.নমো তস্স ভগৰতো অরহতো সম্মাসম্বুদ্ধস্স.

অঙ্গুত্তরনিকাযে

অট্ঠকনিপাত-টীকা

১. পঠমপণ্ণাসকং

১. মেত্তাৰগ্গো

১. মেত্তাসুত্তৰণ্ণনা

১. অট্ঠকনিপাতস্স পঠমে ৰড্ঢিতাযাতি ভাৰনাপারিপূরিৰসেন পরিব্রূহিতায. পুনপ্পুনং কতাযাতি ভাৰনায বহুলীকরণেন অপরাপরং পৰত্তিতায. যুত্তযানসদিসকতাযাতি যথা যুত্তআজঞ্ঞযানং ছেকেন সারথিনা অধিট্ঠিতং যথারুচি পৰত্ততি, এৰং যথারুচি পৰত্তারহতং গমিতায. পতিট্ঠানট্ঠেনাতি সব্বসম্পত্তিঅধিট্ঠানট্ঠেন. পচ্চুপট্ঠিতাযাতি ভাৰনাবহুলীকারেহি পতি পতি উপট্ঠিতায অৰিজহিতায. সমন্ততো চিতাযাতি সব্বভাগেন ভাৰনানুরূপং চযং গমিতায. তেনাহ ‘‘উপচিতাযা’’তি. সুট্ঠু সমারদ্ধাযাতি অতিৰিয সম্মদেৰ নিব্বত্তিগতায.

যো চ মেত্তং ভাৰযতীতিআদীসু যো কোচি গহট্ঠো ৰা পব্বজিতো ৰা. মেত্তন্তি মেত্তাঝানং.

অপ্পমাণন্তি ভাৰনাৰসেন আরম্মণৰসেন চ অপ্পমাণং. অসুভভাৰনাদযো ৰিয হি আরম্মণে একদেসগ্গহণং অকত্ৰা অনৰসেসফরণৰসেন অনোধিসো ফরণৰসেন চ, অপ্পমাণারম্মণতায পগুণভাৰনাৰসেন চ অপ্পমাণং. তনূ সংযোজনা হোন্তীতি মেত্তং পাদকং কত্ৰা সম্মসিত্ৰা হেট্ঠিমে অরিযমগ্গে অধিগচ্ছন্তস্স সুখেনেৰ পটিঘসংযোজনাদযো পহীযমানা তনূ হোন্তীতি এৰমেত্থ অত্থো দট্ঠব্বো.

এৰং কিলেসপ্পহানঞ্চ নিব্বানাধিগমঞ্চ মেত্তাভাৰনায সিখাপ্পত্তমানিসংসং দস্সেত্ৰা ইদানি অঞ্ঞেপি আনিসংসে দস্সেতুং ‘‘একম্পি চে’’তিআদি ৰুত্তং. তত্থ অদুট্ঠচিত্তোতি মেত্তাবলেন সুট্ঠু ৰিক্খম্ভিতব্যাপাদতায ব্যাপাদেন অদূসিতচিত্তো. মেত্তাযতীতি হিতফরণৰসেন মেত্তং করোতি. কুসলীতি অতিসযেন কুসলৰা মহাপুঞ্ঞো, পটিঘাদিঅনত্থৰিগমেন খেমী. সব্বে চ পাণেতি চ-সদ্দো ব্যতিরেকো. মনসানুকম্পীতি চিত্তেন অনুকম্পন্তো. ইদং ৰুত্তং হোতি – একসত্তৰিসযাপি তাৰ মেত্তা মহাকুসলরাসি, সব্বে পন পাণে অত্তনো পুত্তং ৰিয হিতফরণেন মনসা অনুকম্পন্তো পহুকং পহুং অনপ্পকং অপরিযন্তং চতুসট্ঠিমহাকপ্পেপি অত্তনো ৰিপাকপ্পবন্ধং পৰত্তেতুং সমত্থং উল়ারং পুঞ্ঞং অরিযো পরিসুদ্ধচিত্তো পুগ্গলোৰ করোতি নিপ্ফাদেতীতি. সত্তভরিতন্তি সত্তেহি অৰিরল়ং, আকিণ্ণমনুস্সন্তি অত্থো.

সঙ্গহৰত্থূনীতি (সং. নি. টী. ১.১.১২০) লোকস্স সঙ্গণ্হনকারণানি. নিপ্ফন্নসস্সতো নৰ ভাগে কস্সকস্স দত্ৰা রঞ্ঞং একভাগগ্গহণং দসমভাগগ্গহণং. এৰং কস্সকা হট্ঠতুট্ঠা সস্সানি সম্পাদেন্তীতি আহ ‘‘সস্সসম্পাদনে মেধাৰিতাতি অত্থো’’তি. ততো ওরভাগে কির ছভাগগ্গহণং জাতং. ছমাসিকন্তি ছন্নং ছন্নং মাসানং পহোনকং. পাসেতীতি পাসগতে ৰিয করোতি. ৰাচায পিযং ৰাচাপিযং, তস্স কম্মং ৰাচাপেয্যং. সব্বসো রট্ঠস্স ইদ্ধাদিভাৰতো খেমং. নিরব্বুদং চোরিযাভাৰতো. ইদ্ধঞ্হি রট্ঠং অচোরিযং. ‘‘নিরগ্গল়’’ন্তি ৰুচ্চতি অপারুতঘরভাৰতো.

উদ্ধংমূলকং কত্ৰাতি উম্মূলং কত্ৰা. দ্ৰীহি পরিযঞ্ঞেহীতি মহাযঞ্ঞস্স পুব্বভাগে পচ্ছা চ পৰত্তেতব্বেহি দ্ৰীহি পরিৰারযঞ্ঞেহি. সত্ত…পে… ভীসনস্সাতি সত্তনৰুতাধিকানং পঞ্চন্নং পসুসতানং মারণেন ভেরৰস্স পাপভীরুকানং ভযাৰহস্স. তথা হি ৰদন্তি –

‘‘ছসতানি নিযুজ্জন্তি, পসূনং মজ্ঝিমে হনি;

অস্সমেধস্স যঞ্ঞস্স, ঊনানি পসূহি তীহী’’তি. (সং. নি. টী. ১.১.১২০; অ. নি. টী. ২.৪.৩৯);

সম্মন্তি যুগচ্ছিদ্দে পক্খিপিতব্বদণ্ডকং. পাসন্তীতি খিপন্তি. সংহারিমেহীতি সকটেহি ৰহিতব্বেহি. পুব্বে কির একো রাজা সম্মাপাসং যজন্তো সরস্সতিনদিতীরে পথৰিযা ৰিৰরে দিন্নে নিমুগ্গোযেৰ অহোসি. অন্ধবালব্রাহ্মণা গতানুগতিগতা ‘‘অযং তস্স সগ্গগমনমগ্গো’’তি সঞ্ঞায তত্থ সম্মাপাসং যঞ্ঞং পট্ঠপেন্তি. তেন ৰুত্তং ‘‘নিমুগ্গোকাসতো পভুতী’’তি. অযূপো অপ্পকদিৰসো যাগো, সযূপো বহুদিৰসং সাধেয্যো সত্রযাগো. মন্তপদাভিসঙ্খতানং সপ্পিমধূনং ‘‘ৰাজ’’মিতি সমঞ্ঞা. হিরঞ্ঞসুৰণ্ণগোমহিংসাদি সত্তরসকদক্খিণস্স. সারগব্ভকোট্ঠাগারাদীসু নত্থি এত্থ অগ্গল়াতি নিরগ্গল়ো. তত্থ কির যঞ্ঞে অত্তনো সাপতেয্যং অনৰসেসতো অনিগূহিত্ৰা নিয্যাতীযতি.

চন্দপ্পভাতি (ইতিৰু. অট্ঠ. ২৭) চন্দিমস্সেৰ পভায. তারাগণাৰ সব্বেতি যথা সব্বেপি তারাগণা চন্দিমসোভায সোল়সিম্পি কলং নাগ্ঘন্তি, এৰং তে অস্সমেধাদযো যঞ্ঞা মেত্তস্স চিত্তস্স ৰুত্তলক্খণেন সুভাৰিতস্স সোল়সিম্পি কলং নানুভৰন্তি, ন পাপুণন্তি, নাগ্ঘন্তীতি অত্থো.

ইদানি অপরেপি দিট্ঠধম্মিকসম্পরাযিকে মেত্তাভাৰনায আনিসংসে দস্সেতুং ‘‘যো ন হন্তী’’তিআদি ৰুত্তং. তত্থ যোতি মেত্তাব্রহ্মৰিহারভাৰনানুযুত্তো পুগ্গলো. ন হন্তীতি তেনেৰ মেত্তাভাৰনানুভাৰেন দূরৰিক্খম্ভিতব্যাপাদতায ন কঞ্চি সত্তং হিংসতি, লেড্ডুদণ্ডাদীহি ন ৰিবাধতি ৰা. ন ঘাতেতীতি পরং সমাদপেত্ৰা ন সত্তে মারাপেতি ন ৰিবাধাপেতি চ. ন জিনাতীতি সারম্ভৰিগ্গাহিককথাদিৰসেন ন কঞ্চি জিনাতি সারম্ভস্সেৰ অভাৰতো, জানিকরণৰসেন ৰা অট্টকরণাদিনা ন কঞ্চি জিনাতি. তেনাহ ‘‘ন অত্তনা পরস্স জানিং করোতী’’তি. ন জাপযেতি পরেহি পযোজেত্ৰা পরেসম্পি ধনজানিং ন কারাপেয্য. তেনাহ ‘‘ন পরেন পরস্স জানিং কারেতী’’তি. মেত্তায ৰা অংসো অৰিহেঠনট্ঠেন অৰযৰভূতোতি মেত্তংসো.

মেত্তাসুত্তৰণ্ণনা নিট্ঠিতা.

২-৪. পঞ্ঞাসুত্তাদিৰণ্ণনা

২-৪. দুতিযে আদিব্রহ্মচরিযিকাযাতি আদিব্রহ্মচরিযমেৰ আদিব্রহ্মচরিযিকা. তেনাহ ‘‘মগ্গব্রহ্মচরিযস্স আদিভূতাযা’’তি. অরিযোতি নিদ্দোসো পরিসুদ্ধো. তুণ্হীভাৰো ন তিত্থিযানং মূগব্বতগহণং ৰিয অপরিসুদ্ধোতি অরিযো তুণ্হীভাৰো. চতুত্থজ্ঝানন্তি উক্কট্ঠনিদ্দেসেনেতং ৰুত্তং, পঠমজ্ঝানাদীনিপি অরিযো তুণ্হীভাৰোত্ৰেৰ সঙ্খং গচ্ছন্তি. জানন্তি ইদং কম্মসাধনন্তি আহ ‘‘জানিতব্বকং জানাতী’’তি. যথা ৰা একচ্চো ৰিপরীতং গণ্হন্তো জানন্তোপি ন জানাতি, পস্সন্তোপি ন পস্সতি, ন এৰমযং. অযং পন জানন্তো জানাতি, পস্সন্তো পস্সতীতি এৰমেত্থ দট্ঠব্বো. ততিযাদীনি সুৰিঞ্ঞেয্যানি.

পঞ্ঞাসুত্তাদিৰণ্ণনা নিট্ঠিতা.

৫. পঠমলোকধম্মসুত্তৰণ্ণনা

৫. পঞ্চমে লোকস্স ধম্মাতি সত্তলোকস্স অৰস্সংভাৰিধম্মা. তেনাহ ‘‘এতেহি মুত্তা নাম নত্থি’’তিআদি. ঘাসচ্ছাদনাদীনং লদ্ধি লাভো, তানি এৰ ৰা লদ্ধব্বতো লাভো, তদভাৰো অলাভো, লাভগ্গহণেন চেত্থ তব্বিসযো অনুরোধো গহিতো, অলাভগ্গহণেন ৰিরোধো. যস্মা লোহিতে সতি তদুপঘাতৰসেন পুব্বো ৰিয অনুরোধো লদ্ধাৰসরো এৰ হোতি, তস্মা ৰুত্তং ‘‘লাভে আগতে অলাভো আগতোযেৰা’’তি. এস নযো যসাদীসুপি. সেসং সুৰিঞ্ঞেয্যমেৰ.

পঠমলোকধম্মসুত্তৰণ্ণনা নিট্ঠিতা.

৬-৮. দুতিযলোকধম্মসুত্তাদিৰণ্ণনা

৬-৮. ছট্ঠে অধিকং পযসতি পযুজ্জতি এতেনাতি অধিপ্পযাসো, সৰিসেসং ইতিকত্তব্বকিরিযা. তেনাহ ‘‘অধিকপ্পযোগো’’তি. সত্তমট্ঠমেসু নত্থি ৰত্তব্বং.

দুতিযলোকধম্মসুত্তাদিৰণ্ণনা নিট্ঠিতা.

৯. নন্দসুত্তৰণ্ণনা

৯. নৰমে দুৰিধা কুলপুত্তা জাতিকুলপুত্তা আচারকুলপুত্তা চ. তত্থ ‘‘তেন খো পন সমযেন রট্ঠপালো কুলপুত্তো তস্মিংযেৰ থুল্লকোট্ঠিকে অগ্গকুলিকস্স পুত্তো’’তি (ম. নি. ২.২৯৪) এৰং আগতা উচ্চাকুলপুত্তা জাতিকুলপুত্তা. ‘‘সদ্ধাযেতে কুলপুত্তা অগারস্মা অনগারিযং পব্বজিতা’’তি (ম. নি. ৩.৭৮) এৰং আগতা পন যত্থ কত্থচি কুলে পসুতাপি আচারকুলপুত্তা নাম. ইধ পন উচ্চাকুলপ্পসুততং সন্ধায ‘‘কুলপুত্তোতি, ভিক্খৰে, নন্দং সম্মা ৰদমানো ৰদেয্যা’’তি ভগৰতা ৰুত্তন্তি আহ ‘‘জাতিকুলপুত্তো’’তি. উভোহিপি পন কারণেহি তস্স কুলপুত্তভাৰোযেৰ. সেসমেত্থ উত্তানমেৰ.

নন্দসুত্তৰণ্ণনা নিট্ঠিতা.

১০. কারণ্ডৰসুত্তৰণ্ণনা

১০. দসমে পটিচরতীতি পটিচ্ছাদনৰসেন চরতি পৰত্ততি. পটিচ্ছাদনট্ঠো এৰ ৰা চরতি-সদ্দো অনেকত্থত্তা ধাতূনন্তি আহ ‘‘পটিচ্ছাদেতী’’তি. অঞ্ঞেনাঞ্ঞন্তি পন পটিচ্ছাদনাকারদস্সনন্তি আহ ‘‘অঞ্ঞেন কারণেনা’’তিআদি. তত্থ অঞ্ঞং কারণং ৰচনং ৰাতি যং চোদকেন চুদিতকস্স দোসৰিভাৰনং কারণং, ৰচনং ৰা ৰুত্তং, তং ততো অঞ্ঞেনেৰ কারণেন, ৰচনেন ৰা পটিচ্ছাদেতি. কারণেনাতি চোদনায অমূলায অমূলিকভাৰদীপনিযা যুত্তিযা ৰা. ৰচনেনাতি তদত্থবোধকেন ৰচনেন. ‘‘কো আপন্নো’’তিআদিনা চোদনং ৰিস্সজ্জেত্ৰাৰ ৰিক্খেপাপজ্জনং অঞ্ঞেনাঞ্ঞং পটিচরণং. বহিদ্ধা কথাপনামনা নাম ‘‘ইত্থন্নামং আপত্তিং আপন্নোসী’’তি ৰুত্তে – ‘‘পাটলিপুত্তং গতোম্হী’’তিআদিনা চোদনং ৰিস্সজ্জেত্ৰাতি অযমেৰ ৰিসেসো. যো হি ‘‘আপত্তিং আপন্নোসী’’তি ৰুত্তো ‘‘কো আপন্নো, কিং আপন্নো, কিস্মিং আপন্না, কং ভণথ, কিং ভণথা’’তি ৰা ৰদতি, ‘‘এৰরূপং কিঞ্চি তযা দিট্ঠ’’ন্তি ৰুত্তে ‘‘ন সুণামী’’তি সোতং ৰা উপনেতি, অযং অঞ্ঞেনাঞ্ঞং পটিচরতি নাম. যো পন ‘‘ইত্থন্নামং নাম আপত্তিং আপন্নোসী’’তি পুট্ঠো ‘‘পাটলিপুত্তং গতোম্হী’’তি ৰত্ৰা পুন ‘‘ন তৰ পাটলিপুত্তগমনং পুচ্ছাম, আপত্তিং পুচ্ছামা’’তি ৰুত্তে ততো ‘‘রাজগহং গতোম্হি. রাজগহং ৰা যাহি ব্রাহ্মণগহং ৰা, আপত্তিং আপন্নোসীতি. তং তত্থ মে সূকরমংসং লদ্ধ’’ন্তিআদীনি ৰদতি, অযং বহিদ্ধা কথং অপনামেতি নাম. সমণকচৰরোতি সমণৰেসধারণেন সমণপ্পতিরূপকতায সমণানং কচৰরভূতং.

কারণ্ডৰং (সু. নি. অট্ঠ. ২.২৮৩-২৮৪) নিদ্ধমথাতি ৰিপন্নসীলতায কচৰরভূতং পুগ্গলং কচৰরমিৰ অনপেক্খা অপনেথ. কসম্বুং অপকস্সথাতি কসম্বুভূতঞ্চ নং খত্তিযাদীনং মজ্ঝগতং পভিন্নপগ্ঘরিতকুট্ঠং চণ্ডালং ৰিয অপকড্ঢথ. কিং কারণং? সঙ্ঘারামো নাম সীলৰন্তানং কতো, ন দুস্সীলানং. যতো এতদেৰ সন্ধাযাহ ‘‘ততো পলাপে ৰাহেথ, অস্সমণে সমণমানিনে’’তি. যথা পলাপা অন্তোসাররহিতা অতণ্ডুলা বহি থুসেন ৰীহী ৰিয দিস্সন্তি, এৰং পাপভিক্খূ অন্তো সীলরহিতাপি বহি কাসাৰাদিপরিক্খারেন ভিক্খূ ৰিয দিস্সন্তি, তস্মা ‘‘পলাপা’’তি ৰুচ্চন্তি. তে পলাপে ৰাহেথ ওপুনথ ৰিধমথ, পরমত্থতো অস্সমণে সমণৰেসমত্তেন সমণমানিনে. কপ্পযৰ্হোতি কপ্পেথ, করোথাতি ৰুত্তং হোতি. পতিস্সতাতি সপ্পতিস্সা. ৰট্টদুক্খস্স অন্তং করিস্সথ, পরিনিব্বানং পাপুণিস্সথাতি অত্থো.

কারণ্ডৰসুত্তৰণ্ণনা নিট্ঠিতা.

মেত্তাৰগ্গৰণ্ণনা নিট্ঠিতা.

২. মহাৰগ্গো

১. ৰেরঞ্জসুত্তৰণ্ণনা

১১. দুতিযস্স পঠমে ৰেরঞ্জাযং ৰিহরতীতি (পারা. অট্ঠ. ১.১) এত্থ ৰেরঞ্জাতি তস্স নগরস্সেতং অধিৰচনং, তস্সং ৰেরঞ্জাযং. সমীপত্থে ভুম্মৰচনং. নল়েরুপুচিমন্দমূলেতি এত্থ নল়েরু নাম যক্খো. পুচিমন্দোতি নিম্বরুক্খো. মূলন্তি সমীপং. অযঞ্হি মূল-সদ্দো ‘‘মূলানি উদ্ধরেয্য অন্তমসো উসীরনাল়িমত্তানিপী’’তিআদীসু (অ. নি. ৪.১৯৫) মূলমূলে দিস্সতি. ‘‘লোভো অকুসলমূল’’ন্তিআদীসু (দী. নি. ৩.৩০৫; পরি. ৩২৩) অসাধারণহেতুম্হি. ‘‘যাৰ মজ্ঝন্হিকে কালে ছাযা ফরতি, নিৰাতে পণ্ণানি পতন্তি, এত্তাৰতা রুক্খমূল’’ন্তিআদীসু (পারা. ৪৯৪) সমীপে. ইধ পন সমীপে অধিপ্পেতো, তস্মা নল়েরুযক্খেন অধিগ্গহিতস্স পুচিমন্দস্স সমীপেতি এৰমেত্থ অত্থো দট্ঠব্বো. সো কির পুচিমন্দো রমণীযো পাসাদিকো অনেকেসং রুক্খানং আধিপচ্চং ৰিয কুরুমানো তস্স নগরস্স অৰিদূরে গমনাগমনসম্পন্নে ঠানে অহোসি. অথ ভগৰা ৰেরঞ্জং গন্ত্ৰা পতিরূপে ঠানে ৰিহরন্তো তস্স রুক্খস্স সমীপে হেট্ঠাভাগে ৰিহাসি. তেন ৰুত্তং ‘‘ৰেরঞ্জাযং ৰিহরতি নল়েরুপুচিমন্দমূলে’’তি.

পচ্চুট্ঠানং (সারত্থ. টী. ১.২) নাম আসনা ৰুট্ঠানন্তি আহ ‘‘নাসনা ৰুট্ঠাতী’’তি. নিসিন্নাসনতো ন ৰুট্ঠহতীতি অত্থো. এত্থ চ জিণ্ণে…পে… ৰযোঅনুপ্পত্তেতি উপযোগৰচনং আসনা ৰুট্ঠানকিরিযাপেক্খং ন হোতি. তস্মা ‘‘জিণ্ণে…পে… ৰযোঅনুপ্পত্তে দিস্ৰা’’তি অজ্ঝাহারং কত্ৰা অত্থো ৰেদিতব্বো. অথ ৰা পচ্চুগ্গমনকিরিযাপেক্খং উপযোগৰচনং, তস্মা ন পচ্চুট্ঠাতীতি উট্ঠায পচ্চুগ্গমনং ন করোতীতি অত্থো ৰেদিতব্বো. পচ্চুগ্গমনম্পি হি পচ্চুট্ঠানন্তি ৰুচ্চতি. ৰুত্তঞ্হেতং ‘‘আচরিযং পন দূরতোৰ দিস্ৰা পচ্চুট্ঠায পচ্চুগ্গমনকরণং পচ্চুট্ঠানং নামা’’তি. নাসনা ৰুট্ঠাতীতি ইমিনা পন পচ্চুগ্গমনাভাৰস্স উপলক্খণমত্তং দস্সিতন্তি দট্ঠব্বং. ৰিভাৰনে নাম অত্থেতি পকতিৰিভাৰনসঙ্খাতে অত্থে. ন অভিৰাদেতি ৰাতি ন অভিৰাদেতব্বন্তি ৰা সল্লক্খেতীতি ৰুত্তং হোতি.

তং অঞ্ঞাণন্তি ‘‘অযং মম অভিৰাদনাদীনি কাতুং অরহরূপো ন হোতী’’তি অজাননৰসেন পৰত্তং অঞ্ঞাণং. ওলোকেন্তোতি ‘‘দুক্খং খো অগারৰো ৰিহরতি অপ্পতিস্সো, কিং নু খো অহং সমণং ৰা ব্রাহ্মণং ৰা সক্করেয্যং গরুং করেয্য’’ন্তিআদিসুত্তৰসেনেৰ (অ. নি. ৪.২১) ঞাণচক্খুনা ওলোকেন্তো. নিপচ্চকারারহন্তি পণিপাতারহং. সম্পতিজাতোতি মুহুত্তজাতো, জাতসমনন্তরমেৰাতি ৰুত্তং হোতি. উত্তরেন মুখোতি উত্তরদিসাভিমুখো. ‘‘সত্তপদৰীতিহারেন গন্ত্ৰা সকলং দসসহস্সিলোকধাতুং ওলোকেসি’’ন্তি ইদং –

‘‘ধম্মতা এসা, ভিক্খৰে, সম্পতিজাতো বোধিসত্তো সমেহি পাদেহি পতিট্ঠহিত্ৰা উত্তরাভিমুখো সত্তপদৰীতিহারেন গচ্ছতি, সেতম্হি ছত্তে অনুধারিযমানে সব্বা দিসা ৰিলোকেতি, আসভিঞ্চ ৰাচং ভাসতী’’তি (দী. নি. ২.৩১) –

এৰং পাল়িযং সত্তপদৰীতিহারুপরি ঠিতস্স ৰিয সব্বাদিসানুলোকনস্স কথিতত্তা ৰুত্তং, ন পনেতং এৰং দট্ঠব্বং সত্তপদৰীতিহারতো পগেৰ দিসাৰিলোকনস্স কতত্তা. মহাসত্তো হি মনুস্সানং হত্থতো মুচ্চিত্ৰা পুরত্থিমং দিসং ওলোকেসি, অনেকানি চক্কৰাল়সহস্সানি একঙ্গণানি অহেসুং. তত্থ দেৰমনুস্সা গন্ধমালাদীহি পূজযমানা, ‘‘মহাপুরিস, ইধ তুম্হেহি সদিসোপি নত্থি, কুতো উত্তরিতরো’’তি আহংসু. এৰং চতস্সো দিসা, চতস্সো অনুদিসা, হেট্ঠা, উপরীতি দসপি দিসা অনুৰিলোকেত্ৰা অত্তনো সদিসং অদিস্ৰা ‘‘অযং উত্তরদিসা’’তি সত্তপদৰীতিহারেন অগমাসীতি ৰেদিতব্বা. ওলোকেসিন্তি মম পুঞ্ঞানুভাৰেন লোকৰিৰরণপাটিহারিযে জাতে পঞ্ঞাযমানং দসসহস্সিলোকধাতুং মংসচক্খুনাৰ ওলোকেসিন্তি অত্থো.

মহাপুরিসোতি জাতিগোত্তকুলপ্পদেসাদিৰসেন মহন্তপুরিসো. অগ্গোতি গুণেহি সব্বপ্পধানো. জেট্ঠোতি গুণৰসেনেৰ সব্বেসং ৰুদ্ধতমো, গুণেহি মহল্লকতমোতি ৰুত্তং হোতি. সেট্ঠোতি গুণৰসেনেৰ সব্বেসং পসত্থতমো. অত্থতো পন পচ্ছিমানি দ্ৰে পুরিমস্সেৰ ৰেৰচনানীতি ৰেদিতব্বং. তযাতি নিস্সক্কে করণৰচনং. উত্তরিতরোতি অধিকতরো. পতিমানেসীতি পূজেসি. আসভিন্তি উত্তমং. ময্হং অভিৰাদনাদিরহো পুগ্গলোতি ময্হং অভিৰাদনাদিকিরিযায অরহো অনুচ্ছৰিকো পুগ্গলো. নিচ্চসাপেক্খতায পনেত্থ সমাসো দট্ঠব্বো. তথাগতাতি তথাগততো, তথাগতস্স সন্তিকাতি ৰুত্তং হোতি. এৰরূপন্তি অভিৰাদনাদিসভাৰং. পরিপাকসিথিলবন্ধনন্তি পরিপাকেন সিথিলবন্ধনং.

তং ৰচনন্তি ‘‘নাহং তং ব্রাহ্মণা’’তিআদিৰচনং. ‘‘নাহং অরসরূপো, মাদিসা ৰা অরসরূপা’’তি ৰুত্তে ব্রাহ্মণো থদ্ধো ভৰেয্য. তেন ৰুত্তং ‘‘চিত্তমুদুভাৰজননত্থ’’ন্তি.

কতমো পন সোতি পরিযাযাপেক্খো পুল্লিঙ্গনিদ্দেসো, কতমো সো পরিযাযোতি অত্থো? জাতিৰসেনাতি খত্তিযাদিজাতিৰসেন. উপপত্তিৰসেনাতি দেৰেসু উপপত্তিৰসেন. সেট্ঠসম্মতানম্পীতি অপি-সদ্দেন পগেৰ অসেট্ঠসম্মতানন্তি দস্সেতি. অভিনন্দন্তানন্তি সপ্পীতিকতণ্হাৰসেন পমোদমানানং. রজ্জন্তানন্তি বলৰরাগৰসেন রজ্জন্তানং. রূপপরিভোগেন উপ্পন্নতণ্হাসম্পযুত্তসোমনস্সৰেদনা রূপতো নিব্বত্তিত্ৰা হদযতপ্পনতো অম্বরসাদযো ৰিয রূপরসাতি ৰুচ্চন্তি. আৰিঞ্চন্তীতি আকড্ঢন্তি. ৰত্থারম্মণাদিসামগ্গিযন্তি ৰত্থুআরম্মণাদিকারণসামগ্গিযং. অনুক্খিপন্তোতি অত্তুক্কংসনৰসেন কথিতে ব্রাহ্মণস্স অসপ্পাযভাৰতো অত্তানং অনুক্খিপন্তো অনুক্কংসেন্তো.

এতস্মিং পনত্থে করণে সামিৰচনন্তি ‘‘জহিতা’’তি এতস্মিং অত্থে তথাগতস্সাতি করণে সামিৰচনং, তথাগতেন জহিতাতি অত্থো. মূলন্তি ভৰমূলং. ‘‘তালৰত্থুকতা’’তি ৰত্তব্বে ‘‘ওট্ঠমুখো’’তিআদীসু ৰিয মজ্ঝেপদলোপং কত্ৰা অ-কারঞ্চ দীঘং কত্ৰা ‘‘তালাৰত্থুকতা’’তি ৰুত্তন্তি আহ ‘‘তালৰত্থু ৰিয নেসং ৰত্থু কতন্তি তালাৰত্থুকতা’’তি. তত্থ তালস্স ৰত্থু তালৰত্থু. যথা আরামস্স ৰত্থুভূতপুব্বো পদেসো আরামস্স অভাৰে ‘‘আরামৰত্থূ’’তি ৰুচ্চতি, এৰং তালস্স পতিট্ঠিতোকাসো সমূলং উদ্ধরিতে তালে পদেসমত্তে ঠিতে তালস্স ৰত্থুভূতপুব্বত্তা ‘‘তালৰত্থূ’’তি ৰুচ্চতি. নেসন্তি রূপরসাদীনং. কথং পন তালৰত্থু ৰিয নেসং ৰত্থু কতন্তি আহ ‘‘যথা হী’’তিআদি. রূপাদিপরিভোগেন উপ্পন্নতণ্হাযুত্তসোমনস্সৰেদনাসঙ্খাতরূপরসাদীনং চিত্তসন্তানস্স অধিট্ঠানভাৰতো ৰুত্তং ‘‘তেসং পুব্বে উপ্পন্নপুব্বভাৰেন ৰত্থুমত্তে চিত্তসন্তানে কতে’’তি. তত্থ পুব্বেতি পুরে, সরাগকালেতি ৰুত্তং হোতি. তালাৰত্থুকতাতি ৰুচ্চন্তীতি তালৰত্থু ৰিয অত্তনো ৰত্থুস্স কতত্তা রূপরসাদযো ‘‘তালাৰত্থুকতা’’তি ৰুচ্চন্তি. এতেন পহীনকিলেসানং পুন উপ্পত্তিযা অভাৰো দস্সিতো.

অৰিরুল়্হিধম্মত্তাতি অৰিরুল়্হিসভাৰতায. মত্থকচ্ছিন্নো তালো পত্তফলাদীনং অৰত্থুভূতো তালাৰত্থূতি আহ ‘‘মত্থকচ্ছিন্নতালো ৰিয কতা’’তি. এতেন ‘‘তালাৰত্থু ৰিয কতাতি তালাৰত্থুকতা’’তি অযং ৰিগ্গহো দস্সিতো. এত্থ পন ‘‘অৰত্থুভূতো তালো ৰিয কতাতি অৰত্থুতালকতা’’তি ৰত্তব্বে ৰিসেসনস্স পরনিপাতং কত্ৰা ‘‘তালাৰত্থুকতা’’তি ৰুত্তন্তি দট্ঠব্বং. ইমিনা পনত্থেন ইদং দস্সেতি – রূপরসাদিৰচনেন ৰিপাকধম্মধম্মা হুত্ৰা পুব্বে উপ্পন্নকুসলাকুসলা ধম্মা গহিতা, তে উপ্পন্নাপি মত্থকসদিসানং তণ্হাৰিজ্জানং মগ্গসত্থেন ছিন্নত্তা আযতিং তালপত্তসদিসে ৰিপাকক্খন্ধে নিব্বত্তেতুং অসমত্থা জাতা, তস্মা তালাৰত্থু ৰিয কতাতি তালাৰত্থুকতা রূপরসাদযোতি. ইমস্মিং অত্থে ‘‘অভিনন্দন্তান’’ন্তি ইমিনা পদেন কুসলসোমনস্সম্পি সঙ্গহিতন্তি ৰদন্তি. অনভাৰং কতাতি এত্থ অনু-সদ্দো পচ্ছাসদ্দেন সমানত্থোতি আহ ‘‘যথা নেসং পচ্ছাভাৰো ন হোতী’’তিআদি.

যঞ্চ খো ত্ৰং সন্ধায ৰদেসি, সো পরিযাযো ন হোতীতি যং ৰন্দনাদিসামগ্গিরসাভাৰসঙ্খাতং কারণং অরসরূপতায ৰদেসি, তং কারণং ন হোতি, ন ৰিজ্জতীতি অত্থো. ননু চাযং ব্রাহ্মণো যং ৰন্দনাদিসামগ্গিরসাভাৰসঙ্খাতপরিযাযং সন্ধায ‘‘অরসরূপো ভৰং গোতমো’’তি আহ, ‘‘সো পরিযাযো নত্থী’’তি ৰুত্তে ৰন্দনাদীনি ভগৰা করোতীতি আপজ্জতীতি ইমং অনিট্ঠপ্পসঙ্গং দস্সেন্তো আহ ‘‘ননু চা’’তিআদি.

সব্বপরিযাযেসূতি সব্বৰারেসু. সন্ধাযভাসিতমত্তন্তি যং সন্ধায ব্রাহ্মণো ‘‘নিব্ভোগো ভৰং গোতমো’’তিআদিমাহ. ভগৰা চ যং সন্ধায নিব্ভোগতাদিং অত্তনি অনুজানাতি, তং সন্ধাযভাসিতমত্তং. ছন্দরাগপরিভোগোতি ছন্দরাগৰসেন পরিভোগো. অপরং পরিযাযন্তি অঞ্ঞং কারণং.

কুলসমুদাচারকম্মন্তি কুলাচারসঙ্খাতং কম্মং, কুলচারিত্তন্তি অত্থো. অকিরিযন্তি অকরণভাৰং. ‘‘অনেকৰিহিতানং পাপকানং অকুসলানং ধম্মান’’ন্তি সামঞ্ঞৰচনেপি পারিসেসঞাযতো ৰুত্তাৰসেসা অকুসলধম্মা গহেতব্বাতি আহ ‘‘ঠপেত্ৰা তে ধম্মে’’তিআদি, তে যথাৰুত্তকাযদুচ্চরিতাদিকে অকুসলধম্মে ঠপেত্ৰাতি অত্থো. অনেকৰিহিতাতি অনেকপ্পকারা.

অযং লোকতন্তীতি অযং ৰুড্ঢানং অভিৰাদনাদিকিরিযলক্খণা লোকপ্পৰেণী. অনাগামিব্রহ্মানং অলঙ্কারাদীসু অনাগামিভিক্খূনঞ্চ চীৰরাদীসু নিকন্তিৰসেন রাগুপ্পত্তি হোতীতি অনাগামিমগ্গেন পঞ্চকামগুণিকরাগস্সেৰ পহানং ৰেদিতব্বন্তি আহ ‘‘পঞ্চকামগুণিকরাগস্সা’’তি. রূপাদীসু পঞ্চসু কামগুণেসু ৰত্থুকামকোট্ঠাসেসু উপ্পজ্জমানো রাগো ‘‘পঞ্চকামগুণিকরাগো’’তি ৰেদিতব্বো. কোট্ঠাসৰচনো হেত্থ গুণ-সদ্দো ‘‘ৰযোগুণা অনুপুব্বং জহন্তী’’তিআদীসু (সং. নি. ১.৪) ৰিয. অকুসলচিত্তদ্ৰযসম্পযুত্তস্সাতি দোমনস্সসহগতচিত্তদ্ৰযসম্পযুত্তস্স. মোহস্স সব্বাকুসলসাধারণত্তা আহ ‘‘সব্বাকুসলসম্ভৰস্সা’’তি. অৰসেসানন্তি সক্কাযদিট্ঠিআদীনং.

জিগুচ্ছতি মঞ্ঞেতি অহমভিজাতো রূপৰা পঞ্ঞৰা কথং নাম অঞ্ঞেসং অভিৰাদনাদিং করেয্যন্তি জিগুচ্ছতি ৰিয, জিগুচ্ছতীতি ৰা সল্লক্খেমি. অকুসলধম্মে জিগুচ্ছমানো তেসং সমঙ্গিভাৰম্পি জিগুচ্ছতীতি ৰুত্তং ‘‘অকুসলানং ধম্মানং সমাপত্তিযা জিগুচ্ছতী’’তি. সমাপত্তীতি এতস্সেৰ ৰেৰচনং সমাপজ্জনা সমঙ্গিভাৰোতি. মণ্ডনজাতিকোতি মণ্ডনকসভাৰো, মণ্ডনকসীলোতি অত্থো. জেগুচ্ছিতন্তি জিগুচ্ছনসীলতং.

লোকজেট্ঠককম্মন্তি লোকজেট্ঠকানং কত্তব্বকম্মং, লোকে ৰা সেট্ঠসম্মতং কম্মং. তত্রাতি তেসু দ্ৰীসুপি অত্থৰিকপ্পেসু. পদাভিহিতো অত্থো পদত্থো, ব্যঞ্জনত্থোতি ৰুত্তং হোতি. ৰিনযং ৰা অরহতীতি এত্থ ৰিনযনং ৰিনযো, নিগ্গণ্হনন্তি অত্থো. তেনাহ ‘‘নিগ্গহং অরহতীতি ৰুত্তং হোতী’’তি. ননু চ পঠমং ৰুত্তেসু দ্ৰীসুপি অত্থৰিকপ্পেসু সকত্থে অরহত্থে চ তদ্ধিতপচ্চযো সদ্দলক্খণতো দিস্সতি, ন পন ‘‘ৰিনযায ধম্মং দেসেতী’’তি ইমস্মিং অত্থে. তস্মা কথমেত্থ তদ্ধিতপচ্চযোতি আহ ‘‘ৰিচিত্রা হি তদ্ধিতৰুত্তী’’তি. ৰিচিত্রতা চেত্থ লোকপ্পমাণতো ৰেদিতব্বা. তথা হি যস্মিং যস্মিং অত্থে তদ্ধিতপ্পযোগো লোকস্স, তত্থ তত্থ তদ্ধিতৰুত্তি লোকতো সিদ্ধাতি ৰিচিত্রা তদ্ধিতৰুত্তি, তস্মা যথা ‘‘মা সদ্দমকাসী’’তি ৰদন্তো ‘‘মাসদ্দিকো’’তি ৰুচ্চতি, এৰং ৰিনযায ধম্মং দেসেতীতি ৰেনযিকোতি ৰুচ্চতীতি অধিপ্পাযো.

কপণপুরিসোতি গুণৰিরহিততায দীনমনুস্সো. ব্যঞ্জনানি অৰিচারেত্ৰাতি তিস্সদত্তাদিসদ্দেসু ৰিয ‘‘ইমস্মিং অত্থে অযং নাম পচ্চযো’’তি এৰং ব্যঞ্জনৰিচারং অকত্ৰা, অনিপ্ফন্নপাটিপদিকৰসেনাতি ৰুত্তং হোতি.

‘‘দেৰলোকগব্ভসম্পত্তিযা’’তি ৰত্ৰাপি ঠপেত্ৰা ভুম্মদেৰে সেসদেৰেসু গব্ভগ্গহণস্স অভাৰতো পটিসন্ধিযেৰেত্থ গব্ভসম্পত্তীতি ৰেদিতব্বাতি ৰুত্তমেৰত্থং ৰিৰরিত্ৰা দস্সেন্তো আহ ‘‘দেৰলোকপটিসন্ধিপটিলাভায সংৰত্ততী’’তি. অস্সাতি অভিৰাদনাদিসামীচিকম্মস্স. মাতুকুচ্ছিস্মিং পটিসন্ধিগ্গহণে দোসং দস্সেন্তোতি মাতিতো অপরিসুদ্ধভাৰং দস্সেন্তো, অক্কোসিতুকামস্স দাসিযা পুত্তোতি দাসিকুচ্ছিম্হি নিব্বত্তভাৰে দোসং দস্সেত্ৰা অক্কোসনং ৰিয ভগৰতো মাতুকুচ্ছিস্মিং পটিসন্ধিগ্গহণে দোসং দস্সেত্ৰা অক্কোসন্তোপি এৰমাহাতি অধিপ্পাযো. গব্ভতোতি দেৰলোকপ্পটিসন্ধিতো. তেনেৰাহ ‘‘অভব্বো দেৰলোকূপপত্তিং পাপুণিতুন্তি অধিপ্পাযো’’তি. ‘‘হীনো ৰা গব্ভো অস্সাতি অপগব্ভো’’তি ইমস্স ৰিগ্গহস্স একেন পরিযাযেন অধিপ্পাযং দস্সেন্তো আহ ‘‘দেৰলোকগব্ভপরিবাহিরত্তা আযতিং হীনগব্ভপটিলাভভাগী’’তি. ইতি-সদ্দো হেতুঅত্থো. যস্মা আযতিম্পি হীনগব্ভপটিলাভভাগী, তস্মা হীনো ৰা গব্ভো অস্সাতি অপগব্ভোতি অধিপ্পাযো. পুন তস্সেৰ ৰিগ্গহস্স ‘‘কোধৰসেন…পে… দস্সেন্তো’’তি হেট্ঠা ৰুত্তনযস্স অনুরূপং কত্ৰা অধিপ্পাযং দস্সেন্তো আহ ‘‘হীনো ৰাস্স মাতুকুচ্ছিস্মিং গব্ভৰাসো অহোসীতি অধিপ্পাযো’’তি. গব্ভ-সদ্দো অত্থি মাতুকুচ্ছিপরিযাযো ‘‘গব্ভে ৰসতি মাণৰো’’তিআদীসু (জা. ১.১৫.৩৬৩) ৰিয. অত্থি মাতুকুচ্ছিস্মিং নিব্বত্তসত্তপরিযাযো ‘‘অন্তমসো গব্ভপাতনং উপাদাযা’’তিআদীসু (মহাৰ. ১২৯) ৰিয. তত্থ মাতুকুচ্ছিপরিযাযং গহেত্ৰা অত্থং দস্সেন্তো আহ ‘‘অনাগতে গব্ভসেয্যা’’তি. গব্ভে সেয্যা গব্ভসেয্যা. অনুত্তরেন মগ্গেনাতি অগ্গমগ্গেন. কম্মকিলেসানং মগ্গেন ৰিহতত্তা আহ ‘‘ৰিহতকারণত্তা’’তি. ইতরা তিস্সোপীতি অণ্ডজসংসেদজওপপাতিকা. এত্থ চ যদিপি ‘‘অপগব্ভো’’তি ইমস্স অনুরূপতো গব্ভসেয্যা এৰ ৰত্তব্বা, পসঙ্গতো পন লব্ভমানং সব্বম্পি ৰত্তুং ৰট্টতীতি পুনব্ভৰাভিনিব্বত্তিপি ৰুত্তাতি ৰেদিতব্বা.

ইদানি সত্তপরিযাযস্স গব্ভ-সদ্দস্স ৰসেন ৰিগ্গহনানত্তং দস্সেন্তো আহ ‘‘অপিচা’’তিআদি. ইমস্মিং পন ৰিকপ্পে গব্ভসেয্যা পুনব্ভৰাভিনিব্বত্তীতি উভযম্পি গব্ভসেয্যৰসেনেৰ ৰুত্তন্তিপি ৰদন্তি. ননু চ ‘‘আযতিং গব্ভসেয্যা পহীনা’’তি ৰুত্তত্তা গব্ভস্স সেয্যা এৰ পহীনা, ন পন গব্ভোতি আপজ্জতীতি আহ ‘‘যথা চা’’তিআদি. অথ ‘‘অভিনিব্বত্তী’’তি এত্তকমেৰ অৰত্ৰা পুনব্ভৰগ্গহণং কিমত্থন্তি আহ ‘‘অভিনিব্বত্তি চ নামা’’তিআদি. অপুনব্ভৰভূতাতি খণে খণে উপ্পজ্জমানানং ধম্মানং অভিনিব্বত্তি.

ধম্মধাতুন্তি এত্থ ধম্মে অনৰসেসে ধারেতি যাথাৰতো উপধারেতীতি ধম্মধাতু, ধম্মানং যথাসভাৰতো অৰবুজ্ঝনসভাৰো, সব্বঞ্ঞুতঞ্ঞাণস্সেতং অধিৰচনং. পটিৰিজ্ঝিত্ৰাতি সচ্ছিকত্ৰা, পটিলভিত্ৰাতি অত্থো, পটিলাভহেতূতি ৰুত্তং হোতি. দেসনাৰিলাসপ্পত্তো হোতীতি রুচিৰসেন পরিৰত্তেত্ৰা দস্সেতুং সমত্থতা দেসনাৰিলাসো, তং পত্তো অধিগতোতি অত্থো. করুণাৰিপ্ফারন্তি সব্বসত্তেসু মহাকরুণায ফরণং. তাদিলক্খণমেৰ পুন উপমায ৰিভাৰেত্ৰা দস্সেন্তো আহ ‘‘পথৰীসমচিত্তত’’ন্তি. যথা পথৰী সুচিঅসুচিনিক্খেপচ্ছেদনভেদনাদীসু ন ৰিকম্পতি, অনুরোধৰিরোধং ন পাপুণাতি, এৰং ইট্ঠানিট্ঠেসু লাভালাভাদীসু অনুরোধৰিরোধপ্পহানতো অৰিকম্পিতচিত্ততায পথৰীসমচিত্ততন্তি অত্থো. অকুপ্পধম্মতন্তি এত্থ অকুপ্পধম্মো নাম ফলসমাপত্তীতি কেচি ৰদন্তি. ‘‘পরেসু পন অক্কোসন্তেসুপি অত্তনো পথৰীসমচিত্ততায অকুপ্পনসভাৰতন্তি এৰমেত্থ অত্থো গহেতব্বো’’তি অম্হাকং খন্তি. জরায অনুসটন্তি জরায পলিৰেঠিতং. ব্রাহ্মণস্স ৰুদ্ধতায আসন্নৰুত্তিমরণন্তি সম্ভাৰনৰসেন ‘‘অজ্জ মরিত্ৰা’’তিআদি ৰুত্তং. ‘‘মহন্তেন খো পন উস্সাহেনা’’তি সাধু খো পন তথারূপানং অরহতং দস্সনং হোতী’’তি এৰং সঞ্জাতমহুস্সাহেন. অপ্পটিসমং পুরেজাতভাৰন্তি অনঞ্ঞসাধারণং পুরেজাতভাৰং. নত্থি এতস্স পটিসমোতি অপ্পটিসমো, পুরেজাতভাৰো.

পক্খে ৰিধুনন্তাতি পত্তে চালেন্তা. নিক্খমন্তানন্তি নিদ্ধারণে সামিৰচনং, নিক্খন্তেসূতি অত্থো.

সো জেট্ঠো ইতি অস্স ৰচনীযোতি যো পঠমতরং অণ্ডকোসতো নিক্খন্তো কুক্কুটপোতকো, সো জেট্ঠোতি ৰচনীযো অস্স, ভৰেয্যাতি অত্থো. সম্পটিপাদেন্তোতি সংসন্দেন্তো. তিভূমপরিযাপন্নাপি সত্তা অৰিজ্জাকোসস্স অন্তো পৰিট্ঠা তত্থ তত্থ অপ্পহীনায অৰিজ্জায ৰেঠিতত্তাতি আহ ‘‘অৰিজ্জাকোসস্স অন্তো পৰিট্ঠেসু সত্তেসূ’’তি অণ্ডকোসন্তি বীজকপালং. লোকসন্নিৰাসেতি লোকোযেৰ সঙ্গম্ম সমাগম্ম নিৰাসনট্ঠেন লোকসন্নিৰাসো, সত্তনিকাযো. সম্মাসম্বোধিন্তি এত্থ সম্মাতি অৰিপরীতত্থো, সং-সদ্দো সামন্তি ইমমত্থং দীপেতি. তস্মা সম্মা অৰিপরীতেনাকারেন সযমেৰ চত্তারি সচ্চানি বুজ্ঝতি পটিৰিজ্ঝতীতি সম্মাসম্বোধীতি মগ্গো ৰুচ্চতি. তেনাহ ‘‘সম্মা সামঞ্চ বোধি’’ন্তি, সম্মা সযমেৰ চ বুজ্ঝনকন্তি অত্থো. সম্মাতি ৰা পসত্থৰচনো, সং-সদ্দো সুন্দরৰচনোতি আহ ‘‘অথ ৰা পসত্থং সুন্দরঞ্চ বোধি’’ন্তি.

অসব্বগুণদাযকত্তাতি সব্বগুণানং অদাযকত্তা. সব্বগুণে ন দদাতীতি হি অসব্বগুণদাযকো, অসমত্থসমাসোযং গমকত্তা যথা ‘‘অসূরিযপস্সানি মুখানী’’তি. তিস্সো ৰিজ্জাতি উপনিস্সযৰতো সহেৰ অরহত্তফলেন তিস্সো ৰিজ্জা দেতি. ননু চেত্থ তীসু ৰিজ্জাসু আসৰক্খযঞাণস্স মগ্গপরিযাপন্নত্তা কথমেতং যুজ্জতি ‘‘মগ্গো তিস্সো ৰিজ্জা দেতী’’তি? নাযং দোসো. সতিপি আসৰক্খযঞাণস্স মগ্গপরিযাপন্নভাৰে অট্ঠঙ্গিকে মগ্গে সতি মগ্গঞাণেন সদ্ধিং তিস্সো ৰিজ্জা পরিপুণ্ণা হোন্তীতি ‘‘মগ্গো তিস্সো ৰিজ্জা দেতী’’তি ৰুচ্চতি. ছ অভিঞ্ঞাতি এত্থাপি এসেৰ নযো. সাৰকপারমিঞাণন্তি অগ্গসাৰকেহি পটিলভিতব্বমেৰ লোকিযলোকুত্তরঞাণং. পচ্চেকবোধিঞাণন্তি এত্থাপি ইমিনাৰ নযেন অত্থো ৰেদিতব্বো. অব্ভঞ্ঞাসিন্তি জানিং. জাননঞ্চ ন অনুস্সৰাদিৰসেনাতি আহ ‘‘পটিৰিজ্ঝি’’ন্তি, পচ্চক্খমকাসিন্তি অত্থো. পটিৰেধোপি ন দূরে ঠিতস্স লক্খণপ্পটিৰেধো ৰিযাতি আহ ‘‘পত্তোম্হী’’তি, পাপুণিন্তি অত্থো. পাপুণনঞ্চ ন সযং গন্ত্ৰাতি আহ ‘‘অধিগতোম্হী’’তি, সন্তানে উপ্পাদনৰসেন পটিলভিন্তি অত্থো.

ওপম্মসম্পটিপাদনন্তি ওপম্মত্থস্স উপমেয্যেন সম্মদেৰ পটিপাদনং. অত্থেনাতি উপমেয্যত্থেন. যথা কুক্কুটিযা অণ্ডেসু তিৰিধকিরিযাকরণং কুক্কুটচ্ছাপকানং অণ্ডকোসতো নিক্খমনস্স মূলকারণং, এৰং বোধিসত্তভূতস্স ভগৰতো তিৰিধানুপস্সনাকরণং অৰিজ্জণ্ডকোসতো নিক্খমনস্স মূলকারণন্তি আহ ‘‘যথা হি তস্সা কুক্কুটিযা…পে… তিৰিধানুপস্সনাকরণ’’ন্তি. ‘‘সন্তানে’’তি ৰুত্তত্তা অণ্ডসদিসতা সন্তানস্স, বহি নিক্খন্তকুক্কুটচ্ছাপকসদিসতা বুদ্ধগুণানং, বুদ্ধগুণাতি চ অত্থতো বুদ্ধোযেৰ ‘‘তথাগতস্স খো এতং, ৰাসেট্ঠ, অধিৰচনং ধম্মকাযো ইতিপী’’তি ৰচনতো. অৰিজ্জণ্ডকোসস্স তনুভাৰোতি বলৰৰিপস্সনাৰসেন অৰিজ্জণ্ডকোসস্স তনুভাৰো, পটিচ্ছাদনসামঞ্ঞেন চ অৰিজ্জায অণ্ডকোসসদিসতা. মুদুভূতস্সপি খরভাৰাপত্তি হোতীতি তন্নিৰত্তনত্থং ‘‘থদ্ধখরভাৰো’’তি ৰুত্তং. তিক্খখরৰিপ্পসন্নসূরভাৰোতি এত্থ পরিগ্গয্হমানেসু সঙ্খারেসু ৰিপস্সনাঞাণস্স সমাধিন্দ্রিযৰসেন সুখানুপ্পৰেসো তিক্খতা, অনুপৰিসিত্ৰাপি সতিন্দ্রিযৰসেন অনতিক্কমনতো অকুণ্ঠতা খরভাৰো. তিক্খোপি হি একচ্চো সরো লক্খং পত্ৰা কুণ্ঠো হোতি, ন তথা ইদং. সতিপি খরভাৰে সুখুমপ্পৰত্তিৰসেন কিলেসসমুদাচারসঙ্খোভরহিততায সদ্ধিন্দ্রিযৰসেন পসন্নভাৰো, সতিপি পসন্নভাৰে অন্তরা অনোসক্কিত্ৰা কিলেসপচ্চত্থিকানং সুট্ঠু অভিভৰনতো ৰীরিযিন্দ্রিযৰসেন সূরভাৰো ৰেদিতব্বো. এৰমিমেহি পকারেহি সঙ্খারুপেক্খাঞাণমেৰ গহিতন্তি দট্ঠব্বং. ৰিপস্সনাঞাণস্স পরিণামকালোতি ৰিপস্সনায ৰুট্ঠানগামিনিভাৰাপত্তি. তদা চ সা মগ্গঞাণগব্ভং ধারেন্তী ৰিয হোতীতি আহ ‘‘গব্ভগ্গহণকালো’’তি. গব্ভং গণ্হাপেত্ৰাতি সঙ্খারুপেক্খায অনন্তরং সিখাপ্পত্তঅনুলোমৰিপস্সনাৰসেন মগ্গৰিজাযনত্থং গব্ভং গণ্হাপেত্ৰা. অভিঞ্ঞাপক্খেতি লোকিযাভিঞ্ঞাপক্খে. লোকুত্তরাভিঞ্ঞা হি অৰিজ্জণ্ডকোসং পদালিতা. পোত্থকেসু পন কত্থচি ‘‘ছাভিঞ্ঞাপক্খে’’তি লিখন্তি, সো অপাঠোতি ৰেদিতব্বো.

জেট্ঠো সেট্ঠোতি ৰুদ্ধতমত্তা জেট্ঠো, সব্বগুণেহি উত্তমত্তা পসত্থতমোতি সেট্ঠো.

ইদানি ‘‘আরদ্ধং খো পন মে, ব্রাহ্মণ, ৰীরিয’’ন্তিআদিকায দেসনায অনুসন্ধিং দস্সেন্তো আহ ‘‘এৰং ভগৰা’’তিআদি. তত্থ পুব্বভাগতো পভুতীতি ভাৰনায পুব্বভাগীযৰীরিযারম্ভাদিতো পট্ঠায. মুট্ঠস্সতিনাতি ৰিনট্ঠস্সতিনা, সতিৰিরহিতেনাতি অত্থো. সারদ্ধকাযেনাতি সদরথকাযেন. বোধিমণ্ডেতি বোধিসঙ্খাতস্স ঞাণস্স মণ্ডভাৰপ্পত্তে ঠানে. বোধীতি হি পঞ্ঞা ৰুচ্চতি. সা এত্থ মণ্ডা পসন্না জাতাতি সো পদেসো ‘‘বোধিমণ্ডো’’তি পঞ্ঞাতো. পগ্গহিতন্তি আরম্ভং সিথিলং অকত্ৰা দল়্হপরক্কমসঙ্খাতুস্সহনভাৰেন গহিতং. তেনাহ ‘‘অসিথিলপ্পৰত্তিত’’ন্তি. অসল্লীনন্তি অসঙ্কুচিতং কোসজ্জৰসেন সঙ্কোচং অনাপন্নং. উপট্ঠিতাতি ওগাহনসঙ্খাতেন অপিলাপনভাৰেন আরম্মণং উপগন্ত্ৰা ঠিতা. তেনাহ ‘‘আরম্মণাভিমুখীভাৰেনা’’তি. সম্মোসস্স ৰিদ্ধংসনৰসেন পৰত্তিযা ন সম্মুট্ঠাতি অসম্মুট্ঠা. কিঞ্চাপি চিত্তপ্পস্সদ্ধিৰসেন চিত্তমেৰ পস্সদ্ধং, কাযপ্পস্সদ্ধিৰসেনেৰ চ কাযো পস্সদ্ধো হোতি, তথাপি যস্মা কাযপ্পস্সদ্ধি উপ্পজ্জমানা চিত্তপ্পস্সদ্ধিযা সহেৰ উপ্পজ্জতি, ন ৰিনা, তস্মা ৰুত্তং ‘‘কাযচিত্তপ্পস্সদ্ধিৰসেনা’’তি. কাযপ্পস্সদ্ধিযা উভযেসম্পি কাযানং পস্সম্ভনাৰহত্তা ৰুত্তং ‘‘রূপকাযোপি পস্সদ্ধোযেৰ হোতী’’তি.

সো চ খোতি সো চ খো কাযো. ৰিগতদরথোতি ৰিগতকিলেসদরথো. নামকাযে হি ৰিগতদরথে রূপকাযোপি ৰূপসন্তদরথপরিল়াহো হোতি. সম্মা আহিতন্তি নানারম্মণেসু ৰিধাৰনসঙ্খাতং ৰিক্খেপং ৰিচ্ছিন্দিত্ৰা একস্মিংযেৰ আরম্মণে অৰিক্খিত্তভাৰাপাদনেন সম্মদেৰ আহিতং ঠপিতং. তেনাহ ‘‘সুট্ঠু ঠপিত’’ন্তিআদি. চিত্তস্স অনেকগ্গভাৰো ৰিক্খেপৰসেন চঞ্চলতা, সা সতি একগ্গতায ন হোতীতি আহ ‘‘একগ্গং অচলং নিপ্ফন্দন’’ন্তি. এত্তাৰতাতি ‘‘আরদ্ধং খো পনা’’তিআদিনা ৰীরিযসতিপস্সদ্ধিসমাধীনং কিচ্চসিদ্ধিদস্সনেন. ননু চ সদ্ধাপঞ্ঞানম্পি কিচ্চসিদ্ধি ঝানস্স পুব্বভাগপ্পটিপদায ইচ্ছিতব্বাতি? সচ্চং, সা পন নানন্তরিকভাৰেন অৰুত্তসিদ্ধাতি ন গহিতা. অসতি হি সদ্ধায ৰীরিযারম্ভাদীনং অসম্ভৰোযেৰ, পঞ্ঞাপরিগ্গহে চ নেসং অসতি ঞাযারম্ভাদিভাৰো ন সিযা, তথা অসল্লীনাসম্মোসতাদযো ৰীরিযাদীনন্তি অসল্লীনতাদিগ্গহণেনেৰেত্থ পঞ্ঞাকিচ্চসিদ্ধি গহিতাতি দট্ঠব্বং. ঝানভাৰনাযং ৰা সমাধিকিচ্চং অধিকং ইচ্ছিতব্বন্তি দস্সেতুং সমাধিপরিযোসানাৰ ঝানস্স পুব্বভাগপ্পটিপদা কথিতাতি দট্ঠব্বং.

অতীতভৰে খন্ধা তপ্পটিবদ্ধানি নামগোত্তানি চ সব্বং পুব্বেনিৰাসংত্ৰেৰ গহিতন্তি আহ ‘‘কিং ৰিদিতং করোতি? পুব্বেনিৰাস’’ন্তি. মোহো পটিচ্ছাদকট্ঠেন তমো ৰিয তমোতি আহ ‘‘স্ৰেৰ মোহো’’তি. ওভাসকরণট্ঠেনাতি কাতব্বতো করণং. ওভাসোৰ করণং ওভাসকরণং. অত্তনো পচ্চযেহি ওভাসভাৰেন নিব্বত্তেতব্বট্ঠেনাতি অত্থো. সেসং পসংসাৰচনন্তি পটিপক্খৰিধমনপৰত্তিৰিসেসানং বোধনতো ৰুত্তং. অৰিজ্জা ৰিহতাতি এতেন ৰিজাননট্ঠেন ৰিজ্জাতি অযম্পি অত্থো দীপিতোতি দট্ঠব্বং. ‘‘কস্মা? যস্মা ৰিজ্জা উপ্পন্না’’তি এতেন ৰিজ্জাপটিপক্খা অৰিজ্জা. পটিপক্খতা চস্সা পহাতব্বভাৰেন ৰিজ্জায চ পহাযকভাৰেনাতি দস্সেতি. এস নযো ইতরস্মিম্পি পদদ্ৰযেতি ইমিনা ‘‘তমো ৰিহতো ৰিনট্ঠো. কস্মা? যস্মা আলোকো উপ্পন্নো’’তি ইমমত্থং অতিদিসতি. কিলেসানং আতাপনপরিতাপনট্ঠেন ৰীরিযং আতাপোতি আহ ‘‘ৰীরিযাতাপেন আতাপিনো’’তি, ৰীরিযৰতোতি অত্থো. পেসিতত্তস্সাতি যথাধিপ্পেতত্থসিদ্ধিং পতি ৰিস্সট্ঠচিত্তস্স. যথা অপ্পমত্তস্স আতাপিনো পহিতত্তস্স ৰিহরতোতি অঞ্ঞস্সপি কস্সচি মাদিসস্সাতি অধিপ্পাযো. পধানানুযোগস্সাতি সম্মপ্পধানমনুযুত্তস্স.

পচ্চৰেক্খণঞাণপরিগ্গহিতন্তি ন পঠমদুতিযঞাণদ্ৰযাধিগমং ৰিয কেৰলন্তি অধিপ্পাযো. দস্সেন্তোতি নিগমনৰসেন দস্সেন্তো. সরূপতো হি পুব্বে দস্সিতমেৰাতি.

তিক্খত্তুং জাতোতি ইমিনা পন ইদং দস্সেতি – ‘‘অহং, ব্রাহ্মণ, পঠমৰিজ্জায জাতোযেৰ পুরেজাতস্স সহজাতস্স ৰা অভাৰতো সব্বেসং ৰুদ্ধো মহল্লকো, কিমঙ্গং পন তীহি ৰিজ্জাহি তিক্খত্তুং জাতো’’তি. পুব্বেনিৰাসঞাণেন অতীতংসঞাণন্তি অতীতারম্মণসভাগতায তব্ভাৰিভাৰতো চ পুব্বেনিৰাসঞাণেন অতীতংসঞাণং পকাসেত্ৰাতি যোজেতব্বং. তত্থ অতীতংসঞাণন্তি অতীতক্খন্ধাযতনধাতুসঙ্খাতে অতীতে কোট্ঠাসে অপ্পটিহতঞাণং. দিব্বচক্খুঞাণস্স পচ্চুপ্পন্নারম্মণত্তা যথাকম্মূপগঞাণস্স অনাগতংসঞাণস্স চ দিব্বচক্খুৰসেনেৰ ইজ্ঝনতো দিব্বচক্খুনো পরিভণ্ডঞাণত্তা দিব্বচক্খুম্হিযেৰ চ ঠিতস্স চেতোপরিযঞাণসিদ্ধিতো ৰুত্তং ‘‘দিব্বচক্খুনা পচ্চুপ্পন্নানাগতংসঞাণ’’ন্তি. তত্থ দিব্বচক্খুনাতি সপরিভণ্ডেন দিব্বচক্খুঞাণেন. পচ্চুপ্পন্নংসো চ অনাগতংসো চ পচ্চুপ্পন্নানাগতংসং, তত্থ ঞাণং পচ্চুপ্পন্নানাগতংসঞাণং. আসৰক্খযঞাণাধিগমেনেৰ সব্বঞ্ঞুতঞ্ঞাণস্স ৰিয সেসাসাধারণছঞাণদসবলঞাণআৰেণিকবুদ্ধধম্মাদীনম্পি অনঞ্ঞসাধারণানং বুদ্ধগুণানং ইজ্ঝনতো ৰুত্তং ‘‘আসৰক্খযেন সকললোকিযলোকুত্তরগুণ’’ন্তি. তেনাহ ‘‘সব্বেপি সব্বঞ্ঞুগুণে পকাসেত্ৰা’’তি.

পীতিৰিপ্ফারপরিপুণ্ণগত্তচিত্তোতি পীতিফরণেন পরিপুণ্ণকাযচিত্তো. অঞ্ঞাণন্তি অঞ্ঞাণস্সাতি অত্থো. ধি-সদ্দযোগতো হি সামিঅত্থে এতং উপযোগৰচনং. সেসমেত্থ সুৰিঞ্ঞেয্যমেৰ.

ৰেরঞ্জসুত্তৰণ্ণনা নিট্ঠিতা.

২. সীহসুত্তৰণ্ণনা

১২. দুতিযে সন্থাগারং (ম. নি. অট্ঠ. ১.২২; সং. নি. অট্ঠ. ৩.৪.২৪৩) নাম একা মহাসালাৰ. উয্যোগকালাদীসু হি রাজানো তত্থ ঠত্ৰা ‘‘এত্তকা পুরতো গচ্ছন্তু, এত্তকা পচ্ছা’’তিআদিনা তত্থ নিসীদিত্ৰা সন্থং করোন্তি, মরিযাদং বন্ধন্তি, তস্মা তং ঠানং ‘‘সন্থাগার’’ন্তি ৰুচ্চতি. উয্যোগট্ঠানতো চ আগন্ত্ৰা যাৰ গেহে গোমযপরিভণ্ডাদিৰসেন পটিজগ্গনং করোন্তি, তাৰ একং দ্ৰে দিৰসে তে রাজানো তত্থ সন্থম্ভন্তীতিপি সন্থাগারং. তেসং রাজূনং সহ অত্থানুসাসনং অগারন্তিপি সন্থাগারং. গণরাজানো হি তে, তস্মা উপ্পন্নং কিচ্চং একস্স ৰসেন ন সিজ্ঝতি, সব্বেসং ছন্দো লদ্ধুং ৰট্টতি, তস্মা সব্বে তত্থ সন্নিপতিত্ৰা অনুসাসন্তি. তেন ৰুত্তং ‘‘সহ অত্থানুসাসনং অগার’’ন্তি. যস্মা ৰা তত্থ সন্নিপতিত্ৰা ‘‘ইমস্মিং কালে কসিতুং ৰট্টতি, ইমস্মিং কালে ৰপিতু’’ন্তিআদিনা নযেন ঘরাৰাসকিচ্চানি সম্মন্তযন্তি, তস্মা ছিদ্দাৰছিদ্দং ঘরাৰাসং সন্থরন্তীতিপি সন্থাগারং.

পুত্তদারধনাদিউপকরণপরিচ্চাগো পারমিযো. অত্তনো অঙ্গপরিচ্চাগো উপপারমিযো. অত্তনোৰ জীৰিতপরিচ্চাগো পরমত্থপারমিযো. ঞাতীনং অত্থচরিযা ঞাতত্থচরিযা. লোকস্স অত্থচরিযা লোকত্থচরিযা. কম্মস্সকতঞাণৰসেন অনৰজ্জকম্মাযতনসিপ্পাযতনৰিজ্জাট্ঠানপরিচযৰসেন খন্ধাযতনাদিপরিচযৰসেন লক্খণত্তযতীরণৰসেন চ ঞাণচারো বুদ্ধচরিযা. অঙ্গনযনধনরজ্জপুত্তদারপরিজ্জাগৰসেন পঞ্চ মহাপরিচ্চাগে পরিচ্চজন্তেন. সতিপি মহাপরিচ্চাগানং দানপারমিভাৰে পরিচ্চাগৰিসেসসভাৰদস্সনত্থঞ্চেৰ সুদুক্করভাৰদস্সনত্থঞ্চ পঞ্চমহাপরিচ্চাগানং ৰিসুং গহণং, ততোযেৰ চ অঙ্গপরিচ্চাগতো ৰিসুং নযনপরিচ্চাগগ্গহণং. পরিচ্চাগভাৰসামঞ্ঞেপি ধনরজ্জপরিচ্চাগতো পুত্তদারপরিচ্চাগগ্গহণঞ্চ ৰিসুং কতং. পব্বজ্জাৰ সঙ্খেপো.

সত্তসু অনুপস্সনাসূতি অনিচ্চানুপস্সনা, দুক্খানুপস্সনা, অনত্তানুপস্সনা, নিব্বিদানুপস্সনা, ৰিরাগানুপস্সনা, নিরোধানুপস্সনা, পটিনিস্সগ্গানুপস্সনাতি ইমাসু সত্তসু অনুপস্সনাসু.

অনুৰিচ্চকারন্তি অৰেচ্চকরণং. দ্ৰীহি কারণেহি অনিয্যানিকসাসনে ঠিতা অত্তনো সাৰকত্তং উপগতে পগ্গণ্হন্তি, তানি দস্সেতুং ‘‘কস্মা’’তিআদি ৰুত্তং.

অনুপুব্বিং কথন্তি (দী. নি. টী. ২.৭৫-৭৬) অনুপুব্বং কথেতব্বকথং. কা পন সাতি? দানাদিকথা. তত্থ দানকথা তাৰ পচুরজনেসুপি পৰত্তিযা সব্বসত্তসাধারণত্তা সুকরত্তা সীলে পতিট্ঠানস্স উপাযভাৰতো চ আদিতো কথিতা. পরিচ্চাগসীলো হি পুগ্গলো পরিগ্গহৰত্থূসু নিস্সঙ্গভাৰতো সুখেনেৰ সীলানি সমাদিযতি, তত্থ চ সুপ্পতিট্ঠিতো হোতি. সীলেন দাযকপ্পটিগ্গাহকৰিসুদ্ধিতো পরানুগ্গহং ৰত্ৰা পরপীল়ানিৰত্তিৰচনতো কিরিযাধম্মং ৰত্ৰা অকিরিযাধম্মৰচনতো, ভোগসম্পত্তিহেতুং ৰত্ৰা ভৰসম্পত্তিহেতুৰচনতো চ দানকথানন্তরং সীলকথা কথিতা. ‘‘তঞ্চ সীলং ৰট্টনিস্সিতং, অযং ভৰসম্পত্তি তস্স ফল’’ন্তি দস্সনত্থং. ‘‘ইমেহি চ দানসীলমযেহি পণীতপণীততরাদিভেদভিন্নেহি পুঞ্ঞকিরিযৰত্থূহি এতা চাতুমহারাজিকাদীসু পণীতপণীততরাদিভেদভিন্না অপরিমেয্যা দিব্বভোগসম্পত্তিযো লদ্ধব্বা’’তি দস্সনত্থং তদনন্তরং সগ্গকথা. ‘‘স্ৰাযং সগ্গো রাগাদীহি উপক্কিলিট্ঠো, সব্বথানুপক্কিলিট্ঠো অরিযমগ্গো’’তি দস্সনত্থং সগ্গানন্তরং মগ্গো, মগ্গঞ্চ কথেন্তেন তদধিগমূপাযসন্দস্সনত্থং সগ্গপরিযাপন্নাপি পগেৰ ইতরে সব্বেপি কামা নাম বহ্ৰাদীনৰা অনিচ্চা অদ্ধুৰা ৰিপরিণামধম্মাতি কামানং আদীনৰো. ‘‘হীনা গম্মা পোথুজ্জনিকা অনরিযা অনত্থসংহিতা’’তি তেসং ওকারো লামকভাৰো. সব্বেপি ভৰা কিলেসানং ৰত্থুভূতাতি তত্থ সংকিলেসো. সব্বসো সংকিলেসৰিপ্পমুত্তং নিব্বানন্তি নেক্খম্মে আনিসংসো চ কথেতব্বোতি অযমত্থো মগ্গন্তীতি এত্থ ইতি-সদ্দেন আদি-অত্থেন দীপিতোতি ৰেদিতব্বং.

সুখানং নিদানন্তি দিট্ঠধম্মিকানং সম্পরাযিকানং নিব্বানুপসংহিতানঞ্চাতি সব্বেসম্পি সুখানং কারণং. যঞ্হি কিঞ্চি লোকে ভোগসুখং নাম, তং সব্বং দানাধীনন্তি পাকটোযমত্থো. যং পন ঝানৰিপস্সনামগ্গফলনিব্বানপ্পটিসংযুত্তং সুখং, তস্সপি দানং উপনিস্সযপচ্চযো হোতিযেৰ. সম্পত্তীনং মূলন্তি যা ইমা লোকে পদেসরজ্জসিরিস্সরিযসত্তরতনসমুজ্জলচক্কৰত্তিসম্পদাতি এৰংপভেদা মানুসিকা সম্পত্তিযো, যা চ চাতুমহারাজিকাদিগতা দিব্বসম্পত্তিযো, যা ৰা পনঞ্ঞাপি সম্পত্তিযো, তাসং সব্বাসং ইদং মূলকারণং. ভোগানন্তি ভুঞ্জিতব্বট্ঠেন ‘‘ভোগো’’তি লদ্ধনামানং পিযমনাপিযরূপাদীনং তন্নিস্সযানং ৰা উপভোগসুখানং পতিট্ঠা নিচ্চলাধিট্ঠানতায. ৰিসমগতস্সাতি ব্যসনপ্পত্তস্স. তাণন্তি রক্খা, ততো পরিপালনতো. লেণন্তি ব্যসনেহি পরিপাতিযমানস্স ওলীযনপ্পদেসো. গতীতি গন্তব্বট্ঠানং. পরাযণন্তি পটিসরণং. অৰস্সযোতি ৰিনিপতিতুং অদেন্তো নিস্সযো. আরম্মণন্তি ওলুব্ভারম্মণং.

রতনমযসীহাসনসদিসন্তি সব্বরতনমযসত্তঙ্গমহাসীহাসনসদিসং. এৰং হিস্স মহগ্ঘং হুত্ৰা সব্বসো ৰিনিপতিতুং অপ্পদানট্ঠো দীপিতো হোতি. মহাপথৰীসদিসং গতগতট্ঠানে পতিট্ঠানস্স লভাপনতো. যথা দুব্বলস্স পুরিসস্স আলম্বনরজ্জু উত্তিট্ঠতো তিট্ঠতো চ উপত্থম্ভো, এৰং দানং সত্তানং সম্পত্তিভৰে উপপত্তিযা ঠিতিযা চ পচ্চযোতি আহ ‘‘আলম্বনট্ঠেন আলম্বনরজ্জুসদিস’’ন্তি. দুক্খনিত্থরণট্ঠেনাতি দুগ্গতিদুক্খট্ঠাননিত্থরণট্ঠেন. সমস্সাসনট্ঠেনাতি লোভমচ্ছরিযাদিপটিসত্তুপদ্দৰতো সমস্সাসনট্ঠেন. ভযপরিত্তাণট্ঠেনাতি দালিদ্দিযভযতো পরিপালনট্ঠেন. মচ্ছেরমলাদীহীতি মচ্ছেরলোভদোসমদইস্সামিচ্ছাদিট্ঠিৰিচিকিচ্ছাদিচিত্তমলেহি. অনুপলিত্তট্ঠেনাতি অনুপক্কিলিট্ঠতায. তেসন্তি মচ্ছেরমলাদীনং. তেসং এৰ দুরাসদট্ঠেন. অসন্তাসনট্ঠেনাতি সন্তাসহেতুঅভাৰেন. যো হি দাযকো দানপতি, সো সম্পতিপি ন কুতোচি সন্তসতি, পগেৰ আযতিং. বলৰন্তট্ঠেনাতি মহাবলৰতায. দাযকো হি দানপতি সম্পতি পক্খবলেন বলৰা হোতি, আযতিং পন কাযবলাদীহিপি. অভিমঙ্গলসম্মতট্ঠেনাতি ‘‘ৰড্ঢিকারণ’’ন্তি অভিসম্মতভাৰেন. ৰিপত্তিভৰতো সম্পত্তিভৰূপনযনং খেমন্তভূমিসম্পাপনং.

ইদানি মহাবোধিচরিযভাৰেনপি দানগুণং দস্সেতুং ‘‘দানং নামেত’’ন্তিআদি ৰুত্তং. তত্থ অত্তানং নিয্যাতেন্তেনাতি এতেন ‘‘দানফলং সম্মদেৰ পস্সন্তা মহাপুরিসা অত্তনো জীৰিতম্পি পরিচ্চজন্তি, তস্মা কো নাম ৰিঞ্ঞুজাতিকো বাহিরে ৰত্থুস্মিং পগেৰ সঙ্গং করেয্যা’’তি ওৰাদং দেতি. ইদানি যা লোকিযা লোকুত্তরা চ উক্কংসগতা সম্পত্তিযো, তা সব্বা দানতোযেৰ পৰত্তন্তীতি দস্সেন্তো ‘‘দানঞ্হী’’তিআদিমাহ. তত্থ সক্কমারব্রহ্মসম্পত্তিযো অত্তহিতায এৰ, চক্কৰত্তিসম্পত্তি পন অত্তহিতায পরহিতায চাতি দস্সেতুং সা তাসং পরতো চক্কৰত্তিসম্পত্তি ৰুত্তা. এতা লোকিযা, ইমা পন লোকুত্তরাতি দস্সেতুং ‘‘সাৰকপারমিঞাণ’’ন্তিআদি ৰুত্তং. তাসুপি উক্কট্ঠুক্কট্ঠতরুক্কট্ঠতমতং দস্সেতুং কমেন ঞাণত্তযং ৰুত্তং. তেসং পন দানস্স পচ্চযভাৰো হেট্ঠা ৰুত্তোযেৰ. এতেনেৰ তস্স ব্রহ্মসম্পত্তিযাপি পচ্চযভাৰো দীপিতোতি ৰেদিতব্বো.

দানঞ্চ নাম দক্খিণেয্যেসু হিতজ্ঝাসযেন পূজনজ্ঝাসযেন ৰা অত্তনো সন্তকস্স পরেসং পরিচ্চজনং, তস্মা দাযকো পুরিসপুগ্গলো পরে হন্তি, পরেসং ৰা সন্তকং হরতীতি অট্ঠানমেতন্তি আহ ‘‘দানং দেন্তো সীলং সমাদাতুং সক্কোতী’’তি. সীলালঙ্কারসদিসো অলঙ্কারো নত্থি সোভাৰিসেসাৰহত্তা সীলস্স. সীলপুপ্ফসদিসং পুপ্ফং নত্থীতি এত্থাপি এসেৰ নযো. সীলগন্ধসদিসো গন্ধো নত্থীতি এত্থ ‘‘চন্দনং তগরং ৰাপী’’তিআদিকা (ধ. প. ৫৫) গাথা – ‘‘গন্ধো ইসীনং চিরদিক্খিতানং, কাযা চুতো গচ্ছতি মালুতেনা’’তিআদিকা (জা. ২.১৭.৫৫) জাতকগাথাযো চ আহরিত্ৰা ৰত্তব্বা. সীলঞ্হি সত্তানং আভরণঞ্চেৰ অলঙ্কারো চ গন্ধৰিলেপনঞ্চ পরস্স দস্সনীযভাৰাৰহঞ্চ. তেনাহ ‘‘সীলালঙ্কারেন হী’’তিআদি.

অযং সগ্গো লব্ভতীতি ইদং মজ্ঝিমেহি আরদ্ধং সীলং সন্ধাযাহ. তেনেৰাহ সক্কো দেৰরাজা –

‘‘হীনেন ব্রহ্মচরিযেন, খত্তিযে উপপজ্জতি;

মজ্ঝিমেন চ দেৰত্তং, উত্তমেন ৰিসুজ্ঝতী’’তি. (জা. ১.৮.৭৫);

ইট্ঠোতি সুখো. কন্তোতি কমনীযো. মনাপোতি মনৰড্ঢনকো. তং পন তস্স ইট্ঠাদিভাৰং দস্সেতুং ‘‘নিচ্চমেত্থ কীল়া’’তিআদি ৰুত্তং.

দোসোতি অনিচ্চতাদিনা অপ্পস্সাদাদিনা চ দূসিতভাৰো, যতো তে ৰিঞ্ঞূনং চিত্তং নারাধেন্তি. অথ ৰা আদীনং ৰাতি পৰত্ততীতি আদীনৰো, পরমকপণতা. তথা চ কামা যথাতথং পচ্চৰেক্খন্তানং পচ্চুপতিট্ঠন্তি. লামকভাৰোতি অসেট্ঠেহি সেৰিতব্বো, সেট্ঠেহি ন সেৰিতব্বো নিহীনভাৰো. সংকিলিস্সনন্তি ৰিবাধকতা উপতাপকতা চ.

নেক্খম্মে আনিসংসন্তি এত্থ ‘‘যত্তকা কামেসু আদীনৰা, তপ্পটিপক্খতো তত্তকা নেক্খম্মে আনিসংসা. অপিচ নেক্খম্মং নামেতং অসম্বাধং অসংকিলিট্ঠং, নিক্খন্তং কামেহি, নিক্খন্তং কামসঞ্ঞায, নিক্খন্তং কামৰিতক্কেহি, নিক্খন্তং কামপরিল়াহেহি, নিক্খন্তং ব্যাপাদসঞ্ঞাযা’’তিআদিনা নযেন নেক্খম্মে আনিসংসে পকাসেসি. পব্বজ্জাযং ঝানাদীসু চ গুণে ৰিভাৰেসি ৰণ্ণেসি. কল্লচিত্তন্তি কম্মনিযচিত্তং হেট্ঠা পৰত্তিতদেসনায অস্সদ্ধিযাদীনং চিত্তদোসানং ৰিগতত্তা উপরি দেসনায ভাজনভাৰূপগমেন কম্মক্খমচিত্তং. অট্ঠকথাযং পন যস্মা অস্সদ্ধিযাদযো চিত্তস্স রোগভূতা, তদা তে ৰিগতা, তস্মা আহ ‘‘অরোগচিত্ত’’ন্তি. দিট্ঠিমানাদিকিলেসৰিগমেন মুদুচিত্তং. কামচ্ছন্দাদিৰিগমেন ৰিনীৰরণচিত্তং. সম্মাপটিপত্তিযং উল়ারপীতিপামোজ্জযোগেন উদগ্গচিত্তং. তত্থ সদ্ধাসম্পত্তিযা পসন্নচিত্তং. যদা ভগৰা অঞ্ঞাসীতি সম্বন্ধো. অথ ৰা কল্লচিত্তন্তি কামচ্ছন্দৰিগমেন অরোগচিত্তং. মুদুচিত্তন্তি ব্যাপাদৰিগমেন মেত্তাৰসেন অকঠিনচিত্তং. ৰিনীৰরণচিত্তন্তি উদ্ধচ্চকুক্কুচ্চৰিগমেন অৰিক্খেপতো তেন অপিহিতচিত্তং. উদগ্গচিত্তন্তি থিনমিদ্ধৰিগমেন সম্পগ্গহিতৰসেন অলীনচিত্তং. পসন্নচিত্তন্তি ৰিচিকিচ্ছাৰিগমেন সম্মাপটিপত্তিযং অধিমুত্তচিত্তন্তি এৰমেত্থ সেসপদানং অত্থো ৰেদিতব্বো.

সেয্যথাপীতিআদিনা উপমাৰসেন সীহস্স কিলেসপ্পহানং অরিযমগ্গুপ্পাদনঞ্চ দস্সেতি. অপগতকাল়কন্তি ৰিগতকাল়কং. সম্মদেৰাতি সুট্ঠুদেৰ. রজনন্তি নীলপীতলোহিতাদিরঙ্গজাতং. পটিগ্গণ্হেয্যাতি গণ্হেয্য, পভস্সরং ভৰেয্য. তস্মিংযেৰ আসনেতি তস্সংযেৰ নিসজ্জাযং. এতেনস্স লহুৰিপস্সকতা তিক্খপঞ্ঞতা সুখপ্পটিপদখিপ্পাভিঞ্ঞতা চ দস্সিতা হোতি. ৰিরজন্তি অপাযগমনীযরাগরজাদীনং ৰিগমেন ৰিরজং. অনৰসেসদিট্ঠিৰিচিকিচ্ছামলাপগমেন ৰীতমলং. পঠমমগ্গৰজ্ঝকিলেসরজাভাৰেন ৰা ৰিরজং. পঞ্চৰিধদুস্সীল্যমলৰিগমেন ৰীতমলং. তস্স উপ্পত্তিআকারদস্সনত্থন্তি কস্মা ৰুত্তং? ননু মগ্গঞাণং অসঙ্খতধম্মারম্মণন্তি চোদনং সন্ধাযাহ ‘‘তঞ্হী’’তিআদি. তত্থ পটিৰিজ্ঝন্তন্তি অসম্মোহপ্পটিৰেধৰসেন পটিৰিজ্ঝন্তং. তেনাহ ‘‘কিচ্চৰসেনা’’তি. তত্রিদং উপমাসংসন্দনং – ৰত্থং ৰিয চিত্তং, ৰত্থস্স আগন্তুকমলেহি কিলিট্ঠভাৰো ৰিয চিত্তস্স রাগাদিমলেহি সংকিলিট্ঠভাৰো, ধোৰনসিলাতলং ৰিয অনুপুব্বীকথা, উদকং ৰিয সদ্ধা, উদকেন তেমেত্ৰা ঊসগোমযছারিকখারেহি কাল়কে সম্মদ্দিত্ৰা ৰত্থস্স ধোৰনপ্পযোগো ৰিয সদ্ধাসিনেহেন তেমেত্ৰা তেমেত্ৰা সতিসমাধিপঞ্ঞাহি দোসে সিথিলে কত্ৰা সুতাদিৰিধিনা চিত্তস্স সোধনে ৰীরিযারম্ভো. তেন পযোগেন ৰত্থে কাল়কাপগমো ৰিয ৰীরিযারম্ভেন কিলেসৰিক্খম্ভনং, রঙ্গজাতং ৰিয অরিযমগ্গো, তেন সুদ্ধৰত্থস্স পভস্সরভাৰো ৰিয ৰিক্খম্ভিতকিলেসস্স চিত্তস্স মগ্গেন পরিযোদপনন্তি.

‘‘দিট্ঠধম্মো’’তি ৰত্ৰা দস্সনং নাম ঞাণদস্সনতো অঞ্ঞম্পি অত্থীতি তন্নিৰত্তনত্থং ‘‘পত্তধম্মো’’তি ৰুত্তং. পত্তি নাম ঞাণসম্পত্তিতো অঞ্ঞাপি ৰিজ্জতীতি ততো ৰিসেসনত্থং ‘‘ৰিদিতধম্মো’’তি ৰুত্তং. সা পনেসা ৰিদিতধম্মতা ধম্মেসু একদেসেনপি হোতীতি নিপ্পদেসতো ৰিদিতভাৰং দস্সেতুং. ‘‘পরিযোগাল়্হধম্মো’’তি ৰুত্তং. তেনস্স সচ্চাভিসম্বোধংযেৰ দীপেতি. মগ্গঞাণঞ্হি একাভিসমযৰসেন পরিঞ্ঞাদিকিচ্চং সাধেন্তং নিপ্পদেসেন চতুসচ্চধম্মং সমন্ততো ওগাল়্হং নাম হোতি. তেনাহ ‘‘দিট্ঠো অরিযসচ্চধম্মো এতেনাতি দিট্ঠধম্মো’’তি. তিণ্ণা ৰিচিকিচ্ছাতি সপ্পটিভযকন্তারসদিসা সোল়সৰত্থুকা অট্ঠৰত্থুকা চ তিণ্ণা নিত্তিণ্ণা ৰিচিকিচ্ছা. ৰিগতা কথংকথাতি পৰত্তিআদীসু ‘‘এৰং নু খো, ন নু খো’’তি এৰং পৰত্তিকা ৰিগতা সমুচ্ছিন্না কথংকথা. সারজ্জকরানং পাপধম্মানং পহীনত্তা তপ্পটিপক্খেসু সীলাদিগুণেসু পতিট্ঠিতত্তা ৰেসারজ্জং ৰিসারদভাৰং ৰেয্যত্তিযং পত্তো. অত্তনা এৰ পচ্চক্খতো দিট্ঠত্তা ন পরং পচ্চেতি, ন চস্স পরো পচ্চেতব্বো অত্থীতি অপরপ্পচ্চযো.

উদ্দিসিত্ৰা কতন্তি অত্তানং উদ্দিসিত্ৰা মারণৰসেন কতং নিব্বত্তিতং মংসং. পটিচ্চকম্মন্তি এত্থ কম্ম-সদ্দো কম্মসাধনো অতীতকালিকো চাতি আহ ‘‘অত্তানং পটিচ্চকত’’ন্তি. নিমিত্তকম্মস্সেতং অধিৰচনং ‘‘পটিচ্চ কম্মং ফুসতী’’তিআদীসু (জা. ১.৪.৭৫) ৰিয. নিমিত্তকম্মস্সাতি নিমিত্তভাৰেন লদ্ধব্বকম্মস্স. করণৰসেন পটিচ্চকম্মং এত্থ অত্থীতি মংসং পটিচ্চকম্মং যথা বুদ্ধি বুদ্ধং. তং এতস্স অত্থীতি বুদ্ধো. সেসমেত্থ উত্তানমেৰ.

সীহসুত্তৰণ্ণনা নিট্ঠিতা.

৩-৪. অস্সাজানীযসুত্তাদিৰণ্ণনা

১৩-১৪. ততিযে সাঠেয্যানীতি সঠত্তানি. সেসপদেসুপি এসেৰ নযো. তানি পনস্স সাঠেয্যাদীনি কাযচিত্তুজুকতাপটিপক্খভূতা লোভসহগতচিত্তুপ্পাদস্স পৰত্তিআকারৰিসেসা. তত্থ যস্স কিস্মিঞ্চিদেৰ ঠানে ঠাতুকামস্স সতো যং ঠানং মনুস্সানং সপ্পটিভযং, পুরতো গন্ত্ৰা তথেৰ সপ্পটিভযট্ঠানেৰ ঠস্সামীতি ন হোতি, ৰঞ্চনাধিপ্পাযভাৰতো ঠাতুকামট্ঠানেযেৰ নিখাতত্থম্ভো ৰিয চত্তারো পাদে নিচ্চালেত্ৰা তিট্ঠতি, অযং সঠো নাম, ইমস্স সাঠেয্যস্স পাকটকরণং. তথা যস্স কিস্মিঞ্চিদেৰ ঠানে নিৰত্তিত্ৰা খন্ধগতং পাতেতুকামস্স সতো যং ঠানং মনুস্সানং সপ্পটিভযং, পুরতো গন্ত্ৰা তথেৰ পাতেস্সামীতি ন হোতি, পাতেতুকামট্ঠানেযেৰ নিৰত্তিত্ৰা পাতেতি, অযং কূটো নাম. যস্স কালেন ৰামতো, কালেন দক্খিণতো, কালেন উজুমগ্গেনেৰ চ গন্তুকামস্স সতো যং ঠানং মনুস্সানং সপ্পটিভযং, পুরতো গন্ত্ৰা তথেৰ এৰং করিস্সামীতি ন হোতি, যদিচ্ছকং গন্তুকামট্ঠানেযেৰ কালেন ৰামতো, কালেন দক্খিণতো, কালেন উজুমগ্গং গচ্ছতি, তথা লেণ্ডং ৰা পস্সাৰং ৰা ৰিস্সজ্জেতুকামস্স ইদং ঠানং সুসম্মট্ঠং আকিণ্ণমনুস্সং রমণীযং. ইমস্মিং ঠানে এৰরূপং কাতুং ন যুত্তং, পুরতো গন্ত্ৰা পটিচ্ছন্নট্ঠানে করিস্সামীতি ন হোতি, তত্থেৰ করোতি, অযং জিম্হো নাম. যস্স পন কিস্মিঞ্চি ঠানে মগ্গা উক্কম্ম নিৰত্তিত্ৰা পটিমগ্গং আরোহিতুকামস্স সতো যং ঠানং মনুস্সানং সপ্পটিভযং, পুরতো গন্ত্ৰা তত্থেৰ এৰং করিস্সামীতি ন হোতি, পটিমগ্গং আরোহিতুকামট্ঠানেযেৰ মগ্গা উক্কম্ম নিৰত্তিত্ৰা পটিমগ্গং আরোহতি, অযং ৰঙ্কো নাম. ইতি ইমং চতুব্বিধম্পি কিরিযং সন্ধাযেতং ৰুত্তং ‘‘যানি খো পনস্স তানি সাঠেয্যানি…পে… আৰিকত্তা হোতী’’তি. চতুত্থে নত্থি ৰত্তব্বং.

অস্সাজানীযসুত্তাদিৰণ্ণনা নিট্ঠিতা.

৫-৮. মলসুত্তাদিৰণ্ণনা

১৫-১৮. পঞ্চমে (ধ. প. অট্ঠ. ২.২৪১) যা কাচি পরিযত্তি ৰা সিপ্পং ৰা যস্মা অসজ্ঝাযন্তস্স অননুযুঞ্জন্তস্স ৰিনস্সতি, নিরন্তরং ৰা ন উপট্ঠাতি, তস্মা ‘‘অসজ্ঝাযমলা মন্তা’’তি ৰুত্তং. যস্মা পন ঘরাৰাসং ৰসন্তস্স উট্ঠাযুট্ঠায জিণ্ণপ্পটিসঙ্খরণাদীনি অকরোন্তস্স ঘরং নাম ৰিনস্সতি, তস্মা ‘‘অনুট্ঠানমলা ঘরা’’তি ৰুত্তং. যস্মা গিহিস্স ৰা পব্বজিতস্স ৰা কোসজ্জৰসেন সরীরপ্পজগ্গনং ৰা পরিক্খারপ্পটিজগ্গনং ৰা অকরোন্তস্স কাযো দুব্বণ্ণো হোতি, তস্মা ‘‘মলং ৰণ্ণস্স কোসজ্জ’’ন্তি ৰুত্তং. যস্মা পন গাৰো রক্খন্তস্স পমাদৰসেন নিদ্দাযন্তস্স ৰা কীল়ন্তস্স ৰা তা গাৰো অতিত্থপক্খন্দনাদীহি ৰা ৰাল়মিগচোরাদিউপদ্দৰেন ৰা পরেসং সালিক্খেত্তাদীনি ওতরিত্ৰা খাদনৰসেন ৰা ৰিনাসমাপজ্জন্তি, সযম্পি দণ্ডং ৰা পরিভাসং ৰা পাপুণাতি, পব্বজিতং ৰা পন ছদ্ৰারাদীনি অরক্খন্তং পমাদৰসেন কিলেসা ওতরিত্ৰা সাসনা চাৰেন্তি, তস্মা ‘‘পমাদো রক্খতো মল’’ন্তি ৰুত্তং. সো হিস্স ৰিনাসাৰহেন মলট্ঠানিযত্তা মলং.

দুচ্চরিতন্তি অতিচারো. অতিচারিনিঞ্হি ইত্থিং সামিকোপি গেহা নীহরতি, মাতাপিতূনং সন্তিকং গতম্পি ‘‘ত্ৰং কুলস্স অঙ্গারভূতা, অক্খীহিপি ন দট্ঠব্বা’’তি তং মাতাপিতরোপি নীহরন্তি, সা অনাথা ৰিচরন্তী মহাদুক্খং পাপুণাতি. তেনস্সা দুচ্চরিতং ‘‘মল’’ন্তি ৰুত্তং. দদতোতি দাযকস্স. যস্স হি খেত্তকসনকালে ‘‘ইমস্মিং খেত্তে সম্পন্নে সলাকভত্তাদীনি দস্সামী’’তি চিন্তেত্ৰাপি নিপ্ফন্নে সস্সে মচ্ছেরং উপ্পজ্জিত্ৰা চাগচিত্তং নিৰারেতি, সো মচ্ছেরৰসেন চাগচিত্তে অৰিরুহন্তে মনুস্সসম্পত্তি, দিব্বসম্পত্তি, নিব্বানসম্পত্তীতি তিস্সো সম্পত্তিযো ন লভতি. তেন ৰুত্তং ‘‘মচ্ছেরং দদতো মল’’ন্তি. অঞ্ঞেসুপি এৰরূপেসু এসেৰ নযো. পাপকা ধম্মাতি অকুসলা ধম্মা. তে পন ইধলোকে পরলোকে চ মলমেৰ. ততোতি হেট্ঠা ৰুত্তমলতো. মলতরন্তি অতিরেকমলং. ছট্ঠাদীনি উত্তানত্থানেৰ.

মলসুত্তাদিৰণ্ণনা নিট্ঠিতা.

৯. পহারাদসুত্তৰণ্ণনা

১৯. নৰমে (উদা. অট্ঠ. ৪৫; সারত্থ. টী. চূল়ৰগ্গ ৩.৩৮৪) অসুরাতি দেৰা ৰিয ন সুরন্তি ন কীল়ন্তি ন ৰিরোচন্তীতি অসুরা. সুরা নাম দেৰা, তেসং পটিপক্খাতি ৰা অসুরা, ৰেপচিত্তিপহারাদাদযো. তেসং ভৰনং সিনেরুস্স হেট্ঠাভাগে. তে তত্থ পৰিসন্তা নিক্খমন্তা সিনেরুপাদে মণ্ডপাদীনি নিম্মিনিত্ৰা কীল়ন্তা অভিরমন্তি. সা তত্থ তেসং অভিরতি. ইমে গুণে দিস্ৰাতি আহ ‘‘যে দিস্ৰা দিস্ৰা অসুরা মহাসমুদ্দে অভিরমন্তী’’তি.

যস্মা লোকিযা জম্বুদীপো, হিমৰা তত্থ পতিট্ঠিতসমুদ্দদহপব্বতা তপ্পভৰা নদিযোতি এতেসু যং যং ন মনুস্সগোচরং, তত্থ সযং সম্মূল়্হা অঞ্ঞেপি সম্মোহযন্তি, তস্মা তত্থ সম্মোহৰিধমনত্থং ‘‘অযং তাৰ জম্বুদীপো’’তিআদি আরদ্ধং. দসসহস্সযোজনপরিমাণো আযামতো ৰিত্থারতো চাতি অধিপ্পাযো. তেনাহ ‘‘তত্থা’’তিআদি. উদকেন অজ্ঝোত্থটো তদুপভোগিসত্তানং পুঞ্ঞক্খযেন. সুন্দরদস্সনং কূটন্তি সুদস্সনকূটং, যং লোকে ‘‘হেমকূট’’ন্তি ৰুচ্চতি. মূলগন্ধো কালানুসারিযাদি. সারগন্ধো চন্দনাদি. ফেগ্গুগন্ধো সললাদি. তচগন্ধো লৰঙ্গাদি. পপটিকাগন্ধো কপিত্থাদি. রসগন্ধো সজ্জুলসাদি. পত্তগন্ধো তমালহিরিৰেরাদি. পুপ্ফগন্ধো নাগকুসুমাদি. ফলগন্ধো জাতিফলাদি. গন্ধগন্ধো সব্বেসং গন্ধানং গন্ধো. ‘‘সব্বানি পুথুলতো পঞ্ঞাস যোজনানি, আযামতো পন উব্বেধতো ৰিয দ্ৰিযোজনসতানেৰা’’তি ৰদন্তি.

মনোহরসিলাতলানীতি রতনমযত্তা মনুঞ্ঞসোপানসিলাতলানি. সুপটিযত্তানীতি তদুপভোগিসত্তানং সাধারণকম্মুনাৰ সুট্ঠু পটিযত্তানি সুসণ্ঠিতানি হোন্তি. মচ্ছকচ্ছপাদীনি উদকং মলং করোন্তি, তদভাৰতো ফলিকসদিসনিম্মলোদকানি. তিরিযতো দীঘং উগ্গতকূটন্তি ‘‘তিরচ্ছানপব্বত’’ন্তি আহ. পুরিমানি নামগোত্তানীতি এত্থ নদী নিন্নগাতিআদিকং গোত্তং, গঙ্গা যমুনাতিআদিকং নামং.

সৰমানাতি সন্দমানা. পূরত্তন্তি পুণ্ণভাৰো. মসারগল্লং ‘‘চিত্তফলিক’’ন্তিপি ৰদন্তি. মহতং ভূতানন্তি মহন্তানং সত্তানং. তিমী তিমিঙ্গলা তিমিতিমিঙ্গলাতি তিস্সো মচ্ছজাতিযো. তিমিং গিলনসমত্থা তিমিঙ্গলা. তিমিঞ্চ তিমিঙ্গলঞ্চ গিলনসমত্থা তিমিতিমিঙ্গলাতি ৰদন্তি.

মম সাৰকাতি সোতাপন্নাদিকে অরিযপুগ্গলে সন্ধায ৰদতি. ন সংৰসতীতি উপোসথকম্মাদিৰসেন সংৰাসং ন করোতি. উক্খিপতীতি অপনেতি. ৰিমুত্তিরসোতি কিলেসেহি ৰিমুচ্চনরসো. সব্বা হি সাসনসম্পত্তি যাৰদেৰ অনুপাদায আসৰেহি চিত্তস্স ৰিমুত্তিঅত্থা.

রতনানীতি রতিজননট্ঠেন রতনানি. সতিপট্ঠানাদযো হি ভাৰিযমানা পুব্বভাগেপি অনপ্পকং পীতিপামোজ্জং নিব্বত্তেন্তি, পগেৰ অপরভাগে. ৰুত্তঞ্হেতং –

‘‘যতো যতো সম্মসতি, খন্ধানং উদযব্বযং;

লভতী পীতিপামোজ্জং, অমতং তং ৰিজানত’’ন্তি. (ধ. প. ৩৭৪) –

লোকিযরতননিব্বত্তং পন পীতিপামোজ্জং ন তস্স কলভাগম্পি অগ্ঘতি. অপিচ –

‘‘চিত্তীকতং মহগ্ঘঞ্চ, অতুলং দুল্লভদস্সনং;

অনোমসত্তপরিভোগং, রতনন্তি পৰুচ্চতি’’. (দী. নি. অট্ঠ. ২.৩৩; সং. নি. অট্ঠ. ৩.৫.২২৩; খু. পা. অট্ঠ. ৬.৩; সু. নি. অট্ঠ. ১.২২৬; মহানি. অট্ঠ. ৫০);

যদি চ চিত্তীকতাদিভাৰেন রতনং নাম হোতি, সতিপট্ঠানাদীনংযেৰ ভূততো রতনভাৰো. বোধিপক্খিযধম্মানঞ্হি সো আনুভাৰো, যং সাৰকা সাৰকপারমিঞাণং, পচ্চেকবুদ্ধা পচ্চেকবোধিঞাণং, সম্মাসম্বুদ্ধা সম্মাসম্বোধিং অধিগচ্ছন্তি আসন্নকারণত্তা. আসন্নকারণঞ্হি দানাদিউপনিস্সযোতি এৰং রতিজননট্ঠেন চিত্তীকতাদিঅত্থেন চ রতনভাৰো বোধিপক্খিযধম্মানং সাতিসযো. তেন ৰুত্তং ‘‘তত্রিমানি রতনানি, সেয্যথিদং. চত্তারো সতিপট্ঠানা’’তিআদি.

তত্থ আরম্মণে ওক্কন্তিত্ৰা উপট্ঠানট্ঠেন উপট্ঠানং, সতিযেৰ উপট্ঠানন্তি সতিপট্ঠানং. আরম্মণস্স পন কাযাদিৰসেন চতুব্বিধত্তা ৰুত্তং ‘‘চত্তারো সতিপট্ঠানা’’তি. তথা হি কাযৰেদনাচিত্তধম্মেসু সুভসুখনিচ্চঅত্তসঞ্ঞানং পহানতো অসুভদুক্খানিচ্চানত্তভাৰগ্গহণতো চ নেসং কাযানুপস্সনাদিভাৰো ৰিভত্তো.

সম্মা পদহন্তি এতেন, সযং ৰা সম্মা পদহতি, পসত্থং সুন্দরং ৰা পদহন্তীতি সম্মপ্পধানং, পুগ্গলস্স ৰা সম্মদেৰ পধানভাৰকরণতো সম্মপ্পধানং ৰীরিযস্সেতং অধিৰচনং. তম্পি অনুপ্পন্নুপ্পন্নানং অকুসলানং অনুপ্পাদনপ্পহানৰসেন অনুপ্পন্নুপ্পন্নানং কুসলানং ধম্মানং উপ্পাদনট্ঠাপনৰসেন চ চতুকিচ্চসাধকত্তা ৰুত্তং ‘‘চত্তারো সম্মপ্পধানা’’তি.

ইজ্ঝতীতি ইদ্ধি, সমিজ্ঝতি নিপ্ফজ্জতীতি অত্থো. ইজ্ঝন্তি ৰা তায সত্তা ইদ্ধা ৰুদ্ধা উক্কংসগতা হোন্তীতি ইদ্ধি. ইতি পঠমেন অত্থেন ইদ্ধি এৰ পাদোতি ইদ্ধিপাদো, ইদ্ধিকোট্ঠাসোতি অত্থো. দুতিযেন অত্থেন ইদ্ধিযা পাদো পতিট্ঠা অধিগমুপাযোতি ইদ্ধিপাদো. তেন হি উপরূপরিৰিসেসসঙ্খাতং ইদ্ধিং পজ্জন্তি পাপুণন্তি. স্ৰাযং ইদ্ধিপাদো যস্মা ছন্দাদিকে চত্তারো অধিপতিধম্মে ধুরে জেট্ঠকে কত্ৰা নিব্বত্তীযতি, তস্মা ৰুত্তং ‘‘চত্তারো ইদ্ধিপাদা’’তি.

পঞ্চিন্দ্রিযানীতি সদ্ধাদীনি পঞ্চ ইন্দ্রিযানি. তত্থ অস্সদ্ধিযং অভিভৰিত্ৰা অধিমোক্খলক্খণে ইন্দট্ঠং কারেতীতি সদ্ধিন্দ্রিযং. কোসজ্জং অভিভৰিত্ৰা পগ্গহলক্খণে, পমাদং অভিভৰিত্ৰা উপট্ঠানলক্খণে, ৰিক্খেপং অভিভৰিত্ৰা অৰিক্খেপলক্খণে, অঞ্ঞাণং অভিভৰিত্ৰা দস্সনলক্খণে ইন্দট্ঠং কারেতীতি পঞ্ঞিন্দ্রিযং.

তানিযেৰ অস্সদ্ধিযাদীহি অনভিভৰনীযতো অকম্পিযট্ঠেন সম্পযুত্তধম্মেসু থিরভাৰেন চ বলানি ৰেদিতব্বানি.

সত্ত বোজ্ঝঙ্গাতি বোধিযা, বোধিস্স ৰা অঙ্গাতি বোজ্ঝঙ্গা. যা হি এসা ধম্মসামগ্গী যায লোকুত্তরমগ্গক্খণে উপ্পজ্জমানায লীনুদ্ধচ্চপতিট্ঠানাযূহনকামসুখত্তকিলমথানুযোগউচ্ছেদসস্সতাভিনিৰেসাদীনং অনেকেসং উপদ্দৰানং পটিপক্খভূতায সতিধম্মৰিচযৰীরিযপীতিপস্সদ্ধিসমাধিউপেক্খাসঙ্খাতায ধম্মসামগ্গিযা অরিযসাৰকো বুজ্ঝতি, কিলেসনিদ্দায ৰুট্ঠহতি, চত্তারি অরিযসচ্চানি পটিৰিজ্ঝতি, নিব্বানমেৰ ৰা সচ্ছিকরোতীতি ‘‘বোধী’’তি ৰুচ্চতি. তস্সা ধম্মসামগ্গিসঙ্খাতায বোধিযা অঙ্গাতিপি বোজ্ঝঙ্গা ঝানঙ্গমগ্গঙ্গাদযো ৰিয. যোপেস ৰুত্তপ্পকারায ধম্মসামগ্গিযা বুজ্ঝতীতি কত্ৰা অরিযসাৰকো ‘‘বোধী’’তি ৰুচ্চতি. তস্স বোধিস্স অঙ্গাতিপি বোজ্ঝঙ্গা সেনঙ্গরথঙ্গাদযো ৰিয. তেনাহু পোরাণা ‘‘বুজ্ঝনকস্স পুগ্গলস্স অঙ্গাতি বোজ্ঝঙ্গা’’তি (ৰিভ. অট্ঠ. ৪৬৬; সং. নি. অট্ঠ. ৩.৫.১৮২; পটি. ম. অট্ঠ. ২.২.১৭). ‘‘বোধায সংৰত্তন্তীতি বোজ্ঝঙ্গা’’তিআদিনা (পটি. ম. ২.১৭) নযেনপি বোজ্ঝঙ্গত্থো ৰেদিতব্বো.

অরিযো অট্ঠঙ্গিকো মগ্গোতি তংতংমগ্গৰজ্ঝেহি কিলেসেহি আরকত্তা, অরিযভাৰকরত্তা, অরিযফলপ্পটিলাভকরত্তা চ অরিযো. সম্মাদিট্ঠিআদীনি অট্ঠঙ্গানি অস্স অত্থি, অট্ঠ অঙ্গানিযেৰ ৰা অট্ঠঙ্গিকো. মারেন্তো কিলেসে গচ্ছতি নিব্বানত্থিকেহি ৰা মগ্গীযতি, সযং ৰা নিব্বানং মগ্গতীতি মগ্গোতি এৰমেতেসং সতিপট্ঠানাদীনং অত্থৰিভাগো ৰেদিতব্বো.

সোতাপন্নোতি মগ্গসঙ্খাতং সোতং আপজ্জিত্ৰা পাপুণিত্ৰা ঠিতো, সোতাপত্তিফলট্ঠোতি অত্থো. সোতাপত্তিফলসচ্ছিকিরিযায পটিপন্নোতি সোতাপত্তিফলস্স অত্তপচ্চক্খকরণায পটিপজ্জমানো পঠমমগ্গট্ঠো, যো অট্ঠমকোতিপি ৰুচ্চতি. সকদাগামীতি সকিদেৰ ইমং লোকং পটিসন্ধিগ্গহণৰসেন আগমনসীলো দুতিযফলট্ঠো. অনাগামীতি পটিসন্ধিগ্গহণৰসেন কামলোকং অনাগমনসীলো ততিযফলট্ঠো. যো পন সদ্ধানুসারী ধম্মানুসারী একবীজীতিএৰমাদিকো অরিযপুগ্গলৰিভাগো, সো এতেসংযেৰ পভেদোতি. সেসং ৰুত্তনযসদিসমেৰ.

পহারাদসুত্তৰণ্ণনা নিট্ঠিতা.

১০. উপোসথসুত্তৰণ্ণনা

২০. দসমে তদহুপোসথেতি (উদা. অট্ঠ. ৪৫; সারত্থ. টী. চূল়ৰগ্গ ৩.৩৮৩) তস্মিং উপোসথদিৰসভূতে অহনি. উপোসথকরণত্থাযাতি ওৰাদপাতিমোক্খং উদ্দিসিতুং. উদ্ধস্তং অরুণন্তি অরুণুগ্গমনং. উদ্দিসতু, ভন্তে, ভগৰা ভিক্খূনং পাতিমোক্খন্তি থেরো ভগৰন্তং পাতিমোক্খুদ্দেসং যাচি. তস্মিং কালে ‘‘ন, ভিক্খৰে, অনুপোসথে উপোসথো কাতব্বো’’তি (মহাৰ. ১৩৬) সিক্খাপদস্স অপঞ্ঞত্তত্তা. কস্মা পন ভগৰা তিযামরত্তিং ৰীতিনামেসি? ততো পট্ঠায ওৰাদপাতিমোক্খং অনুদ্দিসিতুকামো তস্স ৰত্থুং পাকটং কাতুং. অদ্দসাতি কথং অদ্দস? অত্তনো চেতোপরিযঞাণেন তস্সং পরিসতি ভিক্খূনং চিত্তানি পরিজানন্তো তস্স দুস্সীলস্স চিত্তং পস্সি. যস্মা পন চিত্তে দিট্ঠে তংসমঙ্গীপুগ্গলো দিট্ঠো নাম হোতি, তস্মা ‘‘অদ্দসা খো আযস্মা মহামোগ্গল্লানো তং পুগ্গলং দুস্সীল’’ন্তিআদি ৰুত্তং. যথেৰ হি অনাগতে সত্তসু দিৰসেসু পৰত্তং পরেসং চিত্তং চেতোপরিযঞাণলাভী জানাতি, এৰং অতীতেপীতি. মজ্ঝে ভিক্খুসঙ্ঘস্স নিসিন্নন্তি সঙ্ঘপরিযাপন্নো ৰিয ভিক্খুসঙ্ঘস্স অন্তো নিসিন্নং. দিট্ঠোসীতি অযং ন পকতত্তোতি ভগৰতা দিট্ঠো অসি. যস্মা চ এৰং দিট্ঠো, তস্মা নত্থি তে তৰ ভিক্খূহি সদ্ধিং এককম্মাদিসংৰাসো. যস্মা পন সো সংৰাসো তৰ নত্থি, তস্মা উট্ঠেহি, আৰুসোতি এৰমেত্থ পদযোজনা ৰেদিতব্বা.

ততিযম্পি খো সো পুগ্গলো তুণ্হী অহোসীতি অনেকৰারং ৰত্ৰাপি ‘‘থেরো সযমেৰ নিব্বিন্নো ওরমিস্সতী’’তি ৰা, ‘‘ইদানি ইমেসং পটিপত্তিং জানিস্সামী’’তি ৰা অধিপ্পাযেন তুণ্হী অহোসি. বাহাযং গহেত্ৰাতি ‘‘ভগৰতা মযা চ যাথাৰতো দিট্ঠো, যাৰততিযং ‘উট্ঠেহি, আৰুসো’তি চ ৰুত্তো ন ৰুট্ঠাতি, ইদানিস্স নিক্কড্ঢনকালো, মা সঙ্ঘস্স উপোসথন্তরাযো অহোসী’’তি তং বাহাযং অগ্গহেসি, তথা গহেত্ৰা. বহি দ্ৰারকোট্ঠকা নিক্খামেত্ৰাতি দ্ৰারকোট্ঠকা দ্ৰারসালাতো নিক্খামেত্ৰা. বহীতি পন নিক্খামিতট্ঠানদস্সনং. অথ ৰা বহিদ্ৰারকোট্ঠকাতি বহিদ্ৰারকোট্ঠকতোপি নিক্খামেত্ৰা, ন অন্তোদ্ৰারকোট্ঠকতো এৰ. উভযত্থাপি ৰিহারতো বহিকত্ৰাতি অত্থো. সূচিঘটিকং দত্ৰাতি অগ্গল়সূচিঞ্চ উপরিঘটিকঞ্চ আদহিত্ৰা, সুট্ঠুতরং কৰাটং থকেত্ৰাতি অত্থো. যাৰ বাহাগহণাপি নামাতি ইমিনা ‘‘অপরিসুদ্ধা, আনন্দ, পরিসা’’তি ৰচনং সুত্ৰা এৰ হি তেন পক্কমিতব্বং সিযা, এৰং অপক্কমিত্ৰা যাৰ বাহাগহণাপি নাম সো মোঘপুরিসো আগমেস্সতি, অচ্ছরিযমিদন্তি দস্সেতি. ইদঞ্চ গরহনচ্ছরিযমেৰাতি ৰেদিতব্বং.

অথ ভগৰা চিন্তেসি – ‘‘ইদানি ভিক্খুসঙ্ঘে অব্বুদো জাতো, অপরিসুদ্ধা পুগ্গলা উপোসথং আগচ্ছন্তি, ন চ তথাগতা অপরিসুদ্ধায পরিসায উপোসথং করোন্তি, পাতিমোক্খং উদ্দিসন্তি. অনুদ্দিসন্তে চ ভিক্খুসঙ্ঘস্স উপোসথো পচ্ছিজ্জতি. যংনূনাহং ইতো পট্ঠায ভিক্খূনংযেৰ পাতিমোক্খুদ্দেসং অনুজানেয্য’’ন্তি. এৰং পন চিন্তেত্ৰা ভিক্খূনংযেৰ পাতিমোক্খুদ্দেসং অনুজানি. তেন ৰুত্তং ‘‘অথ খো ভগৰা…পে… পাতিমোক্খং উদ্দিসেয্যাথা’’তি. তত্থ ন দানাহন্তি ইদানি অহং উপোসথং ন করিস্সামি, পাতিমোক্খং ন উদ্দিসিস্সামীতি পচ্চেকং ন-কারেন সম্বন্ধো. দুৰিধঞ্হি পাতিমোক্খং – আণাপাতিমোক্খং, ওৰাদপাতিমোক্খন্তি. তেসু ‘‘সুণাতু মে, ভন্তে’’তিআদিকং (মহাৰ. ১৩৪) আণাপাতিমোক্খং. তং সাৰকাৰ উদ্দিসন্তি, ন বুদ্ধা, যং অন্ৰদ্ধমাসং উদ্দিসীযতি. ‘‘খন্তী পরমং…পে… সব্বপাপস্স অকরণং…পে… অনুপৰাদো অনুপঘাতো…পে… এতং বুদ্ধান সাসন’’ন্তি (দী. নি. ২.৯০; ধ. প. ১৮৩-১৮৫; উদা. ৩৬; নেত্তি. ৩০) ইমা পন তিস্সো গাথা ওৰাদপাতিমোক্খং নাম. তং বুদ্ধাৰ উদ্দিসন্তি, ন সাৰকা, ছন্নম্পি ৰস্সানং অচ্চযেন উদ্দিসন্তি. দীঘাযুকবুদ্ধানঞ্হি ধরমানকালে অযমেৰ পাতিমোক্খুদ্দেসো, অপ্পাযুকবুদ্ধানং পন পঠমবোধিযংযেৰ. ততো পরং ইতরো. তঞ্চ খো ভিক্খূযেৰ উদ্দিসন্তি, ন বুদ্ধা, তস্মা অম্হাকম্পি ভগৰা ৰীসতিৰস্সমত্তং ইমং ওৰাদপাতিমোক্খং উদ্দিসিত্ৰা ইমং অন্তরাযং দিস্ৰা ততো পরং ন উদ্দিসি. অট্ঠানন্তি অকারণং. অনৰকাসোতি তস্সেৰ ৰেৰচনং. কারণঞ্হি যথা তিট্ঠতি এত্থ ফলং তদাযত্তৰুত্তিতাযাতি ‘‘ঠান’’ন্তি ৰুচ্চতি, এৰং ‘‘অৰকাসো’’তিপি ৰুচ্চতি. যন্তি কিরিযাপরামসনং.

অট্ঠিমে, ভিক্খৰে, মহাসমুদ্দেতি কো অনুসন্ধি? য্ৰাযং অপরিসুদ্ধায পরিসায পাতিমোক্খস্স অনুদ্দেসো ৰুত্তো, সো ইমস্মিং ধম্মৰিনযে অচ্ছরিযো অব্ভুতো ধম্মোতি তং অপরেহিপি সত্তহি অচ্ছরিযব্ভুতধম্মেহি সদ্ধিং ৰিভজিত্ৰা দস্সেতুকামো পঠমং তাৰ তেসং উপমাভাৰেন মহাসমুদ্দে অট্ঠ অচ্ছরিযব্ভুতধম্মে দস্সেন্তো সত্থা ‘‘অট্ঠিমে, ভিক্খৰে, মহাসমুদ্দে’’তিআদিমাহ.

উপোসথসুত্তৰণ্ণনা নিট্ঠিতা.

মহাৰগ্গৰণ্ণনা নিট্ঠিতা.

৩. গহপতিৰগ্গো

১-৭. পঠমউগ্গসুত্তাদিৰণ্ণনা

২১-২৭. ততিযস্স পঠমদুতিযেসু নত্থি ৰত্তব্বং. ততিযে ‘‘হত্থগো’’তি ৰত্তব্বে ‘‘হত্থকো’’তি ৰুত্তং. সো হি রাজপুরিসানং হত্থতো যক্খস্স হত্থং, যক্খস্স হত্থতো ভগৰতো হত্থং, ভগৰতো হত্থতো পুন রাজপুরিসানং হত্থং গতত্তা নামতো হত্থকো আল়ৰকোতি জাতো. তেনাহ ‘‘আল়ৰকযক্খস্স হত্থতো হত্থেহি সম্পটিচ্ছিতত্তা হত্থকোতি লদ্ধনামো রাজকুমারো’’তি. চতুত্থাদীনি উত্তানত্থানেৰ.

পঠমউগ্গসুত্তাদিৰণ্ণনা নিট্ঠিতা.

৮. দুতিযবলসুত্তৰণ্ণনা

২৮. অট্ঠমে খীণাসৰস্স সব্বেসং সঙ্খারানং অনিচ্চতা অসম্মোহৰসেন কিচ্চতো মগ্গপঞ্ঞায সুপ্পটিৰিদ্ধা, ৰিপস্সনায আরম্মণকরণৰসেনপীতি দস্সেন্তো আহ ‘‘সহৰিপস্সনায মগ্গপঞ্ঞাযা’’তি. ইমে কামাতি দ্ৰেপি কামে ৰদতি. কিলেসৰসেন উপ্পজ্জমানো হি পরিল়াহো ৰত্থুকামসন্নিস্সযো ৰত্থুকামৰিসযো ৰাতি দ্ৰেপি সপরিল়াহট্ঠেন অঙ্গারকাসু ৰিযাতি ‘‘অঙ্গারকাসূপমা’’তি ৰুত্তা. অন্তো ৰুচ্চতি লামকট্ঠেন তণ্হা, ব্যন্তং ৰিগতন্তং ভূতন্তি ব্যন্তিভূতন্তি আহ ‘‘ৰিগতন্তভূত’’ন্তি, নিত্তণ্হন্তি অত্থো.

দুতিযবলসুত্তৰণ্ণনা নিট্ঠিতা.

৯. অক্খণসুত্তৰণ্ণনা

২৯. নৰমে যস্মা মহিদ্ধিকপেতা দেৰাসুরানং আৰাহং গচ্ছন্তি, ৰিৰাহং ন গচ্ছন্তি, তস্মা পেত্তিৰিসযেনেৰ অসুরকাযো গহিতোতি ৰেদিতব্বো. পেতাসুরা পন পেতা এৰাতি তেসং পেতেহি সঙ্গহো অৰুত্তসিদ্ধোৰ.

অক্খণসুত্তৰণ্ণনা নিট্ঠিতা.

১০. অনুরুদ্ধমহাৰিতক্কসুত্তৰণ্ণনা

৩০. দসমে অপ্পিচ্ছস্সাতি ন ইচ্ছস্স. অভাৰত্থো হেত্থ অপ্পসদ্দো ‘‘অপ্পডংসমকসৰাতাতপা’’তিআদীসু (অ. নি. ১০.১১) ৰিয. পচ্চযেসু অপ্পিচ্ছো পচ্চযপ্পিচ্ছো, চীৰরাদিপচ্চযেসু ইচ্ছারহিতো. অধিগমপ্পিচ্ছোতি ঝানাদিঅধিগমৰিভাৰনে ইচ্ছারহিতো. পরিযত্তিঅপ্পিচ্ছোতি পরিযত্তিযং বাহুসচ্চৰিভাৰনে ইচ্ছারহিতো. ধুতঙ্গপ্পিচ্ছোতি ধুতঙ্গেসু অপ্পিচ্ছো ধুতঙ্গভাৰৰিভাৰনে ইচ্ছারহিতো. সন্তগুণনিগুহনেনাতি অত্তনি সংৰিজ্জমানানং ঝানাদিগুণানঞ্চেৰ বাহুসচ্চগুণস্স ধুতঙ্গগুণস্স চ নিগুহনেন ছাদনেন. সম্পজ্জতীতি নিপ্ফজ্জতি সিজ্ঝতি. নো মহিচ্ছস্সাতি মহতিযা ইচ্ছায সমন্নাগতস্স নো সম্পজ্জতি অনুধম্মস্সপি অনিপ্ফজ্জনতো. পৰিৰিত্তস্সাতি পকারেহি ৰিৰিত্তস্স. তেনাহ ‘‘কাযচিত্তউপধিৰিৰেকেহি ৰিৰিত্তস্সা’’তি. আরম্ভৰত্থুৰসেনাতি ভাৰনাভিযোগৰসেন একীভাৰোৰ কাযৰিৰেকোতি অধিপ্পেতো, ন গণসঙ্গণিকাভাৰমত্তন্তি দস্সেতি. কম্মন্তি যোগকম্মং.

সত্তেহি কিলেসেহি চ সঙ্গণনং সমোধানং সঙ্গণিকা, সা আরমিতব্বট্ঠেন আরামো এতস্সাতি সঙ্গণিকারামো, তস্স. তেনাহ ‘‘গণসঙ্গণিকায চেৰা’’তিআদি. আরদ্ধৰীরিযস্সাতি পগ্গহিতৰীরিযস্স. তঞ্চ খো উপধিৰিৰেকে নিন্নতাৰসেন ‘‘অযং ধম্মো’’তি ৰচনতো. এস নযো ইতরেসুপি. ৰিৰট্টনিস্সিতংযেৰ হি সমাধানং ইধাধিপ্পেতং, তথা পঞ্ঞাপি. কম্মস্স-কতপঞ্ঞায হি ঠিতো কম্মৰসেন ভৰেসু নানপ্পকারো অনত্থোতি জানন্তো কম্মক্খযকরং ঞাণং অভিপত্থেতি, তদত্থঞ্চ উস্সাহং করোতি. মানাদযো সত্তসন্তানং সংসারে পপঞ্চেন্তি ৰিত্থারেন্তীতি পপঞ্চাতি আহ ‘‘তণ্হামানদিট্ঠিপপঞ্চরহিতত্তা’’তিআদি. সেসমেত্থ সুৰিঞ্ঞেয্যমেৰ.

অনুরুদ্ধমহাৰিতক্কসুত্তৰণ্ণনা নিট্ঠিতা.

গহপতিৰগ্গৰণ্ণনা নিট্ঠিতা.

৪. দানৰগ্গো

১-৪. পঠমদানসুত্তাদিৰণ্ণনা

৩১-৩৪. চতুত্থস্স পঠমে আসজ্জাতি যস্স দেতি, তস্স আগমনহেতু তেন সমাগমনিমিত্তং. ভযাতি ভযহেতু. ননু ভযং নাম লদ্ধকামতারাগাদযো ৰিয চেতনায অৰিসুদ্ধিকরং, তং কস্মা ইধ গহিতন্তি? নযিদং তাদিসং ৰোহারভযাদিং সন্ধায ৰুত্তন্তি দস্সেতুং ‘‘অযং অদাযকো অকারকো’’তিআদি ৰুত্তং. অদাসি মেতি যং পুব্বে কতং উপকারং চিন্তেত্ৰা দীযতি, তং সন্ধায ৰুত্তং. দস্সতি মেতি পচ্চুপকারাসীসায যং দীযতি, তং সন্ধায ৰদতি. সাহু দানন্তি দানং নামেতং পণ্ডিতপঞ্ঞত্তন্তি সাধুসমাচারে ঠত্ৰা দেতি. অলঙ্কারত্থন্তি উপসোভনত্থং. দানঞ্হি দত্ৰা তং পচ্চৰেক্খন্তস্স পামোজ্জপীতিসোমনস্সাদযো উপ্পজ্জন্তি, লোভদোসইস্সামচ্ছেরাদযোপি ৰিদূরী ভৰন্তি. ইদানি দানং অনুকূলধম্মপরিব্রূহনেন পচ্চনীকধম্মৰিদূরীকরণেন চ ভাৰনাচিত্তস্স উপসোভনায চ পরিক্খারায চ হোতীতি ‘‘অলঙ্কারত্থঞ্চেৰ পরিক্খারত্থঞ্চ দেতী’’তি ৰুত্তং. তেনাহ ‘‘দানঞ্হি চিত্তং মুদুং করোতী’’তিআদি. মুদুচিত্তো হোতি লদ্ধা দাযকে ‘‘ইমিনা ময্হং সঙ্গহো কতো’’তি, দাতাপি লদ্ধরি. তেন ৰুত্তং ‘‘উভিন্নম্পি চিত্তং মুদুং করোতী’’তি.

অদন্তদমনন্তি অদন্তা অনস্সৰাপিস্স দানেন দন্তা অস্সৰা হোন্তি, ৰসে ৰত্তন্তি. অদানং দন্তদূসকন্তি অদানং পুব্বে দন্তানং অস্সৰানম্পি ৰিঘাতুপ্পাদনেন চিত্তং দূসেতি. উন্নমন্তি দাযকা পিযংৰদা চ পরেসং গরুচিত্তীকারট্ঠানতায. নমন্তিপটিগ্গাহকা দানেন পিযৰাচায চ লদ্ধসঙ্গহাসঙ্গাহকানং.

চিত্তালঙ্কারদানমেৰ উত্তমং অনুপক্কিলিট্ঠতায সুপরিসুদ্ধতায গুণৰিসেসপচ্চযতায চ. দুতিযাদীনি উত্তানত্থানেৰ.

পঠমদানসুত্তাদিৰণ্ণনা নিট্ঠিতা.

৫. দানূপপত্তিসুত্তৰণ্ণনা

৩৫. পঞ্চমে দানপচ্চযাতি দানকারণা, দানমযপুঞ্ঞস্স কতত্তা উপচিতত্তাতি অত্থো. উপপত্তিযোতি মনুস্সেসু দেৰেসু চ নিব্বত্তিযো. ঠপেতীতি একৰারমেৰ অনুপ্পজ্জিত্ৰা যথা উপরি তেনেৰাকারেন পৰত্ততি, এৰং ঠপেতি. তদেৰ চস্স অধিট্ঠানন্তি আহ ‘‘তস্সেৰ ৰেৰচন’’ন্তি. ৰড্ঢেতীতি ব্রূহেতি ন হাপেতি. ৰিমুত্তন্তি অধিমুত্তং, নিন্নং পোণং পব্ভারন্তি অত্থো. ৰিমুত্তন্তি ৰা ৰিস্সট্ঠং. নিপ্পরিযাযতো উত্তরি নাম পণীতং মজ্ঝেপি হীনমজ্ঝিমৰিভাগস্স লব্ভনতোতি ৰুত্তং ‘‘উত্তরি অভাৰিতন্তি ততো উপরিমগ্গফলত্থায অভাৰিত’’ন্তি. সংৰত্ততি তথাপণিহিতং দানমযং চিত্তং. যং পন পাল়িযং ‘‘তঞ্চ খো’’তিআদি ৰুত্তং, তং তত্রুপপত্তিযা ৰিবন্ধকরদুস্সীল্যাভাৰদস্সনপরং দট্ঠব্বং, ন দানমযস্স পুঞ্ঞস্স কেৰলস্স তংসংৰত্তনতাদস্সনপরন্তি দট্ঠব্বং. সমুচ্ছিন্নরাগস্সাতি সমুচ্ছিন্নকামরাগস্স. তস্স হি সিযা ব্রহ্মলোকে উপপত্তি, ন সমুচ্ছিন্নভৰরাগস্স. ৰীতরাগগ্গহণেন চেত্থ কামেসু ৰীতরাগতা অধিপ্পেতা, যায ব্রহ্মলোকূপপত্তি সিযা. তেনাহ ‘‘দানমত্তেনেৰা’’তিআদি. যদি এৰং দানং তত্থ কিমত্থিযন্তি আহ ‘‘দানং পনা’’তিআদি. দানেন মুদুচিত্তোতি বদ্ধাঘাতে ৰেরিপুগ্গলেপি অত্তনো দানসম্পটিচ্ছনেন মুদুভূতচিত্তো.

দানূপপত্তিসুত্তৰণ্ণনা নিট্ঠিতা.

৬. পুঞ্ঞকিরিযৰত্থুসুত্তৰণ্ণনা