ ‘‘কুপিতো’’তিআদি.

অন্ধতমন্তি অন্ধভাৰকরতমং. যন্তি যত্থ. ভুম্মত্থে হি এতং পচ্চত্তৰচনং. যস্মিং কালে কোধো সহতে নরং, অন্ধতমং তদা হোতীতি সম্বন্ধো. যন্তি ৰা কারণৰচনং, যস্মা কোধো উপ্পজ্জমানো নরং অভিভৰতি, তস্মা অন্ধতমং তদা হোতি, যদা কোধোতি অত্থো যংতংসদ্দানং একন্তসম্বন্ধিভাৰতো. অথ ৰা যন্তি কিরিযায পরামসনং. কোধো সহতেতি যদেতং কোধস্স সহনং অভিভৰনং, এতং অন্ধকারতমভৰনন্তি অত্থো. অথ ৰা যং নরং কোধো সহতে অভিভৰতি, তস্স অন্ধতমং তদা হোতি, ততো চ কুদ্ধো অত্থং ন জানাতি, কুদ্ধো ধম্মং ন পস্সতীতি. অন্তরতোতি অব্ভন্তরতো, চিত্ততো ৰা.

‘‘ইদঞ্চিদঞ্চ কারণ’’ন্তি ইমিনা সব্বঞ্ঞূ এৰ অম্হাকং সত্থা অৰিপরীতধম্মদেসনত্তা, স্ৰাক্খাতো ধম্মো একন্তনিয্যানিকত্তা, সুপ্পটিপন্নো সঙ্ঘো সংকিলেসরহিতত্তাতি ইমমত্থং দস্সেতি. ‘‘ইদঞ্চিদঞ্চ কারণ’’ন্তি এতেন চ ‘‘ন সব্বঞ্ঞূ’’তিআদিৰচনং অভূতং অতচ্ছন্তি নিব্বেঠিতং হোতি. দুতিযং পদন্তি ‘‘অতচ্ছ’’ন্তি পদং. পঠমস্সাতি ‘‘অভূত’’ন্তি পদস্স. চতুত্থঞ্চাতি ‘‘ন চ পনেতং অম্হেসু সংৰিজ্জতী’’তি পদং. ততিযস্সাতি ‘‘নত্থি চেতং অম্হেসূ’’তি পদস্স. অৰণ্ণেযেৰাতি কারণপতিরূপকং ৰত্ৰা দোসপতিট্ঠাপনৰসেন নিন্দনে এৰ. ন সব্বত্থাতি কেৰলং অক্কোসনখুংসনৰম্ভনাদীসু ন একন্তেন নিব্বেঠনং কাতব্বন্তি অত্থো. ৰুত্তমেৰত্থং ‘‘যদি হী’’তিআদিনা পাকটং কত্ৰা দস্সেতি.

৬. আনন্দন্তি পমোদন্তি এতেন ধম্মেন তংসমঙ্গিনো সত্তাতি আনন্দ-সদ্দস্স করণত্থতং দস্সেতি. সোভনং মনো অস্সাতি সুমনো, সোভনং ৰা মনো সুমনো, তস্স ভাৰো সোমনস্সন্তি তদঞ্ঞধম্মানম্পি সম্পযুত্তানং সোমনস্সভাৰো আপজ্জতীতি? নাপজ্জতি রুল়্হীসদ্দত্তা যথা ‘‘পঙ্কজ’’ন্তি দস্সেন্তো ‘‘চেতসিকসুখস্সেতং অধিৰচন’’ন্তি আহ. উব্বিলযতীতি উব্বিলং, ভিন্দতি পুরিমাৰত্থায ৰিসেসং আপজ্জতীতি অত্থো. উব্বিলমেৰ উব্বিলাৰিতং, তস্স ভাৰো উব্বিলাৰিতত্তং. যায উপ্পন্নায কাযচিত্তং ৰাতপূরিতভস্তা ৰিয উদ্ধুমাযনাকারপ্পত্তং হোতি, তস্সা গেহস্সিতায ওদগ্গিযপীতিযা এতং অধিৰচনং. তেনেৰাহ ‘‘উদ্ধচ্চাৰহাযা’’তিআদি. ইধাপি ‘‘কিঞ্চাপি তেসং ভিক্খূনং উব্বিলাৰিতমেৰ নত্থি, অথ খো আযতিং কুলপুত্তানং এদিসেসুপি ঠানেসু অকুসলুপ্পত্তিং পটিসেধেন্তো ধম্মনেত্তিং ঠপেতী’’তি, ‘‘দ্ৰীহি পদেহি সঙ্খারক্খন্ধো, একেন ৰেদনাক্খন্ধো ৰুত্তো’’তি এত্থ ‘‘তেসং ৰসেন সেসানম্পি সম্পযুত্তধম্মানং করণং পটিক্খিত্তমেৰা’’তি চ অট্ঠকথাযং, ‘‘পি-সদ্দো সম্ভাৰনে’’তিআদিনা ইধ চ ৰুত্তনযেন অত্থো যথাসম্ভৰং ৰেদিতব্বো. ‘‘তুম্হংযেৰস্স তেন অন্তরাযো’’তি এত্থাপি ‘‘অন্তরাযোতি ইদ’’ন্তিআদিনা হেট্ঠা অৰণ্ণপক্খে ৰুত্তনযেন অত্থো ৰেদিতব্বো.

কস্মা পনেতন্তি চ ৰক্খমানংযেৰ অত্থং মনসি কত্ৰা চোদেতি. আচরিযো ‘‘সচ্চং ৰণ্ণিত’’ন্তি তমত্থং পটিজানিত্ৰা ‘‘তং পন নেক্খম্মনিস্সিত’’ন্তিআদিনা পরিহরতি. তত্থ এতন্তি আনন্দাদীনং অকরণীযতাৰচনং. ননু ভগৰতা ৰণ্ণিতন্তি সম্বন্ধো. কসিণেনাতি কসিণতায সকলভাৰেন. কেচি পন ‘‘জম্বুদীপস্সাতি করণে সামিৰচন’’ন্তি ৰদন্তি, তেসং মতেন কসিণজম্বুদীপ-সদ্দানং সমানাধিকরণভাৰো দট্ঠব্বো. তস্মাতি যস্মা গেহস্সিতপীতিসোমনস্সং ঝানাদীনং অন্তরাযকরং, তস্মা. ৰুত্তঞ্হেতং ভগৰতা ‘‘সোমনস্সং পাহং দেৰানং ইন্দ দুৰিধেন ৰদামি সেৰিতব্বম্পি অসেৰিতব্বম্পী’’তি (দী. নি. ২.৩৫৯). ‘‘অযঞ্হী’’তিআদি যেন সম্পযুত্তা পীতি অন্তরাযকরী, তং দস্সনত্থং ৰুত্তং. তত্থ ‘‘ইদঞ্হি লোভসহগতং পীতিসোমনস্স’’ন্তি ৰত্তব্বং সিযা, পীতিগ্গহণেন পন সোমনস্সম্পি গহিতমেৰ হোতি সোমনস্সরহিতায পীতিযা অভাৰতোতি পীতিযেৰ গহিতাতি দট্ঠব্বং. অথ ৰা সেৰিতব্বাসেৰিতব্বৰিভাগৰচনতো সোমনস্সস্স পাকটো অন্তরাযকরভাৰো, ন তথা পীতিযাতি পীতিযেৰ লোভসহগতত্তেন ৰিসেসেত্ৰা ৰুত্তা. ‘‘লুদ্ধো অত্থ’’ন্তিআদিগাথানং ‘‘কুদ্ধো অত্থ’’ন্তিআদি গাথাসু ৰিয অত্থো দট্ঠব্বো.

‘‘মমং ৰা ভিক্খৰে পরে ৰণ্ণং ভাসেয্যুং, ধম্মস্স ৰা ৰণ্ণং ভাসেয্যুং, সঙ্ঘস্স ৰা ৰণ্ণং ভাসেয্যুং, তত্র চে তুম্হে অস্সথ আনন্দিনো সুমনা উব্বিলাৰিতা, অপি নু তুম্হে পরেসং সুভাসিতদুব্ভাসিতং আজানেয্যাথাতি. নো হেতং ভন্তে’’তি অযং ততিযৰারো, সো দেসনাকালে নীহরিত্ৰা দেসেতব্বপুগ্গলাভাৰতো দেসনায অনাগতোপি তদত্থসম্ভৰতো অত্থতো আগতোযেৰাতি দট্ঠব্বো যথা তং কথাৰত্থুপকরণং ৰিত্থারৰসেনাতি অধিপ্পাযো. ‘‘অত্থতো আগতো যেৰা’’তি এতেন সংৰণ্ণনাকালে তথা বুজ্ঝনকসত্তানং ৰসেন সো ৰারো আনেত্ৰা ৰত্তব্বোতি দস্সেতি. ‘‘যথেৰ হী’’তিআদিনা তমেৰত্থসম্ভৰং ৰিভাৰেতি. ৰুত্তনযেনাতি ‘‘তত্র তুম্হেহীতি তস্মিং ৰণ্ণে তুম্হেহী’’তিআদিনা, ‘‘দুতিযং পদং পঠমস্স পদস্স, চতুত্থঞ্চ ততিযস্স ৰেৰচন’’ন্তিআদিনা চ ৰুত্তনযেন.

চূল়সীলৰণ্ণনা

৭. নিৰত্তো অমূলকত্তা ৰিস্সজ্জেতব্বতাভাৰতো. অনুৰত্ততিযেৰ ৰিস্সজ্জেতব্বতায অধিকতভাৰতো. অনুসন্ধিং দস্সেস্সতি ‘‘অত্থি ভিক্খৰে’’তিআদিনা. ওরন্তি ৰা অপরভাগো ‘‘ওরতো ভোগং, ওরং পার’’ন্তিআদীসু ৰিয. অথ ৰা হেট্ঠাঅত্থো ওর-সদ্দো ‘‘ওরং আগমনায যে পচ্চযা, তে ওরম্ভাগিযানি সংযোজনানী’’তিআদীসু ৰিয. সীলঞ্হি সমাধিপঞ্ঞাযো অপেক্খিত্ৰা অপরভাগো, হেট্ঠাভূতঞ্চ হোতীতি. সীলমত্তকন্তি এত্থ মত্ত-সদ্দো অপ্পকত্থো ৰা ‘‘ভেসজ্জমত্তা’’তিআদীসু (দী. নি. ১.৪৪৭) ৰিয. ৰিসেসনিৰত্তিঅত্থো ৰা ‘‘অৰিতক্কৰিচারমত্তা ধম্মা (ধ. স. তিকমাতিকা ৬), মনোমত্তা ধাতু মনোধাতূ’’তি চ আদীসু ৰিয. ‘‘অপ্পমত্তকং, ওরমত্তক’’ন্তি পদদ্ৰযেন সামঞ্ঞতো ৰুত্তোযেৰ হি অত্থো সীলমত্তকন্তি ৰিসেসৰসেন ৰুত্তো. অথ ৰা সীলেনপি তদেকদেসস্সেৰ সঙ্গহণত্থং অপ্পকত্থৰাচকো, ৰিসেসনিৰত্তিঅত্থো এৰ ৰা ‘‘সীলমত্তক’’ন্তি এত্থ মত্ত-সদ্দো ৰুত্তো. তথা হি ইন্দ্রিযসংৰরপচ্চযসন্নিস্সিতসীলানি ইধ দেসনং অনারুল়্হানি. ন হি তানি পাতিমোক্খআজীৰপারিসুদ্ধিসীলানি ৰিয সব্বপুথুজ্জনেসু পাকটানীতি. ‘‘উস্সাহং কত্ৰা’’তি এতেন ‘‘ৰদমানো’’তি এত্থ সত্তিঅত্থং মান-সদ্দং দস্সেতি.

অলঙ্করণং ৰিভূসনং অলঙ্কারো, কুণ্ডলাদিপসাধনং ৰা. ঊনট্ঠানপূরণং মণ্ডনং. মণ্ডনেতি মণ্ডনহেতু. অথ ৰা মণ্ডতীতি মণ্ডনো, মণ্ডনজাতিকো পুরিসো. বহুৰচনত্থে চ ইদং একৰচনং, মণ্ডনসীলেসূতি অত্থো. পরিপূরকারীতি এত্থ ইতি-সদ্দো আদিঅত্থো, পকারত্থো ৰা, তেন সকলম্পি সীলথোমন সুত্তং দস্সেতি. চন্দনন্তি চন্দনসহচরণতো চন্দনগন্ধো, তথা তগরাদীসুপি. সতঞ্চ গন্ধোতি এত্থ গন্ধো ৰিযাতি গন্ধোতি ৰুত্তো সীলনিবন্ধনো থুতিঘোসো. সীলঞ্হি কিত্তিযা নিমিত্তং. যথাহ ‘‘সীলৰতো সীলসম্পন্নস্স কল্যাণো কিত্তিসদ্দো অব্ভুগ্গচ্ছতী’’তি (দী. নি. ২.১৫০; অ. নি. ৫.২১৩; মহাৰ. ২৮৫). পৰাযতীতি পকাসতি. গন্ধাৰ গন্ধজাতা.

‘‘অপ্পকং বহুক’’ন্তি ইদং পারাপারং ৰিয অঞ্ঞমঞ্ঞং উপনিধায ৰুচ্চতীতি আহ ‘‘উপরিগুণে উপনিধাযা’’তি. সীলঞ্হীতি এত্থ হি-সদ্দো হেতুঅত্থো, তেন ইদং দস্সেতি ‘‘যস্মা সীলং কিঞ্চাপি পতিট্ঠাভাৰেন সমাধিস্স বহুকারং, পভাৰাদিগুণৰিসেসে পনস্স উপনিধায কলম্পি ন উপেতি, তথা সমাধি চ পঞ্ঞাযা’’তি. তেনেৰাহ ‘‘তস্মা’’তিআদি. ইদানি ‘‘কথ’’ন্তি পুচ্ছিত্ৰা সমাধিস্স আনুভাৰং ৰিত্থারতো ৰিভাৰেতি. ‘‘অভি…পে… মূলে’’তি ইদং যমকপাটিহারিযস্স সুপাকটভাৰদস্সনত্থং, অঞ্ঞেহি বোধিমূলঞাতিসমাগমাদীসু কতপাটিহারিযেহি ৰিসেসনত্থঞ্চ ৰুত্তং. যমকপাটিহারিযকরণত্থায হি ভগৰতো চিত্তে উপ্পন্নে তদনুচ্ছৰিকং ঠানং ইচ্ছিতব্বন্তি রতনমণ্ডপাদি সক্কস্স দেৰরঞ্ঞো আণায ৰিস্সকম্মুনা নিম্মিতন্তি ৰদন্তি, ভগৰতাৰ নিম্মিতন্তি অপরে. ‘‘যো কোচি এৰরূপং পাটিহারিযং কাতুং সমত্থো অত্থি চে, আগচ্ছতূ’’তি চোদনাসদিসত্তা ৰুত্তং ‘‘অত্তাদানপরিদীপন’’ন্তি. তত্থ অত্তাদানং অনুযোগো, তিত্থিযানং তথা কাতুং অসমত্থত্তা, ‘‘করিস্সামা’’তি পুব্বে উট্ঠিতত্তা তিত্থিযপরিমদ্দনং.

উপরিমকাযতোতিআদি পটিসম্ভিদামগ্গে (পটি. ম. ১.১১৬).

তত্থাযং পাল়িসেসো –

‘‘হেট্ঠিমকাযতো অগ্গিক্খন্ধো পৰত্ততি, উপরিমকাযতো উদকধারা পৰত্ততি. পুরত্থিমকাযতো অগ্গি, পচ্ছিমকাযতো উদকং. পচ্ছিমকাযতো অগ্গি, পুরত্থিমকাযতো উদকং. দক্খিণঅক্খিতো অগ্গি, ৰামঅক্খিতো উদকং. ৰামঅক্খিতো অগ্গি, দক্খিণঅক্খিতো উদকং. দক্খিণকণ্ণসোততো অগ্গি, ৰামকণ্ণসোততো উদকং. ৰামকণ্ণসোততো অগ্গি, দক্খিণকণ্ণসোততো উদকং. দক্খিণনাসিকাসোততো অগ্গি, ৰামনাসিকাসোততো উদকং. ৰামনাসিকাসোততো অগ্গি, দক্খিণনাসিকাসোততো উদকং. দক্খিণঅংসকূটতো অগ্গি, ৰামঅংসকূটতো উদকং. ৰামঅংসকূটতো অগ্গি, দক্খিণঅংসকূটতো উদকং. দক্খিণহত্থতো অগ্গি, ৰামহত্থতো উদকং. ৰামহত্থতো অগ্গি, দক্খিণহত্থতো উদকং. দক্খিণপস্সতো অগ্গি, ৰামপস্সতো উদকং. ৰামপস্সতো অগ্গি, দক্খিণপস্সতো উদকং. দক্খিণপাদতো অগ্গি, ৰামপাদতো উদকং. ৰামপাদতো অগ্গি, দক্খিণপাদতো উদকং. অঙ্গুলঙ্গুলেহি অগ্গি, অঙ্গুলন্তরিকাহি উদকং. অঙ্গুলন্তরিকাহি অগ্গি, অঙ্গুলঙ্গুলেহি উদকং. একেকলোমতো অগ্গি, একেকলোমতো উদকং. লোমকূপতো লোমকূপতো অগ্গিক্খন্ধো পৰত্ততি, লোমকূপতো লোমকূপতো উদকধারা পৰত্ততী’’তি (পটি. ম. ১.১১৬).

অট্ঠকথাযং পন ‘‘একেকলোমকূপতো’’তি আগতং.

‘‘ছন্নং ৰণ্ণানন্তি আদিনযপ্পৰত্ত’’ন্তি এত্থাপি নীলানং পীতকানং লোহিতকানং ওদাতানং মঞ্জিট্ঠানং পভস্সরানন্তি অযং পাল়িসেসো. ‘‘সুৰণ্ণৰণ্ণা রস্মিযো’’তি ইদং তাসং যেভুয্যতায ৰুত্তং. ৰিত্থারেতব্বন্তি এত্থাপি ‘‘সত্থা তিট্ঠতি, নিম্মিতো চঙ্কমতি ৰা নিসীদতি ৰা সেয্যং ৰা কপ্পেতী’’তিআদিনা চতূসু ইরিযাপথেসু একেকমূলকা সত্থুৰসেন চত্তারো, নিম্মিতৰসেন চত্তারোতি সব্বেৰ অট্ঠ ৰারে ৰিত্থারেতব্বং.

মধুপাযাসন্তি মধুসিত্তং পাযাসং. অত্তা মিত্তো মজ্ঝত্তো ৰেরীতি চতূসু সীমসম্ভেদৰসেন চতুরঙ্গসমন্নাগতং মেত্তাকম্মট্ঠানং. ‘‘চতুরঙ্গসমন্নাগত’’ন্তি ইদং পন ‘‘ৰীরিযাধিট্ঠান’’ন্তি এতেনাপি যোজেতব্বং. তত্থ ‘‘কামং তচো চ ন্হারু চা’’তিআদিপাল়ি (ম. নি. ২.১৮৪; সং. নি. ২.২২; অ. নি. ২.৫; অ. নি. ৮.১৩; মহানি. ১৯৬) ৰসেন চতুরঙ্গসমন্নাগততা ৰেদিতব্বা. ‘‘কিচ্ছং ৰতাযং লোকো আপন্নো’’তিআদিনা (দী. নি. ২.৫৭; সং. নি. ২.৪) জরামরণমুখেন পচ্চযাকারে ঞাণং ওতারেত্ৰা. আনাপানচতুত্থজ্ঝানন্তি এত্থাপি ‘‘সব্ববুদ্ধানং আচিণ্ণ’’ন্তি পদং ৰিভত্তিৰিপরিণামং কত্ৰা যোজেতব্বং. তম্পি হি সব্ববুদ্ধানং আচিণ্ণমেৰাতি ৰদন্তি. ছত্তিংসকোটিসতসহস্সমুখেন মহাৰজিরঞাণগব্ভং গণ্হাপেন্তো ৰিপস্সনংৰড্ঢেত্ৰা. দ্ৰত্তিংসদোণগণ্হনপ্পমাণং কুণ্ডং কোলম্বো. দরিভাগো কন্দরো. চক্কৰাল়পাদেসু মহাসমুদ্দো চক্কৰাল়মহাসমুদ্দো.

‘‘দুৰে পুথুজ্জনা’’তিআদি পুথুজ্জনে লব্ভমানৰিভাগদস্সনত্থং ৰুত্তং, ন মূলপরিযাযৰণ্ণনাদীসু ৰিয পুথুজ্জনৰিসেসনিদ্ধারণত্থং. সব্বোপি হি পুথুজ্জনো ভগৰতো উপরি গুণে ৰিভাৰেতুং ন সক্কোতি, তিট্ঠতু পুথুজ্জনো, সাৰকপচ্চেকবুদ্ধানম্পি অৰিসযা বুদ্ধগুণা. তথা হি ৰক্খতি ‘‘সোতাপন্না’’তিআদি (দী. নি. অট্ঠ. ১.৮). ৰাচুগ্গতকরণং উগ্গহো. অত্থপরিপুচ্ছনং পরিপুচ্ছা. অট্ঠকথাৰসেন অত্থস্স সৰনং সৰনং. ব্যঞ্জনত্থানং সুনিক্খেপসুদস্সনেন ধম্মস্স পরিহরণং ধারণং. এৰং সুতধাতপরিচিতানং মনসানুপেক্খনং পচ্চৰেক্খণং. বহূনং নানপ্পকারানং কিলেসানং সক্কাযদিট্ঠিযা চ অৰিহতত্তা তা জনেন্তি, তাহি ৰা জনিতাতি পুথুজ্জনা. অৰিঘাতমেৰ ৰা জন-সদ্দো ৰদতি. পুথু সত্থারানং মুখুল্লোকিকাতি এত্থ পুথূ জনা সত্থুপটিঞ্ঞা এতেসন্তি পুথুজ্জনাতি ৰচনত্থো. পুথু…পে… অৰুট্ঠিতাতি এত্থ জনেতব্বা, জাযন্তি ৰা এত্থাতি জনা, গতিযো. পুথূ জনা এতেসন্তি পুথুজ্জনা. ইতো পরে জাযন্তি এতেহীতি জনা, অভিসঙ্খারাদযো. তে এতেসং পুথূ ৰিজ্জন্তীতি পুথুজ্জনা. অভিসঙ্খরণাদি অত্থো এৰ ৰা জন-সদ্দো দট্ঠব্বো. কামরাগভৰরাগদিট্ঠিঅৰিজ্জা ওঘা. রাগগ্গিআদযো সন্তাপা. তেযেৰ, সব্বেপি ৰা কিলেসা পরিল়াহা. পুথু পঞ্চসু কামগুণেসু রত্তাতি এত্থ জাযতীতি জনো, রাগো গেধোতি এৰং আদিকো. পুথু জনো এতেসন্তি পুথুজ্জনা, পুথূসু ৰা জনা জাতা রত্তাতি এৰং রাগাদিঅত্থো এৰ ৰা জন-সদ্দো দট্ঠব্বো. পলিবুদ্ধাতি সম্বুদ্ধা, উপদ্দুতা ৰা. ‘‘পুথূনং গণনপথমতীতান’’ন্তিআদিনা পুথূ জনা পুথুজ্জনাতি দস্সেতি.

যেহি গুণৰিসেসেহি নিমিত্তভূতেহি ভগৰতি তথাগত-সদ্দো পৰত্তো, তংদস্সনত্থং ‘‘অট্ঠহি কারণেহি ভগৰা তথাগতো’’তিআদিমাহ. গুণনেমিত্তকানেৰ হি ভগৰতো সব্বানি নামানি. যথাহ –

‘‘অসঙ্খ্যেয্যানি নামানি, সগুণেন মহেসিনো;

গুণেন নামমুদ্ধেয্যং, অপি নামসহস্সতো’’তি. (ধ. স. অট্ঠ. ১৩১৩; উদা. অট্ঠ. ৫৩; পটি. ম. অট্ঠ. ১.১.৭৬);

তথা আগতোতি এত্থ আকারনিযমনৰসেন ওপম্মসম্পটিপাদনত্থো তথা-সদ্দো. সামঞ্ঞজোতনায ৰিসেসাৰট্ঠানতো পটিপদাগমনত্থো আগত-সদ্দো, ন ঞাণগমনত্থো ‘‘তথলক্খণং আগতো’’তিআদীসু (দী. নি. অট্ঠ. ১.৭; ম. নি. অট্ঠ. ১.১২; সং. নি. অট্ঠ. ২.৪.৭৮; অ. নি. অট্ঠ. ১.১.১৭০; উদা. অট্ঠ. ১৮; পটি. ম. অট্ঠ. ১.১.৩৭; থেরগা. অট্ঠ. ১.৩; ইতিৰু. অট্ঠ. ৩৮; মহানি. অট্ঠ. ১৪) ৰিয, নাপি কাযগমনাদিঅত্থো ‘‘আগতো খো মহাসমণো, মাগধানং গিরিব্বজ’’ন্তিআদীসু (মহাৰ. ৬২) ৰিয. তত্থ যদাকারনিযমনৰসেন ওপম্মসম্পটিপাদনত্থো তথা-সদ্দো, তং করুণাপধানত্তা মহাকরুণামুখেন পুরিমবুদ্ধানং আগমনপটিপদং উদাহরণৰসেন সামঞ্ঞতো দস্সেন্তো যংতংসদ্দানং একন্তসম্বন্ধভাৰতো ‘‘যথা সব্বলোক…পে… আগতা’’তি আহ. তং পন পটিপদং মহাপদানসুত্তাদীসু (দী. নি. ২.৪) সম্বহুলনিদ্দেসেন সুপাকটানং আসন্নানঞ্চ ৰিপস্সীআদীনং ছন্নং সম্মাসম্বুদ্ধানং ৰসেন নিদস্সেন্তো ‘‘যথা ৰিপস্সী ভগৰা’’তিআদিমাহ. তত্থ যেন অভিনীহারেনাতি মনুস্সত্তলিঙ্গসম্পত্তিহেতুসত্থারদস্সনপব্বজ্জাঅভিঞ্ঞাদিগুণসম্পত্তিঅধিকারছন্দানং ৰসেন অট্ঠঙ্গসমন্নাগতেন কাযপ্পণিধানমহাপণিধানেন. সব্বেসঞ্হি বুদ্ধানং কাযপ্পণিধানং ইমিনাৰ অভিনীহারেন সমিজ্ঝতীতি. এৰং মহাভিনীহারৰসেন ‘‘তথাগতো’’তি পদস্স অত্থং দস্সেত্ৰা ইদানি পারমীপূরণৰসেন দস্সেতুং ‘‘যথা ৰিপস্সী ভগৰা…পে… কস্সপো ভগৰা দানপারমিং পূরেত্ৰা’’তিআদিমাহ.

এত্থ চ সুত্তন্তিকানং মহাবোধিযানপটিপদায কোসল্লজননত্থং পারমীসু অযং ৰিত্থারকথা – কা পনেতা পারমিযো? কেনট্ঠেন পারমিযো? কতিৰিধা চেতা? কো তাসং কমো? কানি লক্খণরসপচ্চুপট্ঠানপদট্ঠানানি? কো পচ্চযো? কো সংকিলেসো? কিং ৰোদানং? কো পটিপক্খো? কা পটিপত্তি? কো ৰিভাগো? কো সঙ্গহো? কো সম্পাদনূপাযো? কিত্তকেন কালেন সম্পাদনং? কো আনিসংসো? কিং চেতাসং ফলন্তি?

তত্রিদং ৰিস্সজ্জনং – কা পনেতা পারমিযোতি. তণ্হামানাদীহি অনুপহতা করুণূপাযকোসল্লপরিগ্গহিতা দানাদযো গুণা পারমিযো.

কেনট্ঠেন পারমিযোতি দানসীলাদিগুণৰিসেসযোগেন সত্তুত্তমতায পরমা মহাসত্তা বোধিসত্তা, তেসং ভাৰো, কম্মং ৰা পারমী, দানাদিকিরিযা. অথ ৰা পরতীতি পরমো, দানাদিগুণানং পূরকো পালকো চ বোধিসত্তো. পরমস্স অযং, পরমস্স ৰা ভাৰো, কম্মং ৰা পারমী, দানাদিকিরিযাৰ. অথ ৰা পরং সত্তং অত্তনি মৰতি বন্ধতি গুণৰিসেসযোগেন, পরং ৰা অধিকতরং মজ্জতি সুজ্ঝতি সংকিলেসমলতো, পরং ৰা সেট্ঠং নিব্বানং ৰিসেসেন মযতি গচ্ছতি, পরং ৰা লোকং পমাণভূতেন ঞাণৰিসেসেন ইধলোকং ৰিয মুনাতি পরিচ্ছিন্দতি, পরং ৰা অতিৰিয সীলাদিগুণগণং অত্তনো সন্তানে মিনোতি পক্খিপতি, পরং ৰা অত্তভূততো ধম্মকাযতো অঞ্ঞং, পটিপক্খং ৰা তদনত্থকরং কিলেসচোরগণং মিনাতি হিংসতীতি পরমো, মহাসত্তো. ‘‘পরমস্স অয’’ন্তিআদি ৰুত্তনযেনেৰ যোজেতব্বং. পারে ৰা নিব্বানে মজ্জতি সুজ্ঝতি সত্তে চ সোধেতি, তত্থ ৰা সত্তে মৰতি বন্ধতি যোজেতি, তং ৰা মযতি গচ্ছতি গমেতি চ, মুনাতি ৰা তং যাথাৰতো, তত্থ ৰা সত্তে মিনোতি পক্খিপতি, কিলেসারিং ৰা সত্তানং তত্থ মিনাতি হিংসতীতি পারমী, মহাপুরিসো. তস্স ভাৰো, কম্মং ৰা পারমিতা, দানাদিকিরিযাৰ. ইমিনা নযেন পারমীনং সদ্দত্থো ৰেদিতব্বো.

কতিৰিধাতি সঙ্খেপতো দসৰিধা, তা পন পাল়িযং সরূপতো আগতাযেৰ. যথাহ –

‘‘ৰিচিনন্তো তদা দক্খিং, পঠমং দানপারমি’’ন্তিআদি (বু. ৰং. ১১৬).

যথা চাহ –

‘‘কতি নু খো ভন্তে বুদ্ধকারকা ধম্মা? দস খো সারিপুত্ত বুদ্ধকারকা ধম্মা. কতমে দস? দানং খো সারিপুত্ত বুদ্ধকারকো ধম্মো, সীলং নেক্খম্মং পঞ্ঞা ৰীরিযং খন্তি সচ্চমধিট্ঠানং মেত্তা উপেক্খা বুদ্ধকারকো ধম্মো, ইমে খো সারিপুত্ত দস বুদ্ধকারকা ধম্মাতি. ইদমৰোচ ভগৰা, ইদং ৰত্ৰান সুগতো অথাপরং এতদৰোচ সত্থা –

‘দানং সীলঞ্চ নেক্খম্মং, পঞ্ঞা ৰীরিযেন পঞ্চমং;

খন্তি সচ্চং অধিট্ঠানং, মেত্তুপেক্খাতি তে দসা’তি’’.

কেচি পন ‘‘ছব্বিধা’’তি ৰদন্তি, তং এতাসং সঙ্গহৰসেন ৰুত্তং. সো পন সঙ্গহো পরতো আৰিভৰিস্সতি.

কো তাসং কমোতি এত্থ কমো নাম দেসনাক্কমো, সো চ পঠমসমাদানহেতুকো, সমাদানং পৰিচযহেতুকং, ইতি যথা আদিম্হি পৰিচিতা সমাদিন্না চ, তথা দেসিতা. তত্থ চ দানং সীলস্স বহূপকারং সুকরঞ্চাতি তং আদিম্হি ৰুত্তং. দানং সীলপরিগ্গহিতং মহপ্ফলং হোতি মহানিসংসন্তি দানানন্তরং সীলং ৰুত্তং. সীলং নেক্খম্মপরিগ্গহিতং, নেক্খম্মং পঞ্ঞাপরিগ্গহিতং, পঞ্ঞা ৰীরিযপরিগ্গহিতা, ৰীরিযং খন্তিপরিগ্গহিতং, খন্তি সচ্চপরিগ্গহিতা, সচ্চং অধিট্ঠানপরিগ্গহিতং, অধিট্ঠানং মেত্তাপরিগ্গহিতং, মেত্তা উপেক্খাপরিগ্গহিতা মহপ্ফলা হোতি মহানিসংসাতি মেত্তানন্তরং উপেক্খা ৰুত্তা. উপেক্খা পন করুণাপরিগ্গহিতা, করুণা চ উপেক্খাপরিগ্গহিতাতি ৰেদিতব্বা. কথং পন মহাকারুণিকা বোধিসত্তা সত্তেসু উপেক্খকা হোন্তীতি? উপেক্খিতব্বযুত্তেসু কঞ্চি কালং উপেক্খকা হোন্তি, ন পন সব্বত্থ, সব্বদা চাতি কেচি. অপরে পন ন সত্তেসু উপেক্খকা, সত্তকতেসু পন ৰিপ্পকারেসু উপেক্খকা হোন্তীতি.

অপরো নযো – পচুরজনেসুপি পৰত্তিযা সব্বসত্তসাধারণত্তা, অপ্পফলত্তা, সুকরত্তা চ আদিম্হি দানং ৰুত্তং. সীলেনদাযকপটিগ্গাহকসুদ্ধিতো, পরানুগ্গহং ৰত্ৰা পরপীল়ানিৰত্তিৰচনতো, কিরিযধম্মং ৰত্ৰা অকিরিযধম্মৰচনতো, ভোগসম্পত্তিহেতুং ৰত্ৰা ভৰসম্পত্তিহেতুৰচনতো চ দানস্স অনন্তরং সীলং ৰুত্তং. নেক্খম্মেন সীলসম্পত্তিসিদ্ধিতো, কাযৰচীসুচরিতং ৰত্ৰা মনোসুচরিতৰচনতো, ৰিসুদ্ধসীলস্স সুখেনেৰ ঝানসমিজ্ঝনতো, কম্মাপরাধপ্পহানেন পযোগসুদ্ধিং ৰত্ৰা কিলেসাপরাধপ্পহানেন আসযসুদ্ধিৰচনতো, ৰীতিক্কমপ্পহানেন চিত্তস্স পরিযুট্ঠানপ্পহানৰচনতো চ সীলস্স অনন্তরং নেক্খম্মং ৰুত্তং. পঞ্ঞায নেক্খম্মস্স সিদ্ধিপরিসুদ্ধিতো, ঝানাভাৰে পঞ্ঞাভাৰৰচনতো. সমাধিপদট্ঠানা হি পঞ্ঞা, পঞ্ঞাপচ্চুপট্ঠানো চ সমাধি. সমথনিমিত্তং ৰত্ৰা উপেক্খানিমিত্তৰচনতো, পরহিতজ্ঝানেন পরহিতকরণূপাযকোসল্লৰচনতো চ নেক্খম্মস্স অনন্তরং পঞ্ঞা ৰুত্তা. ৰীরিযারম্ভেন পঞ্ঞাকিচ্চসিদ্ধিতো, সত্তসুঞ্ঞতাধম্মনিজ্ঝানক্খন্তিং ৰত্ৰা সত্তহিতায আরম্ভস্স অচ্ছরিযতাৰচনতো, উপেক্খানিমিত্তং ৰত্ৰা পগ্গহনিমিত্তৰচনতো, নিসম্মকারিতং ৰত্ৰা উট্ঠানৰচনতো চ. নিসম্মকারিনো হি উট্ঠানং ফলৰিসেসমাৰহতীতি পঞ্ঞায অনন্তরং ৰীরিযং ৰুত্তং.

ৰীরিযেন তিতিক্খাসিদ্ধিতো. ৰীরিযৰা হি আরদ্ধৰীরিযত্তা সত্তসঙ্খারেহি উপনীতং দুক্খং অভিভুয্য ৰিহরতি ৰীরিযস্স তিতিক্খালঙ্কারভাৰতো. ৰীরিযৰতো হি তিতিক্খা সোভতি. পগ্গহনিমিত্তং ৰত্ৰা সমথনিমিত্তৰচনতো, অচ্চারম্ভেন উদ্ধচ্চদোসপ্পহানৰচনতো. ধম্মনিজ্ঝানক্খন্তিযা হি উদ্ধচ্চদোসো পহীযতি. ৰীরিযৰতো সাতচ্চকরণৰচনতো. খন্তিবহুলো হি অনুদ্ধতো সাতচ্চকারী হোতি. অপ্পমাদৰতো পরহিতকিরিযারম্ভে পচ্চুপকারতণ্হাভাৰৰচনতো. যাথাৰতো ধম্মনিজ্ঝানে হি সতি তণ্হা ন হোতি. পরহিতারম্ভে পরমেপি পরকতদুক্খসহনভাৰৰচনতো চ ৰীরিযস্স অনন্তরং খন্তি ৰুত্তা. সচ্চেন খন্তিযা চিরাধিট্ঠানতো, অপকারিনো অপকারখন্তিং ৰত্ৰা তদুপকারকরণে অৰিসংৰাদৰচনতো, খন্তিযা অপৰাদৰাচাৰিকম্পনেন ভূতৰাদিতায অৰিজহনৰচনতো, সত্তসুঞ্ঞতাধম্মনিজ্ঝানক্খন্তিং ৰত্ৰা তদুপব্রূহিতঞাণসচ্চৰচনতো চ খন্তিযা অনন্তরং সচ্চং ৰুত্তং. অধিট্ঠানেন সচ্চসিদ্ধিতো. অচলাধিট্ঠানস্স হি ৰিরতি সিজ্ঝতি. অৰিসংৰাদিতং ৰত্ৰা তত্থ অচলভাৰৰচনতো. সচ্চসন্ধো হি দানাদীসু পটিঞ্ঞানুরূপং নিচ্চলোৰ পৰত্ততি. ঞাণসচ্চং ৰত্ৰা সম্ভারেসু পৰত্তিনিট্ঠাপনৰচনতো. যথাভূতঞাণৰা হি বোধিসম্ভারেসু অধিতিট্ঠতি, তে চ নিট্ঠাপেতি পটিপক্খেহি অকম্পিযভাৰতোতি সচ্চস্স অনন্তরং অধিট্ঠানং ৰুত্তং. মেত্তায পরহিতকরণসমাদানাধিট্ঠানসিদ্ধিতো, অধিট্ঠানং ৰত্ৰা হিতূপসংহারৰচনতো. বোধিসম্ভারে হি অধিতিট্ঠমানো মেত্তাৰিহারী হোতি. অচলাধিট্ঠানস্স সমাদানাৰিকোপনতো, সমাদানসম্ভৰতো চ অধিট্ঠানস্স অনন্তরং মেত্তা ৰুত্তা. উপেক্খায মেত্তাৰিসুদ্ধিতো, সত্তেসু হিতূপসংহারং ৰত্ৰা তদপরাধেসু উদাসীনতাৰচনতো, মেত্তাভাৰনং ৰত্ৰা তন্নিস্সন্দভাৰনাৰচনতো, ‘‘হিতকামসত্তেপি উপেক্খকো’’তি অচ্ছরিযগুণভাৰৰচনতো চ মেত্তায অনন্তরং উপেক্খা ৰুত্তাতি এৰমেতাসং কমো ৰেদিতব্বো.

কানি লক্খণরসপচ্চুপট্ঠানপদট্ঠানানীতি? এত্থ অৰিসেসেন তাৰ সব্বাপি পারমিযো পরানুগ্গহলক্খণা, পরেসং উপকারকরণরসা, অৰিকম্পনরসা ৰা, হিতেসিতাপচ্চুপট্ঠানা, বুদ্ধত্তপচ্চুপট্ঠানা ৰা, মহাকরুণাপদট্ঠানা, করুণূপাযকোসল্লপদট্ঠানা ৰা.

ৰিসেসেন পন যস্মা করুণূপাযকোসল্লপরিগ্গহিতা অত্তুপকরণপরিচ্চাগচেতনা দানপারমিতা. করুণূপাযকোসল্লপরিগ্গহিতং কাযৰচীসুচরিতং অত্থতো অকত্তব্বৰিরতি, কত্তব্বকরণচেতনাদযো চ সীলপারমিতা. করুণূপাযকোসল্লপরিগ্গহিতো আদীনৰদস্সনপুব্বঙ্গমো কামভৰেহি নিক্খমনচিত্তুপ্পাদো নেক্খম্মপারমিতা. করুণূপাযকোসল্লপরিগ্গহিতো ধম্মানং সামঞ্ঞৰিসেসলক্খণাৰবোধো পঞ্ঞাপারমিতা. করুণূপাযকোসল্লপরিগ্গহিতো কাযচিত্তেহি পরহিতারম্ভো ৰীরিযপারমিতা. করুণূপাযকোসল্লপরিগ্গহিতং সত্তসঙ্খারাপরাধসহনং অদোসপ্পধানো তদাকারপ্পৰত্তো চিত্তুপ্পাদো খন্তিপারমিতা. করুণূপাযকোসল্লপরিগ্গহিতং ৰিরতিচেতনাদিভেদং অৰিসংৰাদনং সচ্চপারমিতা. করুণূপাযকোসল্লপরিগ্গহিতং অচলসমাদানাধিট্ঠানং তদাকারপ্পৰত্তো চিত্তুপ্পাদো অধিট্ঠানপারমিতা. করুণূপাযকোসল্লপরিগ্গহিতো লোকস্স হিতূপসংহারো অত্থতো অব্যাপাদো মেত্তাপারমিতা. করুণূপাযকোসল্লপরিগ্গহিতা অনুনযপটিঘৰিদ্ধংসিনী ইট্ঠানিট্ঠেসু সত্তসঙ্খারেসু সমপ্পৰত্তি উপেক্খাপারমিতা.

তস্মা পরিচ্চাগলক্খণং দানং, দেয্যধম্মে লোভৰিদ্ধংসনরসং, অনাসত্তিপচ্চুপট্ঠানং, ভৰৰিভৰসম্পত্তিপচ্চুপট্ঠানং ৰা, পরিচ্চজিতব্বৰত্থুপদট্ঠানং. সীলনলক্খণং সীলং, সমাধানলক্খণং, পতিট্ঠানলক্খণঞ্চাতি ৰুত্তং হোতি. দুস্সীল্যৰিদ্ধংসনরসং, অনৰজ্জরসং ৰা, সোচেয্যপচ্চুপট্ঠানং, হিরোত্তপ্পপদট্ঠানং. কামতো ভৰতো চ নিক্খমনলক্খণং নেক্খম্মং, তদাদীনৰৰিভাৰনরসং, ততো এৰ ৰিমুখভাৰপচ্চুপট্ঠানং, সংৰেগপদট্ঠানং. যথাসভাৰপটিৰেধলক্খণা পঞ্ঞা, অক্খলিতপটিৰেধলক্খণা ৰা কুসলিস্সাসখিত্তউসুপটিৰেধো ৰিয, ৰিসযোভাসনরসা পদীপো ৰিয, অসম্মোহপচ্চুপট্ঠানা অরঞ্ঞগতসুদেসকো ৰিয, সমাধিপদট্ঠানা, চতুসচ্চপদট্ঠানা ৰা. উস্সাহলক্খণং ৰীরিযং, উপত্থম্ভনরসং, অসংসীদনপচ্চুপট্ঠানং, ৰীরিযারম্ভৰত্থু (অ. নি. ৮.৮০) পদট্ঠানং, সংৰেগপদট্ঠানং ৰা. খমনলক্খণা খন্তি, ইট্ঠানিট্ঠসহনরসা, অধিৰাসনপচ্চুপট্ঠানা, অৰিরোধপচ্চুপট্ঠানা ৰা, যথাভূতদস্সনপদট্ঠানা. অৰিসংৰাদনলক্খণং সচ্চং, যাথাৰৰিভাৰনরসং [যথাসভাৰৰিভাৰনরসং (চরিযা. অট্ঠ. পকিণ্ণককথায)], সাধুতাপচ্চুপট্ঠানং, সোরচ্চপদট্ঠানং. বোধিসম্ভারেসু অধিট্ঠানলক্খণং অধিট্ঠানং, তেসং পটিপক্খাভিভৰনরসং, তত্থ অচলতাপচ্চুপট্ঠানং, বোধিসম্ভারপদট্ঠানং. হিতাকারপ্পৰত্তিলক্খণা মেত্তা, হিতূপসংহাররসা, আঘাতৰিনযনরসা ৰা, সোম্মভাৰপচ্চুপট্ঠানা, সত্তানং মনাপভাৰদস্সনপদট্ঠানা. মজ্ঝত্তাকারপ্পৰত্তিলক্খণা উপেক্খা, সমভাৰদস্সনরসা, পটিঘানুনযৰূপসমপচ্চুপট্ঠানা, কম্মস্সকতাপচ্চৰেক্খণপদট্ঠানা. এত্থ চ করুণূপাযকোসল্লপরিগ্গহিততা দানাদীনং পরিচ্চাগাদিলক্খণস্স ৰিসেসনভাৰেন ৰত্তব্বা, যতো তানি পারমীসঙ্খ্যং লভন্তীতি.

কো পচ্চযোতি অভিনীহারো পচ্চযো. যো হি অযং ‘‘মনুস্সত্তং লিঙ্গসম্পত্তী’’তিআদি (বু. ৰং. ২.৫৯) অট্ঠধম্মসমোধানসম্পাদিতো ‘‘তিণ্ণো তারেয্যং, মুত্তো মোচেয্যং, বুদ্ধো বোধেয্যং, সুদ্ধো সোধেয্যং, দন্তো দমেয্যং, সন্তো সমেয্যং, অস্সত্থো অস্সাসেয্যং, পরিনিব্বুতো পরিনিব্বাপেয্য’’ন্তিআদিনা (চরিযা. অট্ঠ. পকিণ্ণককথায) পৰত্তো অভিনীহারো, সো অৰিসেসেন সব্বপারমীনং পচ্চযো. তপ্পৰত্তিযা হি উদ্ধং পারমীনং পৰিচযুপট্ঠানসমাদানাধিট্ঠাননিপ্ফত্তিযো মহাপুরিসানং সম্ভৰন্তি.

যথা চ অভিনীহারো, এৰং মহাকরুণা, উপাযকোসল্লঞ্চ. তত্থ উপাযকোসল্লং নাম দানাদীনং বোধিসম্ভারভাৰস্স নিমিত্তভূতা পঞ্ঞা, যাহি করুণূপাযকোসল্লতাহি মহাপুরিসানং অত্তসুখনিরপেক্খতা, নিরন্তরং পরহিতকরণপসুততা, সুদুক্করেহিপি মহাবোধিসত্তচরিতেহি ৰিসাদাভাৰো, পসাদসম্বুদ্ধিদস্সনসৰনানুস্সরণাৰত্থাসুপি সত্তানং হিতসুখপটিলাভহেতুভাৰো চ সম্পজ্জতি. তথা হি পঞ্ঞায বুদ্ধভাৰসিদ্ধি, করুণায বুদ্ধকম্মসিদ্ধি. পঞ্ঞায সযং তরতি, করুণায পরে তারেতি. পঞ্ঞায পরদুক্খং পরিজানাতি, করুণায পরদুক্খপটিকারং আরভতি. পঞ্ঞায চ দুক্খে নিব্বিন্দতি, করুণায দুক্খং সম্পটিচ্ছতি. তথা পঞ্ঞায পরিনিব্বানাভিমুখো হোতি, করুণায তং ন পাপুণাতি. তথা করুণায সংসারাভিমুখো হোতি, পঞ্ঞায তত্র নাভিরমতি. পঞ্ঞায চ সব্বত্থ ৰিরজ্জতি, করুণানুগতত্তা ন চ ন সব্বেসং অনুগ্গহায পৰত্তো, করুণায সব্বেপি অনুকম্পতি, পঞ্ঞানুগতত্তা ন চ ন সব্বত্থ ৰিরত্তচিত্তো. পঞ্ঞায চ অহংকারমমংকারাভাৰো, করুণায আলসিযদীনতাভাৰো. তথা পঞ্ঞাকরুণাহি যথাক্কমং অত্তপরনাথতা, ধীরৰীরভাৰো, অনত্তন্তপঅপরন্তপতা, অত্তহিতপরহিতনিপ্ফত্তি, নিব্ভযাভিংসনকভাৰো, ধম্মাধিপতিলোকাধিপতিতা, কতঞ্ঞুপুব্বকারিভাৰো, মোহতণ্হাৰিগমো, ৰিজ্জাচরণসিদ্ধি, বলৰেসারজ্জনিপ্ফত্তীতি সব্বস্সাপি পারমিতাফলস্স ৰিসেসেন উপাযভাৰতো পঞ্ঞাকরুণা পারমীনং পচ্চযো. ইদঞ্চ দ্ৰযং পারমীনং ৰিয পণিধানস্সাপি পচ্চযো.

তথা উস্সাহউম্মঙ্গঅৰত্থানহিতচরিযা চ পারমীনং পচ্চযোতি ৰেদিতব্বা, যা বুদ্ধভাৰস্স উপ্পত্তিট্ঠানতায ‘‘বুদ্ধভূমিযো’’তি পৰুচ্চন্তি. যথাহ –

‘‘কতি পন ভন্তে বুদ্ধভূমিযো? চতস্সো খো সারিপুত্ত বুদ্ধভূমিযো. কতমা চতস্সো? উস্সাহো চ হোতি ৰীরিযং, উমঙ্গো চ হোতি পঞ্ঞাভাৰনা, অৰত্থানঞ্চ হোতি অধিট্ঠানং, মেত্তাভাৰনা চ হোতি হিতচরিযা. ইমা খো সারিপুত্ত চতস্সো বুদ্ধভূমিযো’’তি (সু. নি. অট্ঠ. ১.খগ্গৰিসাণসুত্তৰণ্ণনাযম্পি).

তথা নেক্খম্মপৰিৰেকঅলোভাদোসামোহনিস্সরণপ্পভেদা ছ অজ্ঝাসযা. ৰুত্তঞ্হেতং –

‘‘নেক্খম্মজ্ঝাসযা চ বোধিসত্তা কামে দোসদস্সাৰিনো, পৰিৰেক…পে… সঙ্গণিকায, অলোভ…পে… লোভে, অদোস…পে… দোসে, অমোহ…পে… মোহে, নিস্সরণজ্ঝাসযা চ বোধিসত্তা সব্বভৰেসু দোসদস্সাৰিনো’’তি (ৰিসুদ্ধি. অট্ঠ. ১.৪৯ ৰাক্যখন্ধেপি).

তস্মা এতে বোধিসত্তানং ছ অজ্ঝাসযা দানাদীনং পচ্চযাতি ৰেদিতব্বা. ন হি লোভাদীসু আদীনৰদস্সনেন, অলোভাদিঅধিকভাৰেন চ ৰিনা দানাদিপারমিযো সম্ভৰন্তি. অলোভাদীনঞ্হি অধিকভাৰেন পরিচ্চাগাদিনিন্নচিত্ততা অলোভজ্ঝাসযাদিতাতি. যথা চেতে, এৰং দানজ্ঝাসযতাদযোপি. যথাহ –

‘‘কতি পন ভন্তে বোধায চরন্তানং বোধিসত্তানং অজ্ঝাসযা? দস খো সারিপুত্ত বোধায চরন্তানং বোধিসত্তানং অজ্ঝাসযা. কতমে দস? দানজ্ঝাসযা সারিপুত্ত বোধিসত্তা মচ্ছেরে দোসদস্সাৰিনো, সীল…পে… উপেক্খজ্ঝাসযা সারিপুত্ত বোধিসত্তা সুখদুক্খেসু দোসদস্সাৰিনো’’তি.

এতেসু হি মচ্ছেরঅসংৰরকামৰিচিকিচ্ছাকোসজ্জঅক্খন্তিৰিসংৰাদঅনধিট্ঠানব্যাপাদ- সুখদুক্খসঙ্খাতেসু আদীনৰদস্সনপুব্বঙ্গমা দানাদিনিন্নচিত্ততাসঙ্খাতা দানজ্ঝাসযতাদযো দানাদিপারমীনং নিব্বত্তিযা কারণন্তি. তথা অপরিচ্চাগপরিচ্চাগাদীসু যথাক্কমং আদীনৰানিসংসপচ্চৰেক্খণা দানাদিপারমীনং পচ্চযো.

তত্থাযং পচ্চৰেক্খণাৰিধি – খেত্তৰত্থুহিরঞ্ঞসুৰণ্ণগোমহিংসদাসিদাসপুত্তদারাদিপরিগ্গহব্যাসত্তচিত্তানং সত্তানং খেত্তাদীনং ৰত্থুকামভাৰেন বহুপত্থনীযভাৰতো, রাজচোরাদিসাধারণভাৰতো, ৰিৰাদাধিট্ঠানতো, সপত্তকরণতো, নিস্সারতো, পটিলাভপরিপালনেসু পরৰিহেঠনহেতুতো, ৰিনাসনিমিত্তঞ্চ সোকাদিঅনেকৰিহিতব্যসনাৰহতো, তদাসত্তিনিদানঞ্চ মচ্ছেরমলপরিযুট্ঠিতচিত্তানং অপাযূপপত্তিসম্ভৰতোতি এৰং ৰিৰিধৰিপুলানত্থাৰহা এতে অত্থা নাম, তেসং পরিচ্চাগোযেৰেকো সোত্থিভাৰোতি পরিচ্চাগে অপ্পমাদো করণীযো.

অপিচ ‘‘যাচকো যাচমানো অত্তনো গুয্হস্স আচিক্খনতো ময্হং ৰিস্সাসিকো’’তি চ ‘‘পহায গমনীযং অত্তনো সন্তকং গহেত্ৰা পরলোকং যাহীতি ময্হং উপদেসকো’’তি চ ‘‘আদিত্তে ৰিয অগারে মরণগ্গিনা আদিত্তে লোকে ততো ময্হং সন্তকস্স অপৰাহকসহাযো’’তি চ ‘‘অপৰাহিতস্স চস্স নিজ্ঝাযনিক্খেপট্ঠানভূতো’’তি চ ‘‘দানসঙ্খাতে কল্যাণকম্মস্মিং সহাযভাৰতো, সব্বসম্পত্তীনং অগ্গভূতায পরমদুল্লভায বুদ্ধভূমিযা সম্পত্তিহেতুভাৰতো চ পরমো কল্যাণমিত্তো’’তি চ পচ্চৰেক্খিতব্বং.

তথা ‘‘উল়ারে কম্মনি অনেনাহং সম্ভাৰিতো, তস্মা সা সম্ভাৰনা অৰিতথা কাতব্বা’’তি চ ‘‘একন্তভেদিতায জীৰিতস্স অযাচিতেনপি মযা দাতব্বং, পগেৰ যাচিতেনা’’তি চ ‘‘উল়ারজ্ঝাসযেহি গৰেসিত্ৰাপি দাতব্বো, সযমেৰাগতো মম পুঞ্ঞেনা’’তি চ ‘‘যাচকস্স দানাপদেসেন ময্হমেৰাযমনুগ্গহো’’তি চ ‘‘অহং ৰিয অযং সব্বোপি লোকো মযা অনুগ্গহেতব্বো’’তি চ ‘‘অসতি যাচকে কথং ময্হং দানপারমী পূরেয্যা’’তি চ ‘‘যাচকানমেৰত্থায মযা সব্বো পরিগ্গহেতব্বো’’তি চ ‘‘অযাচিত্ৰা মম সন্তকং যাচকা সযমেৰ কদা গণ্হেয্যু’’ন্তি চ ‘‘কথমহং যাচকানং পিযো চস্সং মনাপো’’তি চ ‘‘কথং ৰা তে ময্হং পিযা চস্সু মনাপা’’তি চ ‘‘কথং ৰাহং দদমানো, দত্ৰাপি চ অত্তমনো অস্সং পমুদিতো পীতিসোমনস্সজাতো’’তি চ ‘‘কথং ৰা মে যাচকা ভৰেয্যুং, উল়ারো চ দানজ্ঝাসযো’’তি চ ‘‘কথং ৰাহমযাচিতোযেৰ যাচকানং হদযমঞ্ঞায দদেয্য’’ন্তি চ ‘‘সতি ধনে যাচকে চ অপরিচ্চাগো মহতী ময্হং ৰঞ্চনা’’তি চ ‘‘কথং ৰাহং অত্তনো অঙ্গানি জীৰিতং ৰাপি যাচকানং পরিচ্চজেয্য’’ন্তি চ পচ্চৰেক্খিতব্বং.

অপিচ ‘‘অত্থো নামাযং নিরপেক্খং দাযকং অনুগচ্ছতি যথা তং নিরপেক্খং খেপকং কিটকো’’তি অত্থে নিরপেক্খতায চিত্তং উপ্পাদেতব্বং. যাচমানো পন যদি পিযপুগ্গলো হোতি, ‘‘পিযো মং যাচতী’’তি সোমনস্সং উপ্পাদেতব্বং. অথ উদাসীনপুগ্গলো হোতি, ‘‘অযং মং যাচমানো অদ্ধা ইমিনা পরিচ্চাগেন মিত্তো হোতী’’তি সোমনস্সং উপ্পাদেতব্বং. দদন্তোপি হি যাচকানং পিযো হোতীতি. অথ পন ৰেরীপুগ্গলো যাচতি, ‘‘পচ্চত্থিকো মং যাচতি, অযং মং যাচমানো অদ্ধা ইমিনা পরিচ্চাগেন ৰেরীপি পিযো মিত্তো হোতী’’তি ৰিসেসতো সোমনস্সং উপ্পাদেতব্বং. এৰং পিযপুগ্গলে ৰিয মজ্ঝত্তৰেরীপুগ্গলেসুপি মেত্তাপুব্বঙ্গমং করুণং উপট্ঠপেত্ৰাৰ দাতব্বং.

সচে পনস্স চিরকালপরিভাৰিতত্তা লোভস্স দেয্যধম্মৰিসযা লোভধম্মা উপ্পজ্জেয্যুং, তেন বোধিসত্তপটিঞ্ঞেন ইতি পটিসঞ্চিক্খিতব্বং ‘‘ননু তযা সপ্পুরিস সম্বোধায অভিনীহারং করোন্তেন সব্বসত্তানং উপকারত্থায অযং কাযো নিস্সট্ঠো, তপ্পরিচ্চাগমযঞ্চ পুঞ্ঞং, তত্থ নাম তে বাহিরেপি ৰত্থুস্মিং অতিসঙ্গপ্পৰত্তি হত্থিসিনানসদিসী হোতি, তস্মা তযা ন কত্থচি সঙ্গো উপ্পাদেতব্বো. সেয্যথাপি নাম মহতো ভেসজ্জরুক্খস্স তিট্ঠতো মূলং মূলত্থিকা হরন্তি, পপটিকং, তচং, খন্ধং, ৰিটপং, সারং, সাখং, পলাসং, পুপ্ফং, ফলং ফলত্থিকা হরন্তি, ন তস্স রুক্খস্স ‘ময্হং সন্তকং এতে হরন্তী’’তি ৰিতক্কসমুদাচারো হোতি, এৰমেৰ সব্বলোকহিতায উস্সুক্কমাপজ্জন্তেন মযা মহাদুক্খে অকতঞ্ঞুকে নিচ্চাসুচিম্হি কাযে পরেসং উপকারায ৰিনিযুজ্জমানে অণুমত্তোপি মিচ্ছাৰিতক্কো ন উপ্পাদেতব্বো, কো ৰা এত্থ ৰিসেসো অজ্ঝত্তিকবাহিরেসু মহাভূতেসু একন্তভেদনৰিকিরণৰিদ্ধংসনধম্মেসু, কেৰলং পন সম্মোহৰিজম্ভিতমেতং, যদিদং ‘এতং মম, এসোহমস্মি, এসো মে অত্তা’তি অভিনিৰেসো. তস্মা বাহিরেসু ৰিয অজ্ঝত্তিকেসুপি করচরণনযনাদীসু, মংসাদীসু চ অনপেক্খেন হুত্ৰা ‘তংতদত্থিকা হরন্তূ’তি নিস্সট্ঠচিত্তেন ভৰিতব্ব’’ন্তি. এৰং পটিসঞ্চিক্খতো চস্স বোধায পহিতত্তস্স কাযজীৰিতেসু নিরপেক্খস্স অপ্পকসিরেনেৰ কাযৰচীমনোকম্মানি সুৰিসুদ্ধানি হোন্তি. সো ৰিসুদ্ধকাযৰচীমনোকম্মন্তো ৰিসুদ্ধাজীৰো ঞাযপটিপত্তিযং ঠিতো, আযাপাযুপাযকোসল্লসমন্নাগমেন ভিয্যোসো মত্তায দেয্যধম্মপরিচ্চাগেন, অভযদানসদ্ধম্মদানেহি চ সব্বসত্তে অনুগ্গণ্হিতুং সমত্থো হোতীতি. অযং তাৰ দানপারমিযং পচ্চৰেক্খণানযো.

সীলপারমিযং পন এৰং পচ্চৰেক্খিতব্বং – ইদঞ্হি সীলং নাম গঙ্গোদকাদীহি ৰিসোধেতুং অসক্কুণেয্যস্স দোসমলস্স ৰিক্খালনজলং, হরিচন্দনাদীহি ৰিনেতুং অসক্কুণেয্যরাগাদিপরিল়াহৰিনযনং, হারমকুটকুণ্ডলাদীহি পচুরজনালঙ্কারেহি অসাধারণো সাধূনং অলঙ্কারৰিসেসো, সব্বদিসাৰাযনতো অকিত্তিমো, সব্বকালানুরূপো চ সুরভিগন্ধো, খত্তিযমহাসালাদীহি দেৰতাহি চ ৰন্দনীযাদিভাৰাৰহনতো পরমো ৰসীকরণমন্তো, চাতুমহারাজিকাদি দেৰলোকারোহনসোপানপন্তি, ঝানাভিঞ্ঞানং অধিগমুপাযো, নিব্বানমহানগরস্স সম্পাপকমগ্গো, সাৰকবোধিপচ্চেকবোধিসম্মাসম্বোধীনং পতিট্ঠানভূমি, যং যং ৰা পনিচ্ছিতং পত্থিতং, তস্স তস্স সমিজ্ঝনূপাযভাৰতো চিন্তামণিকপ্পরুক্খাদিকে চ অতিসেতি. ৰুত্তঞ্হেতং ভগৰতা ‘‘ইজ্ঝতি ভিক্খৰে সীলৰতো চেতোপণিধি ৰিসুদ্ধত্তা’’তি (অ. নি. ৮.৩৫). অপরম্পি ৰুত্তং ‘‘আকঙ্খেয্য চে ভিক্খৰে ভিক্খু সব্রহ্মচারীনং পিযো চ অস্সং মনাপো চ গরু চ ভাৰনীযো চাতি, সীলেস্ৰেৰস্স পরিপূরকারী’’তিআদি (ম. নি. ১.৬১), তথা ‘‘অৰিপ্পটিসারত্থানি খো আনন্দ কুসলানি সীলানী’’তি (অ. নি. ১০.১; ১১.১), ‘‘পঞ্চিমে গহপতযো আনিসংসা সীলৰতো সীলসম্পদাযা’’তি (দী. নি. ২.১৫০; উদা. ৭৬; মহাৰ. ১৮৫) সুত্তানঞ্চ ৰসেন সীলস্স গুণা পচ্চৰেক্খিতব্বা, তথা অগ্গিক্খন্ধোপমসুত্তাদীনং (অ. নি. ৭.৭২) ৰসেন সীলৰিরহে আদীনৰা.

পীতিসোমনস্সনিমিত্ততো, অত্তানুৰাদপরানুৰাদদণ্ডদুগ্গতিভযাভাৰতো, ৰিঞ্ঞূহি পাসংসভাৰতো, অৰিপ্পটিসারহেতুতো, সোত্থিট্ঠানতো, অভিজনসাপতেয্যাধিপতেয্যাযুরূপট্ঠানবন্ধুমিত্তসম্পত্তীনং অতিসযনতো চ সীলং পচ্চৰেক্খিতব্বং. সীলৰতো হি অত্তনো সীলসম্পদাহেতু মহন্তং পীতিসোমনস্সং উপ্পজ্জতি ‘‘কতং ৰত মযা কুসলং, কতং কল্যাণং, কতং ভীরুত্তাণ’’ন্তি. তথা সীলৰতো অত্তা ন উপৰদতি, ন পরে ৰিঞ্ঞূ, দণ্ডদুগ্গতিভযানং সম্ভৰোযেৰ নত্থি, ‘‘সীলৰা পুরিসপুগ্গলো কল্যাণধম্মো’’তি ৰিঞ্ঞূনং পাসংসো হোতি. তথা সীলৰতো য্ৰাযং ‘‘কতং ৰত মযা পাপং, কতং লুদ্দং, কতং কিব্বিস’’ন্তি দুস্সীলস্স ৰিপ্পটিসারো উপ্পজ্জতি, সো ন হোতি. সীলঞ্চ নামেতং অপ্পমাদাধিট্ঠানতো, ভোগব্যসনাদিপরিহারমুখেন মহতো অত্থস্স সাধনতো, মঙ্গলভাৰতো চ পরমং সোত্থিট্ঠানং, নিহীনজচ্চোপি সীলৰা খত্তিযমহাসালাদীনং পূজনীযো হোতীতি কুলসম্পত্তিং অতিসেতি সীলসম্পদা, ‘‘তং কিং মঞ্ঞসি মহারাজ, ইধ তে অস্স পুরিসো দাসো কম্মকরো’’তিআদি (দী. নি. ১.১৮৩) ৰচনঞ্চেত্থ সাধকং. চোরাদীহি অসাধারণতো, পরলোকানুগমনতো, মহপ্ফলভাৰতো, সমথাদিগুণাধিট্ঠানতো চ বাহিরধনং অতিসেতি সীলং, পরমস্স চিত্তিস্সরিযস্স অধিট্ঠানভাৰতো খত্তিযাদীনং ইস্সরিযং অতিসেতি সীলং. সীলনিমিত্তঞ্হি তংতংসত্তনিকাযেসু সত্তানং ইস্সরিযং ৰস্সসতদীঘপ্পমাণতো জীৰিততো একাহম্পি সীলৰতো জীৰিতস্স ৰিসিট্ঠতাৰচনতো, সতি চ জীৰিতে সিক্খানিক্খেপস্স মরণতাৰচনতো সীলং জীৰিততো ৰিসিট্ঠতরং. ৰেরীনম্পি মনুঞ্ঞভাৰাৰহনতো, জরারোগৰিপত্তীহি অনভিভৰনীযতো চ রূপসম্পত্তিং অতিসেতি সীলং. পাসাদহম্মিযাদিট্ঠানৰিসেসে, রাজযুৰরাজসেনাপতিআদিট্ঠানৰিসেসে চ অতিসেতি সীলং সুখৰিসেসাধিট্ঠানভাৰতো. সভাৰসিনিদ্ধে সন্তিকাৰচরেপি বন্ধুজনে মিত্তজনে চ অতিসেতি একন্তহিতসম্পাদনতো, পরলোকানুগমনতো চ. ‘‘ন তং মাতা পিতা কযিরা’’তিআদি (ধ. প. ৪৩) ৰচনঞ্চেত্থ সাধকং. তথা হত্থিঅস্সরথাদিভেদেহি, মন্তাগদসোত্থানপ্পযোগেহি চ দুরারক্খং অত্তানং আরক্খভাৰেন সীলমেৰ ৰিসিট্ঠতরং অত্তাধীনতো, অপরাধীনতো, মহাৰিসযতো চ. তেনেৰাহ ‘‘ধম্মো হৰে রক্খতি ধম্মচারি’’ন্তিআদি (জা. ১.৯.১০২). এৰমনেকগুণসমন্নাগতং সীলন্তি পচ্চৰেক্খন্তস্স অপরিপুণ্ণা চেৰ সীলসম্পদা পারিপূরিং গচ্ছতি অপরিসুদ্ধা চ পারিসুদ্ধিং.

সচে পনস্স দীঘরত্তং পরিচযেন সীলপটিপক্খা ধম্মা দোসাদযো অন্তরন্তরা উপ্পজ্জেয্যুং, তেন বোধিসত্তপটিঞ্ঞেন এৰং পটিসঞ্চিক্খিতব্বং ‘‘ননু তযা সম্বোধায পণিধানং কতং, সীলৰিকলেন চ ন সক্কা লোকিযাপি সম্পত্তিযো পাপুণিতুং, পগেৰ লোকুত্তরা, সব্বসম্পত্তীনং পন অগ্গভূতায সম্মাসম্বোধিযা অধিট্ঠানভূতেন সীলেন পরমুক্কংসগতেন ভৰিতব্বং. তস্মা ‘কিকীৰ অণ্ড’ন্তিআদিনা (ৰিসুদ্ধি. ১.১৯; দী. নি. অট্ঠ. ১.৭) ৰুত্তনযেন সম্মা সীলং পরিরক্খন্তেন সুট্ঠু তযা পেসলেন ভৰিতব্বং. অপি চ তযা ধম্মদেসনায যানত্তযে সত্তানং অৰতারণপরিপাচনানি কাতব্বানি, সীলৰিকলস্স চ ৰচনং ন পচ্চেতব্বং হোতি অসপ্পাযাহারৰিচারস্স ৰিয ৰেজ্জস্স তিকিচ্ছনং, তস্মা কথাহং সদ্ধেয্যো হুত্ৰা সত্তানং অৰতারণপরিপাচনানি করেয্য’’ন্তি সভাৰপরিসুদ্ধসীলেন ভৰিতব্বং. কিঞ্চ ‘‘ঝানাদিগুণৰিসেসযোগেন মে সত্তানং উপকারকরণসমত্থতা, পঞ্ঞাপারমীআদিপরিপূরণঞ্চ, ঝানাদযো চ গুণা সীলপারিসুদ্ধিং ৰিনা ন সম্ভৰন্তী’’তি সম্মদেৰ সীলং পরিসোধেতব্বং.

তথা ‘‘সম্বাধো ঘরাৰাসো রজোপথো’’তিআদিনা (দী. নি. ১.১৯১; ম. নি. ১.২৯১; সং. নি. ২.১৫৪; ম. নি. ২.১০) ঘরাৰাসে ‘‘অট্ঠিকঙ্কলূপমা কামা’’তিআদিনা (ম. নি. ১.২৩৪; পাচি. ৪১৭; মহানি. ৩, ৬;), ‘‘মাতাপি পুত্তেন ৰিৰদতী’’তিআদিনা (ম. নি. ১.১৬৮, ১৭৮) চ কামেসু ‘‘সেয্যথাপি পুরিসো ইণং আদায কম্মন্তে পযোজেয্যা’’তিআদিনা (দী. নি. ১.২১৮) কামচ্ছন্দাদীসু আদীনৰদস্সনপুব্বঙ্গমা ৰুত্তৰিপরিযাযেন ‘‘অব্ভোকাসো পব্বজ্জা’’তিআদিনা (দী. নি. ১.১.৯১; সং. নি. ১.১৫৪) পব্বজ্জাদীসু আনিসংসপটিসঙ্খাৰসেন নেক্খম্মপারমিযং পচ্চৰেক্খণা ৰেদিতব্বা. অযমেত্থ সঙ্খেপত্থো, ৰিত্থারো পন দুক্খক্খন্ধ (ম. নি. ১.১৬৩) ৰীমংসসুত্তাদি (ম. নি. ১.৪৮৭) ৰসেন দুক্খক্খন্ধআসিৰিসোপমসুত্তাদিৰসেন (চরিযা. অট্ঠ. পকিণ্ণককথাযং) ৰেদিতব্বো.

তথা ‘‘পঞ্ঞায ৰিনা দানাদযো ধম্মা ন ৰিসুজ্ঝন্তি, যথাসকং ব্যাপারসমত্থা চ ন হোন্তী’’তি পঞ্ঞাগুণা মনসি কাতব্বা. যথেৰ হি জীৰিতেন ৰিনা সরীরযন্তং ন সোভতি, ন চ অত্তনো কিরিযাসু পটিপত্তিসমত্থং হোতি, যথা চ চক্খাদীনি ইন্দ্রিযানি ৰিঞ্ঞাণেন ৰিনা যথাসকং ৰিসযেসু কিচ্চং কাতুং নপ্পহোন্তি, এৰং সদ্ধাদীনি ইন্দ্রিযানি পঞ্ঞায ৰিনা সকিচ্চপটিপত্তিযং অসমত্থানীতি পরিচ্চাগাদিপটিপত্তিযং পঞ্ঞা পধানকারণং. উম্মীলিতপঞ্ঞাচক্খুকা হি মহাসত্তা অত্তনো অঙ্গপচ্চঙ্গানিপি দত্ৰা অনত্তুক্কংসকা, অপরৰম্ভকা চ হোন্তি, ভেসজ্জরুক্খা ৰিয ৰিকপ্পরহিতা কালত্তযেপি সোমনস্সজাতা. পঞ্ঞাৰসেন উপাযকোসল্লযোগতো পরিচ্চাগো পরহিতপ্পৰত্তিযা দানপারমিভাৰং উপেতি. অত্তত্থঞ্হি দানং ৰুড্ঢিসদিসং হোতি.

তথা পঞ্ঞায অভাৰেন তণ্হাদিসংকিলেসাৰিযোগতো সীলস্স ৰিসুদ্ধিযেৰ ন সম্ভৰতি, কুতো সব্বঞ্ঞুগুণাধিট্ঠানভাৰো. পঞ্ঞৰা এৰ চ ঘরাৰাসে কামগুণেসু সংসারে চ আদীনৰং, পব্বজ্জায ঝানসমাপত্তিযং নিব্বানে চ আনিসংসং সুট্ঠু সল্লক্খেন্তো পব্বজিত্ৰা ঝানসমাপত্তিযো নিব্বত্তেত্ৰা নিব্বাননিন্নো, পরে চ তত্থ পতিট্ঠপেতীতি.

ৰীরিযঞ্চ পঞ্ঞারহিতং যদিচ্ছিতমত্থং ন সাধেতি দুরারম্ভভাৰতো. ৰরমেৰ হি অনারম্ভো দুরারম্ভতো, পঞ্ঞাসহিতেন পন ৰীরিযেন ন কিঞ্চি দুরধিগমং উপাযপটিপত্তিতো. তথা পঞ্ঞৰা এৰ পরাপকারাদিঅধিৰাসকজাতিযো হোতি, ন দুপ্পঞ্ঞো. পঞ্ঞাৰিরহিতস্স চ পরেহি উপনীতা অপকারা খন্তিযা পটিপক্খমেৰ অনুব্রূহেন্তি, পঞ্ঞৰতো পন তে খন্তিসম্পত্তিযা পরিব্রূহনৰসেন অস্সা থিরভাৰায সংৰত্তন্তি. পঞ্ঞৰা এৰ তীণি সচ্চানি তেসং কারণানি পটিপক্খে চ যথাভূতং জানিত্ৰা পরেসং অৰিসংৰাদকো হোতি. তথা পঞ্ঞাবলেন অত্তানং উপত্থম্ভেত্ৰা ধিতিসম্পদায সব্বপারমীসু অচলসমাদানাধিট্ঠানো হোতি, পঞ্ঞৰা এৰ চ পিযমজ্ঝত্তৰেরীৰিভাগং অকত্ৰা সব্বত্থ হিতূপসংহারকুসলো হোতি. তথা পঞ্ঞাৰসেন লাভাদিলোকধম্মসন্নিপাতে নিব্বিকারতায মজ্ঝত্তো হোতি. এৰং সব্বাসং পারমীনং পঞ্ঞাৰ পারিসুদ্ধিহেতূতি পঞ্ঞাগুণা পচ্চৰেক্খিতব্বা.

অপিচ পঞ্ঞায ৰিনা ন দস্সনসম্পত্তি, অন্তরেন চ দিট্ঠিসম্পদং ন সীলসম্পদা, সীলদিট্ঠিসম্পদারহিতস্স ন সমাধিসম্পদা, অসমাহিতেন চ ন সক্কা অত্তহিতমত্তম্পি সাধেতুং, পগেৰ উক্কংসগতং পরহিতন্তি পরহিতায পটিপন্নেন ‘‘ননু তযা সক্কচ্চং পঞ্ঞাপারিসুদ্ধিযং আযোগো করণীযো’’তি বোধিসত্তেন অত্তা ওৰদিতব্বো. পঞ্ঞানুভাৰেন হি মহাসত্তো চতুরধিট্ঠানাধিট্ঠিতো চতূহি সঙ্গহৰত্থূহি (দী. নি. ৩.২১০, ৩১৩; অ. নি. ১০.৩২) লোকং অনুগ্গণ্হন্তো সত্তে নিয্যানিকমগ্গে অৰতারেতি, ইন্দ্রিযানি চ নেসং পরিপাচেতি. তথা পঞ্ঞাবলেন খন্ধাযতনাদীসু পৰিচযবহুলো পৰত্তিনিৰত্তিযো যাথাৰতো পরিজানন্তো দানাদযো গুণে ৰিসেসনিব্বেধভাগিযভাৰং নযন্তো বোধিসত্তসিক্খায পরিপূরকারী হোতীতি এৰমাদিনা অনেকাকারৰোকারে পঞ্ঞাগুণে ৰৰত্থপেত্ৰা পঞ্ঞাপারমী অনুব্রূহেতব্বা.

তথা দিস্সমানপারানিপি লোকিযানি কম্মানি নিহীনৰীরিযেন পাপুণিতুং অসক্কুণেয্যানি, অগণিতখেদেন পন আরদ্ধৰীরিযেন দুরধিগমং নাম নত্থি. নিহীনৰীরিযো হি ‘‘সংসারমহোঘতো সব্বসত্তে সন্তারেস্সামী’’তি আরভিতুমেৰ ন সক্কুণোতি. মজ্ঝিমো আরভিত্ৰা অন্তরাৰোসানমাপজ্জতি. উক্কট্ঠৰীরিযো পন অত্তসুখনিরপেক্খো আরম্ভপারং অধিগচ্ছতীতি ৰীরিযসম্পত্তি পচ্চৰেক্খিতব্বা. অপিচ ‘‘যস্স অত্তনোযেৰ সংসারপঙ্কতো সমুদ্ধরণত্থমারম্ভো, তস্সাপি ৰীরিযস্স সিথিলভাৰেন মনোরথানং মত্থকপ্পত্তি ন সক্কা সম্ভাৰেতুং, পগেৰ সদেৰকস্স লোকস্স সমুদ্ধরণত্থং কতাভিনীহারেনা’’তি চ ‘‘রাগাদীনং দোসগণানং মত্তমহাগজানং ৰিয দুন্নিৰারযভাৰতো, তন্নিদানানঞ্চ কম্মসমাদানানং উক্খিত্তাসিকৰধকসদিসভাৰতো, তন্নিমিত্তানঞ্চ দুগ্গতীনং সব্বদা ৰিৰটমুখভাৰতো, তত্থ নিযোজকানঞ্চ পাপমিত্তানং সদা সন্নিহিতভাৰতো, তদোৰাদকারিতায চ বালস্স পুথুজ্জনভাৰস্স সতি সম্ভৰে যুত্তং সযমেৰ সংসারদুক্খতো নিস্সরিতু’’ন্তি চ ‘‘মিচ্ছাৰিতক্কা ৰীরিযানুভাৰেন দূরী ভৰন্তী’’তি চ ‘‘যদি পন সম্বোধি অত্তাধীনেন ৰীরিযেন সক্কা সমধিগন্তুং, কিমেত্থ দুক্কর’’ন্তি চ এৰমাদিনা নযেন ৰীরিযস্স গুণাপচ্চৰেক্খিতব্বা.

তথা ‘‘খন্তি নামাযং নিরৰসেসগুণপটিপক্খস্স কোধস্স ৰিধমনতো গুণসম্পাদনে সাধূনমপ্পটিহতমাযুধং, পরাভিভৰনে সমত্থানং অলঙ্কারো, সমণব্রাহ্মণানং বলসম্পদা, কোধগ্গিৰিনযনী উদকধারা, কল্যাণস্স কিত্তিসদ্দস্স সঞ্জাতিদেসো, পাপপুগ্গলানং ৰচীৰিসৰূপসমকরো মন্তাগদো, সংৰরে ঠিতানং পরমা ধীরপকতি, গম্ভীরাসযতায সাগরো, দোসমহাসাগরস্স ৰেলা, অপাযদ্ৰারস্স পিধানকৰাটং, দেৰব্রহ্মলোকানং আরোহণসোপানং, সব্বগুণানং অধিৰাসনভূমি, উত্তমা কাযৰচীমনোৰিসুদ্ধী’’তি মনসি কাতব্বং. অপি চ ‘‘এতে সত্তা খন্তিসম্পত্তিযা অভাৰতো ইধ চেৰ তপন্তি, পরলোকে চ তপনীযধম্মানুযোগতো’’তি চ ‘‘যদিপি পরাপকারনিমিত্তং দুক্খং উপ্পজ্জতি, তস্স পন দুক্খস্স খেত্তভূতো অত্তভাৰো, বীজভূতঞ্চ কম্মং মযাৰ অভিসঙ্খত’’ন্তি চ ‘‘তস্স দুক্খস্স আণণ্যকারণমেত’’ন্তি চ ‘‘অপকারকে অসতি কথং ময্হং খন্তিসম্পদা সম্ভৰতী’’তি চ ‘‘যদিপাযং এতরহি অপকারকো, অযং নাম পুব্বে অনেন ময্হং উপকারো কতো’’তি চ ‘‘অপকারো এৰ ৰা খন্তিনিমিত্ততায উপকারো’’তি চ ‘‘সব্বেপিমে সত্তা ময্হং পুত্তসদিসা, পুত্তকতাপরাধেসু চ কো কুজ্ঝিস্সতী’’তি চ ‘‘যেন কোধভূতাৰেসেন অযং ময্হং অপরজ্ঝতি, সো কোধভূতাৰেসো মযা ৰিনেতব্বো’’তি চ ‘‘যেন অপকারেন ইদং ময্হং দুক্খং উপ্পন্নং, তস্স অহম্পি নিমিত্ত’’ন্তি চ ‘‘যেহি ধম্মেহি অপরাধো কতো, যত্থ চ কতো, সব্বেপি তে তস্মিংযেৰ খণে নিরুদ্ধা, কস্সিদানি কেন কোধো কাতব্বো’’তি চ ‘‘অনত্ততায সব্বধম্মানং কো কস্স অপরজ্ঝতী’’তি চ পচ্চৰেক্খন্তেন খন্তিসম্পদা ব্রূহেতব্বা.

যদি পনস্স দীঘরত্তং পরিচযেন পরাপকারনিমিত্তকো কোধো চিত্তং পরিযাদায তিট্ঠেয্য, ইতি পটিসঞ্চিক্খিতব্বং ‘‘খন্তি নামেসা পরাপকারস্স পটিপক্খপটিপত্তীনং পচ্চুপকারকারণ’’ন্তি চ ‘‘অপকারো চ ময্হং দুক্খুপ্পাদনেন দুক্খুপনিসায সদ্ধায, সব্বলোকে অনভিরতিসঞ্ঞায চ পচ্চযো’’তি চ ‘‘ইন্দ্রিযপকতিরেসা, যদিদং ইট্ঠানিট্ঠৰিসযসমাযোগো, তত্থ অনিট্ঠৰিসযসমাযোগো ময্হং ন সিযাতি তং কুতেত্থ লব্ভা’’তি চ ‘‘কোধৰসিকো সত্তো কোধেন উম্মত্তো ৰিক্খিত্তচিত্তো, তত্থ কিং পচ্চপকারেনা’’তি চ ‘‘সব্বে পিমে সত্তা সম্মাসম্বুদ্ধেন ওরসপুত্তা ৰিয পরিপালিতা, তস্মা ন তত্থ মযা চিত্তকোপোপি কাতব্বো’’তি চ ‘‘অপরাধকে চ সতি গুণে গুণৰতি মযা ন কোপো কাতব্বো’’তি চ ‘‘অসতি গুণে ৰিসেসেন করুণাযিতব্বো’’তি চ ‘‘কোপেন চ ময্হং গুণযসা নিহীযন্তী’’তি চ ‘‘কুজ্ঝনেন ময্হং দুব্বণ্ণদুক্খসেয্যাদযো সপত্তকন্তা আগচ্ছন্তী’’তি চ ‘‘কোধো চ নামাযং সব্বাহিতকারকো সব্বহিতৰিনাসকো বলৰা পচ্চত্থিকো’’তি চ ‘‘সতি চ খন্তিযা ন কোচি পচ্চত্থিকো’’তি চ ‘‘অপরাধকেন অপরাধনিমিত্তং যং আযতিং লদ্ধব্বং দুক্খং, সতি চ খন্তিযা ময্হং তদভাৰো’’তি চ ‘‘চিন্তনেন কুজ্ঝন্তেন চ মযা পচ্চত্থিকোযেৰ অনুৰত্তিতো হোতী’’তি চ ‘‘কোধে চ মযা খন্তিযা অভিভূতে তস্স দাসভূতো পচ্চত্থিকো সম্মদেৰ অভিভূতো হোতী’’তি চ ‘‘কোধনিমিত্তং খন্তিগুণপরিচ্চাগো ময্হং ন যুত্তো’’তি চ ‘‘সতি চ কোধে গুণৰিরোধিনি (গুণৰিরোধপচ্চনীধম্মে চরিযা. অট্ঠ. পকিণ্ণককথাযং) কিং মে সীলাদিধম্মা পারিপূরিং গচ্ছেয্যুং, অসতি চ তেসু কথাহং সত্তানং উপকারবহুলো পটিঞ্ঞানুরূপং উত্তমং সম্পত্তিং পাপুণিস্সামী’’তি চ ‘‘খন্তিযা চ সতি বহিদ্ধা ৰিক্খেপাভাৰতো সমাহিতস্স সব্বে সঙ্খারা অনিচ্চতো দুক্খতো সব্বে ধম্মা অনত্ততো নিব্বানঞ্চ অসঙ্খতামতসন্তপণীতাদিভাৰতো নিজ্ঝানং খমন্তি ‘বুদ্ধধম্মা চ অচিন্তেয্যাপরিমেয্যপভাৰা’তি’’, ততো চ ‘‘অনুলোমিযং খন্তিযং ঠিতো ‘কেৰলা ইমে চ অত্তত্তনিযভাৰরহিতা ধম্মমত্তা যথাসকং পচ্চযেহি উপ্পজ্জন্তি ৰযন্তি, ন কুতোচি আগচ্ছন্তি, ন কুহিঞ্চি গচ্ছন্তি, ন চ কত্থচি পতিট্ঠিতা, ন চেত্থ কোচি কস্সচি ব্যাপারো’তি অহংকারমমংকারানধিট্ঠানতা নিজ্ঝানং খমতি, যেন বোধিসত্তো বোধিযা নিযতো অনাৰত্তিধম্মো হোতী’’তি এৰমাদিনা খন্তিপারমিযং পচ্চৰেক্খণা ৰেদিতব্বা.

তথা ‘‘সচ্চেন ৰিনা সীলাদীনং অসম্ভৰতো, পটিঞ্ঞানুরূপং পটিপত্তিযা অভাৰতো চ সচ্চধম্মাতিক্কমে চ সব্বপাপধম্মানং সমোসরণতো, অসচ্চসন্ধস্স অপ্পচ্চযিকভাৰতো, আযতিঞ্চ অনাদেয্যৰচনতাৰহনতো, সম্পন্নসচ্চস্স চ সব্বগুণাধিট্ঠানভাৰতো, সচ্চাধিট্ঠানেন সব্ববোধিসম্ভারানং পারিসুদ্ধিপারিপূরিসমন্ৰাযতো, সভাৰধম্মাৰিসংৰাদনেন সব্ববোধিসম্ভারকিচ্চকরণতো, বোধিসত্তপটিপত্তিযা চ পরিনিপ্ফত্তিতো’’তিআদিনা সচ্চপারমিযা সম্পত্তিযো পচ্চৰেক্খিতব্বা.

তথা ‘‘দানাদীসু দল়্হসমাদানং, তম্পটিপক্খসন্নিপাতে চ নেসং অচলাৰত্থানং, তত্থ চ থিরভাৰং ৰিনা ন দানাদিসম্ভারা সম্বোধিনিমিত্তা সম্ভৰন্তী’’তিআদিনা অধিট্ঠানে গুণা পচ্চৰেক্খিতব্বা.

তথা ‘‘অত্তহিতমত্তে অৰতিট্ঠন্তেনাপি সত্তেসু হিতচিত্ততং ৰিনা ন সক্কা ইধলোকপরলোকসম্পত্তিযো পাপুণিতুং, পগেৰ সব্বসত্তে নিব্বানসম্পত্তিযং পতিট্ঠাপেতুকামেনা’’তি চ ‘‘পচ্ছা সব্বসত্তানং লোকুত্তরসম্পত্তিং আকঙ্খন্তেন ইদানি লোকিযসম্পত্তিং আকঙ্খা যুত্তরূপা’’তি চ ‘‘ইদানি আসযমত্তেন পরেসং হিতসুখূপসংহারং কাতুং অসক্কোন্তো কদা পযোগেন তং সাধেস্সামী’’তি চ ‘‘ইদানি মযা হিতসুখূপসংহারেন সংৰদ্ধিতা পচ্ছা ধম্মসংৰিভাগসহাযা ময্হং ভৰিস্সন্তী’’তি চ ‘‘এতেহি ৰিনা ন ময্হং বোধিসম্ভারা সম্ভৰন্তি, তস্মা সব্ববুদ্ধগুণৰিভূতিনিপ্ফত্তিকারণত্তা ময্হং এতে পরমং পুঞ্ঞক্খেত্তং অনুত্তরং কুসলাযতনং উত্তমং গারৰট্ঠান’’ন্তি চ ‘‘সৰিসেসং সত্তেসু সব্বেসু হিতজ্ঝাসযতা পচ্চুপট্ঠপেতব্বা, কিঞ্চ করুণাধিট্ঠানতোপি সব্বসত্তেসু মেত্তা অনুব্রূহেতব্বা. ৰিমরিযাদীকতেন হি চেতসা সত্তেসু হিতসুখূপসংহারনিরতস্স তেসং অহিতদুক্খাপনযনকামতা বলৰতী উপ্পজ্জতি দল়্হমূলা, করুণা চ সব্বেসং বুদ্ধকারকধম্মানমাদি চরণং পতিট্ঠা মূলং মুখং পমুখ’’ন্তি এৰমাদিনা মেত্তায গুণা পচ্চৰেক্খিতব্বা.

তথা ‘‘উপেক্খায অভাৰে সত্তেহি কতা ৰিপ্পকারা চিত্তস্স ৰিকারং উপ্পাদেয্যুং, সতি চ চিত্তৰিকারে দানাদিসম্ভারানং সম্ভৰোযেৰ নত্থী’’তি চ ‘‘মেত্তাসিনেহেন সিনেহিতে চিত্তে উপেক্খায ৰিনা সম্ভারানং পারিসুদ্ধি ন হোতী’’তি চ ‘‘অনুপেক্খকো সম্ভারেসু পুঞ্ঞসম্ভারং তব্বিপাকঞ্চ সত্তহিতত্থং পরিণামেতুং ন সক্কোতী’’তি চ ‘‘উপেক্খায অভাৰে দেয্যপটিগ্গাহকেসু ৰিভাগং অকত্ৰা পরিচ্চজিতুং ন সক্কোতী’’তি চ ‘‘উপেক্খারহিতেন জীৰিতপরিক্খারানং জীৰিতস্স চ অন্তরাযং অমনসিকরিত্ৰা সংৰরৰিসোধনং কাতুং ন সক্কা’’তি চ ‘‘উপেক্খাৰসেন অরতিরতিসহস্সেৰ নেক্খম্মবলসিদ্ধিতো, উপপত্তিতো ইক্খনৰসেনেৰ সব্বসম্ভারকিচ্চনিপ্ফত্তিতো, অচ্চারদ্ধস্স ৰীরিযস্স অনুপেক্খনে পধানকিচ্চাকরণতো, উপেক্খতোযেৰ তিতিক্খানিজ্ঝানসম্ভৰতো, উপেক্খাৰসেন সত্তসঙ্খারানং অৰিসংৰাদনতো, লোকধম্মানং অজ্ঝুপেক্খনেন সমাদিন্নধম্মেসু অচলাধিট্ঠানসিদ্ধিতো, পরাপকারাদীসু অনাভোগৰসেনেৰ মেত্তাৰিহারনিপ্ফত্তিতোতি সব্ববোধিসম্ভারানং সমাদানাধিট্ঠানপারিপূরিনিপ্ফত্তিযো উপেক্খানুভাৰেন সম্পজ্জন্তী’’তি এৰং আদিনা নযেন উপেক্খাপারমী পচ্চৰেক্খিতব্বা. এৰং অপরিচ্চাগপরিচ্চাগাদীসু যথাক্কমং আদীনৰানিসংসপচ্চৰেক্খণা দানাদিপারমীনং পচ্চযোতি ৰেদিতব্বা.

তথা সপরিক্খারা পঞ্চদস চরণধম্মা পঞ্চ চ অভিঞ্ঞাযো. তত্থ চরণধম্মা নাম সীলসংৰরো, ইন্দ্রিযেসু গুত্তদ্ৰারতা, ভোজনে মত্তঞ্ঞুতা, জাগরিযানুযোগো, সত্ত সদ্ধম্মা, চত্তারি ঝানানি চ. তেসু সীলাদীনং চতুন্নং তেরসপি ধুতধম্মা, অপ্পিচ্ছতাদযো চ পরিক্খারো. সদ্ধম্মেসু সদ্ধায বুদ্ধধম্মসঙ্ঘসীলচাগদেৰতূপসমানুস্সতি- লূখপুগ্গলপরিৰজ্জনসিনিদ্ধপুগ্গলসেৰনপসাদনীয- ধম্মপচ্চৰেক্খণতদধিমুত্ততা পরিক্খারো, হিরোত্তপ্পানং অকুসলাদীনৰপচ্চৰেক্খণঅপাযাদীনৰপচ্চৰেক্খণকুসলধম্মুপত্থম্ভন- ভাৰপচ্চৰেক্খণহিরোত্তপ্প রহিতপুগ্গলপরিৰজ্জনহিরোত্তপ্পসম্পন্নপুগ্গলসেৰনতদধিমুত্ততা, বাহুসচ্চস্স পুব্বযোগপরিপুচ্ছকভাৰসদ্ধম্মাভিযোগঅনৰজ্জৰিজ্জাট্ঠানাদি- পরিচযপরিপক্কিন্দ্রিযতাকিলেসদূরীভাৰঅপ্পস্সুতপরিৰজ্জনবহুস্সুতসেৰনতদধিমুত্ততা, ৰীরিযস্স অপাযভযপচ্চৰেক্খণগমনৰীথিপচ্চৰেক্খণধম্মমহত্তপচ্চৰেক্খণ- থিনমিদ্ধৰিনোদনকুসীতপুগ্গলপরিৰজ্জনআরদ্ধৰীরিযপুগ্গল- সেৰনসম্মপ্পধানপচ্চৰেক্খণতদধিমুত্ততা, সতিযা সতিসম্পজঞ্ঞমুট্ঠস্সতিপুগ্গলপরিৰজ্জনউপট্ঠিতস্সতিপুগ্গলসেৰনতদধিমুত্ততা, পঞ্ঞায পরিপুচ্ছকভাৰৰত্থুৰিসদকিরিযাইন্দ্রিযসমত্তপটিপাদনদুপ্পঞ্ঞ- পুগ্গলপরিৰজ্জনপঞ্ঞৰন্তপুগ্গলসেৰনগম্ভীরঞাণচরিযপচ্চ- ৰেক্খণতদধিমুত্ততা, চতুন্নং ঝানানং সীলাদিচতুক্কং অট্ঠতিংসায আরম্মণেসু পুব্বভাগভাৰনা, আৰজ্জনাদিৰসীভাৰকরণঞ্চ পরিক্খারো. তত্থ সীলাদীহি পযোগসুদ্ধিযা সত্তানং অভযদানে, আসযসুদ্ধিযা আমিসদানে, উভযসুদ্ধিযা চ ধম্মদানে সমত্থো হোতীতিআদিনা চরণাদীনং দানাদিসম্ভারানং পচ্চযভাৰো যথারহং নিদ্ধারেতব্বো, অতিৰিত্থারভযেন ন নিদ্ধারযিম্হ. এৰং সম্পত্তিচক্কাদযোপি দানাদীনং পচ্চযোতি ৰেদিতব্বা.

কো সংকিলেসোতি অৰিসেসেন তণ্হাদীহি পরামট্ঠভাৰো পারমীনং সংকিলেসো, ৰিসেসেন দেয্যপটিগ্গাহকৰিকপ্পা দানপারমিযা সংকিলেসো, সত্তকালৰিকপ্পা সীলপারমিযা, কামভৰতদুপসমেসু অভিরতিঅনভিরতিৰিকপ্পা নেক্খম্মপারমিযা, ‘‘অহং মমা’’তি ৰিকপ্পা পঞ্ঞাপারমিযা, লীনুদ্ধচ্চৰিকপ্পা ৰীরিযপারমিযা, অত্তপরৰিকপ্পা খন্তিপারমিযা, অদিট্ঠাদীসু দিট্ঠাদিৰিকপ্পা সচ্চপারমিযা, বোধিসম্ভারতব্বিপক্খেসু দোসগুণৰিকপ্পা অধিট্ঠানপারমিযা, হিতাহিতৰিকপ্পা মেত্তাপারমিযা, ইট্ঠানিট্ঠৰিকপ্পা উপেক্খাপারমিযা সংকিলেসোতি ৰেদিতব্বো.

কিং ৰোদানন্তি তণ্হাদীহি অনুপঘাতো, যথাৰুত্তৰিকপ্পৰিরহো চ এতাসং ৰোদানন্তি ৰেদিতব্বং. অনুপহতা হি তণ্হামানদিট্ঠিকোধূপনাহমক্খপলাসইস্সামচ্ছরিযমাযাসাঠেয্যথম্ভসারম্ভ- মদপমাদাদীহি কিলেসেহি দেয্যপটিগ্গাহকৰিকপ্পাদিরহিতা চ দানাদিপারমিযো পরিসুদ্ধা পভস্সরা ভৰন্তীতি.

কো পটিপক্খোতি অৰিসেসেন সব্বেপি কিলেসা সব্বেপি অকুসলা ধম্মা এতাসং পটিপক্খো, ৰিসেসেন পন পুব্বে ৰুত্তা মচ্ছেরাদযোতি ৰেদিতব্বা. অপিচ দেয্যপটিগ্গাহকদানফলেসু অলোভাদোসামোহগুণযোগতো লোভদোসমোহপটিপক্খং দানং, কাযাদিদোসৰঙ্কাপগমনতো লোভাদিপটিপক্খং সীলং, কামসুখপরূপঘাতঅত্তকিলমথপরিৰজ্জনতো দোসত্তযপটিপক্খং নেক্খম্মং, লোভাদীনং অন্ধীকরণতো, ঞাণস্স চ অনন্ধীকরণতো লোভাদিপটিপক্খা পঞ্ঞা, অলীনানুদ্ধতঞাযারম্ভৰসেন লোভাদিপটিপক্খং ৰীরিযং, ইট্ঠানিট্ঠসুঞ্ঞতানং খমনতো লোভাদিপটিপক্খা খন্তি, সতিপি পরেসং উপকারে অপকারে চ যথাভূতপ্পৰত্তিযা লোভাদিপটিপক্খং সচ্চং, লোকধম্মে অভিভুয্য যথাসমাদিন্নেসু সম্ভারেসু অচলনতো লোভাদিপটিপক্খং অধিট্ঠানং, নীৰরণৰিৰেকতো লোভাদিপটিপক্খা মেত্তা, ইট্ঠানিট্ঠেসু অনুনযপটিঘৰিদ্ধংসনতো, সমপ্পৰত্তিতো চ লোভাদিপটিপক্খা উপেক্খাতি দট্ঠব্বং.

কা পটিপত্তীতি সুখূপকরণসরীরজীৰিতপরিচ্চাগেন ভযাপনূদনেন ধম্মোপদেসেন চ বহুধা সত্তানং অনুগ্গহকরণং দানে পটিপত্তি. তত্থাযং ৰিত্থারনযো – ‘‘ইমিনাহং দানেন সত্তানং আযুৰণ্ণসুখবলপটিভানাদিসম্পত্তিং রমণীযং অগ্গফলসম্পত্তিং নিপ্ফাদেয্য’’ন্তি অন্নদানং দেতি, তথা সত্তানং কম্মকিলেসপিপাসৰূপসমায পানং দেতি, তথা সুৰণ্ণৰণ্ণতায, হিরোত্তপ্পালঙ্কারস্স চ নিপ্ফত্তিযা ৰত্থানি দেতি, তথা ইদ্ধিৰিধস্স চেৰ নিব্বানসুখস্স চ নিপ্ফত্তিযা যানং দেতি, তথা সীলগন্ধনিপ্ফত্তিযা গন্ধং, বুদ্ধগুণসোভানিপ্ফত্তিযা মালাৰিলেপনং, বোধিমণ্ডাসননিপ্ফত্তিযা আসনং, তথাগতসেয্যানিপ্ফত্তিযা সেয্যং, সরণভাৰনিপ্ফত্তিযা আৰসথং, পঞ্চচক্খুপটিলাভায পদীপেয্যং দেতি. ব্যামপ্পভানিপ্ফত্তিযা রূপদানং, ব্রহ্মস্সরনিপ্ফত্তিযা সদ্দদানং, সব্বলোকস্স পিযভাৰায রসদানং, বুদ্ধসুখুমালভাৰায ফোট্ঠব্বদানং, অজরামরণভাৰায ভেসজ্জদানং, কিলেসদাসব্যৰিমোচনত্থং দাসানং ভুজিস্সতাদানং, সদ্ধম্মাভিরতিযা অনৰজ্জখিড্ডারতিহেতুদানং, সব্বেপি সত্তে অরিযায জাতিযা অত্তনো পুত্তভাৰূপনযনায পুত্তদানং, সকলস্স লোকস্স পতিভাৰূপগমনায দারদানং, সুভলক্খণসম্পত্তিযা সুৰণ্ণমণিমুত্তাপৰাল়াদিদানং, অনুব্যঞ্জনসম্পত্তিযা নানাৰিধৰিভূসনদানং, সদ্ধম্মকোসাধিগমায ৰিত্তকোসদানং, ধম্মরাজভাৰায রজ্জদানং, ঝানাদিসম্পত্তিযা আরামুয্যানাদিৰনদানং, চক্কঙ্কিতেহি পাদেহি বোধিমণ্ডূপসঙ্কমনায চরণদানং, চতুরোঘনিত্থরণায সত্তানং সদ্ধম্মহত্থদানত্থং হত্থদানং, সদ্ধিন্দ্রিযাদিপটিলাভায কণ্ণনাসাদিদানং, সমন্তচক্খুপটিলাভায চক্খুদানং, ‘‘দস্সনসৰনানুস্সরণপারিচরিযাদীসু সব্বকালং সব্বসত্তানং হিতসুখাৰহো, সব্বলোকেন চ উপজীৰিতব্বো মে কাযো ভৰেয্যা’’তি মংসলোহিতাদিদানং, ‘‘সব্বলোকুত্তমো ভৰেয্য’’ন্তি উত্তমঙ্গদানং দেতি.

এৰং দদন্তো চ ন অনেসনায দেতি, ন পরোপঘাতেন, ন ভযেন, ন লজ্জায, ন দক্খিণেয্যরোসনেন, ন পণীতে সতি লূখং, ন অত্তুক্কংসনেন, ন পরৰম্ভনেন, ন ফলাভিকঙ্খায, ন যাচকজিগুচ্ছায, ন অচিত্তীকারেন দেতি, অথ খো সক্কচ্চং দেতি, সহত্থেন দেতি, কালেন দেতি, চিত্তিং কত্ৰা দেতি, অৰিভাগেন দেতি, তীসু কালেসু সোমনস্সিতো দেতি. ততোযেৰ দত্ৰা ন পচ্ছানুতাপী হোতি, ন পটিগ্গাহকৰসেন মানাৰমানং করোতি, পটিগ্গাহকানং পিযসমুদাচারো হোতি ৰদঞ্ঞূ যাচযোগো সপরিৰারদাযী. তঞ্চ দানসম্পত্তিং সকললোকহিতসুখায পরিণামেতি, অত্তনো চ অকুপ্পায ৰিমুত্তিযা, অপরিক্খযস্স ছন্দস্স, অপরিক্খযস্স ৰীরিযস্স, অপরিক্খযস্স সমাধানস্স, অপরিক্খযস্স ঞাণস্স, অপরিক্খযায সম্মাসম্বোধিযা পরিণামেতি. ইমঞ্চ দানপারমিং পটিপজ্জন্তেন মহাসত্তেন জীৰিতে, ভোগেসু চ অনিচ্চসঞ্ঞা পচ্চুপট্ঠপেতব্বা, সত্তেসু চ মহাকরুণা. এৰঞ্হি ভোগে গহেতব্বসারং গণ্হন্তো আদিত্তস্মা ৰিয অগারস্মা সব্বং সাপতেয্যং, অত্তানঞ্চ বহি নীহরন্তো ন কিঞ্চি সেসেতি, নিরৰসেসতো নিস্সজ্জতিযেৰ. অযং তাৰ দানপারমিযা পটিপত্তিক্কমো.

সীলপারমিযা পন যস্মা সব্বঞ্ঞুসীলালঙ্কারেহি সত্তে অলঙ্করিতুকামেন অত্তনোযেৰ তাৰ সীলং ৰিসোধেতব্বং, তস্মা সত্তেসু তথা দযাপন্নচিত্তেন ভৰিতব্বং, যথা সুপিনন্তেনপি ন আঘাতো উপ্পজ্জেয্য. পরূপকারনিরততায পরসন্তকো অলগদ্দো ৰিয ন পরামসিতব্বো. অব্রহ্মচরিযতোপি আরাচারী, সত্তৰিধমেথুন সংযোগৰিরতো, পগেৰ পরদারগমনতো. সচ্চং হিতং পিযং পরিমিতমেৰ চ কালেন ধম্মিং কথং ভাসিতা হোতি, অনভিজ্ঝালু অব্যাপন্নো অৰিপরীতদস্সনো সম্মাসম্বুদ্ধে নিৰিট্ঠসদ্ধো নিৰিট্ঠপেমো. ইতি চতুরাপাযৰট্টদুক্খপথেহি অকুসলকম্মপথেহি, অকুসলধম্মেহি চ ওরমিত্ৰা সগ্গমোক্খপথেসু কুসলকম্মপথেসু পতিট্ঠিতস্স সুদ্ধাসযপযোগতায যথাভিপত্থিতা সত্তানং হিতসুখূপসঞ্হিতা মনোরথা সীঘং অভিনিপ্ফজ্জন্তি.

তত্থ হিংসানিৰত্তিযা সব্বসত্তানং অভযদানং দেতি, অপ্পকসিরেনেৰ মেত্তাভাৰনং সম্পাদেতি, একাদস মেত্তানিসংসে অধিগচ্ছতি, অপ্পাবাধো হোতি অপ্পাতঙ্কো দীঘাযুকো সুখবহুলো, লক্খণৰিসেসে পাপুণাতি, দোসৰাসনঞ্চ সমুচ্ছিন্দতি. তথা অদিন্নাদাননিৰত্তিযা চোরাদিঅসাধারণে উল়ারে ভোগে অধিগচ্ছতি, অনাসঙ্কনীযো পিযো মনাপো ৰিস্সসনীযো, ৰিভৰসম্পত্তীসু অলগ্গচিত্তো পরিচ্চাগসীলো, লোভৰাসনঞ্চ সমুচ্ছিন্দতি. অব্রহ্মচরিযনিৰত্তিযা অলোভো হোতি সন্তকাযচিত্তো, সত্তানং পিযো হোতি মনাপো অপরিসঙ্কনীযো, কল্যাণো চস্স কিত্তিসদ্দো অব্ভুগ্গচ্ছতি, অলগ্গচিত্তো হোতি মাতুগামেসু অলুদ্ধাসযো, নেক্খম্মবহুলো, লক্খণৰিসেসে অধিগচ্ছতি, লোভৰাসনঞ্চ সমুচ্ছিন্দতি.