১৬. ঞাণৰিভঙ্গো

১. এককমাতিকাদিৰণ্ণনা

৭৫১. সম্পযুত্তানং নিস্সযপচ্চযতায, আরম্মণস্স পৰত্তিট্ঠানতায ওকাসট্ঠো ৰেদিতব্বো. নহেতাদীতি আদি-সদ্দেন ‘‘অহেতুকা’’তিআদিকং সব্বং একৰিধেন ঞাণৰত্থুং সঙ্গণ্হাতি. একং নহেতূতি নহেতুতায একং পঞ্চৰিঞ্ঞাণং নহেতূতি ৰুত্তা তেসং নহেতুতা. একন্তাহেতুভাৰেন হি তে একপ্পকারাৰাতি. অঞ্ঞম্পীতি অহেতুকাদি. অৰিতথসামঞ্ঞযুত্তন্তি তেনেৰ অহেতুকতাদিনা যথাভূতেন সমানভাৰেন যুত্তং. ঞাণারম্মণন্তি ঞাণস্স আরম্মণং যথাৰুত্তপঞ্চৰিঞ্ঞাণাদি. ৰত্থুৰিভাৰনাতি পঞ্চৰিঞ্ঞাণাদিকস্স ঞাণৰত্থুস্স যথাৰুত্তৰিসেসেন ৰিভাৰনা পকাসনা পঞ্ঞা.

ওসানদুকস্সাতি ‘‘অত্থজাপিকা পঞ্ঞা, জাপিতত্থা পঞ্ঞা’’তি ইমস্স দুকস্স. দুকমাতিকা ধম্মসঙ্গণিযং ৰুত্তদুকমাতিকাতি আহ ‘‘দুকমাতিকং অনিস্সাযা’’তি.

‘‘চিন্তামযা পঞ্ঞা’’তিআদিকা তিকমাতিকং অনিস্সায ৰুত্তাতি আহ ‘‘এৰং তিকানুরূপেহীতি এত্থাপি দট্ঠব্ব’’ন্তি. যদিপি জাপ-সদ্দো ব্যত্তৰচনে, মানসে চ পৰত্ততি, জননত্থেপি পন দট্ঠব্বোতি দস্সেন্তো আহ ‘‘অনেকত্থত্তা ধাতুসদ্দান’’ন্তিআদি. কুসলপঞ্ঞা ৰিপাকসঙ্খাতস্স, কিরিযপঞ্ঞা পরিকম্মাদিভূতা অত্তনা নিব্বত্তেতব্বফলসঙ্খাতস্স অত্থস্স নিব্বত্তনতো অত্থজাপিকাতি ৰুত্তাতি আহ ‘‘অত্থজাপিকা কারণগতা পঞ্ঞা’’তি. ৰিপাকপঞ্ঞা, কিরিযপঞ্ঞা চ সহজাতাদিপচ্চযৰসেন তংতংৰিপাকাদিঅত্থং জাপেতি জনেতীতি আহ ‘‘জাপিতো জনিতো অত্থো এতিস্সাতি জাপিতত্থা’’তি. সতিপি সহজাতানং পচ্চযভাৰে ৰিপাককিরিযপঞ্ঞা ন কুসলা ৰিয ৰিপাকানং নিপ্পরিযাযেন কারণৰোহারং লভতীতি আহ ‘‘কারণপঞ্ঞাসদিসী’’তি. ৰিভাৰনত্থেন পঞ্ঞা আরম্মণং ৰিয সম্পযুত্তেপি পকাসেতিযেৰাতি ৰুত্তং ‘‘ফলপ্পকাসনভূতা’’তি. যতো সা আলোকোভাসপজ্জোতপরিযাযেহি ৰিভাৰিতা.

১০. দসকমাতিকাৰণ্ণনা

৭৬০. ‘‘জাতিপচ্চযা জরামরণন্তি ঞাণং, অসতি জাতিযা নত্থি জরামরণন্তি ঞাণং. অতীতম্পি অদ্ধানং জাতিপচ্চযা জরামরণন্তি ঞাণং, অসতি জাতিযা নত্থি জরামরণন্তি ঞাণং. অনাগতম্পি অদ্ধানং জাতিপচ্চযা জরামরণন্তি ঞাণং, অসতি জাতিযা নত্থি জরামরণন্তি ঞাণং. যম্পিস্স তং ধম্মট্ঠিতিঞাণং, তম্পি খযধম্মং ৰযধম্মং ৰিরাগধম্মং নিরোধধম্মন্তি ঞাণং. ভৰপচ্চযা…পে… অৰিজ্জাপচ্চযা সঙ্খারা…পে… নিরোধধম্ম’’ন্তি (সং. নি. ২.৩৪) এৰমাগতানি সত্তসত্ততি ঞাণানি. ‘‘জরামরণে ঞাণং, জরামরণসমুদযে ঞাণং, জরামরণনিরোধে ঞাণং, জরামরণনিরোধগামিনিযা পটিপদায ঞাণং. জাতিযা ঞাণং…পে… সঙ্খারেসু ঞাণং…পে… পটিপদায ঞাণ’’ন্তি (সং. নি. ২.৩৩) এৰমাগতানি চতুচত্তারীসং ঞাণানি. সুতমযঞাণাদীনি অনাৰরণঞাণপরিযোসানানি পটিসম্ভিদামগ্গে (পটি. ম. মাতিকা ১.১ আদযো) আগতানি তেসত্ততি ঞাণানি. তেনাহ ‘‘তেসত্ততি পন…পে… ন সংযুত্তকে’’তি. ‘‘সংযুত্তকে’’তি ৰা ইদং ‘‘সত্তসত্ততি ঞাণানী’’তি ইমিনা সম্বন্ধিতব্বং, ন ‘‘তেসত্ততী’’তি ইমিনা. অঞ্ঞত্থ নিক্খেপকণ্ডাদীসু. যথা সম্মাপটিৰেধাভাৰতো মিচ্ছাঞাণাদি থুসরাসিম্হি নিখাতখাণুকো ৰিয আরম্মণে চঞ্চলং হোতি, ন এৰং হোতি যথাভূতাৰবোধকং ঞাণন্তি আহ ‘‘যাথাৰপটিৰেধতো সযঞ্চ অকম্পিয’’ন্তি. অধিবলকরণং উপত্থম্ভনন্তি তং পুগ্গলে আরোপেন্তো আহ ‘‘পুগ্গলঞ্চ…পে… করোতী’’তি. ৰিসভাগধম্মেসু ৰা অকম্পিযত্থো, সভাগধম্মেসু উপত্থম্ভনত্থো ৰেদিতব্বো.

অভিমুখং গচ্ছন্তীতি ‘‘উপগচ্ছন্তী’’তি পদস্স অত্থৰচনং. উপগমনঞ্চেত্থ সব্বঞ্ঞুতায পটিজাননমেৰাতি ৰুত্তং ‘‘পটিজাননৰসেনা’’তি. অট্ঠ ৰা পরিসা উপসঙ্কমন্তীতি এত্থাপি পটিজাননৰসেন সব্বঞ্ঞুতন্তি যোজেতব্বং. অট্ঠসু পরিসাসু দস্সিতঅকম্পিযঞাণযুত্তোতি সম্বন্ধো.

ফলসম্পত্তিপৰত্তীতি সপ্পুরিসূপনিস্সযাদীনং কারণসম্পত্তীনং ফলভূতায পতিরূপদেসৰাসঅত্তসম্মাপণিধিআদিসম্পত্তিযা পৰত্তনং. আদি-সদ্দেন সুত্তসেসা সঙ্গহিতা. তত্থ সপ্পুরিসূপনিস্সযাদিকে. কস্মা পনেত্থ সমানে অত্থকিচ্চে পটিৰেধঞাণস্স ৰিয দেসনাঞাণস্সাপি যাৰ অরহত্তমগ্গা উপ্পজ্জমানতা ন ৰুত্তাতি চোদনং সন্ধাযাহ ‘‘পটিৰেধনিট্ঠত্তা’’তিআদি. পটিৰেধনিট্ঠত্তাতি পটিৰেধস্স পরিযোসানত্তা. তেনাতি পটিৰেধপরিযোসানভূতেন অরহত্তমগ্গঞাণেন. তদধিগমেন হি সম্পত্তসকলসব্বঞ্ঞুগুণো ভগৰা অনন্তপটিভানো অনুপমায বুদ্ধলীল়ায ধম্মং দেসেতুং সমত্থো অহোসি. ‘‘পটিলদ্ধস্সাপী’’তি ইমিনা সব্বথা লভাপকস্স পটিৰেধানুরূপতা দেসনাঞাণস্স অসক্কুণেয্যাতি দীপেতি, তেন চ পটিৰেধনমত্তেনেত্থ অত্থসিদ্ধীতি দস্সেতি. তেনাহ ‘‘দেসনাঞাণস্সা’’তিআদি.

হানভাগিযধম্মন্তি ৰা হানভাগিযভাৰস্স কারণং. কামসহগতসঞ্ঞাদিধম্মন্তি কামগুণারম্মণং সঞ্ঞামনসিকারাদিং. পুব্বেৰ কতাভিসঙ্খারাদিন্তি ‘‘চন্দে ৰা সূরিযে ৰা এত্তকং গতে ৰুট্ঠহিস্সামী’’তিআদিনা সমাপজ্জনতো পুব্বে পৰত্তচিত্তাভিসঙ্খারপরিকম্মাদিং.

তদভাৰগ্গহণেনাতি কিলেসাৰরণাভাৰগ্গহণেন. ঠিতিন্তি অত্থিভাৰং. তব্বিপরীতাযাতি ‘‘নত্থি দিন্ন’’ন্তিআদিকায মিচ্ছাদিট্ঠিযা. ঠানাভাৰন্তি অপ্পৰত্তিং, নত্থিভাৰং ৰা. উপরীতি ইমিস্সা বলানং অনুক্কমকথায উপরি অনন্তরমেৰ. ৰিপাকাৰরণাভাৰদস্সনাদিকস্সাতি আদি-সদ্দেন কম্মাৰরণাভাৰদস্সনং সঙ্গণ্হাতি. ইতরন্তি অধিগমস্স অট্ঠানদস্সনং. তংসহিতানং ধাতূনন্তি রাগাদিসহিতানং সভাৰানং. ৰেমত্ততা চ তেসং পচ্চযৰিসেসসিদ্ধেন অৰত্থাদিৰিসেসেন ৰেদিতব্বা. চরিযাহেতূনন্তি রাগাদিচরিযাকারণভূতানং ধম্মানং.

১. এককনিদ্দেসৰণ্ণনা

৭৬১. অযং ৰিসেসোতি সমানেপি নযদ্ৰযস্স তেসং অহেতুভাৰাদিদীপনে একস্স হেতুভাৰাদিপটিসেধতা, ইতরস্স রাসন্তরাসঙ্গহোতি ইদং নানাকরণং. একায জাতিযাতি আদাননিক্খেপপরিচ্ছিন্নস্স একস্স ভৰস্স. তদন্তোগধতাযাতি গতিঅন্তোগধতায. তত্থ তত্থাতি তংতংগতিচুতিভৰেসু.

৭৬২. তথাতি অঞ্ঞদ্ৰারারম্মণতায. খীরাদীনং…পে… ৰিলক্খণতাতি যথা খীরস্স দধিভাৰেন, দধিনো তক্কভাৰেন ৰিলক্খণতাপত্তি, ন এৰং পঞ্চৰিঞ্ঞাণানং নহেতুভাৰাদিতো অঞ্ঞস্স সভাৰাপত্তি অত্থীতি অত্থো.

৭৬৩. মহত্তেপীতি পুথুত্তেপি. বহুভাৰৰাচকো হি অযং মহা-সদ্দো ‘‘মহাজনো’’তিআদীসু ৰিয রূপসঙ্ঘাটস্স অধিপ্পেতত্তা. অঞ্ঞথা সভাৰধম্মস্স কা মহন্ততা, সুখুমতা ৰা. চক্খুৰিঞ্ঞাণস্স ৰচনং কত্ৰা ৰুত্তত্তা আহ ‘‘চক্খুপসাদে মম ৰত্থুম্হী’’তি. ইস্সরিযট্ঠানন্তি ইস্সরিযপৰত্তনট্ঠানং. তথা হি নং অঞ্ঞত্থ ভাৰিতং ৰিভাৰেন্তমেৰ তিট্ঠতি, অঞ্ঞৰিঞ্ঞাণানি চ তেন দিন্ননযানেৰ তত্থ পৰত্তন্তি, অপি দিব্বচক্খুঞাণং, যতো তং অন্ধস্স ন নিপ্ফজ্জতি.

৭৬৪. ৰৰত্থিতানম্পীতি অঞ্ঞমঞ্ঞং অসংকিণ্ণানম্পি. পটিপাটিনিযমো নিযতানুপুব্বিকতা. তেনাতি ‘‘অব্বোকিণ্ণা’’তি ৰচনেন.

৭৬৬. আৰট্টনভাৰো আৰজ্জনকিচ্চতা.

তেসন্তি রূপাদীনং. এতেসঞ্হি রূপাদীনং পঞ্চহি ৰিঞ্ঞাণেহি সমাগমো. অভিনিপতিতব্বানি আলম্বিতব্বানি, ৰিজানিতব্বানীতি অত্থো. তেনাহ ‘‘আরম্মণকরণেন পটিৰিজানিতব্বানী’’তি. কুসলাকুসলচেতনায, তংসম্পযুত্তানঞ্চ যথাৰুত্তানং ‘‘মনোপুব্বঙ্গমা…পে… অকুসলং ৰা’’তি (ৰিভ. অট্ঠ. ৭৬৬) এৰং ৰুত্তানং পটিৰিজানিতব্বানং পটিৰিজাননন্তি সম্বন্ধো. কম্মত্থে হি এতং সামিৰচনং. সহজপুব্বঙ্গমধম্মেনাতি দস্সনাদীহি সহজাতফস্সাদিনা পুব্বঙ্গমেন আৰজ্জনাদিনা. কিচ্চন্তরন্তি দস্সনাদিকিচ্চতো অঞ্ঞং সম্পটিচ্ছনাদিকিচ্চং.

অৰিপাকভাৰেন কারণেন, তেন ৰা সদ্ধিং. অঞ্ঞন্তি রূপভাৰাদিং. ভাসনকরণকরাতি ৰিঞ্ঞত্তিসমুট্ঠাপনৰসেন পৰত্তকুসলাকুসলচিত্তুপ্পাদধম্মা. তে এৰ কাযঙ্গৰাচঙ্গং অচোপেত্ৰা পৰত্তা তংসদিসা. পুব্বঙ্গমপটিৰিজাননন্তি পুব্বঙ্গমভাৰেন ৰিজাননং মনোদ্ৰারিকজৰনানং পুরেচরভাৰেন গহণং. তত্থাতি পঞ্চদ্ৰারে. ‘‘ন পটিসিদ্ধ’’ন্তি ৰত্ৰা স্ৰাযমপ্পটিসেধো সামত্থিযলদ্ধোতি দস্সেতুং ‘‘ন কাযকম্মং…পে… অনুঞ্ঞাতত্তা’’তি ৰুত্তং. ‘‘তথা’’তি ইদং যথা কাযৰচীকম্মপট্ঠপনং, এৰং কুসলাদিধম্মসমাদানম্পি নত্থীতি উপসংহরণত্থং ৰেদিতব্বং. যদি ন ভৰতো চৰতি, কথং পঞ্চদ্ৰারে চুতি ৰুত্তাতি আহ ‘‘ন পঞ্চদ্ৰারিক…পে… অতংদ্ৰারিকত্তা’’তি. তস্সা পাল়িযা. আপাথমত্তন্তি আপাথগমনমত্তং আরম্মণপচ্চযভাৰমত্তং. অঞ্ঞন্তি ‘‘রূপং নীল’’ন্তি এৰমাদিধম্মৰিসেসং. তেনাহ ‘‘ধম্মসভাৰ’’ন্তি. রূপন্তি চ ন গণ্হাতীতি রূপারম্মণম্পি সমানং ‘‘রূপং নামেত’’ন্তি ন গণ্হাতি. তথা চাহু একে ‘‘চক্খুৰিঞ্ঞাণসমঙ্গী নীলং ৰিজানাতি, নো তু নীল’’ন্তি. রূপনীলাদিআকারো রূপারম্মণরূপাদানাকারপঞ্ঞত্তি. তজ্জাপঞ্ঞত্তি হেসা যথা অনিচ্চতাদি. সাতিসযং সৰিতক্কসৰিচারত্তা. ততো অঞ্ঞন্তি সদ্দারম্মণতো অঞ্ঞং নামপঞ্ঞত্তিআরম্মণং, অঞ্ঞথা সহুপ্পত্তিপটিসেধো ন সম্ভৰেয্যাতি অধিপ্পাযো.

মনোদ্ৰারেপীতি ন পঞ্চদ্ৰারেযেৰ দুতিযে মোঘৰারে, অথ খো মনোদ্ৰারেপি. আৰজ্জনং দ্ৰত্তিক্খত্তুং…পে… দট্ঠব্বং একচিত্তক্খণিকস্স আৰজ্জনস্স উপ্পত্তিযং তথা অসম্ভৰতো.

তস্সাতি যাথাৰকৰত্থুৰিভাৰনায পঞ্ঞায.

এককনিদ্দেসৰণ্ণনা নিট্ঠিতা.

২. দুকনিদ্দেসৰণ্ণনা

৭৬৭. অধিকরণেসূতি পদত্থেসু. অঞ্ঞত্র সভাৰং গহেত্ৰাতি অত্থসদ্দস্স তত্থ পৰত্তনাকারদস্সনং, তেন অত্থসদ্দস্স সভাৰত্থতং দস্সেতি. অধিকরণৰসেন লিঙ্গপরিৰত্তিং গচ্ছতি. ‘‘অভিধেয্যানুরূপং লিঙ্গৰচনানী’’তি হি সদ্দৰিদূ ৰদন্তি.

দুকনিদ্দেসৰণ্ণনা নিট্ঠিতা.

৩. তিকনিদ্দেসৰণ্ণনা

৭৬৮. পরিপাচিতেসূতি সাধিতেসু. ‘‘ৰিহিতেসূ’’তি এত্থ দুদ্ধাদীসু ৰিয ভূতকালতা নাধিপ্পেতাতি আহ ‘‘ৰিসযৰিসেসনমত্তমেৰা’’তি. ‘‘কম্মং, সিপ্প’’ন্তি পঞ্ঞা কারণূপচারেন ৰুত্তাতি আহ ‘‘পঞ্ঞা এৰ ৰা…পে… ৰেদিতব্বা’’তি.

কুসলং কম্মং সকং একন্তং হিতসুখাৰহত্তা. তপ্পটিপক্খত্তা ইতরং অকুসলং কম্মং নোসকং. সচ্চপটিৰেধানুলোমনং সচ্চানুলোমনং ৰুত্তন্তি আহ ‘‘তপ্পটিৰেধপচ্চযভাৰেনা’’তি. মগ্গসচ্চস্স অনুলোমনতো ৰা সচ্চানুলোমিকতা, তথা পরমত্থসচ্চস্স অনুলোমনতো. তেনাহ অট্ঠকথাযং ‘‘মগ্গসচ্চস্সা’’তিআদি. পঞ্ঞা ৰুত্তা পঞ্ঞাৰিসযে পঞ্ঞাকিচ্চস্স দস্সিতত্তা. ‘‘যোগৰিহিতেসূ’’তিআদিনা ৰুত্তভূমিনিদ্দেসো, ‘‘কম্মস্সকতং সচ্চানুলোমিক’’ন্তি ৰুত্তসরূপনিদ্দেসো, ‘‘রূপং অনিচ্চ’’ন্তিআদিনা ৰুত্তপ্পকারনিদ্দেসো চ যথাৰুত্তা…পে… নিদ্দেসা. ‘‘যোগৰিহিতেসু কম্মাযতনেসু খন্তিং, কম্মস্সকতং খন্তিং, ‘রূপং অনিচ্চ’ন্তি খন্তি’’ন্তিআদিনা খন্তিআদিপদেহি যোজেতব্বা. ওলোকনং পচ্চক্খকরণং. ধম্মা ওলোকনং খমন্তীতি পঞ্ঞায তদোলোকনসমত্থতমাহ.

৭৬৯. মুঞ্চতীতি পজহতি. আরব্ভ-কিরিযায অধিট্ঠানং সমঙ্গিভাৰো, অধিকরণং পট্ঠপনন্তি আহ ‘‘মুঞ্চ…পে… ৰত্তুং যুত্ত’’ন্তি.

৭৭০. পঞ্চসীলদসসীলানি কম্মৰট্টেকদেসভূতানি সন্ধায তেসং ধম্মট্ঠিতিযং সমৰরোধো ৰুত্তো. সতিপি সৰনেতি ‘‘ইধ, ভিক্খৰে, অরিযসাৰকো পাণাতিপাতা পটিৰিরতো’’তিআদিনা (অ. নি. ৮.৩৯; কতা. ৪৮০) তথাগততো সৰনে সতিপি. ভিক্খুআদীনম্পি তং ৰুত্তং অধিসীলপঞ্ঞাপনং ৰিয ন বুদ্ধাৰেণিকন্তি.

অধিপঞ্ঞানিব্বত্তেসূতি ঠপেত্ৰা অধিপঞ্ঞং তদঞ্ঞেসু মগ্গফলধম্মেসু. তদধিট্ঠানেসূতি তস্সা অধিপঞ্ঞায অধিট্ঠানেসু ৰিপস্সনাধম্মেসু.

৭৭১. অপাযুপ্পাদনং অৰড্ঢিনিব্বত্তনং. তস্মিংযেৰ ঠানেতি তস্মিংযেৰ খণে.

তিকনিদ্দেসৰণ্ণনা নিট্ঠিতা.

৪. চতুক্কনিদ্দেসৰণ্ণনা

৭৯৩. পরিতস্সনং পরিত্তাসো, চিত্তুত্রাসো চাতি ‘‘ন পরিতস্সতী’’তি পদস্স ‘‘ন পত্থেতি ন উত্তসতী’’তি অত্থমাহ.

৭৯৬. অরিযসচ্চেসু ধম্মসদ্দো ‘‘দিট্ঠধম্মো’’তিআদীসু ৰিয. অরিযমগ্গো, তস্স চ ফলং ধম্মো যথানুসিট্ঠং পটিপন্নে অপাযেসু অপতমানে ধারেতীতি. তত্থ পঞ্ঞাতি তস্মিং অরিযমগ্গফলে নিস্সযভূতে পঞ্ঞা. তেনাহ ‘‘তংসহগতা’’তি. অৰিদিতং ৰিদিতং ৰিয নেতি ঞাপেতীতি নযো, অনুমানং, তস্স নযনং পৰত্তনং, তং পন ৰিসুংযেৰেকং ঞাণুপ্পাদনন্তি আসঙ্কায নিৰত্তনত্থমাহ ‘‘ন অঞ্ঞ…পে… ৰিসেসো’’তি. অত্তনো হি অধিগমানুসারেন পরাধিগতানং কালত্তযে মগ্গাদীনং পৰত্তিআকারানুমানং নযনযনং. অনুমিননাকারমেৰ হিস্স সন্ধায ৰুত্তং ‘‘ঞাণস্সেৰ পৰত্তিৰিসেসো’’তি. কারণঞ্চ নযনযনস্স সচ্চেসু পচ্চক্খপৰত্তনতো. ‘‘তথা’’তি ইমিনা যথা মগ্গঞাণতো অঞ্ঞাপি ‘‘ইমিনা ধম্মেনা’’তি ৰত্তুং যুত্তং, তথা পকারন্তরেনপি ‘‘ইমিনা ধম্মেন ঞাণেনা’’তি এত্থ অত্থো যুজ্জতীতি ইমমত্থং উপসংহরতি. তেনাতি তস্মা ঞাণেন ঞাততো সম্পযোগেহি নযনযনতো. ঞাণৰিসযভাৰেনাতি পটিৰেধঞাণস্স ৰিসযভাৰেন. ঞাতেন পটিৰিদ্ধেন চতুসচ্চধম্মেন, ঞাণসম্পযোগেন ৰা ঞাতেন জানিত্ৰা ঠিতেন মগ্গফলধম্মেন.

সব্বেন সব্বন্তি সব্বপ্পকারেন সব্বং, অনৰসেসন্তি অত্থো. অদ্ধত্তযপরিযাপন্নঞ্হি সব্বং তেভূমকসঙ্খারগতং সম্মসীযতি. নযনতোতি নযগ্গাহতো. অনুরূপত্থৰাচকো ৰা কারণসদ্দো ‘‘কারণং ৰদতী’’তিআদীসু ৰিয.

অন্ৰযঞাণস্সপি পরিযোগাহেত্ৰা পৰত্তনতো সৰিসেসো ৰিসযাৰবোধোতি ৰুত্তং ‘‘ধম্মে ঞাণ…পে… অভাৰা’’তি. ৰিসযোভাসনমত্তজাননসামঞ্ঞেনাতি অসতিপি অভিসমেচ্চ গহণে ৰিসযৰিভাৰনসঙ্খাতঅৰবোধসামঞ্ঞমত্তেন. ‘‘ঞাণ’’ন্তি সম্মতেসূতি ‘‘ঞাণ’’ন্তি ৰোহরিতেসু লদ্ধঞাণৰোহারেসু. সম্মুতিৰসেনাতি ধম্মঞাণাদি ৰিয সমুখেন ৰিসযে অপ্পৰত্তিত্ৰা পঞ্ঞত্তিমুখেন পৰত্তং. অৰসেসন্তি সম্মুতিঞাণমেৰাহ. ইতরঞাণত্তযৰিসভাগন্তি ধম্মঞাণাদিঞাণত্তযৰিধুরং.

৭৯৭. কামভৰধম্মেতি কামভৰসঙ্খাতে ধম্মে.

৭৯৮. সাতি পঠমজ্ঝানপঞ্ঞা. ৰীতরাগভাৰনাৰত্থস্সাতি ‘‘ৰীতরাগো হোতী’’তি এৰং ৰুত্তস্স. তন্তি ছট্ঠাভিঞ্ঞং. মগ্গঞাণঞ্হি কিচ্চতো মগ্গসচ্চম্পি পটিৰিজ্ঝতি. ইতরাতি হেট্ঠিমমগ্গপঞ্ঞা. তদুপনিস্সযত্তাতি তস্সা ছট্ঠাভিঞ্ঞায, তস্স ৰা পটিৰিজ্ঝনস্স উপনিস্সযত্তা পটিৰিজ্ঝতি নাম. যথানুরূপন্তি দিট্ঠাসৰাদীনং যথানুরূপং. আসৰক্খযেতি আসৰক্খযপরিযাযে কারণূপচারেন. তংনিব্বত্তনতোতি তস্স আসৰক্খযসঙ্খাতস্স ফলস্স নিব্বত্তনতো. ইদঞ্চ ‘‘আসৰানং খযে ঞাণং ছট্ঠাভিঞ্ঞা’’তি সুত্তে আগতত্তা ৰুত্তং.

৮০১. অভিৰিসিট্ঠেন ৰা ঞাণেন পাকটং করোন্তস্সাতি অধিগমৰসেন পকাসং ৰিভূতং করোন্তস্স.

৮০২. ৰসিতাপঞ্চকরহিতং ৰসিভাৰং অপাপিতং পটিলদ্ধমত্তং. পটিপদারম্মণসহগতা পঞ্ঞা পটিপদারম্মণসম্বন্ধিনীতি আহ ‘‘পঞ্ঞায পটিপদারম্মণুদ্দেসেনা’’তি.

চতুক্কনিদ্দেসৰণ্ণনা নিট্ঠিতা.

৫. পঞ্চকনিদ্দেসৰণ্ণনা

৮০৪. তমেৰ পঞ্ঞং ‘‘দ্ৰীসু ঝানেসু পঞ্ঞা পীতিফরণেনা’’তিআদিনা ৰিভজতি. অভিসন্দনপরিসন্দনপরিপূরণানিপি পরিপ্ফরণং ৰিয ফরণাপীতিযা, তংসহগতসুখস্স চ কিচ্চৰিসেসভূতানি অধিপ্পেতানীতি আহ ‘‘অভিসন্দেতীতি…পে… ৰেদিতব্ব’’ন্তি. আদিনা নযেনাতি ‘‘অভিসন্দেতী’’তিআদিনা (দী. নি. ১.২২৬; ম. নি. ১.৪২৭) সুত্তে আগতনযেন. ফরণঞ্চেত্থ পীতিসুখসমুট্ঠিতপণীতরূপেহি কাযস্স অভিব্যাপনং দট্ঠব্বং. আরম্মণেতি পীতিফরণতাসুখফরণতাসীসেন ৰুত্তানং তিকদুকঝানানং আরম্মণে. তাতি পীতিফরণতাসুখফরণতা.

সমাধিমুখেনাতি সমাধিং মুখং পমুখং কত্ৰা, সমাধিসীসেনাতি অত্থো, সমাধিপমুখেন ৰা উদ্দেসনিদ্দেসেন. অঞ্ঞে কিলেসা দিট্ঠিমানাদযো. অপ্পযোগেনাতি ঝানৰিমোক্খাদীনং ৰিয উপ্পাদনীযপরিকম্মপযোগেন ৰিনা. আৰজ্জনাসদিসো হি ফলসমাপত্তিঅত্থো সম্মসনচারো. ঠপিতত্তাতি পৰত্তিতত্তা. সতিবহুলতাযাতি সতিযা অভিণ্হুপ্পত্তিযা. পরিচ্ছিন্দনসতিযা কালস্স সতোতি দস্সেতীতি যোজনা.

পঞ্চকনিদ্দেসৰণ্ণনা নিট্ঠিতা.

৬. ছক্কনিদ্দেসৰণ্ণনা

৮০৫. ৰিসুদ্ধিভাৰন্তি ৰিসুদ্ধিযা সব্ভাৰং. ‘‘দিব্বচক্খুঞাণেকদেসত্তা’’তি ইদং তস্স পরিভণ্ডঞাণত্তা ৰুত্তং. তথা হি পাল়িযং ‘‘সত্তানং চুতূপপাতঞাণায চিত্তং অভিনীহরতি অভিনিন্নামেতী’’তি (দী. নি. ১.২৪৭) আরভিত্ৰা ‘‘সো দিব্বেন চক্খুনা ৰিসুদ্ধেনা’’তিআদি (দী. নি. ১.২৪৬) ৰুত্তং. দিব্বস্স তিরোহিতৰিপ্পকট্ঠাদিভেদস্স, ইতরস্স চ রূপাযতনস্স দস্সনসমত্থস্সাপি দিব্বচক্খুঞাণস্স সিখাপত্তি চৰমানোপপজ্জমানসত্তদস্সনন্তি আহ ‘‘মুদ্ধপ্পত্তেন চা’’তিআদি.

ছক্কনিদ্দেসৰণ্ণনা নিট্ঠিতা.

৭. সত্তকনিদ্দেসৰণ্ণনা

৮০৬. ছব্বিধম্পি পচ্চৰেক্খণঞাণন্তি ‘‘জাতিপচ্চযা জরামরণন্তি ঞাণ’’ন্তিআদিনা (ৰিভ. ৮০৬) ৰুত্তং পটিচ্চসমুপ্পাদঙ্গানং পচ্চৰেক্খণৰসেন পৰত্তঞাণং. সহ গহেত্ৰাতি একজ্ঝং গহেত্ৰা ৰিপস্সনারম্মণভাৰসামঞ্ঞেন একত্তেন গহেত্ৰা. সঙ্খিপিত্ৰা ৰুত্তেনাতি পুব্বে ছধা ৰুত্তং ৰিয দস্সিতং ধম্মট্ঠিতিঞাণন্তি এৰং সঙ্খিপিত্ৰা ৰুত্তেন. ‘‘খযধম্ম’’ন্তিআদিনা পকারেন দস্সনন্তি সম্বন্ধো. পৰত্তঞাণস্সাতি ‘‘জাতিপচ্চযা জরামরণ’’ন্তিআদিনা পৰত্তস্স ঞাণস্স, পৰত্তে ৰা সংসারৰট্টে ঞাণস্স. ঞাণারম্মণা ৰিপস্সনা ঞাণৰিপস্সনা. ৰিপস্সনাতি চ ‘‘জাতিপচ্চযা জরামরণ’’ন্তিআদিনা পচ্চযপচ্চযুপ্পন্নধম্মে ৰিভাগেন দস্সনতো ধম্মট্ঠিতিঞাণং ইধাধিপ্পেতং. তস্স খযধম্মতাদিজাননং পটিৰিপস্সনা. তেনাহ ‘‘ৰিপস্সনাপটিৰিপস্সনাদস্সনমত্ত’’ন্তি.

এৰমেত্থ অট্ঠকথাধিপ্পাযৰসেন পাল়িযা অত্থং দস্সেত্ৰা ইদানি অত্তনো অধিপ্পাযৰসেন দস্সেতুং ‘‘পাল়িযং পনা’’তিআদিমাহ. সব্বত্থাতি অদ্ধত্তযে পচ্চযৰিসেসেন পচ্চযুপ্পন্নৰিসেসনিদ্ধারণে. ঞাণৰচনেনাতি ‘‘জাতিপচ্চযা জরামরণ’’ন্তিআদিনা ঞাণস্স গহণেন. অঙ্গানন্তি সত্তসত্ততিযা অঙ্গানং. ইতিসদ্দেনাতি ‘‘নিরোধধম্ম’’ন্তি এত্থ ৰুত্তইতিসদ্দেন. পকাসেত্ৰাতি ঞাণস্স পৰত্তিআকারং জোতেত্ৰা. তেন ধম্মট্ঠিতিঞাণতো অঞ্ঞংযেৰ পরিযোসানে ৰুত্তং ঞাণন্তি দস্সেতি. তেনাহ ‘‘ৰিপস্সনাঞাণং সত্তমং ঞাণ’’ন্তি. অযমেৰ চেত্থ অত্থো যুত্তোতি দস্সেন্তো ‘‘ন হী’’তিআদিমাহ. তত্থ ‘‘তম্পি ঞাণন্তি সম্বন্ধো ন হোতী’’তি এৰং সম্বন্ধো ন যুত্তো অঙ্গন্তরভাৰস্স অৰিভাৰনতোতি অত্থো. তেন ৰুত্তং ‘‘তংঞাণ…পে… অনধিপ্পেতত্তা’’তি. ন হি ৰিসুং ৰিসুং ৰুত্তমেৰ একজ্ঝং ৰচনমত্তেন অত্থন্তরং হোতীতি. ‘‘খযধম্মং…পে… চা’’তি ইমিনা পুরিমস্মিং পক্খে উপচযেন দোসমাহ.

সত্তকনিদ্দেসৰণ্ণনা নিট্ঠিতা.

৮. অট্ঠকনিদ্দেসৰণ্ণনা

৮০৮. পচ্চনীকধম্মেতি নীৰরণাদিপচ্চনীকধম্মে. দুক্খন্তি সমাপজ্জনে অসতি উপ্পজ্জনকদুক্খং.

অট্ঠকনিদ্দেসৰণ্ণনা নিট্ঠিতা.

১০. দসকনিদ্দেসো

পঠমবলনিদ্দেসৰণ্ণনা

৮০৯. ন ঠানন্তি অট্ঠানং, অনুপলব্ভনত্থো অযমকারোতি আহ ‘‘অৰিজ্জমানং ঠানং অট্ঠান’’ন্তি. অভাৰত্থো ৰা, ন অঞ্ঞপটিপক্খাদিঅত্থোতি আহ ‘‘নত্থি ঠানন্তি ৰা অট্ঠান’’ন্তি. কো পনেতস্স অত্থদ্ৰযস্স ৰিসেসোতি? পঠমো হেতুপচ্চযেহি অনুপলব্ভমানতং ৰদতি, দুতিযো সব্বেন সব্বং অভাৰন্তি অযমেতেসং ৰিসেসো. তণ্হুপাদানাদীনম্পি সুখতো উপগমনস্স হেতুভাৰে দিট্ঠিৰিপল্লাসস্স সো সাতিসযো অসুখেপি দল়্হং পৰত্তাপনতোতি আহ ‘‘দিট্ঠিৰিপল্লাসোৰ…পে… অধিপ্পেত’’ন্তি. ‘‘অত্তদিট্ঠিৰসেনা’’তি কস্মা ৰিসেসেত্ৰা ৰুত্তং, ননু অরিযসাৰকস্স সব্বাপি দিট্ঠিযো নত্থীতি? সচ্চং নত্থি, অত্তদিট্ঠিসন্নিস্সযা পন সব্বদিট্ঠিযোতি দস্সেতুং ‘‘অত্তদিট্ঠিৰসেনাতি পধানদিট্ঠিমাহা’’তি ৰুত্তং. ভেদানুরূপস্স ৰত্থুনো. ভেদানুরূপেন ‘‘অধম্মে ধম্মো’’তিআদিনযপ্পৰত্তেন.

সো এৰাতি যো লিঙ্গে অপরিৰত্তে তস্মিং অত্তভাৰে ভৰঙ্গজীৰিতিন্দ্রিযপ্পবন্ধো, সো এৰ. তঞ্হি উপাদায একজাতিসমঞ্ঞা, ন চেত্থ ভাৰকলাপজীৰিতিন্দ্রিযস্স ৰসেন চোদনা কাতব্বা তদঞ্ঞস্সেৰ অধিপ্পেতত্তা. তঞ্হি তত্থ অৰিচ্ছেদৰুত্তিযা পবন্ধৰোহারং লভতি, ইতরম্পি ৰা ভাৰানুপালনতাসামঞ্ঞেনাতি অনোকাসাৰ চোদনা.

সপত্তৰসেন যোজেতব্বন্তি ‘‘সপত্তং মারেমীতি অভিসন্ধিনা সপত্তেন নিপন্নট্ঠানে নিপন্নং মনুস্সভূতো মনুস্সভূতং মাতরং পিতরং ৰা মারেন্তো’’তিআদিনা যোজেতব্বং. সব্বত্থাতি চতূসুপি ৰিকপ্পেসু. পুরিমং অভিসন্ধিচিত্তন্তি পুব্বভাগিযো মরণাধিপ্পাযো. অপ্পমাণং তেন অত্থসিদ্ধিযা অভাৰতো. পুথুজ্জনস্সেৰ তং দিন্নং হোতীতি এত্থ যথা অরহত্তং পত্ৰা পরিভুত্তম্পি পুথুজ্জনকালে দিন্নং পুথুজ্জনদানমেৰ হোতি, এৰং মরণাধিপ্পাযেন পুথুজ্জনকালে পহারে দিন্নে অরহত্তং পত্ৰা তেনেৰ পহারেন মতে কস্মা অরহন্তঘাতোযেৰ হোতি, ন পুথুজ্জনঘাতোতি? ৰিসেসসম্ভৰতো. যথা হি দানং দেয্যধম্মস্স পরিচ্চাগমত্তেন হোতি, ন এৰং ৰধো. সো হি পাণো, পাণসঞ্ঞিতা, ৰধকচেতনা, উপক্কমো, তেন মরণন্তি ইমেসং পঞ্চন্নং অঙ্গানং পারিপূরিযাৰ হোতি, ন অপারিপূরিযা. তস্মা অরহত্তং পত্তস্সেৰ মরণন্তি অরহন্তঘাতোযেৰ হোতি, ন পুথুজ্জনঘাতো. যস্মা পন ‘‘ইমং মারেমী’’তি যং সন্তানং আরব্ভ মারণিচ্ছা, তস্স পুথুজ্জনখীণাসৰভাৰেন পযোগমরণক্খণানং ৰসেন সতিপি সন্তানভেদে অভেদোযেৰ. যদা চ অত্থসিদ্ধি, তদা খীণাসৰভাৰো. তস্মা অরহন্তঘাতোৰ হোতীতি নিচ্ছিতং. কথং পনেত্থ ৰধকচেতনা ৰত্তমানৰিসযা সিযাতি আহ ‘‘ৰধকচিত্তং পচ্চুপ্পন্নারম্মণম্পি…পে… পৰত্ততী’’তি. তত্থ পবন্ধৰিচ্ছেদৰসেনাতি যেন পবন্ধো ৰিচ্ছিজ্জতি, তাদিসং পযোগং নিব্বত্তেতীতি অত্থো. তেন যদা পবন্ধৰিচ্ছেদো, তদা অরহাতি যথাৰুত্তং অরহন্তঘাতং পতিট্ঠাপেতি. ন এৰন্তি যথা কালন্তরাপেক্খকিচ্চসিদ্ধং ৰধকচিত্তং, ন এৰং চাগচেতনা. ‘‘সা হী’’তিআদিনা চাগচেতনায কালন্তরানপেক্খকিচ্চসিদ্ধিতংযেৰ ৰিভাৰেতি. অঞ্ঞসককরণন্তি অত্ততো ৰিনিমোচেত্ৰা অঞ্ঞস্স দক্খিণেয্যস্স সন্তকভাৰকরণং. তস্সাতি চজিতব্বস্স ৰত্থুনো. যস্সাতি যস্স পুথুজ্জনস্স. তস্সেৰ তং দিন্নং হোতি, সচেপি অরহত্তং পত্ৰা তেন পরিভুত্তন্তি অত্থো.

‘‘কপ্পৰিনাসে’’তি ইদং ‘‘সণ্ঠহন্তে কপ্পে’’তি ৰুত্তত্তা মহাকপ্পৰিনাসং সন্ধায ৰুত্তন্তি আহ ‘‘কপ্পট্ঠকথায ন সমেতী’’তি এত্থ আযুকপ্পস্স অধিপ্পেতত্তা. আযুকপ্পো চেত্থ অৰীচিযং নিব্বত্তসত্তানং অন্তরকপ্পপরিমাণং পরমাযু ৰেদিতব্বং. তঞ্হি সন্ধায ‘‘একং কপ্পং অসীতিভাগে কত্ৰা ততো একভাগমত্তং কাল’’ন্তি (কথা. অট্ঠ. ৬৫৪-৬৫৭) ৰুত্তং. তযিদং ‘‘একং কপ্প’’ন্তি যদি একং মহাকপ্পন্তি অত্থো, তথা সতি ৰীসতিঅন্তরকপ্পপরিমাণো একো অসঙ্খ্যেয্যকপ্পোতি ৰুত্তং হোতি. অথ একং অসঙ্খ্যেয্যকপ্পন্তি অত্থো, সব্বথাপি ‘‘চতুসট্ঠি অন্তরকপ্পা’’তি ৰচনেন ৰিরুজ্ঝতীতি ৰীমংসিতব্বং. যথা পন কপ্পট্ঠকথায অযং অট্ঠকথা সমেতি, তং দস্সেতুং ‘‘কপ্পৰিনাসেযেৰাতি পনা’’তিআদিমাহ.

পকতত্তো ৰা অপারাজিকো. সমানসংৰাসকো কম্মলদ্ধীনং ৰসেন অনানাসংৰাসকোতি এৰমেত্থ অত্থো ৰেদিতব্বো.

নিযতস্স পুগ্গলস্স ৰিজ্জমানতং পটিসেধেত্ৰাতি যোজনা. তত্থ পটিসেধেত্ৰাতি ‘‘পুগ্গলো পন নিযতো নাম নত্থী’’তি এৰং পটিসেধেত্ৰা. তত্থ কারণমাহ ‘‘মিচ্ছত্তসম্মত্তনিযতধম্মানং ৰিয সভাৰতো’’তি. পঞ্ঞত্তিমত্তঞ্হেতং মিচ্ছত্তসম্মত্তনিযতধম্মনিস্সযং, যদিদং নিযতো পুগ্গলোতি. যথাপুচ্ছিতন্তি ‘‘কিং পুব্বহেতু নিযমেতী’’তিআদিনা পুচ্ছিতপ্পকারং নিযামকহেতুং. যেনাতি যেন উপরিমগ্গত্তযৰিপস্সনাঞাণেন. নিযতানিযতভেদন্তি সোতাপন্নাদিনিযতভেদং, সত্তক্খত্তুপরমাদিঅনিযতভেদঞ্চ. সোতাপন্নো এৰ হি একো সত্তক্খত্তুপরমো নাম হোতি, একো কোলংকোলো নাম, একো একবীজী নামাতি সোতাপন্নস্স নিযতভাৰো ৰুত্তোতি আহ ‘‘সোতাপন্নো চ নিযতো’’তি. ব্যতিরেকত্থো হি অযং চ-সদ্দো. ততো পুব্বেতি সোতাপত্তিমগ্গতো পুব্বে. ‘‘পুব্বহেতুকিচ্চং নত্থী’’তি ইদং সোতাপন্নস্স নিযততায ৰুত্তত্তা ৰক্খমানঞ্চ দোসং হদযে ঠপেত্ৰা ৰুত্তং. উপরিমগ্গানং সউপনিস্সযত্তে পঠমমগ্গস্সাপি সউপনিস্সযতা সিদ্ধা এৰাতি চোদনং সন্ধাযাহ ‘‘যদি হী’’তিআদি. তঞ্চ নিযতত্তং. অস্সাতি সোতাপত্তিমগ্গস্স.

তেনেৰ খীণাতি সোতাপত্তিমগ্গেনেৰ খীণা. কারণুপচ্ছেদেন হি ফলুপচ্ছেদো সিযা. ততোতি সত্তক্খত্তুপরমাদিতো. সাতি সত্তক্খত্তুপরমাদিতা. পৰত্তিতোতি ৰিপাকপ্পবন্ধতো. তেনাতি সোতাপত্তিমগ্গেন. ৰুট্ঠানেতি ৰুট্ঠানে সতি. কারণেন ৰিনা ফলং নত্থীতি আহ ‘‘সক্কায…পে… ভৰিতব্ব’’ন্তি. ‘‘নামকরণনিমিত্ততো’’তি ইমিনা নামকরণহেতুতায নিযামকতং ৰিভাৰেতি একবীজিআদিসমঞ্ঞানং অন্ৰত্থসঞ্ঞাভাৰতো. তেনাহ ‘‘ৰিপস্সনা…পে… সন্ধায ৰুত্ত’’ন্তি.

আদি-সদ্দেন ‘‘একোম্হি সম্মাসম্বুদ্ধো, সীতীভূতোস্মি নিব্বুতো’’তিআদীনি (মহাৰ. ১১; কথা. ৪০৫; ম. নি. ১.২৮৫) সঙ্গয্হন্তি. এত্থ চ ‘‘সদিসো মে ন ৰিজ্জতি, একোম্হি সম্মাসম্বুদ্ধো (মহাৰ. ১১; কথা. ৪০৫; ম. নি. ১.২৮৫). ‘অত্থেতরহি অঞ্ঞে সমণা ৰা ব্রাহ্মণা ৰা ভগৰতা সমসমা সম্বোধিয’ন্তি এৰং পুট্ঠো অহং, ভন্তে, ‘নো’তি ৰদেয্য’’ন্তিআদি (দী. নি. ৩.১৬১) ৰচনেহি ইমিস্সা লোকধাতুযা ৰিয অঞ্ঞস্স বুদ্ধস্স অঞ্ঞিস্সা লোকধাতুযা উপ্পাদো নিৰারিতোতি দট্ঠব্বং. ন হি ৰিজ্জমানে ‘‘সদিসো মে ন ৰিজ্জতী’’তিআদি সক্কা ৰত্তুং. যং পন ৰদন্তি ‘‘লোকধাতুৰিসেসাপেক্খায ৰুত্ত’’ন্তি, তম্পি নত্থি তথা ৰিসেসনস্স অভাৰতো, বুদ্ধানুভাৰস্স চ অসমত্থভাৰৰিভাৰনতো. আণাখেত্তকিত্তনঞ্চেত্থ ধম্মতাদস্সনত্থং. সক্কোতি হি ভগৰা যত্থ যত্থ ইচ্ছতি, তত্থ তত্থ আণং ৰত্তেতুং. ‘‘একিস্সা লোকধাতুযা’’তি চ ইদং বুদ্ধখেত্তভূতায লোকধাতুযা দস্সনত্থং ৰুত্তং. তত্থাযমত্থো – বুদ্ধখেত্তভূতা একাৰাযং লোকধাতু. তত্থ একস্মিং কালে একো এৰ সম্মাসম্বুদ্ধো উপ্পজ্জতীতি. তেনাহ ‘‘বুদ্ধখেত্ত…পে… অধিপ্পাযো’’তি.

তস্মাতি যস্মা উপসম্পদাধীনং পাতিমোক্খং, উপসম্পদা চ পব্বজ্জাধীনা, তস্মা. পাতিমোক্খে সিদ্ধে, সিদ্ধাসু তাসু পব্বজ্জূপসম্পদাসু. ততো পরং ৰিনট্ঠং নাম হোতীতি পচ্ছিমপটিৰেধতো পরং পটিৰেধসাসনং, পচ্ছিমসীলভেদতো চ পরং পটিপত্তিসাসনং ৰিনট্ঠং নাম হোতীতি সাসনভাৰসামঞ্ঞেন পন উভযং একজ্ঝং কত্ৰা দস্সেন্তো ‘‘পচ্ছিম…পে… একতো কত্ৰা’’তি আহ.

পরিদেৰনকারুঞ্ঞন্তি পরিদেৰনেন করুণাযিতব্বতা করুণাযনা.

ধম্মানং সভাৰৰিসেসো ন সক্কা ধারেতুং, যতো পারমীপৰিচযাদীসু উদকপরিযন্তং কত্ৰা মহাপথৰীকম্পো অহোসি, অভিসম্বোধিদিৰসে চ ঠপেত্ৰা পুব্বুত্তরদিসাভাগে বোধিরুক্খমূলে ভূমিভাগো মহাপুরিসং ধারেতুং নাসক্খি, অঞ্ঞদত্থু একপস্সে পক্খিত্তঅতিভারভরিতনাৰা ৰিয চক্কৰাল়গব্ভো ৰিপরিৰত্তো. ‘‘সমুপ্পাদিকা’’তি ৰত্তব্বে স-কারে অ-কারস্স আ-কারো, একস্স চ প-কারস্স লোপো কতোতি দস্সেন্তো আহ ‘‘সমং উদ্ধং পজ্জতীতি সামুপাদিকা’’তি. সমং উপাদিযতীতি ৰা সমুপাদা, সমুপাদা এৰ সামুপাদিকা, সমুপাহিনীতি অত্থো.

সন্ততিখণৰসেনাতি সন্ততিৰসেন আযূহনসমঙ্গিতা, সপুব্বপচ্ছাভাগস্স গহণৰসেন চেতনাক্খণৰসেন চেতনাসমঙ্গিতাতি যোজেতব্বা. একস্মিং উপট্ঠিতে পচ্চযৰসেন তদঞ্ঞস্স উপট্ঠানং পরিৰত্তনং.

পঠমবলনিদ্দেসৰণ্ণনা নিট্ঠিতা.

দুতিযবলনিদ্দেসৰণ্ণনা

৮১০. ভোগে ভুঞ্জিতুং ন জানাতি, ৰিনাসেতীতি যোজনা.

লহুপরিৰত্তিতায জীৰিতস্সাতি অধিপ্পাযো.

ন অদাসি পযুত্তৰাচায উপ্পন্নন্তি অধিপ্পাযেন.

সম্মাপযোগেনাতি সম্মাপটিপত্তিযা.

দুতিযবলনিদ্দেসৰণ্ণনা নিট্ঠিতা.

পঞ্চমবলনিদ্দেসৰণ্ণনা

৮১৩. ধাতুসভাৰোতি ভূতাদিসঙ্খাতধাতূনং সভাৰো. সভাগৰসেন ফলভূতেন. অজ্ঝাসযধাতুপরিচ্ছিন্দনতোতি অজ্ঝাসযসভাৰস্স ‘‘হীনং, পণীত’’ন্তি ৰা পরিচ্ছিজ্জ জাননতো, ৰুট্ঠিনিমিত্তেন ৰিয মহোঘেন উপরিমেঘৰুট্ঠিযা.

পঞ্চমবলনিদ্দেসৰণ্ণনা নিট্ঠিতা.

ছট্ঠবলনিদ্দেসৰণ্ণনা

সদ্দত্থো সম্ভৰতি সমাসন্তেনেৰ তথা সদ্দসিদ্ধিতো. তেসন্তি পরোপরানং ৰিসদাৰিসদানং সদ্ধাদিইন্দ্রিযানং. এৰঞ্চ কত্ৰাতি আসযাদিতো ইন্দ্রিযপরোপরিযত্তস্স, ইন্দ্রিযপরোপরিযত্ততো চ অধিমুত্তিভেদস্স ৰিসিট্ঠসভাৰত্তা এৰ.

৮১৫. ‘‘কে পন তে অরিযাৰাসা’’তি পুচ্ছিত্ৰা তে সুত্তেনেৰ দস্সেন্তো ‘‘ইধ, ভিক্খৰে’’তিআদিপাল়িং আহরিত্ৰা ‘‘এৰং ৰুত্তা’’তি নিগমেত্ৰা পুন মগ্গাধিগমেনেৰ তেসং অধিগমং দস্সেন্তো ‘‘এতেসূ’’তিআদিমাহ. তত্থ ইতরেতি ছল়ঙ্গসমন্নাগমএকারক্খাসঙ্খাযপটিসেৰনাদযো.

৮১৬. আরম্মণসন্তানানুসযনেসূতি আরম্মণানুসযনং, সন্তানানুসযনন্তি দ্ৰীসু অনুসযনেসু. যথা হি মগ্গেন অসমুচ্ছিন্নো রাগো কারণলাভে উপ্পজ্জনারহো থামগতট্ঠেন সন্তানে অনুসেতীতি ৰুচ্চতি, এৰং ইট্ঠারম্মণেপীতি তস্স আরম্মণানুসযনং দট্ঠব্বং. তং পনস্স অনুসযনং উপ্পত্তিযা পাকটং হোতীতি দস্সেতুং অট্ঠকথাযং ‘‘যথা নামা’’তিআদি (ৰিভ. অট্ঠ. ৮১৬) ৰুত্তং. ‘‘আচিণ্ণসমাচিণ্ণা’’তি এতেন ইট্ঠারম্মণে রাগস্স চিরপরিভাৰনং ৰিভাৰেতি. যস্মা পন এৰং চিরপরিভাৰিতং পরিৰেঠেত্ৰা ৰিয ঠিতং হোতি, তস্মা ‘‘সমন্ততো ৰেঠেত্ৰা ৰিয ঠিতভাৰেন অনুসযিততং দস্সেতী’’তি ৰুত্তং. তথা হি উদকে নিমুগ্গসদিসো উদাহটো. ‘‘সব্বেপি তেভূমকা ধম্মা কামনীযট্ঠেন কামা’’তিআদিপাল়িৰসেন ভৰরাগস্সাপি ৰত্থুকামতা ৰেদিতব্বা. রাগৰসেনাতি আরম্মণরজ্জনৰসেন.

৮১৮. ইন্দ্রিযৰিসেসো ৰিনেয্যানং ইন্দ্রিযপরোপরিযত্তং.

৮১৯. পহাতব্বেন উপদ্দুতনিরোধনত্থং পহাযকং পরিযেসতীতি পঠমং পহাতব্বং, পচ্ছা পহাযকন্তি অযং পহাতব্বপজহনক্কমো পহানক্কমপদেন ৰুত্তো. যস্সাতি পহাতব্বস্স. তন্তি পহাতব্বং. পঠমং ৰুচ্চতীতি পহানৰিচারণানং পঠমং ৰুচ্চতি. ততো পচ্ছা অপ্পহাতব্বং যথা তং দস্সনত্তিকাদীসু.

৮২৬. তন্তি ভৰঙ্গং. তস্সাতি লোকুত্তরস্স. পাদকন্তি অন্তিমভৰিকস্স ভৰঙ্গং সন্ধাযাহ.

ছট্ঠবলনিদ্দেসৰণ্ণনা নিট্ঠিতা.

সত্তমবলনিদ্দেসৰণ্ণনা

৮২৮. সমাপন্নোম্হীতি মঞ্ঞতীতি অত্থো.

সমাধি ৰা তস্স আরম্মণভূতং কম্মট্ঠানং ৰা চিত্তমঞ্জূসাতি যোজনা. ঠপেতুন্তি যথাপরিচ্ছিন্নং কালং সমাপত্তিচিত্তং পৰত্তেতুং.

তেহীতি সঞ্ঞামনসিকারেহি. তংসভাৰতাতি কামাদিদুতিযজ্ঝানাদিঅনুপক্খন্দনসভাৰতা. পগুণৰোদানং পগুণভাৰসিদ্ধা ঝানস্স পটিপক্খতো ৰিসুদ্ধি.

সত্তমবলনিদ্দেসৰণ্ণনা নিট্ঠিতা.

দসমবলনিদ্দেসৰণ্ণনা

৮৩১. পঞ্ঞাৰ ৰিমুত্তীতি রাগাদীহি ৰিমুত্তিভূতা পঞ্ঞাৰ ৰিমুত্তীতি যোজনা. কম্মন্তরস্স ৰিপাকন্তরমেৰাতি অত্থো ৰিপাকন্তরজাননস্সেৰ দুতিযবলকিচ্চত্তা, কম্মন্তরজাননস্স চ ততিযবলকিচ্চত্তা. বলসদিসতন্তি একচ্চবলসদিসতং. কস্মা পনেত্থ বলঞাণকিচ্চে ৰুচ্চমানে ঝানাদিঅবলঞাণং উদাহটন্তি চোদনং সন্ধাযাহ ‘‘যদিপী’’তিআদি. তদন্তোগধন্তি তস্মিং ঝানাদিপচ্চৰেক্খণাসভাৰে সত্তমবলঞাণে অন্তোগধং. এৰন্তি ঝানাদিঞাণং ৰিয. অপ্পেতুং, ৰিকুব্বিতুঞ্চাতি অত্তনা ৰুত্তাকারং সন্ধাযাহ. সমুদযপ্পহানাদিএকচ্চঞাণকিচ্চম্পি অকরোন্তং সব্বঞ্ঞুতঞ্ঞাণং কথমপ্পনাদিকং ঝানাদিকিচ্চং করেয্য, বলঞাণেহি পন জানিতব্বং, ততো উত্তরিঞ্চ জানন্তম্পি যস্মা একচ্চবলকিচ্চং ন করোতি, তস্মা অঞ্ঞানেৰ বলঞাণানি, অঞ্ঞং সব্বঞ্ঞুতঞ্ঞাণন্তি দস্সনত্থং ‘‘এতেসং পন কিচ্চং ন সব্বং করোতী’’তিআদি (ৰিভ. অট্ঠ. ৮৩১) অট্ঠকথাযং ৰুত্তং. তত্থ যথা সব্বঞ্ঞুতঞ্ঞাণং অবলকিচ্চং একচ্চং ন করোতি, এৰং বলকিচ্চম্পীতি উদাহরণদস্সনৰসেন ‘‘তঞ্হি ঝানং হুত্ৰা অপ্পেতু’’ন্তিআদি ৰুত্তন্তি দস্সেতুং ‘‘অথ ৰা…পে… দট্ঠব্ব’’ন্তি ৰুত্তং.

দসমবলনিদ্দেসৰণ্ণনা নিট্ঠিতা.

ঞাণৰিভঙ্গৰণ্ণনা নিট্ঠিতা.