(৯) ৪. থেরৰগ্গো

১-২. রজনীযসুত্তাদিৰণ্ণনা

৮১-৮২. চতুত্থস্স পঠমং সুৰিঞ্ঞেয্যমেৰ. দুতিযে গুণমক্খনায পৰত্তোপি অত্তনো কারকং গূথেন পহরন্তং গূথো ৰিয পঠমতরং মক্খেতীতি মক্খো, সো এতস্স অত্থীতি মক্খী. পল়াসতীতি পল়াসো, পরস্স গুণে ডংসিত্ৰা ৰিয অপনেতীতি অত্থো. সো এতস্স অত্থীতি পল়াসী. পল়াসী পুগ্গলো হি দুতিযস্স ধুরং ন দেতি, সম্পসারেত্ৰা তিট্ঠতি. তেনাহ ‘‘যুগগ্গাহলক্খণেন পল়াসেন সমন্নাগতো’’তি.

রজনীযসুত্তাদিৰণ্ণনা নিট্ঠিতা.

৩. কুহকসুত্তৰণ্ণনা

৮৩. ততিযে তীহি কুহনৰত্থূহীতি সামন্তজপ্পনইরিযাপথসন্নিস্সিতপচ্চযপ্পটিসেৰনভেদতো তিপ্পভেদেহি কুহনৰত্থূহি. তিৰিধেন কুহনৰত্থুনা লোকং কুহযতি ৰিম্হাপযতি ‘‘অহো অচ্ছরিযপুরিসো’’তি অত্তনি পরেসং ৰিম্হযং উপ্পাদেতীতি কুহকো. লাভসক্কারত্থিকো হুত্ৰা লপতি অত্তানং দাযকং ৰা উক্খিপিত্ৰা যথা সো কিঞ্চি দদাতি, এৰং উক্কাচেত্ৰা কথেতীতি লপকো. নিমিত্তং সীলং তস্সাতি নেমিত্তিকো, নিমিত্তেন ৰা চরতি, নিমিত্তং ৰা করোতীতি নেমিত্তিকো. নিমিত্তন্তি চ পরেসং পচ্চযদানসঞ্ঞুপ্পাদকং কাযৰচীকম্মং ৰুচ্চতি. নিপ্পেসো সীলমস্সাতি নিপ্পেসিকো. নিপ্পিসতীতি ৰা নিপ্পেসো, নিপ্পেসোযেৰ নিপ্পেসিকো. নিপ্পেসোতি চ সঠপুরিসো ৰিয লাভসক্কারত্থং অক্কোসনুপ্পণ্ডনপরপিট্ঠিমংসিকতাদি.

কুহকসুত্তৰণ্ণনা নিট্ঠিতা.

৬-৭. পটিসম্ভিদাপ্পত্তসুত্তাদিৰণ্ণনা

৮৬-৮৭. ছট্ঠে পটিসম্ভিদাসু যং ৰত্তব্বং, তং হেট্ঠা ৰুত্তমেৰ. উচ্চাৰচানীতি উচ্চনীচানি. তেনাহ ‘‘মহন্তখুদ্দকানী’’তি. কিংকরণীযানীতি ‘‘কিং করোমী’’তি এৰং ৰত্ৰা কত্তব্বকম্মানি. তত্থ উচ্চকম্মানি নাম চীৰরস্স করণং, রজনং, চেতিযে সুধাকম্মং, উপোসথাগারচেতিযঘরবোধিঘরেসু কত্তব্বকম্মন্তি এৰমাদি. অৰচকম্মং নাম পাদধোৰনমক্খনাদি খুদ্দককম্মং. তত্রুপাযাসাতি তত্রুপগমনিযা, তত্র তত্র মহন্তে খুদ্দকে চ কম্মে সাধনৰসেন উপগচ্ছন্তিযাতি অত্থো. তস্স তস্স কম্মস্স নিপ্ফাদনে সমত্থাযাতি ৰুত্তং হোতি. তত্রুপাযাযাতি ৰা তত্র তত্র কম্মে সাধেতব্বে উপাযভূতায. অলং কাতুন্তি কাতুং সমত্থো হোতি. অলং সংৰিধাতুন্তি ৰিচারেতুং সমত্থো. সত্তমং উত্তানমেৰ.

পটিসম্ভিদাপ্পত্তসুত্তাদিৰণ্ণনা নিট্ঠিতা.

৮. থেরসুত্তৰণ্ণনা

৮৮. অট্ঠমে থিরভাৰপ্পত্তোতি সাসনে থিরভাৰং অনিৰত্তিভাৰং পত্থো. পব্বজিতো হুত্ৰা বহূ রত্তিযো জানাতীতি রত্তঞ্ঞূ. তেনাহ ‘‘পব্বজিতদিৰসতো পট্ঠাযা’’তিআদি. পাকটোতি অযথাভূতগুণেহি চেৰ যথাভূতগুণেহি চ সমুগ্গতো. যসো এতস্স অত্থীতি যসস্সী, যসং সিতো নিস্সিতো ৰা যসস্সী. তেনাহ ‘‘যসনিস্সিতো’’তি. অসতং অসাধূনং ধম্মা অসদ্ধম্মা, অসন্তা ৰা অসুন্দরা গারয্হা লামকা ধম্মাতি অসদ্ধম্মা. ৰিপরিযাযেন সদ্ধম্মা ৰেদিতব্বা.

থেরসুত্তৰণ্ণনা নিট্ঠিতা.

৯. পঠমসেখসুত্তৰণ্ণনা

৮৯. নৰমে আরমিতব্বট্ঠেন কম্মং আরামো এতস্সাতি কম্মারামো, তস্স ভাৰো কম্মারামতা. তত্থ কম্মন্তি ইতিকত্তব্বং কম্মং ৰুচ্চতি. সেয্যথিদং – চীৰরৰিচারণং চীৰরকম্মকরণং উপত্থম্ভনং পত্তত্থৰিকঅংসবদ্ধককাযবন্ধনধম্মকরণআধারকপাদকথলিকসম্মজ্জনিআদীনং করণন্তি. একচ্চো হি এতানি করোন্তো সকলদিৰসং এতানেৰ করোতি, তং সন্ধাযেস পটিক্খেপো. যো পন এতেসং করণৰেলাযমেৰ তানি করোতি, উদ্দেসৰেলায উদ্দেসং গণ্হাতি, সজ্ঝাযৰেলায সজ্ঝাযতি, চেতিযঙ্গণৰত্তৰেলায চেতিযঙ্গণৰত্তং করোতি, মনসিকারৰেলায মনসিকারং করোতি, ন সো কম্মারামো নাম. ভস্সারামতাতি এত্থ যো ইত্থিৰণ্ণপুরিসৰণ্ণাদিৰসেন আলাপসল্লাপং করোন্তোযেৰ দিৰসঞ্চ রত্তিঞ্চ ৰীতিনামেতি, এৰরূপো ভস্সে পরিযন্তকারী ন হোতি, অযং ভস্সারামো নাম. যো পন রত্তিম্পি দিৰসম্পি ধম্মং কথেতি, পঞ্হং ৰিস্সজ্জেতি, অযং অপ্পভস্সো ভস্সে পরিযন্তকারীযেৰ. কস্মা? ‘‘সন্নিপতিতানং ৰো, ভিক্খৰে, দ্ৰযং করণীযং ধম্মী ৰা কথা, অরিযো ৰা তুণ্হীভাৰো’’তি (ম. নি. ১.২৭৩; উদা. ১২, ২৮, ২৯) ৰুত্তত্তা.

নিদ্দারামতাতি এত্থ যো গচ্ছন্তোপি নিসিন্নোপি নিপন্নোপি থিনমিদ্ধাভিভূতো নিদ্দাযতিযেৰ, অযং নিদ্দারামো নাম. যস্স পন করজকাযে গেলঞ্ঞেন চিত্তং ভৰঙ্গে ওতরতি, নাযং নিদ্দারামো. তেনেৰাহ – ‘‘অভিজানামি খো পনাহং, অগ্গিৰেস্সন, গিম্হানং পচ্ছিমে মাসে পচ্ছাভত্তং পিণ্ডপাতপ্পটিক্কন্তো চতুগ্গুণং সঙ্ঘাটিং পঞ্ঞাপেত্ৰা দক্খিণেন পস্সেন সতো সম্পজানো নিদ্দং ওক্কমিতা’’তি (ম. নি. ১.৩৮৭). সঙ্গণিকারামতাতি এত্থ যো একস্স দুতিযো, দ্ৰিন্নং ততিযো, তিণ্ণং চতুত্থোতি এৰং সংসট্ঠোৰ ৰিহরতি, এককো অস্সাদং ন লভতি, অযং সঙ্গণিকারামো. যো পন চতূসু ইরিযাপথেসু এককোৰ অস্সাদং লভতি, নাযং সঙ্গণিকারামো ৰেদিতব্বো. সেখানং পটিলদ্ধগুণস্স পরিহানাসম্ভৰতো ‘‘উপরিগুণেহী’’তিআদি ৰুত্তং.

পঠমসেখসুত্তৰণ্ণনা নিট্ঠিতা.

১০. দুতিযসেখসুত্তৰণ্ণনা

৯০. দসমে অতিপাতোৰাতি সব্বরত্তিং নিদ্দাযিত্ৰা বলৰপচ্চূসে কোটিসম্মুঞ্জনিযা থোকং সম্মজ্জিত্ৰা মুখং ধোৰিত্ৰা যাগুভিক্খত্থায পাতোৰ পৰিসতি. তং অতিক্কমিত্ৰাতি গিহিসংসগ্গৰসেন কালং ৰীতিনামেন্তো মজ্ঝন্হিকসমযং অতিক্কমিত্ৰা পক্কমতি. পাতোযেৰ হি গামং পৰিসিত্ৰা যাগুং আদায আসনসালং গন্ত্ৰা পিৰিত্ৰা একস্মিং ঠানে নিপন্নো নিদ্দাযিত্ৰা মনুস্সানং ভোজনৰেলায ‘‘পণীতভিক্খং লভিস্সামী’’তি উপকট্ঠে মজ্ঝন্হিকে উট্ঠায ধম্মকরণেন উদকং গহেত্ৰা অক্খীনি পুঞ্ছিত্ৰা পিণ্ডায চরিত্ৰা যাৰদত্থং ভুঞ্জিত্ৰা গিহিসংসট্ঠো কালং ৰীতিনামেত্ৰা মজ্ঝন্হে ৰীতিৰত্তে পটিক্কমতি.

অপ্পিচ্ছকথাতি, ‘‘আৰুসো, অত্রিচ্ছতা পাপিচ্ছতাতি ইমে ধম্মা পহাতব্বা’’তি তেসু আদীনৰং দস্সেত্ৰা ‘‘এৰরূপং অপ্পিচ্ছতং সমাদায ৰত্তিতব্ব’’ন্তিআদিনযপ্পৰত্তা কথা. তীহি ৰিৰেকেহীতি কাযৰিৰেকো, চিত্তৰিৰেকো, উপধিৰিৰেকোতি ইমেহি তীহি ৰিৰেকেহি. তত্থ একো গচ্ছতি, একো তিট্ঠতি, একো নিসীদতি, একো সেয্যং কপ্পেতি, একো গামং পিণ্ডায পৰিসতি, একো পটিক্কমতি, একো চঙ্কমং অধিট্ঠাতি, একো চরতি, একো ৰিহরতীতি অযং কাযৰিৰেকো নাম. অট্ঠ সমাপত্তিযো পন চিত্তৰিৰেকো নাম. নিব্বানং উপধিৰিৰেকো নাম. ৰুত্তম্পি হেতং – ‘‘কাযৰিৰেকো চ ৰিৰেকট্ঠকাযানং নেক্খম্মাভিরতানং, চিত্তৰিৰেকো চ পরিসুদ্ধচিত্তানং পরমৰোদানপ্পত্তানং, উপধিৰিৰেকো চ নিরুপধীনং পুগ্গলানং ৰিসঙ্খারগতান’’ন্তি (মহানি. ৫৭). দুৰিধং ৰীরিযন্তি কাযিকং, চেতসিকঞ্চ ৰীরিযং. সীলন্তি চতুপারিসুদ্ধিসীলং. সমাধিন্তি ৰিপস্সনাপাদকা অট্ঠ সমাপত্তিযো. ৰিমুত্তিকথাতি ৰা অরিযফলং আরব্ভ পৰত্তা কথা. সেসং উত্তানমেৰ.

দুতিযসেখসুত্তৰণ্ণনা নিট্ঠিতা.

থেরৰগ্গৰণ্ণনা নিট্ঠিতা.