৩. অম্বট্ঠসুত্তৰণ্ণনা

অদ্ধানগমনৰণ্ণনা

২৫৪. অপুব্বপদৰণ্ণনাতি অত্থসংৰণ্ণনাৰসেন হেট্ঠা অগ্গহিততায অপুব্বস্স পদস্স ৰণ্ণনা অত্থৰিভজনা. ‘‘হিত্ৰা পুনপ্পুনাগতমত্থ’’ন্তি (দী. নি. অট্ঠ. ১.গন্থারম্ভকথা) হি ৰুত্তং. জনপদিনোতি জনপদৰন্তো, জনপদস্স ৰা ইস্সরা রাজকুমারা গোত্তৰসেন কোসলা নাম. যদি একো জনপদো, কথং বহুৰচনন্তি আহ ‘‘রূল়্হিসদ্দেনা’’তি. অক্খরচিন্তকা হি ঈদিসেসু ঠানেসু যুত্তে ৰিয ঈদিসলিঙ্গৰচনানি ইচ্ছন্তি, অযমেত্থ রূল়্হি যথা অঞ্ঞত্থপি ‘‘কুরূসু ৰিহরতি, অঙ্গেসু ৰিহরতী’’তি চ. তব্বিসেসনেপি জনপদ-সদ্দে জাতি-সদ্দে একৰচনমেৰ. পোরাণা পনাতি পন-সদ্দো ৰিসেসত্থজোতনো, তেন পুথুঅত্থৰিসযতায এৰঞ্চেতং পুথুৰচনন্তি ৰক্খমানৰিসেসং জোতেতি. বহুপ্পভেদো হি সো পদেসো তিযোজনসতপরিমাণতায. নঙ্গলানিপি ছড্ডেত্ৰাতি কম্মপ্পহানৰসেন নঙ্গলানিপি পহায, নিদস্সনমত্তঞ্চেতং. ন কেৰলং কস্সকা এৰ, অথ খো অঞ্ঞেপি মনুস্সা অত্তনো অত্তনো কিচ্চং পহায তত্থ সন্নিপতিংসু. ‘‘সো পদেসো’’তি পদেসসামঞ্ঞতো ৰুত্তং, ৰচনৰিপল্লাসেন ৰা, তে পদেসাতি অত্থো. কোসলাতি ৰুচ্চতি কুসলা এৰ কোসলাতি কত্ৰা.

চারিকন্তি চরণং, চরণং ৰা চারো, সো এৰ চারিকা. তযিদং মগ্গগমনং ইধাধিপ্পেতং, ন চুণ্ণিকগমনমত্তন্তি আহ ‘‘অদ্ধানগমনং গচ্ছন্তো’’তি. তং ৰিভাগেন দস্সেতুং ‘‘চারিকা চ নামেসা’’তিআদি ৰুত্তং. তত্থ দূরেপীতি নাতিদূরেপি. সহসা গমনন্তি সীঘগমনং. মহাকস্সপপচ্চুগ্গমনাদিং একদেসেন ৰত্ৰা ৰনৰাসীতিস্সসামণেরস্স ৰত্থুং ৰিত্থারেত্ৰা জনপদচারিকং কথেতুং ‘‘ভগৰা হী’’তিআদি আরদ্ধং. আকাসগামীহি এৰ সদ্ধিং গন্তুকামো ‘‘ছল়ভিঞ্ঞানং আরোচেহী’’তি আহ.

সঙ্ঘকম্মৰসেন সিজ্ঝমানাপি উপসম্পদা সত্থু আণাৰসেনেৰ সিজ্ঝনতো ‘‘বুদ্ধদাযজ্জং তে দস্সামী’’তি ৰুত্তন্তি ৰদন্তি. অপরে পন অপরিপুণ্ণৰীসতিৰস্সস্সেৰ তস্স উপসম্পদং অনুজানন্তো ‘‘দস্সামী’’তি অৰোচাতি ৰদন্তি. উপসম্পাদেত্ৰাতি ধম্মসেনাপতিনা উপজ্ঝাযেন উপসম্পাদেত্ৰা.

নৰযোজনসতিকম্পি ঠানং মজ্ঝিমদেসপরিযাপন্নমেৰ, ততো পরং নাধিপ্পেতং তুরিতচারিকাৰসেন অগমনতো. সমন্তাতি গতগতট্ঠানস্স চতূসু পস্সেসু সমন্ততো. অঞ্ঞেনপি কারণেনাতি ভিক্খূনং সমথৰিপস্সনাতরুণভাৰতো অঞ্ঞেনপি মজ্ঝিমমণ্ডলে ৰেনেয্যানং ঞাণপরিপাকাদিকারণেন মজ্ঝিমমণ্ডলং ওসরতি.‘‘সত্তহি ৰা’’তিআদি ‘‘একমাসং ৰা’’তিআদিনা ৰুত্তানুক্কমেন যোজেতব্বং.

সরীরফাসুকত্থাযাতি একস্মিংযেৰ ঠানে নিবদ্ধৰাসৰসেন উস্সন্নধাতুকস্স সরীরস্স ৰিচরণেন ফাসুকত্থায. অট্ঠুপ্পত্তিকালাভিকঙ্খনত্থাযাতি অগ্গিক্খন্ধোপমসুত্ত (অ. নি. ৭.৭২) মঘদেৰজাতকাদি (জা. ১.১.৯) দেসনানং ৰিয ধম্মদেসনায অট্ঠুপ্পত্তিকালং আকঙ্খমানেন. সুরাপানসিক্খাপদপঞ্ঞাপনে (পাচি. ৩২৮) ৰিয সিক্খাপদপঞ্ঞাপনত্থায. বোধনেয্যসত্তে অঙ্গুলিমালাদিকে (ম. নি. ২.৩৪৭) বোধনত্থায. কঞ্চি, কতিপযে ৰা পুগ্গলে উদ্দিস্স চারিকা নিবদ্ধচারিকা. তদঞ্ঞা অনিবদ্ধচারিকা.

দসসহস্সি লোকধাতুযাতি জাতিখেত্তভূতে দসসহস্সচক্কৰাল়ে. তত্থ হি সত্তে পরিপক্কিন্দ্রিযে পস্সিতুং বুদ্ধঞাণং অভিনীহরিত্ৰা ঠিতো ভগৰা ঞাণজালং পত্থরতীতি ৰুচ্চতি. সব্বঞ্ঞুতঞ্ঞাণজালস্স অন্তো পৰিট্ঠোতি তস্স ঞাণস্স গোচরভাৰং উপগতো. ভগৰা কির মহাকরুণাসমাপত্তিং সমাপজ্জিত্ৰা ততো ৰুট্ঠায ‘‘যে সত্তা ভব্বা পরিপাকঞাণা অজ্জ মযা ৰিনেতব্বা, তে ময্হং ঞাণস্স উপট্ঠহন্তূ’’তি চিত্তং অধিট্ঠায সমন্নাহরতি. তস্স সহ সমন্নাহারা একো ৰা দ্ৰে ৰা বহূ ৰা তদা ৰিনযূপগা ৰেনেয্যা ঞাণস্স আপাথমাগচ্ছন্তি অযমেত্থ বুদ্ধানুভাৰো. এৰম্পি আপাথমাগতানং পন নেসং উপনিস্সযং পুব্বচরিযং পুব্বহেতুং সম্পতি ৰত্তমানঞ্চ পটিপত্তিং ওলোকেতি, তেনাহ ‘‘অথ ভগৰা’’তিআদি. ৰাদপটিৰাদং কত্ৰাতি ‘‘এৰং নু তে অম্বট্ঠা’’তিআদিনা মযা ৰুত্তৰচনস্স ‘‘যে চ খো তে ভো গোতম মুণ্ডকা সমণকা’’তিআদিনা পটিৰচনং কত্ৰা তিক্খত্তুং ইব্ভৰাদনিপাতনৰসেন নানপ্পকারং অসম্ভিৰাক্যং সাধুসভাৰায ৰাচায ৰত্তুং অযুত্তৰচনং ৰক্খতি. নিব্বিসেৰনন্তি ৰিগততুদনং, মানদব্বৰসেন অপগতপরিপ্ফন্দনন্তি অত্থো.

অৰসরিতব্বন্তি উপগন্তব্বং. ইচ্ছানঙ্গলেতি ইদং তদা ভগৰতো গোচরগামনিদস্সনং সমীপত্থে ভুম্মন্তি কত্ৰা. ‘‘ইচ্ছানঙ্গলৰনসণ্ডে’’তি নিৰাসনট্ঠানদস্সনং অধিকরণে ভুম্মন্তি. তদুভযং ৰিৰরন্তো ‘‘ইচ্ছানঙ্গলং উপনিস্সাযা’’তিআদিমাহ. ধম্মরাজস্স ভগৰতো সব্বসো অধম্মনিগ্গণ্হনপরা পটিপত্তি, সা চ সীলসমাধিপঞ্ঞাৰসেনাতি তং দস্সেতুং ‘‘সীলখন্ধাৰার’’ন্তিআদি ৰুত্তং. যথাভিরুচিতেনাতি দিব্বৰিহারাদীসু যেন যেন অত্তনো অভিরুচিতেন ৰিহারেন.

পোক্খরসাতিৰত্থুৰণ্ণনা

২৫৫. মন্তেতি ইরুব্বেদাদিমন্তসত্থে. পোক্খরে কমলে সযমানো নিসীদীতি পোক্খরসাতী. সাতি ৰুচ্চতি সমসণ্ঠানং, পোক্খরে সণ্ঠানাৰযৰে জাতোতি ‘‘পোক্খরসাতী’’তিপি ৰুচ্চতি. সেতপোক্খরসদিসোতি সেতপদুমৰণ্ণো. সুৰট্টিতাতি ৰট্টভাৰস্স যুত্তট্ঠানে সুট্ঠু ৰট্টুলা. কাল়ৰঙ্গতিলকাদীনং অভাৰেন সুপরিসুদ্ধা.

ইমস্স ব্রাহ্মণস্স কীদিসো পুব্বযোগো, যেন নং ভগৰা অনুগ্গণ্হিতুং তং ঠানং উপগতোতি আহ ‘‘অযং পনা’’তিআদি. পদুমগব্ভে নিব্বত্তি তেনাযং সংসেদজো জাতো. ন পুপ্ফতীতি ন ৰিকসতি. রজতবিম্বকন্তি রূপিযমযং রূপকং.

অজ্ঝাৰসতীতি এত্থ অধি-সদ্দো ইস্সরিযত্থদীপনো, আসদ্দো মরিযাদত্থোতি দস্সেন্তো ‘‘অভিভৰিত্ৰা’’তিআদিমাহ. তেহি যুত্তত্তা হি উক্কট্ঠন্তি উপযোগৰচনং, তেনাহ ‘‘উপসগ্গৰসেনা’’তিআদি. যায মরিযাদাযাতি যায অৰত্থায.নগরস্স ৰত্থুন্তি ‘‘অযং খণো, সুমুহুত্তং মা অতিক্কমী’’তি রত্তিৰিভাযনং অনুরক্খন্তা রত্তিযং উক্কা ঠপেত্ৰা উক্কাসু জলমানাসু নগরস্স ৰত্থুং অগ্গহেসুং, তস্মা উক্কাসু ঠিতাতি উক্কট্ঠা, উক্কাসু ৰিজ্জোতযন্তীসু ঠিতা পতিট্ঠিতাতি মূলৰিভুজাদিপক্খেপেন সদ্দসিদ্ধি ৰেদিতব্বা, নিরুত্তিনযেন ৰা উক্কাসু ঠিতাসু ঠিতা আসীতি উক্কট্ঠা. অপরে পন ভণন্তি ‘‘ভূমিভাগসম্পত্তিযা, উপকরণসম্পত্তিযা, মনুস্সসম্পত্তিযা চ তং নগরং উক্কট্ঠগুণযোগতো উক্কট্ঠাতি নামং লভী’’তি. তস্সাতি ‘‘উক্কট্ঠ’’ন্তি উপযোগৰসেন ৰুত্তপদস্স. অনুপযোগত্তাতি ৰিসেসনভাৰেন অনুপযুত্তত্তা. সেসপদেসূতি ‘‘সত্তুস্সদ’’ন্তিআদিপদেসু. যথাৰিধি হি অনুপযোগো পুরিমস্মিং. তত্থাতি ‘‘উপসগ্গৰসেনা’’তিআদিনা ৰুত্তৰিধানে. ‘‘সদ্দসত্থতো পরিযেসিতব্ব’’ন্তি এতেন সদ্দলক্খণানুগতো ৰাযং সদ্দপ্পযোগোতি দস্সেতি. উপঅনুঅধিআইতিএৰংপুব্বকে ৰসনকিরিযাঠানে উপযোগৰচনমেৰ পাপুণাতীতি সদ্দৰিদূ ইচ্ছন্তি.

উস্সদতা নামেত্থ বহুলতাতি, তং বহুলতং দস্সেতুং ‘‘বহুজন’’ন্তিআদি ৰুত্তং. গহেত্ৰা পোসেতব্বং পোসাৰনিযং. আৰিজ্ঝিত্ৰাতি পরিক্খিপিত্ৰা.

রঞ্ঞা ৰিয ভুঞ্জিতব্বন্তি ৰা রাজভোগ্গং. রঞ্ঞো দাযভূতন্তি কুলপরম্পরায যোগ্যভাৰেন রাজতো লদ্ধদাযভূতং. তেনাহ ‘‘দাযজ্জন্তি অত্থো’’তি. রাজনীহারেন পরিভুঞ্জিতব্বতো উদ্ধং পরিভোগলাভস্স সেট্ঠদেয্যতা নাম নত্থীতি আহ ‘‘ছত্তং উস্সাপেত্ৰা রাজসঙ্খেপেন ভুঞ্জিতব্ব’’ন্তি. ‘‘সব্বং ছেজ্জভেজ্জ’’ন্তি সরীরদণ্ডধনদণ্ডাদি ভেদং সব্বং দণ্ডমাহ. নদীতিত্থপব্বতাদীসূতি নদীতিত্থপব্বতপাদগামদ্ৰারঅটৰিমুখাদীসু. ‘‘রাজদায’’ন্তি ইমিনাৰ রঞ্ঞো দিন্নভাৰে সিদ্ধে ‘‘রঞ্ঞা পসেনদিনা কোসলেন দিন্ন’’ন্তি ৰচনং কিমত্থিযন্তি আহ ‘‘দাযকরাজদীপনত্থ’’ন্তিআদি. নিস্সট্ঠপরিচ্চত্তন্তি মুত্তচাগৰসেন পরিচ্চত্তং কত্ৰা. এৰঞ্হি তং সেট্ঠদেয্যং উত্তমদেয্যং জাতং.

উপলভীতি সৰনৰসেন উপলভীতি ইমমত্থং দস্সেন্তো ‘‘সোতদ্ৰার…পে… অঞ্ঞাসী’’তি আহ. অৰধারণফলত্তা সব্বম্পি ৰাক্যং অন্তোগধাৰধারণন্তি আহ ‘‘পদপূরণমত্তে নিপাতো’’তি. ‘‘অৰধারণত্থে’’তি পন ইমিনা ইট্ঠতোৰধারণত্থং খো-সদ্দগ্গহণন্তি দস্সেতি. ‘‘অস্সোসী’’তি পদং খো-সদ্দে গহিতে তেন ফুল্লিতমণ্ডিতং ৰিয হোন্তং পূরিতং নাম হোতি, তেন চ পুরিমপচ্ছিমপদানি সিলিট্ঠানি হোন্তি, ন তস্মিং অগ্গহিতেতি আহ ‘‘পদপূরণেন ব্যঞ্জনসিলিট্ঠতামত্তমেৰা’’তি. মত্ত-সদ্দো ৰিসেসনিৰত্তিঅত্থো, তেনস্স অনত্থন্তরদীপনতা দস্সিতা হোতি, এৰ-সদ্দেন পন ব্যঞ্জনসিলিট্ঠতায একন্তিকতা.

সমিতপাপত্তাতি অচ্চন্তং অনৰসেসতো সৰাসনং সমিতপাপত্তা. এৰঞ্হি বাহিরকৰিরাগসেক্খাসেক্খপাপসমনতো ভগৰতো পাপসমনং ৰিসেসিতং হোতি, তেনাহ ৰুত্তঞ্হেতন্তিআদি. অনেকত্থত্তা নিপাতানং ইধ অনুস্সৰত্থো অধিপ্পেতোতি আহ ‘‘খলূতি অনুস্সৰত্থে নিপাতো’’তি. আলপনমত্তন্তি পিযালাপৰচনমত্তং. পিযসমুদাহারো হেতে ‘‘ভো’’তি ৰা ‘‘আৰুসো’’তি ৰা ‘‘দেৰানং পিযা’’তি ৰা. গোত্তৰসেনাতি এত্থ গং তাযতীতি গোত্তং. গোতমোতি হি পৰত্তমানং ৰচনং, বুদ্ধিঞ্চ তাযতি একংসিকৰিসযতায রক্খতীতি গোত্তং. যথা হি বুদ্ধি আরম্মণভূতেন অত্থেন ৰিনা ন ৰত্ততি, এৰং অভিধানং অভিধেয্যভূতেন, তস্মা সো গোত্তসঙ্খাতো অত্থো তানি তাযতি রক্খতীতি ৰুচ্চতি. কো পন সোতি? অঞ্ঞকুলপরম্পরাসাধারণং তস্স কুলস্স আদিপুরিসসমুদাগতং তংকুলপরিযাপন্নসাধারণং সামঞ্ঞরূপন্তি দট্ঠব্বং. এত্থ চ ‘‘সমণো’’তি ইমিনা সরিক্খকজনেহি ভগৰতো বহুমতভাৰো দস্সিতো সমিতপাপতাকিত্তনতো. ‘‘গোতমো’’তি ইমিনা লোকিযজনেহি উল়ারকুলসম্ভূততাদীপনতো.

উচ্চাকুলপরিদীপনং উদিতোদিতৰিপুলখত্তিযকুলৰিভাৰনতো. সব্বখত্তিযানঞ্হি আদিভূতমহাসম্মতমহারাজতো পট্ঠায অসম্ভিন্নং উল়ারতমং সক্যরাজকুলং. কেনচি পারিজুঞ্ঞেনাতি ঞাতিপারিজুঞ্ঞভোগপারিজুঞ্ঞাদিনা কেনচি পারিজুঞ্ঞেন পারিহানিযা. অনভিভূতো অনজ্ঝোত্থতো. তথা হি তস্স কুলস্স ন কিঞ্চি পারিজুঞ্ঞং লোকনাথস্স অভিজাতিযং, অথ খো ৰড্ঢিযেৰ. অভিনিক্খমনে চ ততোপি সমিদ্ধতমভাৰো লোকে পাকটো পঞ্ঞাতো. ইতি ‘‘সক্যকুলা পব্বজিতো’’তি ইদং ৰচনং ভগৰতো সদ্ধাপব্বজিতভাৰদীপনং ৰুত্তং মহন্তং ঞাতিপরিৰট্টং, মহন্তঞ্চ ভোগক্খন্ধং পহায পব্বজিতভাৰসিদ্ধিতো. সুন্দরন্তি ভদ্দকং. ভদ্দকতা চ পস্সন্তস্স হিতসুখাৰহভাৰেন ৰেদিতব্বাতি আহ অত্থাৰহং সুখাৰহন্তি. তত্থ অত্থাৰহন্তি দিট্ঠধম্মিকসম্পরাযিকপরমত্থসংহিতহিতাৰহং. সুখাৰহন্তি যথাৰুত্ততিৰিধসুখাৰহং. তথারূপানন্তি তাদিসানং. যাদিসেহি পন গুণেহি ভগৰা সমন্নাগতো, তেহি চতুপ্পমাণিকস্স লোকস্স সব্বথাপি অচ্চন্তায সদ্ধায পসাদনীযো তেসং যথাভূতসভাৰত্তাতি দস্সেন্তো যথারূপোতিআদিমাহ. তত্থ যথাভূতং…পে… অরহতন্তি ইমিনা ধম্মপ্পমাণানং, লূখপ্পমাণানঞ্চ সত্তানং ভগৰতো পসাদাৰহতং দস্সেতি. তং দস্সনেনেৰ চ ইতরেসম্পি অত্থতো পসাদাৰহতা দস্সিতা হোতীতি দট্ঠব্বং তদৰিনাভাৰতো. দস্সনমত্তম্পি সাধু হোতীতি এত্থ কোসিযসকুণৰত্থুং (ম. নি. অট্ঠ. ১.১৪৪; খু. পা. অট্ঠ. ১০) কথেতব্বং.

অম্বট্ঠমাণৰকথাৰণ্ণনা

২৫৬. মন্তে পরিৰত্তেতীতি ৰেদে সজ্ঝাযতি, পরিযাপুণাতীতি অত্থো. মন্তে ধারেতীতি যথাঅধীতে মন্তে অসম্মুট্ঠে কত্ৰা হদযে ঠপেতি ওট্ঠপহতকরণৰসেন, ন অত্থৰিভাৰনৰসেন.

সনিঘণ্ডুকেটুভানন্তি এত্থ ৰচনীযৰাচকভাৰেন অত্থং সদ্দঞ্চ নিখডতি ভিন্দতি ৰিভজ্জ দস্সেতীতি নিখণ্ডু, সা এৰ ইধ খ-কারস্স ঘ-কারং কত্ৰা ‘‘নিঘণ্ডূ’’তি ৰুত্তো. কিটযতি গমেতি ঞাপেতি কিরিযাদিৰিভাগং, তং ৰা অনৰসেসপরিযাদানতো গমেন্তো পূরেতীতি কেটুভং. ৰেৰচনপ্পকাসকন্তি পরিযাযসদ্দদীপকং, একেকস্স অত্থস্স অনেকপরিযাযৰচনৰিভাৰকন্তি অত্থো. নিদস্সনমত্তঞ্চেতং অনেকেসম্পি অত্থানং একসদ্দৰচনীযতাৰিভাৰনৰসেনপি তস্স গন্থস্স পৰত্তত্তা. ৰচীভেদাদিলক্খণা কিরিযা কপ্পীযতি এতেনাতি কিরিযাকপ্পো, সো পন ৰণ্ণপদসম্বন্ধপদত্থাদিৰিভাগতো বহুৰিকপ্পোতি আহ ‘‘কিরিযাকপ্পৰিকপ্পো’’তি. ইদঞ্চ মূলকিরিযাকপ্পগন্থং সন্ধায ৰুত্তং. সো হি সতসহস্সপরিমাণো নযচরিযাদিপকরণং. ঠানকরণাদিৰিভাগতো, নিব্বচনৰিভাগতো চ অক্খরা পভেদীযন্তি এতেহীতি অক্খরপ্পভেদা, সিক্খানিরুত্তিযো. এতেসন্তি ৰেদানং.

তে এৰ ৰেদে পদসো কাযতীতি পদকো. তং তং সদ্দং তদত্থঞ্চ ব্যাকরোতি ব্যাচিক্খতি এতেনাতি ব্যাকরণং, সদ্দসত্থং. আযতিং হিতং তেন লোকো ন যততি ন ঈহতীতি লোকাযতং. তঞ্হি গন্থং নিস্সায সত্তা পুঞ্ঞকিরিযায চিত্তম্পি ন উপ্পাদেন্তি.

ৰযতীতি ৰযো, আদিমজ্ঝপরিযোসানেসু কত্থচি অপরিকিলমন্তো অৰিত্থাযন্তো তে গন্থে সন্ধারেতি পূরেতীতি অত্থো. দ্ৰে পটিসেধা পকতিং গমেন্তীতি দস্সেন্তো ‘‘অৰযো ন হোতী’’তি ৰত্ৰা তত্থ অৰযং দস্সেতুং ‘‘অৰযো নাম…পে… ন সক্কোতী’’তি ৰুত্তং. ‘‘অনুঞ্ঞাতো’’তি পদস্স কম্মসাধনৰসেন, ‘‘পটিঞ্ঞাতো’’তি পন পদস্স কত্তুসাধনৰসেন অত্থো ৰেদিতব্বোতি দস্সেন্তো ‘‘আচরিযেনা’’তিআদিমাহ. আচরিযপরম্পরাভতং আচরিযকং. গরূতি ভারিযং অত্তানং ততো মোচেত্ৰা গমনং দুক্করং হোতি. অনত্থোপি উপ্পজ্জতি নিন্দাব্যারোসউপারম্ভাদি.

২৫৭. ‘‘অব্ভুগ্গতো’’তি এত্থ অভিসদ্দযোগেন ইত্থম্ভূতাখ্যানত্থৰসেনেৰ উপযোগৰচনং.

২৫৮. লক্খণানীতি লক্খণদীপনানি মন্তপদানি. অন্তরধাযন্তীতি ন কেৰলং লক্খণমন্তানিযেৰ, অথ খো অঞ্ঞানিপি ব্রাহ্মণানং ঞাণবলাভাৰেন অনুক্কমেন অন্তরধাযন্তি. তথা হি ৰদন্তি ‘‘একসতং অদ্ধরিযং সাখা সহস্সৰত্তকো সামা’’তিআদি. পণিধি …পে… মহতোতি এত্থ পণিধিমহতো সমাদানমহতোতি আদিনা পচ্চেকং মহন্ত-সদ্দো যোজেতব্বো. পণিধিমহন্ততাদি চস্স বুদ্ধৰংসচরিযাপিটকৰণ্ণনাদিৰসেন ৰেদিতব্বো. নিট্ঠাতি নিপ্ফত্তিযো. ভৰভেদেতি ভৰৰিসেসে. ইতো চ এত্তো চ ব্যাপেত্ৰা ঠিততা ৰিসটভাৰো.

জাতিসামঞ্ঞতোতি লক্খণজাতিযা লক্খণভাৰমত্তেন সমানভাৰতো. যথা হি বুদ্ধানং লক্খণানি সুৰিসদানি, সুপরিব্যত্তানি, পরিপুণ্ণানি চ হোন্তি, ন এৰং চক্কৰত্তীনং, তেনাহ ‘‘ন তেহেৰ বুদ্ধো হোতী’’তি. অভিরূপতা, দীঘাযুকতা, অপ্পাতঙ্কতা, ব্রাহ্মণাদীনং পিযমনাপতাতি ইমেহি চতূহি অচ্ছরিযসভাৰেহি. দানং, পিযৰচনং, অত্থচরিযা, সমানত্ততাতি ইমেহি চতূহি সঙ্গহৰত্থূহি. রঞ্জনতোতি পীতিজননতো. চক্কং চক্করতনং ৰত্তেতি পৰত্তেতীতি চক্কৰত্তী. সম্পত্তিচক্কেহি সযং ৰত্ততি, তেহি চ পরং সত্তনিকাযং ৰত্তেতি পৰত্তেতীতি চক্কৰত্তী. পরহিতাৰহো ইরিযাপথচক্কানং ৰত্তো ৰত্তনং এতস্স, এত্থাতি ৰা চক্কৰত্তী. অপ্পটিহতং ৰা আণাসঙ্খাতং চক্কং ৰত্তেতীতি চক্কৰত্তী. খত্তিযমণ্ডলাদিসঞ্ঞিতং চক্কং সমূহং অত্তনো ৰসে ৰত্তেতীতি চক্কৰত্তী চক্কৰত্তিৰত্তসঙ্খাতং ধম্মং চরতি, চক্কৰত্তিৰত্তসঙ্খাতো ধম্মো এতস্মিং অত্থীতি ৰা ধম্মিকো. ধম্মতো অনপেতত্তা ধম্মো রঞ্জনট্ঠেন রাজাতি ধম্মরাজা. ‘‘রাজা হোতি চক্কৰত্তী’’তি ৰুত্তত্তা ‘‘চাতুরন্তো’’তি পদং চতুদীপিস্সরতং ৰিভাৰেতীতি আহ ‘‘চতুসমুদ্দঅন্তাযা’’তিআদি. তত্থ ‘‘চতুদ্দীপৰিভূসিতাযা’’তি অৰত্ৰা ‘‘চতুব্বিধা’’তি ৰিধগ্গহণং তংতংপরিত্তদীপানম্পি সঙ্গহত্থন্তি দট্ঠব্বং. কোপাদীতি আদি-সদ্দেন কামমোহমানমদাদিকে সঙ্গণ্হাতি. ৰিজিতাৰীতি ৰিজিতৰা. কেনচি অকম্পিযট্ঠেন জনপদে থাৰরিযপ্পত্তো, দল়্হভত্তিভাৰতো ৰা, জনপদো থাৰরিযং পত্তো এত্থাতি জনপদত্থাৰরিযপ্পত্তো.

চিত্তীকতভাৰাদিনাপি (খু. পা. অট্ঠ. ৩; দী. নি. অট্ঠ. ২.৩৩; সু. নি. অট্ঠ. ১.২২৬; মহানি. অট্ঠ. ৫০) চক্কস্স রতনট্ঠো ৰেদিতব্বো. এস নযো সেসেসুপি. রতিনিমিত্ততায ৰা চিত্তীকতাদিভাৰস্স রতিজননট্ঠেন একসঙ্গহতায ৰিসুং অগ্গহণং. ইমেহি পন রতনেহি রাজা চক্কৰত্তী যং যমত্থং পচ্চনুভোতি, তং তং দস্সেতুং ‘‘ইমেসু পনা’’তিআদি ৰুত্তং. অজিতং জিনাতি মহেসক্খতাসংৰত্তনিযকম্মনিস্সন্দভাৰতো. ৰিজিতে যথাসুখং অনুৰিচরতি হত্থিরতনং অস্সরতনঞ্চ অভিরুহিত্ৰা তেসং আনুভাৰেন অন্তোপাতরাসেযেৰ সমুদ্দপরিযন্তং পথৰিং অনুসংযাযিত্ৰা রাজধানিমেৰ পচ্চাগমনতো. পরিণাযকরতনেন ৰিজিতমনুরক্খতি তেন তত্থ তত্থ কাতব্বকিচ্চস্স সংৰিধানতো. অৰসেসেহীতি মণিরতনইত্থিরতনগহপতিরতনেহি. তত্থ মণিরতনেন যোজনপ্পমাণে পদেসে অন্ধকারং ৰিধমিত্ৰা আলোকদস্সনাদিনা সুখমনুভৰতি, ইত্থিরতনেন অতিক্কন্তমানুসকরূপসম্পত্তিদস্সনাদিৰসেন, গহপতিরতনেন ইচ্ছিতিচ্ছিতমণিকনকরজতাদিধনপটিলাভৰসেন.

উস্সাহসত্তিযোগো তেন কেনচি অপ্পটিহতাণাচক্কভাৰসিদ্ধিতো পচ্ছিমেনাতি পরিণাযকরতনেন. তঞ্হি সব্বরাজকিচ্চেসু কুসলং অৰিরজ্ঝনযোগং, তেনাহ ‘‘মন্তসত্তিযোগো’’তি. হত্থিঅস্সরতনানং মহানুভাৰতায কোসসম্পত্তিযাপি পভাৰসম্পত্তিসিদ্ধিতো ‘‘হত্থি…পে… যোগো’’তি ৰুত্তং. (কোসো হি নাম সতি উস্সাহসম্পত্তিযং দুগ্গং তেজং কুসুমোরং পরক্কমং পব্বতোমুখং অমোসপহরণং) তিৰিধসত্তিযোগফলং পরিপুণ্ণং হোতীতি সম্বন্ধো. সেসেহীতি সেসেহি পঞ্চহি রতনেহি.

অদোসকুসলমূলজনিতকম্মানুভাৰেনাতি অদোসসঙ্খাতেন কুসলমূলেন সহজাতাদিপচ্চযৰসেন উপ্পাদিতকম্মস্স আনুভাৰেন সম্পজ্জন্তি সোম্মতররতনজাতিকত্তা. মজ্ঝিমানি মণিইত্থিগহপতিরতনানি. অলোভ…পে… কম্মানুভাৰেন সম্পজ্জন্তি উল়ারস্স ধনস্স, উল়ারধনপটিলাভকারণস্স চ পরিচ্চাগসম্পদাহেতুকত্তা. পচ্ছিমন্তি পরিণাযকরতনং. তঞ্হি অমোহ…পে… কম্মানুভাৰেন সম্পজ্জতি মহাপঞ্ঞেনেৰ চক্কৰত্তিরাজকিচ্চস্স পরিণেতব্বত্তা. উপদেসো নাম সৰিসেসং সত্তন্নং রতনানং ৰিচারণৰসেন পৰত্তো কথাবন্ধো.

সরণতো পটিপক্খৰিধমনতো সূরা, তেনাহ ‘‘অভীরুকজাতিকা’’তি. অসুরে ৰিজিনিত্ৰা ঠিতত্তা ৰীরো, সক্কো দেৰানং ইন্দো. তস্স অঙ্গং দেৰপুত্তো সেনঙ্গভাৰতোতি ৰুত্তং ‘‘ৰীরঙ্গরূপাতি দেৰপুত্তসদিসকাযা’’তি. ‘‘একে’’তি সারসমাসাচরিযমাহ. সভাৰোতি সভাৰভূতো অত্থো. ৰীরকারণন্তি ৰীরভাৰকারণং. ৰীরিযমযসরীরা ৰিযাতি সৰিগ্গহৰীরিযসদিসা, সৰিগ্গহং চে ৰীরিযং সিযা তংসদিসাতি অত্থো. ননু রঞ্ঞো চক্কৰত্তিস্স পটিসেনা নাম নত্থি, য’মস্স পুত্তা পমদ্দেয্যুং, অথ কস্মা পরসেনপ্পমদ্দনাতি ৰুত্তন্তি চোদনং সন্ধাযাহ সচেতিআদি, তেন পরসেনা হোতু ৰা মা ৰা তে পন এৰং মহানুভাৰাতি দস্সেতি. ধম্মেনাতি কতুপচিতেন অত্তনো পুঞ্ঞধম্মেন. তেন হি সঞ্চোদিতা পথৰিযং সব্বরাজানো পচ্চুগ্গন্ত্ৰা ‘‘স্ৰাগতং তে মহারাজা’’তি আদিং ৰত্ৰা অত্তনো রজ্জং রঞ্ঞো চক্কৰত্তিস্স নিয্যাতেন্তি, তেন ৰুত্তং ‘‘সো ইমং…পে… অজ্ঝাৰসতী’’তি. অট্ঠকথাযং পন তস্স যথাৰুত্তস্স ধম্মস্স চিরতরং ৰিপচ্চিতুং পচ্চযভূতং চক্কৰত্তিৰত্তসমুদাগতং পযোগসম্পত্তিসঙ্খাতং ধম্মং দস্সেতুং ‘‘পাণো ন হন্তব্বোতিআদিনা পঞ্চসীলধম্মেনা’’তি ৰুত্তং. এৰঞ্হি ‘‘অদণ্ডেন অসত্থেনা’’তি ইদং ৰচনং সুট্ঠুতরং সমত্থিতং হোতীতি. যস্মা রাগাদযো পাপধম্মা উপ্পজ্জমানা সত্তসন্তানং ছাদেত্ৰা পরিযোনন্ধিত্ৰা তিট্ঠন্তি কুসলপ্পৰত্তিং নিৰারেন্তি, তস্মা তে ‘‘ছদনা, ছদা’’তি চ ৰুত্তা. ৰিৰটেত্ৰাতি ৰিগমেত্ৰা. পূজারহতা ৰুত্তা ‘‘অরহতীতি অরহ’’ন্তি. তস্সা পূজারহতায. যস্মা সম্মাসম্বুদ্ধো, তস্মা অরহন্তি. বুদ্ধত্তহেতুভূতা ৰিৰট্টচ্ছদতা ৰুত্তা সৰাসনসব্বকিলেসপ্পহানপুব্বকত্তা বুদ্ধভাৰস্স.

অরহং ৰট্টাভাৰেনাতি ফলেন হেতুঅনুমানদস্সনং. সম্মাসম্বুদ্ধো ছদনাভাৰেনাতি হেতুনা ফলানুমানদস্সনং. হেতুদ্ৰযং ৰুত্তং ‘‘ৰিৰট্টো ৰিচ্ছদো চা’’তি. দুতিযেন ৰেসারজ্জেনাতি ‘‘খীণাসৰস্স তে পটিজানতো’’তিআদিনা ৰুত্তেন ৰেসারজ্জেন. পুরিমসিদ্ধীতি পুরিমস্স পদস্স অত্থসিদ্ধীতি অত্থো. পঠমেনাতি ‘‘সম্মাসম্বুদ্ধস্স তে পটিজানতো’’তিআদিনা (ম. নি. ১.১৫০; অ. নি. ৪.৮) ৰুত্তেন ৰেসারজ্জেন. দুতিযসিদ্ধীতি দুতিযস্স পদস্স অত্থসিদ্ধি, বুদ্ধত্থসিদ্ধীতি অত্থো. ততিযচতুত্থেহীতি ‘‘যে খো পন তে অন্তরাযিকা ধম্মা’’তিআদিনা, (ম. নি. ১.১৫০; অ. নি. ৪.৮) ‘‘যস্স খো পন তে অত্থাযা’’তিআদিনা (ম. নি. ১.১৫০; অ. নি. ৪.৮) চ ৰুত্তেহি ততিযচতুত্থেহি ৰেসারজ্জেহি. ততিযসিদ্ধীতি ৰিৰট্টচ্ছদনতাসিদ্ধি যাথাৰতো অন্তরাযিকনিয্যানিকধম্মাপদেসেন হি সত্থু ৰিৰট্টচ্ছদনভাৰো লোকে পাকটো অহোসি. পুরিমং ধম্মচক্খুন্তি পুরিমপদং ভগৰতো ধম্মচক্খুং সাধেতি কিলেসারীনং, সংসারচক্কস্স চ অরানং হতভাৰদীপনতো. দুতিযং পদং বুদ্ধচক্খুং সাধেতি সম্মাসম্বুদ্ধস্সেৰ তংসব্ভাৰতো. ততিযং পদং সমন্তচক্খুং সাধেতি সৰাসনসব্বকিলেসপ্পহানদীপনতো. ‘‘সম্মাসম্বুদ্ধো’’তি হি ৰত্ৰা ‘‘ৰিৰট্টচ্ছদো’’তি ৰচনং বুদ্ধভাৰাৰহমেৰ সব্বকিলেসপ্পহানং ৰিভাৰেতি. ‘‘সূরভাৰ’’ন্তি লক্খণৰিভাৰনে ৰিসদঞাণতং.

২৫৯. এৰং ভোতি এত্থ এৰন্তি ৰচনসম্পটিচ্ছনে নিপাতো. ৰচনসম্পটিচ্ছনঞ্চেত্থ ‘‘তথা মযং তং ভৰন্তং গোতমং ৰেদিস্সাম, ত্ৰং মন্তানং পটিগ্গহেতা’’তি চ এৰং পৰত্তস্স পোক্খরসাতিনো ৰচনস্স সম্পটিগ্গহোতি আহ. ‘‘সোপি তাযা’’তিআদি. তত্থ তাযাতি তায যথাৰুত্তায সমুত্তেজনায. অযানভূমিন্তি যানস্স অভূমিং. দিৰাপধানিকাতি দিৰাপধানানুযুঞ্জনকা.

২৬০. যদিপি পুব্বে অম্বট্ঠকুলং অপ্পঞ্ঞাতং, তদা পন পঞ্ঞাযতীতি আহ ‘‘তদা কিরা’’তিআদি. অতুরিতোতি অৰেগাযন্তো.

২৬১. যথা খমনীযাদীনি পুচ্ছন্তোতি যথা ভগৰা ‘‘কচ্চি ৰো মাণৰা খমনীযং, কচ্চি যাপনীয’’ন্তিআদিনা খমনীযাদীনি পুচ্ছন্তো তেহি মাণৰেহি সদ্ধিং পঠমং পৰত্তমোদো অহোসি পুব্বভাসিতায তদনুকরণেন এৰং তেপি মাণৰা ভগৰতা সদ্ধিং সমপ্পৰত্তমোদা অহেসুন্তি যোজনা. তং পন সমপ্পৰত্তমোদতং উপমায দস্সেতুং ‘‘সীতোদকং ৰিযা’’তিআদি ৰুত্তং. তত্থ সম্মোদিতন্তি সংসন্দিতং. একীভাৰন্তি সম্মোদনকিরিযায সমানতং. খমনীযন্তি ‘‘ইদং চতুচক্কং নৰদ্ৰারং সরীরযন্তং দুক্খবহুলতায সভাৰতো দুস্সহং কচ্চি খমিতুং সক্কুণেয্য’’ন্তি পুচ্ছন্তি, যাপনীযন্তি আহারাদিপচ্চযপটিবদ্ধৰুত্তিকং চিরপ্পবন্ধসঙ্খাতায যাপনায কচ্চি যাপেতুং সক্কুণেয্যং. সীসরোগাদিআবাধাভাৰেন কচ্চি অপ্পাবাধং, দুক্খজীৰিকাভাৰেন কচ্চি অপ্পাতঙ্কং, তংতংকিচ্চকরণে উট্ঠানসুখতায কচ্চি লহুট্ঠানং, তদনুরূপবলযোগতো কচ্চি বলং, সুখৰিহারসব্ভাৰেন কচ্চি ফাসুৰিহারো অত্থীতি সব্বত্থ কচ্চি-সদ্দং যোজেত্ৰা অত্থো ৰেদিতব্বো. বলপ্পত্তা পীতি পীতিযেৰ. তরুণপীতি পামোজ্জং. সম্মোদনং জনেতি করোতীতি সম্মোদনিকং তদেৰ সম্মোদনীযং. সম্মোদিতব্বতো সম্মোদনীযন্তি ইদং পন অত্থং দস্সেতুং ৰুত্তং ‘‘সম্মোদিতুং যুত্তভাৰতো’’তি. সরিতব্বভাৰতো অনুস্সরিতব্বভাৰতো ‘‘সরণীয’’ন্তি ৰত্তব্বে ‘‘সারণীয’’ন্তি দীঘং কত্ৰা ৰুত্তং. ‘‘সুয্যমানসুখতো’’তি আপাথমধুরতমাহ, ‘‘অনুস্সরিযমানসুখতো’’তি ৰিমদ্দরমণীযতং. ‘‘ব্যঞ্জনপরিসুদ্ধতাযা’’তি সভাৰনিরুত্তিভাৰেন তস্সা কথায ৰচনচাতুরিযমাহ, ‘‘অত্থপরিসুদ্ধতাযা’’তি অত্থস্স নিরুপক্কিলেসতং. অনেকেহি পরিযাযেহীতি অনেকেহি কারণেহি.

অপসাদেস্সামীতি মঙ্কুং করিস্সামি. কণ্ঠে ওলম্বেত্ৰাতি উভোসু খন্ধেসু সাটকং আসজ্জেত্ৰা কণ্ঠে ওলম্বিত্ৰা. দুস্সকণ্ণং গহেত্ৰাতি নিৰত্থসাটকস্স দসাকোটিং একেন হত্থেন গহেত্ৰা. চঙ্কমং অভিরুহিত্ৰাতি চঙ্কমিতুং আরভিত্ৰা. ধাতুসমতাতি রসাদিধাতূনং সমাৰত্থতা, অরোগতাতি অত্থো. অনাচারভাৰসারণীযন্তি অনাচারভাৰেন সরণীযং. ‘‘অনাচারো ৰতায’’ন্তি সরিতব্বকং.

২৬২. ‘‘ভৰগ্গং গহেতুকামো ৰিযা’’তিআদি অসক্কুণেয্যত্তা দুক্করং কিচ্চং আরভতীতি দস্সেতুং ৰুত্তং. অসক্কুণেয্যঞ্হেতং সদেৰকেনাপি লোকেন, যদিদং ভগৰতো অপসাদনং, তেনাহ ‘‘অট্ঠানে ৰাযমতী’’তি. অযং বালো ‘‘মযি কিঞ্চি অকথেন্তে মযা সদ্ধিং কথেতুম্পি ন ৰিসহতী’’তি মানমেৰ পগ্গণ্হিস্সতি, কথেন্তে পন কথাপসঙ্গেনস্স জাতিগোত্তে ৰিভাৰিতে মাননিগ্গহো ভৰিস্সতীতি ভগৰা ‘‘এৰং নু তে’’তিআদিমাহ. তেন ৰুত্তং ‘‘অথ খো ভগৰা’’তিআদি. আচারসমাচারসিক্খাপনেন আচরিযা, তেসং পন আচরিযানং পকট্ঠা আচরিযাতি পাচরিযা যথা পপিতামহোতি, তেনাহ ‘‘আচরিযেহি চ তেসং পাচরিযেহি চা’’তি.

পঠমইব্ভৰাদৰণ্ণনা

২৬৩. তীসু ইরিযাপথেসূতি ঠানগমননিসজ্জাসু. কথাপল়াসন্তি কথাৰসেন যুগগ্গাহং. সযানেন আচরিযেন সদ্ধিং সযানস্স কথা নাম আচারো ন হোতি, তং ইতরেহি সদিসং কত্ৰা কথনং ইধ কথাপল়াসো.

তস্স পন যং অনাচারভাৰৰিভাৰনং সত্থারা অম্বট্ঠেন সদ্ধিং কথেন্তেন কতং, তং সঙ্গীতিঅনারুল়্হং পরম্পরাভতন্তি উপরি পাল়িযা সম্বন্ধভাৰেন দস্সেন্তো ‘‘ততো কিরা’’তিআদিমাহ. মুণ্ডকা সমণকাতি চ গরহাযং ক-সদ্দো, তেনাহ ‘‘হীল়েন্তো’’তি. ইভস্স পযোগো ইভো উত্তরপদলোপেন, তং ইভং অরহন্তীতি ইব্ভা. কিং ৰুত্তং হোতি? যথা ইভো হত্থিৰাহনভূতো পরস্স ৰসেন ৰত্ততি, ন অত্তনো, এৰং এতেপি ব্রাহ্মণানং সুস্সুসকা সুদ্দা পরস্স ৰসেন ৰত্তন্তি, ন অত্তনো, তস্মা ইভসদিসপযোগতায ইব্ভাতি. তে পন কুটুম্বিকতায ঘরৰাসিনো ঘরস্সামিকা হোন্তীতি আহ ‘‘গহপতিকা’’তি. কণ্হাতি কণ্হজাতিকা. দিজা এৰ হি সুদ্ধজাতিকা, ন ইতরেতি তস্স অধিপ্পাযো, তেনাহ ‘‘কাল়কা’’তি. মুখতো নিক্খন্তাতি ব্রাহ্মণানং পুব্বপুরিসা ব্রহ্মুনো মুখতো নিক্খন্তা, অযং তেসং পঠমুপ্পত্তীতি অধিপ্পাযো. সেসপদেসুপি এসেৰ নযো. ‘‘সমণা পিট্ঠিপাদতো’’তি ইদং পনস্স ‘‘মুখতো নিক্খন্তা’’তিআদিৰচনতোপি অতিৰিয অসমৰেক্খিতৰচনং চতুৰণ্ণপরিযাপন্নস্সেৰ সমণভাৰসম্ভৰতো. অনিযমেত্ৰাতি অৰিসেসেত্ৰা, অনুদ্দেসিকভাৰেনাতি অত্থো.

মানুস্সযৰসেন কথেতীতি মানুস্সযং অৰস্সায অত্তানং উক্কংসেন্তো, পরে চ ৰম্ভেন্তো ‘‘মুণ্ডকা’’তি আদিং কথেতি. জানাপেমীতি জাতিগোত্তস্স পমাণং যাথাৰতো ৰিভাৰনেন পমাণং জানাপেমীতি. অত্থো এতস্স অত্থীতি অত্থিকং দণ্ডিকঞাযেন.

‘‘যাযেৰ খো পনত্থাযা’’তি ইত্থিলিঙ্গৰসেন ৰুত্তন্তি ৰদন্তি, তং পরতো ‘‘পুরিসলিঙ্গৰসেনেৰা’’তি ৰক্খমানত্তা যুত্তং. যায অত্থাযাতি ৰা পুল্লিঙ্গৰসেনেৰ তদত্থে সম্পদানৰচনং, যস্স অত্থস্স অত্থাযাতি অত্থো. অস্সাতি অম্বট্ঠস্স দস্সেত্ৰাতি সম্বন্ধো. অঞ্ঞেসন্তি অঞ্ঞেসং সাধুরূপানং. সন্তিকং আগতানন্তি গুরুট্ঠানিযানং সন্তিকং উপগতানং. ৰত্তন্তি তেহি চরিতব্বআচারং. অসিক্খিতোতি আচারং অসিক্খিতো. ততো এৰ অপ্পস্সুতো. বাহুসচ্চঞ্হি নাম যাৰদেৰ উপসমত্থং ইচ্ছিতব্বং, তদভাৰতো অম্বট্ঠো অপ্পস্সুতো অসিক্খিতো ‘‘অৰুসিতো’’তি ৰিঞ্ঞাযতি, তেনাহ ‘‘এতস্স হী’’তিআদি.

২৬৪. কোধৰসচিত্ততায অসকমনো. মাননিম্মদনত্থন্তি মানস্স নিম্মদনত্থং. উগ্গিলেত্ৰাতি সিনেহপানেন কিলিন্নং উব্বমনং কত্ৰা. গোত্তেন গোত্তন্তি তেন ৰুত্তেন পুরাতনগোত্তেন ইদানি তং তং অনৰজ্জসঞ্ঞিতং গোত্তং সাৰজ্জতো উট্ঠাপেত্ৰা উদ্ধরিত্ৰা. সেসপদেসুপি এসেৰ নযো. তত্থ গোত্তং আদিপুরিসৰসেন, কুলাপদোসো, তদন্ৰযে উপ্পন্নঅভিঞ্ঞাতপুরিসৰসেন ৰেদিতব্বো যথা ‘‘আদিচ্চো, মঘদেৰো’’তি. গোত্তমূলস্স গারয্হতায অমানৰত্থুভাৰপৰেদনতো ‘‘মানদ্ধজং মূলে ছেত্ৰা’’তি ৰুত্তং. ঘট্টেন্তোতি ওমসন্তো.

যস্মিং মানুস্সযকোধুস্সযা অঞ্ঞমঞ্ঞূপত্থদ্ধা, সো ‘‘চণ্ডো’’তি ৰুচ্চতীতি আহ ‘‘চণ্ডাতি মাননিস্সিতকোধযুত্তা’’তি. খরাতি চিত্তেন, ৰাচায চ কক্খল়া. লহুকাতি তরুণা. ভস্সাতি ‘‘সাহসিকা’’তি কেচি ৰদন্তি, ‘‘সারম্ভকা’’তি অপরে. সমানাতি হোন্তা, ভৰমানাতি অত্থোতি আহ ‘‘সন্তাতি পুরিমপদস্সেৰ ৰেৰচন’’ন্তি. ন সক্করোন্তীতি সক্কারং ন করোন্তি. অপচিতিকম্মন্তি পণিপাতকম্ম নানুলোমন্তি অত্তনো জাতিযা ন অনুচ্ছৰিকন্তি অত্থো.

দুতিযইব্ভৰাদৰণ্ণনা

২৬৫. কামং সক্যরাজকুলে যো সব্বেসং বুদ্ধতরো সমত্থো চ, সো এৰ অভিসেকং লভতি, একচ্চো পন অভিসিত্তো সমানো ‘‘ইদং রজ্জং নাম বহুকিচ্চং বহুব্যাপার’’ন্তি ততো নিব্বিজ্জ রজ্জং ৰযসা অনন্তরস্স নিয্যাতেতি, কদাচি সোপি অঞ্ঞস্সাতি তাদিসে সন্ধাযাহ ‘‘সক্যাতি অভিসিত্তরাজানো’’তি. কুলৰংসং জানন্তীতি কণ্হাযনতো পট্ঠায পরম্পরাগতং অনুস্সৰৰসেন জানন্তি. কুলাভিমানিনো হি যেভুয্যেন পরেসং উচ্চাৰচং কুলং তথা তথা উদাহরন্তি, অত্তনো চ কুলৰংসং জানন্তি, এৰং অম্বট্ঠোপি. তথা হি সো পরতো ভগৰতা পুচ্ছিতো ৰজিরপাণিভযেন যাথাৰতো কথেসি.

ততিযইব্ভৰাদৰণ্ণনা

২৬৬. খেত্তলেড্ডূনন্তি খেত্তে কসনৰসেন নঙ্গলেন উট্ঠাপিতলেড্ডূনং. ‘‘লটুকিকা’’ ইচ্চেৰ পঞ্ঞাতা খুদ্দকসকুণিকা লটুকিকোপমৰণ্ণনাযং ‘‘চাতকসকুণিকা’’তি (ম. নি. অট্ঠ. ৩.১৫০) ৰুত্তা. কোধৰসেন লগ্গিতুন্তি উপনয্হিতুং, আঘাতং বন্ধিতুন্তি অত্থো. ‘‘অম্হে হংসকোঞ্চমোরসমে করোতী’’তি ইমিনা ‘‘ন তং কোচি হংসো ৰা’’তিআদিৰচনং সঙ্গীতিং অনারুল়্হং তদা ভগৰতা ৰুত্তমেৰাতি দস্সেতি. ‘‘এৰং নু তে’’তিআদিৰচনং, ‘‘অৰুসিতৰাযেৰা’’তিআদিৰচনঞ্চ মানৰসেন সমণেন গোতমেন ৰুত্তন্তি মঞ্ঞতীতি অধিপ্পাযেনাহ ‘‘নিম্মানো দানি জাতোতি মঞ্ঞমানো’’তি.

দাসিপুত্তৰাদৰণ্ণনা

২৬৭. নিম্মাদেতীতি অ-কারস্স আ-কারং কত্ৰা নিদ্দেসোতি আহ ‘‘নিম্মদেতী’’তি. কামং গোত্তং নামেতং পিতিতো লদ্ধব্বং, ন মাতিতো ন হি ব্রাহ্মণানং সগোত্তায আৰাহৰিৰাহো ইচ্ছিতো, গোত্তনামং পন যস্মা জাতিসিদ্ধং, ন কিত্তিমং, জাতি চ উভযসম্বন্ধিনী, তস্মা ‘‘মাতাপেত্তিকন্তি মাতাপিতূনং সন্তক’’ন্তি ৰুত্তং. নামগোত্তন্তি গোত্তনামং, ন কিত্তিমনামং, ন গুণনামং ৰা. তত্থ ‘‘কণ্হাযনো’’তি নিরুল়্হা যা নামপণ্ণত্তি, তং সন্ধাযাহ ‘‘পণ্ণত্তিৰসেন নামন্তি. তং পন কণ্হইসিতো পট্ঠায তস্মিং কুলপরম্পরাৰসেন আগতং, ন এতস্মিংযেৰ নিরুল়্হং, তেন ৰুত্তং ‘‘পৰেণীৰসেন গোত্ত’’ন্তি. গোত্ত-পদস্স পন অত্থো হেট্ঠা ৰুত্তোযেৰ. অনুস্সরতোতি এত্থ ন কেৰলং অনুস্সরণং অধিপ্পেতং, অথ খো কুলসুদ্ধিৰীমংসনৰসেনাতি আহ ‘‘কুলকোটিং সোধেন্তস্সা’’তি. অয্যপুত্তাতি অয্যিকপুত্তাতি আহ ‘‘সামিনো পুত্তা’’তি. দিসা ওক্কাকরঞ্ঞো অন্তোজাতা দাসীতি আহ ‘‘ঘরদাসিযা পুত্তো’’তি. এত্থ চ যস্মা অম্বট্ঠো জাতিং নিস্সায মানত্থদ্ধো, ন চস্স যাথাৰতো জাতিযা অৰিভাৰিতায মাননিগ্গহো হোতি, মাননিগ্গহে চ কতে অপরভাগে রতনত্তযে পসীদিস্সতি, ন ‘‘দাসী’’তি ৰাচা ফরুসৰাচা নাম হোতি চিত্তস্স সণ্হভাৰতো. অভযসুত্তঞ্চেত্থ (ম. নি. ২.৮৩; অ. নি. ৪.১৮৪) নিদস্সনং. কেচি চ সত্তা অগ্গিনা ৰিয লোহাদযো কক্খল়ায ৰাচায মুদুভাৰং গচ্ছন্তি, তস্মা ভগৰা অম্বট্ঠং নিব্বিসেৰনং কাতুকামো ‘‘অয্যপুত্তা সক্যা ভৰন্তি, দাসিপুত্তো ত্ৰমসি সক্যান’’ন্তি অৰোচ.

ঠপেন্তীতি পঞ্ঞপেন্তি, তেনাহ ‘‘ওক্কাকো’’তিআদি. পভা নিচ্ছরতি দন্তানং অতিৰিয পভস্সরভাৰতো.

পঠমকপ্পিকানন্তি পঠমকপ্পস্স আদিকালে নিব্বত্তানং. কির-সদ্দো অনুস্সৰত্থে, তেন যো ৰুচ্চমানায রাজপরম্পরায কেসঞ্চি মতিভেদো, তং উল্লিঙ্গেতি. মহাসম্মতস্সাতি ‘‘অযং নো রাজা’’তি মহাজনেন সম্মন্নিত্ৰা ঠপিতত্তা ‘‘মহাসম্মতো’’তি এৰং সম্মতস্স. যং সন্ধায ৰদন্তি –

‘‘আদিচ্চকুলসম্ভূতো, সুৰিসুদ্ধগুণাকরো;

মহানুভাৰো রাজাসি, মহাসম্মতনামকো.

যো চক্খুভূতো লোকস্স, গুণরংসিসমুজ্জলো;

তমোনুদো ৰিরোচিত্থ, দুতিযো ৰিয ভাণুমা.

ঠপিতা যেন মরিযাদা, লোকে লোকহিতেসিনা;

ৰৰত্থিতা সক্কুণন্তি, ন ৰিলঙ্ঘযিতুং জনা.

যসস্সিনং তেজস্সিনং, লোকসীমানুরক্খকং;

আদিভূতং মহাৰীরং, কথযন্তি ‘মনূ’তি য’’ন্তি.

তস্স চ পুত্তপপুত্তপরম্পরং সন্ধায –

‘‘তস্স পুত্তো মহাতেজো, রোজো নাম মহীপতি;

তস্স পুত্তো ৰররোজো, পৰরো রাজমণ্ডলে.

তস্সাসি কল্যাণগুণো, কল্যাণো নাম অত্রজো;

রাজা তস্সাসি তনযো, ৰরকল্যাণনামকো.

তস্স পুত্তো মহাৰীরো, মন্ধাতা কামভোগিনং;

অগ্গভূতো মহিন্দেন, অড্ঢরজ্জেন পূজিতো.

তস্স সূনু মহাতেজো, ৰরমন্ধাতুনামকো;

‘উপোসথো’তি নামেন, তস্স পুত্তো মহাযসো.

ৰরো নাম মহাতেজো, তস্স পুত্তো মহাৰরো;

তস্সাসি উপৰরোতি, পুত্তো রাজা মহাবলো.

তস্স পুত্তো মঘদেৰো, দেৰতুল্যো মহীপতি;

চতুরাসীতিসহস্সানি, তস্স পুত্তপরম্পরা.

তেসং পচ্ছিমকো রাজা, ‘ওক্কাকো’ ইতি ৰিস্সুতো;

মহাযসো মহাতেজো, অখুদ্দো রাজমণ্ডলে’’তি.

আদি তেসং পচ্ছতোতি তেসং মঘদেৰ পরম্পরভূতানং কল়ারজনকপরিযোসানানং অনেকসতসহস্সানং রাজূনং অপরভাগে ওক্কাকো নাম রাজা অহোসি, তস্স পরম্পরাভূতানং অনেকসতসহস্সানং রাজূনং অপরভাগে অপরো ওক্কাকো নাম রাজা অহোসি, তস্স পরম্পরভূতানং অনেকসতসহস্সানং রাজূনং অপরভাগে পুনাপরো ওক্কাকো নাম রাজা অহোসি, তং সন্ধাযাহ ‘‘তযো ওক্কাকৰংসা অহেসুং. তেসু ততিযওক্কাকস্সা’’তিআদি.

সহসা ৰরং অদাসিন্তি পুত্তদস্সনেন সোমনস্সপ্পত্তো সহসা অৰীমংসিত্ৰা তুট্ঠিযা ৰসেন ৰরং অদাসিং, ‘‘যং ইচ্ছসি, তং গণ্হা’’তি. রজ্জং পরিণামেতুং ইচ্ছতীতি সা জন্তুকুমারস্স মাতা মম তং ৰরদানং অন্তরং কত্ৰা ইমং রজ্জং পরিণামেতুং ইচ্ছতীতি.

নপ্পসহেয্যাতি ন পরিযত্তো ভৰেয্য.

নিক্খম্মাতি ঘরাৰাসতো, কামেহি চ নিক্খমিত্ৰা. হেট্ঠা চাতি চ-সদ্দেন ‘‘অসীতিহত্থে’’তি ইদং অনুকড্ঢতি. তেহীতি মিগসূকরেহি, মণ্ডূকমূসিকেহি চ. তেতি সীহব্যগ্ঘাদযো, সপ্পবিল়ারা চ.

অৰসেসাহি অত্তনো অত্তনো কনিট্ঠাহি.

ৰড্ঢমানানন্তি অনাদরে সামিৰচনং. কুট্ঠরোগো নাম সাসমসূরীরোগা ৰিয যেভুয্যেন সঙ্কমনসভাৰোতি ৰুত্তং ‘‘অযং রোগো সঙ্কমতীতি চিন্তেত্ৰা’’তি.

মিগসূকরাদীনন্তি আদি-সদ্দেন ৰনচরসোণাদিকে সঙ্গণ্হাতি.

তস্মিং নিসিন্নেতি সম্বন্ধো. খত্তিযমাযারোচনেন অত্তনো খত্তিযভাৰং জানাপেত্ৰা.

নগরং মাপেহীতি সাহারং নগরং মাপেহীতি অধিপ্পাযো.

কেসগ্গহণন্তি কেসৰেণিবন্ধনং. দুস্সগ্গহণন্তি ৰত্থস্স নিৰাসনাকারো.

২৬৮. অত্তনো উপারম্ভমোচনত্থাযাতি আচরিযেন অম্বট্ঠেন চ অত্তনো অত্তনো উপরি পাপেতব্বউপৰাদস্স অপনযনত্থং. অস্মিং ৰচনেতি ‘‘চত্তারোমে ভো গোতম ৰণ্ণা’’তিআদিনা অত্তনা ৰুত্তে, ভোতা চ গোতমেন ৰুত্তে ‘‘জাতিৰাদে’’তি ইমস্মিং যথাধিকতে ৰচনে. তত্থ পন যস্মা ৰেদে ৰুত্তৰিধিনাৰ তেন পটিমন্তেতব্বং হোতি, তস্মা ৰুত্তং ‘‘ৰেদত্তযৰচনে’’তি, ‘‘এতস্মিং ৰা দাসিপুত্তৰচনে’’তি চ.

২৭০. ধম্মো নাম কারণং ‘‘ধম্মপটিসম্ভিদা’’তিআদীসু (ৰিভ. ৭১৮) ৰিয, সহ ধম্মেনাতি সহধম্মো, সহধম্মো এৰ সহধম্মিকোতি আহ ‘‘সহেতুকো’’তি.

২৭১. তস্মা তদা পটিঞ্ঞাতত্তা. তাসেত্ৰা পঞ্হং ৰিস্সজ্জাপেস্সামীতি আগতো যথা তং সচ্চকসমাগমে. ‘‘ভগৰা চেৰ পস্সতি অম্বট্ঠো চা’’তি এত্থ ইতরেসং অদস্সনে কারণং দস্সেতুং ‘‘যদি হী’’তিআদি ৰুত্তং. আৰাহেত্ৰাতি মন্তবলেন আনেত্ৰা. তস্সাতি অম্বট্ঠস্স. ৰাদসঙ্ঘট্টেতি ৰাচাসঙ্ঘট্টে.

২৭২. তাণন্তি গৰেসমানোতি, ‘‘অযমেৰ সমণো গোতমো ইতো ভযতো মম তাযকো’’তি ভগৰন্তংযেৰ ‘‘তাণ’’ন্তি পরিযেসন্তো উপগচ্ছন্তো. সেসপদদ্ৰযেপি এসেৰ নযো. তাযতীতি যথাউপট্ঠিতভযতো পালেতি, তেনাহ ‘‘রক্খতী’’তি, এতেন তাণ-সদ্দস্স কত্তুসাধনতমাহ. যথুপট্ঠিতেন ভযেন উপদ্দুতো নিলীযতি এত্থাতি লেণং, উপলযনং, এতেন লেণ-সদ্দস্স অধিকরণসাধনতমাহ. ‘‘সরতী’’তি এতেন সরণ-সদ্দস্স কত্তুসাধনতমাহ.

অম্বট্ঠৰংসকথাৰণ্ণনা

২৭৪. গঙ্গায দক্খিণতোতি গঙ্গায নদিযা দক্খিণদিসায. আৰুধং ন পরিৰত্ততীতি সরং ৰাসত্তিআদিং ৰা পরস্স উপরি খিপিতুকামস্স হত্থং ন পরিৰত্ততি, হত্থে পন অপরিৰত্তেন্তে কুতো আৰুধপরিৰত্তনন্তি আহ ‘‘আৰুধং ন পরিৰত্ততী’’তি. সো কির ‘‘কথং নামাহং দিসায দাসিযা কুচ্ছিম্হি নিব্বত্তো’’তি তং হীনং জাতিং জিগুচ্ছন্তো ‘‘হন্দাহং যথা তথা ইমং জাতিং সোধেস্সামী’’তি নিগ্গতো, তেনাহ ‘‘ইদানি মে মনোরথং পূরেস্সামী’’তিআদি. ৰিজ্জাবলেন রাজানং তাসেত্ৰা তস্স ধীতুযা লদ্ধকালতো পট্ঠায ম্যাযং জাতিসোধিতা ভৰিস্সতীতি তস্স অধিপ্পাযো. অম্বট্ঠং নাম ৰিজ্জন্তি সত্তানং সরীরে অব্ভঙ্গং ঠপেতীতি অম্বট্ঠাতি এৰং লদ্ধনামং ৰিজ্জং, মন্তন্তি অত্থো. যতো অম্বট্ঠা এতস্মিং অত্থীতি অম্বট্ঠোতি কণ্হো ইসি পঞ্ঞাযিত্থ, তংবংসজাততায অযং মাণৰো ‘‘অম্বট্ঠো’’তি ৰোহরীযতি.

সেট্ঠমন্তে ৰেদমন্তেতি অধিপ্পাযো. মন্তানুভাৰেন রঞ্ঞো বাহুক্খম্ভমত্তং জাতং তেন পনস্স বাহুক্খম্ভেন রাজা, ‘‘কো জানাতি, কিং ভৰিস্সতী’’তি ভীতো উস্সঙ্কী উত্রাসো অহোসি, তেনাহ ‘‘ভযেন ৰেধমানো অট্ঠাসী’’তি. সোত্থি ভদ্দন্তেতি আদিৰচনং অৰোচুং. ‘‘অযং মহানুভাৰো ইসী’’তি মঞ্ঞমানা.

উন্দ্রিযিস্সতীতি ৰিপ্পকিরিযিস্সতি, তেনাহ ‘‘ভিজ্জিস্সতী’’তি. মন্তে পরিৰত্তিতেতি বাহুক্খম্ভকমন্তস্স পটিপ্পস্সম্ভকৰিজ্জাসঙ্খাতে মন্তে ‘‘সরো ওতরতূ’’তি পরিৰত্তিতে. এৰরূপানঞ্হি মন্তানং একংসেনেৰ পটিপ্পস্সম্ভকৰিজ্জা হোন্তিযেৰ যথা তং কুসুমারকৰিজ্জানং. অত্তনো ধীতু অপৰাদমোচনত্থং তস্স ভুজিস্সকরণং. তস্সানুরূপে ইস্সরিযে ঠপনত্থং উল়ারে চ নং ঠানে ঠপেসি.

খত্তিযসেট্ঠভাৰৰণ্ণনা

২৭৫. সমস্সাসনত্থমাহ করুণাযন্তো, ন কুলীনভাৰদস্সনত্থং, তেনাহ ‘‘অথ খো ভগৰা’’তিআদি. ব্রাহ্মণেসূতি ব্রাহ্মণানং সমীপে, ততো ব্রাহ্মণেহি লদ্ধব্বং আসনাদিং সন্ধায ‘‘ব্রাহ্মণানং অন্তরে’’তি ৰুত্তং. কেৰলং সদ্ধায কাতব্বং সদ্ধং, পরলোকগতে সন্ধায ন ততো কিঞ্চি অপত্থেন্তেন কাতব্বন্তি অত্থো, তেনাহ ‘‘মতকে উদ্দিস্স কতভত্তে’’তি. মঙ্গলাদিভত্তেতি আদি-সদ্দেন উস্সৰদেৰতারাধনাদিং সঙ্গণ্হাতি. যঞ্ঞভত্তেতি পাপসঞ্ঞমাদিৰসেন কতভত্তে. পাহুনকানন্তি অতিথীনং. খত্তিযভাৰং অপ্পত্তো উভতো সুজাততাভাৰতো, তেনাহ ‘‘অপরিসুদ্ধোতি অত্থো’’তি.

২৭৬. ইত্থিং করিত্ৰাতি এত্থ করণং কিরিযাসামঞ্ঞৰিসযন্তি আহ ‘‘ইত্থিং পরিযেসিত্ৰা’’তি. ব্রাহ্মণকঞ্ঞং ইত্থিং খত্তিযকুমারস্স ভরিযাভূতং গহেত্ৰাপি খত্তিযাৰ সেট্ঠা, হীনা ব্রাহ্মণাতি যোজনা. পুরিসেন ৰা পুরিসং করিত্ৰাতি এত্থাপি এসেৰ নযো. পকরণেতি রাগাদিৰসেন পদুট্ঠে পক্খলিতে কারণে, তেনাহ ‘‘দোসে’’তি. ভস্সতি নিরত্থকভাৰেন খিপীযতীতি ভস্সং, ছারিকা.

২৭৭. জনিতস্মিন্তি কম্মকিলেসেহি নিব্বত্তে. জনে এতস্মিন্তি ৰা জনেতস্মিং, মনুস্সেসূতি অত্থো, তেনাহ ‘‘গোত্তপটিসারিনো’’তি. সংসন্দিত্ৰাতি ঘটেত্ৰা, অৰিরুদ্ধং কত্ৰাতি অত্থো.

পঠমভাণৰারৰণ্ণনা নিট্ঠিতা.

ৰিজ্জাচরণকথাৰণ্ণনা

২৭৮. ইদং ৰট্টতীতি ইদং অজ্ঝেনাদি কত্তুং লব্ভতি. জাতিৰাদৰিনিবদ্ধাতি জাতিসন্নিস্সিতৰাদে ৰিনিবদ্ধা. ব্রাহ্মণস্সেৰ অজ্ঝেনজ্ঝাপনযজনযাজনাদযোতি এৰং যে অত্তুক্কংসনপরৰম্ভনৰসেন পৰত্তা, ততো এৰ তে মানৰাদপটিবদ্ধা চ হোন্তি. যে পন আৰাহৰিৰাহৰিনিবদ্ধা, তে এৰ সম্বন্ধত্তযৰসেন ‘‘অরহসি ৰা মং ত্ৰং, ন ৰা মং ত্ৰং অরহসী’’তি এৰং পৰত্তনকা.

যত্থাতি যস্সং ৰিজ্জাচরণসম্পত্তিযং. লগ্গিস্সামাতি ওলগ্গা অন্তোগধা ভৰিস্সামাতি চিন্তযিম্হ. পরমত্থতো অৰিজ্জাচরণানিযেৰ ‘‘ৰিজ্জাচরণানী’’তি গহেত্ৰা ঠিতো পরমত্থতো ৰিজ্জাচরণেসু ৰিভজিযমানেসু সো ততো দূরতো অপনীতো নাম হোতীতি আহ ‘‘দূরমেৰ অৰক্খিপী’’তি. সমুদাগমতো পভুতীতিআদিসমুট্ঠানতো পট্ঠায.

২৭৯. তিৰিধং সীলন্তি খুদ্দকাদিভেদং তিৰিধং সীলং. সীলৰসেনেৰাতি সীলপরিযাযেনেৰ. কিঞ্চি কিঞ্চীতি অহিংসনাদিযমনিযমলক্খণং কিঞ্চি কিঞ্চি সীলং অত্থি. তত্থ তত্থেৰ লগ্গেয্যাতি তস্মিং তস্মিংযেৰ ব্রাহ্মণসমযসিদ্ধে সীলমত্তে ‘‘চরণ’’ন্তি লগ্গেয্য. অট্ঠপি সমাপত্তিযো চরণন্তি নিয্যাতিতা হোন্তি রূপাৰচরচতুত্থজ্ঝাননিদ্দেসেনেৰ অরূপজ্ঝানানম্পি নিদ্দিট্ঠভাৰাপত্তিতো নিয্যাতিতা নিদস্সিতা.

চতুঅপাযমুখকথাৰণ্ণনা

২৮০. অসম্পাপুণন্তোতি আরভিত্ৰা সম্পত্তুং অসক্কোন্তো. অৰিসহমানোতি আরভিতুমেৰ অসক্কোন্তো. খারিন্তি পরিক্খারং. তং পন ৰিভজিত্ৰা দস্সেতুং ‘‘অরণী’’তিআদি ৰুত্তং. তত্থ অরণীতি অগ্গিধমনকং অরণীদ্ৰযং. সুজাতি দব্বি. আদি-সদ্দেন তিদণ্ডতিঘটিকাদিং সঙ্গণ্হাতি খারিভরিতন্তি খারীহি পুণ্ণং. ননু উপসম্পন্নস্স ভিক্খুনো সাসনিকোপি যো কোচি অনুপসম্পন্নো অত্থতো পরিচারকোৰ, কিং অঙ্গং পন বাহিরকপব্বজিতেতি তত্থ ৰিসেসং দস্সেতুং ‘‘কামঞ্চা’’তিআদি ৰুত্তং. ৰুত্তনযেনাতি ‘‘কপ্পিযকরণ…পে… ৰত্তকরণৰসেনা’’তি এৰং ৰুত্তেন নযেন. পরিচারকো হোতি উপসম্পন্নভাৰস্স ৰিসিট্ঠভাৰতো. ‘‘নৰকোটিসহস্সানী’’তিআদিনা (ৰিসুদ্ধি. ১.২০; পটি. ম. অট্ঠ. ৩৭) ৰুত্তপ্পভেদানং অনেকসহস্সানং সংৰরৰিনযানং সমাদিযিত্ৰা ৰত্তনেন উপরিভূতা অগ্গভূতা সম্পদাতি হি ‘‘উপসম্পদা’’তি ৰুচ্চতীতি. গুণাধিকোপীতি গুণেহি উক্কট্ঠোপি. অযং পনাতি ৰুত্তলক্খণো তাপসো.

তাপসা নাম কম্মৰাদিকিরিযাৰাদিনো, ন সাসনস্স পটাণীভূতা, যতো নেসং পব্বজিতুং আগতানং তিত্থিযপরিৰাসেন ৰিনাৰ পব্বজ্জা অনুঞ্ঞাতাতি কত্ৰা ‘‘কস্মা পনা’’তি চোদনং সমুট্ঠপেতি চোদকো. আচরিযো ‘‘যস্মা’’তিআদিনা চোদনং পরিহরতি. ‘‘ওসক্কিস্সতী’’তি সঙ্খেপতো ৰুত্তমত্থং ৰিৰরিতুং ‘‘ইমস্মিঞ্হী’’তিআদি ৰুত্তং. খুরধারূপমন্তি খুরধারানং মত্থকেনেৰ অক্কমিত্ৰা গমনূপমং. অঞ্ঞেতি অঞ্ঞে ভিক্খূ. অগ্গিসালন্তি অগ্গিহুত্তসালং. নানাদারূহীতি পলাসদণ্ডাদিনানাৰিধসমিধাদারূহি.

ইদন্তি ‘‘চতুদ্ৰারং আগারং কত্ৰা’’তিআদিনা ৰুত্তং. অস্সাতি অস্স চতুত্থস্স পুগ্গলস্স. পটিপত্তিমুখন্তি কোহঞ্ঞপটিপত্তিযা মুখমত্তং. সো হি নানাৰিধেন কোহঞ্ঞেন লোকং ৰিম্হাপেন্তো তত্থ অচ্ছতি, তেনাহ ‘‘ইমিনা হি মুখেন সো এৰং পটিপজ্জতী’’তি.

খলাদীসু মনুস্সানং সন্তিকে উপতিট্ঠিত্ৰা ৰীহিমুগ্গতিলমাসাদীনি ভিক্খাচরিযানিযামেন সঙ্কড্ঢিত্ৰা উঞ্ছনং উঞ্ছা, সা এৰ চরিযা ৰুত্তি এতেসন্তি উঞ্ছাচরিযা. অগ্গিপক্কেন জীৰন্তীতি অগ্গিপক্কিকা, ন অগ্গিপক্কিকা অনগ্গিপক্কিকা. উঞ্ছাচরিযা হি খলেসু গন্ত্ৰা খলগ্গং নাম মনুস্সেহি দিয্যমানং ধঞ্ঞং গণ্হন্তি, তং ইমে ন গণ্হন্তীতি অনগ্গিপক্কিকা নাম জাতা. অসামপাকাতি অসযংপাচকা. অস্মমুট্ঠিনা মুট্ঠিপাসাণেন ৰত্তন্তীতি অস্মমুট্ঠিকা. দন্তেন উপ্পাটিতং ৰক্কলং রুক্খত্তচো দন্তৰক্কলং, তেন ৰত্তন্তীতি দন্তৰক্কলিকা. পৰত্তং রুক্খাদিতো পাতিতং ফলং ভুঞ্জন্তীতি পৰত্তফলভোজিনো. জিণ্ণপক্কতায পণ্ডুভূতং পলাসং, তংসদিসঞ্চ পণ্ডুপলাসং, তেন ৰত্তন্তীতি পণ্ডুপলাসিকা, সযংপতিতপুপ্ফফলপত্তভোজিনো.

ইদানি তে অট্ঠৰিধেপি সরূপতো দস্সেতুং ‘‘তত্থা’’তিআদি ৰুত্তং. সঙ্কড্ঢিত্ৰাতি ভিক্খাচরিযাৰসেন লদ্ধধঞ্ঞং একজ্ঝং কত্ৰা.

পরিযেট্ঠি নাম দুক্খাতি পরেসং গেহতো গেহং গন্ত্ৰা পরিযেট্ঠি নাম দীনৰুত্তিভাৰেন দুক্খা. পাসাণস্স পরিগ্গহো দুক্খো পব্বজিতস্সাতি ৰা দন্তেহেৰ উপ্পাটেত্ৰা খাদন্তি.

ইমাহি চতূহিযেৰাতি ‘‘খারিৰিধং আদাযা’’তিআদিনা ৰুত্তাহি চতূহি এৰ তাপসপব্বজ্জাহীতি.

২৮২. অপাযে ৰিনাসে নিযুত্তো আপাযিকো. তব্ভাৰং পরিপূরেতুং অসক্কোন্তো তেন অপরিপুণ্ণো অপরিপূরমানো, করণে চেতং পচ্চত্তৰচনং, তেনাহ ‘‘আপাযিকেনাপি অপরিপূরমানেনা’’তি.

পুব্বকইসিভাৰানুযোগৰণ্ণনা

২৮৩. দীযতীতি দত্তি, দত্তিযেৰ দত্তিকন্তি আহ ‘‘দিন্নক’’ন্তি. যদি ব্রাহ্মণস্স সম্মুখীভাৰো রঞ্ঞো ন দাতব্বো, কস্মাস্স উপসঙ্কমনং ন পটিক্খিত্তন্তি আহ ‘‘যস্মা পনা’’তিআদি. খেত্তৰিজ্জাযাতি নীতিসত্থে. পযাতন্তি সদ্ধং, সস্সতিকং ৰা, তেনাহ ‘‘অভিহরিত্ৰা দিন্ন’’ন্তি. কস্মা ভগৰা ‘‘রঞ্ঞো পসেনদিস্স কোসলস্স দত্তিকং ভুঞ্জতী’’তিআদিনা ব্রাহ্মণস্স মম্মৰচনং অৰোচাতি তত্থ কারণং দস্সেতুং ‘‘ইদং পন কারণ’’ন্তিআদি ৰুত্তং.

২৮৪. রথূপত্থরেতি রথস্স উপরি অত্থরিতপদেসে. পাকটমন্তনন্তি পকাসভূতং মন্তনং. তঞ্হি সুদ্দাদীহি ঞাযতীতি ন রহস্সমন্তনং. ভণতীতি অপি নু ভণতি.

২৮৫. পৰত্তারোতি পাৰচনভাৰেন ৰত্তারো, যস্মা তে তেসং মন্তানং পৰত্তকা, তস্মা আহ ‘‘পৰত্তযিতারো’’তি. সুদ্দে বহি কত্ৰা রহো ভাসিতব্বট্ঠেন মন্তা এৰ, তংতংঅত্থপটিপত্তিহেতুতায পদন্তি মন্তপদং, অনুপনীতাসাধারণতায ৰা রহস্সভাৰেন ৰত্তব্বং হিতকিরিযায অধিগমুপাযং. সজ্ঝাযিতন্তি গাযনৰসেন সজ্ঝাযিতং, তং পন উদত্তানুদত্তাদীনং সরানং সম্পাদনৰসেনেৰ ইচ্ছিতন্তি আহ ‘‘সরসম্পত্তিৰসেনা’’তি. অঞ্ঞেসং ৰুত্তন্তি পাৰচনভাৰেন অঞ্ঞেসং ৰুত্তং. সমুপব্যূল়্হন্তি সঙ্গহেত্ৰা উপরূপরি সঞ্ঞূল়্হং. রাসিকতন্তি ইরুৰেদযজুৰেদসামৰেদাদিৰসেন, তত্থাপি পচ্চেকং মন্তব্রহ্মাদিৰসেন, অজ্ঝাযানুৰাকাদিৰসেন চ রাসিকতং.

তেসন্তি মন্তানং কত্তূনং. দিব্বেন চক্খুনা ওলোকেত্ৰাতি দিব্বচক্খুপরিভণ্ডেন যথাকম্মূপগঞাণেন সত্তানং কম্মস্সকতাদিং পচ্চক্খতো দস্সনট্ঠেন দিব্বচক্খুসদিসেন পুব্বেনিৰাসঞাণেন অতীতকপ্পে ব্রাহ্মণানং মন্তজ্ঝেনৰিধিঞ্চ ওলোকেত্ৰা. পাৰচনেন সহ সংসন্দিত্ৰাতি কস্সপসম্মাসম্বুদ্ধস্স যং ৰচনং ৰট্টসন্নিস্সিতং, তেন সহ অৰিরুদ্ধং কত্ৰা. ন হি তেসং ৰিৰট্টসন্নিস্সিতো অত্থো পচ্চক্খো হোতি. অপরাপরে পনাতি অট্ঠকাদীহি অপরা পরে পচ্ছিমা ওক্কাকরাজকালাদীসু উপ্পন্না. পক্খিপিত্ৰাতি অট্ঠকাদীহি গন্থিতমন্তপদেসু কিলেসসন্নিস্সিতপদানং তত্থ তত্থ পদে পক্খিপনং কত্ৰা. ৰিরুদ্ধে অকংসূতি ব্রাহ্মণধম্মিকসুত্তাদীসু আগতনযেন সংকিলেসিকত্থদীপনতো পচ্চনীকভূতে অকংসু. ইধাতি ‘‘ত্যাহং মন্তে অধীযামী’’তি এতস্মিং ঠানে. পটিঞ্ঞং অগ্গহেত্ৰাতি ‘‘তং কিং মঞ্ঞসী’’তি এৰং পটিঞ্ঞং অগ্গহেত্ৰাৰ.

২৮৬. নিরামগন্ধাতি কিলেসাসুচিৰসেন ৰিস্সগন্ধরহিতা. অনিত্থিগন্ধাতি ইত্থীনং গন্ধমত্তস্সপি অৰিসহনেন ইত্থিগন্ধরহিতা. এত্থ চ ‘‘নিরামগন্ধা’’তি এতেন তেসং পোরাণানং ব্রাহ্মণানং ৰিক্খম্ভিতকিলেসতং দস্সেতি, ‘‘অনিত্থিগন্ধা ব্রহ্মচারিনো’’তি এতেন একৰিহারিতং, ‘‘রজোজল্লধরা’’তি এতেন মণ্ডনৰিভূসনানুযোগাভাৰং, ‘‘অরঞ্ঞাযতনে পব্বতপাদেসু ৰসিংসূ’’তি এতেন মনুস্সূপচারং পহায ৰিৰিত্তৰাসং, ‘‘ৰনমূলফলাহারা ৰসিংসূ’’তি এতেন সালিমংসোদনাদিপণীতাহারপটিক্খেপং, ‘‘যদা’’তিআদিনা যানৰাহনপটিক্খেপং, ‘‘সব্বদিসাসূ’’তিআদিনা রক্খাৰরণপটিক্খেপং, এৰঞ্চ ৰদন্তো মিচ্ছাপটিপদাপক্খিকং সাচরিযস্স অম্বট্ঠস্স ৰুত্তিং উপাদায সম্মাপটিপদাপক্খিকাপি তেসং ব্রাহ্মণানং ৰুত্তি অরিযৰিনযে সম্মাপটিপত্তিং উপাদায মিচ্ছাপটিপদাযেৰ. কুতস্স সল্লেখপটিপত্তিযুত্ততাতি. ‘‘এৰং সুতে’’তিআদিনা ভগৰা অম্বট্ঠং সন্তজ্জেন্তো নিগ্গণ্হাতীতি দস্সেতি.

ৰেঠকেহীতি ৰেঠকপট্টকাহি. সমন্তানগরন্তি নগরস্স সমন্ততো. কতসুধাকম্মং পাকারস্স অধোভাগে ঠানং ৰুচ্চতীতি অধিপ্পাযো.

দ্ৰেলক্খণদস্সনৰণ্ণনা

২৮৭. ন সক্কোতিসঙ্কুচিতে ইরিযাপথে অনৰসেসতো তেসং দুব্বিভাৰনতো. গৰেসীতি ঞাণেন পরিযেসনমকাসি. সমানযীতি ঞাণেন সঙ্কলেন্তো সম্মা আনযি সমাহরি. ‘‘কঙ্খতী’’তি পদস্স আকঙ্খতীতি অযমত্থোতি আহ ‘‘অহো ৰত পস্সেয্যন্তি পত্থনং উপ্পাদেতী’’তি. কিচ্ছতীতি কিলমতি. ‘‘কঙ্খতী’’তি পদস্স পুব্বে আসিসনত্থতং ৰত্ৰা ইদানিস্স সংসযত্থতমেৰ ৰিকপ্পন্তরৰসেন দস্সেন্তো ‘‘কঙ্খায ৰা দুব্বলা ৰিমতি ৰুত্তা’’তি আহ. তীহি ধম্মেহীতি তিপ্পকারেহি সংসযধম্মেহি. কালুসিযভাৰোতি অপ্পসন্নতায হেতুভূতো আৰিলভাৰো.

যস্মা ভগৰতো কোসোহিতং সব্ববুদ্ধানং আৰেণিকং অঞ্ঞেহি অসাধারণং ৰত্থগুয্হং সুৰিসুদ্ধকঞ্চনমণ্ডলসন্নিকাসং, অত্তনো সণ্ঠানসন্নিৰেসসুন্দরতায আজানেয্যগন্ধহত্থিনো ৰরঙ্গপরমচারুভাৰং, ৰিকসমানতপনিযারৰিন্দসমুজ্জলকেসরাৰত্তৰিলাসং, সঞ্ঝাপভানুরঞ্জিতজলৰনন্তরাভিলক্খিতসম্পুণ্ণচন্দমণ্ডলসোভঞ্চ অত্তনো সিরিযা অভিভুয্য ৰিরাজতি, যং বাহিরব্ভন্তরমলেহি অনুপক্কিলিট্ঠতায, চিরকালং সুপরিচিতব্রহ্মচরিযাধিকারতায, সুসণ্ঠিতসণ্ঠানসম্পত্তিযা চ, কোপীনম্পি সন্তং অকোপীনমেৰ, তস্মা ৰুত্তং ‘‘ভগৰতো হী’’তিআদি. পহূতভাৰন্তি পুথুলভাৰং. এত্থেৰ হি তস্স সংসযো, তনুমুদুসুকুমারতাদীসু পনস্স গুণেসু ৰিচারণা এৰ নাহোসি.

২৮৮. হিরিকরণোকাসন্তি হিরিযিতব্বট্ঠানং. ছাযন্তি পটিবিম্বং. কথং কীদিসন্তি আহ ‘‘ইদ্ধিযা’’তিআদি. ছাযারূপকমত্তন্তি ভগৰতো পটিবিম্বরূপং. তঞ্চ খো বুদ্ধসন্তানতো ৰিনিমুত্তত্তা রূপকমত্তং ভগৰতো সরীরৰণ্ণসণ্ঠানাৰযৰং ইদ্ধিমযং বিম্বকমত্তং. তং পন রূপকমত্তং দস্সেন্তো ভগৰা যথা অত্তনো বুদ্ধরূপং ন দিস্সতি, তথা কত্ৰা দস্সেতি. নিন্নেত্ৰাতি নীহরিত্ৰা. কল্লোসীতি পুচ্ছাৰিস্সজ্জনে কুসলো ছেকো অসি. তথাকরণেনাতি কথিনসূচিং ৰিয করণেন. এত্থাতি পহূতজিৰ্হায. মুদুভাৰো পকাসিতো অমুদুনো ঘনসুখুমভাৰাপাদনত্থং অসক্কুণেয্যত্তা দীঘভাৰো, তনুভাৰো চাতি দট্ঠব্বং.

২৯১. ‘‘অত্থচরকেনা’’তি ইমিনা ব্যতিরেকমুখেন অনত্থচরকতংযেৰ ৰিভাৰেতি. ন অঞ্ঞত্রাতি ন অঞ্ঞস্মিং সুগতিযন্তি অত্থো. উপনেত্ৰা উপনেত্ৰাতি তং তং দোসং উপনেত্ৰা উপনেত্ৰা, তেনাহ ‘‘সুট্ঠুদাসাদিভাৰং আরোপেত্ৰা’’তি. পাতেসীতি পৰট্টনৰসেন পাতেসি.

পোক্খরসাতিবুদ্ধূপসঙ্কমনৰণ্ণনা

২৯৩-৬. আগমা নূতি আগতো নু. খোতি নিপাতমত্তং. ইধাতি এত্থ, তুম্হাকং সন্তিকন্তি অত্থো. অধিৰাসেতূতি সাদিযতু, তং পন সাদিযনং মনসা সম্পটিগ্গহো হোতীতি আহ ‘‘সম্পটিচ্ছতূ’’তি.

২৯৭. যাৰদত্থন্তি যাৰ অত্থো, তাৰ ভোজনেন তদা কতন্তি অত্থো. ওণিত্তন্তি আমিসাপনযনেন সুচিকতং, তেনাহ ‘‘হত্থে চ পত্তঞ্চ ধোৰিত্ৰা’’তি.

২৯৮. অনুপুব্বিং কথন্তি অনুপুব্বং কথেতব্বকথং, তেনাহ ‘‘অনুপটিপাটিকথ’’ন্তি. কা পন সা? দানাদিকথাতি আহ ‘‘দানানন্তরং সীল’’ন্তিআদি. তেন দানকথা তাৰ পচুরজনেসুপি পৰত্তিযা সব্বসাধারণত্তা, সুকরত্তা, সীলে পতিট্ঠানস্স উপাযভাৰতো চ আদিতো কথেতব্বা. পরিচ্চাগসীলো হি পুগ্গলো পরিগ্গহিতৰত্থূসু নিস্সঙ্গভাৰতো সুখেনেৰ সীলানি সমাদিযতি, তত্থ চ সুপ্পতিট্ঠিতো হোতি. সীলেন দাযকপটিগ্গাহকসুদ্ধিতো পরানুগ্গহং ৰত্ৰা পরপীল়ানিৰত্তিৰচনতো, কিরিযধম্মং ৰত্ৰা অকিরিযধম্মৰচনতো, ভোগসম্পত্তিহেতুং ৰত্ৰা ভৰসম্পত্তিহেতুৰচনতো চ দানকথানন্তরং সীলকথা কথেতব্বা, তঞ্চে দানসীলং ৰট্টনিস্সিতং, অযং ভৰসম্পত্তি তস্স ফলন্তি দস্সনত্থং ইমেহি চ দানসীলমযেহি পণীতপণীততরাদিভেদভিন্নেহি পুঞ্ঞকিরিযৰত্থূহি এতা চাতুমহারাজিকাদীসু পণীতপণীততরাদিভেদভিন্না অপরিমেয্যা দিব্বভোগসম্পত্তিযো লদ্ধব্বাতি দস্সনত্থং তদনন্তরং সগ্গকথা. স্ৰাযং সগ্গো রাগাদীহি উপক্কিলিট্ঠো, সব্বথানুপক্কিলিট্ঠো অরিযমগ্গোতি দস্সনত্থং সগ্গানন্তরং মগ্গো কথেতব্বো. মগ্গঞ্চ কথেন্তেন তদধিগমুপাযসন্দস্সনত্থং সগ্গপরিযাপন্নাপি, পগেৰ ইতরে সব্বেপি কামা নাম বহ্ৰাদীনৰা অনিচ্চা অদ্ধুৰা ৰিপরিণামধম্মাতি কামানং আদীনৰো, হীনা গম্মা পোথুজ্জনিকা অনরিযা অনত্থসঞ্হিতাতি তেসং ওকারো লামকভাৰো, সব্বেপি ভৰা কিলেসানং ৰত্থুভূতাতি তত্থ সংকিলেসো, সব্বসংকিলেসৰিপ্পমুত্তং নিব্বানন্তি নেক্খম্মে আনিসংসো চ কথেতব্বোতি অযমত্থো বোধিতোতি ৰেদিতব্বো. মগ্গোতি চেত্থ ইতি-সদ্দেন আদিঅত্থদীপনতো ‘‘কামানং আদীনৰো’’তি এৰমাদীনং সঙ্গহোতি এৰমযং অত্থৰণ্ণনা কতাতি ৰেদিতব্বা. ‘‘তস্স উপ্পত্তিআকারদস্সনত্থ’’ন্তি কস্মা ৰুত্তং, ননু মগ্গঞাণং অসঙ্খতধম্মারম্মণং, ন সঙ্খতধম্মারম্মণন্তি চোদনং সন্ধাযাহ ‘‘তঞ্হী’’তিআদি. তত্থ পটিৰিজ্ঝন্তন্তি অসম্মোহপটিৰেধৰসেন পটিৰিজ্ঝন্তং, তেনাহ ‘‘কিচ্চৰসেনা’’তি.

পোক্খরসাতিউপাসকত্তপটিৰেদনাকথাৰণ্ণনা

২৯৯. এত্থ চ ‘‘দিট্ঠধম্মো’’তিআদি পাল়িযং দস্সনং নাম ঞাণদস্সনতো অঞ্ঞম্পি অত্থি, তন্নিৰত্তনত্থং ‘‘পত্তধম্মো’’তি ৰুত্তং. পত্তি চ ঞাণসম্পত্তিতো অঞ্ঞম্পি ৰিজ্জতীতি ততো ৰিসেসদস্সনত্থং ‘‘ৰিদিতধম্মো’’তি ৰুত্তং. সা পনেসা ৰিদিতধম্মতা একদেসতোপি হোতীতি নিপ্পদেসতো ৰিদিতভাৰং দস্সেতুং ‘‘পরিযোগাল়্হধম্মো’’তি ৰুত্তং. তেনস্স সচ্চাভিসম্বোধংযেৰ দীপেতি. মগ্গঞাণঞ্হি একাভিসমযৰসেন পরিঞ্ঞাদিকিচ্চং সাধেন্তং নিপ্পদেসেন চতুসচ্চধম্মং সমন্ততো ওগাল়্হং নাম হোতি, তেনাহ ‘‘দিট্ঠো অরিযসচ্চধম্মো এতেনাতি দিট্ঠধম্মো’’তি. তিণ্ণা ৰিচিকিচ্ছাতি সপ্পটিভযকন্তারসদিসা সোল়সৰত্থুকা, অট্ঠৰত্থুকা চ তিণ্ণা ৰিতিণ্ণা ৰিচিকিচ্ছা. ৰিগতা কথঙ্কথাতি পৰত্তিআদীসু. ‘‘এৰং নু খো, ন নু খো’’তি এৰং পৰত্তিকা ৰিগতা সমুচ্ছিন্না কথঙ্কথা. ৰেসারজ্জপ্পত্তোতি সারজ্জকরানং পাপধম্মানং পহীনত্তা, তপ্পটিপক্খেসু চ সীলাদিগুণেসু সুপ্পতিট্ঠিতত্তা ৰেসারজ্জং ৰিসারদভাৰং ৰেয্যত্তিযং পত্তো অধিগতো. সাযং ৰেসারজ্জপ্পত্তি সুপ্পতিট্ঠিতভাৰোতি কত্ৰা আহ ‘‘সত্থুসাসনে’’তি. অত্তনা পচ্চক্খতো দিট্ঠত্তা অধিগতত্তা ন পরং পচ্চেতি, ন তস্স পরো পচ্চেতব্বো অত্থীতি অপরপ্পচ্চযো. যং পনেত্থ ৰত্তব্বং অৰুত্তং, তং পরতো আগমিস্সতি. সেসং সুৰিঞ্ঞেয্যমেৰ.

অম্বট্ঠসুত্তৰণ্ণনায লীনত্থপ্পকাসনা.