১৪. সিক্খাপদৰিভঙ্গো

১. অভিধম্মভাজনীযৰণ্ণনা

৭০৩. সিক্খাসঙ্খাতানং কুসলধম্মানং পঞ্চ সীলঙ্গানি নিস্সযভাৰেন ৰা পতিট্ঠা সিযুং, উপনিস্সযভাৰেন ৰাতি তদুভযং দস্সেন্তো আহ ‘‘সম্পযোগৰসেন, উপনিস্সযৰসেন চ ওকাসভাৰেনা’’তি.

৭০৪. ‘‘কম্মপথা এৰা’’তি নিযমস্স কতত্তা ৰুত্তং ‘‘অসব্বসাধারণেসূ’’তি. ন হি সক্কা ইন্দ্রিযাদিসাধারণকোট্ঠাসৰসেন নিযমং কাতুং. কম্মপথকোট্ঠাসিকা এৰ, ন ঝানাদিকোট্ঠাসিকা. কম্মপথভাৰেন আগতন্তি ৰদন্তি, দুগ্গতিযা, তত্থ উপ্পজ্জনদুক্খস্স চ পৰত্তিউপাযভাৰতোতি অধিপ্পাযো. অস্স সুরাপানস্স. উপকারকত্তং সব্বেসং. সভাগত্তং মিচ্ছাচারস্স.

তথাগহিতসঙ্খারারম্মণতাযাতি ‘‘সত্তং অৰহরামি, সত্তে ৰিপ্পটিপজ্জামী’’তিআদিনা সত্তাকারেন গহিতসঙ্খারারম্মণতায, ন পন সত্তপঞ্ঞত্তিআরম্মণতাযাতি অধিপ্পাযো. ‘‘পঞ্চ সিক্খাপদা’’তিআদিনা তমেৰত্থং ৰিৰরতি.

তস্স তস্সাতি যস্স যস্স ব্যসনত্থায. সযং ৰা উসুআদিং খিপতি, ওপাতখণনাদিং করোতি, তাদিসং মন্তং পরিজপ্পতি, কম্মজইদ্ধিং ৰল়ঞ্জেতি, অঞ্ঞেন ৰা তং সব্বং কারেতীতি আহ ‘‘নিস্সগ্গিয…পে… দ্ৰে এৰ গহিতা’’তি.

যদিপি কোট্ঠাসৰারে ৰিরতি সরূপেন নাগতা ‘‘যেৰাপনা’’ত্ৰেৰ ৰুত্তা, ভজাপিযমানা পন মগ্গভাৰংযেৰ ভজতীতি আহ ‘‘ৰিরতিসীলং পন মগ্গকোট্ঠাসিক’’ন্তি. সেসসীলানন্তি সেসঅৰীতিক্কন্তসীলানং.

৭১২. অভব্বট্ঠানাতি পাণাতিপাতাদযো. যথা পাণাতিপাতাদযো ৰেরহেতুতায ৰেরং, এৰং তদঞ্ঞেপি অকুসলাতি ৰুত্তং ‘‘তংসভাগতায ৰেরভূতান’’ন্তি. ৰিরতীনং উপ্পত্তি ন ন ভৰিস্সতি সেক্খানন্তি যোজনা. ‘‘অকুসলসমুট্ঠিতানি চা’’তিআদিনাপি সেক্খানং উভযেন ৰিরতিসব্ভাৰংযেৰ ৰিভাৰেতি. তস্সত্থো – যানি অকুসলসমুট্ঠিতানি কাযকম্মাদীনি, তানি তেসং সেক্খানং কাযদুচ্চরিতাদীনীতি ৰেরানিযেৰ, তেহি ৰেরেহি তেসং সেক্খানং ৰিরতিযো সম্ভৰন্তিযেৰ. যতোতি যস্মা পাণাতিপাতাদিৰিরমিতব্বনিপ্পরিযাযৰেরাভাৰেপি কাযদুচ্চরিতাদিৰেরমত্ততো সেক্খানং ৰিরতিসম্ভৰতো. নফলভূতস্সাপীতি যথা ফলস্স মগ্গপটিবিম্বভূতত্তা মগ্গসদিসং সত্তঅট্ঠঙ্গিকতা সিযা, এৰং অফলভূতস্সাপি সকদাগামিমগ্গাদিকস্স যতো ৰিরতিসম্ভৰতো অট্ঠঙ্গিকতা হোতি, অঞ্ঞথা পঞ্চঙ্গিকো এৰ সিযাতি অধিপ্পাযো.

অভিধম্মভাজনীযৰণ্ণনা নিট্ঠিতা.

২. পঞ্হপুচ্ছকৰণ্ণনা

৭১৪. যথাৰিরমিতব্বতোতি যো যো পাণাতিপাতাদি ৰিরমিতব্বো, ততো ৰিরতিৰসেন.

পঞ্হপুচ্ছকৰণ্ণনা নিট্ঠিতা.

সিক্খাপদৰিভঙ্গৰণ্ণনা নিট্ঠিতা.