২. অভিধম্মভাজনীযৰণ্ণনা

৭২৫. অৰুত্তত্তাতি ‘‘তেসং ৰিপাকে ঞাণ’’ন্তি সামঞ্ঞেন ৰত্ৰা ৰিসেসেন অৰুত্তত্তাতি অধিপ্পাযো. এত্থ চ কিরিযানং অৰিপাকত্তা ধম্মভাৰো ন ৰুত্তোতি. যদি এৰং ৰিপাকা ন হোন্তীতি অত্থভাৰো চ ন ৰত্তব্বোতি? ন, পচ্চযুপ্পন্নত্তা. এৰঞ্চে কুসলাকুসলানম্পি অত্থভাৰো আপজ্জতীতি. নপ্পটিসিদ্ধো, ৰিপাকস্স পন পধানহেতুতায পাকটত্তা ধম্মভাৰোৰ তেসং ৰুত্তো. কিরিযানং পচ্চযত্তা ধম্মভাৰো আপজ্জতীতি চে? নাযং দোসো অপ্পটিসিদ্ধত্তা, কম্মফলসম্বন্ধস্স পন অহেতুত্তা ধম্মভাৰো ন ৰুত্তো. অপিচ ‘‘অযং ইমস্স পচ্চযো, ইদং পচ্চযুপ্পন্ন’’ন্তি এৰং ভেদং অকত্ৰা কেৰলং কুসলাকুসলে ৰিপাককিরিযধম্মে চ সভাৰতো পচ্চৰেক্খন্তস্স ধম্মপটিসম্ভিদা অত্থপটিসম্ভিদা চ হোতীতিপি তেসং অত্থধম্মতা ন ৰুত্তাতি ৰেদিতব্বা. কুসলাকুসলৰারেসু চ ধম্মপটিসম্ভিদা কুসলাকুসলানং পচ্চযভাৰং সত্তিৰিসেসং সনিপ্ফাদেতব্বতং পস্সন্তী নিপ্ফাদেতব্বাপেক্খা হোতীতি তংসম্বন্ধেনেৰ ‘‘তেসং ৰিপাকে ঞাণং অত্থপটিসম্ভিদা’’তি ৰুত্তং. সভাৰদস্সনমত্তমেৰ পন অত্থপটিসম্ভিদায কিচ্চং নিপ্ফন্নফলমত্তদস্সনতোতি তস্সা নিপ্ফাদকানপেক্খত্তা ৰিপাকৰারে ‘‘তেসং ৰিপচ্চনকে ঞাণং ধম্মপটিসম্ভিদা’’তি ন ৰুত্তন্তি ৰেদিতব্বং.

সভাৰপঞ্ঞত্তিযাতি ন সত্তাদিপঞ্ঞত্তিযা, অৰিপরীতপঞ্ঞত্তিযা ৰা. খোভেত্ৰাতি লোমহংসজননসাধুকারদানাদীহি খোভেত্ৰা. পুন ধম্মস্সৰনে জানিস্সথাতি অপ্পস্সুতত্তা দুতিযৰারং কথেন্তো তদেৰ কথেস্সতীতি অধিপ্পাযো.

৭৪৬. ভূমিদস্সনত্থন্তি এত্থ কামাৰচরা লোকুত্তরা চ ভূমি ‘‘ভূমী’’তি ৰেদিতব্বা, চিত্তুপ্পাদা ৰাতি.

অভিধম্মভাজনীযৰণ্ণনা নিট্ঠিতা.