(৮) ৩. যোধাজীৰৰগ্গো

১-২. পঠমচেতোৰিমুত্তিফলসুত্তাদিৰণ্ণনা

৭১-৭২. ততিযস্স পঠমে অৰিজ্জাপলিঘন্তি এত্থ অৰিজ্জাতি ৰট্টমূলিকা অৰিজ্জা, অযং পচুরজনেহি উক্খিপিতুং অসক্কুণেয্যভাৰতো দুক্খিপনট্ঠেন নিব্বানদ্ৰারপ্পৰেসৰিবন্ধনেন চ ‘‘পলিঘো ৰিযাতি পলিঘো’’তি ৰুচ্চতি. তেনেস তস্সা উক্খিত্তত্তা ‘‘উক্খিত্তপলিঘো’’তি ৰুত্তো. পুনব্ভৰস্স করণসীলো, পুনব্ভৰং ৰা ফলং অরহতীতি পোনোভৰিকা, পুনব্ভৰদাযিকাতি অত্থো. জাতিসংসারোতি জাযনৰসেন চেৰ সংসরণৰসেন চ এৰংলদ্ধনামানং পুনব্ভৰক্খন্ধানং পচ্চযো কম্মাভিসঙ্খারো. জাতিসংসারোতি হি ফলূপচারেন কারণং ৰুত্তং. তঞ্হি পুনপ্পুনং উপ্পত্তিকারণৰসেন পরিক্খিপিত্ৰা ঠিতত্তা ‘‘পরিখা’’তি ৰুচ্চতি সন্তানস্স পরিক্খিপনতো. তেনেস তস্স সংকিণ্ণত্তা ৰিকিণ্ণত্তা সব্বসো খিত্তত্তা ৰিনাসিতত্তা ‘‘সংকিণ্ণপরিখো’’তি ৰুত্তো.

তণ্হাসঙ্খাতন্তি এত্থ তণ্হাতি ৰট্টমূলিকা তণ্হা. অযঞ্হি গম্ভীরানুগতট্ঠেন ‘‘এসিকা’’তি ৰুচ্চতি. লুঞ্চিত্ৰা উদ্ধরিত্ৰা. ওরম্ভাগিযানীতি ওরম্ভাগজনকানি কামভৰে উপপত্তিপচ্চযানি কামরাগসংযোজনাদীনি. এতানি হি কৰাটং ৰিয নগরদ্ৰারং চিত্তং পিদহিত্ৰা ঠিতত্তা ‘‘অগ্গল়া’’তি ৰুচ্চন্তি. তেনেস তেসং নিগ্গতত্তা ভিন্নত্তা ‘‘নিরগ্গল়ো’’তি ৰুত্তোতি. অগ্গমগ্গেন পন্নো অপচিতো মানদ্ধজো এতস্সাতি পন্নদ্ধজো. পন্নভারোতি খন্ধভারকিলেসভারঅভিসঙ্খারভারা ওরোপিতা অস্সাতি পন্নভারো. ৰিসংযুত্তোতি চতূহি যোগেহি সব্বকিলেসেহি চ ৰিসংযুত্তো. অস্মিমানোতি রূপে অস্মীতি মানো, ৰেদনায, সঞ্ঞায, সঙ্খারেসু, ৰিঞ্ঞাণে অস্মিমানো. এত্থ হি পঞ্চপি খন্ধে অৰিসেসতো ‘‘অস্মী’’তি গহেত্ৰা পৰত্তমানো অস্মিমানোতি অধিপ্পেতো.

নগরদ্ৰারস্স পরিস্সযপটিবাহনত্থঞ্চেৰ সোধনত্থঞ্চ উভোসু পস্সেসু এসিকাথম্ভে নিখণিত্ৰা ঠপেতীতি আহ ‘‘নগরদ্ৰারে উস্সাপিতে এসিকাথম্ভে’’তি. পাকারৰিদ্ধংসনেনেৰ পরিখাভূমিসমকরণং হোতীতি আহ ‘‘পাকারং ভিন্দিত্ৰা পরিখং ৰিকিরিত্ৰা’’তি. ‘‘এৰ’’ন্তিআদি উপমাসংসন্দনং. সন্তো সংৰিজ্জমানো কাযো ধম্মসমূহোতি সক্কাযো, উপাদানক্খন্ধপঞ্চকং. দ্ৰত্তিংসকম্মকারণা দুক্খক্খন্ধে আগতদুক্খানি. অক্খিরোগসীসরোগাদযো. অট্ঠনৰুতি রোগা, রাজভযাদীনি পঞ্চৰীসতিমহাভযানি. দুতিযং উত্তানমেৰ.

পঠমচেতোৰিমুত্তিফলসুত্তাদিৰণ্ণনা নিট্ঠিতা.

৩-৪. পঠমধম্মৰিহারীসুত্তাদিৰণ্ণনা

৭৩-৭৪. ততিযে নিযকজ্ঝত্তেতি অত্তনো সন্তানে. মেত্তায উপসংহরণৰসেন হিতং এসন্তেন. করুণায ৰসেন অনুকম্পমানেন. পরিগ্গহেত্ৰাতি পরিতো গহেত্ৰা, ফরিত্ৰাতি অত্থো. পরিচ্চাতি পরিতো কত্ৰা, সমন্ততো ফরিত্ৰা ইচ্চেৰ অত্থো. ‘‘পটিচ্চা’’তিপি পাঠো. মা পমজ্জিত্থাতি ‘‘ঝাযথা’’তি ৰুত্তসমথৰিপস্সনানং অননুযুঞ্জনেন অঞ্ঞেন ৰা কেনচি পমাদকারণেন মা পমাদং আপজ্জিত্থ. নিয্যানিকসাসনে অকত্তব্বকরণং ৰিয কত্তব্বাকরণম্পি পমাদোতি. ৰিপত্তিকালেতি সত্তঅসপ্পাযাদিৰিপত্তিযুত্তে কালে. সব্বেপি সাসনে গুণা ইধেৰ সঙ্গহং গচ্ছন্তীতি আহ ‘‘ঝাযথ মা পমাদত্থ…পে… অনুসাসনী’’তি. চতুত্থে নত্থি ৰত্তব্বং.

পঠমধম্মৰিহারীসুত্তাদিৰণ্ণনা নিট্ঠিতা.

৫. পঠমযোধাজীৰসুত্তৰণ্ণনা

৭৫. পঞ্চমে যুজ্ঝনং যোধো, সো আজীৰো এতেসন্তি যোধাজীৰা. তেনাহ ‘‘যুদ্ধূপজীৰিনো’’তি. সন্থম্ভিত্ৰা ঠাতুং ন সক্কোতীতি বদ্ধো ধিতিসম্পন্নো ঠাতুং ন সক্কোতি. সমাগতেতি সম্পত্তে. ব্যাপজ্জতীতি ৰিকারমাপজ্জতি. তেনাহ ‘‘পকতিভাৰং জহতী’’তি.

রজগ্গস্মিন্তি পচ্চত্তে ভুম্মৰচনন্তি আহ ‘‘কিং তস্স পুগ্গলস্স রজগ্গং নামা’’তি. ৰিনিব্বেঠেত্ৰাতি গহিতগ্গহণং ৰিস্সজ্জাপেত্ৰা. মোচেত্ৰাতি সরীরতো অপনেত্ৰা.

পঠমযোধাজীৰসুত্তৰণ্ণনা নিট্ঠিতা.

৬. দুতিযযোধাজীৰসুত্তৰণ্ণনা

৭৬. ছট্ঠে চম্মন্তি ইমিনা চম্মমযং চম্মমিতি সিব্বিতং, অঞ্ঞং ৰা কেটকফলকাদিং সঙ্গণ্হাতি. ধনুকলাপং সন্নয্হিত্ৰাতি ধনুঞ্চেৰ তূণিরঞ্চ সন্নয্হিত্ৰা সজ্জেত্ৰা. ধনুদণ্ডস্স জিযাযত্তভাৰকরণাদিপি হি ধনুনো সন্নয্হনং. তেনেৰাহ ‘‘ধনুঞ্চ সরকলাপঞ্চ সন্নয্হিত্ৰা’’তি. যুদ্ধসন্নিৰেসেন ঠিতন্তি দ্ৰিন্নং সেনানং ব্যূহনসংৰিধাননযেন কতো যো সন্নিৰেসো, তস্স ৰসেন ঠিতং, সেনাব্যূহসংৰিধানৰসেন সন্নিৰিট্ঠন্তি ৰুত্তং হোতি. উস্সাহঞ্চ ৰাযামঞ্চ করোতীতি যুজ্ঝনৰসেন উস্সাহং ৰাযামঞ্চ করোতি. পরিযাপাদেন্তীতি মরণপরিযন্তিকং অপরং পাপেন্তি. তেনাহ ‘‘পরিযাপাদযন্তী’’তি, জীৰিতং পরিযাপাদযন্তি মরণং পটিপজ্জাপেন্তীতি ৰুত্তং হোতি.

অরক্খিতেনেৰ কাযেনাতিআদীসু হত্থপাদে কীল়াপেন্তো গীৰং ৰিপরিৰত্তেন্তো কাযং ন রক্খতি নাম. নানপ্পকারং দুট্ঠুল্লং করোন্তো ৰাচং ন রক্খতি নাম. কামৰিতক্কাদযো ৰিতক্কেন্তো চিত্তং ন রক্খতি নাম. অনুপট্ঠিতায সতিযাতি কাযগতায সতিযা অনুপট্ঠিতায. রাগেন অনুগতোতি রাগেন অনুপহতো. রাগপরেতোতি ৰা রাগেন ফুট্ঠো ফুট্ঠৰিসেন ৰিয সপ্পেন.

অনুদহনট্ঠেনাতি অনুপাযপ্পটিপত্তিযা. সম্পতি আযতিঞ্চ মহাভিতাপট্ঠেন. অনৰত্থিতসভাৰতায ইত্তরপচ্চুপট্ঠানট্ঠেন. মুহুত্তরমণীযতায তাৰকালিকট্ঠেন. ব্যত্তেহি অভিভৰনীযতায সব্বঙ্গপচ্চঙ্গপলিভঞ্জনট্ঠেন. ছেদনভেদনাদিঅধিকরণভাৰেন উগ্ঘট্টনসদিসতায অধিকুট্টনট্ঠেন. অৰণে ৰণং উপ্পাদেত্ৰা অন্তো অনুপৰিসনসভাৰতায ৰিনিৰিজ্ঝনট্ঠেন. দিট্ঠধম্মিকসম্পরাযিক অনত্থনিমিত্ততায সাসঙ্কসপ্পটিভযট্ঠেন.

দুতিযযোধাজীৰসুত্তৰণ্ণনা নিট্ঠিতা.

৭-৮. পঠমঅনাগতভযসুত্তাদিৰণ্ণনা

৭৭-৭৮. সত্তমে ৰিসেসস্স পত্তিযা ৰিসেসস্স পাপুণনত্থং. ৰীরিযন্তি পধানৰীরিযং. তং পন চঙ্কমনৰসেন করণে ‘‘কাযিক’’ন্তিপি ৰত্তব্বতং লভতীতি আহ – ‘‘দুৰিধম্পী’’তি. সত্থকৰাতাতি সন্ধিবন্ধনানি কত্তরিযা ছিন্দন্তা ৰিয পৰত্তৰাতা. তেনাহ – ‘‘সত্থং ৰিযা’’তিআদি. কতকম্মেহীতি কতচোরকম্মেহি. তে কির কতকম্মা যং নেসং দেৰতং আযাচিত্ৰা কম্মং নিপ্ফন্নং, তস্স উপকারত্থায মনুস্সে মারেত্ৰা গললোহিতানি গণ্হন্তি. তে ‘‘অঞ্ঞেসু মনুস্সেসু মারিযমানেসু কোলাহলং উপ্পজ্জিস্সতি, পব্বজিতং পরিযেসন্তো নাম নত্থী’’তি মঞ্ঞমানা ভিক্খূ গহেত্ৰা মারেন্তি. তং সন্ধাযেতং ৰুত্তং. অকতকম্মেহীতি অটৰিতো গামং আগমনকালে কম্মনিপ্ফত্তত্থং পুরেতরং বলিকম্মং কাতুকামেহি. তেনেৰাহ – ‘‘চোরিকং কত্ৰা নিক্খন্তা কতকম্মা নামা’’তিআদি. অট্ঠমে নত্থি ৰত্তব্বং.

পঠমঅনাগতভযসুত্তাদিৰণ্ণনা নিট্ঠিতা.

৯. ততিযঅনাগতভযসুত্তৰণ্ণনা

৭৯. নৰমে পাল়িগম্ভীরাতি (সং. নি. টী. ২.২.২২৯) পাল়িৰসেন গম্ভীরা অগাধা দুক্খোগাহা সল্লসুত্তসদিসা. সল্লসুত্তঞ্হি (সু. নি. ৫৭৯) ‘‘অনিমিত্তমনঞ্ঞাত’’ন্তিআদিনা পাল়িৰসেন গম্ভীরং, ন অত্থগম্ভীরং. তথা হি তত্থ তা তা গাথা দুৰিঞ্ঞেয্যরূপা তিট্ঠন্তি. দুৰিঞ্ঞেয্যঞ্হি ঞাণেন দুক্খোগাহন্তি কত্ৰা ‘‘গম্ভীর’’ন্তি ৰুচ্চতি. পুব্বাপরংপেত্থ কাসঞ্চি গাথানং দুৰিঞ্ঞেয্যতায দুক্খোগাহমেৰ, তস্মা পাল়িৰসেন গম্ভীরং. অত্থগম্ভীরাতি অত্থৰসেন গম্ভীরা মহাৰেদল্লসুত্তসদিসা, মহাৰেদল্লসুত্তস্স (ম. নি. ১.৪৪৯ আদযো) অত্থৰসেন গম্ভীরতা পাকটাযেৰ. লোকং উত্তরতীতি লোকুত্তরো, সো অত্থভূতো এতেসং অত্থীতি লোকুত্তরা. তেনাহ – ‘‘লোকুত্তরধম্মদীপকা’’তি. সুঞ্ঞতাপটিসংযুত্তাতি সত্তসুঞ্ঞধম্মপ্পকাসকা. তেনাহ ‘‘খন্ধধাতুআযতনপচ্চযাকারপ্পটিসংযুত্তা’’তি. উগ্গহেতব্বং পরিযাপুণিতব্বন্তি চ লিঙ্গৰচনৰিপল্লাসেন ৰুত্তন্তি আহ ‘‘উগ্গহেতব্বে চেৰ ৰল়ঞ্জেতব্বে চা’’তি. কৰিনো কম্মং কৰিতা. যস্স পন যং কম্মং, তং তেন কতন্তি ৰুচ্চতীতি আহ ‘‘কৰিতাতি কৰীহি কতা’’তি. কাৰেয্যন্তি কব্যং, কব্যন্তি চ কৰিনা ৰুত্তন্তি অত্থো. তেনাহ ‘‘তস্সেৰ ৰেৰচন’’ন্তি. চিত্তক্খরাতি চিত্রাকারঅক্খরা. ইতরং তস্সেৰ ৰেৰচনং. সাসনতো বহিদ্ধা ঠিতাতি ন সাসনাৰচরা. বাহিরকসাৰকেহীতি ‘‘বুদ্ধা’’তি অপ্পঞ্ঞাতানং যেসং কেসঞ্চি সাৰকেহি. সুস্সূসিস্সন্তীতি অক্খরচিত্ততায চেৰ সরসম্পত্তিযা চ অত্তমনা হুত্ৰা সামণেরদহরভিক্খুমাতুগামমহাগহপতিকাদযো ‘‘এস ধম্মকথিকো’’তি সন্নিপতিত্ৰা সোতুকামা ভৰিস্সন্তি.

ততিযঅনাগতভযসুত্তৰণ্ণনা নিট্ঠিতা.

১০. চতুত্থঅনাগতভযসুত্তৰণ্ণনা

৮০. দসমে পঞ্চৰিধেন সংসগ্গেনাতি ‘‘সৰনসংসগ্গো, দস্সনসংসগ্গো, সমুল্লাপসংসগ্গো, সম্ভোগসংসগ্গো, কাযসংসগ্গো’’তি এৰং ৰুত্তেন পঞ্চৰিধেন সংসগ্গেন. সংসজ্জতি এতেনাতি সংসগ্গো, রাগো. সৰনহেতুকো, সৰনৰসেন ৰা পৰত্তো সংসগ্গো সৰনসংসগ্গো. এস নযো সেসেসুপি. কাযসংসগ্গো পন কাযপরামাসো. তেসু পরেহি ৰা কথিযমানং রূপাদিসম্পত্তিং অত্তনা ৰা সিতলপিতগীতসদ্দং সুণন্তস্স সোতৰিঞ্ঞাণৰীথিৰসেন উপ্পন্নো রাগো সৰনসংসগ্গো নাম. ৰিসভাগরূপং ওলোকেন্তস্স পন চক্খুৰিঞ্ঞাণৰীথিৰসেন উপ্পন্নো রাগো দস্সনসংসগ্গো নাম. অঞ্ঞমঞ্ঞআলাপসল্লাপৰসেন উপ্পন্নরাগো সমুল্লাপসংসগ্গো নাম. ভিক্খুনো ভিক্খুনিযা সন্তকং, ভিক্খুনিযা ভিক্খুস্স সন্তকং গহেত্ৰা পরিভোগকরণৰসেন উপ্পন্নরাগো সম্ভোগসংসগ্গো নাম. হত্থগ্গাহাদিৰসেন উপ্পন্নো রাগো কাযসংসগ্গো নাম.

অনেকৰিহিতন্তি অন্নসন্নিধিপানসন্নিধিৰত্থসন্নিধিযানসন্নিধিসযনসন্নিধিগন্ধসন্নিধি- আমিসসন্নিধিৰসেন অনেকপ্পকারং. সন্নিধিকতস্সাতি এতেন ‘‘সন্নিধিকারপরিভোগ’’ন্তি (ধ. স. তিকমাতিকা ১০) এত্থ কার-সদ্দস্স কম্মত্থতং দস্সেতি. যথা ৰা ‘‘আচযং গামিনো’’তি ৰত্তব্বে অনুনাসিকলোপেন ‘‘আচযগামিনো’’তি নিদ্দেসো কতো, এৰং ‘‘সন্নিধিকারং পরিভোগ’’ন্তি ৰত্তব্বে অনুনাসিকলোপেন ‘‘সন্নিধিকারপরিভোগ’’ন্তি ৰুত্তং, সন্নিধিং কত্ৰা পরিভোগন্তি অত্থো.

‘‘সন্নিধিকতস্স পরিভোগ’’ন্তি এত্থ (দী. নি. অট্ঠ. ১.১২) পন দুৰিধা কথা ৰিনযৰসেন সল্লেখৰসেন চ. ৰিনযৰসেন তাৰ যং কিঞ্চি অন্নং অজ্জ পটিগ্গহিতং অপরজ্জু সন্নিধিকারং হোতি, তস্স পরিভোগে পাচিত্তিযং. অত্তনা লদ্ধং পন সামণেরানং দত্ৰা তেহি লদ্ধং ৰা পাপেত্ৰা দুতিযদিৰসে ভুঞ্জিতুং ৰট্টতি, সল্লেখো পন ন হোতি. পানসন্নিধিম্হিপি এসেৰ নযো. ৰত্থসন্নিধিম্হি অনধিট্ঠিতাৰিকপ্পিতং সন্নিধি চ হোতি, সল্লেখঞ্চ কোপেতি. অযং নিপ্পরিযাযকথা. পরিযাযতো পন তিচীৰরসন্তুট্ঠেন ভৰিতব্বং, চতুত্থং লভিত্ৰা অঞ্ঞস্স দাতব্বং. সচে যস্স কস্সচি দাতুং ন সক্কোতি, যস্স পন দাতুকামো হোতি, সো উদ্দেসত্থায ৰা পরিপুচ্ছত্থায ৰা গতো, আগতমত্তে দাতব্বং, অদাতুং ন ৰট্টতি. চীৰরে পন অপ্পহোন্তে, সতিযা ৰা পচ্চাসায অনুঞ্ঞাতকালং ঠপেতুং ৰট্টতি. সূচিসুত্তচীৰরকারকানং অলাভে ততোপি ৰিনযকম্মং কত্ৰা ঠপেতুং ৰট্টতি ‘‘ইমস্মিং জিণ্ণে পুন ঈদিসং কুতো লভিস্সামী’’তি পন ঠপেতুং ন ৰট্টতি, সন্নিধি চ হোতি, সল্লেখঞ্চ কোপেতি.

যানসন্নিধিম্হি যানং নাম ৰয্হং রথো সকটং সন্দমানিকা পাটঙ্কীতি. ন পনেতং পব্বজিতস্স যানং, উপাহনং পন যানং. একভিক্খুস্স হি একো অরঞ্ঞৰাসত্থায, একো ধোতপাদকত্থাযাতি উক্কংসতো দ্ৰে উপাহনসঙ্ঘাটকা ৰট্টন্তি, ততিযং লভিত্ৰা অঞ্ঞস্স দাতব্বো. ‘‘ইমস্মিং জিণ্ণে অঞ্ঞং কুতো লভিস্সামী’’তি ঠপেতুং ন ৰট্টতি, সন্নিধি চ হোতি, সল্লেখঞ্চ কোপেতি. সযনসন্নিধিম্হি সযনন্তি মঞ্চো. একস্স ভিক্খুনো একো সযনগব্ভে, একো দিৰাট্ঠানেতি উক্কংসতো দ্ৰে মঞ্চা ৰট্টন্তি. ততো উত্তরিং লভিত্ৰা অঞ্ঞস্স ভিক্খুনো, গণস্স ৰা দাতব্বো, অদাতুং ন ৰট্টতি, সন্নিধি চেৰ হোতি, সল্লেখো চ কুপ্পতি. গন্ধসন্নিধিম্হি ভিক্খুনো কণ্ডুকচ্ছুছৰিদোসাদিআবাধে সতি গন্ধা ৰট্টন্তি. গন্ধত্থিকেন গন্ধঞ্চ আহরাপেত্ৰা তস্মিং রোগে ৰূপসন্তে অঞ্ঞেসং ৰা আবাধিকানং দাতব্বং, দ্ৰারে পঞ্চঙ্গুলিঘরধূপনাদীসু ৰা উপনেতব্বং. ‘‘পুন রোগে সতি ভৰিস্সতী’’তি ঠপেতুং ন ৰট্টতি, গন্ধসন্নিধি চ হোতি, সল্লেখঞ্চ কোপেতি.

আমিসন্তি ৰুত্তাৰসেসং দট্ঠব্বং. সেয্যথিদং – ইধেকচ্চো ভিক্খু ‘‘তথারূপে কালে উপকারায ভৰিস্সন্তী’’তি তিলতণ্ডুলমুগ্গমাসনাল়িকেরলোণমচ্ছসপ্পিতেলকুলালভাজনাদীনি আহরাপেত্ৰা ঠপেতি. সো ৰস্সকালে কালস্সেৰ সামণেরেহি যাগুং পচাপেত্ৰা পরিভুঞ্জিত্ৰা ‘‘সামণের উদককদ্দমে দুক্খং গামং পৰিসিতুং, গচ্ছ অসুককুলং গন্ত্ৰা ময্হং ৰিহারে নিসিন্নভাৰং আরোচেহি, অসুককুলতো দধিআদীনি আহরা’’তি পেসেতি. ভিক্খূহি ‘‘কিং, ভন্তে, গামং পৰিসিস্সামা’’তি ৰুত্তেপি ‘‘দুপ্পৰেসো, আৰুসো, ইদানি গামো’’তি ৰদতি. তে ‘‘হোতু, ভন্তে, অচ্ছথ তুম্হে, মযং ভিক্খং পরিযেসিত্ৰা আহরিস্সামা’’তি গচ্ছন্তি. অথ সামণেরো দধিআদীনি আহরিত্ৰা ভত্তঞ্চ ব্যঞ্জনঞ্চ সম্পাদেত্ৰা উপনেতি, তং ভুঞ্জন্তস্সেৰ উপট্ঠাকা ভত্তং পহিণন্তি, ততোপি মনাপমনাপং ভুঞ্জতি. অথ ভিক্খূ পিণ্ডপাতং গহেত্ৰা আগচ্ছন্তি, ততোপি মনাপমনাপং ভুঞ্জতিযেৰ. এৰং চতুমাসম্পি ৰীতিনামেতি. অযং ৰুচ্চতি ভিক্খু মুণ্ডকুটুম্বিকজীৰিকং জীৰতি, ন সমণজীৰিকন্তি. এৰরূপো আমিসসন্নিধি নাম হোতি. ভিক্খুনো পন ৰসনট্ঠানে একা তণ্ডুলনাল়ি একো গুল়পিণ্ডো কুডুৰমত্তং সপ্পীতি এত্তকং নিধেতুং ৰট্টতি অকালে সম্পত্তচোরানং অত্থায. তে হি এত্তকং আমিসপটিসন্থারং অলভন্তা জীৰিতা ৰোরোপেয্যুং, তস্মা সচে হি এত্তকং নত্থি, আহরাপেত্ৰাপি ঠপেতুং ৰট্টতি. অফাসুককালে চ যদেত্থ কপ্পিযং, তং অত্তনাপি পরিভুঞ্জিতুং ৰট্টতি. কপ্পিযকুটিযং পন বহুং ঠপেন্তস্সপি সন্নিধি নাম নত্থি.

চতুত্থঅনাগতভযসুত্তৰণ্ণনা নিট্ঠিতা.

যোধাজীৰৰগ্গৰণ্ণনা নিট্ঠিতা.