২. সামঞ্ঞফলসুত্তৰণ্ণনা

রাজামচ্চকথাৰণ্ণনা

১৫০. রাজগহেতি এত্থ দুগ্গজনপদট্ঠানৰিসেসসম্পদাদিযোগতো পধানভাৰেন রাজূহি গহিতন্তি রাজগহন্তি আহ ‘‘মন্ধাতু…পে… ৰুচ্চতী’’তি. তত্থ মহাগোৰিন্দেন মহাসত্তেন পরিগ্গহিতং রেণুআদীহি রাজূহি পরিগ্গহিতমেৰ হোতীতি মহাগোৰিন্দগ্গহণং. মহাগোৰিন্দোতি মহানুভাৰো একো পুরাতনো রাজাতি কেচি. পরিগ্গহিতত্তাতি রাজধানীভাৰেন পরিগ্গহিতত্তা. পকারেতি নগরমাপনেন রঞ্ঞা কারিতসব্বগেহত্তা রাজগহং, গিজ্ঝকূটাদীহি পরিক্খিত্তত্তা পব্বতরাজেহি পরিক্খিত্তগেহসদিসন্তিপি রাজগহং, সম্পন্নভৰনতায রাজমানং গেহন্তি পি রাজগহং, সংৰিহিতারক্খতায অনত্থাৰহভাৰেন উপগতানং পটিরাজূনং গহং গেহভূতন্তিপি রাজগহং, রাজূহি দিস্ৰা সম্মা পতিট্ঠাপিতত্তা তেসং গহং গেহভূতন্তিপি রাজগহং, আরামরামণেয্যকাদীহি রাজতে, নিৰাসসুখতাদিনা সত্তেহি মমত্তৰসেন গয্হতি, পরিগ্গয্হতীতি ৰা রাজগহন্তি এদিসে পকারে সো পদেসো ঠানৰিসেসভাৰেন উল়ারসত্তপরিভোগোতি আহ ‘‘তং পনেত’’ন্তিআদি. তেসন্তি যক্খানং. ৰসনৰনন্তি আপানভূমিভূতং উপৰনং.

অৰিসেসেনাতি ‘‘পাতিমোক্খসংৰরসংৰুতো ৰিহরতি’’ (ম. নি. ১.৬৯; ৩.৭৫; ৰিভ. ৫০৮), ‘‘পঠমং ঝানং উপসম্পজ্জ ৰিহরতি, (দী. নি. ১.২২৬; সং. নি. ২.১৫২; অ. নি. ৪.১২৩; পারা. ১১) ‘‘মেত্তাসহগতেন চেতসা একং দিসং ফরিত্ৰা ৰিহরতি’’, (দী. নি. ১.৫৫৬; ৩.৩০৮; ম. নি. ১.৭৭, ৪৫৯, ৫০৯; ২.৩০৯, ৩১৫, ৪৫১, ৪৭১; ৩.২৩০; ৰিভ. ৬৪২) ‘‘সব্বনিমিত্তানং অমনসিকারা অনিমিত্তং চেতোসমাধিং সমাপজ্জিত্ৰা ৰিহরতী’’তিআদীসু (ম. নি. ১.৪৫৯) ৰিয সদ্দন্তরসন্নিধানসিদ্ধেন ৰিসেসপরামসনেন ৰিনা. ইরিযায কাযিককিরিযায পৰত্তনূপাযভাৰতো পথোতি ইরিযাপথো. ঠানাদীনঞ্হি গতিনিৰত্তি আদিঅৰত্থাহি ৰিনা ন কঞ্চি কাযিককিরিযং পৰত্তেতুং সক্কা. ৰিহরতি পৰত্ততি এতেন, ৰিহরণঞ্চাতি ৰিহারো, দিব্বভাৰাৰহো ৰিহারো দিব্বৰিহারো, মহগ্গতজ্ঝানানি. নেত্তিযং পন ‘‘চতস্সো আরুপ্পসমাপত্তিযো আনেঞ্জা ৰিহারা’’তি ৰুত্তং. তং তাসং মেত্তাঝানাদীনং ব্রহ্মৰিহারতা ৰিয ভাৰনাৰিসেসভাৰং সন্ধায ৰুত্তং. অট্ঠকথাসু পন দিব্বভাৰাৰহসামঞ্ঞতো তাপি ‘‘দিব্বৰিহারা’’ ত্ৰেৰ ৰুত্তা. হিতূপসংহারাদিৰসেন পৰত্তিযা ব্রহ্মভূতা সেট্ঠভূতা ৰিহারাতি ব্রহ্মৰিহারা, মেত্তাঝানাদিকা. অনঞ্ঞসাধারণত্তা অরিযানং ৰিহারাতি অরিযৰিহারা, চতস্সোপি ফলসমাপত্তিযো. সমঙ্গীপরিদীপনন্তি সমঙ্গিভাৰপরিদীপনং. ইরিযাপথসমাযোগপরিদীপনং ইতরৰিহারসমাযোগপরিদীপনস্স ৰিসেসৰচনস্স অভাৰতো, ইরিযাপথসমাযোগপরিদীপনস্স চ অত্থসিদ্ধত্তা. ৰিহরতীতি এত্থ ৰি-সদ্দো ৰিচ্ছেদত্থজোতনো, হরতীতি নেতি, পৰত্তেতীতি অত্থো. তত্থ কস্স কেন ৰিচ্ছিন্দনং, কথং কস্স পৰত্তনন্তি অন্তোলীনং চোদনং সন্ধাযাহ ‘‘সো হী’’তিআদি.

গোচরগামদস্সনত্থং ‘‘রাজগহে’’তি ৰত্ৰা বুদ্ধানং অনুরূপনিৰাসনট্ঠানদস্সনত্থং ‘‘অম্বৰনে’’তি ৰুত্তন্তি আহ ‘‘ইদমস্সা’’তিআদি. এতন্তি এতং ‘‘রাজগহে’’তি ভুম্মৰচনং সমীপত্থে ‘‘গঙ্গায গাৰো চরন্তি, কূপে গগ্গকুল’’ন্তি চ যথা. কুমারেন ভতোতি কুমারভতো, সো এৰ কোমারভচ্চো যথা ভিসগ্গমেৰ ভেসজ্জং. দোসাভিসন্নন্তি ৰাতপিত্তাদিৰসেন উস্সন্নদোসং. ৰিরেচেত্ৰাতি দোসপকোপতো ৰিৰেচেত্ৰা.

অড্ঢতেল়সহীতি অড্ঢেন তেরসহি অড্ঢতেরসহি ভিক্খুসতেহি. তানি পন পঞ্ঞাসায ঊনানি তেরসভিক্খুসতানি হোন্তীতি আহ ‘‘অড্ঢসতেনা’’তিআদি.

রাজতীতি দিব্বতি, সোভতীতি অত্থো. রঞ্জেতীতি রমেতি. রঞ্ঞোতি পিতু বিম্বিসাররঞ্ঞো. সাসনট্ঠেন হিংসনট্ঠেন সত্তু.

ভারিযেতি গরুকে অঞ্ঞেসং অসক্কুণেয্যে ৰা. সুৰণ্ণসত্থকেনাতি সুৰণ্ণমযেন সত্থকেন. অযোমযঞ্হি রঞ্ঞো সরীরং উপনেতুং অযুত্তন্তি ৰদতি. সুৰণ্ণসত্থকেনাতি ৰা সুৰণ্ণপরিক্খতেন সত্থকেন বাহুং ফালাপেত্ৰাতি সিরাৰেধৰসেন বাহুং ফলাপেত্ৰা উদকেন সম্ভিন্দিত্ৰা পাযেসি কেৰলস্স লোহিতস্স গব্ভিনিত্থিযা দুজ্জীরভাৰতো. ধুরাতি ধুরভূতা, গণস্স, ধোরয্হাতি অত্থো. ধুরং নীহরামীতি গণধুরং গণবন্ধিযং নিব্বত্তেমি. ‘‘পুব্বে খো’’তিআদি খন্ধকপাল়ি এৰ.

পোত্থনিযন্তি ছুরিকং, যং ‘‘নখর’’ন্তিপি [পোথনিকন্তি ছুরিকং, যং খরন্তিপি (সারত্থ. টী. ৩.৩৩৯) পোথনিকন্তি ছুরিকং, খরন্তিপি (ৰি. ৰি. টী. ২.চূল়ৰগ্গৰণ্ণনা ৩৩৯)] ৰুচ্চতি. দিৰা দিৰস্সাতি দিৰস্সপি দিৰা, মজ্ঝন্হিকৰেলাযন্তি অত্থো.

তস্সা সরীরং লেহিত্ৰা যাপেতি অত্তূপক্কমেন মরণং ন যুত্তন্তি. ন হি অরিযসাৰকা অত্তানং ৰিনিপাতেন্তীতি. মগ্গফলসুখেনাতি মগ্গফলসুখাৰহেন সোতাপত্তিমগ্গফলসুখূপসঞ্হিতেন চঙ্কমেন যাপেতি.চেতিযঙ্গণেতি গন্ধপুপ্ফাদীহি পূজনট্ঠানভূতে চেতিযঙ্গণে. নিসজ্জনত্থাযাতি ভিক্খুসঙ্ঘনিসীদনত্থায. চাতুমহারাজিকদেৰলোকে…পে… যক্খো হুত্ৰা নিব্বত্তি তত্থ বহুলং নিব্বত্তপুব্বতায চিরপরিচিতনিকন্তিৰসেন.

খোভেত্ৰাতি পুত্তসিনেহস্স বলৰভাৰতো, সহজাতপীতিৰেগস্স চ সৰিপ্ফারতায তংসমুট্ঠানরূপধম্মেহি ফরণৰসেন সকলসরীরং আলোল়েত্ৰা. তেনাহ ‘‘অট্ঠিমিঞ্জং আহচ্চ অট্ঠাসী’’তি. পিতুগুণন্তি পিতু অত্তনি সিনেহগুণং. মুঞ্চাপেত্ৰাতি এত্থ ইতি-সদ্দো পকারত্থো, তেন ‘‘অভিমারকপুরিসপেসনাদিপ্পকারেনা’’তি ৰুত্তে এৰ পকারে পচ্চামসতি. ৰিত্থারকথানযোতি অজাতসত্তুপসাদনাদিৰসেন ৰিত্থারতো ৰত্তব্বায কথায নযমত্তং. কস্মা পনেত্থ ৰিত্থারনযা কথা ন ৰুত্তাতি আহ ‘‘আগতত্তা পন সব্বং ন ৰুত্ত’’ন্তি.

কোসলরঞ্ঞোতি মহাকোসলরঞ্ঞো. পণ্ডিতাধিৰচনন্তি পণ্ডিতৰেৰচনং. ৰিদন্তীতি জানন্তি. ৰেদেন ঞাণেন করণভূতেন ঈহতি পৰত্ততীতি ৰেদেহি.

এত্থাতি এতস্মিং দিৰসে. অনসনেন ৰাতি ৰা-সদ্দো অনিযমত্থো, তেন একচ্চমনোদুচ্চরিতদুস্সীল্যাদীনি সঙ্গণ্হাতি. তথা হি গোপালকূপোসথো অভিজ্ঝাসহগতচিত্তস্স ৰসেন ৰুত্তো, নিগণ্ঠুপোসথো মোসৰজ্জাদিৰসেন. যথাহ ‘‘সো তেন অভিজ্ঝাসহগতেন চেতসা দিৰসং অতিনামেতী’’তি (অ. নি. ১.৭১), ‘‘ইতি যস্মিং সমযে সচ্চে সমাদপেতব্বা, মুসাৰাদে তস্মিং সমযে সমাদপেন্তী’’তি (অ. নি. ১.৭১) চ আদি. এত্থাতি উপোসথসদ্দে. অত্থুদ্ধারোতি ৰত্তব্বঅত্থানং উদ্ধারণং.

ননু চ অত্থমত্তং পতি সদ্দা অভিনিৰিসন্তীতি ন একেন সদ্দেন অনেকে অত্থা অভিধীযন্তীতি? সচ্চমেতং সদ্দৰিসেসে অপেক্খিতে, তেসং পন অত্থানং উপোসথসদ্দৰচনীযতা সামঞ্ঞং উপাদায ৰুচ্চমানো অযং ৰিচারো উপোসথসদ্দস্স অত্থুদ্ধারোতি ৰুত্তো. হেট্ঠা ‘‘এৰং মে সুত’’ন্তিআদীসু আগতে অত্থুদ্ধারেপি এসেৰ নযো. কামঞ্চ পাতিমোক্খুদ্দেসাদিৰিসযোপি উপোসথসদ্দো সামঞ্ঞরূপো এৰ ৰিসেসসদ্দস্স অৰাচকভাৰতো, তাদিসং পন সামঞ্ঞং অনাদিযিত্ৰা অযমত্থো ৰুত্তোতি ৰেদিতব্বং. সীলসুদ্ধিৰসেন উপেতেহি সমগ্গেহি ৰসীযতি অনুট্ঠীযতীতি উপোসথো, পাতিমোক্খুদ্দেসো. সমাদানৰসেন অধিট্ঠানৰসেন ৰা উপেচ্চ অরিযৰাসাদিঅত্থং ৰসিতব্বতো উপোসথো, সীলং. অনসনাদিৰসেন উপেচ্চ ৰসিতব্বতো অনুৰসিতব্বতো উপোসথো. উপৰাসোতি সমাদানং. উপোসথকুলভূততায নৰমহত্থিনিকাযপরিযাপন্নে হত্থিনাগে কিঞ্চি কিরিযং অনপেক্খিত্ৰা রূল়্হিৰসেন সমঞ্ঞামত্তং উপোসথোতি আহ ‘‘উপোসথো নাগরাজাতিআদীসু পঞ্ঞত্তী’’তি. দিৰসে পন উপোসথসদ্দপ্পৰত্তি অট্ঠকথাযং ৰুত্তা এৰ. সুদ্ধস্স ৰে সদা ফগ্গূতি এত্থ পন সুদ্ধস্সাতি সব্বসো কিলেসমলাভাৰেন সুদ্ধস্স. ৰেতি নিপাতমত্তং. ৰেতি ৰা ব্যত্তন্তি অত্থো. সদা ফগ্গূতি নিচ্চকালম্পি ফগ্গুণনক্খত্তমেৰ. যস্স হি ফগ্গুণমাসে উত্তরফগ্গুণদিৰসে তিত্থন্হানং করোন্তস্স সংৰচ্ছরিকপাপপৰাহনং হোতীতি লদ্ধি, তং ততো ৰিৰেচেতুং ইদং ভগৰতা ৰুত্তং. সুদ্ধস্সুপোসথো সদাতি যথাৰুত্তসুদ্ধিযা সুদ্ধস্স উপোসথঙ্গানি ৰতসমাদানানি চ অসমাদিযতোপি নিচ্চং উপোসথো, উপোসথৰাসো এৰাতি অত্থো. পঞ্চদসন্নং তিথীনং পূরণৰসেন পন্নরসো.

বহুসো, অতিসযতো ৰা কুমুদানি এত্থ সন্তীতি কুমুদৰতী, তিস্সং কুমুদৰতিযা. চতুন্নং মাসানং পারিপূরিভূতাতি চাতুমাসী. সা এৰ পাল়িযং চাতুমাসিনীতি ৰুত্তাতি আহ ‘‘ইধ পন চাতুমাসিনীতি ৰুচ্চতী’’তি. তদা কত্তিকমাসস্স পুণ্ণতায মাসপুণ্ণতা. ৰস্সানস্স উতুনো পুণ্ণতায উতুপুণ্ণতা. কত্তিকমাসলক্খিতস্স সংৰচ্ছরস্স পুণ্ণতায সংৰচ্ছরপুণ্ণতা. ‘‘মা’’ ইতি চন্দো ৰুচ্চতি তস্স গতিযা দিৰসস্স মিনিতব্বতো. এত্থ পুণ্ণোতি এতিস্সা রত্তিযা সব্বকলাপারিপূরিযা পুণ্ণো. তদা হি চন্দো সব্বসো পরিপুণ্ণো হুত্ৰা দিস্সতি. এত্থ চ ‘‘তদহুপোসথে পন্নরসে’’তি পদানি দিৰসৰসেন ৰুত্তানি, ‘‘কোমুদিযা’’তিআদীনি রত্তিৰসেন.

রাজামচ্চপরিৰুতোতি রাজকুলসমুদাগতেহি অমচ্চেহি পরিৰুতো. অথ ৰা অনুযুত্তকরাজূহি চেৰ অমচ্চেহি চ পরিৰুতো. চতুরুপক্কিলেসাতি অব্ভা মহিকা ধূমরজো রাহূতি ইমেহি চতূহি উপক্কিলেসেহি. সন্নিট্ঠানং কতং অট্ঠকথাযং.

পীতিৰচনন্তি পীতিসমুট্ঠানং ৰচনং. যঞ্হি ৰচনং পটিগ্গাহকনিরপেক্খং কেৰলং উল়ারায পীতিযা ৰসেন সরসতো সহসাৰ মুখতো নিচ্ছরতি, তং ইধ ‘‘উদান’’ন্তি অধিপ্পেতং. তেনাহ ‘‘যং পীতিৰচনং হদযং গহেতুং ন সক্কোতী’’তিআদি.

দোসেহি ইতা গতা অপগতাতি দোসিনা ত-কারস্স ন-কারং কত্ৰা যথা ‘‘কিলেসে জিতো ৰিজিতাৰীতি জিনো’’তি. অনীয-সদ্দো কত্তুঅত্থে ৰেদিতব্বোতি আহ ‘‘মনং রমযতী’’তি ‘‘রমণীযা’’তি যথা ‘‘নিয্যানিকা ধম্মা’’তি. জুণ্হৰসেন রত্তিযা সুরূপতাতি আহ ‘‘ৰুত্তদোসৰিমুত্তাযা’’তিআদি. তত্থ অব্ভাদযো ৰুত্তদোসা, তব্বিগমেনেৰ চস্সা দস্সনীযতা, তেন, উতুসম্পত্তিযা চ পাসাদিকতা ৰেদিতব্বা. লক্খণং ভৰিতুং যুত্তাতি এতিস্সা রত্তিযা যুত্তো দিৰসো মাসো উতু সংৰচ্ছরোতি এৰং দিৰসমাসউতুসংৰচ্ছরানং সল্লক্খণং ভৰিতুং যুত্তা লক্খঞ্ঞা, লক্খণীযাতি অত্থো.

‘‘যং নো পযিরুপাসতো চিত্তং পসীদেয্যা’’তি ৰুত্তত্তা ‘‘সমণং ৰা ব্রাহ্মণং ৰা’’তি এত্থ পরমত্থসমণো চ পরমত্থব্রাহ্মণো চ অধিপ্পেতো, ন পব্বজ্জামত্তসমণো, ন জাতিমত্তব্রাহ্মণো চাতি আহ ‘‘সমিতপাপতায সমণং. বাহিতপাপতায ব্রাহ্মণ’’ন্তি. বহুৰচনে ৰত্তব্বে একৰচনং, একৰচনে ৰা ৰত্তব্বে বহুৰচনং ৰচনব্যতযো. অট্ঠকথাযং পন একৰচনৰসেনেৰ ব্যতযো দস্সিতো. অত্তনি, গরুট্ঠানিযে চ একস্মিম্পি বহুৰচনপ্পযোগো নিরূল়্হোতি. সব্বেনপীতি ‘‘রমণীযা ৰতা’’তিআদিনা সব্বেন ৰচনেন. ওভাসনিমিত্তকম্মন্তি ওভাসভূতনিমিত্তকম্মং পরিব্যত্তং নিমিত্তকরণন্তি অত্থো. দেৰদত্তো চাতি. চ-সদ্দো অত্তূপনযনে, তেন যথা রাজা অজাতসত্তু অত্তনো পিতু অরিযসাৰকস্স সত্থুউপট্ঠাকস্স ঘাতনেন মহাপরাধো, এৰং ভগৰতো মহাঅনত্থকরস্স দেৰদত্তস্স অৰস্সযভাৰেন পীতি ইমমত্থং উপনেতি. তস্স পিট্ঠিছাযাযাতি তস্স জীৰকস্স পিট্ঠিঅপস্সযেন, তং পমুখং কত্ৰা তং অপস্সাযাতি অত্থো. ৰিক্খেপপচ্ছেদনত্থন্তি ভাৰিনিযা অত্তনো কথায উপ্পজ্জনকৰিক্খেপনস্স পচ্ছিন্দনত্থং, অনুপ্পত্তিঅত্থন্তি অধিপ্পাযো. তেনাহ ‘‘তস্সং হী’’তিআদি.

১৫১. ‘‘সো কিরা’’তিআদি পোরাণট্ঠকথায আগতনযো. এসেৰ নযো পরতো মক্খলিপদনিব্বচনেপি. উপসঙ্কমন্তীতি উপগতা. তদেৰ পব্বজ্জং অগ্গহেসীতি তদেৰ নগ্গরূপং পব্বজ্জং কত্ৰা গণ্হি.

পব্বজিতসমূহসঙ্খাতো সঙ্ঘোতি পব্বজিতসমূহতামত্তেন সঙ্ঘো, ন নিয্যানিকদিট্ঠিসুৰিসুদ্ধসীলসামঞ্ঞৰসেন সংহতত্তাতি অধিপ্পাযো. অস্স অত্থীতি অস্স সত্থুপটিঞ্ঞস্স পরিৰারভূতো অত্থি. স্ৰেৰাতি পব্বজিতসমূহসঙ্খাতোৰ. কেচি পন ‘‘পব্বজিতসমূহৰসেন সঙ্ঘী, গহট্ঠসমূহৰসেন গণী’’তি ৰদন্তি, তং তেসং মতিমত্তং গণে এৰ লোকে সঙ্ঘ-সদ্দস্স নিরূল়্হত্তা. আচারসিক্খাপনৰসেনাতি অচেলক ৰতচরিযাদিআচারসিক্খাপনৰসেন. পাকটোতি সঙ্ঘীআদিভাৰেন পকাসিতো. ‘‘অপ্পিচ্ছো’’তি ৰত্ৰা তত্থ লব্ভমানং অপ্পিচ্ছত্তং দস্সেতুং ‘‘অপ্পিচ্ছতায ৰত্থম্পি ন নিৰাসেতী’’তি ৰুত্তং. ন হি তস্মিং সাসনিকে ৰিয সন্তগুণনিগূহণলক্খণা অপ্পিচ্ছতা লব্ভতীতি. যসোতি কিত্তিসদ্দো. ‘‘তরন্তি এতেন সংসারোঘ’’ন্তি এৰং সম্মতত্তা তিত্থং ৰুচ্চতি লদ্ধীতি আহ ‘‘তিত্থকরোতি লদ্ধিকরো’’তি. সাধুসম্মতোতি ‘‘সাধূ’’তি সম্মতো, ন সাধূহি সম্মতোতি আহ ‘‘অযং সাধূ’’তিআদি. ‘‘ইমানি মে ৰতসমাদানানি এত্তকং কালং সুচিণানী’’তি পব্বজিততো পট্ঠায অতিক্কন্তা বহূ রত্তিযো জানাতীতি রত্তঞ্ঞূ. তা পনস্স রত্তিযো চিরকালভূতাতি কত্ৰা চিরং পব্বজিতস্স অস্সাতি চিরপব্বজিতো. তত্থ চিরপব্বজিততাগহণেন বুদ্ধিসীলতং দস্সেতি, রত্তঞ্ঞুতাগহণেন তত্থ সম্পজানতং. অদ্ধানন্তি দীঘকালং. কিত্তকো পন সোতি আহ ‘‘দ্ৰে তযো রাজপরিৰট্টে’’তি, দ্ৰিন্নং তিণ্ণং রাজূনং রজ্জং অনুসাসনপটিপাটিযোতি অত্থো. ‘‘অদ্ধগতো’’তি ৰত্ৰা কতং ৰযোগহণং ওসানৰযাপেক্খন্তি আহ ‘‘পচ্ছিমৰযং অনুপ্পত্তো’’তি. উভযন্তি ‘‘অদ্ধগতো, ৰযোঅনুপ্পত্তো’’তি পদদ্ৰযং.

পুব্বে পিতরা সদ্ধিং সত্থু সন্তিকং গন্ত্ৰা দেসনায সুতপুব্বতং সন্ধাযাহ ‘‘ঝানাভিঞ্ঞাদি…পে… সোতুকামো’’তি. দস্সনেনাতি ন দস্সনমত্তং, দিস্ৰা পন তেন সদ্ধিং আলাপসল্লাপং কত্ৰা ততো অকিরিযৰাদং সুত্ৰা তেসং অনত্তমনো অহোসি. গুণকথাযাতি অভূতগুণকথায. তেনাহ ‘‘সুট্ঠুতরং অনত্তমনো হুত্ৰা’’তি. যদি অনত্তমনো, কস্মা তুণ্হী অহোসীতি আহ ‘‘অনত্তমনো সমানোপী’’তিআদি.

১৫২. গোসালাযাতি এৰং নামকে গামে. ৰস্সানকালে গুন্নং তিট্ঠনসালাতি একে.

১৫৩. পটিকিট্ঠতরন্তি নিহীনতরং. তন্তাৰুতানীতি তন্তে পসারেত্ৰা ৰীতানি. ‘‘সীতে সীতো’’তিআদিনা ছহাকারেহি তস্স নিহীনস্স নিহীনতরতং দস্সেতি.

১৫৪. ৰচ্চং কত্ৰাপীতি পি-সদ্দেন ভোজনং ভুঞ্জিত্ৰাপি কেনচি অসুচিনা মক্খিতো পীতি ইমমত্থং সম্পিণ্ডেতি. ৰালিকথূপং কত্ৰাতি ৰত্তৰসেন ৰালিকায থূপং কত্ৰা.

১৫৬. পলিবুদ্ধনকিলেসোতি সংসারে পলিবুদ্ধনকিচ্চো রাগাদিকিলেসো খেত্তৰত্থুপুত্তদারাদিৰিসযো.

কোমারভচ্চজীৰককথাৰণ্ণনা

১৫৭. ন যথাধিপ্পাযং ৰত্ততীতি কত্ৰা ৰুত্তং ‘‘অনত্থো ৰত মে’’তি. জীৰকস্স তুণ্হীভাৰো মম অধিপ্পাযস্স মদ্দনসদিসো, তস্মা তং পুচ্ছিত্ৰা কথাপনেন মম অধিপ্পাযো পূরেতব্বোতি অযমেত্থ রঞ্ঞো অজ্ঝাসযোতি দস্সেন্তো ‘‘হত্থিম্হি নু খো পনা’’তিআদিমাহ. কিং তুণ্হীতি কিং কারণা তুণ্হী, কিং তং কারণং, যেন তুৰং তুণ্হীতি ৰুত্তং হোতি. তেনাহ ‘‘কেন কারণেন তুণ্হী’’তি.

কামং সব্বাপি তথাগতস্স পটিপত্তি অনঞ্ঞসাধারণা অচ্ছরিযঅব্ভুতরূপা চ, তথাপি গব্ভোক্কন্তি- অভিজাতিঅভিনিক্খমনঅভিসম্বোধিধম্মচক্কপ্পৰত্তন- যমকপাটিহারিযদেৰোরোহণানি সদেৰকে লোকে অতিৰিয সুপাকটানি, ন সক্কা কেনচি পটিবাহিতুন্তি তানিযেৰেত্থ উদ্ধটানি. ইত্থম্ভূতাখ্যানত্থেতি ইত্থং এৰং পকারো ভূতো জাতোতি এৰং কথনত্থে. উপযোগৰচনন্তি. ‘‘অব্ভুগ্গতো’’তি এত্থ অভীতি উপসগ্গো ইত্থম্ভূতাখ্যানত্থজোতকো, তেন যোগতো ‘‘তং খো পন ভগৰন্ত’’ন্তি ইদং সামিঅত্থে উপযোগৰচনং, তেনাহ ‘‘তস্স খো পন ভগৰতোতি অত্থো’’তি. কল্যাণগুণসমন্নাগতোতি কল্যাণেহি গুণেহি যুত্তো, তং নিস্সিতো তব্বিসযতাযাতি অধিপ্পাযো. সেট্ঠোতি এত্থাপি এসেৰ নযো. কিত্তেতব্বতো কিত্তি, সা এৰ সদ্দনীযতো সদ্দোতি আহ ‘‘কিত্তিসদ্দোতি কিত্তিযেৰা’’তি. অভিত্থৰনৰসেন পৰত্তো সদ্দো থুতিঘোসো. অনঞ্ঞসাধারণগুণে আরব্ভ পৰত্তত্তা সদেৰকং লোকং অজ্ঝোত্থরিত্ৰা অভিভৰিত্ৰা উগ্গতো.

সো ভগৰাতি যো সো সমতিং সপারমিযো পূরেত্ৰা সব্বকিলেসে ভঞ্জিত্ৰা অনুত্তরং সম্মাসম্বোধিং অভিসম্বুদ্ধো দেৰানং অতিদেৰো সক্কানং অতিসক্কো ব্রহ্মানং অতিব্রহ্মা লোকনাথো ভাগ্যৰন্ততাদীহি কারণেহি সদেৰকে লোকে ‘‘ভগৰা’’তি সব্বত্থ পত্থটকিত্তিসদ্দো, সো ভগৰা. ‘‘ভগৰা’’তি চ ইদং সত্থু নামকিত্তনং. তেনাহ আযস্মা ধম্মসেনাপতি ‘‘ভগৰাতি নেতং নামং মাতরা কত’’ন্তিআদি (মহানি. ৮৪). পরতো পন ভগৰাতি গুণকিত্তনং.

যথা কম্মট্ঠানিকেন ‘‘অরহ’’ন্তিআদীসু নৰট্ঠানেসু পচ্চেকং ইতি-সদ্দং যোজেত্ৰা বুদ্ধগুণা অনুস্সরীযন্তি, এৰং বুদ্ধগুণসঙ্কিত্তকেনাপীতি দস্সেন্তো ‘‘ইতিপি অরহং, ইতিপি সম্মাসম্বুদ্ধো…পে… ইতিপি ভগৰা’’তি আহ. ‘‘ইতিপেতং অভূতং, ইতিপেতং অতচ্ছ’’ন্তিআদীসু (দী. নি. ১.৫) ৰিয ইধ ইতি-সদ্দো আসন্নপচ্চক্খকরণত্থো, পি-সদ্দো সম্পিণ্ডনত্থো, তেন চ তেসং গুণানং বহুভাৰো দীপিতো. তানি চ সঙ্কিত্তেন্তেন ৰিঞ্ঞুনা চিত্তস্স সম্মুখীভূতানেৰ কত্ৰা সঙ্কিত্তেতব্বানীতি দস্সেন্তো ‘‘ইমিনা চ ইমিনা চ কারণেনাতি ৰুত্তং হোতী’’তি আহ. এৰঞ্হি নিরূপেত্ৰা কিত্তেন্তে যস্স সঙ্কিত্তেতি, তস্স ভগৰতি অতিৰিয অভিপ্পসাদো হোতি. আরকত্তাতি সুৰিদূরত্তা. অরীনন্তি কিলেসারীনং. অরানন্তি সংসারচক্কস্স অরানং. হতত্তাতি ৰিহতত্তা. পচ্চযাদীনন্তি চীৰরাদিপচ্চযানঞ্চেৰ পূজাৰিসেসানঞ্চ. ততোতি ৰিসুদ্ধিমগ্গতো. যথা চ ৰিসুদ্ধিমগ্গতো, এৰং তংসংৰণ্ণনতোপি নেসং ৰিত্থারো গহেতব্বো.

যস্মা জীৰকো বহুসো সত্থুসন্তিকে বুদ্ধগুণে সুত্ৰা ঠিতো, দিট্ঠসচ্চতায চ সত্থুসাসনে ৰিগতকথংকথো ৰেসারজ্জপ্পত্তো, তস্মা আহ ‘‘জীৰকো পনা’’তিআদি. পঞ্চৰণ্ণাযাতি খুদ্দিকাদিৰসেন পঞ্চপ্পকারায. নিরন্তরং ফুটং অহোসি কতাধিকারভাৰতো. কম্মন্তরাযৰসেন হিস্স রঞ্ঞো গুণসরীরং খতুপহতং অহোসি.

১৫৮. ‘‘উত্তম’’ন্তি ৰত্ৰা ন কেৰলং সেট্ঠভাৰো এৰেত্থ কারণং, অথ খো অপ্পসদ্দতাপি কারণন্তি দস্সেতুং ‘‘অস্সযানরথযানানী’’তিআদি ৰুত্তং. হত্থিযানেসু নিব্বিসেৰনমেৰ গণ্হন্তো হত্থিনিযোৰ কপ্পাপেসি. রঞ্ঞো আসঙ্কানিৰত্তনত্থং আসন্নচারীভাৰেন তত্থ ইত্থিযোৰ নিসজ্জাপিতা. রঞ্ঞো পরেসং দুরুপসঙ্কমনভাৰদস্সনত্থং তা পুরিসৰেসং গাহাপেত্ৰা আৰুধহত্থা কারিতা. পটিৰেদেসীতি ঞাপেসি. তদেৰাতি গমনং, অগমনমেৰ ৰা.

১৫৯. মহঞ্চাতি করণত্থে পচ্চত্তৰচনন্তি আহ ‘‘মহতাচা’’তি. মহচ্চাতি মহতিযা, লিঙ্গৰিপল্লাসৰসেন ৰুত্তং, মহন্তেনাতি ৰুত্তং হোতি. তেনাহ ‘‘রাজানুভাৰেনা’’তি ‘‘দ্ৰিন্নং মহারট্ঠানং ইস্সরিযসিরী’’তি অঙ্গমগধরট্ঠানং আধিপচ্চমাহ. আসত্তখগ্গানীতি অংসে ওলম্বনৰসেন সন্নদ্ধঅসীনি. কুলভোগইস্সরিযাদিৰসেন মহতী মত্তা এতেসন্তি মহামত্তা, মহানুভাৰা রাজপুরিসা. ৰিজ্জাধরতরুণা ৰিযাতি ৰিজ্জাধরকুমারা ৰিয. রট্ঠিযপুত্তাতি ভোজপুত্তা. হত্থিঘটাতি হত্থিসমূহা. অঞ্ঞমঞ্ঞসঙ্ঘট্টনাতি অৰিচ্ছেদৰসেন গমনেন অঞ্ঞমঞ্ঞসম্বন্ধা.

চিত্তুত্রাসো সযং ভাযনট্ঠেন ভযং যথা তথা ভাযতীতি কত্ৰা. ঞাণং ভাযিতব্বে এৰ ৰত্থুস্মিং ভযতো উপট্ঠিতে ‘‘ভাযিতব্বমিদ’’ন্তি ভযতো তীরণতো ভযং. তেনেৰাহ ‘‘ভযতুপট্ঠানঞাণং পন ভাযতি নভাযতীতি? ন ভাযতি. তঞ্হি অতীতা সঙ্খারা নিরুদ্ধা, পচ্চুপ্পন্না নিরুজ্ঝন্তি, অনাগতা নিরুজ্ঝিস্সন্তীতি তীরণমত্তমেৰ হোতী’’তি (ৰিসুদ্ধি. ২.৭৫১). আরম্মণং ভাযতি এতস্মাতি ভযং. ওতপ্পং পাপতো ভাযতি এতেনাতি ভযং. ভযানকন্তি ভাযনাকারো. ভযন্তি ঞাণভযং. সংৰেগন্তি সহোত্তপ্পঞাণং সন্তাসন্তি সব্বসো উব্বিজ্জনং. ভাযিতব্বট্ঠেন ভযং ভীমভাৰেন ভেরৰন্তি ভযভেরৰং, ভীতব্বৰত্থু. তেনাহ ‘‘আগচ্ছতী’’তি.

ভীরুং পসংসন্তীতি পাপতো ভাযনতো উত্তসনতো ভীরুং পসংসন্তি পণ্ডিতা. ন হি তত্থ সূরন্তি তস্মিং পাপকরণে সূরং পগব্ভধংসিনং ন হি পসংসন্তি. তেনাহ ‘‘ভযা হি সন্তো ন করোন্তি পাপ’’ন্তি. তত্থ ভযাতি পাপুত্রাসতো, ওত্তপ্পহেতূতি অত্থো. সরীরচলনন্তি ভযৰসেনসরীরসংকম্পো. একেতি উত্তরৰিহারৰাসিনো. ‘‘রাজগহে’’তিআদি তেসং অধিপ্পাযৰিৰরণং. কামং ৰযতুল্যো ‘‘ৰযস্সো’’তি ৰুচ্চতি, রূল়্হিরেসো, যো কোচি পন সহাযো ৰযস্সো, তস্মা ৰযস্সাভিলাপোতি সহাযাভিলাপো. ন ৰিপ্পলম্ভেসীতি ন ৰিসংৰাদেসি. ৰিনস্সেয্যাতি চিত্তৰিঘাতেন ৰিহঞ্ঞেয্য.

সামঞ্ঞফলপুচ্ছাৰণ্ণনা

১৬০. ভগৰতো তেজোতি বুদ্ধানুভাৰো. রঞ্ঞো সরীরং ফরি যথা তং সোণদণ্ডস্স ব্রাহ্মণস্স ভগৰতো সন্তিকং গচ্ছন্তস্স অন্তোৰনসণ্ডগতস্স. একেতি উত্তরৰিহারৰাসিনো.

১৬১. যেন, তেনাতি চ ভুম্মত্থে করণৰচনন্তি আহ ‘‘যত্থ ভগৰা, তত্থ গতো’’তি. তদা তস্মিং ভিক্খুসঙ্ঘে তুণ্হীভাৰস্স অনৰসেসতো ব্যাপিভাৰং দস্সেতুং ‘‘তুণ্হীভূতং তুণ্হীভূত’’ন্তি ৰুত্তন্তি আহ ‘‘যতো যতো…পে… মেৰাতি অত্থো’’তি. হত্থস্স কুকতত্তা অসংযমো অসম্পজঞ্ঞকিরিযা হত্থকুক্কুচ্চন্তি ৰেদিতব্বো. ৰা-সদ্দো অৰুত্তৰিকপ্পত্থো, তেন তদঞ্ঞো অসংযমভাৰো ৰিভাৰিতোতি দট্ঠব্বং. তত্থ পন চক্খুঅসংযমো সব্বপঠমো, দুন্নিৰারো চাতি তদভাৰং দস্সেতুং ‘‘সব্বালঙ্কারপটিমণ্ডিত’’ন্তিআদি ৰুত্তং. কাযিকৰাচসিকেন উপসমেন লদ্ধেন ইতরোপি অনুমানতো লদ্ধো এৰ হোতীতি আহ ‘‘মানসিকেন চা’’তি. উপসমন্তি সংযমং, আচারসম্পত্তিন্তি অত্থো. পঞ্চপরিৰট্টেতি পঞ্চপুরিসপরিৰট্টে. পঞ্চহাকারেহীতি ‘‘ইট্ঠানিট্ঠে তাদী’’তি (মহানি. ৩৮, ১৯২) এৰং আদিনা আগতেহি, পঞ্চৰিধঅরিযিদ্ধিসিদ্ধেহি চ পঞ্চহি পকারেহি. তাদিলক্খণেতি তাদিভাৰে.

১৬২. ন মে পঞ্হৰিস্সজ্জনে ভারো অত্থীতি সত্থু সব্বত্থ অপ্পটিহতঞাণচারতাদস্সনং. যদাকঙ্খসীতি ন ৰদন্তি, কথং পন ৰদন্তীতি আহ ‘‘সুত্ৰা ৰেদিস্সামা’’তি পদেসঞাণে ঠিতত্তা. বুদ্ধা পন সব্বঞ্ঞুপৰারণং পৰারেন্তীতি সম্বন্ধো. ‘‘যক্খনরিন্দদেৰসমণব্রাহ্মণপরিব্বাজকান’’ন্তি ইদং ‘‘পুচ্ছাৰুসো যদাকঙ্খসী’’তিআদীনি (সং. নি. ১.২৩৭, ২৪৬; সু. নি. আল়ৰকসুত্তে) সুত্তপদানি পুচ্ছন্তানং যেসং পুগ্গলানং ৰসেন আগতানি, তং দস্সনত্থং. ‘‘পুচ্ছাৰুসো যদাকঙ্খসী’’তি ইদং আল়ৰকস্স যক্খস্স ওকাসকরণং, সেসানি নরিন্দাদীনং. মনসিচ্ছসীতি মনসা ইচ্ছসি. পুচ্ছৰ্হো, যং কিঞ্চি মনসিচ্ছথাতি বাৰরিস্স সংসযং মনসা পুচ্ছৰ্হো. তুম্হাকং পন সব্বেসং যং কিঞ্চি সব্বসংসযং মনসা, অঞ্ঞথা চ, যথা ইচ্ছথ, তথা পুচ্ছৰ্হোতি অধিপ্পাযো.

সাধুরূপাতি সাধুসভাৰা. ধম্মোতি পৰেণীধম্মো. ৰুদ্ধন্তি সীলাদীহি বুদ্ধিপ্পত্তং, গরুন্তি অত্থো. এস ভারোতি এস সংসযূপচ্ছেদনসঙ্খাতো ভারো, আগতো ভারো অৰস্সং আৰহিতব্বোতি অধিপ্পাযো. ঞত্ৰা সযন্তি পরূপদেসেন ৰিনা সযমেৰ ঞত্ৰা.

সুচিরতেনাতি এৰং নামকেন ব্রাহ্মণেন. তগ্ঘাতি একংসেন. যথাপি কুসলো তথাতি যথা সব্বধম্মকুসলো সব্বৰিদূ জানাতি কথেতি, তথা অহমক্খিস্সং. রাজা চ খো তং যদি কাহতি ৰা ন ৰাতি যো তং ইধ পুচ্ছিতুং পেসেসি, সো রাজানং তযা পুচ্ছিতং করোতু ৰা মা ৰা, অহং পন তে অক্খিস্সং অক্খিস্সামি, আচিক্খিস্সামীতি অত্থো.

১৬৩. সিপ্পনট্ঠেন সিক্খিতব্বতায চ সিপ্পমেৰ সিপ্পাযতনং জীৰিকায কারণভাৰতো. সেয্যথিদন্তি নিপাতো, তস্স তে কতমেতি অত্থো. পুথু সিপ্পাযতনানীতি হি সাধারণতো সিপ্পানি উদ্দিসিত্ৰা উপরি তংতংসিপ্পূপজীৰিনো নিদ্দিট্ঠা পুগ্গলাধিট্ঠানকথায পপঞ্চং পরিহরিতুং. অঞ্ঞথা যথাধিপ্পেতানি তাৰ সিপ্পাযতনানি দস্সেত্ৰা পুন তংতংসিপ্পূপজীৰীসু দস্সিযমানেসু পপঞ্চো সিযাতি. তেনাহ ‘‘হত্থারোহা’’তিআদি.

হত্থিং আরোহন্তি, আরোহাপযন্তি চাতি হত্থারোহা. যেহি পযোগেহি পুরিসো হত্থিনো আরোহনযোগ্গো হোতি, হত্থিস্স তং পযোগং ৰিধাযতং সব্বেসং পেতেসং গহণং. তেনাহ ‘‘সব্বেপী’’তিআদি. তত্থ হত্থাচরিযা নাম যে হত্থিনো হত্থারোহকানঞ্চ সিক্খপকা. হত্থিৰেজ্জা নাম হত্থিভিসক্কা. হত্থিমেণ্ডা নাম হত্থীনং পাদরক্খকা. আদি-সদ্দেন হত্থীনং যৰসদাযকাদিকে সঙ্গণ্হাতি. অস্সারোহা রথিকাতি এত্থাপি এসেৰ নযো. রথে নিযুত্তা রথিকা. রথরক্খা নাম রথস্স আণিরক্খকা. ধনুং গণ্হন্তি, গণ্হাপেন্তি চাতি ধনুগ্গহা, ইস্সাসা ধনুসিপ্পস্স সিক্খাপকা চ. তেনাহ ‘‘ধনুআচরিযা ইস্সাসা’’তি. চেলেন চেলপটাকায যুদ্ধে অকন্তি গচ্ছন্তীতি চেলকাতি আহ ‘‘যে যুদ্ধে জযধজং গহেত্ৰা পুরতো গচ্ছন্তী’’তি. যথা তথা ঠিতে সেনিকে ব্যূহকরণৰসেন ততো চলযন্তি উচ্চালেন্তীতি চলকা. সকুণগ্ঘিআদযো ৰিয মংসপিণ্ডং পরসেনাসমূহং সাহসিকমহাযোধতায ছেত্ৰা ছেত্ৰা দযন্তি উপ্পতিত্ৰা উপ্পতিত্ৰা গচ্ছন্তীতি পিণ্ডদাযকা. দুতিযৰিকপ্পে পিণ্ডে দযন্তি জনসম্মদ্দে উপ্পতন্তা ৰিয গচ্ছন্তীতি পিণ্ডদাযকাতি অত্থো ৰেদিতব্বো. উগ্গতুগ্গতাতি থামজৰপরক্কমাদিৰসেন অতিৰিয উগ্গতা উগ্গাতি অত্থো. পক্খন্দন্তীতি অত্তনো ৰীরসূরভাৰেন অসজ্জমানা পরসেনং অনুপৰিসন্তীতি অত্থো. থামজৰবলপরক্কমাদিসম্পত্তিযা মহানাগা ৰিয মহানাগা. একন্তসূরাতি একাকিসূরা অত্তনো সূরভাৰেনেৰ একাকিনো হুত্ৰা যুজ্ঝনকা. সজালিকাতি সৰম্মিকা. সরপরিত্তাণচম্মন্তি চম্মপরিসিব্বিতং খেটকং, চম্মমযং ৰা ফলকং. ঘরদাসযোধাতি অন্তোজাতযোধা.

আল়ারং ৰুচ্চতি মহানসং, তত্থ নিযুত্তাতি আল়ারিকা, ভত্তকারা. পূৰিকাতি পূৰসম্পাদকা, যে পূৰমেৰ নানপ্পকারতো সম্পাদেত্ৰা ৰিক্কিণন্তা জীৰন্তি. কেসনখলিখনাদিৰসেন মনুস্সানং অলঙ্কারৰিধিং কপ্পেন্তি সংৰিদহন্তীতি কপ্পকা. ন্হাপকাতি চুণ্ণৰিলেপনাদীহি মলহরণৰণ্ণসম্পাদনৰিধিনা ন্হাপেন্তীতি ন্হাপকা. নৰন্তাদিৰিধিনা পৰত্তো গণনগন্থো অন্তরা ছিদ্দাভাৰেন অচ্ছিদ্দকোতি ৰুচ্চতি, তং গণনং উপনিস্সায জীৰন্তা অচ্ছিদ্দকপাঠকা. হত্থেন অধিপ্পাযৰিঞ্ঞাপনং হত্থমুদ্দা হত্থ-সদ্দো চেত্থ তদেকদেসেসু অঙ্গুলীসু দট্ঠব্বো. ‘‘ন ভুঞ্জমানো সব্বং হত্থং মুখে পক্খিপিস্সামী’’তিআদীসু ৰিয, তস্মা অঙ্গুলিসঙ্কোচনাদিনা গণনা হত্থমুদ্দায গণনা. চিত্তকারাদীনীতি. আদি-সদ্দেন ভমকারকোট্টকলেখক ৰিলীৰকারাদীনং সঙ্গহো দট্ঠব্বো. দিট্ঠেৰ ধম্মেতি ইমস্মিংযেৰ অত্তভাৰে. সন্দিট্ঠিকমেৰাতি অসম্পরাযিকতায সামং দট্ঠব্বং, সযং অনুভৰিতব্বং অত্তপচ্চক্খং দিট্ঠধম্মিকন্তি অত্থো. সুখিতন্তি সুখপ্পত্তং. উপরীতি দেৰলোকে. সো হি মনুস্সলোকতো উপরিমো. কম্মস্স কতত্তা নিব্বত্তনতো তস্স ফলং তস্স অগ্গিসিখা ৰিয হোতি, তঞ্চ উদ্ধং দেৰলোকেতি আহ ‘‘উদ্ধং অগ্গং অস্সা অত্থীতি উদ্ধগ্গিকা’’তি. সগ্গং অরহতীতি অত্তনো ফলভূতং সগ্গং অরহতি, তত্থ সা নিব্বত্তনারহোতি অত্থো. সুখৰিপাকাতি ইট্ঠৰিপাকৰিপচ্চনীকা. সুট্ঠু অগ্গেতি অতিৰিয উত্তমে উল়ারে. দক্খন্তি ৰড্ঢন্তি এতাযাতি দক্খিণা, পরিচ্চাগমযং পুঞ্ঞন্তি আহ ‘‘দক্খিণং দান’’ন্তি.

মগ্গো সামঞ্ঞং সমিতপাপসমণভাৰোতি কত্ৰা. যস্মা অযং রাজা পব্বজিতানং দাসকস্সকাদীনং লোকতো অভিৰাদনাদিলাভো সন্দিট্ঠিকং সামঞ্ঞফলন্তি চিন্তেত্ৰা ‘‘অত্থি নু খো কোচি সমণো ৰা ব্রাহ্মণো ৰা ঈদিসমত্থং জানন্তো’’তি ৰীমংসন্তো পূরণাদিকে পুচ্ছিত্ৰা তেসং কথায অনারাধিতচিত্তো ভগৰন্তম্পি তমত্থং পুচ্ছি, তস্মা ৰুত্তং ‘‘উপরি আগতং পন দাসকস্সকোপমং সন্ধায পুচ্ছতী’’তি.

কণ্হপক্খন্তি যথাপুচ্ছিতে অত্থে লব্ভমানং দিট্ঠিগতূপসঞ্হিতং সংকিলেসপক্খং. সুক্কপক্খন্তি তব্বিধুরং উপরিসুত্তাগতং ৰোদানপক্খং. সমণকোলাহলন্তি সমণকোতূহলং তংতংসমণৰাদানং অঞ্ঞমঞ্ঞৰিরোধং. সমণভণ্ডনন্তি তেনেৰ ৰিরোধেন ‘‘এৰংৰাদীনং তেসং সমণব্রাহ্মণানং অযং দোসো, এৰংৰাদীনং অযং দোসো’’তি এৰং তংতংৰাদস্স পরিভাসনং. রঞ্ঞো ভারং করোন্তো অত্তনো দেসনাকোসল্লেনাতি অধিপ্পাযো.

১৬৪. পণ্ডিতপতিরূপকানন্তি আমং ৰিয পক্কানং পণ্ডিতাভাসানং.

পূরণকস্সপৰাদৰণ্ণনা

১৬৫. একং ইদাহন্তি একাহং. ইধ-সদ্দো চেত্থ নিপাতমত্তং, একাহং সমযং তিচ্চেৰ অত্থো. সরিতব্বযুত্তন্তি অনুস্সরণানুচ্ছৰিকং.

১৬৬. সহত্থা করোন্তস্সাতি সহত্থেনেৰ করোন্তস্স. নিস্সগ্গিযথাৰরাদযোপি ইধ সহত্থকরণেনেৰ সঙ্গহিতা. হত্থাদীনীতি হত্থপাদকণ্ণনাসাদীনি. পচনং দহনং ৰিবাধনন্তি আহ ‘‘দণ্ডেন উপ্পীল়েন্তস্সা’’তি. পপঞ্চসূদনিযং ‘‘তজ্জেন্তস্স ৰা’’তি অত্থো ৰুত্তো, ইধ পন তজ্জনং পরিভাসনং দণ্ডেনেৰ সঙ্গহেত্ৰা ‘‘দণ্ডেন উপ্পীল়েন্তস্স’’ ইচ্চেৰ ৰুত্তং. সোকং সযং করোন্তস্সাতি পরস্স সোককারণং সযং করোন্তস্স, সোকং ৰা উপ্পাদেন্তস্স. পরেহীতি অত্তনো ৰচনকরেহি. সযম্পি ফন্দতোতি পরস্স ৰিবাধনপযোগেন সযম্পি ফন্দতো. ‘‘অতিপাতাপযতো’’তি পদং সুদ্ধকত্তুঅত্থে হেতুকত্তুঅত্থে চ ৰত্ততীতি আহ ‘‘হনন্তস্সাপি হনাপেন্তস্সাপী’’তি. কারণৰসেনাতি কারাপনৰসেন.

ঘরস্স ভিত্তি অন্তো বহি চ সন্ধিতা হুত্ৰা ঠিতা ঘরসন্ধি. কিঞ্চিপি অসেসেত্ৰা নিরৰসেসো লোপো নিল্লোপো. একাগারে নিযুত্তো ৰিলোপো একাগারিকো. পরিতো সব্বসো পন্থে হননং পরিপন্থো. পাপং ন করীযতি পুব্বে অসঞ্ঞতো উপ্পাদেতুং অসক্কুণেয্যত্তা, তস্মা নত্থি পাপং. যদি এৰং কথং সত্তা পাপে পটিপজ্জন্তীতি আহ ‘‘সত্তা পন পাপং করোমাতি এৰং সঞ্ঞিনো হোন্তী’’তি. এৰং কিরস্স হোতি – ইমেসঞ্হি সত্তানং হিংসাদিকিরিযা ন অত্তানং ফুসতি তস্স নিচ্চতায নিব্বিকারত্তা সরীরং পন অচেতনং কট্ঠকলিঙ্গরূপমং, তস্মিং ৰিকোপিতেপি ন কিঞ্চি পাপন্তি. খুরনেমিনাতি নিসিতখুরমযনেমিনা.

গঙ্গায দক্খিণা দিসা অপ্পতিরূপদেসো, উত্তরা দিসা পতিরূপদেসোতি অধিপ্পাযেন‘‘দক্খিণঞ্চ’’তিআদি ৰুত্তন্তি আহ ‘‘দক্খিণতীরে মনুস্সা কক্খল়া’’তিআদি. মহাযাগন্তি মহাৰিজিতযঞ্ঞসদিসং মহাযাগং. উপোসথকম্মেন ৰাতি উপোসথকম্মেন চ. দম-সদ্দো হি ইন্দ্রিযসংৰরস্স উপোসথসীলস্স চ ৰাচকো ইধাধিপ্পেতো. কেচি পন ‘‘উপোসথকম্মেনাতি ইদং ইন্দ্রিযদমনস্স ৰিসেসনং, তস্মা ‘উপোসথকম্মভূতেন ইন্দ্রিযদমনেনা’’তি অত্থং ৰদন্তি. সীলসংযমেনাতি কাযিকৰাচসিকসংৰরেন. সচ্চৰজ্জেনাতি সচ্চৰাচায, তস্সা ৰিসুং ৰচনং লোকে গরুতরপুঞ্ঞসম্মতভাৰতো. যথা হি পাপধম্মেসু মুসাৰাদো গরু, এৰং পুঞ্ঞধম্মেসু সচ্চৰাচা. তেনাহ ভগৰা ‘‘একং ধম্মং অতীতস্সা’’তিআদি. পৰত্তীতি যো ‘‘করোতী’’তি ৰুচ্চতি, তস্স সন্তানে ফলুপ্পত্তিপচ্চযভাৰেন উপ্পত্তি. সব্বথাতি ‘‘করোতো’’তিআদিনা ৰুত্তেন সব্বপ্পকারেন. কিরিযমেৰ পটিক্খিপতি, ন রঞ্ঞা পুট্ঠং সন্দিট্ঠিকং সামঞ্ঞফলং ব্যাকরোতীতি অধিপ্পাযো. ইদং অৰধারণং ৰিপাকপটিক্খেপনিৰত্তনত্থং. যো হি কম্মং পটিক্খিপতি, তেন অত্থতো ৰিপাকোপি পটিক্খিত্তো এৰ নাম হোতি. তথা হি ৰক্খতি ‘‘কম্মং পটিবাহন্তেনাপী’’তিআদি (দী. নি. অট্ঠ. ১.১৭০-১৭২).

পটিরাজূহি অনভিভৰনীযভাৰেন ৰিসেসতো জিতন্তি ৰিজিতং, আণাপৰত্তিদেসো. ‘‘মা ময্হং ৰিজিতে ৰসথা’’তি অপসাদনা পব্বজিতস্স ৰিহেঠনা পব্বাজনাতি কত্ৰা ৰুত্তং ‘‘অপসাদেতব্বন্তি ৰিহেঠেতব্ব’’ন্তি. উগ্গণ্হনং তেন ৰুত্তস্স অত্থস্স ‘‘এৰমেত’’ন্তি উপধারণং সল্লক্খণং, নিকুজ্জনং তস্স অদ্ধনিযভাৰাপাদনৰসেন চিত্তেন সন্ধারণং. তদুভযং পটিক্খিপন্তো আহ ‘‘অনুগ্গণ্হন্তো অনিকুজ্জন্তো’’তি. তেনাহ ‘‘সারৰসেন অগ্গণ্হন্তো’’তিআদি.

মক্খলিগোসালৰাদৰণ্ণনা

১৬৮. উভযেনাতি হেতুপচ্চযপটিসেধনৰচনেন. সংকিলেসপচ্চযন্তি সংকিলিস্সনস্স মলীনভাৰস্স কারণং. ৰিসুদ্ধিপচ্চযন্তি সঙ্কিকিলেসতো ৰিসুদ্ধিযা ৰোদানস্স কারণং. অত্তকারোতি তেন তেন সত্তেন অত্তনা কাতব্বকম্মং অত্তনা নিপ্ফাদেতব্বপযোগো. পরকারন্তি পরস্স ৰাহসা ইজ্ঝনকপযোজনং. তেনাহ ‘‘যেনা’’তিআদি. মহাসত্তন্তি অন্তিমভৰিকং মহাবোধিসত্তং, পচ্চেকবোধিসত্তস্সপি এত্থেৰ সঙ্গহো ৰেদিতব্বো. মনুস্সসোভগ্যতন্তি মনুস্সেসু সুভগভাৰং. এৰন্তি ৰুত্তপ্পকারেন. কম্মৰাদস্স কিরিযৰাদস্স পটিক্খিপনেন ‘‘অত্থি ভিক্খৰে কম্মং কণ্হং কণ্হৰিপাক’’ন্তিআদি (অ. নি. ৪.২৩২) নযপ্পৰত্তে জিনচক্কে পহারং দেতি নাম. নত্থি পুরিসকারেতি যথাৰুত্তঅত্তকারপরকারাভাৰতো এৰ সত্তানং পচ্চত্তপুরিসকারো নাম কোচি নত্থীতি অত্থো. তেনাহ ‘‘যেনা’’তিআদি. নত্থি বলন্তি সত্তানং দিট্ঠধম্মিকসম্পরাযিকনিব্বানসম্পত্তিআৰহং বলং নাম কিঞ্চি নত্থি. তেনাহ ‘‘যম্হী’’তিআদি. নিদস্সনমত্তঞ্চেতং, সংকিলেসিকম্পি চাযং বলং পটিক্খিপতেৰ. যদি ৰীরিযাদীনি পুরিসকারৰেৰচনানি, কস্মা ৰিসুং গহণন্তি আহ ‘‘ইদং নো ৰীরিযেনা’’তিআদি. সদ্দত্থতো পন তস্সা তস্সা কিরিযায উস্সন্নট্ঠেন বলং. সূরৰীরভাৰাৰহট্ঠেন ৰীরিযং. তদেৰ দল়্হভাৰতো, পোরিসধুরং ৰহন্তেন পৰত্তেতব্বতো চ পুরিসথামো. পরং পরং ঠানং অক্কমনপ্পৰত্তিযা পুরিসপরক্কমোতি ৰুত্তোতি ৰেদিতব্বং.

সত্তযোগতো রূপাদীসু সত্তৰিসত্ততায সত্তা. পাণনতো অস্সসনপস্সসনৰসেন পৰত্তিযা পাণা. তে পন সো একিন্দ্রিযাদিৰসেন ৰিভজিত্ৰা ৰদতীতি আহ ‘‘একিন্দ্রিযো’’তিআদি. অণ্ডকোসাদীসু ভৰনতো ‘‘ভূতা’’তি ৰুচ্চন্তীতি আহ ‘‘অণ্ডকোস…পে… ৰদতী’’তি. জীৰনতো পাণং ধারেন্তা ৰিয ৰড্ঢনতো জীৰা. তেনাহ ‘‘সালিযৰা’’তিআদি. নত্থি এতেসং সংকিলেসৰিসুদ্ধীসু ৰসোতি অৰসা. নত্থি নেসং বলং ৰীরিযং চাতি অবলা অৰীরিযা. নিযতাতি অচ্ছেজ্জসুত্তাৰুতাভেজ্জমণিনো ৰিয নিযতপ্পৰত্তিতায গতিজাতিবন্ধাপৰগ্গৰসেন নিযামো. তত্থ তত্থ গমনন্তি ছন্নং অভিজাতীনং তাসু তাসু গতীসু উপগমনং সমৰাযেন সমাগমো. সভাৰোযেৰাতি যথা কণ্টকস্স তিখিণতা, কপিত্থফলানং পরিমণ্ডলতা, মিগপক্খীনং ৰিচিত্তাকারতা, এৰং সব্বস্সাপি লোকস্স হেতুপচ্চযেন ৰিনা তথা তথা পরিণামো অযং সভাৰো এৰ অকিত্তিমোযেৰ. তেনাহ ‘‘যেন হী’’তিআদি. ছল়াভিজাতিযো পরতো ৰিত্থারীযন্তি. ‘‘সুখঞ্চ দুক্খঞ্চ পটিসংৰেদেন্তী’’তি ৰদন্তো অদুক্খমসুখভূমিং সব্বেন সব্বং ন জানাতীতি উল্লিঙ্গন্তো ‘‘অঞ্ঞা অদুক্খমসুখভূমি নত্থীতি দস্সেতী’’তি আহ.

পমুখযোনীনন্তি মনুস্সতিরচ্ছানাদীসু খত্তিযব্রাহ্মণাদিসীহব্যগ্ঘাদিৰসেন পধানযোনীনং. সট্ঠিসতানীতি ছসহস্সানি. ‘‘পঞ্চ চ কম্মুনো সতানী’’তি পদস্স অত্থদস্সনং ‘‘পঞ্চকম্মসতানি চা’’তি. ‘‘এসেৰ নযো’’তি ইমিনা ‘‘কেৰলং তক্কমত্তকেন নিরত্থকং দিট্ঠিং দীপেতী’’তি ইমমেৰত্থং অতিদিসতি. এত্থ চ ‘‘তক্কমত্তকেনা’’তি ইমিনা যস্মা তক্কিকা নিরঙ্কুসতায পরিকপ্পনস্স যং কিঞ্চি অত্তনো পরিকপ্পিতং সারতো মঞ্ঞমানা তথেৰ অভিনিৰিস্স তক্কদিট্ঠিগাহং গণ্হন্তি, তস্মা ন তেসং দিট্ঠিৰত্থুস্মিং ৰিঞ্ঞূহি ৰিচারণা কাতব্বাতি দস্সেতি. কেচীতি উত্তরৰিহারৰাসিনো. তে হি ‘‘পঞ্চ কম্মানীতি চক্খুসোতঘানজিৰ্হাকাযা ইমানি পঞ্চিন্দ্রিযানি ‘পঞ্চ কম্মানী’তি পঞ্ঞাপেন্তী’’তি ৰদন্তি. কম্মন্তি লদ্ধীতি ওল়ারিকভাৰতো পরিপুণ্ণকম্মন্তি লদ্ধি. মনোকম্মং অনোল়ারিকত্তা উপড্ঢকম্মন্তি লদ্ধীতি যোজনা. দ্ৰট্ঠিপটিপদাতি ‘‘দ্ৰাসট্ঠি পটিপদা’’তি ৰত্তব্বে সভাৰনিরুত্তিং অজানন্তো ‘‘দ্ৰট্ঠিপটিপদা’’তি ৰদতি. একস্মিং কপ্পেতি একস্মিং মহাকপ্পে, তত্থাপি চ ৰিৰট্টট্ঠাযীসঞ্ঞিতে একস্মিং অসঙ্খ্যেয্যেকপ্পে.

উরব্ভে হনন্তীতি ওরব্ভিকা. এৰং সূকরিকাদযো ৰেদিতব্বা. লুদ্দাতি অঞ্ঞেপি যে কেচি মাগৰিকনেসাদা. তে পাপকম্মপসুততায ‘‘কণ্হাভিজাতীতি ৰদতি. ভিক্খূ’’তি বুদ্ধসাসনে ভিক্খূ. তে কির ‘‘সছন্দরাগা পরিভুঞ্জন্তী’’তি অধিপ্পাযেন ‘‘চতূসু পচ্চযেসু কণ্টকে পক্খিপিত্ৰা খাদন্তী’’তি ৰদতি. কস্মাতি চে? যস্মা ‘‘তে পণীতপণীতে পচ্চযে পটিসেৰন্তী’’তি তস্স মিচ্ছাগাহো, তস্মা ঞাযলদ্ধেপি পচ্চযে ভুঞ্জমানা আজীৰকসমযস্স ৰিলোমগাহিতায পচ্চযেসু কণ্টকে পক্খিপিত্ৰা খাদন্তি নামাতি ৰদতীতি অপরে. একে পব্বজিতা, যে সৰিসেসং অত্তকিলমথানুযোগং অনুযুত্তা. তথা হি তে কণ্টকে ৰত্তন্তা ৰিয হোন্তীতি ‘‘কণ্টকৰুত্তিকা’’তি ৰুত্তা. ঠত্ৰা ভুঞ্জননহানপটিক্খেপাদিৰতসমাযোগেন পণ্ডরতরা. ‘‘অচেলকসাৰকা’’তি আজীৰকসাৰকে ৰদতি. তে কির আজীৰকলদ্ধিযা ৰিসুদ্ধচিত্ততায নিগণ্ঠেহিপি পণ্ডরতরা. নন্দাদযো হি তথারূপং আজীৰকপটিপত্তিং উক্কংসং পাপেত্ৰা ঠিতা. তস্মা নিগণ্ঠেহি আজীৰকসাৰকেহি চ পণ্ডরতরা পরমসুক্কাভিজাতীতি অযং তস্স লদ্ধি.

পুরিসভূমিযোতি পধানপুগ্গলেন নিদ্দেসো. ইত্থীনম্পি তা ভূমিযো ইচ্ছন্তেৰ. ‘‘ভিক্খু চ পন্নকো’’তিআদি তেসং পাল়িযেৰ. তত্থ পন্নকোতি ভিক্খায ৰিচরণকো, তেসং ৰা পটিপত্তিযা পটিপন্নকো. জিনোতি জিণ্ণো জরাৰসেন হীনধাতুকো, অত্তনো ৰা পটিপত্তিযা পটিপক্খং জিনিত্ৰা ঠিতো. সো কির তথাভূতো ধম্মম্পি কস্সচি ন কথেসি. তেনাহ ‘‘ন কিঞ্চি আহা’’তি. ওট্ঠৰদনাদিৰিপ্পকারে কতেপি খমনৰসেন ন কিঞ্চি ৰদতীতিপি ৰদন্তি. অলাভিন্তি ‘‘সো ন কুম্ভিমুখা পটিগ্গণ্হাতী’’তিআদিনা (দী. নি. ১.৩৯৪) নযেন ৰুত্তঅলাভহেতুসমাযোগেন অলাভিং, ততোযেৰ জিঘচ্ছাদুব্বলপরেততায সযনপরাযনং ‘‘সমণং পন্নভূমী’’তি ৰদতি.

আজীৰৰুত্তিসতানীতি সত্তানং আজীৰভূতানি জীৰিকাৰুত্তিসতানি. পসুগ্গহণেন এল়কজাতি গহিতা, মিগগ্গহণেন রুরুগৰযাদিসব্বমিগজাতি. বহূ দেৰাতি চাতুমহারাজিকাদিব্রহ্মকাযিকাদিৰসেন, তেসং অন্তরভেদৰসেন বহূ দেৰা. তত্থ চাতুমহারাজিকানং একচ্চভেদো মহাসমযসুত্তৰসেন (দী. নি. ২.৩৩১) দীপেতব্বো. মনুস্সাপি অনন্তাতি দীপদেসকুলৰংসাজীৰাদিৰিভাগৰসেন মনুস্সাপি অনন্তভেদা. পিসাচা এৰ পেসাচা. তে অপরপেতাদযো মহন্তমহন্তা. ছদ্দন্তদহমন্দাকিনিযো কুৰাল়িযমুচলিন্দনামেন ৰদতি.

পৰুটাতি পব্বগণ্ঠিকা. পণ্ডিতোপি …পে… উদ্ধং ন গচ্ছতি, কস্মা? সত্তানং সংসরণকালস্স নিযতভাৰতো. অপরিপক্কং সংসরণনিমিত্তং সীলাদিনা পরিপাচেতি নাম সীঘংযেৰ ৰিসুদ্ধিপ্পত্তিযা. পরিপক্কং কম্মং ফুস্স ফুস্স পত্ৰা পত্ৰা কালেন পরিপক্কভাৰানাপাদনেন ব্যন্তিং করোতি নাম.

সুত্তগুল়েতি সুত্তৰট্টিযং. ‘‘নিব্বেঠিযমানমেৰ পলেতী’’তি উপমায সত্তানং সংসারো অনুক্কমেন খীযতেৰ, ন তস্স ৰড্ঢতীতি দস্সেতি পরিচ্ছিন্নরূপত্তা.

অজিতকেসকম্বলৰাদৰণ্ণনা

১৭১. দিন্নন্তি দেয্যধম্মসীসেন দানং ৰুত্তন্তি আহ ‘‘দিন্নস্স ফলাভাৰং ৰদতী’’তি, দিন্নং পন অন্নাদিৰত্থুং কথং পটিক্খিপতি. এসেৰ নযো যিট্ঠং হুতন্তি এত্থাপি. মহাযাগোতি সব্বসাধারণং মহাদানং. পাহুনকসক্কারোতি পাহুনভাৰেন কাতব্বসক্কারো. ফলন্তি আনিসংসফলং, নিস্সন্দফলঞ্চ. ৰিপাকোতি সদিসফলং. পরলোকে ঠিতস্স অযং লোকো নত্থীতি পরলোকে ঠিতস্স কম্মুনা লদ্ধব্বো অযং লোকো ন হোতি. ইধলোকে ঠিতস্সাপি পরলোকো নত্থীতি ইধলোকে ঠিতস্স কম্মুনা লদ্ধব্বো পরলোকো ন হোতি. তত্থ কারণমাহ ‘‘সব্বে তত্থ তত্থেৰ উচ্ছিজ্জন্তী’’তি. ইমে সত্তা যত্থ যত্থ ভৰে, যোনিআদীসু চ ঠিতা তত্থ তত্থেৰ উচ্ছিজ্জন্তি নিরুদযৰিনাসৰসেন ৰিনস্সন্তি. ফলাভাৰৰসেনাতি মাতাপিতূসু সম্মাপটিপত্তিমিচ্ছাপটিপত্তীনং ফলস্স অভাৰৰসেন ‘‘নত্থি মাতা, নত্থি পিতা’’তি ৰদতি, ন মাতাপিতূনং, নাপি তেসু ইদানি কযিরমানসক্কারাসক্কারানং অভাৰৰসেন তেসং লোকপচ্চক্খত্তা. পুব্বুল়কস্স ৰিয ইমেসং সত্তানং উপ্পাদো নাম কেৰলো, ন চৰিত্ৰা আগমনপুব্বকোতি দস্সনত্থং ‘‘নত্থি সত্তা ওপপাতিকা’’তি ৰুত্তন্তি আহ ‘‘চৰিত্ৰা উপপজ্জনকসত্তা নাম নত্থীতি ৰদতী’’তি. সমণেন নাম যাথাৰতো জানন্তেন কস্সচি কিঞ্চি অকথেত্ৰা সঞ্ঞতেন ভৰিতব্বং, অঞ্ঞথা আহোপুরিসিকা নাম সিযা. কিঞ্হি পরো পরস্স করিস্সতি? তথা চ অত্তনো সম্পাদনস্স কস্সচি অৰস্সযো এৰ ন সিযা তত্থ তত্থেৰ উচ্ছিজ্জনতোতি আহ ‘‘যে ইমঞ্চ…পে… পৰেদেন্তী’’তি.

চতূসু মহাভূতেসু নিযুত্তোতি চাতুমহাভূতিকো. যথা পন মত্তিকায নিব্বত্তং ভাজনং মত্তিকামযং, এৰং অযং চতূহি মহাভূতেহি নিব্বত্তোতি আহ ‘‘চতুমহাভূতমযো’’তি. অজ্ঝত্তিকপথৰীধাতূতি সত্তসন্তানগতা পথৰীধাতু. বাহিরপথৰীধাতুন্তি বহিদ্ধা মহাপথৰিং. উপগচ্ছতীতি বাহিরপথৰিকাযতো তদেকদেসভূতা পথৰী আগন্ত্ৰা অজ্ঝত্তিকভাৰপ্পত্তিযা সত্তভাৰেন সণ্ঠিতা ইদানি ঘটাদিগতপথৰী ৰিয তমেৰ বাহিরপথৰিকাযং উপেতি উপগচ্ছতি সব্বসো তেন নিব্বিসেসতং একীভাৰমেৰ গচ্ছতি. আপাদীসুপি এসেৰ নযোতি এত্থ পজ্জুন্নেন মহাসমুদ্দতো গহিতআপো ৰিয ৰস্সোদকভাৰেন পুনপি মহাসমুদ্দমেৰ, সূরিযরস্মিতো গহিতং ইন্দগ্গিসঙ্খাততেজো ৰিয পুন সূরিযরস্মিং, মহাৰাযুখন্ধতো নিগ্গতমহাৰাতো ৰিয তমেৰ ৰাযুখন্ধং উপেতি উপগচ্ছতীতি দিট্ঠিগতিকস্স অধিপ্পাযো. মনচ্ছট্ঠানি ইন্দ্রিযানি আকাসং পক্খন্দন্তি তেসং ৰিসযাভাৰাতি ৰদন্তি. ৰিসযিগহণেন হি ৰিসযাপি গহিতা এৰ হোন্তীতি. গুণাগুণপদানীতি গুণদোসকোট্ঠাসা. সরীরমেৰ পদানীতি অধিপ্পেতং সরীরেন তংতংকিরিযায পজ্জিতব্বতো. দব্বন্তি মুয্হন্তীতি দত্তূ, মূল়্হপুগ্গলা. তেহি দত্তূহি বালমনুস্সেহি. ‘‘পরলোকো অত্থী’’তি মতি যেসং, তে অত্থিকা, তেসং ৰাদোতি অত্থিকৰাদো, তং অত্থিকৰাদং.

কম্মং পটিবাহতি অকিরিযৰাদিভাৰতো. ৰিপাকং পটিবাহতি সব্বেন সব্বং আযতিং উপপত্তিযা পটিক্খিপনতো. উভযং পটিবাহতি সব্বসো হেতুপটিবাহনেনেৰ ফলস্সপি পটিক্খিত্তত্তা. উভযন্তি হি কম্মং ৰিপাকঞ্চাতি উভযং. সো হি ‘‘অহেতূ অপ্পচ্চযা সত্তা সংকিলিস্সন্তি, ৰিসুজ্ঝন্তি চা’’তি (দী. নি. ১.১৬৮; ম. নি. ২.১০০, ২২৭; সং. নি. ৩.২১২) ৰদন্তো কম্মস্স ৰিয ৰিপাকস্সাপি সংকিলেসৰিসুদ্ধীনং পচ্চযত্তাভাৰৰচনতো তদুভযং পটিবাহতি নাম. ৰিপাকো পটিবাহিতো হোতি অসতি কম্মে ৰিপাকাভাৰতো. কম্মং পটিবাহিতং হোতি অসতি ৰিপাকে কম্মস্স নিরত্থকভাৰাপত্তিতো. অত্থতোতি সরূপেন. উভযপ্পটিবাহকাতি ৰিসুং ৰিসুং তংতংদিট্ঠিদীপকভাৰেন পাল়িযং আগতাপি পচ্চেকং তিৰিধদিট্ঠিকা এৰ উভযপটিবাহকত্তা. উভযপ্পটিবাহকাতি হি হেতুৰচনং. ‘‘অহেতুকৰাদা চেৰা’’তিআদি পটিঞ্ঞাৰচনং. যো হি ৰিপাকপটিবাহনেন নত্থিকদিট্ঠিকো উচ্ছেদৰাদী, সো অত্থতো কম্মপটিবাহনেন অকিরিযদিট্ঠিকো, উভযপটিবাহনেন অহেতুকদিট্ঠিকো চ হোতি. সেসদ্ৰযেপি এসেৰ নযো.

সজ্ঝাযন্তীতি তং দিট্ঠিদীপকং গন্থং উগ্গহেত্ৰা পঠন্তি. ৰীমংসন্তীতি তস্স অত্থং ৰিচারেন্তি. ‘‘তেস’’ন্তিআদি ৰীমংসনাকারদস্সনং. তস্মিং আরম্মণেতি যথাপরিকপ্পিতকম্মফলাভাৰাদিকে ‘‘করোতো ন করীযতি পাপ’’ন্তি আদিনযপ্পৰত্তায লদ্ধিযা আরম্মণে. মিচ্ছাসতি সন্তিট্ঠতীতি ‘‘করোতো ন করীযতি পাপ’’ন্তিআদিৰসেন অনুস্সৰূপলদ্ধে অত্থে তদাকারপরিৰিতক্কনেহি সৰিগ্গহে ৰিয সরূপতো চিত্তস্স পচ্চুপট্ঠিতে চিরকালপরিচযেন এৰমেতন্তি নিজ্ঝানক্খমভাৰূপগমনেন নিজ্ঝানক্খন্তিযা তথাগহিতে পুনপ্পুনং তথেৰ আসেৰন্তস্স বহুলীকরোন্তস্স মিচ্ছাৰিতক্কেন সমাদিযমানা মিচ্ছাৰাযামূপত্থম্ভিতা অতংসভাৰং ‘‘তংসভাৰ’’ন্তি গণ্হন্তী মিচ্ছাসতীতি লদ্ধনামা তংলদ্ধিসহগতা তণ্হা সন্তিট্ঠতি. চিত্তং একগ্গং হোতীতি যথাসকং ৰিতক্কাদিপচ্চযলাভেন তস্মিং আরম্মণে অৰট্ঠিততায অনেকগ্গতং পহায একগ্গং অপ্পিতং ৰিয হোতি. চিত্তসীসেন মিচ্ছাসমাধি এৰ ৰুত্তো. সোপি হি পচ্চযৰিসেসেহি লদ্ধভাৰনাবলো ঈদিসে ঠানে সমাধানপতিরূপকিচ্চকরোযেৰ, ৰাল়ৰিজ্ঝনাদীসু ৰিযাতি দট্ঠব্বং. জৰনানি জৰন্তীতি অনেকক্খত্তুং তেনাকারেন পুব্বভাগিযেসু জৰনৰারেসু পৰত্তেসু সব্বপচ্ছিমে জৰনৰারে সত্ত জৰনানি জৰন্তি. পঠমে জৰনে সতেকিচ্ছা হোন্তি. তথা দুতিযাদীসূতি ধম্মসভাৰদস্সনমত্তমেতং, ন পন তস্মিং খণে তেসং তিকিচ্ছা কেনচি সক্কা কাতুং.

তত্থাতি তেসু তীসু মিচ্ছাদস্সনেসু. কোচি একং দস্সনং ওক্কমতীতি যস্স একস্মিংযেৰ অভিনিৰেসো আসেৰনা চ পৰত্তা, সো একমেৰ দস্সনং ওক্কমতি. যস্স পন দ্ৰীসু তীসুপি ৰা অভিনিৰেসো আসেৰনা চ পৰত্তা, সো দ্ৰে তীণিপি ওক্কমতি, এতেন যা পুব্বে উভযপটিবাহকতামুখেন দীপিতা অত্থসিদ্ধা সব্বদিট্ঠিকতা, সা পুব্বভাগিযা. যা পন মিচ্ছত্তনিযামোক্কন্তিভূতা, সা যথাসকং পচ্চযসমুদাগমসিদ্ধিতো ভিন্নারম্মণানং ৰিয ৰিসেসাধিগমানং একজ্ঝং অনুপ্পত্তিযা অসঙ্কিণ্ণা এৰাতি দস্সেতি. ‘‘একস্মিং ওক্কন্তেপী’’তিআদিনা তিস্সন্নম্পি দিট্ঠীনং সমানবলতং সমানফলতঞ্চ দস্সেতি. তস্মা তিস্সোপি চেতা একস্স উপ্পন্না অব্বোকিণ্ণা এৰ, একায ৰিপাকে দিন্নে ইতরা অনুবলপ্পদাযিকাযো হোন্তি. ‘‘ৰট্টখাণু নামেসা’’তি ইদং ৰচনং নেয্যত্থং, ন নীতত্থং. তথা হি পপঞ্চসূদনিযং ‘‘কিং পনেস একস্মিংযেৰ অত্তভাৰে নিযতো হোতি, উদাহু অঞ্ঞস্মিং পীতি? একস্মিংযেৰ নিযতো, আসেৰনৰসেন পন ভৰন্তরেপি তং তং দিট্ঠিং রোচেতি যেৰা’’তি (ম. নি. অট্ঠ. ৩.১২৯) ৰুত্তং. অকুসলঞ্হি নামেতং অবলং দুব্বলং, ন কুসলং ৰিয সবলং মহাবলং. তস্মা ‘‘একস্মিংযেৰ অত্তভাৰে নিযতো’’তি ৰুত্তং. অঞ্ঞথা সম্মত্তনিযামো ৰিয মিচ্ছত্তনিযামোপি অচ্চন্তিকো সিযা, ন চ অচ্চন্তিকো. যদি এৰং ৰট্টখাণুজোতনা কথন্তি আহ ‘‘আসেৰনৰসেন পনা’’তিআদি. তস্মা যথা ‘‘সকিং নিমুগ্গোপি নিমুগ্গো এৰ বালো’’তি ৰুত্তং, এৰং ৰট্টখাণুজোতনা. যাদিসে হি পচ্চযে পটিচ্চ অযং তং তং দস্সনং ওক্কন্তো পুন কদাচি তপ্পটিপক্খে পচ্চযে পটিচ্চ ততো সীসুক্খিপনমস্স ন হোতীতি ন ৰত্তব্বং, তস্মা ‘‘যেভুয্যেন হি এৰরূপস্স ভৰতো ৰুট্ঠানং নাম নত্থী’’তি ৰুত্তং.

তস্মাতি যস্মা এৰং সংসারখাণুভাৰস্সপি পচ্চযো অপণ্ণকজাতো, তস্মা. ভূতিকামোতি দিট্ঠধম্মিকসম্পরাযিকপরমত্থানং ৰসেন অত্তনো গুণেহি ৰড্ঢিকামো.

পকুধকচ্চাযনৰাদৰণ্ণনা

১৭৪. অকতাতি সমেন ৰিসমেন ৰা কেনচি হেতুনা ন কতা ন ৰিহিতা. কতৰিধো করণৰিধি নত্থি এতেসন্তি অকতৰিধানা. পদদ্ৰযেনাপি লোকে কেনচি হেতুপচ্চযেন নেসং অনিব্বত্তনভাৰং দস্সেতি. ইদ্ধিযাপি ন নিম্মিতাতি কস্সচি ইদ্ধিমতো চেতোৰসিপ্পত্তস্স দেৰস্স, ইস্সরাদিনো ৰা ইদ্ধিযাপি ন নিম্মিতা. অনিম্মাপিতা কস্সচি অনিম্মাপিতা. ৰুত্তত্থমেৰাতি ব্রহ্মজালৰণ্ণনাযং (দী. নি. অট্ঠ. ১.৩০) ৰুত্তত্থমেৰ. ৰঞ্ঝাতি ৰঞ্ঝপসুৰঞ্ঝতালাদযো ৰিয অফলা, কস্সচি অজনকাতি অত্থো, এতেন পথৰিকাযাদীনং রূপাদিজনকভাৰং পটিক্খিপতি. রূপসদ্দাদযো হি পথৰিকাযাদীহি অপ্পটিবদ্ধৰুত্তিকাতি তস্স লদ্ধি. পব্বতকূটং ৰিয ঠিতাতি কূটট্ঠা, যথা পব্বতকূটং কেনচি অনিব্বত্তিতং, কস্সচি চ অনিব্বত্তকং, এৰমেতে পীতি অধিপ্পাযো. যমিদং ‘‘বীজতো অঙ্কুরাদি জাযতী’’তি ৰুচ্চতি, তং ৰিজ্জমানমেৰ ততো নিক্খমতি, ন অৰিজ্জমানং, অঞ্ঞথা অঞ্ঞতোপি অঞ্ঞস্স উপলদ্ধি সিযাতি অধিপ্পাযো. ঠিতত্তাতি নিব্বিকারাভাৰেন ঠিতত্তা. ন চলন্তীতি ৰিকারং নাপজ্জন্তি. ৰিকারাভাৰতো হি তেসং সত্তন্নং কাযানং এসিকট্ঠাযিট্ঠিততা. অনিঞ্জনঞ্চ অত্তনো পকতিযা অৰট্ঠানমেৰ. তেনাহ ‘‘ন ৰিপরিণমন্তী’’তি. অৰিপরিণামধম্মত্তা এৰ হি তে অঞ্ঞমঞ্ঞং ন ব্যাবাধেন্তি. সতি হি ৰিকারং আপাদেতব্বতায ব্যাবাধকতাপি সিযা, তথা অনুগ্গহেতব্বতায অনুগ্গাহকতাতি তদভাৰং দস্সেতুং পাল়িযং নালন্তিআদি ৰুত্তং. পথৰী এৰ কাযেকদেসত্তা পথৰিকাযো. জীৰসত্তমানং কাযানং নিচ্চতায নিব্বিকারভাৰতো ন হন্তব্বতা, ন ঘাতেতব্বতা চাতি নেৰ কোচি হন্তা ৰা ঘাতেতা ৰা, তেনেৰাহ ‘‘সত্তন্নং ত্ৰেৰ কাযান’’ন্তিআদি. যদি কোচি হন্তা নত্থি, কথং সত্থপ্পহারোতি আহ ‘‘যথা মুগ্গরাসি আদীসূ’’তিআদি. কেৰলং সঞ্ঞামত্তমেৰ হোতি. হননঘাতনাদি পন পরমত্থতো নত্থেৰ কাযানং অৰিকোপনীযভাৰতোতি অধিপ্পাযো.

নিগণ্ঠনাটপুত্তৰাদৰণ্ণনা

১৭৭. চত্তারো যামা ভাগা চতুযামা, চতুযামা এৰ চাতুযামা, ভাগত্থো হি ইধ যাম-সদ্দো যথা ‘‘রত্তিযা পঠমো যামো’’তি. সো পনেত্থ ভাগো সংৰরলক্খণোতি আহ ‘‘চাতুযামসংৰুতোতি চতুকোট্ঠাসেন সংৰরেন সংৰুতো’’তি. পটিক্খিত্তসব্বসীতোদকোতি পটিক্খিত্তসব্বসীতোদকপরিভোগো. সব্বেন পাপৰারণেন যুত্তোতি সব্বপ্পকারেন সংৰরলক্খণেন সমন্নাগতো. ধুতপাপোতি সব্বেন নিজ্জরলক্খণেন পাপৰারণেন ৰিধুতপাপো. ফুট্ঠোতি অট্ঠন্নম্পি কম্মানং খেপনেন মোক্খপ্পত্তিযা কম্মক্খযলক্খণেন সব্বেন পাপৰারণেন ফুট্ঠো তং পত্ৰা ঠিতো. কোটিপ্পত্তচিত্তোতি মোক্খাধিগমেনেৰ উত্তমমরিযাদপ্পত্তচিত্তো. যতত্তোতি কাযাদীসু ইন্দ্রিযেসু সংযমেতব্বস্স অভাৰতো সংযতচিত্তো. সুপ্পতিট্ঠিতচিত্তোতি নিস্সেসতো সুট্ঠু পতিট্ঠিতচিত্তো. সাসনানুলোমং নাম পাপৰারণেন যুত্ততা. তেনাহ ‘‘ধুতপাপো’’তিআদি. অসুদ্ধলদ্ধিতাযাতি ‘‘অত্থি জীৰো, সো চ সিযা নিচ্চো, সিযা অনিচ্চো’’তি এৰমাদিঅসুদ্ধলদ্ধিতায. সব্বাতি কম্মপকতিৰিভাগাদিৰিসযা সব্বা নিজ্ঝানক্খন্তিযো. দিট্ঠিযে ৰাতি মিচ্ছাদিট্ঠিযো এৰ জাতা.

সঞ্চযবেলট্ঠপুত্তৰাদৰণ্ণনা

১৭৯-১৮১. অমরাৰিক্খেপে ৰুত্তনযো এৰাতি ব্রহ্মজালে অমরাৰিক্খেপৰাদসংৰণ্ণনাযং (দী. নি. অট্ঠ. ১.৬১-৬৩) ৰুত্তনযো এৰ ৰিক্খেপব্যাকরণভাৰতো, তথেৰ চেত্থ ৰিক্খেপৰাদস্স আগতত্তা.

পঠমসন্দিট্ঠিকসামঞ্ঞফলৰণ্ণনা

১৮৩. যথা তে রুচ্চেয্যাতি ইদানি মযা পুচ্ছিযমানো অত্থো যথা তৰ চিত্তে রোচেয্য. ঘরদাসিযা কুচ্ছিস্মিং জাতো অন্তোজাতো. ধনেন কীতো ধনক্কীতো. বন্ধগ্গাহগহিতো করমরানীতো. সামন্তি সযমেৰ. দাসব্যন্তি দাসভাৰং. কোচি দাসোপি সমানো অলসো কম্মং অকরোন্তো ‘‘কম্মকারো’’তি ন ৰুচ্চতীতি আহ ‘‘অনলসো কম্মকরণসীলোযেৰা’’তি. পঠমমেৰাতি আসন্নতরট্ঠানূপসঙ্কমনতো পগেৰ পুরেতরমেৰ. পচ্ছাতি সামিকস্স নিপজ্জায পচ্ছা. সযনতো অৰুট্ঠিতেতি রত্তিযা ৰিভাযনৰেলায সেয্যতো অৰুট্ঠিতে. পচ্চূসকালতো পট্ঠাযাতি অতীতায রত্তিযা পচ্চূসকালতো পট্ঠায. যাৰ সামিনো রত্তিং নিদ্দোক্কমনন্তি অপরায পদোসৰেলাযং যাৰ নিদ্দোক্কমনং. কিং কারন্তি কিং করণীযং, কিংকারভাৰতো পুচ্ছিত্ৰা কাতব্বৰেয্যাৰচ্চন্তি অত্থো.

দেৰো ৰিযাতি আধিপচ্চপরিৰারাদিসম্পত্তিসমন্নাগতো পধানদেৰো ৰিয. সো ৰতস্সাহন্তি সো ৰত অস্সং অহং. সো রাজা ৰিয অহম্পি ভৰেয্যং, কথং পুঞ্ঞানি করেয্যং, যদি পুঞ্ঞানি উল়ারানি করেয্যন্তি যোজনা. ‘‘সো ৰতস্স’স্স’’ন্তি পাঠে সো রাজা অস্স অহং অস্সং ৰত, যদি পুঞ্ঞানি করেয্যন্তি যোজনা. তেনাহ ‘‘অযমেৰত্থো’’তি. অস্সন্তি উত্তমপুরিসপ্পযোগে অহং-সদ্দো অপ্পযুত্তোপি পযুত্তো এৰ হোতি. যাৰজীৰং ন সক্খিস্সামি দাতুন্তি যাৰজীৰং দানত্থায উস্সাহং করোন্তোপি যং রাজা একং দিৰসং দেতি, ততো সতভাগম্পি দাতুং ন সক্খিস্সামি. তস্মা পব্বজিস্সামীতি পব্বজ্জাযং উস্সাহং কত্ৰাতি যোজনা.

কাযেন সংৰুতোতি কাযেন সংৰরিতব্বং কাযদ্ৰারেন পৰত্তনকং পাপধম্মং সংৰরিত্ৰা ৰিহরেয্যাতি অযমেত্থ অত্থোতি আহ ‘‘কাযেন পিহিতো হুত্ৰা’’তিআদি. ঘাসচ্ছাদনেন পরমতাযাতি ঘাসচ্ছাদনপরিযেসনে সল্লেখৰসেন পরমতায, উক্কট্ঠভাৰে সণ্ঠিতো ঘাসচ্ছাদনমেৰ ৰা পরমং পরা কোটি এতস্স, ন ততো পরং কিঞ্চি আমিসজাতং পরিযেসতি পচ্চাসিসতি চাতি ঘাসচ্ছাদনপরমো, তব্ভাৰো ঘাসচ্ছাদনপরমতা, তস্সা ঘাসচ্ছাদনপরমতায. ৰিৰেকট্ঠকাযানন্তি গণসঙ্গণিকতো পৰিৰিত্তে ঠিতকাযানং. নেক্খম্মাভিরতানন্তি ঝানাভিরতানং. তায এৰ ঝানাভিরতিযা পরমং উত্তমং ৰোদানং ৰিসুদ্ধিং পত্ততায পরমৰোদানপ্পত্তানং. কিলেসূপধিঅভিসঙ্খারূপধীনং অচ্চন্তৰিগমেন নিরুপধীনং. ৰিসঙ্খারগতানন্তি অধিগতনিব্বানানং. এত্থ চ পঠমো ৰিৰেকো ইতরেহি দ্ৰীহি ৰিৰেকেহি সহাপি পত্তব্বো ৰিনাপি, তথা দুতিযো. ততিযো পন ইতরেহি দ্ৰীহি সহেৰ পত্তব্বো, ন ৰিনাতি দট্ঠব্বং. গণে জনসমাগমে সন্নিপতনং গণসঙ্গণিকা, তং পহায একো ৰিহরতি চরতি পুগ্গলৰসেন অসহাযত্তা. চিত্তে কিলেসানং সন্নিপতনং চিত্তকিলেসসঙ্গণিকা, তং পহায একো ৰিহরতি কিলেসৰসেন অসহাযত্তা. মগ্গস্স একচিত্তক্খণিকত্তা, গোত্রভুআদীনঞ্চ আরম্মণমত্তত্তা ন তেসং ৰসেন সাতিসযা নিব্বুতিসুখসম্ফুসনা, ফলসমাপত্তিনিরোধসমাপত্তিৰসেন সাতিসযাতি আহ ‘‘ফলসমাপত্তিং ৰা নিরোধসমাপত্তিং ৰা পৰিসিত্ৰা’’তি. ফলপরিযোসানো হি নিরোধোতি.

১৮৪. অভিহরিত্ৰাতি অভিমুখীভাৰেন নেত্ৰা. ‘‘অহং চীৰরাদীহি পযোজনং সাধেস্সামী’’তি ৰচনসেসো. সপ্পাযন্তি সব্বগেলঞ্ঞপহরণৰসেন উপকারাৰহং. ভাৰিনা অনত্থতো পরিপালনৰসেন গোপনা রক্খাগুত্তি. পচ্চুপ্পন্নস্স নিসেধৰসেন আৰরণগুত্তি.

দুতিযসন্দিট্ঠিকসামঞ্ঞফলৰণ্ণনা

১৮৬. কসতীতি কসিং করোতি. গহপতিকোতি এত্থ ক-সদ্দো অপ্পত্থোতি আহ ‘‘একগেহমত্তে জেট্ঠকো’’তি, তেন অনেককুলজেট্ঠকভাৰং পটিক্খিপতি. করং করোতীতি করং সম্পাদেতি. ৰড্ঢেতীতি উপরূপরি সম্পাদনেন ৰড্ঢেতি. এৰং অপ্পম্পি পহায পব্বজিতুং দুক্করন্তি অযমত্থো লটুকিকোপমসুত্তেন (ম. নি. ২.১৫১, ১৫২) দীপেতব্বো. তেনাহ ‘‘সেয্যথাপি, উদাযি, পুরিসো দলিদ্দো অস্সকো অনাল়্হিযো, তস্সস্স একং অগারকং ওলুগ্গৰিলুগ্গং কাকাতিদাযিং নপরমরূপ’’ন্তি ৰিত্থারো. যদি অপ্পম্পি ভোগং পহায পব্বজিতুং দুক্করং, কস্মা দাসৰারে ভোগগ্গহণং ন কতন্তি আহ ‘‘দাসৰারে পনা’’তিআদি. যথা চ দাসস্স ভোগাপি অভোগা পরাযত্তভাৰতো, এৰং ঞাতযো পীতি দাসৰারে ঞাতিপরিৰট্টগ্গহণম্পি ন কতন্তি দট্ঠব্বং.

পণীততরসামঞ্ঞফলৰণ্ণনা

১৮৯. এৰরূপাহীতি যথাৰুত্তদাসকস্সকূপমাসদিসাহি উপমাহি সামঞ্ঞফলং দীপেতুং পহোতি ভগৰা সকলম্পি রত্তিন্দিৰং ততো ভিয্যোপি অনন্তপটিভানতায ৰিচিত্তনযদেসনভাৰতো. তথাপীতি সতিপি দেসনায উত্তরুত্তরাধিকনানানযৰিচিত্তভাৰে.

একত্থমেতং পদং সাধুসদ্দস্সেৰ ক-কারেন ৰড্ঢিত্ৰা ৰুত্তত্তা, তেনেৰ সাধুক-সদ্দস্স অত্থং ৰদন্তেন অত্থুদ্ধারৰসেন সাধু-সদ্দো উদাহটো. আযাচনেতি অভিমুখযাচনে, অভিপত্থনাযন্তি অত্থো. সম্পটিচ্ছনেতি পটিগ্গণ্হনে. সম্পহংসনেতি সংৰিজ্জমানগুণৰসেন হংসনে তোসনে, উদগ্গতাকরণেতি অত্থো. ধম্মরুচীতি পুঞ্ঞকামো. পঞ্ঞাণৰাতি পঞ্ঞৰা. অদ্দুব্ভোতি অদূসকো, অনুপঘাতকোতি অত্থো. ইধাপীতি ইমস্মিং সামঞ্ঞফলেপি. অযং সাধু-সদ্দো. দল়্হীকম্মেতি সক্কচ্চ কিরিযাযং. আণত্তিযন্তি আণাপনে. ‘‘সুণোহি সাধুকং মনসি করোহী’’তি হি ৰুত্তে সাধুক-সদ্দেন সৰনমনসিকারানং সক্কচ্চকিরিযা ৰিয তদাণাপনম্পি জোতিতং হোতি, আযাচনত্থতা ৰিয চস্স আণাপনত্থতা ৰেদিতব্বা. সুন্দরেপীতি সুন্দরত্থেপি. ইদানি যথাৰুত্তেন সাধুক-সদ্দস্স অত্থত্তযেন পকাসিতং ৰিসেসং দস্সেতুং ‘‘দল়্হীকম্মত্থেন হী’’তিআদি ৰুত্তং.

মনসি করোহীতি এত্থ মনসিকারো ন আরম্মণপটিপাদনলক্খণো, অথ খো ৰীথিপটিপাদনজৰনপটিপাদনমনসিকারপুব্বকং চিত্তে ঠপনলক্খণোতি দস্সেন্তো ‘‘আৰজ্জা’’তিআদিমাহ. সোতিন্দ্রিযৰিক্খেপৰারণং সৰনে নিযোজনৰসেন কিরিযন্তরপটিসেধনভাৰতো, সোতং ওদহাতি অত্থো. মনিন্দ্রিযৰিক্খেপৰারণং অঞ্ঞচিন্তাপটিসেধনতো. ব্যঞ্জনৰিপল্লাসগ্গাহৰারণং ‘‘সাধুক’’ন্তি ৰিসেসেত্ৰা ৰুত্তত্তা. পচ্ছিমস্স অত্থৰিপল্লাসগ্গাহৰারণেপি এসেৰ নযো. ধারণূপপরিক্খাদীসূতি আদি-সদ্দেন তুলনতীরণাদিকে, দিট্ঠিযা সুপ্পটিৰিধে চ সঙ্গণ্হাতি. সব্যঞ্জনোতি এত্থ যথাধিপ্পেতমত্থং ব্যঞ্জযতীতি ব্যঞ্জনং, সভাৰনিরুত্তি. সহ ব্যঞ্জনেনাতি সব্যঞ্জনো, ব্যঞ্জনসম্পন্নোতি অত্থো. সাত্থোতি অরণীযতো উপগন্তব্বতো অনুধাতব্বতো অত্থো, চতুপারিসুদ্ধিসীলাদিকো. তেন সহ অত্থেনাতি সাত্থো, অত্থসম্পন্নোতি অত্থো. ধম্মগম্ভীরোতিআদীসু ধম্মো নাম তন্তি. দেসনা নাম তস্সা মনসা ৰৰত্থাপিতায তন্তিযা দেসনা. অত্থো নাম তন্তিযা অত্থো. পটিৰেধো নাম তন্তিযা, তন্তিঅত্থস্স চ যথাভূতাৰবোধো. যস্মা চেতে ধম্মদেসনা অত্থপ্পটিৰেধা সসাদীহি ৰিয মহাসমুদ্দো মন্দবুদ্ধীহি দুক্খোগাহা, অলব্ভনেয্যপতিট্ঠা চ, তস্মা গম্ভীরা. তেন ৰুত্তং ‘‘যস্মা অযং ধম্মো…পে… সাধুকং মনসি করোহী’’তি. এত্থ চ পটিৰেধস্স দুক্করভাৰতো ধম্মত্থানং, দেসনাঞাণস্স দুক্করভাৰতো দেসনায দুক্খোগাহতা, পটিৰেধস্স পন উপ্পাদেতুং অসক্কুণেয্যতায, ঞাণুপ্পত্তিযা চ দুক্করভাৰতো দুক্খোগাহতা ৰেদিতব্বা. দেসনং নাম উদ্দিসনং, তস্স নিদ্দিসনং ভাসনন্তি ইধাধিপ্পেতন্তি আহ ‘‘ৰিত্থারতো ভাসিস্সামী’’তি. পরিব্যত্তং কথনঞ্হি ভাসনং, তেনাহ ‘‘দেসেস্সামীতি…পে… ৰিত্থারদীপন’’ন্তি.

যথাৰুত্তমত্থং সুত্তপদেন সমত্থেতুং ‘‘তেনাহা’’তিআদি ৰুত্তং. সাল়িকাযিৰ নিগ্ঘোসোতি সাল়িকায আলাপো ৰিয মধুরো কণ্ণসুখো পেমনীযো. পটিভানন্তি সদ্দো. উদীরযীতি উচ্চারীযতি, ৰুচ্চতি ৰা.

এৰং ৰুত্তে উস্সাহজাতোতি এৰং ‘‘সুণোহি সাধুকং মনসি করোহি ভাসিস্সামী’’তি ৰুত্তে ‘‘ন কির ভগৰা সঙ্খেপেনেৰ দেসেস্সতি, ৰিত্থারেনপি ভাসিস্সতী’’তি সঞ্জাতুস্সাহো হট্ঠতুট্ঠো হুত্ৰা.

১৯০. ‘‘ইধা’’তি ইমিনা ৰুচ্চমানং অধিকরণং তথাগতস্স উপ্পত্তিট্ঠানভূতং অধিপ্পেতন্তি আহ ‘‘দেসাপদেসে নিপাতো’’তি. ‘‘স্ৰায’’ন্তি সামঞ্ঞতো ইধসদ্দমত্তং গণ্হাতি, ন যথাৰিসেসিতব্বং ইধ-সদ্দং. তথা হি ৰক্খতি ‘‘কত্থচি পদপূরণমত্তমেৰা’’তি (দী. নি. অট্ঠ. ১.১৯০). লোকং উপাদায ৰুচ্চতি লোক-সদ্দেন সমানাধিকরণভাৰেন ৰুত্তত্তা. সেসপদদ্ৰযে পন পদন্তরসন্নিধানমত্তেন তং তং উপাদায ৰুত্ততা দট্ঠব্বা. ইধ তথাগতো লোকেতি হি জাতিখেত্তং, তত্থাপি অযং চক্কৰাল়ো ‘‘লোকো’’তি অধিপ্পেতো. সমণোতি সোতাপন্নো. দুতিযো সমণোতি সকদাগামী. ৰুত্তঞ্হেতং ‘‘কতমো চ ভিক্খৰে সমণো? ইধ ভিক্খৰে ভিক্খু তিণ্ণং সংযোজনানং পরিক্খযা সোতাপন্নো হোতী’’তিআদি (অ. নি. ৪.২৪১). ‘‘কতমো চ ভিক্খৰে দুতিযো সমণো? ইধ ভিক্খৰে ভিক্খু তিণ্ণং সংযোজনানং পরিক্খযা রাগদোসমোহানং তনুত্তা’’তিআদি (অ. নি. ৪.২৪১). ওকাসন্তি কঞ্চি পদেসং. ইধেৰ তিট্ঠমানস্সাতি ইমিস্সা এৰ ইন্দসালগুহাযং তিট্ঠমানস্স.

পদপূরণমত্তমেৰ ওকাসাপদিসনস্সাপি অসম্ভৰতো অত্থন্তরস্স অবোধনতো. অরহন্তি আদযো সদ্দা ৰিত্থারিতাতি যোজনা. অত্থতো ৰিত্থারণং সদ্দমুখেনেৰ হোতীতি সদ্দগ্গহণং. যস্মা. ‘‘অপরেহিপি অট্ঠহি কারণেহি ভগৰা তথাগতো’’তিআদিনা উদানট্ঠকথাদীসু, (উদা. অট্ঠ. ১৮; ইতিৰু. অট্ঠ. ৩৮) অরহন্তি আদযো ৰিসুদ্ধিমগ্গটীকাযং অপরেহি পকারেহি ৰিত্থারিতা, তস্মাতেসু ৰুত্তানযেনপি সো (ৰিসুদ্ধি. টী. ১.১২৯, ১৩০) অত্থো ৰেদিতব্বো. তথাগতস্স সত্তনিকাযন্তোগধতায ‘‘ইধ পন সত্তলোকো অধিপ্পেতো’’তি ৰত্ৰা তত্থাযং যস্মিং সত্তনিকাযে যস্মিঞ্চ ওকাসে উপ্পজ্জতি, তং দস্সেতুং ‘‘সত্তলোকে উপ্পজ্জমানোপি চা’’তিআদি ৰুত্তং. ‘‘তথাগতো ন দেৰলোকে উপ্পজ্জতী’’তিআদীসু যং ৰত্তব্বং, তং পরতো আগমিস্সতি. সারপ্পত্তাতি কুলভোগিস্সরিযাদিৰসেন সারভূতা. ব্রাহ্মণগহপতিকাতি ব্রহ্মাযুপোক্খরসাতিআদিব্রাহ্মণা চেৰ অনাথপিণ্ডিকাদিগহপতিকা চ.

‘‘সুজাতাযা’’তিআদিনা ৰুত্তেসু চতূসু ৰিকপ্পেসু পঠমো ৰিকপ্পো বুদ্ধভাৰায আসন্নতরপটিপত্তিদস্সনৰসেন ৰুত্তো. আসন্নতরায হি পটিপত্তিযা ঠিতো ‘‘উপ্পজ্জতীতি’’ ৰুচ্চতি উপ্পাদস্স একন্তিকত্তা, পগেৰ পটিপত্তিযা মত্থকে ঠিতো. দুতিযো বুদ্ধভাৰাৰহপব্বজ্জতো পট্ঠায আসন্নপটিপত্তিদস্সনৰসেন, ততিযো বুদ্ধকরধম্ম পারিপূরিতো পট্ঠায বুদ্ধভাৰায পটিপত্তিদস্সনৰসেন. ন হি মহাসত্তানং উপ্পতিভৰূপপত্তিতো পট্ঠায বোধিসম্ভারসম্ভরণং নাম অত্থি. চতুত্থো বুদ্ধকরধম্মসমারম্ভতো পট্ঠায. বোধিযা নিযতভাৰপ্পত্তিতো পভুতি হি ৰিঞ্ঞূহি ‘‘বুদ্ধো উপ্পজ্জতী’’তি ৰত্তুং সক্কা উপ্পাদস্স একন্তিকত্তা. যথা পন সন্দন্তি নদিযোতি সন্দনকিরিযায অৰিচ্ছেদমুপাদায ৰত্তমানপ্পযোগো, এৰং উপ্পাদত্থায পটিপজ্জনকিরিযায অৰিচ্ছেদমুপাদায চতূসু ৰিকপ্পেসু ‘‘উপ্পজ্জতি নামা’’তি ৰুত্তং. সব্বপঠমং উপ্পন্নভাৰন্তি চতূসু ৰিকপ্পেসু সব্বপঠমং ৰুত্তং তথাগতস্স উপ্পন্নতাসঙ্খাতং অত্থিভাৰং. তেনাহ ‘‘উপ্পন্নো হোতীতি অযঞ্হেত্থ অত্থো’’তি.

সো ভগৰাতি যো ‘‘তথাগতো অরহ’’ন্তিআদিনা কিত্তিতগুণো, সো ভগৰা. ‘‘ইমং লোক’’ন্তি নযিদং মহাজনস্স সম্মুখমত্তং সন্ধায ৰুত্তং, অথ খো অনৰসেসং পরিযাদাযাতি দস্সেতুং ‘‘সদেৰক’’ন্তিআদি ৰুত্তং, তেনাহ ‘‘ইদানি ৰত্তব্বং নিদস্সেতী’’তি. পজাতত্তাতি যথাসকং কম্মকিলেসেহি নিব্বত্তত্তা. পঞ্চকামাৰচরদেৰগ্গহণং পারিসেসঞাযেন ইতরেসং পদন্তরেহি সঙ্গহিতত্তা. সদেৰকন্তি চ অৰযৰেন ৰিগ্গহো সমুদাযো সমাসত্থো. ছট্ঠকামাৰচরদেৰগ্গহণং পচ্চাসত্তিঞাযেন. তত্থ হি সো জাতো, তংনিৰাসী চ. ব্রহ্মকাযিকাদিব্রহ্মগ্গহণন্তি এত্থাপি এসেৰ নযো. পচ্চত্থিক …পে… সমণব্রাহ্মণগ্গহণন্তি নিদস্সনমত্তমেতং অপচ্চত্থিকানং, অসমিতাবাহিতপাপানঞ্চ সমণব্রাহ্মণানং সস্সমণব্রাহ্মণীৰচনেন গহিতত্তা. কামং ‘‘সদেৰক’’ন্তিআদি ৰিসেসনানং ৰসেন সত্তৰিসযো লোকসদ্দোতি ৰিঞ্ঞাযতি তুল্যযোগৰিসযত্তা তেসং, ‘‘সলোমকো সপক্খকো’’তিআদীসু পন অতুল্যযোগেপি অযং সমাসো লব্ভতীতি ব্যভিচারদস্সনতো পজাগহণন্তি আহ ‘‘পজাৰচনেন সত্তলোকগ্গহণ’’ন্তি.

অরূপিনো সত্তা অত্তনো আনেঞ্জৰিহারেন ৰিহরন্তা দিব্বন্তীতি দেৰাতি ইমং নিব্বচনং লভন্তীতি আহ ‘‘সদেৰকগ্গহণেন অরূপাৰচরলোকো গহিতো’’তি. তেনাহ ‘‘আকাসানঞ্চাযতনূপগানং দেৰানং সহব্যত’’ন্তি (অ. নি. ৩.১১৭). সমারকগ্গহণেন ছকামাৰচরদেৰলোকো গহিতো তস্স সৰিসেসং মারস্স ৰসে ৰত্তনতো. রূপী ব্রহ্মলোকো গহিতো অরূপীব্রহ্মলোকস্স ৰিসুং গহিতত্তা. চতুপরিসৰসেনাতি খত্তিযাদিচতুপরিসৰসেন, ইতরা পন চতস্সো পরিসা সমারকাদিগ্গহণেন গহিতা এৰাতি. অৰসেসসব্বসত্তলোকো নাগগরুল়াদিভেদো.

এত্তাৰতা চ ভাগসো লোকং গহেত্ৰা যোজনং দস্সেত্ৰা ইদানি তেন তেন ৰিসেসেন অভাগসো লোকং গহেত্ৰা যোজনং দস্সেতুং ‘‘অপি চেত্থা’’তিআদি ৰুত্তং. তত্থ উক্কট্ঠপরিচ্ছেদতোতি উক্কংসগতিৰিজাননেন. পঞ্চসু হি গতীসু দেৰগতিপরিযাপন্নাৰ সেট্ঠা, তত্থাপি অরূপিনো দূরসমুস্সারিতকিলেসদুক্খতায, সন্তপণীতআনেঞ্জৰিহারসমঙ্গিতায, অতিদীঘাযুকতাযাতি এৰমাদীহি ৰিসেসেহি অতিৰিয উক্কট্ঠা. ‘‘ব্রহ্মা মহানুভাৰো’’তিআদি দসসহস্সিযং মহাব্রহ্মুনো ৰসেন ৰদতি. ‘‘উক্কট্ঠপরিচ্ছেদতো’’তি হি ৰুত্তং. অনুত্তরন্তি সেট্ঠং নৰ লোকুত্তরং. ভাৰানুক্কমোতি ভাৰৰসেন পরেসং অজ্ঝাসযৰসেন ‘‘সদেৰক’’ন্তিআদীনং পদানং অনুক্কমো.

তীহাকারেহীতি দেৰমারব্রহ্মসহিততাসঙ্খাতেহি তীহি পকারেহি. তীসু পদেসূতি ‘‘সদেৰক’’ন্তিআদীসু তীসু পদেসু. তেন তেনাকারেনাতি সদেৰকত্তাদিনা তেন তেন পকারেন. তেধাতুকমেৰ পরিযাদিন্নন্তি পোরাণা পনাহূতি যোজনা.

অভিঞ্ঞাতি য-কারলোপেনাযং নিদ্দেসো, অভিজানিত্ৰাতি অযমেত্থ অত্থোতি আহ ‘‘অভিঞ্ঞায অধিকেন ঞাণেন ঞত্ৰা’’তি. অনুমানাদিপটিক্খেপোতি অনুমানউপমানঅত্থাপত্তিআদিপটিক্খেপো একপ্পমাণত্তা. সব্বত্থ অপ্পটিহতঞাণচারতায হি সব্বপচ্চক্খা বুদ্ধা ভগৰন্তো.

অনুত্তরং ৰিৰেকসুখন্তি ফলসমাপত্তিসুখং, তেন ঠিতিমিস্সাপি [ৰীথিমিস্সাপি (সারত্থ. টী. ১.ৰেরঞ্জকণ্ডৰণ্ণনাযং) ধিতিমিস্সাপি (ক)] কদাচি ভগৰতো ধম্মদেসনা হোতীতি হিত্ৰাপীতি পি-সদ্দগ্গহণং. ভগৰা হি ধম্মং দেসেন্তো যস্মিং খণে পরিসা সাধুকারং ৰা দেতি, যথাসুতং ৰা ধম্মং পচ্চৰেক্খতি, তং খণং পুব্বভাগেন পরিচ্ছিন্দিত্ৰা ফলসমাপত্তিং সমাপজ্জতি, যথাপরিচ্ছেদঞ্চ সমাপত্তিতো ৰুট্ঠায ঠিতট্ঠানতো পট্ঠায ধম্মং দেসেতি. উগ্ঘটিতঞ্ঞুস্স ৰসেন অপ্পং ৰা ৰিপঞ্চিতঞ্ঞুস্স, নেয্যস্স ৰা ৰসেন বহুং ৰা দেসেন্তো. ধম্মস্স কল্যাণতা নিয্যানিকতায, নিয্যানিকতা চ সব্বসো অনৰজ্জভাৰেনেৰাতি আহ ‘‘অনৰজ্জমেৰ কত্ৰা’’তি. দেসকাযত্তেন আণাদিৰিধিনা অভিসজ্জনং পবোধনং দেসনাতি সা পরিযত্তিধম্মৰসেন ৰেদিতব্বাতি আহ ‘‘দেসনায তাৰ চতুপ্পদিকাযপি গাথাযা’’তিআদি. নিদাননিগমনানিপি সত্থুনো দেসনায অনুৰিধানতো তদন্তোগধানি এৰাতি আহ ‘‘নিদানমাদি, ইদং এৰোচাতি পরিযোসান’’ন্তি.

সাসিতব্বপুগ্গলগতেন যথাপরাধাদিসাসিতব্বভাৰেন অনুসাসনং তদঙ্গৰিনযাদিৰসেন ৰিনযনং সাসনন্তি তং পটিপত্তিধম্মৰসেন ৰেদিতব্বন্তি আহ ‘‘সীলসমাধিৰিপস্সনা’’তিআদি. কুসলানং ধম্মানন্তি অনৰজ্জধম্মানং সীলস্স, সমথৰিপস্সনানঞ্চ সীলদিট্ঠীনং আদিভাৰো তং মূলকত্তা উত্তরিমনুস্সধম্মানং. অরিযমগ্গস্স অন্তদ্ৰযৰিগমেন মজ্ঝিমপটিপদাভাৰো ৰিয, সম্মাপটিপত্তিযা আরব্ভনিপ্ফত্তীনং ৰেমজ্ঝত্তাপি মজ্ঝভাৰোতি ৰুত্তং. ‘‘অত্থি ভিক্খৰে…পে… মজ্ঝং নামা’’তি. ফলং পরিযোসানং নাম সউপাদিসেসতাৰসেন, নিব্বানং পরিযোসানং নাম অনুপাদিসেসতাৰসেন. ইদানি তেসং দ্ৰিন্নম্পি সাসনস্স পরিযোসানতং আগমেন দস্সেতুং ‘‘এতদত্থমিদ’’ন্তিআদি আহ. ইধ দেসনায আদিমজ্ঝপরিযোসানং অধিপ্পেতং ‘‘সব্যঞ্জন’’ন্তিআদি ৰচনতো. তস্মিং তস্মিং অত্থে কতাৰধিসদ্দপ্পবন্ধো গাথাৰসেন, সুত্তৰসেন চ ৰৰত্থিতো পরিযত্তিধম্মো, যো ইধ ‘‘দেসনা’’তি ৰুত্তো, তস্স পন অত্থো ৰিসেসতো সীলাদি এৰাতি আহ ‘‘ভগৰা হি ধম্মং দেসেন্তো…পে… দস্সেতী’’তি. তত্থ সীলং দস্সেত্ৰাতি সীলগ্গহণেন সসম্ভারং সীলং গহিতং, তথা মগ্গগ্গহণেন সসম্ভারো মগ্গোতি তদুভযৰসেন অনৰসেসতো পরিযত্তি অত্থং পরিযাদিযতি. তেনাতি সীলাদিদস্সনেন. অত্থৰসেন হি ইধ দেসনায আদিকল্যাণাদিভাৰো অধিপ্পেতো. কথিকসণ্ঠিতীতি কথিকস্স সণ্ঠানং কথনৰসেন সমৰট্ঠানং.

ন সো সাত্থং দেসেতি নিয্যানত্থৰিরহতো তস্সা দেসনায. একব্যঞ্জনাদিযুত্তা ৰাতি সিথিলাদিভেদেসু ব্যঞ্জনেসু একপ্পকারেমেৰ, দ্ৰিপকারেমেৰ ৰা ব্যঞ্জনেন যুত্তা ৰা দমিল়ভাসা ৰিয. ৰিৰটকরণতায ওট্ঠে অফুসাপেত্ৰা উচ্চারেতব্বতো সব্বনিরোট্ঠব্যঞ্জনা ৰা কিরাতভাসা ৰিয. সব্বস্সেৰ [সব্বত্থেৰ (সারত্থ. টী. ১.ৰেরঞ্জকণ্ডৰণ্ণনাযং ১)] ৰিস্সজ্জনীযযুত্ততায সব্বৰিস্সট্ঠব্যঞ্জনা ৰা সৰরভাসা [যৰনভাসা (সারত্থ. টী. ১.ৰেরঞ্জকণ্ডৰণ্ণনাযং)] ৰিয. সব্বস্সেৰ [সব্বত্থেৰ (সারত্থ. টী. ১.ৰেরঞ্জকণ্ডৰণ্ণনাযং)] সানুসারতায সব্বনিগ্গহিতব্যঞ্জনা ৰা পারসিকাদিমিলক্খুভাসা ৰিয. সব্বাপেসা ব্যঞ্জনেকদেসৰসেন পৰত্তিযা অপরিপুণ্ণব্যঞ্জনাতি কত্ৰা ‘‘অব্যঞ্জনা’’তি ৰুত্তা.

ঠানকরণানি সিথিলানি কত্ৰা উচ্চারেতব্বং অক্খরং পঞ্চসু ৰগ্গেসু পঠমততিযন্তি এৰমাদি সিথিলং. তানি অসিথিলানি কত্ৰা উচ্চারেতব্বং অক্খরং ৰগ্গেসু দুতিযচতুত্থন্তি এৰমাদি ধনিতং. দ্ৰিমত্তকালং দীঘং. একমত্তকালং রস্সং তদেৰ লহুকং. লহুকমেৰ সংযোগপরং, দীঘঞ্চ গরুকং. ঠানকরণানি নিগ্গহেত্ৰা উচ্চারেতব্বং নিগ্গহিতং. পরেন সম্বন্ধং কত্ৰা উচ্চারেতব্বং সম্বন্ধং. তথা নসম্বন্ধং ৰৰত্থিতং. ঠানকরণানি নিস্সট্ঠানি কত্ৰা উচ্চারেতব্বং ৰিমুত্তং. দসধাতি এৰং সিথিলাদিৰসেন ব্যঞ্জনবুদ্ধিযা অক্খরুপ্পাদকচিত্তস্স সব্বাকারেন পভেদো. সব্বানি হি অক্খরানি চিত্তসমুট্ঠানানি যথাধিপ্পেতত্থং ব্যঞ্জনতো ব্যঞ্জনানি চাতি.

অমক্খেত্ৰাতি অমিলেচ্ছেত্ৰা, অৰিনাসেত্ৰা, অহাপেত্ৰাতি ৰা অত্থো. ভগৰা যমত্থং ঞাপেতুং একং গাথং, একং ৰাক্যং ৰা দেসেতি, তমত্থং তায দেসনায পরিমণ্ডলপদব্যঞ্জনায এৰ দেসেতীতি আহ ‘‘পরিপুণ্ণব্যঞ্জনমেৰ কত্ৰা ধম্মং দেসেতী’’তি. ইধ কেৰলসদ্দো অনৰসেসৰাচকো, ন অৰোমিস্সকাদিৰাচকোতি আহ ‘‘সকলাধিৰচন’’ন্তি. পরিপুণ্ণন্তি সব্বসো পুণ্ণং, তং পন কেনচি ঊনং, অধিকং ৰা ন হোতীতি ‘‘অনূনাধিকৰচন’’ন্তি ৰুত্তং. তত্থ যদত্থং দেসিতো, তস্স সাধকত্তা অনূনতা ৰেদিতব্বা, তব্বিধুরস্স পন অসাধকত্তা অনধিকতা. সকলন্তি সব্বভাগৰন্তং. পরিপুণ্ণন্তি সব্বসো পরিপুণ্ণমেৰ, তেনাহ ‘‘একদেসনাপি অপরিপুণ্ণা নত্থী’’তি. অপরিসুদ্ধা দেসনা হোতি তণ্হায সংকিলিট্ঠত্তা. লোকামিসং চীৰরাদযো পচ্চযা তত্থ অগধিতচিত্ততায লোকামিসনিরপেক্খো. হিতফরণেনাতি হিতূপসংহারেন. মেত্তাভাৰনায করণভূতায মুদুহদযো. উল্লুম্পনসভাৰসণ্ঠিতেনাতি সকলসংকিলেসতো, ৰট্টদুক্খতো চ উদ্ধরণাকারাৰট্ঠিতেন চিত্তেন, কারুণাধিপ্পাযেনাতি অত্থো.

‘‘ইতো পট্ঠায দস্সামেৰ, এৰঞ্চ দস্সামী’’তি সমাদাতব্বট্ঠেন ৰতং. পণ্ডিতপঞ্ঞত্ততায সেট্ঠট্ঠেন ব্রহ্মং ব্রহ্মানং ৰা চরিযন্তি ব্রহ্মচরিযং দানং. মচ্ছরিযলোভাদিনিগ্গণ্হনেন সুচিণ্ণস্স. ইদ্ধীতি দেৰিদ্ধি. জুতীতি পভা, আনুভাৰো ৰা. বলৰীরিযূপপত্তীতি এৰং মহতা বলেন চ ৰীরিযেন চ সমন্নাগমো. পুঞ্ঞন্তি পুঞ্ঞফলং. ৰেয্যাৰচ্চং ব্রহ্মচরিযং সেট্ঠা চরিযাতি কত্ৰা. এস নযো সেসেপি.

তস্মাতি যস্মা সিক্খত্তযসঙ্গহং সকলং সাসনং ইধ ‘‘ব্রহ্মচরিয’’ন্তি অধিপ্পেতং তস্মা. ‘‘ব্রহ্মচরিয’’ন্তি ইমিনা সমানাধিকরণানি সব্বপদানি যোজেত্ৰা অত্থং দস্সেন্তো ‘‘সো ধম্মং দেসেতি…পে… পকাসেতীতি এৰমেত্থ অত্থো দট্ঠব্বো’’তি আহ.

১৯১. ৰুত্তপ্পকারসম্পদন্তি যথাৰুত্তং আদিকল্যাণতাদিগুণসম্পদং, দূরসমুস্সারিতমানস্সেৰ সাসনে সম্মাপটিপত্তি সম্ভৰতি, ন মানজাতিকস্সাতি আহ ‘‘নিহতমানত্তা’’তি. উস্সন্নত্তাতি বহুলভাৰতো. ভোগারোগ্যাদিৰত্থুকা মদা সুপ্পহেয্যা হোন্তি নিমিত্তস্স অনৰত্থানতো, ন তথা কুলৰিজ্জামদা, তস্মা খত্তিযব্রাহ্মণকুলানং পব্বজিতানম্পি জাতিৰিজ্জা নিস্সায মানজপ্পনং দুপ্পজহন্তি আহ ‘‘যেভুয্যেন হি…পে… মানং করোন্তী’’তি. ৰিজাতিতাযাতি নিহীনজাতিতায. পতিট্ঠাতুং ন সক্কোন্তীতি সুৰিসুদ্ধং কত্ৰা সীলং রক্খিতুং ন সক্কোন্তি. সীলৰসেন হি সাসনে পতিট্ঠা, পতিট্ঠাতুন্তি ৰা সচ্চপটিৰেধেন লোকুত্তরায পতিট্ঠায পতিট্ঠাতুং. সা হি নিপ্পরিযাযতো সাসনে পতিট্ঠা নাম, যেভুয্যেন চ উপনিস্সযসম্পন্না সুজাতা এৰ হোন্তি, ন দুজ্জাতা.

পরিসুদ্ধন্তি রাগাদীনং অচ্চন্তমেৰ পহানদীপনতো নিরুপক্কিলেসতায সব্বসো পরিসুদ্ধং. সদ্ধং পটিলভতীতি পোথুজ্জনিকসদ্ধাৰসেন সদ্দহতি. ৰিঞ্ঞূজাতিকানঞ্হি ধম্মসম্পত্তিগ্গহণপুব্বিকা সদ্ধা সিদ্ধি ধম্মপ্পমাণধম্মপ্পসন্নভাৰতো. ‘‘সম্মাসম্বুদ্ধো ৰত সো ভগৰা, যো এৰং স্ৰাক্খাতধম্মো’’তি সদ্ধং পটিলভতি. জাযম্পতিকাতি ঘরণীপতিকা. কামং ‘‘জাযম্পতিকা’’তি ৰুত্তে ঘরসামিকঘরসামিনীৰসেন দ্ৰিন্নংযেৰ গহণং ৰিঞ্ঞাযতি. যস্স পন পুরিসস্স অনেকা পজাপতিযো, তত্থ কিং ৰত্তব্বং, একাযাপি সংৰাসো সম্বাধোতি দস্সনত্থং ‘‘দ্ৰে’’তি ৰুত্তং. রাগাদিনা সকিঞ্চনট্ঠেন, খেত্তৰত্থু আদিনা সপলিবোধট্ঠেন রাগরজাদীনং আগমনপথতাপি উট্ঠানট্ঠানতা এৰাতি দ্ৰেপি ৰণ্ণনা একত্থা, ব্যঞ্জনমেৰ নানং. অলগ্গনট্ঠেনাতি অস্সজ্জনট্ঠেন অপ্পটিবদ্ধভাৰেন. এৰং অকুসলকুসলপ্পৰত্তীনং ঠানভাৰেন ঘরাৰাসপব্বজ্জানং সম্বাধব্ভোকাসতং দস্সেত্ৰা ইদানি কুসলপ্পৰত্তিযা এৰ অট্ঠানট্ঠানভাৰেন তেসং তং দস্সেতুং ‘‘অপিচা’’তিআদি ৰুত্তং.

সঙ্খেপকথাতি ৰিসুং ৰিসুং পদুদ্ধারং অকত্ৰা সমাসতো অত্থৰণ্ণনা. একম্পি দিৰসন্তি একদিৰসমত্তম্পি. অখণ্ডং কত্ৰাতি দুক্কটমত্তস্সপি অনাপজ্জনেন অখণ্ডিতং কত্ৰা. কিলেসমলেন অমলীনন্তি তণ্হাসংকিলেসাদিনা অসংকিলিট্ঠং কত্ৰা. পরিযোদাতট্ঠেন নিম্মলভাৰেন সঙ্খং ৰিয লিখিতং ধোতন্তি সঙ্খলিখিতন্তি আহ ‘‘ধোতসঙ্খসপ্পটিভাগ’’ন্তি. ‘‘অজ্ঝাৰসতা’’তি পদপ্পযোগেন ‘‘অগার’’ন্তি ভুম্মত্থে উপযোগৰচনন্তি আহ ‘‘অগারমজ্ঝে’’তি. কসাযেন রত্তানি ৰত্থানি কাসাযানীতি আহ ‘‘কসাযরসপীততাযা’’তি. পরিদহিত্ৰাতি নিৰাসেত্ৰা চেৰ পারুপিত্ৰা চ. অগারৰাসো অগারং উত্তরপদলোপেন, তস্স ৰড্ঢিআৰহং অগারস্স হিতং.

১৯২. ভোগক্খন্ধোতি ভোগসমুদাযো. আবন্ধনট্ঠেনাতি ‘‘পুত্তো নত্তা’’তিআদিনা পেমৰসেন সপরিচ্ছেদং বন্ধনট্ঠেন. ‘‘অম্হাকমেতে’’তি ঞাযন্তীতি ঞাতী. পিতামহপিতুপুত্তাদিৰসেন পরিৰত্তনট্ঠেন পরিৰট্টো.

১৯৩. পাতিমোক্খসংৰরসংৰুতোতি পাতিমোক্খসংৰরেন পিহিতকাযৰচীদ্ৰারো, তথাভূতো চ যস্মা তেন সংৰরেন উপেতো নাম হোতি, তস্মা ৰুত্তং ‘‘পাতিমোক্খসংৰরেন সমন্নাগতো’’তি. ‘‘আচারগোচরসম্পন্নো’’তিআদি তস্সেৰ পাতিমোক্খসংৰরসমন্নাগমস্স পচ্চযদস্সনং. অপ্পমত্তকেসূতি অসঞ্চিচ্চ আপন্নঅনুখুদ্দকেসু চেৰ সহসা উপ্পন্নঅকুসলচিত্তুপ্পাদেসু চ. ভযদস্সাৰীতি ভযদস্সনসীলো. সম্মা আদিযিত্ৰাতি সক্কচ্চং যাৰজীৰং অৰীতিক্কমৰসেন আদিযিত্ৰা. তং তং সিক্খাপদন্তি তং তং সিক্খাকোট্ঠাসং. এত্থাতি এতস্মিং ‘‘পাতিমোক্খসংৰরসংৰুতো’’তি পাঠে. সঙ্খেপোতি সঙ্খেপৰণ্ণনা. ৰিত্থারো ৰিসুদ্ধিমগ্গে (ৰিসুদ্ধি. ১.১৪) ৰুত্তো, তস্মা সো তত্থ, তংসংৰণ্ণনায (ৰিসুদ্ধি. টী. ১.১৪) চ ৰুত্তনযেন ৰেদিতব্বো.

আচারগোচরগ্গহণেনেৰাতি ‘‘আচারগোচরসম্পন্নো’’তি ৰচনেনেৰ. তেনাহ ‘‘কুসলে কাযকম্মৰচীকম্মে গহিতেপী’’তি. অধিকৰচনং অঞ্ঞমত্থং বোধেতীতি কত্ৰা তস্স আজীৰপারিসুদ্ধিসীলস্স উপ্পত্তিদ্ৰারদস্সনত্থং…পে… কুসলেনাতি ৰুত্তং, সব্বসো অনেসনপ্পহানেন অনৰজ্জেনাতি অত্থো. যস্মা ‘‘কতমে চ থপতি কুসলা সীলা কুসলং কাযকম্মং কুসলং ৰচীকম্ম’’ন্তি (ম. নি. ২.২৬৫) সীলস্স কুসলকাযৰচীভাৰং দস্সেত্ৰা ‘‘আজীৰপরিসুদ্ধম্পি খো অহং থপতি সীলস্মিং ৰদামী’’তি (ম. নি. ২.২৬৫) এৰং পৰত্তায মুণ্ডিকসুত্তদেসনায ‘‘কাযকম্মৰচীকম্মেন সমন্নাগতো কুসলেন, পরিসুদ্ধাজীৰো’’তি অযং দেসনা একসঙ্গহা অঞ্ঞদত্থু সংসন্দতি সমেতীতি দস্সেন্তো আহ ‘‘মুণ্ডিকসুত্তৰসেন ৰা এৰং ৰুত্ত’’ন্তি. সীলস্মিং ৰদামীতি ‘‘সীল’’ন্তি ৰদামি, ‘‘সীলস্মিং অন্তোগধং পরিযাপন্ন’’ন্তি ৰদামীতি ৰা অত্থো. পরিযাদানত্থন্তি পরিগ্গহত্থং.

তিৰিধেন সীলেনাতি চূল়সীলং মজ্ঝিমসীলং মহাসীলন্তি এৰং তিৰিধেন সীলেন. মনচ্ছট্ঠেসু ইন্দ্রিযেসু, ন কাযপঞ্চমেসু. যথালাভযথাবলযথাসারুপ্পপ্পকারৰসেন তিৰিধেন সন্তোসেন.

চূল়মজ্ঝিমমহাসীলৰণ্ণনা

১৯৪-২১১. ‘‘সীলস্মি’’ন্তি ইদং নিদ্ধারণে ভুম্মন্তি আহ ‘‘একং সীলং হোতীতি অত্থো’’তি. অযমেৰ অত্থোতি পচ্চত্তৰচনত্থো এৰ. ব্রহ্মজালেতি ব্রহ্মজালৰণ্ণনাযং (দী. নি. অট্ঠ. ১.৭).

২১২. অত্তানুৰাদপরানুৰাদদণ্ডভযাদীনি অসংৰরমূলকানি. সীলস্সাসংৰরতোতি সীলস্স অসংৰরণতো, সীলসংৰরাভাৰতোতি অত্থো. ভৰেয্যাতি উপ্পজ্জেয্য. যথাৰিধানৰিহিতেনাতি যথাৰিধানসম্পাদিতেন. অৰিপ্পটিসারাদিনিমিত্তং উপ্পন্নচেতসিকসুখসমুট্ঠানেহি পণীতরূপেহি ফুট্ঠসরীরস্স উল়ারং কাযিকং সুখং ভৰতীতি আহ ‘‘অৰিপ্পটিসার…পে… পটিসংৰেদেতী’’তি.

ইন্দ্রিযসংৰরকথাৰণ্ণনা

২১৩. ৰিসেসো কম্মত্থাপেক্খতায সামঞ্ঞস্স ন তেহি পরিচত্তোতি আহ ‘‘চক্খু-সদ্দো কত্থচি বুদ্ধচক্খুম্হি ৰত্ততী’’তি. ৰিজ্জমানমেৰ হি অভিধেয্যে ৰিসেসত্থং ৰিসেসন্তরনিৰত্তনৰসেন ৰিসেসসদ্দো ৰিভাৰেতি, ন অৰিজ্জমানং. সেসপদেসুপি এসেৰ নযো. অঞ্ঞেহি অসাধারণং বুদ্ধানংযেৰ চক্খুদস্সনন্তি বুদ্ধচক্খু, আসযানুসযঞাণং, ইন্দ্রিযপরোপরিযত্তঞাণঞ্চ. সমন্ততো সব্বসো দস্সনট্ঠেন সমন্তচক্খু, সব্বঞ্ঞুতঞ্ঞাণং. অরিযমগ্গত্তযপঞ্ঞাতি হেট্ঠিমে অরিযমগ্গত্তযে পঞ্ঞা. ইধাতি ‘‘চক্খুনা রূপ’’ন্তি ইমস্মিং পাঠে. অযং চক্খু-সদ্দো পসাদ…পে… ৰত্ততি নিস্সযৰোহারে নিস্সিতস্স ৰত্তব্বতো যথা. ‘‘মঞ্চা উক্কুট্ঠিং করোন্তী’’তি. অসম্মিস্সন্তি কিলেসদুক্খেন অৰোমিস্সং. তেনাহ ‘‘পরিসুদ্ধ’’ন্তি. সতি হি সুৰিসুদ্ধে ইন্দ্রিযসংৰরে, পধানভূতপাপধম্মৰিগমেন অধিচিত্তানুযোগো হত্থগতো এৰং হোতীতি আহ ‘‘অধিচিত্তসুখং পটিসংৰেদেতী’’তি.

সতিসম্পজঞ্ঞকথাৰণ্ণনা

২১৪. সমন্ততো, পকট্ঠং ৰা সৰিসেসং জানাতীতি সম্পজানো, সম্পজানস্স ভাৰো সম্পজঞ্ঞং, তথাপৰত্তঞাণং. তস্স ৰিভজনং সম্পজঞ্ঞভাজনীযং, তস্মিং সম্পজঞ্ঞভাজনীযম্হি. অভিক্কমনং অভিক্কন্তন্তি আহ ‘‘অভিক্কন্তং ৰুচ্চতি গমন’’ন্তি. তথা পটিক্কমনং পটিক্কন্তন্তি আহ ‘‘পটিক্কন্তং নিৰত্তন’’ন্তি. নিৰত্তনন্তি চ নিৰত্তিমত্তং. নিৰত্তিত্ৰা পন গমনং গমনমেৰ. অভিহরন্তোতি গমনৰসেন কাযং উপনেন্তো. ঠাননিসজ্জাসযনেসু যো গমনৰিধুরো কাযস্স পুরতো অভিহারো, সো অভিক্কমো, পচ্ছতো অপহরণং পটিক্কমোতি দস্সেন্তো ‘‘ঠানেপী’’তিআদিমাহ. আসনস্সাতি পীঠকাদিআসনস্স. পুরিমঅঙ্গাভিমুখোতি অটনিকাদিপুরিমাৰযৰাভিমুখো. সংসরন্তোতি সংসপ্পন্তো. পচ্চাসংসরন্তোতি পটিআসপ্পন্তো. ‘‘এসেৰ নযো’’তি ইমিনা নিপন্নস্সেৰ অভিমুখসংসপ্পনপটিআসপ্পনানি নিদস্সেতি.

সম্মা পজাননং সম্পজানং, তেন অত্তনা কাতব্বকিচ্চস্স করণসীলো সম্পজানকারীতি আহ ‘‘সম্পজঞ্ঞেন সব্বকিচ্চকারী’’তি. সম্পজানসদ্দস্স সম্পজঞ্ঞপরিযাযতা পুব্বে ৰুত্তা এৰ. সম্পজঞ্ঞং করোতেৰাতি অভিক্কন্তাদীসু অসম্মোহং উপ্পাদেতি এৰ. সম্পজঞ্ঞস্স ৰা কারো এতস্স অত্থীতি সম্পজানকারী. ধম্মতো ৰড্ঢিসঙ্খাতেন সহ অত্থেন ৰত্ততীতি সাত্থকং, অভিক্কন্তাদি. সাত্থকস্স সম্পজাননং সাত্থকসম্পজঞ্ঞং. সপ্পাযস্স অত্তনো হিতস্স সম্পজাননং সপ্পাযসম্পজঞ্ঞং. অভিক্কমাদীসু ভিক্খাচারগোচরে, অঞ্ঞত্থাপি চ পৰত্তেসু অৰিজহিতে কম্মট্ঠানসঙ্খাতে গোচরে সম্পজঞ্ঞং গোচরসম্পজঞ্ঞং. অভিক্কমাদীসু অসম্মুয্হনমেৰ সম্পজঞ্ঞং অসম্মোহসম্পজঞ্ঞং. পরিগ্গহেত্ৰাতি তূলেত্ৰা তীরেত্ৰা পটিসঙ্খাযাতি, অত্থো. সঙ্ঘদস্সনেনেৰ উপোসথপৰারণাদিঅত্থং গমনং সঙ্গহিতং. অসুভদস্সনাদীতি আদি-সদ্দেন কসিণপরিকম্মাদীনং সঙ্গহো দট্ঠব্বো. সঙ্খেপতো ৰুত্তমত্থং ৰিৰরিতুং ‘‘চেতিযং ৰা বোধিং ৰা দিস্ৰাপি হী’’তিআদি ৰুত্তং. অরহত্তং পাপুণাতীতি উক্কট্ঠনিদ্দেসো এসো. সমথৰিপস্সনুপ্পাদনম্পি হি ভিক্খুনো ৰড্ঢিযেৰ. কেচীতি অভযগিরিৰাসিনো.

তস্মিং পনাতি সাত্থকসম্পজঞ্ঞৰসেন পরিগ্গহিতঅত্থে. ‘‘অত্থোতি ধম্মতো ৰড্ঢী’’তি যং সাত্থকন্তি অধিপ্পেতং, তং সপ্পাযং এৰাতি সিযা কস্সচি আসঙ্কাতি তন্নিৰত্তনত্থং ‘‘চেতিযদস্সনং তাৰা’’তিআদি আরদ্ধং. চিত্তকম্মরূপকানি ৰিযাতি চিত্তকম্মকতা পটিমাযো ৰিয, যন্তপযোগেন ৰা ৰিচিত্তকম্মা পটিমাযো ৰিয. অসমপেক্খনং গেহস্সিত অঞ্ঞাণুপেক্খাৰসেন আরম্মণস্স অযোনিসো গহণং. যং সন্ধায ৰুত্তং. ‘‘চক্খুনা রূপং দিস্ৰা উপ্পজ্জতি উপেক্খা বালস্স মূল়্হস্স পুথুজ্জনস্সা’’তিআদি (ম. নি. ৩.৩০৮). হত্থিআদিসম্মদ্দেন জীৰিতন্তরাযো. ৰিসভাগরূপদস্সনাদিনা ব্রহ্মচরিযন্তরাযো.

পব্বজিতদিৰসতো পট্ঠায ভিক্খূনং অনুৰত্তনকথা আচিণ্ণা, অননুৰত্তনকথা পন তস্সা দুতিযা নাম হোতীতি আহ ‘‘দ্ৰে কথা নাম ন কথিতপুব্বা’’তি. এৰন্তি ‘‘সচে পনা’’তিআদিকং সব্বম্পি ৰুত্তাকারং পচ্চামসতি, ন ‘‘পুরিসস্স মাতুগামাসুভ’’ন্তিআদিকং ৰুচ্চমানং.

যোগকম্মস্স পৰত্তিট্ঠানতায ভাৰনায আরম্মণং ‘‘কম্মট্ঠান’’ন্তি ৰুচ্চতীতি আহ ‘‘কম্মট্ঠানসঙ্খাতং গোচর’’ন্তি. উগ্গহেত্ৰাতি যথা উগ্গহনিমিত্তং উপ্পজ্জতি, এৰং উগ্গহকোসল্লস্স সম্পাদনৰসেন উগ্গহেত্ৰা.

হরতীতি কম্মট্ঠানং পৰত্তেতি, যাৰ পিণ্ডপাতপটিক্কমা অনুযুঞ্জতীতি অত্থো. ন পচ্চাহরতীতি আহারূপযোগতো যাৰ দিৰাঠানুপসঙ্কমনা কম্মট্ঠানং ন পটিনেতি. সরীরপরিকম্মন্তি মুখধোৰনাদিসরীরপটিজগ্গনং. দ্ৰে তযো পল্লঙ্কেতি দ্ৰে তযো নিসজ্জাৰারে দ্ৰে তীণি উণ্হাসনানি. তেনাহ ‘‘উসুমং গাহাপেন্তো’’তি. কম্মট্ঠানসীসেনেৰাতি কম্মট্ঠানমুখেনেৰ কম্মট্ঠানং অৰিজহন্তো এৰ, তেন ‘‘পত্তোপি অচেতনো’’তিআদিনা (দী. নি. অট্ঠ. ১.২১৪) ৰক্খমানং কম্মট্ঠানং, যথাপরিহরিযমানং ৰা অৰিজহিত্ৰাতি দস্সেতি. তথেৰাতি তিক্খত্তুমেৰ. পরিভোগচেতিযতো সারীরিকচেতিযং গরুতরন্তি কত্ৰা ‘‘চেতিযং ৰন্দিত্ৰা’’তি পুব্বকালকিরিযায ৰসেন ৰুত্তং. তথা হি অট্ঠকথাযং ‘‘চেতিযং বাধযমানা বোধিসাখা হরিতব্বা’’তি ৰুত্তা. বুদ্ধগুণানুস্সরণৰসেনেৰ বোধিযং পণিপাতকরণন্তি আহ ‘‘বুদ্ধস্স ভগৰতো সম্মুখা ৰিয নিপচ্চকারং দস্সেত্ৰা’’তি. গামসমীপেতি গামস্স উপচারট্ঠানে. জনসঙ্গহত্থন্তি ‘‘মযি অকথেন্তে এতেসং কো কথেস্সতী’’তি ধম্মানুগ্গহেন জনসঙ্গহত্থং. তস্মাতি যস্মা ‘‘ধম্মকথা নাম কথেতব্বা এৰা’’তি অট্ঠকথাচরিযা ৰদন্তি, যস্মা চ ধম্মকথা কম্মট্ঠানৰিনিমুত্তা নাম নত্থি, তস্মা. কম্মট্ঠানসীসেনেৰাতি অত্তনা পরিহরিযমানং কম্মট্ঠানং অৰিজহন্তো তদনুগুণংযেৰ ধম্মকথং কথেত্ৰা. অনুমোদনং ৰত্ৰাতি এত্থাপি ‘‘কম্মট্ঠানসীসেনেৰা’’তি আনেত্ৰা সম্বন্ধিতব্বং.

সম্পত্তপরিচ্ছেদেনেৰাতি ‘‘পরিচিতো অপরিচিতো’’তিআদি ৰিভাগং অকত্ৰা সম্পত্তকোটিযা এৰ, সমাগমমত্তেনেৰাতি অত্থো. ভযেতি পরচক্কাদিভযে.

‘‘কম্মজতেজো’’তি গহণিং সন্ধাযাহ. কম্মট্ঠানং ৰীথিং নারোহতি খুদাপরিস্সমেন কিলন্তকাযত্তা সমাধানাভাৰতো. অৰসেসট্ঠানেতি যাগুযা অগ্গহিতট্ঠানে. পোঙ্খানুপোঙ্খন্তি কম্মট্ঠানুপট্ঠানস্স অৰিচ্ছেদদস্সনমেতং, যথা পোঙ্খানুপোঙ্খং পৰত্তায সরপটিপাতিযা অনৰিচ্ছেদো, এৰমেতস্সপীতি.

নিক্খিত্তধুরো ভাৰনানুযোগে. ৰত্তপটিপত্তিযা অপূরণেন সব্বৰত্তানি ভিন্দিত্ৰা. ‘‘কামেসু অৰীতরাগো হোতি, কাযে অৰীতরাগো, রূপে অৰীতরাগো, যাৰদত্থং উদরাৰদেহকং ভুঞ্জিত্ৰা সেয্যসুখং পস্সসুখং মিদ্ধসুখং অনুযুত্তো ৰিহরতি, অঞ্ঞতরং দেৰনিকাযং পণিধায ব্রহ্মচরিযং চরতী’’তি (দী. নি. ৩.৩২০; ম. নি. ১.১৮৬) এৰং ৰুত্তপঞ্চৰিধচেতোখিলৰিনিবন্ধচিত্তো. চরিত্ৰাতি পৰত্তিত্ৰা.

গতপচ্চাগতিকৰত্তৰসেনাতি ভাৰনাসহিতংযেৰ ভিক্খায গতপচ্চাগতং গমনপচ্চাগমনং এতস্স অত্থীতি গতপচ্চাগতিকং, তদেৰ ৰত্তং, তস্স ৰসেন. অত্তকামাতি অত্তনো হিতসুখং ইচ্ছন্তা, ধম্মচ্ছন্দৰন্তোতি অত্থো. ধম্মো হি হিতং তন্নিমিত্তকঞ্চ সুখন্তি. অথ ৰা ৰিঞ্ঞূনং নিব্বিসেসত্তা, অত্তভাৰপরিযাপন্নত্তা চ অত্তা নাম ধম্মো, তং কামেন্তি ইচ্ছন্তীতি অত্তকামা.

উসভং নাম ৰীসতি যট্ঠিযো. তায সঞ্ঞাযাতি তায পাসাণসঞ্ঞায, এত্তকং ঠানং আগতাতি জানন্তাতি অধিপ্পাযো. সোযেৰ নযোতি ‘‘অযং ভিক্খূ’’তিআদিকো যো ঠানে ৰুত্তো, সো এৰ নিসজ্জাযপি নযো. পচ্ছতো আগচ্ছন্তানং ছিন্নভত্তভাৰভযেনপি যোনিসোমনসিকারং পরিব্রূহেতি. মদ্দন্তাতি ধঞ্ঞকরণট্ঠানে সালিসীসানি মদ্দন্তা.

মহাপধানং পূজেস্সামীতি অম্হাকং অত্থায লোকনাথেন ছৰস্সানি কতং দুক্করচরিযমেৰাহং যথাসত্তি পূজেস্সামীতি. পটিপত্তিপূজা হি সত্থুপূজা, ন আমিসপূজাতি. ‘‘ঠানচঙ্কমমেৰা’’তি অধিট্ঠাতব্বইরিযাপথৰসেন ৰুত্তং, ন ভোজনাদিকালেসু অৰস্সং কত্তব্বনিসজ্জায পটিক্খেপৰসেন.

ৰীথিং ওতরিত্ৰা ইতো চিতো চ অনোলোকেত্ৰা পঠমমেৰ ৰীথিযো সল্লক্খেতব্বাতি আহ ‘‘ৰীথিযো সল্লক্খেত্ৰা’’তি. যং সন্ধায ৰুচ্চতি ‘‘পাসাদিকেন অভিক্কন্তেনা’’তি, তং দস্সেতুং ‘‘তত্থ চা’’তিআদি ৰুত্তং. ‘‘আহারে পটিক্কূলসঞ্ঞং উপট্ঠপেত্ৰা’’তিআদীসু যং ৰত্তব্বং, তং পরতো আগমিস্সতি. অট্ঠঙ্গসমন্নাগতন্তি ‘‘যাৰদেৰ ইমস্স কাযস্স ঠিতিযা’’তিআদিনা (ম. নি. ১.২৩; অ. নি. ৬.৫৮; মহানি. ২০৬) ৰুত্তেহি অট্ঠহি অঙ্গেহি সমন্নাগতং কত্ৰা. ‘‘নেৰ দৰাযা’’তিআদি পটিক্খেপদস্সনং.

পচ্চেকবোধিং সচ্ছিকরোতি, যদি উপনিস্সযসম্পন্নো হোতীতি সম্বন্ধো. এৰং সব্বত্থ ইতো পরেসুপি. তত্থ পচ্চেকবোধিযা উপনিস্সযসম্পদা কপ্পানং দ্ৰে অসঙ্খ্যেয্যানি, সতসহস্সঞ্চ তজ্জাপুঞ্ঞঞাণসম্ভরণং. সাৰকবোধিযা অগ্গসাৰকানং অসঙ্খ্যেয্যং, কপ্পসতসহস্সঞ্চ, মহাসাৰকানং (থেরগা. অট্ঠ. ২.১২৮৮) সতসহস্সমেৰ তজ্জাপুঞ্ঞঞাণসম্ভরণং. ইতরেসং অতীতাসু জাতীসু ৰিৰট্টসন্নিস্সযৰসেন নিব্বত্তিতং নিব্বেধভাগিযং কুসলং. বাহিযো দারুচীরিযোতি বাহিযৰিসযে সঞ্জাতসংৰড্ঢতায বাহিযো, দারুচীরপরিহরণেন দারুচীরিযোতি চ সমঞ্ঞাতো. সো হি আযস্মা ‘‘তস্মাতিহ তে, বাহিয, এৰং সিক্খিতব্বং ‘দিট্ঠে দিট্ঠমত্তং ভৰিস্সতি, সুতে, মুতে, ৰিঞ্ঞাতে ৰিঞ্ঞাতমত্তং ভৰিস্সতী’তি, এৰঞ্হি তে বাহিয সিক্খিতব্বং. যতো খো তে বাহিয দিট্ঠে দিট্ঠমত্তং ভৰিস্সতি, সুতে, মুতে, ৰিঞ্ঞাতে ৰিঞ্ঞাতমত্তং ভৰিস্সতি, ততো ত্ৰং, বাহিয, ন তেন. যতো ত্ৰং, বাহিয, ন তেন, ততো ত্ৰং, বাহিয, ন তত্থ. যতো ত্ৰং, বাহিয, ন তত্থ, ততো ত্ৰং, বাহিয, নেৰিধ ন হুরং ন উভযমন্তরেন. এসেৰন্তো দুক্খস্সা’’তি (উদা. ১০) এত্তকায দেসনায অরহত্তং সচ্ছাকাসি. এৰং সারিপুত্তত্থেরাদীনং মহাপঞ্ঞতাদিদীপনানি সুত্তপদানি ৰিত্থারতো ৰেদিতব্বানি.

তন্তি অসম্মুয্হনং এৰন্তি ইদানি ৰুচ্চমানমাকারেনেৰ ৰেদিতব্বং. ‘‘অত্তা অভিক্কমতী’’তি ইমিনা অন্ধপুথুজ্জনস্স দিট্ঠিগাহৰসেন অভিক্কমে সম্মুয্হনং দস্সেতি, ‘‘অহং অভিক্কমামী’’তি পন ইমিনা মানগাহৰসেন. তদুভযং পন তণ্হায ৰিনা ন হোতীতি তণ্হগাহৰসেনপি সম্মুয্হনং দস্সিতমেৰ হোতি. ‘‘তথা অসম্মুয্হন্তো’’তি ৰত্ৰা তং অসম্মুয্হনং যেন ঘনৰিনিব্ভোগেন হোতি, তং দস্সেন্তো ‘‘অভিক্কমামী’’তিআদিমাহ. তত্থ যস্মা ৰাযোধাতুযা অনুগতা তেজোধাতু উদ্ধরণস্স পচ্চযো. উদ্ধরণগতিকা হি তেজোধাতূতি. উদ্ধরণে ৰাযোধাতুযা তস্সা অনুগতভাৰো, তস্মা ইমাসং দ্ৰিন্নমেত্থ সামত্থিযতো অধিমত্ততা, ইতরাসঞ্চ ওমত্ততাতি দস্সেন্তো ‘‘একেকপাদুদ্ধরণে…পে… বলৰতিযোতি আহ. যস্মা পন তেজোধাতুযা অনুগতা ৰাযোধাতু অতিহরণৰীতিহরণানং পচ্চযো. তিরিযগতিকায হি ৰাযোধাতুযা অতিহরণৰীতিহরণেসু সাতিসযো ব্যাপারোতি. তেজোধাতুযা তস্সা অনুগতভাৰো, তস্মা ইমাসং দ্ৰিন্নমেত্থ সামত্থিযতো অধিমত্ততা, ইতরাসঞ্চ ওমত্ততাতি দস্সেন্তো ‘‘তথা অতিহরণৰীতিহরণেসূ’’তি আহ. সতিপি অনুগমকঅনুগন্তব্বতাৰিসেসে তেজোধাতুৰাযোধাতুভাৰমত্তং সন্ধায তথা-সদ্দগ্গহণং,. তত্থ অক্কন্তট্ঠানতো পাদস্স উক্খিপনং উদ্ধরণং. ঠিতট্ঠানং অতিক্কমিত্ৰা পুরতো হরণং অতিহরণং, খাণুআদিপরিহরণত্থং, পতিট্ঠিতপাদঘট্টনপরিহরণত্থং ৰা পস্সেন হরণং ৰীতিহরণং. যাৰ পতিট্ঠিতপাদো, তাৰ আহরণং অতিহরণং, ততো পরং হরণং ৰীতিহরণন্তি অযং ৰা এতেসং ৰিসেসো.

যস্মা পথৰীধাতুযা অনুগতা আপোধাতু ৰোস্সজ্জনস্স পচ্চযো. গরুতরসভাৰা হি আপোধাতূতি. ৰোস্সজ্জনে পথৰীধাতুযা তস্সা অনুগতভাৰো, তস্মা তাসং দ্ৰিন্নমেত্থ সামত্থিযতো অধিমত্ততা, ইতরাসঞ্চ ওমত্ততাতি দস্সেন্তো আহ ‘‘ৰোস্সজ্জনে…পে… বলৰতিযো’’তি. যস্মা পন আপোধাতুযা অনুগতা পথৰীধাতু সন্নিক্খেপনস্স পচ্চযো, পতিট্ঠাভাৰে ৰিয পতিট্ঠাপনেপি তস্সা সাতিসযকিচ্চত্তা আপোধাতুযা তস্সা অনুগতভাৰো, তথা ঘট্টনকিরিযায পথৰীধাতুযা ৰসেন সন্নিরুজ্ঝনস্স সিজ্ঝনতো তত্থাপি পথৰীধাতুযা আপোধাতুঅনুগতভাৰো, তস্মা ৰুত্তং ‘‘তথা সন্নিক্খেপনসন্নিরুজ্ঝনেসূ’’তি.

তত্থাতি তস্মিং অভিক্কমনে, তেসু ৰা ৰুত্তেসু উদ্দরণাদীসু কোট্ঠাসেসু. উদ্ধরণেতি উদ্ধরণক্খণে. রূপারূপধম্মাতি উদ্ধরণাকারেন পৰত্তা রূপধম্মা, তংসমুট্ঠাপকা অরূপধম্মা চ. অতিহরণং ন পাপুণন্তি খণমত্তাৰট্ঠানতো. তত্থ তত্থেৰাতি যত্থ যত্থ উপ্পন্না, তত্থ তত্থেৰ. ন হি ধম্মানং দেসন্তরসঙ্কমনং অত্থি. ‘‘পব্বং পব্ব’’তিআদি উদ্ধরণাদিকোট্ঠাসে সন্ধায সভাগসন্ততিৰসেন ৰুত্তন্তি ৰেদিতব্বং. অতিইত্তরো হি রূপধম্মানম্পি পৰত্তিক্খণো, গমনস্সাদীনং, দেৰপুত্তানং হেট্ঠুপরিযেন পটিমুখং ধাৰন্তানং সিরসি পাদে চ বন্ধখুরধারা সমাগমতোপি সীঘতরো. যথা তিলানং ভজ্জিযমানানং পটপটাযনেন ভেদো লক্খীযতি, এৰং সঙ্খতধম্মানং উপ্পাদেনাতি দস্সনত্থং ‘‘পটপটাযন্তা’’তি ৰুত্তং. উপ্পন্না হি একন্ততো ভিজ্জন্তীতি. ‘‘সদ্ধিং রূপেনা’’তি ইদং তস্স তস্স চিত্তস্স নিরোধেন সদ্ধিং নিরুজ্ঝনকরূপধম্মানং ৰসেন ৰুত্তং, যং ততো সত্তরসমচিত্তস্স উপ্পাদক্খণে উপ্পন্নং. অঞ্ঞথা যদি রূপারূপধম্মা সমানক্খণা সিযুং, ‘‘রূপং গরুপরিণামং দন্ধনিরোধ’’ন্তিআদিৰচনেহি ৰিরোধো সিযা, তথা ‘‘নাহং ভিক্খৰে অঞ্ঞং একধম্মম্পি সমনুপস্সামি, যং এৰং লহুপরিৰত্তং, যথযিদং চিত্ত’’ন্তি (অ. নি. ১.৪৮) এৰং আদিপাল়িযা. চিত্তচেতসিকা হি সারম্মণসভাৰা যথাবলং অত্তনো আরম্মণপচ্চযভূতমত্থং ৰিভাৰেন্তো এৰ উপ্পজ্জন্তীতি তেসং তংসভাৰনিপ্ফত্তিঅনন্তরং নিরোধো. রূপধম্মা পন অনারম্মণা পকাসেতব্বা, এৰং তেসং পকাসেতব্বভাৰনিপ্ফত্তি সোল়সহি চিত্তেহি হোতীতি তঙ্খণাযুকতা তেসং ইচ্ছিতা, লহুৰিঞ্ঞাণৰিসযসঙ্গতিমত্তপ্পচ্চযতায তিণ্ণং খন্ধানং, ৰিসযসঙ্গতিমত্ততায চ ৰিঞ্ঞাণস্স লহুপরিৰত্তিতা, দন্ধমহাভূতপ্পচ্চযতায রূপধম্মানং দন্ধপরিৰত্তিতা. নানাধাতুযা যথাভূতঞাণং খো পন তথাগতস্সেৰ, তেন চ পুরেজাতপচ্চযো রূপধম্মোৰ ৰুত্তো, পচ্ছাজাতপচ্চযো চ তথেৰাতি রূপারূপধম্মানং সমানক্খণতা ন যুজ্জতেৰ. তস্মা ৰুত্তনযেনেৰেত্থ অত্থো ৰেদিতব্বো.

অঞ্ঞং উপ্পজ্জতে চিত্তং, অঞ্ঞং চিত্তং নিরুজ্ঝতীতি যং পুরিমুপ্পন্নং চিত্তং, তং অঞ্ঞং, তং পন নিরুজ্ঝন্তং অপরস্স অনন্তরাদিপচ্চযভাৰেনেৰ নিরুজ্ঝতীতি তথালদ্ধপচ্চযং অঞ্ঞং উপ্পজ্জতে চিত্তং. যদি এৰং তেসং অন্তরো লব্ভেয্যাতি? নোতি আহ ‘‘অৰীচি মনুপ্পবন্ধো’’তি, যথা ৰীচি অন্তরো ন লব্ভতি, ‘‘তদেৰেত’’ন্তি অৰিসেসৰিদূ মঞ্ঞন্তি, এৰং অনু অনু পবন্ধো চিত্তসন্তানো রূপসন্তানো চ নদীসোতোৰ নদিযং উদকপ্পৰাহো ৰিয ৰত্ততি.

অভিমুখং লোকিতং আলোকিতন্তি আহ ‘‘পুরতো পেক্খন’’ন্তি. যস্মা যংদিসাভিমুখো গচ্ছতি, তিট্ঠতি, নিসীদতি ৰা তদভিমুখং পেক্খনং আলোকিতং, তস্মা তদনুগতৰিদিসালোকনং ৰিলোকিতন্তি আহ ‘‘ৰিলোকিতং নাম অনুদিসাপেক্খন’’ন্তি. সম্মজ্জনপরিভণ্ডাদিকরণে ওলোকিতস্স, উল্লোকহরণাদীসু উল্লোকিতস্স, পচ্ছতো আগচ্ছন্তপরিস্সযস্স পরিৰজ্জনাদীসু অপলোকিতস্স সিযা সম্ভৰোতি আহ ‘‘ইমিনা ৰা মুখেন সব্বানিপি তানি গহিতানেৰা’’তি.

কাযসক্খিন্তি কাযেন সচ্ছিকতৰন্তং, পচ্চক্খকারিনন্তি অত্থো. সো হি আযস্মা ৰিপস্সনাকালে ‘‘যমেৰাহং ইন্দ্রিযেসু অগুত্তদ্ৰারতং নিস্সায সাসনে অনভিরতিআদিৰিপ্পকারং পত্তো, তমেৰ সুট্ঠু নিগ্গহেস্সামী’’তি উস্সাহজাতো বলৰহিরোত্তপ্পো, তত্থ চ কতাধিকারত্তা ইন্দ্রিযসংৰরে উক্কংসপারমিপ্পত্তো, তেনেৰ নং সত্থা ‘‘এতদগ্গং ভিক্খৰে মম সাৰকানং ভিক্খূনং ইন্দ্রিযেসু গুত্তদ্ৰারানং, যদিদং নন্দো’’তি (অ. নি. ১.২৩৫) এতদগ্গে ঠপেসি.

সাত্থকতা চ সপ্পাযতা চ ৰেদিতব্বা আলোকিতৰিলোকিতস্সাতি আনেত্ৰা সম্বন্ধো. তস্মাতি কম্মট্ঠানাৰিজহনস্সেৰ গোচরসম্পজঞ্ঞভাৰতোতি ৰুত্তমেৰত্থং হেতুভাৰেন পচ্চামসতি. অত্তনো কম্মট্ঠানৰসেনেৰ আলোকনৰিলোকনং কাতব্বং, খন্ধাদিকম্মট্ঠানা অঞ্ঞো উপাযো ন গৰেসিতব্বোতি অধিপ্পাযো. আলোকিতাদিসমঞ্ঞাপি যস্মা ধম্মমত্তস্সেৰ পৰত্তিৰিসেসো, তস্মা তস্স যাথাৰতো পজাননং অসম্মোহসম্পজঞ্ঞন্তি দস্সেতুং ‘‘অব্ভন্তরে’’তিআদি ৰুত্তং. চিত্তকিরিযৰাযোধাতুৰিপ্ফারৰসেনাতি কিরিযমযচিত্তসমুট্ঠানায ৰাযোধাতুযা চলনাকারপ্পৰত্তিৰসেন. অধো সীদতীতি অধো গচ্ছতি. উদ্ধং লঙ্ঘেতীতি লঙ্ঘং ৰিয উপরি গচ্ছতি.

অঙ্গকিচ্চং সাধযমানন্তি পধানভূতঅঙ্গকিচ্চং নিপ্ফাদেন্তং হুত্ৰাতি অত্থো. ‘‘পঠমজৰনেপি…পে… ন হোতী’’তি ইদং পঞ্চদ্ৰারৰীথিযং ‘‘ইত্থী পুরিসো’’তি রজ্জনাদীনং অভাৰং সন্ধায ৰুত্তং. তত্থ হি আৰজ্জন ৰোট্ঠব্বপনানং অযোনিসো আৰজ্জনৰোট্ঠব্বনৰসেন ইট্ঠে ইত্থিরূপাদিম্হি লোভমত্তং, অনিট্ঠে চ পটিঘমত্তং উপ্পজ্জতি, মনোদ্ৰারে পন ‘‘ইত্থী পুরিসো’’তি রজ্জনাদি হোতি. তস্স পঞ্চদ্ৰারজৰনং মূলং, যথাৰুত্তং ৰা সব্বং ভৰঙ্গাদি. এৰং মনোদ্ৰারজৰনস্স মূলৰসেন মূলপরিঞ্ঞা ৰুত্তা. আগন্তুকতাৰকালিকতা পন পঞ্চদ্ৰারজৰনস্সেৰ অপুব্বভাৰৰসেন, ইত্তরভাৰৰসেন চ ৰুত্তা. ‘‘হেট্ঠুপরিযৰসেন ভিজ্জিত্ৰা পতিতেসূ’’তি হেট্ঠিমস্স উপরিমস্স চ অপরাপরং ভঙ্গপ্পত্তিমাহ.

তন্তি জৰনং, তস্স অযুত্তন্তি সম্বন্ধো. আগন্তুকো অব্ভাগতো.

উদযব্বযপরিচ্ছিন্নো তাৰতকো কালো এতেসন্তি তাৰকালিকানি.

এতং অসম্মোহসম্পজঞ্ঞং. সমৰাযেতি সামগ্গিযং. তত্থাতি পঞ্চক্খন্ধৰসেন আলোকনৰিলোকনে পঞ্ঞাযমানে তব্বিনিমুত্তো কো একো আলোকেতি, কো ৰিলোকেতি.

‘‘উপনিস্সযপচ্চযো’’তি ইদং সুত্তন্তনযেন পরিযাযতো ৰুত্তং. সহজাতপচ্চযোতি নিদস্সনমত্তমেতং অঞ্ঞমঞ্ঞসম্পযুত্তঅত্থিঅৰিগতাদিপচ্চযানম্পি লব্ভনতো.

কালে সমঞ্ছিতুং যুত্তকালে সমঞ্ছন্তস্স. তথা পসারেন্তস্সাতি এত্থাপি. মণিসপ্পো নাম একা সপ্পজাতীতি ৰদন্তি. লল়নন্তি কম্পনং, লীল়াকরণং ৰা.

উণ্হপকতিকো পরিল়াহবহুলকাযো. সীলৰিদূসনেন অহিতাৰহত্তা মিচ্ছাজীৰৰসেন উপ্পন্নং অসপ্পাযং. ‘‘চীৰরম্পি অচেতন’’ন্তিআদিনা চীৰরস্স ৰিয কাযোপি অচেতনোতি কাযস্স অত্তসুঞ্ঞতাৰিভাৰনেন ‘‘অব্ভন্তরে’’তিআদিনা ৰুত্তমেৰত্থং পরিদীপেন্তো ইতরীতরসন্তোসস্স কারণং দস্সেতি, তেনাহ ‘‘তস্মা’’তিআদি.

চতুপঞ্চগণ্ঠিকাহতোতি আহতচতুপঞ্চগণ্ঠিকো, চতুপঞ্চগণ্ঠিকাহি ৰা আহতো তথা.

অট্ঠৰিধোপি অত্থোতি অট্ঠৰিধোপি পযোজনৰিসেসো মহাসিৰত্থেরৰাদৰসেন ‘‘ইমস্স কাযস্স ঠিতিযা’’তিআদিনা (ম. নি. ১.২৩, ৪২২; ম. নি. ২.৩৮৭; অ. নি. ২.৩৪১; ৮.৯; ধ. স. ১৩৫৫; ৰিভ. ৫১৮; মহানি. ২০৬) নযেন ৰুত্তো দট্ঠব্বো. ইমস্মিং পক্খে ‘‘নেৰ দৰাযাতিআদিনা (ম. নি. ১.২৩, ৪২২; ম. নি. ২.৩৮৭; অ. নি. ৮.৯; ধ. স. ১৩৫৫; ৰিভ. ৫১৮; মহানি. ২০৬) নযেনা’’তি পন পটিক্খেপঙ্গদস্সনমুখেন দেসনায আগতত্তা ৰুত্তন্তি দট্ঠব্বং.

পথৰিসন্ধারকজলস্স তংসন্ধারকৰাযুনা ৰিয পরিভুত্তস্স আহারস্স ৰাযোধাতুযাৰ আসযে অৰট্ঠানন্তি আহ ‘‘ৰাযোধাতুৰসেনেৰ তিট্ঠতী’’তি. অতিহরতীতি যাৰ মুখা অভিহরতি. ৰীতিহরতীতি ততো কুচ্ছিযং ৰীমিস্সং করোন্তো হরতি. অতিহরতীতি ৰা মুখদ্ৰারং অতিক্কামেন্তো হরতি. ৰীতিহরতীতি কুচ্ছিগতং পস্সতো হরতি, পরিৰত্তেতীতি অপরাপরং চারেতি. এত্থ চ আহারস্স ধারণপরিৰত্তনসঞ্চুণ্ণনৰিসোসনানি পথৰীধাতুসহিতা এৰ ৰাযোধাতু করোতি, ন কেৰলাতি তানি পথৰীধাতুযাপি কিচ্চভাৰেন ৰুত্তানি. অল্লত্তঞ্চ অনুপালেতীতি যথা ৰাযোধাতু আদীহি অঞ্ঞেহি ৰিসোসনং ন হোতি, তথা অল্লত্তঞ্চ অনুপালেতি. তেজোধাতূতি গহণীসঙ্খাতা তেজোধাতু. সা হি অন্তোপৰিট্ঠং আহারং পরিপাচেতি. অঞ্জসো হোতীতি আহারস্স পৰেসনাদীনং মগ্গো হোতি. আভুজতীতি পরিযেসনৰসেন, অজ্ঝোহরণজিণ্ণাজিণ্ণতাদিপটিসংৰেদনৰসেন চ আৰজ্জেতি, ৰিজানাতীতি অত্থো. তংতংৰিজাননস্স পচ্চযভূতোযেৰ হি পযোগো ‘‘সম্মাপযোগো’’তি ৰুত্তো. যেন হি পযোগেন পরিযেসনাদি নিপ্ফজ্জতি, সো তব্বিসযৰিজাননম্পি নিপ্ফাদেতি নাম তদৰিনাভাৰতো. অথ ৰা সম্মাপযোগং সম্মাপটিপত্তি মন্ৰায আগম্ম আভুজতি সমন্নাহরতি. আভোগপুব্বকো হি সব্বোপি ৰিঞ্ঞাণব্যাপারোতি তথা ৰুত্তং.

গমনতোতি ভিক্খাচারৰসেন গোচরগামং উদ্দিস্স গমনতো. পরিযেসনতোতি গোচরগামে ভিক্খত্থং আহিণ্ডনতো. পরিভোগতোতি আহারস্স পরিভুঞ্জনতো. আসযতোতি পিত্তাদিআসযতো. আসযতি এত্থ একজ্ঝং পৰত্তমানোপি কম্মফলৰৰত্থিতো হুত্ৰা মরিযাদৰসেন অঞ্ঞমঞ্ঞং অসঙ্করতো সযতি তিট্ঠতি পৰত্ততীতি আসযো, আমাসযস্স উপরি তিট্ঠনকো পিত্তাদিকো. মরিযাদত্থো হি অযমাকারো. নিধানন্তি যথাভুত্তো আহারো নিচিতো হুত্ৰা তিট্ঠতি এত্থাতি নিধানং, আমাসযো. ততো নিধানতো. অপরিপক্কতোতি গহণীসঙ্খাতেন কম্মজতেজেন অৰিপক্কতো. পরিপক্কতোতি যথাভুত্তস্স আহারস ৰিপক্কভাৰতো. ফলতোতি নিপ্ফত্তিতো. নিস্সন্দতোতি ইতো চিতো চ নিস্সন্দনতো. সম্মক্খনতোতি সব্বসো মক্খনতো. অযমেত্থ সঙ্খেপো, ৰিত্থারো পন ৰিসুদ্ধিমগ্গসংৰণ্ণনায (ৰিসুদ্ধি. টী. ১.২৯৪) গহেতব্বো.

সরীরতো সেদা মুচ্চন্তীতি ৰেগসংধারণেন উপ্পন্নপরিল়াহতো সরীরতো সেদা মুচ্চন্তি. অঞ্ঞে চ রোগা কণ্ণসূলভগন্দরাদযো. অট্ঠানেতি মনুস্সামনুস্সপরিগ্গহিতে অযুত্তট্ঠানে খেত্তদেৰাযতনাদিকে. কুদ্ধা হি অমনুস্সা, মনুস্সাপি ৰা জীৰিতক্খযং পাপেন্তি. নিস্সট্ঠত্তা নেৰ অত্তনো, কস্সচি অনিস্সজ্জিতত্তা, জিগুচ্ছনীযত্তা চ ন পরস্স. উদকতুম্বতোতি ৰেল়ুনাল়িআদিউদকভাজনতো. তন্তি ছড্ডিতউদকং.