২. আযুপ্পমাণৰণ্ণনা

১০২৬. সুপরিমজ্জিতকঞ্চনাদাসং ৰিয সোভতি ৰিজ্জোততীতি সুভো, সরীরোভাসো, তেন সুভেন কিণ্ণা ৰিকিণ্ণাতি সুভকিণ্ণা.

১০২৭. তংতংমনসিকারন্তি পরিত্তপথৰীকসিণাদিগতমনসিকারং. অপ্পনাক্খণেপীতি পি-সদ্দেন পুব্বভাগং সম্পিণ্ডেতি. ছন্দনং আরম্মণপরিযেসনং ছন্দো, কত্তুকম্যতাছন্দো. পণিধানং চিত্তট্ঠপনা পণিধি, সঞ্ঞাৰিরাগাদীহি আরম্মণস্স ৰিসেসনং তথাপৰত্তায ভাৰনায আরম্মণকরণমেৰ.

ৰিপুলং ৰুচ্চতি মহন্তং, সন্তভাৰোপি মহনীযতায মহন্তমেৰাতি আহ ‘‘ৰিপুলা ফলাতি ৰিপুলসন্তসুখাযুৰণ্ণাদিফলা’’তি.

১০২৮. যং চাতুমহারাজিকানং আযুপ্পমাণং, সঞ্জীৰে এসো একো রত্তিদিৰো, তায রত্তিযা তিংস রত্তিযো মাসো, তেন মাসেন দ্ৰাদসমাসিকো সংৰচ্ছরো, তেন সংৰচ্ছরেন পঞ্চ ৰস্সসতানি সঞ্জীৰে আযুপ্পমাণং. যং তাৰতিংসানং আযুপ্পমাণং, এসো কাল়সুত্তে একো রত্তিদিৰো…পে… তেন সংৰচ্ছরেন ৰস্সসহস্সং কাল়সুত্তে আযুপ্পমাণং. যং যামানং আযুপ্পমাণং, এসো সঙ্ঘাতে একো রত্তিদিৰো…পে… তেন সংৰচ্ছরেন দ্ৰে ৰস্সসহস্সানি সঙ্ঘাতে আযুপ্পমাণং. যং তুসিতানং আযুপ্পমাণং, রোরুৰে এসো একো রত্তিদিৰো…পে… তেন সংৰচ্ছরেন চত্তারি ৰস্সসহস্সানি রোরুৰে আযুপ্পমাণং. যং নিম্মানরতীনং আযুপ্পমাণং, মহারোরুৰে এসো একো রত্তিদিৰো…পে… তেন সংৰচ্ছরেন অট্ঠ ৰস্সসহস্সানি মহারোরুৰে আযুপ্পমাণং. যং পরনিম্মিতৰসৰত্তীনং দেৰানং আযুপ্পমাণং, তাপনে এসো একো রত্তিদিৰো…পে… তেন সংৰচ্ছরেন সোল়স ৰস্সসহস্সানি তাপনে আযুপ্পমাণং. মহাতাপনে উপড্ঢন্তরকপ্পো. অৰীচিযং একো অন্তরকপ্পো চ আযুপ্পমাণন্তি ৰদন্তি. দেৰানং অধিমুত্তকালকিরিযা ৰিয তাদিসেন পুঞ্ঞবলেন অন্তরাপি মরণং হোতীতি ‘‘কম্মমেৰ পমাণ’’ন্তি ৰুত্তন্তি ৰেদিতব্বং. এৰঞ্চ কত্ৰা অব্বুদাদিআযুপরিচ্ছেদোপি যুত্ততরো হোতীতি.

কিং ঝানন্তি অট্ঠসু ঝানেসু কতরং ঝানং. ভৰসীসানীতি ভৰগ্গানি, পুথুজ্জনভৰগ্গং অরিযভৰগ্গং সব্বভৰগ্গন্তি ৰেহপ্ফলাদীনং সমঞ্ঞা. কস্সচি সত্তাতি পুথুজ্জনস্স, কস্সচি পঞ্চাতি সোতাপন্নস্স, সকদাগামিনো চ, কস্সচি তযোতি অনাগামিনো ৰসেন ৰুত্তং. তস্মা সো ব্রহ্মকাযিকাদীহি চুতো অরূপং উপপজ্জন্তো ৰেদিতব্বো. ‘‘নৰসু ব্রহ্মলোকেসু নিব্বত্তঅরিযসাৰকানং তত্রূপপত্তিযেৰ হোতি, ন হেট্ঠূপপত্তী’’তি (ৰিভ. অট্ঠ. ১০২৮) অযং অট্ঠকথাপাঠোতি অধিপ্পাযেন ‘‘যং পনা’’তিআদি ৰুত্তং. ‘‘তত্রূপপত্তিপি হোতি উপরূপপত্তিপি, ন হেট্ঠূপপত্তী’’তি পন পাঠোতি তেন ‘‘হেট্ঠূপপত্তিযেৰ নিৰারিতা’’তিআদিৰচনেন পযোজনং নত্থি. অরূপধাতূপপত্তি চ ন নিৰারিতাতি সম্বন্ধো. অরূপধাতূপপত্তি ন নিৰারিতা ‘‘মত্থকে ঠিতোৰ পরিনিব্বাতী’’তি নিযমস্স অনিচ্ছিতত্তা.

অঞ্ঞত্থাতি কামলোকে. তত্থাতি রূপলোকে. অযং অট্ঠকথাতি ‘‘পঠমজ্ঝানভূমিযং নিব্বত্তো…পে… পরিনিব্বাতী’’তি এৰং পৰত্তা অট্ঠকথা. তেনেৰাতি যস্মা রূপধাতুযং উপপন্নো অধিপ্পেতো, ন উপপজ্জনারহো, তেনেৰ কারণেন. তস্সাতি যথাৰুত্তস্স রূপধাতুযং উপপন্নস্স অরিযসাৰকস্স. যেন রূপরাগেন তত্থ রূপভৰে উপপন্নো, তস্মিং অরূপজ্ঝানেন ৰিক্খম্ভিতে সম্মদেৰ দিট্ঠাদীনৰেসু যথা কামরূপভৰেসু আযতিং ভৰাভিলাসো ন ভৰিস্সতি, এৰং অরূপভৰেপীতি দস্সেন্তো আহ ‘‘পুন…পে… ভৰিস্সতিযেৰা’’তি. তত্থ নিব্বত্তোতি রূপধাতুযং উপপন্নো. অরিযমগ্গং ভাৰেত্ৰাতি হেট্ঠিমং অরিযমগ্গং সম্পাদেত্ৰা. নিব্বত্তভৰাদীনৰদস্সনৰসেনাতি তস্মিং রূপভৰে নিব্বত্তোপি তত্থেৰ আদীনৰদস্সনৰসেন. অনিৰত্তিতভৰাভিলাসোতি উপরি অরূপভৰে অৰিস্সট্ঠভৰপত্থনো, যতো অরূপধাতুযং উপপজ্জনারহো. তস্স ৰসেনাতি তাদিসস্স অরিযসাৰকস্স ৰসেন. ‘‘কস্সচি পঞ্চ, কস্সচি তযো অনুসযা অনুসেন্তী’’তি অযং যমকপাল়ি (যম. ২.অনুসযযমক.৩১২) পৰত্তা.

আযুপ্পমাণৰণ্ণনা নিট্ঠিতা.