৮-৯. দেৰাসুরসঙ্গামসুত্তাদিৰণ্ণনা

৩৯-৪০. অট্ঠমে অভিযিংসূতি কদা অভিযিংসু? যদা বলৰন্তো অহেসুং, তদা. তত্রাযমনুপুব্বিকথা (সং. নি. অট্ঠ. ১.১.২৪৭; সারত্থ. টী. ১.ৰেরঞ্জকণ্ডৰণ্ণনা) – সক্কো কির মগধরট্ঠে মচলগামকে মঘো নাম মাণৰো হুত্ৰা তেত্তিংস পুরিসে গহেত্ৰা কল্যাণকম্মং করোন্তো সত্ত ৰতপদানি পূরেত্ৰা তত্থ কালঙ্কতো দেৰলোকে নিব্বত্তি. তং বলৰকম্মানুভাৰেন সপরিসং সেসদেৰতা দসহি ঠানেহি অধিগণ্হন্তং দিস্ৰা ‘‘আগন্তুকদেৰপুত্তা আগতা’’তি নেৰাসিকা গন্ধপানং সজ্জযিংসু. সক্কো সকপরিসায সঞ্ঞং অদাসি ‘‘মারিসা মা গন্ধপানং পিৰিত্থ, পিৰনাকারমত্তমেৰ দস্সেথা’’তি. তে তথা অকংসু. নেৰাসিকদেৰতা সুৰণ্ণসরকেহি উপনীতং গন্ধপানং যাৰদত্থং পিৰিত্ৰা মত্তা তত্থ তত্থ সুৰণ্ণপথৰিযং পতিত্ৰা সযিংসু. সক্কো ‘‘গণ্হথ পুত্তহতায পুত্তে’’তি তে পাদেসু গহেত্ৰা সিনেরুপাদে খিপাপেসি. সক্কস্স পুঞ্ঞতেজেন তদনুৰত্তকাপি সব্বে তত্থেৰ পতিংসু. তে সিনেরুৰেমজ্ঝকালে সঞ্ঞং লভিত্ৰা, ‘‘তাতা, সুরং ন পিৰিম্হ, সুরং ন পিৰিম্হা’’তি আহংসু. ততো পট্ঠায অসুরা নাম জাতা. অথ নেসং কম্মপচ্চযউতুসমুট্ঠানং সিনেরুস্স হেট্ঠিমতলে দসযোজনসহস্সং অসুরভৰনং নিব্বত্তি. সক্কো তেসং নিৰত্তিত্ৰা অনাগমনত্থায আরক্খং ঠপেসি. যং সন্ধায ৰুত্তং –

‘‘অন্তরা দ্ৰিন্নং অযুজ্ঝপুরানং,

পঞ্চৰিধা ঠপিতা অভিরক্খা;

উরগ-করোটি-পযস্স চ হারী,

মদনযুতা চতুরো চ মহত্থা’’তি. (সং. নি. অট্ঠ. ১.১.২৪৭; সারত্থ. টী. ১.১ ৰেরঞ্জকণ্ডৰণ্ণনা);

দ্ৰে নগরানি হি যুদ্ধেন গহেতুং অসক্কুণেয্যতায অযুজ্ঝপুরানি নাম জাতানি দেৰনগরঞ্চ অসুরনগরঞ্চ. যদা হি অসুরা বলৰন্তো হোন্তি, অথ দেৰেহি পলাযিত্ৰা দেৰনগরং পৰিসিত্ৰা দ্ৰারে পিদহিতে অসুরানং সতসহস্সম্পি কিঞ্চি কাতুং ন সক্কোতি. যদা দেৰা বলৰন্তো হোন্তি, অথাসুরেহি পলাযিত্ৰা অসুরনগরস্স দ্ৰারে পিদহিতে সক্কানং সতসহস্সম্পি কিঞ্চি কাতুং ন সক্কোতি. ইতি ইমানি দ্ৰে নগরানি অযুজ্ঝপুরানি নাম. তেসং অন্তরা এতেসু উরগাদীসু পঞ্চসু ঠানেসু সক্কেন আরক্খা ঠপিতা. তত্থ উরগসদ্দেন নাগা গহিতা. তে হি উদকে বলৰন্তো হোন্তি, তস্মা সিনেরুস্স পঠমালিন্দে এতেসং আরক্খা. করোটিসদ্দেন সুপণ্ণা গহিতা. তেসং কির করোটি নাম পানভোজনং, তেন তং নামং লভিংসু, দুতিযালিন্দে তেসং আরক্খা. পযস্সহারিসদ্দেন কুম্ভণ্ডা গহিতা, দানৰরক্খসা কির তে, ততিযালিন্দে তেসং আরক্খা. মদনযুতসদ্দেন যক্খা গহিতা. ৰিসমচারিনো কির তে যুজ্ঝসোণ্ডা, চতুত্থালিন্দে তেসং আরক্খা. চতুরো চ মহত্তাতি চত্তারো মহারাজানো ৰুত্তা, পঞ্চমালিন্দে তেসং আরক্খা, তস্মা যদি অসুরা কুপিতাৰিলচিত্তা দেৰপুরং উপযন্তি যুজ্ঝিতুং. যং গিরিনো পঠমং পরিভণ্ডং, তং উরগা পটিবাহযন্তি. এৰং সেসেসু সেসা.

তে পন অসুরা আযুৰণ্ণযসইস্সরিযসম্পত্তীহি তাৰতিংসসদিসাৰ, তস্মা অন্তরা অত্তানং অজানিত্ৰা পাটলিযা পুপ্ফিতায ‘‘ন ইদং দেৰনগরং, তত্থ পারিচ্ছত্তকো পুপ্ফতি, ইধ পন চিত্তপাটলী, জরসক্কেনাম্হাকং সুরং পাযেত্ৰা ৰঞ্চিতা, দেৰনগরঞ্চ নো গহিতং, গচ্ছাম, তেন সদ্ধিং যুজ্ঝিস্সামা’’তি হত্থিঅস্সরথে আরুয্হ সুৰণ্ণরজতমণিফলকানি গহেত্ৰা যুদ্ধসজ্জা হুত্ৰা অসুরভেরিযো ৰাদেন্তা মহাসমুদ্দে উদকং দ্ৰিধা ভেত্ৰা উট্ঠহন্তি. তে দেৰে ৰুট্ঠে ৰম্মিকমক্খিকা ৰম্মিকং ৰিয সিনেরুং আরুহিতুং আরভন্তি. অথ নেসং পঠমং নাগেহি সদ্ধিং যুদ্ধং হোতি. তস্মিং খো পন যুদ্ধে ন কস্সচি ছৰি ৰা চম্মং ৰা ছিজ্জতি, ন লোহিতং উপ্পজ্জতি, কেৰলং কুমারকানং দারুমেণ্ডকযুদ্ধং ৰিয অঞ্ঞমঞ্ঞসন্তাসনমত্তমেৰ হোতি. কোটিসতাপি কোটিসহস্সাপি নাগা তেহি সদ্ধিং যুজ্ঝিত্ৰা তে অসুরপুরংযেৰ পৰেসেত্ৰা নিৰত্তন্তি. যদা পন অসুরা বলৰন্তো হোন্তি, অথ নাগা ওসক্কিত্ৰা দুতিযে আলিন্দে সুপণ্ণেহি সদ্ধিং একতোৰ হুত্ৰা যুজ্ঝন্তি. এস নযো সুপণ্ণাদীসুপি. যদা পন তানি পঞ্চপি ঠানানি অসুরা মদ্দন্তি, তদা একতো সম্পিণ্ডিতানিপি তানি পঞ্চ বলানি ওসক্কন্তি. অথ চত্তারো মহারাজানো গন্ত্ৰা সক্কস্স তং পৰত্তিং আরোচেন্তি. সক্কো তেসং ৰচনং সুত্ৰা দিযড্ঢযোজনসতিকং ৰেজযন্তরথং আরুয্হ সযং ৰা নিক্খমতি, একং পুত্তং ৰা পেসেতি. যদা দেৰা পুন অপচ্চাগমনায অসুরে জিনিংসু, তদা সক্কো অসুরে পলাপেত্ৰা পঞ্চসু ঠানেসু আরক্খং দত্ৰা ৰেদিযপাদে ৰজিরহত্থা ইন্দপটিমাযো ঠপেসি. অসুরা কালেন কালং উট্ঠহিত্ৰা পটিমাযো দিস্ৰা ‘‘সক্কো অপ্পমত্তো তিট্ঠতী’’তি ততোৰ নিৰত্তন্তি. ইধ পন যদা অসুরানং জযো অহোসি, দেৰানং পরাজযো, তং সন্ধাযেতং ৰুত্তং – ‘‘পরাজিতা চ, ভিক্খৰে, দেৰা অপযিংসুযেৰ উত্তরেনাভিমুখা, অভিযিংসু অসুরা’’তি.

দক্খিণাভিমুখা হুত্ৰাতি চক্কৰাল়পব্বতাভিমুখা হুত্ৰা. অসুরা কির দেৰেহি পরাজিতা পলাযন্তা চক্কৰাল়পব্বতাভিমুখং গন্ত্ৰা চক্কৰাল়মহাসমুদ্দপিট্ঠিযং রজতপট্টৰণ্ণে ৰালিকাপুলিনে যত্থ পণ্ণকুটিযো মাপেত্ৰা ইসযো ৰসন্তি, তত্থ গন্ত্ৰা ইসীনং অস্সমপদেন গচ্ছন্তা ‘‘সক্কো ইমেহি সদ্ধিং মন্তেত্ৰা অম্হে নাসেতি, গণ্হথ পুত্তহতায পুত্তে’’তি কুপিতা অস্সমপদে পানীযঘটচঙ্কমনপণ্ণসালাদীনি ৰিদ্ধংসেন্তি. ইসযো অরঞ্ঞতো ফলাফলং আদায আগতা দিস্ৰা পুন দুক্খেন পটিপাকতিকং করোন্তি, তেপি পুনপ্পুনং তথেৰ পরাজিতা গন্ত্ৰা ৰিনাসেন্তি. তেন ৰুত্তং – ‘‘পরাজিতা চ খো, ভিক্খৰে, অসুরা অপযিংসুযেৰ দক্খিণেনাভিমুখা’’তি. নৰমং উত্তানত্থমেৰ.

দেৰাসুরসঙ্গামসুত্তাদিৰণ্ণনা নিট্ঠিতা.