৪. হিমৰন্তসুত্তৰণ্ণনা

২৪. চতুত্থে সমাপত্তিকুসলো হোতীতি সমাপজ্জনকুসলো হোতি. তেনাহ ‘‘সমাপজ্জিতুং কুসলো’’তি. তত্থ অন্তোগতহেতুঅত্থো ঠিতি-সদ্দো, তস্মা ঠপনকুসলোতি অত্থোতি আহ ‘‘সমাধিং ঠপেতুং সক্কোতীতি অত্থো’’তি. তত্থ ঠপেতুং সক্কোতীতি সত্তট্ঠঅচ্ছরামত্তং খণং ঝানং ঠপেতুং সক্কোতি অধিট্ঠানৰসিভাৰস্স নিপ্ফাদিতত্তা. যথাপরিচ্ছেদেনাতি যথাপরিচ্ছিন্নকালেন. ৰুট্ঠাতুং সক্কোতি ৰুট্ঠানৰসিভাৰস্স নিপ্ফাদিতত্তা. কল্লং সঞ্জাতং অস্সাতি কল্লিতং, তস্মিং কল্লিতে কল্লিতভাৰে কুসলো কল্লিতকুসলো. হাসেতুং তোসেতুং সম্পহংসেতুং. কল্লং কাতুন্তি সমাধানস্স পটিপক্খধম্মানং দূরীকরণেন সহকারীকারণানঞ্চ সমপ্পধানেন সমাপজ্জনে চিত্তং সমত্থং কাতুং. সমাধিস্স গোচরকুসলোতি সমাধিস্মিং নিপ্ফাদেতব্বে তস্স গোচরে কম্মট্ঠানসঞ্ঞিতে পৰত্তিট্ঠানে ভিক্খাচারগোচরে সতিসম্পজঞ্ঞযোগতো কুসলো ছেকো. তেনাহ ‘‘সমাধিস্স অসপ্পাযে অনুপকারকে ধম্মে ৰজ্জেত্ৰা’’তিআদি. পঠমজ্ঝানাদিসমাধিং অভিনীহরিতুন্তি পঠমজ্ঝানাদিসমাধিং ৰিসেসভাগিযতায অভিনীহরিতুং উপনেতুং.

হিমৰন্তসুত্তৰণ্ণনা নিট্ঠিতা.