১১. মগ্গঙ্গৰিভঙ্গো

২. অভিধম্মভাজনীযৰণ্ণনা

৪৯০. অভিধম্মেতি ধম্মসঙ্গহে. সো হি নিব্বত্তিতাভিধম্মদেসনা, ন ৰিভঙ্গদেসনা ৰিয সুত্তন্তনযৰিমিস্সা. অরিযোপপদতং ন করোতি ৰিনাপি তেনস্স অরিযভাৰসিদ্ধিতো. তেনাহ অট্ঠকথাযং ‘‘যথা হী’’তিআদি.

৪৯৩. ‘‘লোকিযকালেনা’’তি ইদং পুব্বভাগভাৰনানুভাৰেন কিচ্চাতিরেকসিদ্ধীতি দস্সনত্থং ৰুত্তং. এতেসন্তি সম্মাদিট্ঠিআদীনং. অপ্পহানে, পহানে চ আদীনৰানিসংসৰিভাৰনাদিনা ৰিসেসপ্পচ্চযত্তা সম্মাদিট্ঠিআদীনি মিচ্ছাৰাচাদীনি পজহাপেন্তীতি ৰুত্তানি. মিচ্ছাৰাচাদিতো নিৰত্তি সম্মাৰাচাদিকিরিযাতি ৰুত্তং ‘‘সম্মাৰাচাদিকিরিযা হি ৰিরতী’’তি. সম্মাদিট্ঠিআদযো ৰিয ন কারাপকভাৰেন, তংসমঙ্গীপুগ্গলো ৰিয ন কত্তুভাৰেন. লোকুত্তরক্খণেপীতি ন কেৰলং লোকিযক্খণেযেৰ, অথ খো লোকুত্তরক্খণেপি.

খন্ধোপধিং ৰিপচ্চতীতি পটিসন্ধিদাযিকং সন্ধাযাহ. তত্থ ৰিপচ্চতীতি পৰত্তিৰিপাকদাযিকং.

একেকন্তি ‘‘তত্থ কতমা সম্মাদিট্ঠী’’তিআদিনা একেকং অঙ্গং পুচ্ছিত্ৰা. তস্স তস্সেৰাতি একেকঅঙ্গস্সেৰ, ন অঙ্গসমুদাযস্স. সহ পন পুচ্ছিত্ৰাতি ‘‘তত্থ কতমো পঞ্চঙ্গিকো মগ্গো’’তি পুচ্ছিত্ৰা. একতো ৰিস্সজ্জনপটিনিদ্দেসত্তাতি যদিপি ‘‘তত্থ কতমা সম্মাদিট্ঠি? যা পঞ্ঞা’’তিআদিনা (ৰিভ. ৪৯৫) ৰিস্সজ্জনং কতং, ‘‘তত্থ কতমো পঞ্চঙ্গিকো মগ্গো’’তি (ৰিভ. ৪৯৪) পন একতো কতায পুচ্ছায ৰিস্সজ্জনৰসেন পটিনিদ্দেসভাৰতো ন পাটিযেক্কং পুচ্ছাৰিস্সজ্জনং নাম হোতি. কস্মা পনেত্থ পঞ্চঙ্গিকৰারে এৰ পাটিযেক্কং পুচ্ছাৰিস্সজ্জনং কতং, ন অট্ঠঙ্গিকৰারেতি চোদনং সন্ধাযাহ ‘‘তত্থা’’তিআদি. একেকমুখাযাতি সম্মাদিট্ঠিআদিমুখায. তেন ৰুত্তং ‘‘অরিযং ৰো, ভিক্খৰে, সম্মাদিট্ঠিং দেসেস্সামি সউপনিসং সপরিক্খার’’ন্তিআদি (সং. নি. ৫.২৮). পুব্বসুদ্ধিযা সিজ্ঝন্তি. তথা হি ৰুত্তং ‘‘পুব্বেৰ খো পনস্স কাযকম্মং ৰচীকম্মং আজীৰো সুপরিসুদ্ধো হোতী’’তি (ম. নি. ৩.৪৩১), তস্মা সম্মাৰাচাদিমুখা ভাৰনা নত্থীতি অধিপ্পাযো. তেনাহ ‘‘ন মগ্গস্স উপচারেনা’’তি.

অভিধম্মভাজনীযৰণ্ণনা নিট্ঠিতা.

মগ্গঙ্গৰিভঙ্গৰণ্ণনা নিট্ঠিতা.