(২১) ১. কিমিলৰগ্গো

১-৪. কিমিলসুত্তাদিৰণ্ণনা

২০১-৪. পঞ্চমস্স পঠমদুতিযানি উত্তানত্থানেৰ. ততিযে অধিৰাসনং খমনং, পরেসং দুক্কটং দুরুত্তঞ্চ পটিৰিরোধাকরণেন অত্তনো উপরি আরোপেত্ৰা ৰাসনং অধিৰাসনং, তদেৰ খন্তীতি অধিৰাসনক্খন্তি. সুভে রতোতি সূরতো, সুট্ঠু ৰা পাপতো ওরতো ৰিরতো সোরতো, তস্স ভাৰো সোরচ্চং. তেনাহ ‘‘সোরচ্চেনাতি সুচিসীলতাযা’’তি. সা হি সোভনকম্মরততা, সুট্ঠু ৰা পাপতো ওরতভাৰো ৰিরততা. চতুত্থে নত্থি ৰত্তব্বং.

কিমিলসুত্তাদিৰণ্ণনা নিট্ঠিতা.

৫. চেতোখিলসুত্তৰণ্ণনা

২০৫. পঞ্চমে চেতোখিলা নাম অত্থতো ৰিচিকিচ্ছা কোধো চ. তে পন যস্মিং সন্তানে উপ্পজ্জন্তি, তস্স খরভাৰো কক্খল়ভাৰো হুত্ৰা উপতিট্ঠন্তি, পগেৰ অত্তনা সম্পযুত্তচিত্তস্সাতি আহ ‘‘চিত্তস্স থদ্ধভাৰা’’তি. যথা লক্খণপারিপূরিযা গহিতায সব্বা সত্থু রূপকাযসিরী গহিতা এৰ নাম হোতি এৰং সব্বঞ্ঞুতায সব্বধম্মকাযসিরী গহিতা এৰ নাম হোতীতি তদুভযৰত্থুকমেৰ কঙ্খং দস্সেন্তো ‘‘সরীরে কঙ্খমানো’’তিআদিমাহ. ৰিচিনন্তোতি ধম্মসভাৰং ৰীমংসন্তো. কিচ্ছতীতি কিলমতি. ৰিনিচ্ছেতুং ন সক্কোতীতি সন্নিট্ঠাতুং ন সক্কোতি. আতপতি কিলেসেতি আতপ্পং, সম্মাৰাযামোতি আহ ‘‘আতপ্পাযাতি কিলেসসন্তাপনৰীরিযকরণত্থাযা’’তি. পুনপ্পুনং যোগাযাতি ভাৰনং পুনপ্পুনং যুঞ্জনায. সততকিরিযাযাতি ভাৰনায নিরন্তরপ্পযোগায.

পটিৰেধধম্মে কঙ্খমানোতি এত্থ কথং লোকুত্তরধম্মে কঙ্খা পৰত্তীতি? ন আরম্মণকরণৰসেন, অনুস্সুতাকারপরিৰিতক্কলদ্ধে পরিকপ্পিতরূপে কঙ্খা পৰত্ততীতি দস্সেন্তো আহ ‘‘ৰিপস্সনা…পে… ৰদন্তি, তং অত্থি নু খো নত্থীতি কঙ্খতী’’তি. সিক্খাতি চেত্থ পুব্বভাগসিক্খা ৰেদিতব্বা. কামঞ্চেত্থ ৰিসেসুপ্পত্তিযা মহাসাৰজ্জতায চেৰ সংৰাসনিমিত্তং ঘটনাহেতু অভিণ্হুপ্পত্তিকতায চ সব্রহ্মচারীসূতি কোপস্স ৰিসযো ৰিসেসেত্ৰা ৰুত্তো, অঞ্ঞত্থাপি কোপো ন চেতোখিলোতি ন সক্কা ৰিঞ্ঞাতুন্তি কেচি. যদি এৰং ৰিচিকিচ্ছাযপি অযং নযো আপজ্জতি, তস্মা যথারুতৰসেন গহেতব্বং.

চেতোখিলসুত্তৰণ্ণনা নিট্ঠিতা.

৬-৮. ৰিনিবন্ধসুত্তাদিৰণ্ণনা

২০৬-৮. ছট্ঠে পৰত্তিতুং অপ্পদানৰসেন কুসলচিত্তং ৰিনিবন্ধন্তীতি চেতসোৰিনিবন্ধা. তং পন ৰিনিবন্ধন্তা মুট্ঠিগ্গাহং গণ্হন্তা ৰিয হোন্তীতি আহ ‘‘চিত্তং ৰিনিবন্ধিত্ৰা’’তিআদি. কামগিদ্ধো পুগ্গলো ৰত্থুকামেপি কিলেসকামেপি অস্সাদেতি অভিনন্দতীতি ৰুত্তং ‘‘ৰত্থুকামেপি কিলেসকামেপী’’তি. অত্তনো কাযেতি অত্তনো নামকাযে, অত্তভাৰে ৰা. বহিদ্ধারূপেতি পরেসং কাযে অনিন্দ্রিযবদ্ধরূপে চ. উদরং অৰদিহতি উপচিনোতি পূরেতীতি উদরাৰদেহকং. সেয্যসুখন্তি সেয্যায সযনৰসেন উপ্পজ্জনকসুখং. সম্পরিৰত্তকন্তি সম্পরিৰত্তিত্ৰা. পণিধাযাতি তণ্হাৰসেনেৰ পণিদহিত্ৰা. ইতি পঞ্চৰিধোপি লোভৰিসেসো এৰ ‘‘চেতোৰিনিবন্ধো’’তি ৰুত্তোতি ৰেদিতব্বো. সত্তমট্ঠমেসু নত্থি ৰত্তব্বং.

ৰিনিবন্ধসুত্তাদিৰণ্ণনা নিট্ঠিতা.

৯-১০. গীতস্সরসুত্তাদিৰণ্ণনা

২০৯-২১০. নৰমে আযতকো নাম গীতস্সরো তং তং ৰত্তং ভিন্দিত্ৰা অক্খরানি ৰিনাসেত্ৰা পৰত্তোতি আহ ‘‘আযতকেনা’’তিআদি. ধম্মেহি সুত্তৰত্তং নাম অত্থি, গাথাৰত্তং নাম অত্থি, তং ৰিনাসেত্ৰা অতিদীঘং কাতুং ন ৰট্টতি. ধম্মঞ্হি ভাসন্তেন চতুরস্সেন ৰত্তেন পরিমণ্ডলানি পদব্যঞ্জনানি দস্সেতব্বানি. ‘‘অনুজানামি, ভিক্খৰে, সরভঞ্ঞ’’ন্তি (চূল়ৰ. ২৪৯) চ ৰচনতো সরেন ধম্মং ভণিতুং ৰট্টতি. সরভঞ্ঞে কির তরঙ্গৰত্তধোতকৰত্তভাগগ্গহকৰত্তাদীনি দ্ৰত্তিংস ৰত্তানি অত্থি. তেসু যং ইচ্ছতি, তং কাতুং লভতীতি. দসমে নত্থি ৰত্তব্বং.

গীতস্সরসুত্তাদিৰণ্ণনা নিট্ঠিতা.

কিমিলৰগ্গৰণ্ণনা নিট্ঠিতা.