(৮) ৩. যমকৰগ্গো

১-১০. সদ্ধাসুত্তাদিৰণ্ণনা

৭১-৮০. অট্ঠমস্স পঠমাদীনি উত্তানত্থানেৰ. দসমে কুচ্ছিতং সীদতীতি কুসীতো দ-কারস্স ত-কারং কত্ৰা. যস্স ধম্মস্স ৰসেন পুগ্গলো ‘‘কুসীতো’’তি ৰুচ্চতি, সো কুসিতভাৰো ইধ কুসিত-সদ্দেন ৰুত্তো. ৰিনাপি হি ভাৰজোতনসদ্দং ভাৰত্থো ৰিঞ্ঞাযতি যথা ‘‘পটস্স সুক্ক’’ন্তি, তস্মা কুসীতভাৰৰত্থূনীতি অত্থো. তেনাহ ‘‘কোসজ্জকারণানীতি অত্থো’’তি. কম্মং নাম সমণসারুপ্পং ঈদিসন্তি আহ ‘‘চীৰরৰিচারণাদী’’তি. ৰীরিযন্তি পধানৰীরিযং. তং পন চঙ্কমনৰসেন করণে কাযিকন্তিপি ৰত্তব্বতং লভতীতি আহ ‘‘দুৰিধম্পী’’তি. পত্তিযাতি পাপুণনত্থং. ওসীদনন্তি ভাৰনানুযোগে সঙ্কোচো. মাসেহি আচিতং নিচিতং ৰিযাতি মাসাচিতং, তং মঞ্ঞে. যস্মা মাসা তিন্তা ৰিসেসেন গরুকা হোন্তি, তস্মা ‘‘যথা তিন্তমাসো’’তিআদি ৰুত্তং. ৰুট্ঠিতো হোতি গিলানভাৰাতি অধিপ্পাযো.

তেসন্তি আরম্ভৰত্থূনং. ইমিনাৰ নযেনাতি ইমিনা কুসীতৰত্থূসু ৰুত্তেনেৰ নযেন ‘‘দুৰিধম্পি ৰীরিযং আরভতী’’তিআদিনা. ইদং পঠমন্তি ‘‘ইদং, হন্দাহং, ৰীরিযং আরভামী’’তি, ‘‘এৰং ভাৰনায অব্ভুস্সহনং পঠমং আরম্ভৰত্থূ’’তিআদিনা চ অত্থো ৰেদিতব্বো. যথা তথা পঠমং পৰত্তং অব্ভুস্সহনঞ্হি উপরি ৰীরিযারম্ভস্স কারণং হোতি. অনুরূপপচ্চৰেক্খণসহিতানি হি অব্ভুস্সহনানি তম্মূলকানি ৰা পচ্চৰেক্খণানি অট্ঠ আরম্ভৰত্থূনীতি ৰেদিতব্বানি.

সদ্ধাসুত্তাদিৰণ্ণনা নিট্ঠিতা.

যমকৰগ্গৰণ্ণনা নিট্ঠিতা.

৮১-৬২৬. সেসং উত্তানমেৰ.

ইতি মনোরথপূরণিযা অঙ্গুত্তরনিকায-অট্ঠকথায

অট্ঠকনিপাতৰণ্ণনায অনুত্তানত্থদীপনা সমত্তা.