৩. ৰজ্জিসত্তকৰগ্গো

১. সারন্দদসুত্তৰণ্ণনা

২১. ততিযস্স পঠমে দেৰাযতনভাৰেন চিত্তত্তা লোকস্স চিত্তীকারট্ঠানতায চ চেতিযং অহোসি. যাৰকীৰন্তি (দী. নি. টী. ২.১৩৪) একমেৰেতং পদং অনিযমতো পরিমাণৰাচী. কালো চেত্থ অধিপ্পেতোতি আহ ‘‘যত্তকং কাল’’ন্তি. অভিণ্হং সন্নিপাতাতি নিচ্চসন্নিপাতা. তং পন নিচ্চসন্নিপাততং দস্সেতুং ‘‘দিৰসস্সা’’তিআদি ৰুত্তং. সন্নিপাতবহুলাতি পচুরসন্নিপাতা. ৰোসানন্তি সঙ্কোচং. ‘‘ৰুদ্ধিযেৰা’’তিআদিনা ৰুত্তমত্থং ব্যতিরেকমুখেন দস্সেতুং ‘‘অভিণ্হং অসন্নিপতন্তা হী’’তিআদি ৰুত্তং. আকুলাতি খুভিতা ন পসন্না. ভিজ্জিত্ৰাতি ৰগ্গবন্ধতো ৰিভজ্জ ৰিসুং ৰিসুং হুত্ৰা.

সন্নিপাতভেরিযাতি সন্নিপাতারোচনভেরিযা. অদ্ধভুত্তা ৰাতি সামিভুত্তা ৰা. ওসীদমানেতি হাযমানে.

সুঙ্কন্তি ভণ্ডং গহেত্ৰা গচ্ছন্তেহি পব্বতখণ্ডনাদিতিত্থগামদ্ৰারাদীসু রাজপুরিসানং দাতব্বভাগং. বলিন্তি নিপ্ফন্নসস্সাদিতো ছভাগং সত্তভাগন্তিআদিনা লদ্ধব্বকরং. দণ্ডন্তি দসৰীসতিকহাপণাদিকং অপরাধানুরূপং গহেতব্বধনদণ্ডং. ৰজ্জিধম্মন্তি ৰজ্জিরাজধম্মং. ইদানি অপঞ্ঞত্তপঞ্ঞাপনাদীসু তপ্পটিক্খেপে চ আদীনৰানিসংসে চ ৰিত্থারতো দস্সেতুং ‘‘তেস’’ন্তিআদি ৰুত্তং. পারিচরিযক্খমাতি উপট্ঠানক্খমা. পোরাণং ৰজ্জিধম্মন্তি এত্থ পুব্বে কির ৰজ্জিরাজানো ‘‘অযং চোরো’’তি আনেত্ৰা দস্সিতে ‘‘গণ্হথ নং চোর’’ন্তি অৰত্ৰা ৰিনিচ্ছযমহামত্তানং দেন্তি. তে ৰিনিচ্ছিনিত্ৰা সচে অচোরো হোতি, ৰিস্সজ্জেন্তি. সচে চোরো, অত্তনা কিঞ্চি অকত্ৰা ৰোহারিকানং দেন্তি, তেপি ৰিনিচ্ছিনিত্ৰা অচোরো চে, ৰিস্সজ্জেন্তি. চোরো চে, সুত্তধরানং দেন্তি. তেপি ৰিনিচ্ছিনিত্ৰা অচোরো চে, ৰিস্সজ্জেন্তি. চোরো চে, অট্টকুলিকানং দেন্তি, তেপি তথেৰ কত্ৰা সেনাপতিস্স, সেনাপতি উপরাজস্স, উপরাজা রঞ্ঞো. রাজা ৰিনিচ্ছিনিত্ৰা সচে অচোরো হোতি, ৰিস্সজ্জেতি. সচে পন চোরো হোতি, পৰেণিপণ্ণকং ৰাচাপেতি. তত্থ ‘‘যেন ইদং নাম কতং, তস্স অযং নামদণ্ডো’’তি লিখিতং. রাজা তস্স কিরিযং তেন সমানেত্ৰা তদনুচ্ছৰিকং দণ্ডং করোতি. ইতি এতং পোরাণং ৰজ্জিধম্মং সমাদায ৰত্তন্তানং মনুস্সা ন উজ্ঝাযন্তি. পরম্পরাগতেসু অট্টকুলেসু জাতা অগতিগমনৰিরতা অট্টমহল্লকপুরিসা অট্টকুলিকা.

সক্কারন্তি উপকারং. গরুভাৰং পচ্চুপট্ঠপেত্ৰাতি ‘‘ইমে অম্হাকং গরুনো’’তি তত্থ গরুভাৰং পটি পটি উপট্ঠপেত্ৰা. মানেস্সন্তীতি সম্মানেস্সন্তি. তং পন সম্মাননং তেসু নেসং অত্তমনতাপুব্বকন্তি আহ ‘‘মনেন পিযাযিস্সন্তী’’তি. নিপচ্চকারং পণিপাতং. দস্সেন্তীতি গরুচিত্তভারং দস্সেন্তি. সন্ধানেতুন্তি সম্বন্ধং অৰিচ্ছিন্নং কত্ৰা ঘটেতুং.

পসয্হকারস্সাতি বলক্কারস্স. কামং ৰুদ্ধিযা পূজনীযতায ‘‘ৰুদ্ধিহানিযো’’তি ৰুত্তং, অত্থো পন ৰুত্তানুক্কমেনেৰ যোজেতব্বো. পাল়িযং ৰা যস্মা ‘‘ৰুদ্ধিযেৰ পাটিকঙ্খা, নো পরিহানী’’তি ৰুত্তং, তস্মা তদনুক্কমেন ‘‘ৰুদ্ধিহানিযো’’তি ৰুত্তং.

ৰিপচ্চিতুং অলদ্ধোকাসে পাপকম্মে, তস্স কম্মস্স ৰিপাকে ৰা অনৰসরোৰ দেৰসোপসগ্গো. তস্মিং পন লদ্ধোকাসে সিযা দেৰতোপসগ্গস্স অৰসরোতি আহ ‘‘অনুপ্পন্নং…পে… ৰড্ঢেন্তী’’তি. এতেনেৰ অনুপ্পন্নং সুখন্তি এত্থাপি অত্থো ৰেদিতব্বো. বলকাযস্স দিগুণতিগুণতাদস্সনং পটিভযভাৰদস্সনন্তি এৰমাদিনা দেৰতানং সঙ্গামসীসে সহাযতা ৰেদিতব্বা.

অনিচ্ছিতন্তি অনিট্ঠং. আৰরণতোতি নিসেধনতো. ধম্মতো অনপেতা ধম্মিযাতি ইধ ‘‘ধম্মিকা’’তি ৰুত্তা. মিগসূকরাদিঘাতায সুনখাদীনং কড্ঢিত্ৰা ৰনচরণং ৰাজো, তত্থ নিযুত্তা, তে ৰা ৰাজেন্তীতি ৰাজিকা, মিগৰধচারিনো.

সারন্দদসুত্তৰণ্ণনা নিট্ঠিতা.

২. ৰস্সকারসুত্তৰণ্ণনা

২২. দুতিযে অভিযাতুকামোতি এত্থ অভি-সদ্দো অভিভৰনত্থো ‘‘অনভিৰিদিতু’’ন্তিআদীসু ৰিযাতি আহ ‘‘অভিভৰনত্থায যাতুকামো’’তি. ৰজ্জিরাজানোতি ‘‘ৰজ্জেতব্বা ইমে’’তি আদিতো পৰত্তং ৰচনং উপাদায ৰজ্জীতি লদ্ধনামা রাজানো, ৰজ্জিরট্ঠস্স ৰা রাজানো ৰজ্জিরাজানো. রট্ঠস্স পন ৰজ্জিসমঞ্ঞা তন্নিৰাসিরাজকুমারৰসেন ৰেদিতব্বা. রাজিদ্ধিযাতি রাজভাৰানুগতেন পভাৰেন. সো পন পভাৰো নেসং গণরাজানং মিথো সামগ্গিযা লোকে পাকটো. চিরট্ঠাযী চ অহোসীতি ‘‘সমগ্গভাৰং কথেতী’’তি ৰুত্তং. অনু অনু তংসমঙ্গিনো ভাৰেতি ৰড্ঢেতীতি অনুভাৰো, অনুভাৰো এৰ আনুভাৰো, পতাপো. সো পন নেসং পতাপো হত্থিঅস্সাদিৰাহনসম্পত্তিযা তত্থ চ সুভিক্খিতভাৰেন লোকে পাকটো জাতোতি ‘‘এতেন…পে… কথেতী’’তি ৰুত্তং. তাল়চ্ছিগ্গল়েনাতি কুঞ্চিকাছিদ্দেন. অসনন্তি সরং. অতিপাতযিস্সন্তীতি অতিক্কামেন্তি. পোঙ্খানুপোঙ্খন্তি পোঙ্খস্স অনুপোঙ্খং, পুরিমসরস্স পোঙ্খপদানুগতপোঙ্খং ইতরং সরং কত্ৰাতি অত্থো. অৰিরাধিতন্তি অৰিরজ্ঝিতং. উচ্ছিন্দিস্সামীতি উম্মূলনৰসেন কুলসন্ততিং ছিন্দিস্সামি. অযনং ৰড্ঢনং অযো, তপ্পটিপক্খেন অনযোতি আহ ‘‘অৰড্ঢি’’ন্তি. ঞাতীনং ব্যসনং ৰিনাসো ঞাতিব্যসনং.

গঙ্গাযাতি গঙ্গাসমীপে. পট্টনগামন্তি সকটপট্টনগামং. তত্রাতি তস্মিং পট্টনে. বলৰাঘাতজাতোতি উপ্পন্নবলৰকোধো. মেতি ময্হং. গতেনাতি গমনেন. সীতং ৰা উণ্হং ৰা নত্থি তায ৰেলায. অভিমুখং যুদ্ধেনাতি অভিমুখং উজুকমেৰ সঙ্গামকরণেন. উপলাপনং সামং দানঞ্চাতি দস্সেতুং ‘‘অল’’ন্তিআদি ৰুত্তং. ভেদোপি ইধ উপাযো এৰাতি ৰুত্তং ‘‘অঞ্ঞত্র মিথুভেদা’’তি. যুদ্ধস্স পন অনুপাযতা পগেৰ পকাসিতা. ইদন্তি ‘‘অঞ্ঞত্র উপলাপনায অঞ্ঞত্র মিথুভেদা’’তি ইদং ৰচনং. কথায নযং লভিত্ৰাতি ‘‘যাৰকীৰঞ্চ …পে… পরিহানী’’তি ইমায ভগৰতো কথায উপাযং লভিত্ৰা. অনুকম্পাযাতি ৰজ্জিরাজেসু অনুগ্গহেন.

রাজাপি তমেৰ পেসেত্ৰা সব্বে…পে… পাপেসীতি রাজা তং অত্তনো সন্তিকং আগতং ‘‘কিং, আচরিয, ভগৰা অৰচা’’তি পুচ্ছি. সো ‘‘যথা ভো সমণস্স গোতমস্স ৰচনং ন সক্কা ৰজ্জী কেনচি গহেতুং, অপিচ উপলাপনায ৰা মিথুভেদেন ৰা সক্কা’’তি আহ. ততো নং রাজা ‘‘উপলাপনায অম্হাকং হত্থিঅস্সাদযো নস্সিস্সন্তি, ভেদেনেৰ তে গহেস্সামি, কিং করোমা’’তি পুচ্ছি. তেন হি, মহারাজ, তুম্হে ৰজ্জী আরব্ভ পরিসতি কথং সমুট্ঠাপেথ, ততো অহং ‘‘কিং তে, মহারাজ, তেহি, অত্তনো সন্তকেন কসিৰণিজ্জাদীনি কত্ৰা জীৰন্তু এতে রাজানো’’তি ৰত্ৰা পক্কমিস্সামি. ততো তুম্হে ‘‘কিং নু, ভো, এস ব্রাহ্মণো ৰজ্জী আরব্ভ পৰত্তং কথং পটিবাহতী’’তি ৰদেয্যাথ. দিৰসভাগে চাহং তেসং পণ্ণাকারং পেসেস্সামি, তম্পি গাহাপেত্ৰা তুম্হেপি মম দোসং আরোপেত্ৰা বন্ধনতাল়নাদীনি অকত্ৰাৰ কেৰলং খুরমুণ্ডং মং কত্ৰা নগরা নীহরাপেথ, অথাহং ‘‘মযা তে নগরে পাকারো পরিখা চ কারিতা, অহং থিরদুব্বলট্ঠানঞ্চ উত্তানগম্ভীরট্ঠানঞ্চ জানামি, ন চিরস্সং দানি তং উজুং করিস্সামী’’তি ৰক্খামি. তং সুত্ৰা তুম্হে ‘‘গচ্ছতূ’’তি ৰদেয্যাথাতি. রাজা সব্বং অকাসি.

লিচ্ছৰী তস্স নিক্খমনং সুত্ৰা ‘‘সঠো ব্রাহ্মণো, মা তস্স গঙ্গং উত্তারেতুং অদত্থা’’তি আহংসু. তত্র একচ্চেহি ‘‘অম্হে আরব্ভ কথিতত্তা কির সো এৰং করোতী’’তি ৰুত্তে ‘‘তেন হি ভণে এতূ’’তি ৰদিংসু. সো গন্ত্ৰা লিচ্ছৰী দিস্ৰা ‘‘কিমাগতত্থা’’তি পুচ্ছিতো তং পৰত্তিং আরোচেসি. লিচ্ছৰিনো ‘‘অপ্পমত্তকেন নাম এৰং গরুং দণ্ডং কাতুং ন যুত্ত’’ন্তি ৰত্ৰা ‘‘কিং তে তত্র ঠানন্তর’’ন্তি পুচ্ছিংসু. ৰিনিচ্ছযমহামচ্চোহমস্মীতি. তদেৰ তে ঠানন্তরং হোতূতি. সো সুট্ঠুতরং ৰিনিচ্ছযং করোতি. রাজকুমারা তস্স সন্তিকে সিপ্পং উগ্গণ্হন্তি. সো পতিট্ঠিতগুণো হুত্ৰা একদিৰসং একং লিচ্ছৰিং গহেত্ৰা একমন্তং গন্ত্ৰা ‘‘দারকা কসন্তী’’তি পুচ্ছি. আম, কসন্তি. দ্ৰে গোণে যোজেত্ৰাতি. আম, দ্ৰে গোণে যোজেত্ৰাতি. এত্তকং ৰত্ৰা নিৰত্তো. ততো তমঞ্ঞো ‘‘কিং আচরিযো আহা’’তি পুচ্ছিত্ৰা তেন ৰুত্তং – অসদ্দহন্তো ‘‘ন মেসো যথাভূতং কথেতী’’তি তেন সদ্ধিং ভিজ্জি.

ব্রাহ্মণো অপরম্পি একদিৰসং একং লিচ্ছৰিং একমন্তং নেত্ৰা ‘‘কেন ব্যঞ্জনেন ভুত্তোসী’’তি পুচ্ছিত্ৰা নিৰত্তো. তম্পি অঞ্ঞো পুচ্ছিত্ৰা অসদ্দহন্তো তথেৰ ভিজ্জি. ব্রাহ্মণো অপরম্পি দিৰসং একং লিচ্ছৰিং একমন্তং নেত্ৰা ‘‘অতিদুগ্গতোসি কিরা’’তি পুচ্ছি. কো এৰমাহাতি. অসুকো নাম লিচ্ছৰীতি. অপরম্পি একমন্তং নেত্ৰা ‘‘ত্ৰং কির ভীরুজাতিকো’’তি পুচ্ছি. কো এৰমাহাতি? অসুকো নাম লিচ্ছৰীতি. এৰং অঞ্ঞেন অকথিতমেৰ অঞ্ঞস্স কথেন্তো তীহি সংৰচ্ছরেহি তে রাজানো অঞ্ঞমঞ্ঞং ভিন্দিত্ৰা যথা দ্ৰে একমগ্গেন ন গচ্ছন্তি, তথা কত্ৰা সন্নিপাতভেরিং চরাপেসি. লিচ্ছৰিনো ‘‘ইস্সরা সন্নিপতন্তু, সূরা সন্নিপতন্তূ’’তি ৰত্ৰা ন সন্নিপতিংসু. ব্রাহ্মণো ‘‘অযং দানি কালো, সীঘং আগচ্ছতূ’’তি রঞ্ঞো সাসনং পেসেতি. রাজা সুত্ৰাৰ বলভেরিং চরাপেত্ৰা নিক্খমি. ৰেসালিকা সুত্ৰা ‘‘রঞ্ঞো গঙ্গং উত্তরিতুং ন দস্সামা’’তি ভেরিং চরাপেসুং. তে সুত্ৰা ‘‘গচ্ছন্তু সূররাজানো’’তিআদীনি ৰত্ৰা ন সন্নিপতিংসু. ‘‘নগরপ্পৰেসনং ন দস্সাম, দ্ৰারানি পিদহিস্সামা’’তি ভেরিং চরাপেসুং. একোপি ন সন্নিপতি. যথাৰিৰটেহি দ্ৰারেহি পৰিসিত্ৰা সব্বে অনযব্যসনং পাপেত্ৰা গতো. তং সন্ধাযেতং ৰুত্তং – ‘‘রাজাপি তমেৰ পেসেত্ৰা সব্বেপি ভিন্দিত্ৰা গন্ত্ৰা অনযব্যসনং পাপেসী’’তি.

ৰস্সকারসুত্তৰণ্ণনা নিট্ঠিতা.

২. পঠমসত্তকসুত্তৰণ্ণনা

২৩. ততিযে অপরিহানায হিতাতি অপরিহানিযা (দী. নি. টী. ২.১৩৬), ন পরিহাযন্তি এতেহীতি ৰা অপরিহানিযা. এৰং সঙ্খেপতো ৰুত্তমত্থং ৰিত্থারতো দস্সেন্তো ‘‘ইধাপি চা’’তিআদিমাহ. তত্থ ততোতিআদি দিসাসু আগতসাসনে ৰুত্তৰচনং ৰুত্তকথনং. ৰিহারসীমা আকুলা যস্মা, তস্মা উপোসথপৰারণা ঠিতা. ওলীযমানকোতি পাল়িতো অত্থতো চ ৰিনস্সমানকো. উক্খিপাপেন্তাতি পগুণভাৰকরণেন অত্থসংৰণ্ণনাৰসেন চ পগ্গণ্হন্তা.

সাৰত্থিযং ভিক্খূ ৰিয (পারা. ৫৬৫) পাচিত্তিযং দেসাপেতব্বোতি পঞ্ঞাপেন্তা. ৰজ্জিপুত্তকা ৰিয (চূল়ৰ. ৪৪৬) দসৰত্থুদীপনেন. তথা অকরোন্তাতি নৰং কতিকৰত্তং ৰা সিক্খাপদং ৰা অমদ্দন্তা ধম্মৰিনযতো সাসনং দীপেন্তা খুদ্দকম্পি চ সিক্খাপদং অসমূহনন্তা. আযস্মা মহাকস্সপো ৰিয চাতি ‘‘সুণাতু মে, আৰুসো, সঙ্ঘো, সন্তাম্হাকং সিক্খাপদানি গিহিগতানি. গিহিনোপি জানন্তি ‘ইদং ৰো সমণানং সক্যপুত্তিকানং কপ্পতি, ইদং ৰো ন কপ্পতী’তি. সচেপি হি মযং খুদ্দানুখুদ্দকানি সিক্খাপদানি সমূহনিস্সাম, ভৰিস্সন্তি ৰত্তারো ‘ধূমকালিকং সমণেন গোতমেন সাৰকানং সিক্খাপদং পঞ্ঞত্তং, যাৰিমেসং সত্থা অট্ঠাসি, তাৰিমে সিক্খাপদেসু সিক্খিংসু. যতো ইমেসং সত্থা পরিনিব্বুতো, ন দানিমে সিক্খাপদেসু সিক্খন্তী’তি. যদি সঙ্ঘস্স পত্তকল্লং, সঙ্ঘো অপঞ্ঞত্তং ন পঞ্ঞপেয্য, পঞ্ঞত্তং ন সমুচ্ছিন্দেয্য, যথাপঞ্ঞত্তেসু সিক্খাপদেসু সমাদায ৰত্তেয্যা’’তি ইমং (চূল়ৰ. ৪৪২) তন্তিং ঠপেন্তো আযস্মা মহাকস্সপো ৰিয চ.

থিরভাৰপ্পত্তাতি সাসনে থিরভাৰং অনিৰত্তিতভাৰং উপগতা. থেরকারকেহীতি থেরভাৰসাধকেহি সীলাদিগুণেহি অসেক্খধম্মেহি. বহূ রত্তিযোতি পব্বজিতা হুত্ৰা বহূ রত্তিযো জানন্তি. সীলাদিগুণেসু পতিট্ঠাপনমেৰ সাসনে পরিণাযকতাতি আহ ‘‘তীসু সিক্খাসু পৰত্তেন্তী’’তি. ওৰাদং ন দেন্তি অভাজনভাৰতো. পৰেণিকথন্তি আচরিযপরম্পরাভতং সম্মাপটিপত্তিদীপনং ধম্মকথং. সারভূতং ধম্মপরিযাযন্তি সমথৰিপস্সনামগ্গফলসম্পাপনেন সাসনে সারভূতং বোজ্ঝঙ্গকোসল্লঅনুত্তরসীতিভাৰ- (অ. নি. ৬.৮৫) অধিচিত্তসুত্তাদিধম্মতন্তিং. আদিকং ওৰাদন্তি আদি-সদ্দেন ‘‘এৰং তে আলোকেতব্বং, এৰং তে ৰিলোকেতব্বং, এৰং তে সমিঞ্জিতব্বং, এৰং তে পসারেতব্বং, এৰং তে সঙ্ঘাটিপত্তচীৰরং ধারেতব্ব’’ন্তি ওৰাদং সঙ্গণ্হাতি.

পুনব্ভৰদানং পুনব্ভৰো উত্তরপদলোপেন. ইতরেতি যে ন পচ্চযৰসিকা ন আমিসচক্খুকা, তে ন গচ্ছন্তি তণ্হায ৰসং.

আরঞ্ঞকেসূতি অরঞ্ঞভাগেসু অরঞ্ঞপরিযাপন্নেসু. ননু যত্থ কত্থচিপি তণ্হা সাৰজ্জা এৰাতি চোদনং সন্ধাযাহ ‘‘গামন্তসেনাসনেসু হী’’তিআদি. তেন ‘‘অনুত্তরেসু ৰিমোক্খেসু পিহং উপট্ঠাপযতো’’তি এত্থ ৰুত্তপিহাদযো পিয আরঞ্ঞকসেনাসনেসু সালযতা সেৰিতব্বপক্খিকা এৰাতি দস্সেতি.

অত্তনাৰাতি সযমেৰ. তেন পরেহি অনুস্সাহিতানং সরসেনেৰ অনাগতানং পেসলানং ভিক্খূনং আগমনং, আগতানঞ্চ ফাসুৰিহারং পচ্চাসীসন্তীতি দস্সেতি. ইমিনাৰ নীহারেনাতি ইমায পটিপত্তিযা. অগ্গহিতধম্মগ্গহণন্তি অগ্গহিতস্স পরিযত্তিধম্মস্স উগ্গহণং. গহিতসজ্ঝাযকরণন্তি উগ্গহিতস্স সুট্ঠু অত্থচিন্তনং. চিন্তরত্থো হি অযং সজ্ঝাযসদ্দো. এন্তীতি উপগচ্ছন্তি. নিসীদন্তি আসনপঞ্ঞাপনাদিনা.

পঠমসত্তকসুত্তৰণ্ণনা নিট্ঠিতা.

৪-৬. দুতিযসত্তকসুত্তাদিৰণ্ণনা

২৪-২৬. চতুত্থে করোন্তোযেৰাতি যথাৰুত্তং তিরচ্ছানকথং কথেন্তোযেৰ. অতিরচ্ছানকথাভাৰেপি তস্স তত্থ তপ্পরভাৰদস্সনত্থং অৰধারণৰচনং. পরিযন্তকারীতি সপরিযন্তং কত্ৰা ৰত্তা. ‘‘পরিযন্তৰতিং ৰাচং ভাসিতা’’তি (দী. নি. ১.৯, ১৯৪) হি ৰুত্তং. অপ্পভস্সোৰাতি পরিমিতকথোযেৰ একন্তেন কথেতব্বস্সেৰ কথনতো. সমাপত্তিসমাপজ্জনং অরিযো তুণ্হীভাৰো. নিদ্দাযতিযেৰাতি নিদ্দোক্কমনে অনাদীনৰদস্সী নিদ্দাযতিযেৰ, ইরিযাপথপরিৰত্তনাদিনা ন নং ৰিনোদেতি. এৰং সংসট্ঠোৰাতি ৰুত্তনযেন গণসঙ্গণিকায সংসট্ঠো এৰ ৰিহরতি. দুস্সীলা পাপিচ্ছা নামাতি সযং নিস্সীলা অসন্তগুণসম্ভাৰনিচ্ছায সমন্নাগতত্তা পাপা লামকা ইচ্ছা এতেসন্তি পাপিচ্ছা. পাপপুগ্গলেহি মিত্তিকরণতো পাপমিত্তা. তেহি সদা সহপৰত্তনেন পাপসহাযা. তত্থ নিন্নতাদিনা তদধিমুত্ততায পাপসম্পৰঙ্কা. পঞ্চমাদীনি উত্তানত্থানিযেৰ.

দুতিযসত্তকসুত্তাদিৰণ্ণনা নিট্ঠিতা.

৭-১১. সঞ্ঞাসুত্তাদিৰণ্ণনা

২৭-৩১. সত্তমে অনিচ্চাতি অনুপস্সতি এতাযাতি অনিচ্চানুপস্সনা. তথাপৰত্তৰিপস্সনা পন যস্মা অত্তনা সহগতসঞ্ঞায ভাৰিতায ভাৰিতা এৰ হোতি, তস্মা ৰুত্তং ‘‘অনিচ্চানুপস্সনাদীহি সহগতসঞ্ঞা’’তি. ইমা সত্ত লোকিযৰিপস্সনাপি হোন্তি ‘‘অনিচ্চ’’ন্তিআদিনা পৰত্তনতো. ‘‘এতং সন্তং এতং পণীতং যদিদং সব্বসঙ্খারসমথো’’তি আগতৰসেন পনেত্থ দ্ৰে লোকুত্তরা হোন্তীতি ৰেদিতব্বা. ‘‘ৰিরাগো নিরোধো’’তি হি তত্থ নিব্বানং ৰুত্তন্তি ইধ ৰিরাগসঞ্ঞা, তা ৰুত্তসঞ্ঞা নিব্বানারম্মণাপি সিযুং. সেসমেত্থ সুৰিঞ্ঞেয্যমেৰ. অট্ঠমাদীনি উত্তানত্থানেৰ.

সঞ্ঞাসুত্তাদিৰণ্ণনা নিট্ঠিতা.

ৰজ্জিসত্তকৰগ্গৰণ্ণনা নিট্ঠিতা.