১. সব্বসঙ্গাহিকৰারৰণ্ণনা

৯৭৮. ধাতুসম্ভৰ…পে… সঙ্গহিতত্তাতি এত্থ খন্ধাদীনং কামধাতুআদিধাতূসু সম্ভৰভেদভিন্নানং নিরৰসেসতো সঙ্গহিতত্তাতি ৰিভাগেন যোজনা, তথা সেসেসুপি পরিযাপন্নপভেদভিন্নানন্তিআদিনা. তত্থ ‘‘নিরৰসেসতো সঙ্গহিতত্তা’’তি ইমিনা ‘‘সব্বসঙ্গাহিকৰারো’’তি অযমস্স অত্থানুগতা সমঞ্ঞাতি দস্সেতি. যস্মা চেত্থ খন্ধাদীনং দ্ৰাদসন্নং কোট্ঠাসানং অনৰসেসসঙ্গহো, তস্মা এৰং দুতিযৰারাদীনঞ্চেত্থ অনুপ্পৰেসো ৰেদিতব্বো. খন্ধাদীনমেৰ হি তেসং সম্ভৰাদিৰিচারো উপ্পত্তানুপ্পত্তিদস্সনৰারোতি ৰত্তুং যুত্তোতি যোজনা. অনুপ্পত্তিদস্সনঞ্চেত্থ অত্থাপত্তিসিদ্ধং ৰেদিতব্বং. ন হি তত্থ ‘‘কতি খন্ধা ন পাতুভৰন্তী’’তিআদিপাল়ি অত্থি.

৯৭৯. পুচ্ছানুরূপন্তি যেনাধিপ্পাযেন পুচ্ছা কতা, তদনুরূপং. অৰিতথব্যাকরণং নাম বুদ্ধানং এৰ আৰেণিকং, অঞ্ঞেসং তং যাদিচ্ছিকং সুতক্খরসদিসন্তি আহ ‘‘সব্বঞ্ঞুৰচনং ৰিঞ্ঞায কতত্তা’’তি.

সব্বসঙ্গাহিকৰারৰণ্ণনা নিট্ঠিতা.