৪-৫. দুতিযঅগ্গিসুত্তাদিৰণ্ণনা

৪৭-৪৮. চতুত্থে যঞ্ঞৰাটং সম্পাদেত্ৰা মহাযঞ্ঞং উদ্দিস্স সৰিঞ্ঞাণকানি অৰিঞ্ঞাণকানি চ যঞ্ঞূপকরণানি সজ্জিতানীতি আহ পাল়িযং ‘‘মহাযঞ্ঞো উপক্খটো’’তি. তং উপকরণং তেসং তথাসজ্জনন্তি আহ ‘‘উপক্খটোতি পচ্চুপট্ঠিতো’’তি. ৰচ্ছতরসতানীতি যুৰভাৰপ্পত্তানি নাতিবলৰৰচ্ছসতানি. তে পন ৰচ্ছা এৰ হোন্তি, ন দম্মা, বলীবদ্দা ৰা. উরব্ভাতি তরুণমেণ্ডকা ৰুচ্চন্তি. উপনীতানীতি ঠপনত্থায উপনীতানি. ৰিহিংসট্ঠেনাতি হিংসনট্ঠেন. উপৰাযতূতি উপগন্ত্ৰা সরীরদরথং নিব্বাপেন্তো সণ্হসীতলা ৰাতো ৰাযতু. সেসং সুৰিঞ্ঞেয্যমেৰ. পঞ্চমে নত্থি ৰত্তব্বং.

দুতিযঅগ্গিসুত্তাদিৰণ্ণনা নিট্ঠিতা.