অসঞ্ঞী নেৰসঞ্ঞীনাসঞ্ঞীৰাদৰণ্ণনা

৭৮-৮৩. অসঞ্ঞীৰাদে অসঞ্ঞভৰে নিব্বত্তসত্তৰসেন পঠমৰাদো, ‘‘সঞ্ঞং অত্ততো সমনুপস্সতী’’তি এত্থ ৰুত্তনযেন সঞ্ঞংযেৰ ‘‘অত্তা’’তি গহেত্ৰা তস্স কিঞ্চনভাৰেন ঠিতায অঞ্ঞায সঞ্ঞায অভাৰতো ‘‘অসঞ্ঞী’’তি পৰত্তো দুতিযৰাদো, তথা সঞ্ঞায সহ রূপধম্মে, সব্বে এৰ ৰা রূপারূপধম্মে ‘‘অত্তা’’তি গহেত্ৰা পৰত্তো ততিযৰাদো, তক্কগাহৰসেনেৰ চতুত্থৰাদো পৰত্তো. তস্স পুব্বে ৰুত্তনযেনেৰ অত্থো ৰেদিতব্বো. দুতিযচতুক্কেপি কসিণরূপস্স অসঞ্জাননসভাৰতায অসঞ্ঞীতি কত্ৰা অন্তানন্তিকৰাদে ৰুত্তনযেনেৰ চত্তারোপি ৰেদিতব্বা. তথা নেৰসঞ্ঞীনাসঞ্ঞীৰাদেপি নেৰসঞ্ঞীনাসঞ্ঞীভৰে নিব্বত্তসত্তস্সেৰ চুতিপটিসন্ধীসু, সব্বত্থ ৰা পটুসঞ্ঞাকিচ্চং কাতুং অসমত্থায সুখুমায সঞ্ঞায অত্থিভাৰপটিজাননৰসেন পঠমৰাদো, অসঞ্ঞীৰাদে ৰুত্তনযেন সুখুমায সঞ্ঞায ৰসেন, সঞ্জাননসভাৰতাপটিজানেন চ দুতিযৰাদাদযো পৰত্তাতি এৰং একেন পকারেন সতিপি কারণপরিযেসনস্স সম্ভৰে দিট্ঠিগতিকৰাদানং অনাদরণীযভাৰদস্সনত্থং ‘‘তত্থ ন একন্তেন কারণং পরিযেসিতব্ব’’ন্তি ৰুত্তন্তি দট্ঠব্বং. এতেসঞ্চ সঞ্ঞীঅসঞ্ঞীনেৰসঞ্ঞীনাসঞ্ঞীৰাদানং ‘‘অরোগো পরং মরণা’’তি ৰচনতো সস্সতদিট্ঠিসঙ্গহো পাকটোযেৰ.