৫. উপোসথৰগ্গো
১-৮. সংখিত্তূপোসথসুত্তাদিৰণ্ণনা
৪১-৪৮. পঞ্চমস্স পঠমাদীসু নত্থি ৰত্তব্বং. ছট্ঠে (সং. নি. টী. ১.১.১৬৫) পঞ্চ অঙ্গানি এতস্সাতি পঞ্চঙ্গং, পঞ্চঙ্গমেৰ পঞ্চঙ্গিকং, তস্স পঞ্চঙ্গিকস্স. মহতী দদ্দরী ৰীণাৰিসেসোপি আততমেৰাতি ‘‘চম্মপরিযোনদ্ধেসূ’’তি ৰিসেসনং কতং. একতলতূরিযং কুম্ভথুনদদ্দরিকাদি. উভযতলং ভেরিমুদিঙ্গাদি. চম্মপরিযোনদ্ধং হুত্ৰা ৰিনিবদ্ধং আততৰিততং. সব্বসো পরিযোনদ্ধং নাম চতুরস্সঅম্বণং পণৰাদি চ. গোমুখীআদীনম্পি এত্থেৰ সঙ্গহো দট্ঠব্বো. ৰংসাদীতি আদি-সদ্দেন সঙ্খাদীনং সঙ্গহো. সম্মাদীতি সম্মতাল়কংসতাল়সিলাসলাকতাল়াদি. তত্থ সম্মতাল়ং নাম দন্তমযতাল়ং. কংসতাল়ং লোহমযং. সিলামযং অযোপত্তেন চ ৰাদনতাল়ং সিলাসলাকতাল়ং. সুমুচ্ছিতস্সাতি সুট্ঠু পটিযত্তস্স. পমাণেতি নাতিদল়্হনাতিসিথিলসঙ্খাতে মজ্ঝিমে মুচ্ছনাপমাণে. ছেকোতি পটু পট্ঠো. সো চস্স পটুভাৰো মনোহরোতি আহ ‘‘সুন্দরো’’তি. রঞ্জেতুন্তি রাগং উপ্পাদেতুং. খমতেৰাতি রোচতেৰ. ন নিব্বিন্দতীতি ন তজ্জেতি, সোতসুখভাৰতো পিযাযিতব্বোৰ হোতি.
ভত্তারং নাতিমঞ্ঞতীতি সামিকং মুঞ্চিত্ৰা অঞ্ঞং মনসাপি ন পত্থেতি. উট্ঠাহিকাতি উট্ঠানৰীরিযসম্পন্না. অনলসাতি নিক্কোসজ্জা. সঙ্গহিতপরিজ্জনাতি সম্মাননাদীহি চেৰ ছণাদীসু পেসেতব্ব-পিযভণ্ডাদিপণ্ণাকারপেসনাদীহি চ সঙ্গহিতপরিজনা. ইধ পরিজনো নাম সামিকস্স চেৰ অত্তনো চ ঞাতিজনো. সম্ভতন্তি কসিৰণিজ্জাদীনি কত্ৰা আভতধনং. সত্তমট্ঠমানি উত্তানত্থানি.
সংখিত্তূপোসথসুত্তাদিৰণ্ণনা নিট্ঠিতা.
৯-১০. পঠমইধলোকিকসুত্তাদিৰণ্ণনা
৪৯-৫০. নৰমে ইধলোকৰিজযাযাতি ইধলোকৰিজিননত্থায অভিভৰত্থায. যো হি দিট্ঠধম্মিকং অনত্থং পরিৰজ্জনৰসেন অভিভৰতি, ততো এৰ তদত্থং সম্পাদেতি, সো ইধলোকৰিজযায পটিপন্নো নাম হোতি পচ্চত্থিকনিগ্গণ্হনতো সদত্থসম্পাদনতো চ. তেনাহ ‘‘অযংস লোকো আরদ্ধো হোতী’’তি. (পসংসাৰহতো তযিদং পসংসাৰহনং কিত্তিসদ্দেন ইধলোকে সদ্দানং চিত্ততোসনৰিদ্ধেয্যভাৰাপাদনেন চ হোতীতি দট্ঠব্বং.) সুসংৰিহিতকম্মন্তোতি যাগুভত্তপচনকালাদীনি অনতিক্কমিত্ৰা তস্স তস্স সাধুকং করণেন সুট্ঠু সংৰিহিতকম্মন্তো. পরলোকৰিজযাযাতি পরলোকস্স ৰিজিননত্থায অভিভৰত্থায. যো হি সম্পরাযিকং অনত্থং পরিৰজ্জনৰসেন অভিভৰতি, ততো এৰ তদত্থং সম্পাদেতি, সো পরলোকৰিজযায পটিপন্নো নাম হোতি. সেসং সব্বত্থ উত্তানমেৰ.
পঠমইধলোকিকসুত্তাদিৰণ্ণনা নিট্ঠিতা.
উপোসথৰগ্গৰণ্ণনা নিট্ঠিতা.
পঠমপণ্ণাসকং নিট্ঠিতং.