১. এককনিদ্দেসৰণ্ণনা

৮৪৩-৪. অত্থিপটিচ্চং নামাতি অত্থিতা পটিচ্চত্থো নাম, অসতিপি সহজাতপুরেজাতাদিভাৰে যস্মিং সতি যং হোতি, সো তস্স পচ্চযোতি কত্ৰা যথা তথা অত্থিতামত্তং ইধ পটিচ্চত্থোতি অত্থো. তং পন পটিচ্চত্থং ব্যতিরেকমুখেন পাকটতরং কাতুং ‘‘যথা’’তিআদিমাহ. তত্থ নিস্সযাদিপচ্চযভাৰেন পটিচ্চাতি ৰুত্তন্তি নিস্সযাদিপচ্চযভাৰতো পচ্চযভূতং চক্খাদি ‘‘পটিচ্চা’’তি ৰুত্তং. একিস্সা সেণিযাতি অট্ঠারসসু সেণীসু মযং অমুকায সেণিযা জাতাম্হ, ন অঞ্ঞে ৰিয অপ্পঞ্ঞাতাতি এৰমেত্থ অত্থং ৰদন্তি.

পুরতো করণং পমুখভাৰকরণং. নিধানরাসীতি নিদহিত্ৰা ঠপিতধননিচযো. যসোতি ইস্সরিযং. তং পন যেসু ৰত্ততি, তেসু পট্ঠাপকআণাকরণেহি পাকটো হোতীতি ‘‘পট্ঠাপকমদো, আণাকরণমদো’’তি চ ৰুত্তং.

৮৪৫. ৰত্থুনাতি জাতিআদিপৰত্তিহেতুনা.

৮৪৬. পতিট্ঠাভাৰোতি কুসলকম্মেসু পতিট্ঠানাভাৰো, সো পন যস্মা কুসলকিরিযায ঠানং ন হোতি, তস্মা ‘‘কুসলকরণে অট্ঠান’’ন্তি আহ. পমাদসঙ্খাতস্স অত্থস্স এৰমাদিকো পরিযাযোতি যোজনা. আদি-সদ্দেন ‘‘ৰচীদুচ্চরিতে, মনোদুচ্চরিতে চিত্তস্স ৰোস্সগ্গো, মক্খো, পল়াসো’’তি চ এৰমাদিকস্স সঙ্গহো দট্ঠব্বো. ‘‘পমাদো পমজ্জনাদী’’তিআদিকো তদত্থপ্পকাসকো, ‘‘চিত্তস্স ৰোস্সগ্গো ৰোস্সগ্গানুপ্পাদন’’ন্তিআদিকো তপ্পরিযাযপ্পকাসকো ব্যঞ্জনপরিযাযো চ অপরিযন্তোতি সম্বন্ধো. ‘‘চত্তারো খন্ধে দস্সেতী’’তি ইমিনা সতিৰোস্সগ্গাকারপ্পৰত্তা চত্তারো অকুসলক্খন্ধা পমাদোতি ৰদতি.

৮৪৭. অনিৰাতৰুত্তিতায হেতুভূতো চিত্তসম্পগ্গহো মানৰিসেসো.

৮৪৮. উত্তরভাৰো উত্তরিযং, করণেন উত্তরিযং করণুত্তরিযং, সারম্ভেন পরস্স কিরিযতো উত্তরিকিরিযা.

৮৪৯. নেরুত্তিকৰিধানেনাতি ই-কারচ্চ-কারানঞ্চ র-কারতাপাদনেন.

অত্তহিতং অত্তাতি উত্তরপদলোপেন নিদ্দেসমাহ যথা ‘‘রূপভৰো রূপং, ভীমসেনো ভীমো’’তি চ. আদিন্নো, পত্তো ৰা অত্থো অত্তাতি নিরুত্তিনযেন পদসিদ্ধি ৰেদিতব্বা.

মুদ্দিতস্সাতি অঙ্কিতস্স.

৮৫০. জানন্তস্সেৰ মহাজনস্স. উপাদানাদিপচ্চযেতি ইন্ধনুদকচীৰরাদিকে পারিপূরিহেতুকে.

৮৫১. গণ্ঠিকা সযং গণ্ঠিকরণতো. পতিরূপৰচনতো, অঞ্ঞেসং গণ্ঠিভেদতো চ গণ্ঠিভূতা.

৮৫২. অভেজ্জন্তরতায সমাসেৰিততায সুট্ঠু আসেৰিততায.

৮৫৩. চিরকালপরিভাৰিতত্তেন তেমনকরণং অল্লভাৰকরণং, লোভৰসেন অৰস্সৰনন্তি অত্থো.

এৰং সন্তে কথং খীযনন্তি নিদ্দেসোতি আহ ‘‘খীযনন্তি চা’’তিআদি.

৮৫৪. চীৰরমণ্ডনাদীনন্তি চীৰরমণ্ডনা পত্তমণ্ডনা সেনাসনমণ্ডনাতি ইমেসং. ইদানি তং ৰিসেসনভাৰং যোজেত্ৰা দস্সেতুং ‘‘চীৰরেন হী’’তিআদি ৰুত্তং.

৮৫৫. সভাগরহিতো, সভাগপটিপক্খো ৰা অসভাগো, অননুকূলানং পটিক্কূলতা ৰা. তেনাহ ‘‘মানথদ্ধতা, ৰিরোধো ৰা’’তি.

৮৫৬. সঙ্কম্পনা উক্কণ্ঠনাৰসেন অনৰট্ঠানং, অনৰধানং ৰা. তস্স তস্স আরম্মণস্স তণ্হাযনা.

৮৫৭. কাযস্সাতি নামকাযস্স. তস্মিঞ্হি অৰিপ্ফারিকে রূপকাযোপি অৰিপ্ফারিকো হোতি.

৮৬০. রাগাদীনন্তি রাগমোহঅহিরিকানোত্তপ্পৰিচিকিচ্ছাদীনং.

৮৬১. তিৰিধম্পি কুহনৰত্থুং দস্সেতুন্তি সম্বন্ধো. তত্থাতি মহানিদ্দেসে. ‘‘তত্থ কতমা কুহনা লাভসক্কারসিলোকসন্নিস্সিতস্সা’’তিআদিনা (ৰিভ. ৮৬১) ইধ খুদ্দকৰিভঙ্গে আগতং দেসনানযং নিস্সায মহানিদ্দেসদেসনা পৰত্তাতি আহ ‘‘নিস্সযভূতায ইমায পাল়িযা’’তি.

অন্তরহিতানীতি অন্তৰিকলানি ছিন্দন্তানি.

লাভসক্কারসিলোকহেতু সম্ভাৰনাধিপ্পাযেন সংযতাকারদস্সনং কোহঞ্ঞন্তি আহ ‘‘পাপিচ্ছতায নিরত্থককাযৰচীৰিপ্ফন্দনিগ্গহণং কোরজ’’ন্তি. যো সংৰেগবহুলো কুক্কুচ্চকো পুব্বেনাপরং অত্তনোপি কিরিযং পরিসঙ্কন্তো পচ্চৰেক্খমানো তিট্ঠতি, তাদিসং ৰিয অত্তানং দস্সেন্তো ‘‘অতিপরিসঙ্কিতো’’তি ৰুত্তো.

৮৬৪. পসংসামুখেন নিন্দনন্তি পসংসাৰত্থুতো খিপনং বহি ছড্ডনং যথা ‘‘অদাযকং অহো দানপতী’’তি.

৮৬৫. গৰেসনকম্মন্তি অপ্পকেন লাভেন মহন্তস্স পরিযেসনকব্যাপারো.

৮৬৬. পোক্খরং ৰুচ্চতি সুন্দরং, ৰণ্ণস্স সুন্দরভাৰো ৰণ্ণপারিপূরী হোতীতি আহ ‘‘ৰণ্ণপারিপূরী ৰা ৰণ্ণপোক্খরতা’’তি.

৮৭৯. সেয্যমানাদিনিদ্দেসেসূতি ‘‘তত্থ কতমো সেয্যস্স ‘সেয্যোহমস্মী’তি মানো’’তিআদিনা (ৰিভ. ৮৬৯) নিদ্দিট্ঠেসু নৰসু মাননিদ্দেসেসু. ‘‘সেয্যাদিপুগ্গলো’’তি ইদং তত্থ পাল়িযং সেয্যাদীনং নৰন্নং পুগ্গলানং আমট্ঠত্তা ৰুত্তং. ইধ পন পুগ্গলামসনে সতি সেয্যপুগ্গলো চ আমসিতব্বো সিযা. তেনেৰাহ ‘‘সেয্যমানভাৰেপী’’তি. সেয্যমানভাৰেপীতি পি-সদ্দো আকড্ঢকো অসেয্যমাননিদ্দেসেপি পুগ্গলামসনস্স কতত্তা. যস্স কস্সচীতি সেয্যাদীসু যস্স কস্সচি পুগ্গলস্স.

৮৮০. পুরিমমানস্সাতি পুব্বে পৰত্তস্স সদিসমানস্স, হীনমানস্স ৰা, সদিসমানৰসেনেৰ পন পাল়ি আগতা.

৮৮১. ‘‘মিগানং কোত্থুকো অন্তো, পক্খীনং পন ৰাযসো’’তি (জা. ১.৩.১৩৫) ৰচনতো আহ ‘‘পক্খিজাতীসু ৰাযসো অন্তো লামকো’’তি.

৮৮২. ৰিরাগন্তি অরহত্তং.

৮৮৩. মানসম্পযুত্তচ্ছন্দো তণ্হাছন্দো. মানসভাৰং অনুগতো সেয্যাদিতো সম্পগ্গণ্হনৰসেন পৰত্তো মানসম্পযুত্তকত্তুকম্যতাছন্দো ৰা মানচ্ছন্দো.

৮৮৪. তত্থাতি তস্মিং ৰিলম্বনে নিপ্ফাদেতব্বে. যুত্তং অনুচ্ছৰিকং. মুত্তং ৰিস্সট্ঠং. সিলিট্ঠং সহিতং, অত্থদ্ৰযৰিভাৰকং ৰা.

৮৮৮. অনুদ্দযস্সেৰাতি মেত্তাযন্তস্স ৰিয অনুকম্পন্তস্স ৰিয ৰিকপ্পনাতি আহ ‘‘সহনন্দিতাদিকস্সা’’তি, মেত্তাদিপতিরূপেন পৰত্তগেহসিতসিনেহস্সাতি অত্থো. তেনাহ ‘‘তাদিসো রাগো’’তি. অত্থো যুজ্জতীতি এৰম্পি ‘‘তত্থা’’তি পাল়িপদস্স অত্থো যুজ্জতি. পরানুদ্দযতাহেতুকো হি পরানুদ্দযতাসহিতো সো ৰিতক্কোতি.

৮৯০. কামগুণপারিপূরিযা যেভুয্যেন লোকো সম্ভাৰেতীতি আহ ‘‘অনৰঞ্ঞত্তত্থমেৰ কামগুণে চ পত্থেতী’’তি.

এককনিদ্দেসৰণ্ণনা নিট্ঠিতা.