৪-৬. দুতিযসত্তকসুত্তাদিৰণ্ণনা

২৪-২৬. চতুত্থে করোন্তোযেৰাতি যথাৰুত্তং তিরচ্ছানকথং কথেন্তোযেৰ. অতিরচ্ছানকথাভাৰেপি তস্স তত্থ তপ্পরভাৰদস্সনত্থং অৰধারণৰচনং. পরিযন্তকারীতি সপরিযন্তং কত্ৰা ৰত্তা. ‘‘পরিযন্তৰতিং ৰাচং ভাসিতা’’তি (দী. নি. ১.৯, ১৯৪) হি ৰুত্তং. অপ্পভস্সোৰাতি পরিমিতকথোযেৰ একন্তেন কথেতব্বস্সেৰ কথনতো. সমাপত্তিসমাপজ্জনং অরিযো তুণ্হীভাৰো. নিদ্দাযতিযেৰাতি নিদ্দোক্কমনে অনাদীনৰদস্সী নিদ্দাযতিযেৰ, ইরিযাপথপরিৰত্তনাদিনা ন নং ৰিনোদেতি. এৰং সংসট্ঠোৰাতি ৰুত্তনযেন গণসঙ্গণিকায সংসট্ঠো এৰ ৰিহরতি. দুস্সীলা পাপিচ্ছা নামাতি সযং নিস্সীলা অসন্তগুণসম্ভাৰনিচ্ছায সমন্নাগতত্তা পাপা লামকা ইচ্ছা এতেসন্তি পাপিচ্ছা. পাপপুগ্গলেহি মিত্তিকরণতো পাপমিত্তা. তেহি সদা সহপৰত্তনেন পাপসহাযা. তত্থ নিন্নতাদিনা তদধিমুত্ততায পাপসম্পৰঙ্কা. পঞ্চমাদীনি উত্তানত্থানিযেৰ.

দুতিযসত্তকসুত্তাদিৰণ্ণনা নিট্ঠিতা.