(১০.) দসকনিদ্দেসৰণ্ণনা

৯৭০. জালক্খিপসংৰিধানাদিকুসলতাসঙ্কপ্পনং উপাযচিন্তা, তস্সা মিচ্ছাভাৰপটিচ্ছাদনভাৰেন পৰত্তো তদাকারো মোহো উপাযচিন্তাৰসেন উপ্পন্নোতি দট্ঠব্বো. যথাকতে পন পাপে অনাদীনৰদস্সনৰসেন পৰত্তা সঞ্ঞা, সঙ্কপ্পো ৰা পচ্চৰেক্খণা, তস্সাপি মিচ্ছাভাৰপটিচ্ছাদকং তদাকারং, অনাদীনৰদস্সনং ৰা পচ্চৰেক্খণাকারেন উপ্পন্নো মোহোতি. ৰিমুত্তসঞ্ঞিতাতি অধিমানসম্পযুত্তং, তিত্থিযানং ৰা অত্তনো দিট্ঠিযা ৰিমুত্ততাসঞ্জাননং. ‘‘ৰিমুত্তোম্হী’’তি এৰং পৰত্তো অকুসলচিত্তুপ্পাদো মিচ্ছাৰিমুত্তীতি কেচি ৰদন্তি. ফলং ৰিয ৰিমুত্তন্তি গহিতে পন দিট্ঠিসম্পযুত্তচিত্তে দিট্ঠি মিচ্ছাঞাণং, সমাধি চ মিচ্ছাৰিমুত্তীতি যুত্তং সিযা.

দসকনিদ্দেসৰণ্ণনা নিট্ঠিতা.

তণ্হাৰিচরিতনিদ্দেসৰণ্ণনা

৯৭৩. সমূহগাহতোতি তণ্হামানদিট্ঠীনং সাধারণগ্গহণতোতি ৰদন্তি. ‘‘ইত্থং এৰং অঞ্ঞথা’’তি পন ৰিসেসং অকত্ৰা গহণং সমূহগাহোতি দট্ঠব্বো. অঞ্ঞং আকারন্তি পরসন্তানগতং আকারং. অত্থীতি সদা সংৰিজ্জতীতি অত্থো. সীদতীতি ৰিনস্সতি. সংসযপরিৰিতক্কৰসেনাতি ‘‘কিং নু খো অহং সিযং, ন সিয’’ন্তি এৰং পরিৰিতক্কৰসেন. পত্থনাকপ্পনৰসেনাতি ‘‘অপি নাম সাধু পনাহং সিয’’ন্তি এৰং পত্থনায কপ্পনৰসেন.

সুদ্ধসীসাতি তণ্হামানদিট্ঠীনং সাধারণসীসা ৰিসেসস্স অনিস্সিতত্তা ‘‘সুদ্ধসীসা’’তি ৰুত্তা. তত্থ দিট্ঠিসীসেহি দিট্ঠিযা তণ্হা দস্সিতা, সীসসীসমূলকেহি মানদিট্ঠীহি সযমেৰ চাতি আহ ‘‘এৰমেতে…পে… তণ্হা ৰিচরিতধম্মা ৰেদিতব্বা’’তি. দিট্ঠিমানেসুপি ‘‘তণ্হাৰিচরিতানী’’তি ৰচনঞ্চ অঞ্ঞমঞ্ঞং ৰিপ্পযোগীনং দিট্ঠিমানানং তণ্হায অৰিপ্পযোগীনং তংমূলকত্তাৰ তপ্পধানতায কতন্তি ৰেদিতব্বং.

৯৭৪. অৰক্করীতি নিপাতো নানাভাৰে ৰত্ততীতি অনানাকরণং অনৰক্করি, তং কত্ৰা, অৰক্করি ৰা অকত্ৰা অনৰক্করি কত্ৰাতি এৰং দস্সেন্তো আহ ‘‘অৰিনিব্ভোগং কত্ৰা’’তি. ‘‘অনৰকারিং করিত্ৰা’’তি ৰা পাঠো, তত্থ অৰকিরণং ৰিক্খেপনং সমূহস্স একদেসানং ৰিনিব্ভুজ্জনং অৰকারি, তং অৰকারিং ৰিনিব্ভোগং অকত্ৰা, পঞ্চপি খন্ধে সমূহতো একত্তেনেৰ গহেত্ৰা অত্ততো অৰিনিব্ভুজ্জিত্ৰা অস্মীতি ছন্দমানদিট্ঠিযো পটিলভতীতি অত্থো. অসিতব্যাভঙ্গিতাযাতি দাত্তেন কাজেন চাতি এতেন পরিক্খারেন, অসিতব্যাভঙ্গীহি লৰনৰহনকিরিযা ৰা ‘‘অসিতব্যাভঙ্গী’’তি ৰুত্তা.

৯৭৬. অৰকারিং করিত্ৰাতি রূপাদীনি অত্ততো ৰিনিব্ভুজ্জিত্ৰা ইমিনা রূপেন…পে… ইমিনা ৰিঞ্ঞাণেন অস্মীতি ছন্দং পটিলভতীতি এৰং সব্বত্থ ইমিনাতি এতস্স অত্ততো অৰিনিব্ভুত্তেন রূপাদিনাতি অত্থো দট্ঠব্বো. অত্ততো হি অৰিনিব্ভুত্তানি অবহিকতানি অহমিচ্চেৰ গহিতানি রূপাদীনি উপাদায উপগন্ত্ৰা পৰত্তা তণ্হা ‘‘অজ্ঝত্তিকস্স উপাদাযা’’তি ৰুত্তা, অত্ততো চ ৰিনিব্ভুত্তানি বহিকতানি উপগন্ত্ৰা পৰত্তা ‘‘বাহিরস্স উপাদাযা’’তি. খগ্গেন ৰা ছত্তেন ৰা অহং নিচ্চোতি অভিমঙ্গলসম্মতেন খগ্গাদিনা মম ৰিনাসো নত্থীতি মঞ্ঞতীতি অত্থো. একেকস্সাতি ইদং অনাদিম্হি অনন্তে চ সংসারে একেকস্স অতীতানাগতেসু ছত্তিংসাযপি সম্ভৰদস্সনত্থং ৰুত্তং, একেকস্স ৰা পুগ্গলস্স যথালাভৰসেনাতি ইদম্পি অনিস্সিততণ্হামানদিট্ঠিং কত্ৰা পুথুজ্জনস্স অদ্ধাপচ্চুপ্পন্নে কস্সচি সম্ভৰদস্সনত্থং.

তণ্হাৰিচরিতনিদ্দেসৰণ্ণনা নিট্ঠিতা.

খুদ্দকৰত্থুৰিভঙ্গৰণ্ণনা নিট্ঠিতা.