(৮.) অট্ঠকনিদ্দেসৰণ্ণনা

৯৫২. ‘‘কম্মং খো মে কত্তব্বং ভৰিস্সতী’’তিআদিনা ওসীদনাকারেন পৰত্তচিত্তুপ্পাদা কোসজ্জকারণানি, কোসজ্জমেৰ ৰা কোসজ্জন্তরকারণতায কোসজ্জকারণানীতি দট্ঠব্বানি. মাসাচিতং মঞ্ঞেতি এত্থ আচিত-সদ্দো তিন্ত-সদ্দস্স, মঞ্ঞে-সদ্দো চ ৰিয-সদ্দস্স অত্থং ৰদতীতি অধিপ্পাযেন ‘‘তিন্তমাসো ৰিযা’’তি অযমত্থো ৰিভাৰিতো, মাসচযো ৰিযাতি ৰা অত্থো.

৯৫৭. ফরতীতি ফুসতি, ঘট্টেতীতি অত্থো. অঞ্ঞেন কারণেনাতি ‘‘অজ্জ তযা ৰিকালে ভুত্তং, তেন ত্ৰং আপত্তিং আপন্নোসী’’তি ৰুত্তো ‘‘হিয্যো মযা কালে ভুত্তং, তেনাহং অনাপন্নো’’তিআদিনা অঞ্ঞেন অযুত্তেন কারণেন অঞ্ঞং যুত্তং কারণং পটিচ্ছাদেতীতি অত্থো. পুচ্ছিতত্থতো বহিদ্ধা যথা তং ন অল্লীযতি, তথা কথায অপনযনং ৰিক্খিপনং বহিদ্ধা অপনামনা.

৯৫৮. অসঞ্ঞীৰাদাতি পুগ্গলেহি দিট্ঠিযো দস্সেতি. যেহি ৰা অভিনিৰেসেহি অসঞ্ঞী অত্তানং ৰদন্তি, তে অসঞ্ঞীৰাদা. অরূপসমাপত্তিনিমিত্তন্তি আকাসাদিং.

অট্ঠকনিদ্দেসৰণ্ণনা নিট্ঠিতা.