৫. মহাযঞ্ঞৰগ্গো

১. সত্তৰিঞ্ঞাণট্ঠিতিসুত্তৰণ্ণনা

৪৪. পঞ্চমস্স পঠমে যস্মা নিদস্সনত্থে নিপাতো (দী. নি. টী. ২.১২৭) তস্মা সেয্যথাপি মনুস্সাতি যথা মনুস্সাতি ৰুত্তং হোতি. ৰিসেসো হোতিযেৰ সতিপি বাহিরস্স কারণস্স অভেদে অজ্ঝত্তিকস্স ভিন্নত্তা. নানত্তং কাযে এতেসং, নানত্তো ৰা কাযো এতেসন্তি নানত্তকাযা. ইমিনা নযেন সেসপদেসুপি অত্থো ৰেদিতব্বো. নেসন্তি মনুস্সানং. নানত্তা সঞ্ঞা এতেসং অত্থীতি নানত্তসঞ্ঞিনো. সুখসমুস্সযতো ৰিনিপাতো এতেসং অত্থীতি ৰিনিপাতিকা সতিপি দেৰভাৰে দিব্বসম্পত্তিযা অভাৰতো. অপাযেসু ৰা গতো নত্থি নিপাতো এতেসন্তি ৰিনিপাতিকা. তেনাহ ‘‘চতুঅপাযৰিনিমুত্তা’’তি. পিযঙ্করমাতাদীনং ৰিযাতি পিযঙ্করমাতা কির যক্খিনী পচ্চূসসমযে অনুরুদ্ধত্থেরস্স ধম্মং সজ্ঝাযতো সুত্ৰা –

‘‘মা সদ্দমকরী পিযঙ্কর, ভিক্খু ধম্মপদানি ভাসতি;

অপি ধম্মপদং ৰিজানিয, পটিপজ্জেম হিতায নো সিযা.

‘‘পাণেসু চ সংযমামসে, সম্পজানমুসা ন ভণামসে;

সিক্খেম সুসীল্যমত্তনো, অপি মুচ্চেম পিসাচযোনিযা’’তি. (সং. নি. ১.২৪০) –

এৰং পুত্তকং সঞ্ঞাপেত্ৰা তং দিৰসং সোতাপত্তিফলং পত্তা. উত্তরমাতা পন ভগৰতো ধম্মং সুত্ৰাৰ সোতাপন্না জাতা.

ব্রহ্মকাযে পঠমজ্ঝাননিব্বত্তে ব্রহ্মসমূহে, ব্রহ্মনিকাযে ৰা ভৰাতি ব্রহ্মকাযিকা. মহাব্রহ্মুনো পরিসায ভৰাতি ব্রহ্মপারিসজ্জা তস্স পরিচারকট্ঠানে ঠিতত্তা. মহাব্রহ্মুনো পুরোহিতট্ঠানে ঠিতাতি ব্রহ্মপুরোহিতা. আযুৰণ্ণাদীহি মহন্তা ব্রহ্মানোতি মহাব্রহ্মানো. সতিপি তেসং তিৰিধানম্পি পঠমেন ঝানেন গন্ত্ৰা নিব্বত্তভাৰে ঝানস্স পন পৰত্তিভেদেন অযং ৰিসেসোতি দস্সেতুং ‘‘ব্রহ্মপারিসজ্জা পনা’’তিআদি ৰুত্তং. পরিত্তেনাতি হীনেন. সা চস্স হীনতা ছন্দাদীনং হীনতায ৰেদিতব্বা. পটিলদ্ধমত্তং ৰা হীনং. কপ্পস্সাতি অসঙ্খ্যেয্যকপ্পস্স. হীনপণীতানং মজ্ঝে ভৰত্তা মজ্ঝিমং. সা চস্স মজ্ঝিমতা ছন্দাদীনং মজ্ঝিমতায ৰেদিতব্বা. পটিলভিত্ৰা নাতিসুভাৰিতং ৰা মজ্ঝিমং. উপড্ঢকপ্পোতি অসঙ্খ্যেয্যকপ্পস্স উপড্ঢকপ্পো. ৰিপ্ফারিকতরোতি ব্রহ্মপারিসজ্জেহি পমাণতো ৰিপুলতরো সভাৰতো উল়ারতরো চ হোতি. সভাৰেনপি হি উল়ারতমোৰ. তং পনেত্থ অপ্পমাণং. তস্স হি পরিত্তাভাদীনং পরিত্তসুভাদীনঞ্চ কাযে সতিপি সভাৰৰেমত্তে একত্তৰসেনেৰ ৰৰত্থপীযতীতি ‘‘একত্তকাযা’’ত্ৰেৰ তে ৰুচ্চন্তি. পণীতেনাতি উক্কট্ঠেন. সা চস্স উক্কট্ঠতা ছন্দাদীনং উক্কট্ঠতায ৰেদিতব্বা. সুভাৰিতং ৰা, সম্মদেৰ, ৰসিভাৰং পাপিতং পণীতং ‘‘পধানভাৰং নীত’’ন্তি কত্ৰা. ইধাপি কপ্পো অসঙ্খ্যেয্যকপ্পৰসেনেৰ ৰেদিতব্বো পরিপুণ্ণমহাকপ্পস্স অসম্ভৰতো. ইতীতি এৰং ৰুত্তপ্পকারেন. তেতি ‘‘ব্রহ্মকাযিকা’’তি ৰুত্তা তিৰিধাপি ব্রহ্মানো. সঞ্ঞায একত্তাতি তিহেতুকভাৰেন একসভাৰত্তা. ন হি তস্সা সম্পযুত্তধম্মৰসেন অঞ্ঞোপি কোচি ভেদো অত্থি. এৰন্তি ইমিনা নানত্তকাযা একত্তসঞ্ঞিনো গহিতাতি দস্সেতি.

দণ্ডউক্কাযাতি দণ্ডদীপিকায. সরতি ধাৰতি, ৰিস্সরতি ৰিপ্পকিণ্ণা ৰিয ধাৰতি. দ্ৰে কপ্পাতি দ্ৰে মহাকপ্পা. ইতো পরেসুপি এসেৰ নযো. ইধাতি ইমস্মিং সুত্তে. উক্কট্ঠপরিচ্ছেদৰসেন আভস্সরগ্গহণেনেৰ সব্বেপি তে পরিত্তাভাঅপ্পমাণাভাপি গহিতা.

সুন্দরা পভা সুভা, তায কিণ্ণা সুভাকিণ্ণাতি ৰত্তব্বে. ভা-সদ্দস্স রস্সত্তং অন্তিম-ণ-কারস্স হ-কারঞ্চ কত্ৰা ‘‘সুভকিণ্হা’’তি ৰুত্তা. অট্ঠকথাযং পন নিচ্চলায একগ্ঘনায পভায সুভোতি পরিযাযৰচনন্তি ‘‘সুভেন ওকিণ্ণা ৰিকিণ্ণা’’তি অত্থো ৰুত্তো. এত্থাপি অন্তিম-ণ-কারস্স হ-কারকরণং ইচ্ছিতব্বমেৰ. ন ছিজ্জিত্ৰা পভা গচ্ছতি একগ্ঘনত্তা. চতুত্থৰিঞ্ঞাণট্ঠিতিমেৰ ভজন্তি কাযস্স সঞ্ঞায চ একরূপত্তা. ৰিপুলসন্তসুখাযুৰণ্ণাদিফলত্তা ৰেহপ্ফলা. এত্থাতি ৰিঞ্ঞাণট্ঠিতিযং.

ৰিৰট্টপক্খে ঠিতা অপুনরাৰত্তনতো. ‘‘ন সব্বকালিকা’’তি ৰত্ৰা তমেৰ অসব্বকালিকত্তং ৰিভাৰেতুং ‘‘কপ্পসতসহস্সম্পী’’তিআদি ৰুত্তং. সোল়সকপ্পসহস্সচ্চযেন উপ্পন্নানং সুদ্ধাৰাসব্রহ্মানং পরিনিব্বাযনতো অঞ্ঞেসঞ্চ তত্থ অনুপ্পজ্জনতো বুদ্ধসুঞ্ঞে লোকে সুঞ্ঞং তং ঠানং হোতি, তস্মা সুদ্ধাৰাসা ন সব্বকালিকা. খন্ধাৰারট্ঠানসদিসা হোন্তি সুদ্ধাৰাসভূমিযো. ইমিনা সুত্তেন সুদ্ধাৰাসানং সত্তাৰাসভাৰদীপনেনেৰ ৰিঞ্ঞাণট্ঠিতিভাৰোপি দীপিতো হোতি, তস্মা সুদ্ধাৰাসাপি সত্তসু ৰিঞ্ঞাণট্ঠিতীসু চতুত্থৰিঞ্ঞাণট্ঠিতিং, নৰসু সত্তাৰাসেসু চতুত্থসত্তাৰাসঞ্চ ভজন্তি.

সুখুমত্তাতি সঙ্খারাৰসেসসুখুমভাৰপ্পত্তত্তা. পরিব্যত্তৰিঞ্ঞাণকিচ্চাভাৰতো নেৰ ৰিঞ্ঞাণং, ন সব্বসো অৰিঞ্ঞাণং হোতীতি নাৰিঞ্ঞাণং, তস্মা পরিপ্ফুতৰিঞ্ঞাণকিচ্চৰন্তীসু ৰিঞ্ঞাণট্ঠিতীসু ন ৰুত্তং.

সত্তৰিঞ্ঞাণট্ঠিতিসুত্তৰণ্ণনা নিট্ঠিতা.

২. সমাধিপরিক্খারসুত্তৰণ্ণনা

৪৫. দুতিযে সমাধিপরিক্খারাতি এত্থ তযো পরিক্খারা. ‘‘রথো সীলপরিক্খারো, ঝানক্খো চক্কৰীরিযো’’তি (সং. নি. ৫.৪) হি এত্থ অলঙ্কারো পরিক্খারো নাম. ‘‘সত্তহি নগরপরিক্খারেহি সুপরিক্খতং হোতী’’তি (অ. নি. ৭.৬৭) এত্থ পরিৰারো পরিক্খারো নাম. ‘‘গিলানপচ্চয…পে… জীৰিতপরিক্খারা’’তি (ম. নি. ১.১৯১-১৯২) এত্থ সম্ভারো পরিক্খারো নাম. সো ইধ অধিপ্পেতোতি আহ ‘‘মগ্গসমাধিস্স সম্ভারা’’তি. পরিৰারপরিক্খারোপি ৰট্টতিযেৰ. পরিৰারো হি সম্মাদিট্ঠাদযো মগ্গধম্মা সম্মাসমাধিস্স সহজাতাদিপচ্চযভাৰেন পরিকরণতো অভিসঙ্খরণতো. পরিক্খতাতি পরিৰারিতা. অযং ৰুচ্চতি অরিযো সম্মাসমাধীতি অযং সত্তহি রতনেহি পরিৰুতো চক্কৰত্তী ৰিয সত্তহি অঙ্গেহি পরিৰুতো অরিযো সম্মাসমাধীতি ৰুচ্চতি. উপেচ্চ নিস্সীযতীতি উপনিসা, সহ উপনিসাযাতি সউপনিসো, সউপনিস্সযো অত্থো, সপরিৰারোযেৰাতি ৰুত্তং হোতি. সহকারিকারণভূতো হি ধম্মসমূহো ইধ ‘‘উপনিসো’’তি অধিপ্পেতো.

সমাধিপরিক্খারসুত্তৰণ্ণনা নিট্ঠিতা.

৩. পঠমঅগ্গিসুত্তৰণ্ণনা

৪৬. ততিযে অনুডহনট্ঠেনাতি কামং আহুনেয্যগ্গিআদযো তযো অগ্গী ব্রাহ্মণেহিপি ইচ্ছিতা সন্তি. তে পন তেহি ইচ্ছিতমত্তাৰ, ন সত্তানং তাদিসা অত্থসাধকা. যে পন সত্তানং অত্থসাধকা, তে দস্সেতুং ‘‘আহুনং ৰুচ্চতী’’তিআদি ৰুত্তং. তত্থ আনেত্ৰা হুননং পূজনং ‘‘আহুন’’ন্তি ৰুত্তং, তং আহুনং অরহন্তী মাতাপিতরো. তেনাহ ভগৰা – ‘‘আহুনেয্যাতি, ভিক্খৰে, মাতাপিতূনং এতং অধিৰচন’’ন্তি (ইতিৰু. ১০৬). যদগ্গেন চ তে পুত্তানং বহূপকারতায আহুনেয্যাতি, তেসু সম্মাপটিপত্তি নেসং হিতসুখাৰহা, তদগ্গেন তেসু মিচ্ছাপটিপত্তি অহিতদুক্খাৰহাতি আহ ‘‘তেসু…পে… নিব্বত্তন্তী’’তি.

স্ৰাযমত্থো (দী. নি. অট্ঠ. ৩.৩০৫) মিত্তৰিন্দকৰত্থুনা ৰেদিতব্বো. মিত্তৰিন্দকো হি মাতরা, ‘‘তাত, অজ্জ উপোসথিকো হুত্ৰা ৰিহারে সব্বরত্তিং ধম্মস্সৰনং সুণোহি, সহস্সং তে দস্সামী’’তি ৰুত্তো ধনলোভেন উপোসথং সমাদায ৰিহারং গন্ত্ৰা ‘‘ইদং ঠানং অকুতোভয’’ন্তি সল্লক্খেত্ৰা ধম্মাসনস্স হেট্ঠা নিপন্নো সব্বরত্তিং নিদ্দাযিত্ৰা ঘরং অগমাসি. মাতা পাতোৰ যাগুং পচিত্ৰা উপনামেসি. সো সহস্সং গহেত্ৰাৰ পিৰি. অথস্স এতদহোসি ‘‘ধনং সংহরিস্সামী’’তি. সো নাৰায সমুদ্দং পক্খন্দিতুকামো অহোসি. অথ নং মাতা, ‘‘তাত, ইমস্মিং কুলে চত্তালীসকোটিধনং অত্থি, অলং গমনেনা’’তি নিৰারেতি. সো তস্সা ৰচনং অনাদিযিত্ৰা গচ্ছতি এৰ. সা পুরতো অট্ঠাসি. অথ নং কুজ্ঝিত্ৰা ‘‘অযং ময্হং পুরতো তিট্ঠতী’’তি পাদেন পহরিত্ৰা পতিতং অন্তরং কত্ৰা অগমাসি.

মাতা উট্ঠহিত্ৰা ‘‘মাদিসায মাতরি এৰরূপং কম্মং কত্ৰা গতস্স তে গতট্ঠানে সুখং ভৰিস্সতীতি এৰংসঞ্ঞী নাম ত্ৰং পুত্তা’’তি আহ. তস্স নাৰং আরুয্হ গচ্ছতো সত্তমে দিৰসে নাৰা অট্ঠাসি. অথ তে মনুস্সা ‘‘অদ্ধা এত্থ পাপপুগ্গলো অত্থি, সলাকং দেথা’’তি আহংসু. সলাকা দীযমানা তস্সেৰ তিক্খত্তুং পাপুণি. তে তস্স উল়ুম্পং দত্ৰা তং সমুদ্দে পক্খিপিংসু. সো একং দীপং গন্ত্ৰা ৰিমানপেতীহি সদ্ধিং সম্পত্তিং অনুভৰন্তো তাহি ‘‘পুরতো পুরতো মা অগমাসী’’তি ৰুচ্চমানোপি তদ্দিগুণং তদ্দিগুণং সম্পত্তিং পস্সন্তো অনুপুব্বেন খুরচক্কধরং একং অদ্দস. তং চক্কং পদুমপুপ্ফং ৰিয উপট্ঠাসি. সো তং আহ, ‘‘অম্ভো, ইদং তযা পিল়ন্ধিতং পদুমং ময্হং দেহী’’তি. ন ইদং, সামি, পদুমং, খুরচক্কং এতন্তি. সো ‘‘ৰঞ্চেসি মং ত্ৰং, কিং মযা পদুমং ন দিট্ঠপুব্ব’’ন্তি ৰত্ৰা ‘‘ত্ৰং লোহিতচন্দনং ৰিলিম্পিত্ৰা পিল়ন্ধনং পদুমপুপ্ফং ময্হং ন দাতুকামো’’তি আহ. সো চিন্তেসি ‘‘অযম্পি মযা কতসদিসং কম্মং কত্ৰা তস্স ফলং অনুভৰিতুকামো’’তি. অথ নং ‘‘গণ্হ, রে’’তি ৰত্ৰা তস্স মত্থকে চক্কং খিপি. তেন ৰুত্তং –

‘‘চতুব্ভি অট্ঠজ্ঝগমা, অট্ঠাহি পিচ সোল়স;

সোল়সাহি চ বাত্তিংস, অত্রিচ্ছং চক্কমাসদো;

ইচ্ছাহতস্স পোসস্স, চক্কং ভমতি মত্থকে’’তি. (জা. ১.১.১০৪; ১.৫.১০৩);

সোতি গেহসামিকো ভত্তা. পুরিমনযেনেৰাতি অনুডহনস্স পচ্চযতায. তত্রিদং ৰত্থু – কস্সপবুদ্ধকালে সোতাপন্নস্স উপাসকস্স ভরিযা অতিচারং চরতি. সো তং পচ্চক্খতো দিস্ৰা ‘‘কস্মা এৰং করোসী’’তি আহ. সা ‘‘সচাহং এৰরূপং করোমি, অযং মে সুনখো ৰিলুপ্পমানো খাদতূ’’তি ৰত্ৰা কালকতা কণ্ণমুণ্ডকদহে ৰেমানিকপেতী হুত্ৰা নিব্বত্তা দিৰা সম্পত্তিং অনুভৰতি, রত্তিং দুক্খং. তদা বারাণসিরাজা মিগৰং চরন্তো অরঞ্ঞং পৰিসিত্ৰা অনুপুব্বেন কণ্ণমুণ্ডকদহং সম্পত্তো তায সদ্ধিং সম্পত্তিং অনুভৰতি. সা তং ৰঞ্চেত্ৰা রত্তিং দুক্খং অনুভৰতি. সো ঞত্ৰা ‘‘কত্থ নু খো গচ্ছতী’’তি পিট্ঠিতো পিট্ঠিতো গন্ত্ৰা অৰিদূরে ঠিতো কণ্ণমুণ্ডকদহতো নিক্খমিত্ৰা তং ‘‘পটপট’’ন্তি খাদমানং একং সুনখং দিস্ৰা অসিনা দ্ৰিধা ছিন্দি, দ্ৰে অহেসুং. পুন ছিন্নে চত্তারো, পুন ছিন্নে অট্ঠ, পুন ছিন্নে সোল়স অহেসুং. সা ‘‘কিং করোসি, সামী’’তি আহ. সো ‘‘কিং ইদ’’ন্তি আহ. সা ‘‘এৰং অকত্ৰা খেল়পিণ্ডং ভূমিযং নিট্ঠুভিত্ৰা পাদেন ঘংসাহী’’তি আহ. সো তথা অকাসি. সুনখা অন্তরধাযিংসু. মুট্ঠিযোগো কিরাযং তস্স সুনখন্তরধানস্স, যদিদং খেল়পিণ্ডং ভূমিযং নিট্ঠুভিত্ৰা পাদেন ঘংসনং, তং দিৰসং তস্সা কম্মং খীণং. রাজা ৰিপ্পটিসারী হুত্ৰা গন্তুং আরদ্ধো. সা ‘‘ময্হং, সামি, কম্মং খীণং, মা অগমাসী’’তি আহ. রাজা অস্সুত্ৰাৰ গতো.

দক্খিণাতি চত্তারো পচ্চযা দীযমানা দক্খন্তি এতেহি হিতসুখানীতি, তং দক্খিণং অরহতীতি দক্খিণেয্যো, ভিক্খুসঙ্ঘো.

পঠমঅগ্গিসুত্তৰণ্ণনা নিট্ঠিতা.

৪-৫. দুতিযঅগ্গিসুত্তাদিৰণ্ণনা

৪৭-৪৮. চতুত্থে যঞ্ঞৰাটং সম্পাদেত্ৰা মহাযঞ্ঞং উদ্দিস্স সৰিঞ্ঞাণকানি অৰিঞ্ঞাণকানি চ যঞ্ঞূপকরণানি সজ্জিতানীতি আহ পাল়িযং ‘‘মহাযঞ্ঞো উপক্খটো’’তি. তং উপকরণং তেসং তথাসজ্জনন্তি আহ ‘‘উপক্খটোতি পচ্চুপট্ঠিতো’’তি. ৰচ্ছতরসতানীতি যুৰভাৰপ্পত্তানি নাতিবলৰৰচ্ছসতানি. তে পন ৰচ্ছা এৰ হোন্তি, ন দম্মা, বলীবদ্দা ৰা. উরব্ভাতি তরুণমেণ্ডকা ৰুচ্চন্তি. উপনীতানীতি ঠপনত্থায উপনীতানি. ৰিহিংসট্ঠেনাতি হিংসনট্ঠেন. উপৰাযতূতি উপগন্ত্ৰা সরীরদরথং নিব্বাপেন্তো সণ্হসীতলা ৰাতো ৰাযতু. সেসং সুৰিঞ্ঞেয্যমেৰ. পঞ্চমে নত্থি ৰত্তব্বং.

দুতিযঅগ্গিসুত্তাদিৰণ্ণনা নিট্ঠিতা.

৬. দুতিযসঞ্ঞাসুত্তৰণ্ণনা

৪৯. ছট্ঠে ন্হারুৰিলেখনন্তি চম্মং লিখন্তানং চম্মং লিখিত্ৰা ছড্ডিতকসটং. ‘‘এসোহমস্মী’’তিআদিনা অহংকরণং অহঙ্কারো. ‘‘এতং মমা’’তি মমংকরণং মমঙ্কারো. তেনাহ ‘‘অহঙ্কারদিট্ঠিতো’’তিআদি. তিস্সো ৰিধাতি সেয্যসদিসহীনৰসেন তযো মানা. ‘‘একৰিধেন রূপসঙ্গহো’’তিআদীসু (ধ. স. ৫৮৪) কোট্ঠাসো ‘‘ৰিধা’’তি ৰুত্তো. ‘‘কথংৰিধং সীলৰন্তং ৰদন্তি, কথংৰিধং পঞ্ঞৰন্তং ৰদন্তী’’তিআদীসু (সং. নি. ১.৯৫) পকারো. ‘‘তিস্সো ইমা, ভিক্খৰে, ৰিধা. কতমা তিস্সো? সেয্যোহমস্মীতি ৰিধা’’তি (ৰিভ. ৯২০) এত্থ মানো ‘‘ৰিধা’’তি ৰুত্তো. ইধাপি মানোৰ অধিপ্পেতো. মানো হি ৰিদহনতো হীনাদিৰসেন তিৰিধা. তেনাকারেন দহনতো উপদহনতো ‘‘ৰিধা’’তি ৰুচ্চতি.

দুতিযসঞ্ঞাসুত্তৰণ্ণনা নিট্ঠিতা.

৭-৮. মেথুনসুত্তাদিৰণ্ণনা

৫০-৫১. সত্তমে ইধাতি ইমস্মিং লোকে. একচ্চোতি একো. সমণো ৰা ব্রাহ্মণো ৰাতি পব্বজ্জামত্তেন সমণো ৰা, জাতিমত্তেন ব্রাহ্মণো ৰা. দ্ৰযংদ্ৰযসমাপত্তিন্তি দ্ৰীহি দ্ৰীহি সমাপজ্জিতব্বং, মেথুনন্তি অত্থো. ন হেৰ খো সমাপজ্জতীতি সম্বন্ধো. উচ্ছাদনং উব্বট্টনং. সম্বাহনং পরিমদ্দনং. সাদিযতীতি অধিৰাসেতি. তদস্সাদেতীতি উচ্ছাদনাদিং অভিরমতি. নিকামেতীতি ইচ্ছতি. ৰিত্তিন্তি তুট্ঠিং. ইদম্পি খোতি এত্থ ইদন্তি যথাৰুত্তং সাদিযনাদিং খণ্ডাদিভাৰৰসেন একং কত্ৰা ৰুত্তং. পি-সদ্দো ৰক্খমানং উপাদায সমুচ্চযত্থো, খো-সদ্দো অৰধারণত্থো. ইদং ৰুত্তং হোতি – যদেতং ব্রহ্মচারিপটিঞ্ঞস্স অসতিপি দ্ৰযংদ্ৰযসমাপত্তিযং মাতুগামস্স উচ্ছাদননহাপনসম্বাহনসাদিযনাদি. ইদম্পি একংসেন তস্স ব্রহ্মচরিযস্স খণ্ডাদিভাৰাপাদনতো খণ্ডম্পি ছিদ্দম্পি সবলম্পি কম্মাসম্পীতি. এৰং পন খণ্ডাদিভাৰাপত্তিযা সো অপরিসুদ্ধং ব্রহ্মচরিযং চরতি, ন পরিসুদ্ধং, সংযুত্তো মেথুনসংযোগেন, ন ৰিসংযুত্তো. ততো চস্স ন জাতিআদীহি পরিমুত্তীতি দস্সেন্তো ‘‘অযং ৰুচ্চতী’’তিআদিমাহ.

সঞ্জগ্ঘতীতি কিলেসৰসেন মহাহসিতং হসতি. সংকীল়তীতি কাযসংসগ্গৰসেন কীল়তি. সংকেলাযতীতি সব্বসো মাতুগামং কেলাযন্তো ৰিহরতি. চক্খুনাতি অত্তনো চক্খুনা. চক্খুন্তি মাতুগামস্স চক্খুং. উপনিজ্ঝাযতীতি উপেচ্চ নিজ্ঝাযতি ওলোকেতি. তিরোকুট্টন্তি কুট্টস্স পরতো. তথা তিরোপাকারং, ‘‘মত্তিকামযা ভিত্তি কুট্টং, ইট্ঠকামযা পাকারো’’তি ৰদন্তি. যা কাচি ৰা ভিত্তি পোরিসকা দিযড্ঢরতনপ্পমাণা কুট্টং, ততো অধিকো পাকারো. অস্সাতি ব্রহ্মচারিপটিঞ্ঞস্স. পুব্বেতি ৰতসমাদানতো পুব্বে. কামগুণেহীতি কামকোট্ঠাসেহি. সমপ্পিতন্তি সুট্ঠু অপ্পিতং সহিতং. সমঙ্গিভূতন্তি সমন্নাগতং. পরিচারযমানন্তি কীল়ন্তং, উপট্ঠহিযমানং ৰা. পণিধাযাতি পত্থেত্ৰা. সীলেনাতিআদীসু যমনিযমাদিসমাদানৰসেন সীলং, অৰীতিক্কমৰসেন ৰতং. উভযম্পি ৰা সীলং, দুক্করচরিযৰসেন পৰত্তিতং ৰতং. তংতংঅকিচ্চসম্মততো ৰা নিৰত্তিলক্খণং সীলং, তংতংসমাদানৰতো ৰেসভোজনকিচ্চকরণাদিৰিসেসপ্পটিপত্তি ৰতং. সব্বথাপি দুক্করচরিযা তপো. মেথুনা ৰিরতি ব্রহ্মচরিযন্তি এৰম্পেত্থ পাল়িৰণ্ণনা ৰেদিতব্বা. অট্ঠমং উত্তানমেৰ.

মেথুনসুত্তাদিৰণ্ণনা নিট্ঠিতা.

৯. দানমহপ্ফলসুত্তৰণ্ণনা

৫২. নৰমে ‘‘সাহু দান’’ন্তি দানং দেতীতি ‘‘দানং নাম সাধু সুন্দর’’ন্তি দানং দেতীতি অত্থো. দানঞ্হি দত্ৰা তং পচ্চৰেক্খন্তস্স পামোজ্জপীতিসোমনস্সাদযো উপ্পজ্জন্তি, লোভদোসইস্সামচ্ছেরাদযো ৰিদূরীভৰন্তি. ইদানি দানং অনুকূলধম্মপরিব্রূহনেন পচ্চনীকধম্মৰিদূরীকরণেন চ ভাৰনাচিত্তস্স উপসোভনায চ পরিক্খারায চ হোতীতি ‘‘অলঙ্কারভূতঞ্চেৰ পরিৰারভূতঞ্চ দেতী’’তি ৰুত্তং. ঝানানাগামী নাম হোতি ঝানং নিব্বত্তেত্ৰা ব্রহ্মলোকূপপন্নানং অরিযানং হেট্ঠা অনুপ্পজ্জনতো. ইমং পেচ্চ পরিভুঞ্জিস্সামীতি সাপেক্খস্স দানং পরলোকফলাসায সাতিসযায চ পুব্বাচারৰসেন উপ্পজ্জমানায অনুভৰত্তা তণ্হুত্তরং নাম হোতীতি আহ ‘‘পঠমং তণ্হুত্তরিযদান’’ন্তি. দানং নাম বুদ্ধাদীহি পসত্থন্তি গরুং চিত্তীকারং উপট্ঠপেত্ৰা দাতব্বত্তা ‘‘দুতিযং চিত্তীকারদান’’ন্তি ৰুত্তং. পুব্বকেহি পিতুপিতামহেহি দিন্নপুব্বং কতপুব্বং জহাপেতুং নাম নানুচ্ছৰিকন্তি অত্তভাৰসভাগৰসেন হিরোত্তপ্পং পচ্চুপট্ঠপেত্ৰা দাতব্বতো ‘‘ততিযং হিরোত্তপ্পদান’’ন্তি ৰুত্তং. ‘‘অহং পচামি, ন ইমে পচন্তি, নারহামি পচন্তো অপচন্তানং দানং অদাতু’’ন্তি এৰংসঞ্ঞী হুত্ৰা দেন্তো নিরৰসেসং কত্ৰা দেতীতি আহ ‘‘চতুত্থং নিরৰসেসদান’’ন্তি. ‘‘যথা তেসং পুব্বকানং ইসীনং তানি মহাযঞ্ঞকানি অহেসুং, এৰং মে অযং দানপরিভোগো ভৰিস্সতী’’তি এৰংসঞ্ঞিনো দানং দক্খিণং অরহেসু দাতব্বতো ‘‘পঞ্চমং দক্খিণেয্যদান’’ন্তি ৰুত্তং. ‘‘ইমং মে দানং দদতো চিত্তং পসীদতী’’তিআদিনা পীতিসোমনস্সং উপ্পাদেত্ৰা দেন্তস্স দানং সোমনস্সবাহুল্লপ্পত্তিযা সোমনস্সুপচারং নাম হোতীতি আহ ‘‘ছট্ঠং সোমনস্সুপৰিচারদান’’ন্তি ৰুত্তং.

দানমহপ্ফলসুত্তৰণ্ণনা নিট্ঠিতা.

১০. নন্দমাতাসুত্তৰণ্ণনা

৫৩. দসমে ‘‘ৰুত্থৰস্সো পৰারেত্ৰা…পে… নিক্খমী’’তি অঙ্গুত্তরভাণকানং মতেনেতং ৰুত্তং. মজ্ঝিমভাণকা পন ৰদন্তি ‘‘ভগৰা উপকট্ঠায ৰস্সূপনাযিকায জেতৰনতো ভিক্খুসঙ্ঘপরিৰুতো চারিকং নিক্খমি. তেনেৰ চ অকালে নিক্খন্তত্তা কোসলরাজাদযো ৰারেতুং আরভিংসু. পৰারেত্ৰা হি চরণং বুদ্ধাচিণ্ণ’’ন্তি. পুণ্ণায সম্মাপটিপত্তিং পচ্চাসীসন্তো ভগৰা ‘‘মম নিৰত্তনপচ্চযা ত্ৰং কিং করিস্সসী’’তি আহ. পুণ্ণাপি…পে… পব্বজীতি এত্থ সেট্ঠি ‘‘পুণ্ণায ভগৰা নিৰত্তিতো’’তি সুত্ৰা তং ভুজিস্সং কত্ৰা ধীতুট্ঠানে ঠপেসি. সা পব্বজ্জং যাচিত্ৰা পব্বজি, পব্বজিত্ৰা ৰিপস্সনং আরভি. অথস্সা সত্থা আরদ্ধৰিপস্সকভাৰং ঞত্ৰা ইমং ওভাসগাথং ৰিস্সজ্জেসি –

‘‘পুণ্ণে পূরস্সু সদ্ধম্মং, চন্দো পন্নরসো যথা;

পরিপুণ্ণায পঞ্ঞায, দুক্খস্সন্তং করিস্সসী’’তি. (থেরীগা. ৩);

সা গাথাপরিযোসানে অরহত্তং পত্ৰা অভিঞ্ঞাতা সাৰিকা অহোসি. সেসমেত্থ সুৰিঞ্ঞেয্যমেৰ.

নন্দমাতাসুত্তৰণ্ণনা নিট্ঠিতা.

মহাযঞ্ঞৰগ্গৰণ্ণনা নিট্ঠিতা.

পঠমপণ্ণাসকং নিট্ঠিতং.