৪. দানকথাৰণ্ণনা

৪৭৮. দেয্যধম্মৰসেন চোদেতুন্তি যদি চেতসিকোৰ ধম্মো দানং, ‘‘দিয্যতীতি দান’’ন্তি ইমিনাপি অত্থেন চেতসিকস্সেৰ দানভাৰো আপজ্জতীতি চোদেতুন্তি অত্থো.

৪৭৯. অনিট্ঠফলন্তিআদি অচেতসিকস্স ধম্মস্স দানভাৰদীপনত্থং ৰুত্তন্তি ফলদানভাৰদীপনত্থং ন ৰুত্তন্তি অত্থো দট্ঠব্বো. অনিট্ঠফলন্তিআদিনা অচেতসিকস্স ধম্মস্স ফলদানং ৰুত্তং ৰিয হোতি, ন দানভাৰো, তন্নিৰারণত্থঞ্চেতমাহাতি. এৰঞ্চ কত্ৰা অনন্তরমেৰাহ ‘‘ন হি অচেতসিকো অন্নাদিধম্মো আযতিং ৰিপাকং দেতী’’তি. ইট্ঠফলভাৰনিযমনত্থন্তি দেয্যধম্মো ৰিয কেনচি পরিযাযেন অনিট্ঠফলতা দানস্স নত্থি, একন্তং পন ইট্ঠফলমেৰাতি নিযমনত্থন্তি অত্থো.

ইতরেনাতি ‘‘দিয্যতীতি দান’’ন্তি ইমিনা পরিযাযেন. ন পন একেনত্থেনাতি ‘‘দেয্যধম্মোৰ দান’’ন্তি ইমং সকৰাদীৰাদং নিৰত্তেতুং ‘‘সদ্ধা হিরিয’’ন্তিআদিকং সুত্তসাধনং পরৰাদীৰাদে যুজ্জতি, ‘‘ইধেকচ্চো অন্নং দেতী’’তিআদিকঞ্চ, ‘‘চেতসিকোৰ ধম্মো দান’’ন্তি ইমং নিৰত্তেতুং ‘‘চেতসিকো ধম্মো দান’’ন্তি ইমং পন সাধেতুং ‘‘সদ্ধা হিরিয’’ন্তিআদিকং সকৰাদীৰাদে যুজ্জতি, ‘‘ইধেকচ্চো অন্নং দেতী’’তিআদিকং ৰা ‘‘দেয্যধম্মো দান’’ন্তি সাধেতুন্তি এৰং নিৰত্তনসাধনত্থনানত্তং সন্ধায ‘‘ন পন একেনত্থেনা’’তি ৰুত্তন্তি দট্ঠব্বং. তত্থ যথা পরৰাদীৰাদে চ সুত্তসাধনত্থং ‘‘ন ৰত্তব্বং চেতসিকো ধম্মো দান’’ন্তি পুচ্ছাযং চেতসিকোৰাতি অত্থো দট্ঠব্বো, তথা ‘‘ন ৰত্তব্বং দেয্যধম্মো দান’’ন্তি পুচ্ছায চ দেয্যধম্মোৰাতি. দেয্যধম্মো ইট্ঠফলোতি ইট্ঠফলাভাৰমত্তমেৰ পটিক্খিত্তন্তি এত্থ ‘‘ইট্ঠফলভাৰমত্তমেৰ পটিক্খিত্ত’’ন্তি পাঠেন ভৰিতব্বন্তি. ‘‘ইট্ঠফলাভাৰমত্তমেৰ দিস্ৰা পটিক্খিত্ত’’ন্তি ৰা ৰত্তব্বং. সঙ্করভাৰমোচনত্থন্তি চেতসিকস্স দাতব্বট্ঠেন দেয্যধম্মস্স চ ইট্ঠফলট্ঠেন দানভাৰমোচনত্থন্তি ৰুত্তং হোতি.

দানকথাৰণ্ণনা নিট্ঠিতা.